අර කතා මේ කතා සංගීත කතා පොර කතා රස කතා තියෙන වයලගේ කාමරේ — තාම හදාගෙන යනවා බං —

ජෛවීය විද්‍යාවේ ඉගැන්වෙන විදියට යම් විශේෂයක අකණ්ඩ පැවැත්ම තහවුරු වෙන්න නම් ඒ ජීව විශේෂය අනිවාර්යයෙන්ම තමන්ගේ ජාන පරම්පරාව ඉදිරියට පවත...

ඉසිවර නුවණින් පුරෝකථනය කිරීම ( විවාහ පරීක්ෂාව )






ජෛවීය විද්‍යාවේ ඉගැන්වෙන විදියට යම් විශේෂයක අකණ්ඩ පැවැත්ම තහවුරු වෙන්න නම් ඒ ජීව විශේෂය අනිවාර්යයෙන්ම තමන්ගේ ජාන පරම්පරාව ඉදිරියට පවත්වාගෙන යන්න අවශ්‍ය වෙනවා . ඒ අරමුණ ඉටුවෙන්නේ ප්‍රජනනය කියන මූලික ජෛවීය ක්‍රියාව මත . මට මතක් වෙනවා දවසක් කැම්පස් එකේ සර් කෙනෙක් ලෙක්චර් එකකදී අපෙන් අහපු ප්‍රශ්නයක් . සර් ඇහුවා

“ ළමයි , ඇයි අපි ජීවත් වෙන්නේ ?  “ කියලා .

ඒ වෙලාවේ ළමයි උත්තර දුන්නේ නැතුව ටිකක් වෙලා ඉඳලා කීප දෙනෙක් එක එක උත්තර දුන්නත් අවසානයේ සර්ගේ උත්තරය වුණේ
“ ඔය මොනවත් නෙවෙයි ළමයි , අපි ජීවත් වෙන්නේ ප්‍රජනනය කරන්න “ කියලා .

අපි ඒ වෙලාවේ ඇහෙන්න හිනා වුණේ නැතත් හිතෙන් හිනා වුණා මේ මොන විකාරයක්ද කියලා හිතලා  . අවසානයේ මානව පරිණාමය කියන ඉතාම සරළ මට්ටමේ ඉඳලා සංකීර්ණ මට්ටම් දක්වා ඒ දේවල් අධ්‍යනය කරනකොට සහ ඉගැන්වීම් වලට කන් දෙනකොට තේරුණා මේ මොන දේ කරත් අවසානයේ අපි හැමදේම වගේ සැලසුම් කරන්නේ නව ජීවී පරපුරක් ඇති කරලා ඒ අය පෝෂණය කරලා අපි නැතිවෙලා යනකොට අපේ මූලික සැකසුම ඉදිරියට පවත්වන්න පුළුවන් තත්වයක් ඇතිකරන්න නේද කියලා .

විද්‍යාත්මකව මේ දේ මේ විදියට විස්තර වුණත් සාමාජීය වශයෙන් සහ සංස්කෘතික වශයෙන් ප්‍රජනනය කියන මාතෘකාව ගැන වැඩි වශයෙන් කතා වෙන්නේ ඒකෙ මූලික පියවර විදියට සලකන දෙදෙනෙක් විවාහයට පත්වීම කියන කඩතුරාවෙන් මෙපිට ඉඳගෙන . ප්‍රජනනය කියන දේ කෙලින්ම කියන්නේ නැතුව විවාහය කියන මාතෘකාව අනුව තමයි මේ ක්‍රියාවලිය විස්තර කෙරෙන්නේ .

ශිෂ්ඨ සම්පන්න ජීවින් කොට්ඨාසයක් වෙන්න කලින් විවාහයක් වෙනුවෙන් ගැළපීමක් කෙරුනේ නැහැ . ඒත් කාලෙන් කාලෙට සංස්කෘතික වශයෙන් සිදුවුණ යම් යම් වෙනස්වීම් සම්බන්ධ කරගෙන විවාහ වීම කියන අංගයෙන් එක්වෙන ස්ත්‍රීය සහ පුර්ෂයා එකිනෙකා අන්‍යෝන්‍ය වශයෙන් ගැළපෙනවද නැද්ද කියලා පරීක්ෂා කරන්න විවිධ ක්‍රම ශිල්ප ඇතිවුණා .

තවමත් යම් යම් ගෝත්‍රික සමාජවල සිටින අය පිරිමින්ට විශාල ලිංගයක් පැවතීම , විශාල උදරයක් පැවතීම , ස්ත්‍රීන්ට සිහින් දිගටි ගෙල ප්‍රදේශයක් පැවතීම , දිග කොණ්ඩයක් පැවතීම වගේ ලක්ෂණ පදනම් කරගෙන විවාහ වීමට ඇති ගැළපීම පරීක්ෂා කෙරෙනවා . ජ්‍යෝතිෂ විද්‍යාව කියන්නෙත් ඉතාමත් දියුණු ඉගැන්වීම් ක්‍රම ශිල්පයක් තමයි මේ විවාහය කියන දේ සිදු කිරීමට ගැළපෙනවාද නැත්ද කියන දේ තීරණය කරන්න .





සෘෂිවරයෙක් කියන්නේ භෞතික ඉන්ද්‍රීයයන්ට හසු නොවෙන අතීන්ද්‍රිය ඥානයන් දියුණු කරවපු භෞතික කයෙන් මනස කියන දේ වෙන් කරවලා ඒ ආශ්‍රයෙන් පර්යේෂණ පවත්වලා විශ්වයේ යම් යම් සැඟවුණු විද්‍යාවන් ඉගැන්වීම් වගේ දේවල් , තමා විසින්ම අවබෝධ කරගත් මහා ධ්‍යාන ලාභීන්ට .

ජ්‍යෝතිෂ විද්‍යාව පැවත එන්නෙත් මේ කියන සෘෂිවරුන්ගේ ඉගැන්වීම් පදනම් කරගෙන . ඒවගේ සෘෂි වරුන් තමන්ගේ අතීන්ද්‍රිය ඥානයෙන් මේ විද්‍යාවන් බිහිකරා වගේම තමන්ගේ අත්දැකීම් සහ පර්යේෂණ මත පදනම් වෙලා පුරාණ ආචාර්ය වරුන් විසින් සෘෂිවරුන් බිහි කරපු ඒ ජ්‍යෝතිෂ විද්‍යාව ඔපවත් කරා . පාරාශරය , වරහාමිහිරය , වගේ පොත්පත්වල සඳහන් වෙලා තියෙන මේ සියළු ඉගැන්වීම් සහ න්‍යායාත්මක පර්යේෂණාත්මක දැනුම පාවිච්චි කරලා තමයි ජ්‍යෝතිෂ විද්‍යාව හරහා දෙදෙනෙක් විවාහ වෙන්න සුදුසුද නැත්ද කියලා ගැළපීම සහ නොගැළපීම තීරණය කරන්නේ .

අද වෙනකොට විවාහයක් කිරීමේදී සිංහල බෞද්ධ අය වගේම තමයි වෙනත් ආගම් අදහන අය පවා මේ විවාහ ගැළපීම තියෙනවද නැත්ද කියලා පරීක්ෂා කරවන්න පෙළඹිලා තියෙනවා . ඒ නිසා මේ ලිපියේ දීර්ඝ පූර්විකාවක් ඇතුව සටහන් කරගෙන ආවේ විවාහ පරීක්ෂාව කියන ජ්‍යෝතිෂ කටයුත්ත ගැන යම් දළ අදහසක් ලබා දෙන්න කියලා හිතාගෙන . සමහර අවස්ථා වලදී සමහරු , දෙන්නෙක්ගේ කේන්දර දීලා පොරොන්දම් ගැළපෙනවද කියලා බලන්න ඕන කියලා කියනවා .

ඒත් විවාහ පරීක්ෂාවේ එක් ලාබාල අවස්ථාවක් විතරයි මේ පොරොන්දම් ගැළපෙනවද නැද්ද කියලා කියන්නේ . විවාහ පරීක්ෂාවකදී වැදගත් වෙන්නේ පොරොන්දම් පරීක්ෂාව නෙවෙයි ඇත්තටම . විශේෂයෙන්ම වැදගත් වෙන්නේ කේන්ද්‍ර සටහන්වල ග්‍රහ පිහිටීම් වල තියෙන ගැළපීම සහ නොගැලපීම පරීක්ෂා කිරීම . ඉතාම සරළ අවස්ථාවේ ඉඳලා සංකීර්ණ අවස්ථා දක්වා  මේ කේන්දර පරීක්ෂාව පැතිරිලා යනවා . සමහර වෙලාවල් වලදී පොරොන්දම් 80 %  දක්වා ගැළපෙන දෙන්නෙක් වුණත් දික්කසාද වෙනකොට කියනවා ඔය දෙන්නාගේ පොරොන්දම් ගැලපුනා , එත් වෙන් වුණානේ . තවම මෙයාලට දරුවෝ නැහැනේ කියලා . එහෙම වෙන්නේ ඒ කේන්දර ගැලපීම නොකළ නිසා වෙන්න පුළුවන් . එහෙම දේවල් කලින් දැනගත්තා නම් ප්‍රතිකාර වලින් යම් සුවයක් ලබන්නත් සමහර විට වාසනාව තිබුණා වෙන්න පුළුවන් .

ඒ නිසා ජ්‍යෝතිෂවේදියෙකුගේ පරම යුතුකම වෙන්නේ පොරොන්දම් පරීක්ෂා කරලා දෙන්න කියලා කේන්දර දෙකක් තමන්ට දුන්නත් කේන්දර සටහන් ගැළපෙනවාද කියලාත් පරීක්ෂා කිරීම . ග්‍රහ පොරොන්දම කියන පොරොන්දමේ දී කේන්දර වල ග්‍රහ පිහිටීම් යම් තරමකට යම් සම්මත ගණිත ක්‍රමයක් යටතේ පරීක්ෂා කරලා බැලුවත් කේන්දර ගැළපීම කියන දේ වෙනමම කරන්න ඕන දෙයක් . ඒකෙදී ගොඩක් වෙලාවට ජීවිතය ගැන අදාළ හැමදේම වගේ ඇතුලත් වීමක් වෙනවා .





මුලින්ම අපි බලමු පොරොන්දම් කියන්නේ මොනවද කියලා . පොරොන්දම් 20 ක් තියෙනවා .

නැකැත් පොරොන්දම
වෘක්‍ෂ පොරොන්දම
ගණ පොරොන්දම
ආයුෂ පොරොන්දම
මහේන්ද්‍ර පොරොන්දම
පක්‍ෂි පොරොන්දම
ස්ත‍්‍රී දීර්ඝ පාරොන්දම
භූත පොරොන්දම
යෝනි පොරොන්දම
ගෝත‍්‍ර පොරොන්දම
රාශි පොරොන්දම
වර්ණ පොරොන්දම
රාශ්‍යාධිපති පොරොන්දම
ලිංග පොරොන්දම
වශ්‍ය පොරොන්දම
නාඩි පොරොන්දම
රජ්ජු පොරොන්දම
දින පොරොන්දම
වේධ පොරොන්දම
ග‍්‍රහ පොරොන්දම

මේවා තමයි ඒ පොරොන්දම් 20 . මේ පොරොන්දම් වලින් මොනවාද කියවෙන්නේ සහ ඒවා ගැළපෙන්නේ කොහොමද නොගැළපෙන්නේ කොහොමද කියලා අපි දැන් බලමු .

නැකැත් පොරොන්දම
==============
නැකත් පොරොන්දමෙන් කරන්නේ දෙන්නෙක් ඉපදුනු නැකත අනුව ගැලපෙනවද කියලා බලන එක . මේ ගැලපීමෙන් දෙන්නගේ ධනය බලය සැප හා සාමය කියන කාරනා මුදුන් පත් වෙනවා . අස්විද බෙරණ කැති රෙහෙන මුවසිරස ........කියලා නැකත් 27ක් තියෙනවා . මේ නැකත් 27න් ජන්ම, සම්පත්, විපත්, ක්‍ෂේම, ප‍්‍රත්‍යාරි, සාධක, වධ, මෛත‍්‍රී, පරමමෛත‍්‍රී කියන නම් අනුව නැකත් වෙන්කර ගණන් කරන ක්‍රමයක් තියෙනවා . ඒ අනුව නැකත් කොහොමද කියලා බලන සංකීර්ණ ක්‍රම ශිල්පයක් තියෙනවා ජ්‍යෝතිෂ විද්‍යාවේ . ඒ අනුව මේ නැකත් ගැළපීම කරනවා . එහෙම ගැළපෙන්නේ නැත්නම් ඒ දෝෂය භංග වෙනවද කියලාත් බලන්න ඉගැන්වීම් තියෙනවා .
ගණ පොරොන්දම
============
දෙදෙනෙක්ගේ රුධිරය , ධන සම්පත්තිය සහ ජීවන පැවැත්ම ගැලපෙනවද කියලා බලන පොරොන්දම තමයි ගණ පොරොන්දමෙන් කරන්නේ . ජෝතිශ්‍යයේ ගණ තුනක් සඳහන් වෙනවා . ඒ තමා දේව , රාක්ෂ ,  මනුෂ්‍ය කියන ගණ තුන . මෙයින් ගැලපෙනවාද බලන්නේ . මේ ගණ පොරොන්දමේ දෝෂය දෙන්නගේ උපන් ලග්නාධිපති දෙන්නගේ ගැලපීමෙන් ඒ කියන්නේ ඒ ග්‍රහයන් දෙදෙනාගේ මිත්‍රත්වයෙන් නැතිවෙලා භංග වෙනවා . ගණ ගැළපෙන්නේ නැතුව වෙන විවාහ වලදී දෙන්නා අතරේ ආරවුල් තත්ත්ව ඇතිවෙන්න පුළුවන් යම් සම්භාවිතාවයක් තියෙනවා කියලා කියන්න පුළුවන් . ඒත් ඒක පරීක්ෂා කරලා බලලා තමයි හරියටම කියන්න ඕන .

මහේන්ද්‍ර පොරොන්දම
===============
මහේන්ද්‍ර පොරොන්දමෙන් ආයුෂ සහ දරු සම්පත්තිය ගැන ගැලපීමට ලක් කරනවා . උපන් නැකත්වල ඉඳලා නැකත් චක්‍රයේ ගණන් කරන ක්‍රමයක් අනුව ඒ ඒ ස්ථානවල ඉන්නේ කීවෙනි නැකතද කියලා පරීක්ෂා කරලා බලලා තමයි මේ මහේන්ද්‍ර පොරොන්දම ගැළපීම කරන්නේ .

ස්ත්‍රී දීර්ඝ පොරොන්දම
==============
දෙන්නෙක් විවාහ වෙලා දෙන්නා එකට ජීවත් වෙනකොට දෙන්නට දෙන්නා තම තමන්ගේ ලිංගික ආශාවල් ගැන යම්කිසි අවබෝධයක් ලබාගන්න මේ පොරොන්දම ගැලපීම වඩාත් දායක වෙනවා . කාන්තාවගේ උපන් නැකතේ ඉඳලා 13කින් එහාට පිරිමියාගේ නැකත පිහිටලා තියෙනවනම් ඒක ශුභයි කියලා ගණන් ගන්නවා . පලවෙනි 9 අතරේනම් තියෙන්නේ දෙන්නා අතරේ ගොඩක් ආරවුල් ඇතිවෙනවා කියලා කියන්න පුළුවන් .

යෝනි පොරොන්දම
==============
යෝනි පොරොන්දමෙන් දෙන්නගේ ලිංගික වෙනස සංකේතවත් කරනවා . එකම සත්වයෙක්ට අයිති පුර්ෂ යෝනිය පුර්ශයාටත් ස්ත්‍රී යෝනිය ස්ත්‍රියටත් පිහිටලා තියෙනවනම් ඒක හොඳ ගැලපීමක් වෙනවා .
ඇත් යෝනියට සිංහ (හෝ මිනිස් හෝ කිඳුරු) යෝනිය ද,
අශ්ව යෝනියට ගොන්, මීගොන් යෝනිය ද
ගොන්, මී ගොන්, එළු, මුව, බලූ යන යොනිවලට ව්‍යාඝ‍්‍ර යෝනිය ද
වඳුරු යෝනියට එළු, බලූ යෝනි දෙක ද
මුෂික යෝනියට බළල් සප_ යෝනි දෙක ද
සප_ යෝනියට මුගටි එළු යෝනි දෙක ද
බළල් යෝනියට බලූ, ව්‍යාඝ‍්‍ර යෝනි දෙක ද සතුරු වෙයි .

මුව යෝනියට ගව යෝනිය ද
එළු යෝනියට අශ්ව යෝනිය ද
බලූ යෝනියට මිනිස් යෝනිය ද මිත‍්‍ර වේ. ශුභ වේ.
වෙනත් විදියකට යෝනි සිටිනවම් මධ්‍යමයි
සියළු යෝනිවලටම වඳුරු යෝනිය මිත‍්‍ර වෙනවා කියලා පිළිගැනීමකුත් තියෙනවා . ලිංගික තෘප්තිය සම්බන්ධව යම් අදහසක් ගන්න මේ යෝනි පොරොන්දම අදාළ කරගන්න පුළුවන් . ඒත් පෙරදිග කාම විද්‍යාවේ ඉගැන්වෙන ස්ත්‍රී වර්ග සහ පුර්ෂ වර්ග අතර විවාහය ගැළපීමත් මේ ලිංගික තෘප්තිය සම්බන්ධ ප්‍රශ්න වලට හොඳ විසඳුමක් ලබා දෙන්න පුළුවන් වෙනවා .

රාශි පොරොන්දම
============
වැදගත්ම පොරොන්දමක් විදියට මේ රාශි පොරොන්දම හඳුන්වන්න පුළුවන් . දෙදෙනෙක්ගේ බාහිර සිතුම් පැතුම් රුචි අරුචිකම් ගැලපීම මෙයින් සිද්ද වෙනවා . රාශි චක්‍රයේ රාශි තියෙන්නේ 12 යි වුණාට එක එක ක්‍රම වලට රාශි බෙදා වෙන් කරනවා . රාශි පොරොන්දම ගළපනකොට ඒ රාශි දෙකයි ඒ රාශි වලට අධිපති ග්‍රහයෝයි ගැලපෙන්න ඕන . නැත්නම් මිත්‍ර වෙන්න ඕන . නැත්නම් දෙන්නම එකම රාශියේ වෙන්න ඕන .

රාශ්‍යාධිපති පොරොන්දම
=================
මේ රාශ්‍යාධිපති පොරොන්දමෙන් දෙදෙනක්ගේ අභ්‍යන්තර රුචි අරුචිකම් ගැන කියවෙනවා . ඒ කියන්නේ මානසික ආශාවන් වගේ දේවල් . රාශියකට අධිපති වෙන , ඒ කියන්නේ රාශිය අයිති ග්‍රහයෙක් ඉන්නවා . උදාහරණයක් වශයෙන් මේෂ රාශිය අඟහරුගේ , සිංහ රාශිය රවිගේ කියලා අධිපති කම් වෙන් කරනවා . මේ වගේ ඒ ඒ රාශිවල අධිපති ග්‍රහයින්ගේ ගැළපීම තමයි මේ පොරොන්දමෙන් ගළපන්නේ .

වශ්‍ය පොරොන්දම
==============
විවාහවෙන දෙන්නගේ සමගියට හරස්වෙන හේතු ගැන හොයාගන්න මේ පොරොන්දම දායක වෙනවා . ඒ කරදර මගඇර ගන්න මේ පොරොන්දම ගැලපීම කරනවා .

රජ්ජු පොරොන්දම
=============
විවාහ වෙන දෙන්නගේ ලිංගික සංසර්ගයෙන් අලුත් ජීවියෙක් ඇති කරන්න දෙන්නට තියෙන ශක්තිය මේ පොරොන්දමෙන් ගලපනවා .
පාද රජ්ජුව - අස්විද අසලිස  මා දේට මුල රේවතී
ඌරු රජ්ජුව - බෙරණ පුස පුවපල් අනුර පුවසල උත්රපුටුප
නාභි රජ්ජුව - කැති පුනාවස උත්‍රපල් විසා උත්රසල පුවපුටුප
බාහු රජ්ජුව - රෙහෙන අද හත සා සුවන සියාවස
මෙන්න මේ විදියටයි නැකත් 27 රජ්ජු වලට වෙන කරලා තියෙන්නේ .

වේධ පොරොන්දම
=============
දෙන්නෙක් ඉපදුන නැකත් වේධ වෙනවනම් ඒක අශුභ වෙනවා . වේධ පොරොන්දම ගැළපෙන්න නම් මේ යුගලක් නොවීම තමයි වෙන්න ඕන .

වෘක්ෂ පොරොන්දම
================
දෙදෙනාගේ ප්‍රජනක ධාතුවල සරුබව මේ වෘක්ෂ පොරොන්දමෙන් ගලපනවා . දරුවන් ඇතිවීමේ හැකියාව පරීක්ෂා කෙරෙනවා . හර වෘක්ෂ සහ කිරි වෘක්ෂ කියලා වෘක්ෂ වර්ග වලට වෙන් කරලා තියෙනවා . ඒ ඒ වෘක්ෂ වල ගැළපීම වෙනවානම් දරුවන් අධිකව ලබනවා කියලා පිළිගැනෙනවා .

ආයුෂ පොරොන්දම
===============
විවාහ වන දෙන්නගේ ආයුෂ ගැන මේ පොරොන්දමෙන් කියවෙනවා . ස්ත්‍රිය උපන් නැකතේ ඉඳලා පිරිමියා උපන් නැකත වෙනකන් ගණන් කරලා ඒ ගණන අරගෙන 27න් වැඩි කරලා 28න් බෙදනවා . ලැබෙන පිළිතුර තියාගන්නවා . මේ විදියට පුරෂයාගේ නැකතේ ඉඳලා ස්ත්‍රියගේ නැකතටත් ගණන් කරලා එ ගණන 27න් වැඩි කරලා 28න් බෙදනවා . ලැබෙන පිළිතුර ගන්නවා . මෙයින් වැඩි අගය තියෙන කෙනා තමයි වැඩිපුර ජීවත් වෙන්නේ කියලා පිළිගැනෙනවා .

පක්ෂි පොරොන්දම
===============
කුලා - රාජාලියා බකමූණ
මොනරා - රාජාලියා බකමූණා
කපුටා - බකමූනා
රාජාලියා - බකමූණා කුකුලා මොනරා
කියන පිලිවෙළට පක්‍ෂීන් සතුරු වෙනවා . දෙන්නගෙම නැකත් එකම පක්ෂියාට අයිති නම් ශුභයි . කලින් කිව්වා වගේ සතුරුනම් ගැලපෙන්න නෑ . සතුරු නැත්නම් ගැලපෙනවා .

භූත පොරොන්දම
=============
දෙන්නගෙම උපන් නැකත් එකම භූත නම් ශුභයි , ආපෝ තේජෝ භූත දෙකට අයිතිනම් අශුභයි . ඊට වඩා වෙනස් වෙනවනම් ශුභයි .

ගෝත්‍ර පොරොන්දම
================
මේකනම් ඉන්දියාවේ බමුණෝ හදාගත්ත දෙයක් . දෙන්නම එකම ගෝත්‍රයට අයිතිනම් ගැලපෙන්න නෑ . වෙනස් ගෝත්‍ර නම් ගැලපෙනවා .

වර්ණ පොරොන්දම
================
මේකත් ඉන්දියාවේ බමුණෝ හදාගත්ත එකක් . ස්ත්‍රී පුර්ෂ දෙන්නම එකම වර්ණයට අයිති නැකත් වලනම් ශුභයි . පුර්ෂයා උසස් වර්ණයකත් ස්ත්‍රිය පහත වර්ණයකත් නම් මධ්‍යමයි . ස්ත්‍රිය උසස් වර්ණයක වෙලා පුර්ෂයා පහත් වර්නයකනම් ගැලපෙන්නේ නෑ .

ලිංග පොරොන්දම
===============
මෙන්න මේ පොරොන්දම ගැන විශේෂයෙන් කියන්න ඕන . කේන්දරේ ලිංග කියලා සටහන් වෙන ඒ වචනය අනුව කෙනා වෙනස් වෙන්නේ නැහැ . ඒක ජ්‍යෝතිෂ විග්‍රහය අනුව නම් කිරීමක් විතරයි . ස්ත්‍රී ලිංග නැකත් ස්ත්‍රීන්ටත් පුර්ෂ ලිංග නැකත් පුර්ෂයන්ටත් හිමිවීම උතුම් විදියට සලකනවා . දෙදෙනාම ස්ත්‍රී ලිංග නම් එත් ශුභයි . දෙදෙනාම පුර්ෂ ලින්ගනම් අශුභයි . දෙදෙනාම නපුන්ෂක ලින්ගනම් අශුභයි . ස්ත්‍රී නැකත් පුර්ශයාටත් පුර්ෂ නැකත් ස්ත්‍රියටත් හිමිවීම ඉතාම අශුභයි . ගැලපෙන්නේ නෑ .

නාඩි පොරොන්දම
==============
ලේවල ගමන , නහර ශක්තිය , ජාන ශක්තිය මේ පොරොන්දමෙන් ගලපනවා . දෙදෙනාම එකම නාඩියේනම් ගැලපෙන්නේ නෑ . වෙනස් නාඩිවලනම් ශුභයි .

දින පොරොන්දම
==============
දෙදෙනාම එකම දිනයේනම් ශුභයි . ස්ත්‍රිය උපන් දවසට පසු දිනය පුර්ෂයා උපන්නානම් ශුභයි ( ඉරිදා සඳුදා වගේ ) . ස්ත්‍රිය උපන් දවසට 3 4 5 කියන දවස්වල පුර්ෂයා උපන්නානම් ශුභයි . ස්ත්‍රිය උපන් දවසට 6 7 කියන දවස්වල පුර්ෂයා ඉපදුනා නම් අශුභයි .

ග්‍රහ පොරොන්දම
=============
අන්තිම පොරොන්දම තමයි ග්‍රහ පොරොන්දම . ඉස්සෙල්ලම ස්ත්‍රී කේන්දරේ 1 7 8 2 4 12  කියන තැන්වල රවී කුජ ශනි රාහු කේතු කියන පාපී ග්‍රහයෝ ඉන්නවද කියලා බලනවා . එයාලා උච්චව ක්ෂේත්‍රව මූල ත්‍රිකෝණව මිත්‍රව සතුරුව නීචව ඉන්නවද කියලත් බලනවා . ඊට පස්සේ ගණිත ක්‍රම මගින් පාපංශක ගණනය කරලා ඒ මගින් යම් නිගමනයන්ට එළඹිලා ග්‍රහ පොරොන්දම ගැලපෙනවාද නැද්ද කියලා තීරණය කරනවා .

ඔන්න ඔය පොරොන්දම් තමයි පොරොන්දම් පරීක්ෂාව කියලා මූලිකවම කෙරෙන පොරොන්දම් පරීක්ෂාවේදී කෙරෙන්නේ . ඒත් මේ පොරොන්දම් පරීක්ෂාව වෙනස් වෙන විධි කීපයක් තියෙනවා . ඒ තමයි දස පොරොන්දම සහ අෂ්ට පොරොන්දම කියලා කියන්නේ . පොරොන්දම් 20 ම ගත්තම ඒක විසි පොරොන්දම වෙනවා . යම් මතයක් තියෙනවා මේවායින් තෝරාගත් 10 ක් ගැළපීම පමණක් ඇති කියලා . තවත් මතයක් තියෙනවා තෝරාගත් අටක ගැළපීම මගින් ඒවාට දෙනු ලබන ලකුණු සංක්‍යාව අනුව ගැළපීම වෙනවද නැත්ද කියලා පරීක්ෂා කරන ක්‍රම ශිල්පයක් .

දස පොරොන්දමට අයත් වෙන්නේ නැකත් , ගණ , යෝනි , නාඩි , රාශි , රාශ්‍යාධිපති , රජ්ජු , වේධ , වශ්‍ය , පක්ෂි කියන පොරොන්දම් දහය .
අෂ්ට කූටයට අදාළ වෙන්නේ නාඩි , රාශි , ගණ , රාශ්‍යාධිපති , යෝනි , නැකත් , වශ්‍ය , වර්ණ කියන පොරොන්දම් 8 . මේවාට පිලිවෙළින් 8 7 6 5 4 3 2 1 කියලා ලකුණු දෙනවා . ගැළපෙනවා නම් එම ලකුණම දෙනවා . නැත්නම් බිංදුවයි . මධ්‍යම නම් ඒ ලකුණෙන් භාගයක වටිනාකම දෙනවා . ඊට පස්සේ මේවා එකතු කරනවා . පොරොන්දම් 8 ම ගැළපෙනවා නම් එකතුව 36 ක් වෙන්න ඕන . එහෙම නම් ගැළපීම 100 % ක් වෙනවා . එහෙම නැත්නම් එකතුව 36 න් බෙදලා 100 න් වැඩි කරලා කොච්චරක් ගැළපෙනවද කියලා පරීක්ෂා කරනවා .

චන්ද්‍ර නක්ෂස්ත්‍රධිපති පොරොන්දම , ලග්න නක්ෂස්ත්‍රධිපති පොරොන්දම වගේම මීට අමතරව තියෙනවා යෝගිනි පොරොන්දම , අයවැය පොරොන්දම කියලා යම් යම් ගණිත කර්ම එක්ක අදාළ වෙන සහ න්‍යායාත්මක පිළිගැනීම් වලට අදාළ වෙනත් පොරොන්දම් . ඒවාත් ගැළපීම කරන එකේ වරදක් නම් මම දකින්නේ නැහැ . ඒත් මේ 20 පොරොන්දමට වඩා ඉතාමත්ම වැදගත් වෙන්නේ කේන්දර සටහන් ගැළපීම තමයි .

කේන්දර ගැළපීමේදී එන විශේෂම දේවල් කීපයක් ගැන අපි ඊළඟට බලමු .





එයින් එකක් තමයි කුජ දෝෂය . මට මේ කුජ දෝෂයත් එක්ක කියන්න යම් කතාවක් මතක් වෙනවා . ළඟදී දෙන්නෙක් මට කේන්දර දෙකක් දීලා කිව්වා මේ කේන්දර ගැළපෙන්නේ නැහැ කියලා කිව්වා . කෙනෙක් මැරෙනවා කියලා කිව්වා . ඒ නිසා දැන් ගෙවල් වලින් කැමති නැහැ . මේ වෙනුවෙන් කරන්න දේවල් තියෙනවද ? . එහෙමත් නැත්නම් මේ කියන කතාව ඇත්තද කියලා බලලා දෙන්න කියලා . මම ඊට පස්සේ පොරොන්දම් පරීක්ෂාවේ ඉඳලා සේරම දේවල් බලලා විග්‍රහ කරලා පිටු ගණනාවක දීර්ඝ විස්තරයක් ලිව්වා ඒ දෙන්නා වෙනුවෙන් ඒ දෝෂ නැතිවෙන විදි කේන්දර වල තියෙන හැටි විස්තර කරන්න . තනිකරම ඒ විවාහ පරීක්ෂාව ජ්‍යෝතිෂ පංතියක සටහනක් වගේ වුණා පැහැදිලි කරලාම .

ඒ උදාහරණය වාසනාවන්ත උදාහරණයක් . මොකද දෙන්නාට කොහොම හරි එකතුවෙන්න ලැබෙන නිසා . එත් ඒවගේම තමයි තවත් කේන්දර දෙකක් මට ලැබුණා බැන්දොත් මැරෙනවාමයි කියලා ආයේ කතා දෙකක් නැහැ කියලා කියන්න පුළුවන් කේන්දර දෙකක් . මේ වගේ වෙලාවල් වලදී ජ්‍යෝතිෂ විද්‍යාව හසුරුවන අය තරමක් අසරණ වෙනවා . මොකද විවාහ යෝජනාවක් නම් මේක අතෑරලා වෙන එකක් බලන්න කියන්න පුළුවන් . එත් ප්‍රේම සම්බන්ධතා වලදී මොකද වෙන්නේ ? . අන්න එතනදී යම් ගැටළුවකට මූණ දෙන්න වෙනවා .  එතනදී අපේ අදහස ඉදිරිපත් කරලා එයාලාට කැමති තීරණයක් ගන්න කියන මතයේ තමයි මමනම් ඉන්නේ . එහෙම බඳිනවානම් මම කියන්නේ ආයෙත් මට කතා කරන්න කරන්න ඕන වත් පිළිවෙත් මොනවාද කියලා කියන්නම් . ඒවා කරන්න . එතකොට මරණය අනතුරකිනුත් , අනතුර තුවාලයකිනුත් , තුවාලය දදයකිනුත් , දදය සුළු කැසීමකිනුත් සංකීර්ණ තත්වයෙන් සරළ තත්වයට පත්වෙන්න යම් ප්‍රතිකාරයක් කියලා දෙන්න පුළුවන් කියලා .

විවාහයේදී ග්‍රහ බලපෑම කොහොමද වෙන්නේ කියලා බලාගන්න පුළුවන් වෙන්නේ දෙන්නා කඩදාසියේ ලියලා එක ඇඳක නිදාගත්ත පලියට නෙවෙයි . දෙන්නාගේ ලිංගික වශයෙන් කායික එක්වීමක් වෙන්න ඕන ඒ බලපෑම් වෙනවාද නැත්ද කියලා බලන්න . මේ කතාව මට කියන්න මතක් වුණේ හැම කෙනාම වගේ කියන්නේ අපි යාළුවෙලා අවුරුදු මෙච්චරක් වෙනවා අච්චරක් වෙනවා . ඒත් අපිට මොකවත් අනතුරක් නෑනේ කියලා . එහෙම වෙන්නේ නැහැ .

ලිංගික එක්වීමකට පස්සේ තමයි මේ බලපෑම් හුවමාරු වෙන්න ගන්නේ . ජ්‍යෝතිෂවේදයේ සහෝදරයා විදියට සලකන ආයුර්වේදයේදී කියවෙන්නේ පුරුෂයා සහ ස්ත්‍රිය ලිංගිකව එක්වීමෙන් හුවමාරුවෙන දේවල් අනුව ඒ ඒ අයගේ ග්‍රහ බලපෑමුත් හුවමාරු වෙනවා කියලා . විවාහයෙන් යම් අපල තත්වයක් එනවානම් එන්නේ ඒ දේ වීමෙන් පසුව කියලා තමයි විග්‍රහ කෙරෙන්නේ . ඒ නිසා කායික එක්වීමට කලින් නම් නොගැළපීම කියන දේ හරි හැටි පෙන්නු කරන්නේ නැහැ . ඒ නිසා තමයි පුළුවන් හැම පැත්තකින්ම ගැළපෙන කෙනෙක් බඳින්න තෝරාගන්න  කියලා හැමදෙනාම කියන්නේ .

සමහරු කියනවා “ ආ එයාගේ කුජ හතේ ඉන්නේ . ඒ නිසා බඳින්න හොඳ නෑ කියලා . එහෙම කියන එක වැරදියි . හරියට බලන්නේ නැතුව කුජ දෝෂ තියෙන අයට තියෙනවා කියන එකත් දෝෂ නැති අයට නැහැ කියලා කියන එකත් වැරදියි . කුජ දෝෂය , එහෙමත් නැත්නම් භෞම දෝෂය එන්නේ කුජ හත්වැන්නේ උන්නු පළියටම නෙවෙයි . කුජ දෝෂ එන විදි මම ඔයාලට දැනගන්න මෙතන සටහන් කරන්නම් .

ලග්නයෙන් 1 2 4 7 8 12 කියන තැන්වල
චන්ද්‍රයා ඉන්න තැනින් 1 2 4 7 8 12 කියන තැන්වල
සිකුරු ඉන්න තැනින් 1 2 4 7 8 12 කියන තැන්වල ඉන්න නිසාත් මේ කුජ දෝෂය එන්න පුළුවන් .

ඒවගේම තමයි ශනි මංගල දෝෂය . මංගල කියන්නේ කුජ . සෙනසුරු සහ අඟහරු නිසා එන විවාහ දෝෂය තමයි මේ ශනි මංගල දෝෂය කියන්නේ . ශනි සහ කුජ එකට ඉන්න එක හෝ අන්‍යෝන්‍ය වශයෙන් දෘෂ්ටි ලැබීම නිසා තමයි මේ දෝෂය ඇතිවෙන්නේ .

ඒ නිසා කුජ දෝෂය තියෙනවා හෝ නෑ කියලා නිකන්ම කියන්න එපා . ඒවා පරීක්ෂා කරවලා තමයි බලන්න ඕන . කුජ දෝෂ තියෙනවා වගේම තමයි ඒවා නැතිවෙන්නත් ග්‍රහ පිහිටීම් තියෙනවා .

කුජ කියන්නේ ග්‍රහ මණ්ඩලයේ සටන් කාමි සෙන්පතියා . ඒ කියන්නේ ගින්දර වගේ සටන් කාමියෙක් . කුජ දෝෂය කේන්දරේ තියෙනවානම් , කුජ විසින් කලත්‍රයා මරන්න සූදානමින් ඉන්නවා . කේන්දරේ චන්ද්‍රයා තමයි රැජින . ඒවගේම චන්ද්‍රයා සිසිල් ග්‍රහයෙක් . ඉතින් කුජට චන්ද්‍රයාගේ බලපෑම එල්ලවෙනවානම් ගිනි ගොඩකට වතුර වත් කරනවා වාගේ මේ කුජ දෝෂය දුර්වල වෙලා හෝ නැති වෙලා යනවා . පුරෝහිත තනතුරේ ඉන්න බ්‍රහපතී වගේ බලවත් ග්‍රහයෙක්ගේ සංයෝගය හෝ දෘෂ්ටි වැටීම නිසා මේ දෝෂ නැතිවෙනවා . ග්‍රහයින්ගේ නීච ස්වක්ෂේත්‍ර වීම නිසා දෝෂ නැති වෙනවා . ඒ වගේ ඉගැන්වීම් රාශියක් තියෙනවා මේ දෝෂය නැති වීමට .

විවාහ වලට බලපෑම් කරන තවත් බහුල දෝෂයක් තමයි කාලසර්ප දෝෂය කියලා කියන්නේ . කේන්දරේක රාහු සහ කේතු ඉන්න ස්ථාන වලට අනුව ඒ දෙන්නාගෙන් එක පැත්තකට අනෙක් ග්‍රහයින් තැම්පත් වීම තමයි කාල සර්ප දෝෂය කියලා කියන්නේ . මේ දෝෂය එන විදි 12 ක් තියෙනවා . ඒ අනුව පලාඵල එන විදිත් වෙනස් වෙනවා . කේන්දරේ 1 , 7 හරහා මේ දෝෂය වැටෙනවානම් විවාහය සම්බන්ධව ටිකක් දුරට බලන්න වෙනවා කොහොම තත්වයක්ද තියෙන්නේ කියලා . ඒ වෙනුවෙන් පිළිවෙත් කරලා දෝෂය පාලනය කරගන්න පුළුවන් .

විෂ කන්‍යා යෝග පිහිටීම තවත් විවාහ දෝෂයක් . උපන් දිනය තිථිය නැකත අනුව විෂ කන්‍යා යෝග පිහිටනවා . මේවා නම් විවාහයට අශුභ තත්ත්ව තමයි අරගෙන එන්නේ . විෂ කන්‍යා යෝග තියෙන කේන්දර සහිත ස්ත්‍රීන් විවාහයෙන් පෙර වගේම පසුවත් දුක්බර ජීවිතයක් තමයි ගොඩක් වෙලාවට ගත කරන්නේ . විෂ කන්‍යා යෝග යෙදෙන හැටිත් භංග වීමත් තරමක් සංකීර්ණ ඉගැන්වීමක් .

කඩහන්දී දෝෂය කියලා තවත් දෝෂයක් තියෙනවා . විවාහ වෙන දෙන්නාට එකම මහ දසාවක් ලැබීම නිසා මේ දෝෂය ඇතිවෙනවා . මේක තරමක් මාරක තත්වයක් වෙන්න පුළුවන් කියලා ඉගැන්වෙන නිසා මේ දෝෂය පරීක්ෂා කිරීම සිදු වෙනවානම් හොඳයි කියලා තමයි කියන්න ඕන .

මීට අමතරව තවත් දෝෂ නම් රාශියක් තියෙනවා . වඳ යෝග , ප්‍රසූත දෝෂ , අමනුෂ්‍ය දෝෂ , අවිවාහ යෝග , කාමුක යෝග , සරාගී යෝග වගේ දෝෂ ගොඩක් විස්තර කෙරෙනවා . ඒ ඒ දේවල් පිළිබඳව සැලකිල්ලක් දක්වලා විවාහ පරීක්ෂාව කරනවානම් තමයි අද කාලේ හැටියට හොඳ . මොකද විවාහයක ප්‍රධාන අරමුණ වෙන්නේ දරුඵල ලැබීම . දරුවන් නැතිවීම අදකාලේ වෙනකොට ලොකු ප්‍රශ්නයක් වෙලා තියෙනවා .

පොරොන්දම් පරීක්ෂාවේදී වෘක්‍ෂ විතරක් බලලා විවාහ වීම නිසා දරුවන් ඇතිවීම ගැන කියන එක වැරදියි . කේන්දරේක 5 7 11 කියන ස්ථාන වල අධිපතීන් ඉන්න ග්‍රහයන් සහ ඒ අයගේ මිත්‍ර වීම අදාළ වෙනවා දරුඵල ලැබෙන්න . ඒවගේම පුත්‍රකාරක ගුරු බලවත් වීම වැදගත් වෙනවා දරුවන් ලැබෙන්න . මේ නිසා දරුඵල ලැබීම කියන දේත් පොරොන්දම් මත විතරක් පදනම් වෙලා බලන්න එපා . කේන්දරත් ගැළපෙනවද කියලා පරීක්ෂා කරලා බලලා තමයි තීරණය කරන්න ඕන .

විවාහයක තියෙන අනෙක් ප්‍රශ්නය තමයි දික්කසාද වීම . නොගැළපෙන අය විවාහ වුණාම විවාහයේ යම් යම් ප්‍රශ්න ඇතිවෙන්න බලනවා . ඒ නිසා පුළුවන් තරම් ගැළපෙන කෙනාම විවාහයට තෝරාගන්න බලන්න . එහෙමත් නැතුව විවාහ වෙන්න වුණා නම් ඊළඟට කරන්න ඕන සාමාජීය වශයෙන් වැරදි අඩුපාඩු හදාගෙන , තමන්ගේ ආශාවන් හැගීම් පාලනය කරගෙන , ලැබෙන දෙයින් සතුටු වෙලා ජීවත් වෙන එක . මොකද විවාහයේ ප්‍රතිඵල විදියට දරුවන් ලැබෙනවානම් දරුවන් ආරක්ෂා කිරීම සහ ඒ අයට ඕන සමාජීය සංස්කෘතිකමය වටපිටාව හදලා දීම තමයි දරුවන් ලැබීමෙන් පස්සේ විවාහය තුල වැඩියෙන්ම වැදගත් වෙන්නේ .





විවාහයේ දෙදරා යාමට දරුවන් නැතිවීම යම් හේතුවක් වෙන්න පුළුවන් . ඒ දේට මුණ දෙන්න බැරිකම නිසා මනස අවුල් කරගෙන පවුලත් අවුල් කරගන්නා අය නැතුවම නෙවෙයි . විවාහ වෙලා ළමයි නෑ කියලා කේන්දර අරගෙන එන අයත් නැතුවාම නෙවෙයි . මේ ප්‍රශ්න විසඳගන්න ඕන විවාහ වෙලා ඊට පස්සේ නෙවෙයි . විවාහ වෙන්න කලින් .

තමන්ට යම් ගැටළුවක් තියෙනවා කියලා කේන්දර බලලා කියනවානම් ඒවාට ප්‍රතිකාරත් ඒ විෂය හරහා තියෙනවා . ඒවා විවාහ වෙන්න කලින් ඉඳලාම කරනවානම් විවාහ වෙලා දරුවෙක් ලබාගන්න පුළුවන් යම් සම්භාවිතාවයක් ඇතිකරගන්න පුළුවන් . මොකද මේ ප්‍රතිකාර වලදී කෑම බීම , අඳින ඇඳුම පැළඳුම , වගේ දේවල් වල ඉඳලා යම් සංයමයක් ඇතිකරගන්න උවමනා වෙනවා . විවාහ වෙලා මේ ප්‍රතිකාර කරලා , අද කරන ප්‍රතිකාරයෙන් හෙට දරුවෙක් පිළිසිඳ ගන්නේ නැහැ . සමහර විට අවුරුද්දක වගේ කාලයක් වත් ප්‍රතිකාර කරන්න වෙනවා . මොකද ඇඟට තියෙන ග්‍රහ කිරණ බලපෑම අඩුවෙලා යන්න කාලයක් ගන්නා නිසා . අවුරුදු 20ක් 30ක් ඇඟට තියෙන ග්‍රහ බලපෑම ඉවත් වෙන්න දවසෙන් දෙකෙන් කරන ප්‍රතිකාර වලින් බැහැ .

ඒ නිසා අවදානමට පෙර සූදානම් කියලා ජ්‍යෝතිෂ විද්‍යාව අනුව විවාහ පරීක්ෂා කිරීමේ ඉහළ වැදගත් කමක් තියෙනවා . දැන් දැන් ඒ ප්‍රවණතාවය වැඩි වෙනවා වගේම තමයි මේ විෂයට ගරහන අයත් වැඩි වෙනවා . ඒත් නූතන විද්‍යාවේ දියුණුව තියෙන්නේ තමන් ළඟ කියලා පෙන්වන ඇමරිකාව එංගලන්තය රුසියාව වගේ රටවල් වලත් ජ්‍යෝතිෂ විද්‍යාව අනුව පර්යේෂණ කෙරෙනවා . මොකද ක්වොන්ටම් විද්‍යාව දියුණු වෙන්න වෙන්නම ඒ විෂය සහ ජ්‍යෝතිෂ විෂය අතර බැඳීම වැඩිවෙන නිසා .

පෙරදිග ජ්‍යෝතිෂ සිද්ධාන්ත වගේම බටහිර ජ්‍යෝතිෂ සිද්ධාන්තත් බිහිවෙලා තියෙනවා . ඒවායේත් පැහැදිලි සත්‍ය තාවයක් පෙන්නුම් කරන නිසා ඒවාත් නරකයි කියලා විසි කරන්න බැහැ . පාරම්පරිකයි කියලා පරණ දේ විසි කරන්නත් නූතන දේ හරි කියන්නත් බෑ වගේම තමයි අලුත් කියලා නූතන දේ විසි කරන්නත් පාරම්පරිකයි කියලා පරණ දේ බැඳ තබාගන්නත් බැහැ . බුද්ධිමය විමසුම අනුව වැඩ කිරීමයි අද කාලේ වැදගත් .

අවසාන වශයෙන් මම ජ්‍යෝතිෂ විද්‍යාව ගැන අපවත්වී වදාළ අග්ගමහා පණ්ඩිත අතිපූජ්‍ය බලංගොඩ ආනන්දමෛත්‍රීය මහානායක ස්වාමීන් වහන්සේ විසින් ආචාර්ය රෝහන් සිසිරකුමාර මහතාගේ ජ්‍යෝතිෂ පිවිසුම 1 පොතට ලිව්ව පූර්විකාවේ කොටසක් සටහන් කරන්නම් . ලිපිය අවසානයේ ඔයාලාගේ හිත් වලට එන ප්‍රශ්නයට ආනන්ද මෛත්‍රීය හිමියන්ගේ ඒ අදහස සාර්ථක උත්තරයක් දේවි .

“ යම් තම් පංචාංග ලිතක් බලාගෙන වේලාව වත් හරියට ශුද්ධ කොට නොගෙන දළ කේන්ද්‍රයත් තනාගෙන රාශි භාව දෙකේ වෙනස වත් හරියට තේරුම් නොගෙන වරදවා අනාගත ඵල කියන අයගේ ප්‍රකාශන බොරුවී යෑම නිසා මේ විශ්ෂ්ඨ ශාස්ත්‍රය සමහර විද්වතුන්ගේ නිග්‍රහයට ද ලක්ව ඇත “


අවසාන වශයෙන් ,
ජ්‍යෝතිෂ විද්‍යාව ඇතිකළ දියුණුකළ ප්‍රධාන වශයෙන් දහඅටක් වූ මහා සෘෂි වරුන්ටත්
පර්යේෂණ කරමින් තම අත්දැකීම් සෘෂි මතය හා ගළපමින් ජ්‍යෝතිෂය දියුණු කල පුරාණ ආචාර්ය වරයින්ටත්
මාගේ ගුරුවරයින්ටත්
නමස්කාරය වේවා !

දියුණුවෙන් දියුණුවට පත්වේවා !
ඔබ සැමට සමන් දෙවිඳුගේ පිහිට ලැබේවා !

වයලීනෝ
පාරම්පරික ජ්‍යෝතිෂවේදී ( ප්‍රභාශ්වර ජ්‍යෝතිෂ සේවය )
විද්‍යාවේදී ( ජෛවීය විද්‍යා )  ශ්‍රී ජයවර්ධනපුර
Fb - ප්‍රභාශ්වර ජ්‍යෝතිෂ සේවය - Prabhashwara Jyothisha Sewaya
Email – prabhashwara.astro@gmail.com

2 අදහස් උදහස්:

රසයිද, තිත්තයිද, දිරවගන්න බැරිද, මෙලෝ රහක් නැත්ද, දැනුන රස කිව්වොත් අපිටත් සතුටුයි.

වකුටු සිරස හැඩ ගවසා වකුටු නියන් මෙන් වැරසැර වකුටු මූණ කට ඇද කර කාලා මස් බඩ ලොකු කර වකුටු එනිය බොල්ලෑ දත් යකඩ කිලිය ගෙන අඬ හැර වකුටු...

සූර්ය ග්‍රී පර්වතේ දෙදරවා වඩින කඩවර සෙනෙවිරත්න අධිකාරම් දේවතාවුන් වහන්සේ





වකුටු සිරස හැඩ ගවසා වකුටු නියන් මෙන් වැරසැර
වකුටු මූණ කට ඇද කර කාලා මස් බඩ ලොකු කර
වකුටු එනිය බොල්ලෑ දත් යකඩ කිලිය ගෙන අඬ හැර
වකුටු දෙදළකින් ඇනලා රීරි උරා බොන කඩවර

රන් අවුපත සුරතින් ගෙන සලති පවන් සිසිල් වෙන්ඩ
රන් චාමර සුරත දරා සිටිති සබෙන් තෙද වඩින්ඩ
හංස කිකිණි මිහිරි හඬින් සිට සබයට සෙත් පතන්ඩ
වංස තෙදැති කඩවර දෙවි සැනෙකින් පේනට වඩින්ඩ

දැනට අවුරුදු කීපයකට ඉස්සර මට අහන්න දකින්න ලැබුණු අත්දැකීමක් තමයි මේ ලිපිය ලියන්න නිධාන කතාව වෙන්නේ . මම ඉන්න පැත්ත සාම්ප්‍රදායික ගැමි ජීවිතයෙන් මිදිච්ච ගමක් .

දැන් ඉන්නේ ඔක්කොම නවීන ජීවන පන්නයකට හුරුපුරුදු වෙච්ච අය . ගෙවල් දොරවල ඇඳුම් පැළඳුම් පවා දැන් හැමෝගෙම වෙනස් . ඉස්සරනම් අවුරුදු චාරිත්‍ර වගේ දේවල් පවා හරියටම මේ පැත්තේ ගෙවල් වල සිද්ද කරා . ඒත් දැන් ඒවා වියැකිලා ගිහින් . අලුත් පරපුර හිස ඔසවාගෙන එනකොට ඊට කලින් පරපුරවල් ටිකෙන් ටික පැත්තකට වෙනවා කියලා තමයි පේන්නේ . ත්‍රීවිල් එකක් පදින්න පුරුදු උනාම කොල්ලෝ හිතන්නේ එරොප්ලේන් පදින්න ලයිසන් ගත්ත ගානට . කමක් නෑ ඉතින් . ආසාවනේ . අතපය නැතිව ආවම ගොන් කරත්ත එළවන ගානට වැටෙනවා කියලා උපේක්ෂාවෙන් ඒ අය දිහා බලන්න පුළුවන් .

මේ කොච්චර වෙනස්කම් වෙනවා උනත් මම ගමේ දැක්ක එක දෙයක් තමයි අන්ධ විශ්වාස මත පදනම් වෙලා සාම්ප්‍රදායික සමහර දේවල් තවමත් මේ මිනිස්සු අනුගමනය කරන එක . මේ ළඟදී අපේ ගෙදරට පහළ ගෙදරක ජයටම මන්තර මතුරනවා ඇහෙනවා . මන්තරේ සද්දෙයි අර අනිත් එකේ සද්දෙයි හොඳට දන්න කෙනා වෙච්චි එකේ මමත් මිදුලට බැහැලා පොඩ්ඩක් ඒ පැත්තට කණ හරවාගෙන අහගෙන හිටියා .

මන්තර වලට අනුව කළු කුමාර දිෂ්ටිය නවත්තන්න මන්තර මැතිරිල්ලක් තමයි කෙරුනේ . ඊට ටික දවසකට පස්සේ මට දැනගන්න ලැබුණා ඒ ගෙදර නංගි කළු කුමාරයා එක්ක පැනලා ගියා කියලා . පස්සේ ඉතින් ඒ කළු කුමාරයට සමාව දීලා කළු කුමාරයාවම බැඳලා දැන් සතුටින් සමාදානයෙන් ඉන්නවා . මේවගේ ඇහුවම දැක්කම ඒක වසංගතයක් වෙනවා . අල්ලපු ගෙදරට නූල් දැම්මම අනිත් ගෙදරටත් නූල් දාන්න වෙනවා . ඔහොම ඔහොම ඉතින් මේවා වසංගත වෙනවා .

ශිල්පයේ ඇත්ත නැත්ත ගැනවත් ඒ මිනිස්සුන්ගේ අන්ධ භක්තිය ගැනවත් මම මේ වෙලාවේ කතා කරන්න කැමති නෑ . ඒත් මේ කාලේ අහන දකින දේවල් අනුව මන්තර ශාස්ත්‍රය යක්කු දෙවිවරු සිල්ලර වෙලා කියලානම් කියන්න ඕන . හැමදාම කියනවා වගේ අදත් කියන්නේ ඒකම තමයි . ඒ නිසා තමයි මම ඉස්සර ඉඳලම කල්පනා කරේ යක්කු දෙවිවරු භූතයෝ හසුරුවන ශිල්පයේ ඇත්ත නැත්ත ගැන මෙහෙම ලියන්න ඕන කියන එක . ඒ නිසා මම මේ ලියන ලිපි කියවලා කරන්න ඕන මේවා අනුගමනය කිරීමවත් විශ්වාස කිරීමවත් නෙවෙයි . 

හරි දේවල් දැන හඳුනාගෙන කැස්සට උනට නූල් මතුරලා බෙල්ලේ දාගන්නේ නැතුව මේ ශිල්පයේ ගැඹුර අවබෝධ කරගෙන ඒ අනුව යමක් කරගන්න ඕන නම් අදාළ ගැළපෙන අයව හොයාගෙන ඒ දේවල් කරවා ගන්න එක . මට පණිවුඩ එවලා හිත් අමනාපකම් ඇතිකරගන්න එපා . වයලීනෝ සබැඳි කතා ලිපියේ අන්තිමටම මම පැහැදිළිවම කියලා තියෙනවා ඒ වගේ ප්‍රශ්න වලට මම දෙන ඩිරෙක්ට් උත්තර ගැන . කණගාටුවෙන් උනත් මට ඒ දේවල් එහෙම කියන්න වෙනවා . ඒ නිසා ආයෙත් ඉල්ලලා හිටින්නේ ගවේශකයා පර්යේෂකයා ලේඛකයා සහ ශිල්පියා කියන හතරදෙනා පටලව ගන්න එපා කියන එක . 

හීනියට වගේ පාරම්පරික උරුමයක් තියෙන බව හැබෑව . ඒත් මම ඒ උරුමයෙන් දැන් ගොඩක් ඈත් වෙච්ච කෙනෙක් නිසා ලිපියට වඩා වැඩි යමක් මගෙන් බලාපොරොත්තු වෙන්න එපා කියලා කියමින් මම එන්නම් මගේ නිධාන කතාව කියන්න . ඒ කිව්වේ මෙයාලා මම තමා නිධාන කතාව කියන්න පටන් ගත්තේ නැහැ . හැක හැක හැක...





අපේ ගෙවල් වලට කීඊඊඊඊඊඊඊඊඊඊඊඊඊඊඊඊඊට්ටුවම කියන්නේ ටිකක් කිට්ටුව ගෙදරක රෑට රෑට කාලයක් තිස්සේ පහනක් තිබ්බා . දන්නේ නැහැ ඉතින් කාටද පහන පත්තු කරන්නේ කියලා . සිමෙන්ති වලින් හදපු පහන් පැලක තමයි මේ පහන පත්තු කලේ . ඕක කාලයක් පත්තු කළා . ඊට පස්සේ ඔය ගෙදරට ආවා වරමක් තියෙන ගෑණු කෙනෙක් . මේ ගෑණු කෙනා රෑට රෑට පහන තියලා කන්නලව් කරන්න පටන් ගත්තා . මේ කන්නලව්ව නිසා තමයි දැනගත්තේ මේ පහන රුහුණු කතරගම මහා දේවාලයේ අදෘශ්‍යමාන රන් තොරණේ දකුණේ මුර තේවයේ වැඩ ඉන්න කඩවර සෙනෙවිරත්න අධිකාරම් දේවතාවුන් වහන්සේට කැප වෙච්ච පහනක් කියලා . ටික්ස් කාලෙකින් පස්සේ මේ කන්නලව් කිරීමත් නැවතුනා . ඒත් පහන හැමදාම පත්තු කළා . 

අවුරුද්දක් විතර මෙහෙම පහන පත්තු කලාට පස්සේ මේ ගෙදරට නයෙක් එන්න ගත්තා . සුළු පටු නයෙක් නෙවෙයි . හෙන සයිස් නාග රාජයෙක් . පහන පත්තු කරන වෙලාවට පහන් පැල කිට්ටුව හැමදාම රෑට මේ නයා දරන ගහගෙන ඉන්න පටන් ගත්තා . අපේ වත්තේ මායිමේ තියෙන කළු ගල යට නාග භවනක් තිබුණට ඒ නයි අයියලා මෙහෙම දේවල් කවදාවත් කරේ නැහැ . ඒත් මේ විපරියාසය නිසා ගෙදර අය හොඳටම බය වෙලා හිටියේ .

පස්සේ මේ අය ගෙදර දානයක් දීලා පිං අනුමෝදන් කරා . පහන තියන එක නැවැත්තුවා . ඒත් නයාගේ ගමන නම් නැවතුනේ නෑ . පස්සේ මේ අය ඇදුරන් ගෙන්නවලා ලොකු ගුරුකමක් කරලා තමයි නයා එන ගමන නවත්ත ගත්තේ . නයාව අල්ලලා දෙන්නවත් නයාව මරන්නවත් ඒ අය බය උන නිසා තමයි අන්තිමට මෙහෙම විකල්පයක් ඔස්සේ ගිහිල්ලා මේ කරදරයෙන් මිදුනේ . කතරගම දෙවියන්ගේ දේව සමාගමේ කෙනෙක් හැටියට කඩවර දෙවියන් පවා නාගයින්ට මුවා වෙලා එන එක රහසක් නෙවෙයි කියලා දැනගත්තේ එදා තමයි ඔන්න .

රාත්‍රී කාලයේ ඇවිදින අයට මහසෝනා ගහන්නේ අතේ ඇඟිලි පහක පාර පිටේ හිටින්න . මහසෝනා ගැහුවා කියලා කවුරුහරි ආවොත් පිට හරවලා බලන්නේ මේ ඇඟිලි පාරවල් තියෙනවද කියලා බලන්න . ඉතින් අන්න ඒ වගේ කඩවර යකා ගහන්නේ ඇඟිලි හතරක් හිටින්න . මෙන්න මේ කතාව තමයි කඩවර ගැන මම අහලා තිබ්බ මුල්ම කතාව . ඒත් ඊට පස්සේ පත්තරවල සාත්තර පොට්වල සහ පොත්වල මේ වගේ කතා අහන්න දකින්න ලැබුණට මම ඒවා එච්චර විශ්වාස කලේ නෑ මොකද එයාලා එහෙම උනා කියලා කිව්වට සාක්කි මුකුත් තිබ්බේ නැති නිසා . ඒත් කඩවර දෙවියන් ගැන මම අහපු දැකපු හොඳම සාක්ෂිය තමයි මේ . ඉතින් එහෙව් කඩවර දෙවියන් ගැන කියන්න තමයි මේ ලක ලැස්ති වෙන්නේ .





කඩවර දෙවියන්ගේ උත්පත්ති කතාව ගැන කියනකොට . එක එක දේවල් තියෙනවා . මොකද කාලෙන් කාලෙට මේවා වෙනස් වෙවී එක එක ශිල්පීන් තම තමන්ට ඕන ඕන විදියට මේවා වෙනස් කරගෙන ආව නිසා . කඩවර කෝල් මුර කවි වලින් තමයි අවසාන වතාවට කඩවර උත්පත්තිය ගැන විස්තරයක් සඳහන් වෙන්නේ . ඒ කතාව එක අතකට පිළිගන්න පුළුවන් කියලත් හිතෙනවා . ඒත් ආයෙත් කල්පනා කරලා බලනකොට පිළිගන්න බෑ බෑ වගේ කියලත් හිතෙනවා . ඉන්දියාවේ ඉඳලා ආව ස්කන්ධ සහ ලංකාවේ හිටපු කතරගම දෙවියෝ කියන සංකල්ප කලවම් වෙලා නිසා තමයි මේ ප්‍රශ්න ඇතිවෙන්නේ .  කොහොමහරි මෙන්න මෙහෙමයි මේ කඩවර උත්පත්ති කතාව ගැන සඳහන් වෙන්නේ .

අනුරාධපුරය පැත්තේ ගමක ඉතාම ඈත අතීතයේ ජීවත් උනා එක්තරා මනුස්සයෙක් . මේ මනුස්සයා ඇඟේ පතේ හයිය හත්තිය තියෙන හොඳ ඇඟ පත තියෙන මනුස්සයෙක් . ඉතින් මෙයා ගොවිතැන් කරන කාලෙට ගොවිතැන් කරනවා . කුඹුරු කොටන්න , නියර බඳින්න ඇලවල් කපන්න වගේ වැඩවලට මෙයා හරිම දක්ෂ කෙනෙක් . ඉතින් මේ නිසා මෙයාගේ කුඹුරු වල වී වලින් නම් අඩුවක් උනේ නැහැ . ගොවිතැන් කරන කාලෙට ගොවිතැන් කරාට ඊට පස්සේ මෙයා වැඩි හරියක් කරන්නේ නිදාගන්න එක . ඒත් නිකන්ම නෙවෙයි නිදා ගන්නේ කණපැලෙන්න රා බීලා තමයි නිදා ගන්නේ . ඒ වගේම හොඳට බඩ කට පිරෙන්න කන්නත් ඕන මෙයාට .

දවසක් මෙයාගේ බිරිඳ මෙයාට ගෙදර වැඩ රාජකාරි වගයක් කරන්න කියලා එයාගේ රාජකාරි වගයකට ගෙදරින් බැහැරට යනවා . ඒත් ඉතින් මේ මනුස්සයා කිව්ව වැඩ කරන්නේ නෑ . උයලා තිබ්බ කෑම බීම බඩ කට පිරෙන්න කාලා , රා බීලා ගොරව ගොරව නිදාගත්තා . මෙහෙම නිදාගෙන ඉන්නකොට බිරිඳ එනවා ගෙදර . ඒ එනකොට දකිනවා තමන් කරන්න කිව්ව දේවල් මොකවත් කරන්නේ නැතුව මනුස්සයා කාලා බීලා හොඳට නිදාගෙන ඉන්න හැටි . මේකට මේ බිරිඳට හොඳටම කේන්ති යනවා . ඒ නිසා කරන්නේ උයලා තිබ්බ බත් මුට්ටිය අරගෙන ඇවිත් මේ මනුස්සයට හොඳටම බැනලා බත් මුට්ටිය ඔලුවේ ගහපු එක .

බිරිඳ මෙහෙම කරාට පස්සේ මනුස්සයා හොඳටම කලකිරෙනවා . මොකද කාලා බීලා නිදාගන්නේ කන්න බොන්න ඕන දේවල් හම්බ කරලා තියලා . ඒත් සැනසිල්ලේ ඉන්න නැති නිසා මේ මනුස්සයා බිරිඳට කියන්නෙම නැතුව ගෙදරින් යන්න යනවා . මේ විදියට යන්න ගියාට මෙයට යන්න කියලා තැනක් තිබුණේ නෑ . ඉතින් එයා ජීවත් වෙන්න කල්පනා කරේ වනාන්තරයේ . වනාන්තරයේ ඉන්නකොට මෙයා කෑවේ බිව්වේ ගස්වල කොළ ගෙඩි වගේ දේවල් . කැලේ ඉන්න සත්තුත් එක්ක මෙයා හරිම සමගියෙන් ජීවත් උනා . සමහරවිට ඒ අය මෙල්ල කරගන්න විදියක් මෙයා දැනගෙන ඉන්න ඇති . එහෙමත් නැත්නම් සත්තුන් තේරුම් ගන්න ඇති මේ මනුස්සයාගෙන් තමන්ට කරදරයක් නැහැ කියල . ඒ නිසා සත්තුයි මේ මනුස්සයයි කැලයේ කිසිම් කරදරයක් නැතුව ජීවත් උනා .






දවසක් රජතුමාගේ සේනාව මේ මනුස්සයා හිටපු කැලයේ දඩයමේ ආවා . මුවෝ ගෝන්නු වගේ සත්තු මසට මරාගෙන යන්න තමයි ආවේ . සමහරවිට රජතුමාගේ රාජ භෝජනයට වෙන්න ඇති . එහෙමත් නැත්නම් සෙල්ලමට දඩයමට යන්න වෙන්න ඇති . ඉතින් මෙහෙම දඩයමේ ආවට මේ අයට මොකෙක්වත් අල්ල ගන්න ලැබුණේ නෑ . මොකද මේ කලින් කිව්ව අර ගෙදරින් පැනලා ආව මනුස්සයා රාජ පුර්ෂයින් අලාගෙන ඒ අයට පොලු මුගුරු වලින් ගහලා එළවන නිසා .

දැන් ඉතින් අහන්න එපා රාජ පුර්ශයෝ ගාව දුනු ඊතල කඩු තියෙනවනේ , මේ එක්කෙනා ගාව ඒවා නැහැනේ කියලා . එක කඩුවක් විතරක් තියාගෙන මිනිස්සු 999ක් මරන්න අංගුලි මාලට පුළුවන් උනේ කොසොල් රජතුමාගේ රාජපුර්ෂයින් එක්ක පවා තනියම සටන් කරමින් . ඒ නිසා මෙයාටත් ඒ වගේ හැකියාවක් තියෙන්න ඇති මොකක් හරි . මොකද මම කලින් කිව්වනේ මෙයා හොඳට කන බොන කෙනෙක් කියලා . අනික කැලයේ හිටපු සත්තුන් ගෙන් පවා මෙයාට උදව් ලැබෙන්න ඇති සටන් කරන්න .

ඉතින් අන්තිමට රාජ පුර්ෂයින් හිස් අතින්ම ආයෙත් මාලිගාවට ගියා . මෙහෙම දවස් කීපයක් හිස් අතින් ගියාට පස්සේ දැන් රජ තුමාටත් මස් නැහැ . ඉතින් අන්තිමට කරේ මොකක්ද රජතුමාට පැමිණිලි කරා මෙන්න මෙහෙම යකෙක් වගේ කෙනෙක් ඇවිත් අපිට කරදර කරලා සත්තුන්ව බේරා ගන්නවා . ඒ නිසා අපිට දඩයම් කරන්න විදියක් නැහැ කියලා . පස්සේ රජතුමා විශේෂ සේනාවක් සූදානම් කරවලා ඒ අයව පිටත් කරලා යැව්වා කොහොම හරි මේ කෙනාව අල්ලාගෙන එන්න කියලා .

පස්සේ ඒ සේනාව ගිහින් මේ කෙනාව ල්ලගෙන එනවා . ඒ ආවට ඉතින් වැඩක් නැහැ . මොකද මේ මනුස්සයා කතා කරන්නේ නැහැ . ඔහේ බලාගත්ත අත බලාගෙන ඉන්නවා . ඉතින් රජතුමා එක එක උපයවල් යොදවලා බැලුවා මේ මනුස්සයා කතා කරවන්න . ඒත් කතා කරේ නෑ . පස්සේ නගරය පුරා අඬබෙර ගහන්න සූදානම් කෙරෙව්වා මේ කෙනාව කතා කරවන්න පුළුවන් කෙනෙක් ඉන්නවනම් ඒ කෙනාට වටිනා තෑගී ලබා දෙනවා කියලා .






මේ කතාව ආරංචි වෙනවා අර කෙනාගේ බිරිඳට . ඊට පස්සේ මේ බිරිඳ මාලිගාවට ඇවිල්ලා කියනවා මේ ඉන්නේ තමන්ගේ ස්වාමි පුර්ශයා . මේ මනුස්සයා ගෙදර ඉන්න කාලේ හොඳට බඩ කට පිරෙන්න කාපු කෙනෙක් . දැන් මේ සද්ද නැතුව ඉන්නේ කන්න නැති නිසා . හොඳ රහට කෑම කන්න දුන්නොත් මෙයා කතා කරයි කියලා . පස්සේ රජතුමා ඒ වෙනුවෙන් කටයුතු කරා . ටික දවසක් හොඳට කාපු මේ මනුස්සයා අන්තිමටම කතා කරා .

පස්සේ රජතුමා වෙච්ච දේවල් හිටියේ කොහෙද කෑවේ බිව්වේ කොහොමද වගේ හැම විස්තරයක්ම අහලා දැනගෙන පස්සේ ඇහුවා මේ යන්නේ නියං කාලය වෙච්චි එකේ කැලේ ඇතුලේ ඉන්නකොට කොහොමද වතුර හොයාගත්තේ කියලා . පස්සේ මේ මනුස්සයා කියනවා කැලේ මැද ථියෙනවෙආ දිය බුබුලකින් පෝෂණය වෙන වතුර නොසිඳෙන කඩ වලක් . ඒ කියන්නේ වතුර පිරිලා තියෙන පොකුණක් වගේ තැනක් . මෙතනින් වතුර පාරක් ගලාගෙන යනවා . අන්න එතනින් තමයි වතුර හොයා ගත්තේ කියලා . පස්සේ රජතුමා එතන කලා වැව හදවලා තියෙනවා .

මීට අසමාන වෙනත් කතාවකුත් මම අහලා තියෙනවා . ඒ තමයි මේ මනුස්සයා කතා කරන්නේ නැතුව ඉන්න නිසා අන්තිමට රජතුමා මේ මනුස්සයට මරණ දඬුවම දෙන්න කියලා නියම කරනවා . ඒ වෙලාවේ මේ මනුස්සයා කතා කරා . පස්සේ එයා කිව්වා මම හිටපු කලය ඇතුලේ කවදාවත් නොසිඳෙන දිය බුබුලක් තියෙනවා . එතනට වතුර බොන්න හැමදාම සුදු ඇතෙක් එනවා . මට අභය දානය දෙනවනම් මම ඒ ඇතාව රජතුමාට අල්ලලා දෙන්නම් කියලා . පස්සේ රජතුමා කැලයේ තියෙන මේ තැන බලන්න යනවා . සුදු ඇතාවත් අල්ල ගන්නවා . පස්සේ මේ තැන වට කරලා බැමි බන්දවලා කලාවැව කියන විශාල වැව හදවනවා . මේ වැවේ වැඩ කරවන්නෙත් මේ මනුස්සයාම තමයි .

ඉතින් මේ මනුස්සයාට අන්තිමට ඇමති කමක් ලැබෙනවා . කලා වැවේ සොරොව් බිසෝකොටුවල ක්‍රියාකාරීත්වය , මඩ ඉවත් කරවීම , රැක බලා ගැනීම වගේ හැම දෙයක්ම බලාගන්න දුන්නේ මේ ඇමතිට . කාලයක් යනකොට මේ ඇමතිට අනෙත් ඇමතිවරු ඉරිසියා කරන්න පටන් ගත්තා . මොකද මේ ඇමති ඒක පාරටම ඇමති කෙනෙක් වෙච්ච කෙනෙක් . අනිත් ඇමතිලා වගේ කිසිම වෙනත් සුදුසුකම් නැතිවයි මේ ඇමති පත් වුනේ . ඒ මදිවට වැව් කර්මාන්තය කරවන පිරිසට අධිපති සෙනෙවිරත්න පදවියත් මේ ඇමතිට ලැබුණා . ඉතින් අනිත් ඇමතිලා තවත් ඉරිසියා කළා .

ඔහොම කාලයක් යනකොට එක නියං කාලයක් ආවා . මේ නිසා කලා වැවත් හිඳිලා ගියා . හිඳුනා කියන්නේ ඉතින් වතුර නැත්තටම නැති වුනා කියන එක නෙවෙයි . කුඹුරු වැඩ වලටත් වතුර මදි උනා කියන එක . මේකට ඒ කාලේ තිබ්බ හොඳම බෙහෙත් තමයි දවස් හතක් වැසි පිරිත් සහිතව පිරිත් දේශනා කිරීම . සාම්ප්‍රදායානුකූලව වැසි පිරිත් දේශනා කරන්නේ වැවේ වැව් බැම්මේ සාදවන ලද පිරිත් මණ්ඩපයක . මේ පිරිත් මණ්ඩපය සාදවලා හාමුදුරුවරු වැඩම කරවලා පිරිත් දේශනා කරවලා ඒ කටයුත්ත සම්පූර්ණ කරන්න සියලුම වගකීම් පැවරිලා තිබුණේ මේ ඇමති තුමාට .





ඉතින් ඔන්න පිරිත් දේශනා කරනන සියලුම දේවල් සම්පූර්ණ කරලා හාමුදුරුවරු පිරිතට වඩිනවා . මේ වැවේ වැව් බැම්මේ තියලා තියෙනවා විශාල මැටි කොතලයක් . වහිනකොට මේකට වතුර පිරෙන තරම අනුව වැවේ වතුර පිරෙන ප්‍රමාණයත් මැනගන්න  පුළුවන් . ඉතින් මේ කොතලය හිල් කරන්න කියලා මේ ඇමති තුමාට ඉරිසියා කරන අනිත් අමතිලාගෙන් කෙනෙක් හාමුදුරු කෙනෙක්ට කිව්වා . මේ හාමුදුරුවෝ වයසයි . ඒ නිසා අතේ අරගෙන ආව හැරමිටියෙන් කාටවත් පේන්නේ නැති වෙන්න අර කොතලයේ අඩියට ඇනලා ඒක හිල් කරා . ඊට පස්සේ සුපුරුදු පරිදි පිරිත් දේශනාව ආරම්භකලා .

දවස් හත පිරීගෙන එනකොට ඔන්න වහින්න පටන් ගත්තා . වහිනවා වහිනවා දැන් නවතින්නෙම නෑ . වැවත් ටික ටික පිරෙන්න පටන් ගත්තා . ඇමති තුමාත් සන්තෝසෙන් බලාගෙන හිටියා කොතලය පිරෙනකල් . ඒත් කොතලය පිරෙන්නේ නෑ . වැවේ වතුර වැඩි උනාට පස්සේ ඇමති තුමා කොතලය පරීක්ෂා කරලා බැලුවා මොකද වෙලා තියෙන්නේ කියලා . එතකොට තමයි ඇමති තුමා දැනගත්තේ කොතලය හිල් කරලා කියලා . හාමුදුරුවරුන්ට ඇරෙන්න වෙන කෙනෙක්ට කොතලය තියෙන තැනට යන්න උනෙත් නැති නිසා කොතලය හිල් වෙන්න හාමුදුරුවරුන්ගේ සම්බන්ධයක් තියෙන්න ඕන කියලා ඇමති තුමා කල්පනා කරා .

මේ කල්පනාව අතරේ තමයි දැනගන්න ලැබුණේ වැවේ වතුර වැඩිවෙලා එක පැත්තක වැව් බැම්ම කඩාගෙන ගමක් යට කරගෙන මහා ජාල කඳක් පල්ලම් බහින්න අරගෙන කියලා . ඇමති තුමාට තරහක් වගේම භයක් ඇති උනා . මොකද දැන් රජතුමාගෙන් තමන්ට මරණ දඬුවම ලැබෙන නිසා .  පස්සේ තමන්ගේ කඩුවෙන් අර පිරිත් කිව්ව හාමුදුරුවරු සියලු දෙනාම මරලා දාලා කලා වැවට පැනලා තමනුත් ජීවිතය නැති කරගත්තා . මෙහෙම ජීවිතය නැති කරගත්තට පස්සේ මෙයා යක්ෂයෙක් වෙලා ඉපදුනා . කඩවලට පැනලා ජීවිතය නැති කරගත්ත යකා කඩවර කියලා නම් උනා . ඔන්න ඔහොම තමයි කඩවර යකා ඉපදුනා කියලා කියන්නේ .

කඩවර යකා වෙලා ඉපදුනාට පස්සේ මේ යක්ෂ රූපය විටින් විට ගමේ මිනිස්සුන්ට පේන්න වැවේ ඉඳලා මතුවෙලා නැතිවෙලා තියෙනවා . කළා වැව හැදෙව්වේ තමන් නිසා . මෙන්න මේ නිසා කලා වැව තමන්ගේ වාසස්ථානය කරගන්නත් කඩවර යක්ෂයා අමතක කලේ නෑ . කඩවර මනුස්සයෙක් වෙලා ඉන්න කාලෙත් හොඳට කාපු බීපු කෙනෙක් . ඒ නිසාම යක්ෂ ආත්මය ලැබුණත් මෙයාට හොඳට කන්න බොන්න නම් ඕන උනා . ඒ නිසා මේ යක්ෂයා තැනින් තැන ඇවිද ඇවිද කන්න පුළුවන් දේවල් කෑවා . රා බිව්වා . හැබැයි සත්තු මරාගෙන කෑවේ නෑ . වැඩිපුරම කෑවේ තොවිල් වගේ දේවල් වලදී පූජා කරන පුළුටු ද්‍රව්‍ය .






කාලයක් යනකොට මෙයාට හොඳ කෑමක් ලැබෙන්න පටන් ගත්තා . මෙයා ඒ වෙනකොට හිටියේ කතරගම දෙවියන්ගේ දකුණු ආසනය පිහිටලා තියෙන ප්‍රදේශයේ . මේ පැත්තෙන් තමයි කතරගම දෙවියන්ට දේවාලයේ කපු මහත්වරු මුරුතැන අරගෙන යන්නේ . දෙවියන්ට තියන මුරුතැන අඩුම තරමේ හදන කෙනාටවත් රස බලන්න වරම් නැහැ . ඒත් මේ කඩවර යක්ෂයා ඒකට බය උනේ නෑ . කපු මහත්වරුන්ගේ ගමන භාදා කරලා කඩවර යක්ෂයා කතරගම දෙවියන් වෙනුවෙන් හදපු මුරුතැන කන්න පටන් ගත්තා . පස්සේ දවසේ කපු මහත්තයා මේ ගැන කතරගම දේවාලයේ දෙවියන් ඉදිරියේ කන්නලව් කරා . එදා රෑ කතරගම දේවාලයේ කපු මහත්තයට කතරගම දෙවියන් දෘශ්‍ය මාන උනා .

පස්සේ කතරගම දෙවියෝ ඇහුවා කවුද මේ මුරුතැන ගන්න කෙනා කියලා . පස්සේ කපු මහත්තයා කිව්වා ඔබ වහන්සේගේ දකුණු ආසනය කිට්ටුව ඉන්න යක්ෂයෙක් මුරුතැන කනවා කියලා . පස්සේ කතරගම දෙවියෝ යනවා දකුණු ආසනය පිහිටලා තිබුණු ප්‍රදේශයට . එහෙදී කතරගම දෙවියන්ය ඈත ඉඳලාම කඩවර යක්ෂයා දකින්න ලැබුණා . පස්සේ කතරගම දෙවියෝ කඩවර එක්ක කතා කරලා අන්තිමට කඩුවකුත් දීලා කිව්වා අසුරයින් එක්ක යුද්ධ කරලා එන්න . දිනුවොත් තමන්ගේ සේනාවට එකතුකරගන්නවා කියලා . පස්සේ කඩවර අසුරයින් එක්ක යුද්ධ කරලා ජය ගන්නවා . මේ ජයග්‍රහණය පත්තිනි දේවිය දකිනවා.

පත්තිනි දේවිය තමයි කඩවර යක්ෂයා අර්ධ දේව තත්ත්වයට පත් කරන්නේ . පස්සේ කඩවර දේවත්වයට පත්වෙලා තමයි කඩවර කතරගම දෙවියන් හමුවෙන්න එන්නේ . කතරගම දෙවියන් කඩවර දෙවියන්ට තමන්ගේ දකුණු ආසනයේ වැඩ ඉන්න වරම් දෙනවා . ඒ වගේම තමන්ගේ යක්ෂ සේනාවට අධිපති සෙනෙවිරත්න අධිකාරම් තනුතුර ලබා දෙනවා . ඒ වගේම තමයි රුහුණු කතමගම මහා දේවාලයේ ඉදිරියේ පිහිටලා තියෙනවා කියලා කියන සාමාන්‍ය මනුෂ්‍යයින්ට නොපෙනෙන අදෘශ්‍යමාන දිව්‍යමය රන් තොරණේ දකුණු පැත්තේ මුර තේවය දිනකට වරක් කරන්නත් කඩවර දෙවියන්ට නියම කරනවා .

ඔන්න ඔහොමයි කඩවර දෙවියෝ ඇතිවෙන්නේ . යක්ෂයෙක් උනත් කඩවර කියන්නේ අර්ධ දේව තත්ත්වයේ ඉන්න කෙනෙක් . ඒ නිසා කඩවර දෙවියන් හා යක්ෂයා කියන තත්ත්ව දෙකේම ඉන්නවා කියලා තමයි කියන්නේ . හැම දවසකම රෑ වූ හත් පැය හමාරට කඩවර දෙවියන් යක්ෂ තත්ත්වයට පත් වෙනවා . පහු වෙනිදා හිරු නැග හත් පැය හමාරට ආයෙත් දේවත්වයට පත් වෙනවා . ඒ කියන්නේ මේ හතහාමාරට නෙවෙයි . මේ කියන්නේ දවස පැය හැටකට බෙදලා තියෙනකොට ගන්න වෙලාව අනුව . ඒ කියන්නේ සිංහල පැයකට තියෙනවා විනාඩි 24ක් . එහෙම බැලුවම ඉර උදාවෙන වෙලාව අනුවත් ඉර බසින වෙලාව අනුවත් මේ වෙලාව වෙනස් වෙනවා . ඒ අනුව තමයි අදාළ වෙලාව ගණනය කරලා ගන්න වෙන්නේ . මොකද අපිට ඔරලෝසු තිබුණට අමනුස්සයින්ට ඔරලෝසු නැහැනේ .



                                        



ඉතින් කඩවර දෙවියන් ඉතාම බලසම්පන්න දෙවි කෙනෙක් කියන එක අමුතුවෙන් කියන්න දෙයක් නැහැ . කඩවර කියන්නේ ලංකේශ්වර උතුම් මහ රාවණා මහරජතුමාගේ කාලේ ඉඳලා පැවත එන කෙනෙක් කියලා සමහර අය සාක්ෂි සහිතව කරුණු ගෙනහැර දක්වනවා . ඒකත් වෙන්න පුළුවන් . ඒත් ඒ කතාම මම මෙතන ගාවන්න කැමති නැහැ . කඩවර කංකාරිය ගැන යමක් ලියන්න හිතුනු දවසට ඒක ලියන්න කියලා පසුවට කල් තියනවා .

කඩවර දෙවියෝ දේවත්වයට පත් උනාට පස්සේ ලංකාවේ කරදිය වළල්ල වටේ එක වතාවක් ඇවිදලා බලනවා කියලා මතයක් තියෙනවා . මේ වෙලාවට මේ පාර කිසිම කෙනෙක්ට අවහිර කරන්න දෙන්නේ නැහැ කියලත් කියනවා . කඩවර කට්ටුවේ සේනාව කඩවර දෙවියෝ වඩින පාර පැහැදිලි කරලා තියනවා කියලා කියනවා . ඒත් දවසක් ජයරත්න කලුකම්බිලි දේවතාවා මේ පාර අමතක වීමකින් අවහිර කරපු නිසා කඩවර දෙවියෝ කම්බිලි දේවතාවාට දඬුවම් දුන්නා කියලාත් කතාවක් තියෙනවා . ඒ දඬුවම තමයි කිල්ලෝටෙකින් වැලි ඇදලා බිංගිරිය රාජමහා විහාරයේ මළුව පුරවන්න කියපු එක .

කඩවර දෙවියන් කතරගම දෙවියන්ගේ සහ වල්ලිඅම්මාගේ විවාහය වෙනුවෙන් පත්තිනි දේවතාවිය නියෝජනය කරන්න වැඩියා කියලා කතාවකුත් තියෙනවා . තව දවසක කතරගම දෙවියෝ වඩිනවා කඩවර දෙවියන්ගේ විමානයට . ඒවෙලාවේ කතරගම දෙවියෝ දකිනවා කඩවර දෙවියන්ගේ මුරුතැන් ගොටුව . මේ මුරුතැනෙන් ටිකක් කන්න කතරගම දෙවියන්ට ආසා හිතිලා මුරුතැන් ගොටුව අරගෙන යනකොට කඩවර දැකලා තියෙනවා ඒක . පස්සේ කඩවර කරලා තියෙන්නේ කතරගම දෙවියන්ගේ අතින් ඒක උදුරාගෙන කාපු එක . ඔන්න ඔය වගේ කඩවර ගැන රසවත් කතා තියෙනවා . කඩවරට කැපවෙච්ච ප්‍රධාන දේවාලය තියෙන්නේ කලාවැවේ වැව් ඉස්මත්තේ . ඒවගේ තවත් දේවාල ගණනාවක් තියෙනවා .

කඩවර වෙනුවෙන් පහන් දල්වන අයට මම දෙයක් කියන්න කැමතියි . සූනියම් දෙවියන්ට වගේම කඩවර දෙවියන්ටත් පහන් දල්වනකොට අමතක කිරීම් නම් කරන්න එපා . කරනවානම් ඒ වෙනුවෙන් කැප වෙලා කරන්න . නැත්නම් කරන්නේ නැතුව ඉන්න . කඩවර සම්බන්ධව මම අහලා තියෙන කතා අනුව බැලුවම මේවා අතපසු කරන්න නම් එපා කියලා තමයි මම කියන්නේ .






මම දන්න හැටියට කතරගම දෙවියන්ගේ වමත් මුර තේවය හිමි වෙන්නේ සූනියම් දෙවියන්ට . දකුණත් මුර තේවය හිමි වෙන්නේ කඩවර දෙවියන්ට . ඒ නිසා දෙන්නම එක වගේ තමයි දඬුවම් දෙන්න ගත්තම දෙන්න පටන් ගන්නේ . නයි එනවනම් තමන් තියන පහනට , එතන මොඅක්ක් හරි වැරද්දක් තියෙනවා . ඒ නිසා මම කියන්නේ මේ වගේ දේවල් එක්ක සෙල්ලම් කරන්න එපා කියලා .

කඩවර දෙවියන් පුද ලබන ප්‍රධානම ශාන්ති කර්ම දෙක තමයි කඩවර කංකාරිය සහ කොහොඹා කංකාරිය . මේ කංකාරි වලදී කඩවර ගොටුව කියන එක හරිම වැදගත් දෙයක් . මේ කදවෙඅර ගොටුවට ගොඩක් වෙලාවට දෙවියන්ට අදාළ කෑම වර්ග වගේම යක්ෂයින්ට අදාළ මස් පුළුටු අරක්කු රා වගේ දේවල් පවා තියනවා . ඒක කඩවරගේ හැටියට සම්මත කරගත්ත දෙයක් . ඒවගේ දේවල් තියලා තමයි කඩවර දෙවියන්ගෙන් පිහිට ආරක්ෂාව ප්‍රාර්ථනා කරන්නේ .

කඩවර යක්ෂ කට්ටුව ගත්තම එක එක නම් තියෙන කඩවරලා ඉන්නවා .

අඳුන් කඩවර
සඳුන් කඩවර
මල් කඩවර
පුළුටු කඩවර
කළු කඩවර
දළ කඩවර
කුමාර කඩවර
අලුයම් කඩවර
සැන්දෑ කඩවර
මැදියම් කඩවර
රීරි කඩවර

මේ ඔක්කොම අර කලින් කිව්ව මුල් කඩවරගේ පරිවාර යක්ෂ කට්ටුවේ කඩවර යකුන් මිස මුල් කඩවර දෙවියන් නෙවෙයි . මුල් කඩවර දෙවියන් ගුරුකම් හැම එකකටම වඩින්නේ නැති එක කවුරුත් දන්නා අත්තක් . ඒ වෙනුවෙන් එන්නේ මේ වගේ පරිවාර සේනාවේ කෙනෙක් තමයි . මුල් කඩවරට තියන පූජාව කැප ගන්න මේ අය අදාළ කාරණාව ඉෂ්ට සිද්ධ කරලා දෙනවා .

කඩවර යක්ෂයාගේ මල් පැන්නිල්ල වගේ ගුරුකම් වල ඉඳලා සංකීර්ණ ගුරුකම් කොඩිවින වගේ දේවල් කඩවර එක්ක බැඳිලා තියෙනවා . කඩවර පෙරළුම කියන මහානුභාව සම්පන්න මන්ත්‍රයේ ඉඳලා කඩවර කට්ටුවේ වින කපන්න විවිධ මන්තරත් ගොඩ නැගිලා තියෙනවා . කඩවර කංකාරියට ලියන්නත් විස්තර ඉතුරු කරගෙන මෙතනින් ලිපිය අවසන් කරන්නම් .

ගොඩක් අය කියනවා බොරු මන්තර දාන්නේ නැතුව ඇත්ත මන්තර දාන්න කියලා . ඒක කියන්නේ මේවා ලියන්න ගත්ත කාලේ ඉඳලා . අද එහෙනම් දාන්නම් ඇත්ත මන්තරයක් . කියවලා බලන්නකෝ . කටින් කියන්නේ නැතුව හිතෙන් විතරක් කියවලා බලන්න .

මේ තියෙන්නේ කඩවර යක්ෂයා ගෙන්නන මන්තරයක්

ඕන්නමෝ සූර්යග්‍රී නුවර වේතාල නම් හිමයේ සීතාපතී බිසවුන් වහන්සේගේ ලයපලා උඩගිය ලේ ගොබයෙන් උපන් රීරි කඩවරයා දිෂ්ටි බන්ධ වර වර ලමැද පපු කැවුතු මොලින් උපන් මිනී කඩවරයා දිෂ්ටී බන්ධ වර වර රාජ කඩවරයා දිෂ්ටී බන්ධ වර වර වැදී කඩවරයා දිෂ්ටී බන්ධ වර වර සොහොන් කඩවරයා දිෂ්ටී බන්ධ වර වර වැදී කුමාරී දිෂ්ටී බන්ධ වර වර සොහොන් කුමාරී දිෂ්ටී බන්ධ වර වර සීතා පතී දේවතාවී දිෂ්ටී බන්ධ වර වර ගොබර අම්මා දිෂ්ටී බන්ධ වර වර පත්තිනි අම්මා දිෂ්ටී බන්ධ වර වර සූර්ය ග්‍රී පර්වතේ දෙදරවා වර වර අකනිට්ටා බ්‍රහ්ම ලෝකේ ඉඩ හරවා වර වර රාම ග්‍රී කූට පර්වතේ වෙව්ලවා වර වර කියා මල රජ්ජුරුවෝ සූර්ය ග්‍රී පර්වතේදී ඊතන කෙන්දෙන් බැඳ මැණික් කරඬුවට දමා තනිපල බන්ධනේට හිර තඩුත්තු කල මිනී කඩවර යක්ෂයා දිෂ්ටී බන්ධ වර වර එස්වාහඃ...........

මෙන්න මේක තමයි වින කපන්න ගන්න මහානුභාව සම්පන්න කඩවර පෙරළුම මන්ත්‍රය කියන්නේ

ඕන් පත්‍රාඩි ශර ගිනි කඩවර පෙරලුම් ආපිට හැරී වින කල අයගේ හිස ලේ පපු මස් බිලි ගං ඕඩු පලයන් අප්පොච්චි එලේන්ද්‍රි ඕඩු..............

ඕන් කන්දප්පා ශර ගිනි විසි ලේ කඩවර පෙරලුම් වර වර බන්ධන සුං සුං නමඃ ...........................

ඕන් රාම රාම කන්ධ කුමාර කළු කම්බිලි තොට කඩවර පෙරළුම් වින බන්ධන පිපිරී ආපිට හැරී පයලන් තෝස්වාහඃ.................

ඕන් ඊශ්වර කාඩේරියුම් දළ කඩවර පෙරලුම් කට්ටු බන්ධන ඉනා බන්ධන හැට හතරක් බන්ධන කැපී පලයන් තෝස්වාහඃ...............

ඕන් ඊශ්වර ගිනි මාලාව පැළඳි කඩවර පෙරළුම් තොටයක් දෙමල පිල්ලි බන්ධන කැපී ඉඩහැරී එලාගන් දේවතාවා එලාගන් ........................

ඕන් කමල ගිනි විෂ්ණු නාරායනේ රන් දුනු පුපුරුවා වැදි කඩවර පෙරලුම් එකසිය අටක් අංගං නවසියයක් සූනියම් වඩාපු ඇදුරාගේ හදවත පපු මස් කැපකර එලාගන් පලයන් තෝස්වාහඃ....................

ඕන් විෂ්ණු ශර භෛරව තෝංගු මල් කඩවර පෙරලුම් බන්ධන කැපී ආපිට පෙරලීයන් තෝස්වාහඃ..................

එහෙනම් ආයෙත් ලිපියකින් හමුවෙමු .

ඔබ සැමට සමන් දෙවිඳුගේ පිහිට ලැබේවා !

18 අදහස් උදහස්:

රසයිද, තිත්තයිද, දිරවගන්න බැරිද, මෙලෝ රහක් නැත්ද, දැනුන රස කිව්වොත් අපිටත් සතුටුයි.

ගොඩ කාලෙකින් බ්ලොග් එක පැත්තට එන්න ඉඩක් ලැබුණේ නැත්තේ වැඩ රාජකාරි ගොඩක් වැඩිවෙලා තියෙන නිසා . හදිස්සියේම මේ වගේ ලිපියක් ලියන්න හිතුවේ ...

ජ්‍යෝතිෂ පර්යේෂණ





ගොඩ කාලෙකින් බ්ලොග් එක පැත්තට එන්න ඉඩක් ලැබුණේ නැත්තේ වැඩ රාජකාරි ගොඩක් වැඩිවෙලා තියෙන නිසා . හදිස්සියේම මේ වගේ ලිපියක් ලියන්න හිතුවේ පොත් පත් කියවීම නිසා ලබාගත්ත සමහර කරුණු අද කාලයට ගැළපෙන්නේ නැහැ කියලා පෙනුණු නිසා . අලුත් දෑ නොතනන ජාතිය ලොව නොනගී කියනවා වගේ අපේ විෂයන් පවා අලුත් වෙන්න ඕන . ඒ නිසා අලුත් දත්ත එකතු කරන්න ඕන . මේ වැඩෙත් ඒ වගේ දෙයක් .

මම එකතු කරගත්ත යම්කිසි දැනුම් සම්භාරයක ජ්‍යෝතිෂ විද්‍යාවට අදාළ දැනුමෙන් වැඩක් ගන්න අරගෙන ලබන මාසයට අවුරුද්දක් පිරෙනවා . මම තැන් කීපයකම කියලා තියෙනවා වයස අවුරුදු 11 ඉඳලා ටික ටික අධ්‍යනය ක‍රලා තමයි මේ දක්වා ආපු ජ්‍යෝතිෂ ගමන්මගේ යම් දුරක් එන්න පොඩි දැනුමක් එකතු කරගත්තේ . ඒත් ඉගෙන ගන්න ඉගෙන ගන්න තවත් ඉගෙන ගත්තේ නැති දේවල් පෙනෙන නිසා ඒ දේවල් ගැන අධ්‍යනය කරන්න පර්යේෂණ මට්ටමේ යම් දෙයක් කරන්න තමයි බලාපොරොත්තු වෙන්නේ . ඒ වෙනුවෙන් කේන්දර සටහන් එකතුකිරීමක් කරන්න මේ වෙනකොට අවශ්‍ය වෙලා තියෙනවා .

පිළිකාව අද වෙනකොට උන හෙම්බිරිස්සාව ගානටම වැටිලා තියෙන්නේ . පිළිකා රෝගීන්ගේ කේන්ද්‍ර සටහන් කීපයක් පරීක්ෂා කරන්න ලැබුණා . ඒත් ගොඩ එන්න පොඩි හරි හැකියාවක් ඇතුව නෙවෙයි ඒ අය හිටියේ . සමහර අය ඔපරේෂන් කරලා යම් මට්ටමකට ඉන්නවා . ඒ අයට මේ ජ්‍යෝතිෂ විද්‍යාව හරහා උදව්වක් කරන්න බලාපොරොත්තුවක් තියෙනවා . ඒ වෙනුවෙන් පිළිකා රෝගීන්ගේ කේන්දර සටහන් අවශ්‍ය වෙලා තියෙනවා . ඒ දත්ත කවදාහරි පිළිකාවක් හැදෙන්න ඉන්න කෙනෙක්ට පරෙස්සම් වෙන්න දෙන උපදෙසකට හේතු වේවි . ඒ නිසා ඒ පිනට දායක වෙන්න කියලා ආරාධනා කරනවා .

සමලිංගික වීම අද වෙනකොට කතාවෙන තවත් මාතෘකාවක් . පිරිමින් සහ කාන්තාවන් සමලිංගික වීම පිළිබඳව යම් යම් බටහිර ජ්‍යෝතිෂ මත තිබුණත් පෙරදිග ජ්‍යෝතිෂයේ ඒ ගැන කියවෙනවා තරමක් දුරට අඩුයි . ඒත් යම් පැහැදිලි කිරීම් තියෙනවා . සමලිංගික ජීවිතයක් ගෙවන්නන්ගේ කේන්ද්‍ර සටහන් අවශ්‍ය වෙලා තියෙනවා . මොකද ඒ ගැන අද කාලේ කතාවෙනවා වගේම තමයි දැනට වසර 6000 කට වගේ ඈත හිටපු සමහර ඍෂිවරු කියලා තියෙනවා සෞරග්‍රහ මණ්ඩලයට ආසන්න වෙන තවත් ග්‍රහ වස්තූන් තුන් දෙනෙක් නිසා මිනිසුන්ගේ කාමාශාවන්ගේ යම් වෙනස් වීමක් ඇතිවෙනවා කියලා . ඒ යුරේනස් නැප්චුන් ප්ලූටෝ කියලා තමයි විශ්වාස කෙරෙන්නේ . ඒ අනුව බලනකොට සමලිංගික වීම කේන්දරේ කොහොමද වඩාත් හොඳට පෙන්වන්නේ කියලා පරීක්ෂා කරලා බලන එක යාවත්කාලීන වීම් වශයෙන් වටිනවා .

අනෙත් දැවෙන ප්‍රශ්නය තමයි අද කාලේ වැඩි දෙනෙක්ට දරුඵල අඩුවීම . වෛද්‍ය විද්‍යාව අනුව බලනකොට කිසිම ප්‍රශ්නයක් නැතත් දරුවන් නැති සමහර පවුල් කීපයක් මේ වෙනකොට මගේ අවධානයේ ඉන්නවා . ඒ අයගේ යම් දුර්වලතාවයන් හඳුනාගෙන ප්‍රතිකාර කරගෙන් ගියත් ඒ දේවල් සාර්ථක වීමේ සම්භාවිතාවය අඩුයි . සමහරු IUI 7 , 6 වගේ ප්‍රමාණයක් කරලා තියෙනවා . ඒත් වැඩක් වෙලා නැහැ . ඒ නිසා දරුඵල අඩුවීම නිසා ගැටළු වලට මුහුණ දීලා ඉන්න යුවලවල්වල කේන්දර සටහන් අවශ්‍ය වෙනවා .

මේ කේන්දර එකතු කරන්නේ හූනියම් කරන්න නෙවෙයි කියලා මතක් කරන්න ඕන . මිනිස්සු හිතන්නේ කේන්දරේ වෙන කෙනෙක් ගත්තම තමන්ට හූනියම් කරන්න තමයි කේන්දර ගන්නේ කියලා . වෙන වැඩ නැති අයටනම් ඒවා හොඳයි . ඒත් ඉතින් මටනම් වෙන වැඩ තියෙනවා . ඒ නිසා උදව්වක් හැටියට තමන්ගේ වෙලාවල් ලබාදෙන්න කියලා ඉල්ලා හිටිනවා .

මොනවද අවශ්‍ය වෙන දත්ත කියලා පහළින් මම සටහන් කරනවා . අදාළ කැටගරි එක මොකක්ද කියලා සඳහන් කරලා වෙලාවල් ලබා දෙන්න . ප්‍රභාශ්වර ජ්‍යෝතිෂ සේවය සඳහා සම්බන්ධ වෙන්න පුළුවන් ඕනෑම විදියකින් සම්බන්ධ වෙන්න . මේ වෙනුවෙන් මුදල් අය කරන්නේ නැහැ . තමන්ගේ කේන්දර සටහන ලබා දෙන්න විතරයි තියෙන්නේ .

පිළිකා රෝගීන්ගේ මෙන්න මේ දත්ත අවශ්‍ය වෙනවා .

ස්ත්‍රී පුර්ෂ භාවය
උපන් දිනය
උපන් වෙලාව am pm සමග
උපන් නගරය හෝ ගම
පිළිකාව තියෙන තැන හෝ ස්වභාවය
පිළිකාව හඳුනාගත් කාලය
මිය ගිය කෙනෙක්ගේ නම් ඒ කෙනා මිය ගිය කාලය ?




සමලිංගික චර්යාවන් සහිත අයගේ මෙන්න මේ දත්ත අවශ්‍ය වෙනවා

ස්ත්‍රී පුර්ෂ භාවය
උපන් දිනය
උපන් වෙලාව am pm සමග
උපන් නගරය හෝ ගම
සමලිංගික සම්බන්ධයකදී තමන්ගේ චරිතය ( ස්ත්‍රී භූමිකාව / පුර්ෂ භූමිකාව )



දරුපල සම්බන්ධ ගැටළු සහිත අයගේ මෙන්න මේ දත්ත අවශ්‍ය වෙනවා

පිරිමි කෙනාගේ සහ ගෑණු කෙනාගේ කේන්දරවල මෙන්න මේ විස්තර වෙන වෙනම
ස්ත්‍රී පුර්ෂ භාවය
උපන් දිනය
උපන් වෙලාව am pm සමග
උපන් නගරය හෝ ගම
විවාහ වුණ කාලවකවානුව



මේ විස්තර ලබා දෙනවානම් ලාභය මත පදනම් වෙලා මේ ජ්‍යෝතිෂ විද්‍යාව විනාශයට ඇදලා දාපු මිනිස්සු කරපු විනාශයෙන් තරමක් හෝ ජ්‍යෝතිෂ විද්‍යාව ගොඩ ගන්නත් ගොඩක් දෙනෙක්ට අනාගත කාලයේ උදවු උපකාර කරන්න මේ කේන්දරවලින් ඇතිවෙන සංකල්ප ප්‍රයෝජනයට ගන්නත් පුළුවන් වෙයි . ඒ නිසා හැකි අයුරකින් මේ වෙනුවෙන් සම්බන්ධ වෙන්න කියලා ඉල්ලා හිටිනවා . 


ප්‍රභාශ්වර ජ්‍යෝතිෂ සේවය වෙනුවෙන් සම්බන්ධ වෙන්න පුළුවන් ඕනෑම ආකාරයකින් මේ තොරතුරු ලබාදන්න කියලාත් ආරාධනා කරනවා . 

ඔබ සැමට සමන් දෙවිඳුගේ පිහිට ලැබේවා !

4 අදහස් උදහස්:

රසයිද, තිත්තයිද, දිරවගන්න බැරිද, මෙලෝ රහක් නැත්ද, දැනුන රස කිව්වොත් අපිටත් සතුටුයි.