Friday, July 29, 2016

" ශකාබ්දම් " කියන්නේ මොකක්ද ? ( ශක රාජ වර්ෂ ක්‍රමය )








මේ ලඟදි දවසක් මම කැම්පස් යන්න කියලා උදේම ලෑස්ති උනා . මමයි අපේ බෝඩිමේ ඉන්නේ මගේ බැච් එකේ අනිත් යාළුවයි සාමාන්‍යයෙන් උදේ හයහමාර විතර වෙනකොට කැම්පස් එකට යනවා . මොකද කැන්ටින් වල පෝලිම හැදුනට පස්සේ ඔය පෝලිම කිලෝමීටර් ගානක් දුරට තියෙනවා . ඕකේ හිටගෙන ඉන්න අපි කැමති නැහැ . ඒ නිසා උදේම ගිහින් කාලා බීලා ඔය කොහාටහරි වෙලා ඉඳලා ලෙක්චර්ස් පටන්ගන්න වෙලාවට ඒ පැත්තට යනවා . 

ඉතින් මේ දවසෙත් මම උදේම පිබිදී මුහුණට දිය දී කුල දෙවි නැමද බෝඩිම ඇමද කැම්පස් යන්න ලෑස්තිවෙනකොටම පහල ඇඳේ හිටපු සිංදුවගේ මල්ලිට බාගෙට වගේ ඇහැරිලා . නින්දෙන් වගේ මගෙන් ඇහුවා ශකාබ්දම් කියලා කියන්නේ මොකක්ද කියලා . මම හිතන්නේ ශක රජ්ජුරුවෝ හීනෙන් පෙනිලද කොහෙද . මම ඉතින් එවෙලේ හදිස්සියට කිව්වා ශකාබ්දම් කියලා කියන්නේ ශක රාජ වර්ෂ වලට කියලා . 





එදා ඒ බාගෙට දීපු උත්තරේ සම්පූර්ණ කරන්න තමයි මම අද මේ ලිපිය ලියන්නේ . ශක රාජ වර්ෂ ක්‍රමය ගොඩක් වෙලාවට ශ්‍රී ලාංකික අපිට අදාළ දෙයක් නෙවෙයි . මේ වර්ෂ ක්‍රමය ආවේ ඉන්දියාවෙන් . එක එක පොත්වල මේ ගැන විවිධ මත තියෙනවා . සමහර පොත්වල තියෙනවා ශක රාජ වංශයේ එක රජකෙනෙක් යුද්ධයක් දිනපු නිසා එයාව සිහිපත් වෙන්න එතන ඉඳලා ශකරාජ වර්ෂ පටන් ගත්තා කියලා . තව මතයක් තියෙනවා කනිෂ්ක රජතුමා රජ උනාට පස්සේ ශක රාජ වර්ෂ ක්‍රමය පටන් ගත්තා කියලා .

තවත් තැනක තියෙනවා ශක රාජ කියන රජතුමා මියගියාට පස්සේ එයා ජෝතිෂ්‍ය විද්‍යාවට කරපු සේවය නිසා එතන ඉඳලා වර්ෂ ගණනය කිරීමට ශක රාජ වර්ෂ කියලා නම් කරා කියලා . මේ මත ඔක්කොම එක්ක තමයි ශක රාජ වර්ෂ ක්‍රමය ඇතිවෙලා තියෙන්නේ . හැබැයි ඒ කෙසේ වෙතත් ශක රාජ වර්ෂ ගණනය කිරීම නම් පැහැදිළියි . ක්‍රිස්තුවර්ෂ ගණනින් 78ක් අඩු කරාට පස්සේ එනවා ශකරාජ වර්ෂය මොකක්ද කියලා . 





බුද්ධ වර්ෂ 
ක්‍රිස්තු වර්ෂ 
ක්‍රිස්තු පූර්ව 
ප්‍රහවාදී වර්ෂ

වගේ වර්ෂ මනින ක්‍රම වලින් එකක් තමයි මේ ශක රාජ වර්ෂ ක්‍රමය කියලා කියන්නේ . මේ වර්ෂ ක්‍රමය ඇතිවෙන්න හේතු වුණා කියලා ගොඩක් තැන්වල තියෙන කතාවක් මම මේ ලිපියත් එක්ක ඔයාලට කියන්නෙම් . ඒක ටිකක් අසාමාන්‍යයි වගේ කියලත් හිතෙනවා . ඒත් ඒ වගේ දෙයක් ඒ කාලේ වෙන්නත් පුළුවන් කියලා මට හිතෙනවා . 

මම කියවපු සමහර පොත්වල තියෙනවා රාවණා රජතුමාගේ කාලයේ දරුවන් බිහි කිරීමේදී එක එක බෙහෙත් වර්ග වලින් මේ දරුවන් අම්මගේ බඩේ ඉන්නකොටම එක එක දේවල් වලට විශේෂ හැකියාවන් ලබා දෙන්න වැඩ කටයුතු කරා කියලා . සමහර වෙලාවට අම්මට දෙන ඖෂධ වර්ග වලින් තමයි මේ දේ කරලා තියෙන්නේ . ගොඩක් වෙලාවට යෝධයින් වගේ අය උපද්දවා ගන්න ඕන උනාම ඒ වෙනුවෙන් නැකත් , හෝරා වගේ දේවල් බලලා ඒ වෙනුවෙන් අවශ්‍ය ඖෂධ වර්ග ලබා දීම වගේ දේවල් කරලා තියෙනවා . මේ ශක රාජ වර්ෂ ක්‍රමය ඇතිවෙන්නත් හේතුවෙලා තියෙන්නේ ඒ වගේ රසවත් සිදුවීමක් . 



මම මේ කියන සෘශි වරයාගේ නමක් සඳහන් වෙන්නේ නැහැ . ඒත් සමහර තැන් වල තියෙනවා ගෝතම පුත්‍ර ශකරාජ කියලා . ඒ කියන්නේ මේ ශකරාජයාගේ පියාගේ නම ගෝතම . මට සැකයක් තියෙනවා මේ ගෝතම සෘෂි වරයාද අර ශක්‍ර දේවේන්ද්‍රයාට ඇස් දාහක් ලැබෙන්න ශාප කරේ කියලා . කොහොමහරි ගෝතම කියලා සෘෂි කෙනෙක් තමයි මේ කතාවේ කතා නායකයා වෙන්නේ .

ඉන්දියාවේ හිටපු එක තරුණයෙක් ඒ කාලේ හැටියට ජෝතිෂ්‍ය විද්‍යාව ඉගෙනගෙන ඒ ශිල්පයේ පරතෙරටම ගිහින් ඉන්දියාවේ ගොඩක් ප්‍රසිද්ධ වෙලා හිටියා . මෙයා විවාහක කෙනෙක් . හැබැයි සමහර වෙලාවට මෙයා භාවනා කරන්න වගේ දේවල් වලට හිමාලයට යනවා .  ඒ කාලේ සෘෂි වරුත් එහෙමනේ ඉඳලා තියෙන්නේ . විවාහ වෙලා ඉඳගෙන තමයි තමන්ගේ ධර්මය හෝ ශිල්පය වැඩි දියුණු කරගෙන තියෙන්නේ . මේ තරුණයත් හිමාලයට ගියා ටික කාලයකට . ඒ ගිහින් එයා තරු රටා නැකත් වගේ දේවල් එක්ක පරීක්ෂා කරා ඉන්දියාවට අග රජ වෙන්න පුළුවන් කෙනෙක් මේ ලෝකයට පහළ වෙන්න පුළුවන් නැකතක් , ශුභ වෙලාවක් තියෙනවද කියලා . සියුම් ක්‍රම වලින් කොහොමහරි එයා ඒ වේලාව හොයාගත්ත . හැබැයි ඒ වේලාව දීලා තිබුණේ ඊට දින කීපයකට පස්සේ . ඒ වෙලාවටම ස්ත්‍රියක් සමග එක් වීමෙන් හටගන්නා දරුවා තමයි මෙහෙම ඉන්දියාවටම අග රජ වෙනවා කියලා එයා හොයාගත්තේ . 

මෙයාට ආශාවක් ඇතිවෙනවා ඒ දරුවාගේ , එහෙමත් නැත්නම් ඒ අගරජුගේ පියා වෙන්න . පස්සේ මෙයා හිමාලයේ ඉඳලා ඉක්මනට ඉක්මනට එනවා තමන්ගේ බිරිඳ ඉන්න ගමට මේ දරුවාගෙ තාත්තා වීමේ බලාපොරොත්තුවෙන් . ඒත් එයාට කාලය මදි වෙනවා . නැකත් වෙලාවා ආසන්න වෙනවා . පස්සේ මෙයා කරන්නේ ඒ අසල පිහිටලා තියෙන නිවසකට යන එක . 

පස්සේ මෙයා ඒ නිවසේ වැඩිහිටියෝ එක්ක මේ ගැන කතා කරනවා . එයා සේරම විස්තරේ කියලා තමා කවුද කියලත් හඳුන්වලා දෙනවා . ඒ දුන්නට පස්සේ ගෙදර අය මෙයාගේ දක්ෂතාවය සහ ඥානය ගැන පැහැදිලා මේ ගෙදර හිටපු අවිවාහක තරුණ දියණිය මේ තරුණයට දෙනවා ඒ අවශ්‍ය කාර්යය ඉටු කරගන්න . පස්සේ හෝරා කීපයකින් ලබපු ඒ නැකතින් ඒ තරුණයා අර ගෙදර හිටපු තරුණිය එක්ක සිදුවන එකතු වීමකින් ඒ තරුණියගේ කුසේ දරු ගැබක් ඇතිවෙනවා . 

නිසි කාලයේදී මේ තරුණිය දරුවා බිහි කරනවා . දරුවට නම තිබ්බේ " ශක " කියලා . මේ දරුවා දැකපු බමුණු පඬිවරු පවා අනාවැකි කියලා තිබුණා මේ දරුවා මුළුමහත් දඹදිවටම අගරජු වෙනවා කියලා . ඒත් හැබැයි ඒ හරි පාරෙන් නෙවෙයි . උපායශීලීව තමයි . කොහොමහරි උපායශීලීව මේ දරුවා නිසි වයස එළඹුනාට පස්සේ ඉන්දියාවේ අගරජු බවට පත් වෙනවා . ඒ වගේම ඔහු තමන්ගේ පියා තරමටම ජෝතිෂ්‍ය විද්‍යාවේ ප්‍රවීනයෙක් වෙනවා . 





ඉන්දියාවේ එවකට තිබුණු ජෝතිෂ්‍ය විද්‍යාව දියුණු කරන්න . පොත් පත් ලියන්න මේ රජතුමා අනුග්‍රහය දක්වනවා . මේ රජතුමාගෙන් තමයි ශකරාජ කියන වර්ෂ ක්‍රමය ආරම්භ උනා කියලා කියන්නේ . මේ රජතුමාගේ කාලයේ තමයි වාරාහමීර පාරාෂර ධනවන්තරී වගේ සෘෂිවරු ඉඳලා තියෙන්නේ . මේ රජතුමා මියගියාට පස්සේ ජෝතිෂ්‍ය විද්‍යාව පිළිබඳව තීන්දු තීරණ ගත්ත සෘෂිවරු තීරණය කරා මේ රජතුමාගේ නමින් වර්ෂ ක්‍රමයක් ආරම්භ කරන්න . ක්‍රිස්තුවර්ෂ 78 දී තමයි මේ රජතුමා මියගිහින් තියෙන්නේ . ඉතින් එදා ඉඳලා ශකරාජ වර්ෂ ක්‍රමය ඇතිවෙලා තියෙනවා . මීට වඩා වෙනස් කතාත් තියෙනවා . ඒත් මේ කතාව තමයි ටිකක් ගතියට තියෙන්නේ . ඒ නිසා මම ඔන්න ඒ කතාව ඔයාලට අරගෙන ආවා . 

මේ කතාව කියවනකොට ඔයාලට හිතෙන්න පුළුවන් මේ දේවල් වෙන්න බැහැ නේද කියලා . මොකද නැකත යෙදීමයි ඒ තරුණියගේ සරු කාලයයි එකටම යෙදිලා තියෙන්නේ කොහොමද කියලා . ඒත් වෙලා තියෙන්නේ එහෙම තමයි . 

අපි දැන් මේ ගත කරන්නේ 2016 - 78 = 1938 කියන ශකරාජ වර්ෂය . 

එහෙනම් තවත් ලිපියක් අරගෙන ආයෙත් එන්නම් . මේ ලිපියෙන් බලාපොරොත්තු වෙන්නේ දැනුවත් කිරීමක් විතරයි . ඒ නිසා අඳබාල අවිචාරවත් කමෙන්ට්ස් නොදානවානම් හොඳයි කියලා මම විශ්වාස කරනවා . 

ඔබ සැමට සමන් දෙවිඳුගේ පිහිට ලැබේවා !

Wednesday, July 27, 2016

හෙළ වෙදකමේ දැක්වෙන ලිංගික උත්තේජක ඖෂධ







මේ ලිපිය ලියන්න ඕන කියලා හිතලා අවුරුද්දක් විතර වෙනවා . ඒත් අවශ්‍ය කරන බෙහෙත් වට්ටෝරුවල හිඟතාවය නිසා මම මේ ලිපිය ලියන එක ප්‍රමාද කර කර හිටියේ . මේ ලිපිය ලියන්න හිතුවේ ඇයි කියලා කියනවනම් ඒකට පොඩි කතාවක් තියෙනවා . ඒක ආවේ අපේ බෝඩිමෙන් .

අපේ බෝඩිමේ මම කලින් හිටපු රූම් එකේ හිටියේ හතරදෙනයි . අපි හතරදෙනෙක් හිටියට මොකද ඒක ඇවිල්ලා හය දෙනෙක්ට දෙන කාමරයක් . ඒ නිසා තවත් ඇඳන් දෙකක් හිස්ව තිබුණා . කාලයක් යනකල් අපි මේ ඇඳන් දෙකට කාවවත් ගන්න දෙන්නේ නැතිව හිටියට මොකද ටික දවසක් යනකොට එකෙක් ආවා . අපි හිතුවේ නෑ පොරත් බලලා ගියාට රූම් එකට එයි කියලා . ඒත් අපි නොහිතපු වෙලාවක පොර , පොරගෙ බඩු ටිකත් කරගහන ආවා . ඇවිත් ඉතින් ටික දවසක් ගියාට පස්සේ තමයි අපිට තේරුනේ මිනිහා අපිට හරියන්නේ නැති චරිතයක් කියලා . අපි හතරදෙනාම කැම්පස් . ඌ මොකුත් කරන එකෙක් නෙවෙයි . ඌ කරන්නේ කෙල්ලන්ට බැල්ම දාලා කෙල්ලෝ රවට්ටගෙන කරගන්න ඕන හරිය කරගෙන අතෑරලා දාන එක . ඔය වෙනුවෙන් මිනිහා තමන්ගේ ඇඟ හරියට තියාගන්න මාර විදියට මහන්සි උනා . මිනිහා වැඩි කාලයක් ගත කලේ ජිම් එකේ . කොයිවෙලෙත් බිත්තර කනවා , පළතුරු කනවා අරවා මේවා කරනවා . ඒ වැඩ පිළිවෙල අපේ කැම්පස් වැඩ වලට හරිම කරදරයක් වෙලා තිබුණේ .

අපි අපේ පාඩුවේ හිටියට පස්සේ පස්සේ මිනිහගේ වැඩ කටයුතු එන්න එන්නම අපිට වදයක් වේගෙන ආවා . මිනිහා රූම් එකේ ඉඳගෙනම කෙල්ලන්ට කතා කරනවා . අනාත වෙච්ච කෙල්ලෝ අඬනවා ඒ වගේ ප්‍රශ්න ගොඩයි . මේ අතරේ මිනිහට මිනිහගේ යාළුවන්ගෙනුත් කෝල් එනවා . ගොඩක් වෙලාවට මිනිහට යාළුවො කෝල් කරලා අහන්නේ ලිංගික උත්තේජක ඖෂධ වර්ග ගැන . පොර ඒ බෙහෙත්වල නම් කියන්නේ හරියට ඩොක්ටර්ලටත් උගන්නන්නේ ඌ වගේ . ඒවයේ මාත්‍රාව ගැනවත් හරියට දන්නේ නැති උනාට පොර කියනකොට කියන්නේ පෙති තුනහතරක් බීපන් බං කියලා . පස්සේ අපි බෝඩිම අයිති උදවියට කියලා මිනිහව එලෙව්වා .





ඒත් ඒ කතාව මගේ හිතේ තිබුණා . මේ ලිංගික උත්තේජක වර්ග ගැන ලිපි කීපයක් කියවලා බැලුවම තමයි මට තේරුම් ගියේ මේවා ගොඩක් ගත්තම ඇඟට ඒක හොඳ නැහැ කියලා . ලිංගික උත්තේජක වර්ග ගොඩක් දුරට ප්‍රචලිත වෙන්න අරගෙන තියෙන්නේ කාමෝද්දීපන චිත්‍රපට නිසා කියලා තමයි කියන්නේ . මොකද මේ චිත්‍රපට වල තියෙන දේවල් තමනුත් අත්දකින්න තියෙන ආසාව නිසා ගොඩක් අය උත්තේජක වලට යොමුවෙලා තියෙනවා .

සංසර්ගයේ යෙදෙන කාලය වැඩි කරගන්න එක තමයි මේ උත්තේජක ගන්න අයගේ ප්‍රධානම අරමුණ වෙන්නේ . ඊට අමතරම නෂ්ටකාමය නැතිකරගන්නත් සමහර අය මේ ඖෂධ ගන්නවා කියනවා . මේවායේ තියෙන අතුරු ආබාධ වලින් කීපයක් මම මෙතන සටහන් කරන්නම් .

පපුවේ අධික දැවිල්ලක් ඇතිවෙන්න පුළුවන්
ඔලුවේ කැක්කුම
පාචන තත්ත්වයන්
හෘද ස්පන්දන වේගය ඉහල යෑම
දේහ උෂ්ණත්වය වැඩි වීම
නාසයෙන් ලේ ගැලීම
නින්ද නොයාම
අත්පා හිරිවැටීම
මස්පිඩුවල අධික වේදනාව
නිල් පාට සහ කොළ පාට වෙන් කර හඳුනාගත නොහැකි වීම
කන් ඇසීම අඩු වීම
පෙනීම අඩුවීම
කරකැවිල්ල
ක්ලාන්තය
හුස්ම ගැනීමේ අපහසුතා
මුත්‍රා දැවිල්ල
සිරුර පුරා පළු දැමීම

වගේ දේවල් ඇතිවෙන්න පුළුවන් . මේ වගේ දේවල් මේ ඖෂධ භාවිතා කරන්න පටන් ගත්ත කාලයේ වෙන්නත් පුළුවන් . අධික භාවිතය නිසා වෙන්නත් පුළුවන් . මේ ඖෂධ ඇත්තටම නිපදවලා තියෙන්නේ ලිංගික ආශාව නැති අයට සහ බෙලහීන තත්ත්වයන් වෙනුවෙන් පාවිච්චි කරන්න . ඒත් අද වෙනකොට කිසිම ප්‍රශ්නයක් නැති අයත් මේ බෙහෙත් වර්ග වලට යොමුවෙලා තියෙනවා මේ කාමෝද්දීපන චිත්‍රපට නිසා ඇතිකරගෙන තියෙන වැරදි මත නිසා .

මම දැන් එන්නම් මගේ ලිපිය ගැන කියන්න . මම මේ ලිපියෙන් බලාපොරොත්තු වෙන්නේ සිංහල වෙදකමේ ඉගැන්වෙන බෙහෙත් වට්ටෝරු කීපයක් ඉදිරිපත් කරන්න . රාවණා රජතුමාගේ කාලේ ඉඳලා මේ වගේ දේවල් සඳහාත් බෙහෙත් වර්ග නිපදවලා තියෙනවා . මම කියවපු සමරහ පොත්වල ඒ බෙහෙත් වට්ටෝරු අඩංගු වෙලා තිබුණා . ඒ කාලේ ඒවා නිපදවලා තියෙන්නේ සංසර්ග කාලය වැඩි කරගන්න නෙවෙයි . ලිංගික ක්‍රියාකාරකම් වෙනුවෙන් යහපත් සෞඛ්‍ය තත්ත්වයක් පවත්වාගැනීම වෙනුවෙන් .

මේ ලිපි කියවන ඔබත් දැනටමත් ලිංගික උත්තේජක ඖෂධ භාවිතා කරනවානම් අදම හිතාගන්න ඒ දේවල් ටික ටික හරි අතෑරලා දාන්න . තමන්ට යම් විදියක ගැටළුවක් තියෙනවම මේ බෙහෙත් වට්ටෝරු පාවිච්චි කරලා හොඳ ප්‍රතිඵල තියෙනවද කියලා උත්සහ කරලා බලන්න . විශේෂත්වය තියෙන්නේ මේ බෙහෙත්වල ශරීරයට අහිතකර බවක් නොමැති වීම තමයි .


1
අමුක්කරා අල ,  තල , තිප්පිලි , සමාන ප්‍රමාණවලින් අරගෙන හොඳට චූර්ණ වෙනකල් අඹරාගන්න . මේ මිශ්‍රණය එක වරකට කලං භාගය ගානේ ගිතෙල් මීපැණි එක්ක කලවම් කරලා ආහාරයට ගන්න .

2
අමුක්කරා අල , බින්තල් අල , රට ඉඳි , උඳු , වියලි මුද්දරප්පලම් , සමාන ප්‍රමාන අරගෙන චූර්ණ වෙනකල් අඹරාගෙන මීපැණි ගිතෙල් එක්ක එක වරකට කලඳ ගානේ ආහාරයට ගන්න .

3
අමුක්කරා අල , ඉකිරි ඇට , ගොකටු , උඳු , එළ ඉඹුල් මැලියම් , වැල්මී , බින්තල් , සමාන ප්‍රමාණ අරගෙන චූර්ණ කරලා වරකට කලං එකහමාර ගානේ ආහාරයට ගන්න . මේක ලිංගික ගැටළු ගොඩකට හොඳ ප්‍රතිකාරයක් .

4
අමුක්කරා , ඉකිරි ඇට , බැවිල මුල් , වඳුරු මෑ ඇට , හාතාවාරිය , වැල්මී , සිරිවැඩි බැවිල කියන මේ දේවල් සමාන ප්‍රමාන වලින් අරගෙන චූර්ණ කරගන්න . ඒ චූර්ණය වගේ ඇට ගුණයක් එළකිරි අරගෙන ඒවා එකට කලවම් කරලා හොඳට රත් කරන්න . ඊට පස්සේ ගිතෙල් එක්ක රත් කරලා සමාන ප්‍රමාණයක් සූකිරි එක්ක කලවම් කරලා වරකට කලං තුන ගානේ උදේ හවස එළකිරි එක්ක ආහාරයට ගන්න . ප්‍රභල උත්තේජක ඖෂධයක් මේක .

5
නෙල්ලි ඉස්ම බෝතලයක් හිරු එළියේ තියලා වාෂ්ප කරන්න . මේක හොඳට වාෂ්ප වෙලා සාන්ද්‍ර උනාට පස්සේ එයින් මේස හැන්දක් මීපැණි , සූකිරි , ගිතෙල් එක්ක මිශ්‍ර කරලා දවසකට දෙවතාවක් ආහාරයට ගන්න . මේක මාස තුනක් විතර එක දිගට ගන්න කියලා තමයි කියන්නේ .

6
කාමරංගා ගහේ පස්පංගුව කලං හය ගානේ අරගෙන වැල්පෙනෙල කලං හයක් එකතු කරලා වතුර කෝප්ප අටක් සහ එළකිරි කෝප්පයක් එකතු කරලා හොඳට උණු කරලා නටවලා එක කෝප්පයකට හිඳ ගන්න . පස්සේ ඒක පානය කරන්න . නෂ්ටකාමය දුරු කරන්න මේ ඖෂධයට පුළුවන් .

7
අමුක්කරා , උඳු , වැල්මී , කිරිබදු , හාතාවාරිය අල , වැල් පෙනෙල මුල් , ඉරමුසු , වඳුරු මෑ ඇට , කියන ඒවායින් කලං එකහමාර ගානේ අරගෙන වතුර පත 8ක් එකතු කරලා පත එකකට හිඳගන්න . මේක පස්සේ පෙරලා අරගෙන උදේ හවස සීනි සහ මීපැණි එක්ක කෝප්ප භාගය බැගින් සතියක් විතර බොන්න .

8
අමුක්කරා අල , වියලි කිරිබදු අල , වැල්මී , මේවායින් සමාන ප්‍රමාන අරගෙන සියුම්ව කුඩු කරගෙන වරකට කලං දෙක ගානේ උදේ හවස බටර් , ගිතෙල් හෝ මීපැණි එක්ක ආහාරයට ගන්න .

9
වඳුරු මෑ ඇට මද , නීරමුල්ලිය සමාන ප්‍රමාන අරගෙන සියුම්ව අඹරලා චූර්ණ කරගන්න . මේකෙන් වරකට මන්චාදී පහ ගානේ උදේ සවස සීනි එක්ක ආහාරයට අරගෙන උණු කරපු එළකිරි වීදුරුවක් බොන්න .

10
වඳුරු මෑ ඇට සහ තිරිඟු පිටි සමාන ප්‍රමාන අරගෙන එළකිරි එක්ක මිශ්‍ර කරලා තලප වගේ උයාගන්න . මේකෙන් වරකට මේස හැඳි දෙක ගානේ උදේ රෑ එළකිරි එක්ක ආහාරයට ගන්න .

11
නෙරෙංචි ඇට , නීරමුල්ලිය ඇට , උඳු ඇට , වඳුරු මෑ ඇට , වියලි හාතාවාරිය අල චූර්ණ වෙනකල් අඹරලා වරකට කලං තුන ගානේ උදේ හවස එළකිරි එක්ක ආහාරයට ගන්න .

12
නීරමුල්ලිය ඇට කුඩු කරලා එළකිරි ගිතෙල් එක්ක මිශ්‍ර කරලා ආහාරයට ගන්න .

13
උඳු පිටි , එළකිරි හෝ ගිතෙල් එක්ක මිශ්‍ර කරලා තලප වෙනකල් උයාගෙන සීනි මීපැණි එක්ක දිනපතා ආහාරයට ගන්න .

14
අමුක්කරා පිටි , සීනි , ගිතෙල් එක්ක මිශ්‍ර කරලා ආහාරයට ගන්න .

15
වැල්මී පිටි , මීපැණි සහ ගිතෙල් මිශ්‍ර කර ආහාරයට ගන්න .

16
විෂ නැති කරපු වඳුරු මෑ ඇට පිටි සහ ඉකිරි ඇට පිටි සමාන ප්‍රමාන මිශ්‍ර කරලා නැවුම් එළකිරි වල මිශ්‍ර කරලා සීනි දාලා දිය කරලා බොන්න .

17
ඇට ඉවත් කරපු රට ඉඳි ගෙඩි 50ක් විතර ගන්න . ඒකට මීපැණි එළඟිතෙල් එකතුකරලා හොඳට වහන්න පුළුවන් භාජනයක දාලා සතියක් විතර තියලා දවසට ගෙඩි තුන ගානේ ආහාරයට අරගන්න . ඒ එක්ක එළකිරි පානය කරන්න .

18
ගොකටු , වඳුරු මෑ ඇට , රට ඉඳි , වැල්මී , බින්තල් අල , රසකිඳ කියන ඒවා කලං හය බැගින් අරගෙන වතුර කෝප්ප අටක් එකතු කරලා එක කෝප්පයට හිඳ ගන්න . මේ සිඳගත් කසාය උදේ හවස ගිතෙල් හා මී පැණි එක්ක දවස් තුනක් බොන්න .

19
කෝමාරිකා මුල් එළකිරි එක්ක අඹරලා ඒ තලපය එළකිරිවල දිය කරලා සති දෙකක් එකදිගට බොන්න .

20
බිත්තර සුදුමදය තලතෙල් සමග කලවම් කරලා උදෑසන හිස්බඩ දවස් කීපයක් බොන්න .

21
වැල්මී , උක් හකුරු , කිරිබදු අල කියන ඒවා සමාන ප්‍රමාන වලින් අරගෙන චූර්ණ කරලා එළකිරි එක්ක මිශ්‍ර කරලා බොන්න .

22
කිරිබදු අල චූර්ණය , කිරිබදු යුෂ එක්ක කලවම් කරලා අවුවේ වේලාගන්න . ඒ තලපය සීනි මීපැණි එක්ක මිශ්‍ර කරලා ආහාරයට ගන්න .

23
රසකිඳ , නෙල්ලි , ගොකටු සමාන ප්‍රමාණයන්ගෙන් අරගෙන චූර්ණ කරන්න . පස්සේ ඊට සමාන ප්‍රමාණයක් සීනි මිශ්‍ර කරන්න . මේකෙන් තේ හැන්දක් ගිතෙල් එක්ක මිශ්‍ර කරලා එළකිරි සමග ආහාරයට ගන්න .

24
එළ ඔලිඳ මුල් , වඳුරු මෑ , ඉකිරි ඇට කියන ඒවා සමාන ප්‍රමාන වලින් අරගෙන චූර්ණ කරගන්න . ඉන් පසුව සමාන ප්‍රමාණයක් සීනි එකතු කරලා වරකට තේ හැඳි එක බැගින් එළකිරි වල දිය කරලා උදේ හවස ආහාරයට ගන්න .

25
එල ඔලිඳ මුල් චූර්ණය වරකට තේ හෑන්ද බැගින් ගෙන සීනි ගිතෙල් මිශ්‍ර කරලා ආහාරටය ගන්න .

26
අමුක්කරා අල , කිරිබදු අල , බින්තල් අල , උඳු ඇට , කියන මේවා සමාන ප්‍රමාන වලින් අරගෙන චූර්ණ කරගන්න . සීනි සහ මීපැණි මිශ්‍ර කරගන්න . ඒ මිශ්‍රණයෙන් වරකට තේ හැන්දක ප්‍රමාණයක් ගෙන උදේ හවස ආහාරයට ගන්න .

27
රට ඉඳි , වියළි මුද්දරප්පලම් , බින්තල් අල , අමුක්කරා අල , සමාන ප්‍රමාණවලින් අරගෙන චූරන් කරගන්න . ඒ චූර්ණය උදේ හවස සීනි මීපැණි එක්ක ආහාරයට ගන්න .

28
සමන් පිච්ච තෙල් අලිගැටපේර තෙල් ස්වල්පයක් එක්ක කලවම් කරලා සම්බාහන තෙලක් විදියට පාවිච්චි කරන්න .

29
තිප්පිලි , උඳු , ඇල් හාල් , යව හාල් , තිරිඟු සමාන ප්‍රමාණවලින් අරගෙන කුඩු කරගන්න . ඒ පිටි ගිතෙල් එක්ක මිශ්‍ර කරලා රත්කරලා උයාගෙන ආහාරයට ගන්න .

30
අරළු , රත්නිටෝල් , ඉඟුරු , බින්තල් අල , රසකිඳ පිටි සමාන ප්‍රමාන්වෙඅලින් අරගෙන වියලා අඹරා කුඩු කරගෙන වරකට තේ හන්ද බැගින් ගිතෙල් සහ උක් හකුරු සමග ආහාරයට ගන්න .


මීට මතරව අශ්වගන්ධ අරිෂ්ටය , අශ්වගන්ධ තෙල් වගේ දේවලුත් පාවිච්චි කරන්න පුළුවන් .

එහෙනම් තවත් ලිපියකින් හමුවෙමු .

ඔබ සැමට සමන් දෙවිඳුගේ පිහිට ලැබේවා !

Friday, July 22, 2016

දෛවඥකාමධෙනු







කාලෙකට පස්සේ තමයි ආයෙත් බ්ලොග් එක පැත්තේ ආවේ ලියන්න කියලා . මේ දවස්වල ඉතින් දන්නවනේ මොකද උනේ කියලා . සිංදුවා ගස් බන්දන්න අපිත් එහෙන් මෙහෙන් ඔය පොඩි පොඩි වැඩ කෑලි ටිකක් කරලා දීලා උදවු පදවූ කරා . ඒ නිසා ඉතින් වෙලාවක් තිබුණෙත් නැහැ ලියන්න කියලා . සිංදුවගෙ මංගල්ලෙට පස්සේ හාහාපුරා කියලා ආයෙත් බ්ලොග් එක ලියන්න සැරසෙන්නේ පොතක් ගැන . පොතේ නම දැන් ඉතින් දන්නවනේ . දෛවඥකාමධෙනු තමයි ඔය පොතේ නම .

සාමාන්‍යපෙළ ලියන කාලේ මම දැනට වඩා ගොඩක් පොත් එක්ක ජීවත් උනා . අපේ ගමේ මහගෙදර විකුණලා එහෙ තිබ්බ පොත් සේරම රත්නපුරේ අරගෙන ආවාට පස්සේ මම ඉතින් කලේ ඔය එක එක පොත් කියවපු එක . ඒ පොත්වල වැඩිපුරම තිබුණේ ඉතිහාසය පොත් . ලංකාවේ ඉතිහාසය රුසියන් ඉතිහාසය ප්‍රංශ ඉතිහාසය වගේ විෂයන් තමයි තිබුණේ . ඔය අතරේ නැකත් ශාස්ත්‍රයට අදාළ පොත් කීපයකුත් තිබුණා . ඉතින් මේ ඉතිහාස පොත් කියවන්න පුරුදු උනාට පස්සේ මම තව තවත් ඉතිහාස පොත් කියවන්න පටන් ගත්තා .

ඒ කාලේ වෙනකොට මම 10 වසරේ හිටියේ . මම අතිරේක විෂයන් අතරට ඉතිහාසය විෂයත් තෝරාගත්තා . ඒ මට අනුරාධපුර පොළොන්නරු යුගයන් එච්චර අමාරු උනේ නැහැ . එත් එතනින් එහාට අවුල් ජාලාවක් වෙච්ච ලංකාවේ ඉතිහාසය මතක තියාගන්න ඉගෙනගන්න මමගාව තිබ්බ පොත්පත් මදි නිසා මම පොත් සල්පිලකට ගිය වෙලාවක ලංකාවේ අමරණීය ඉතිහාස යුග හතරක් කියලා පොතක් මිලදී ගත්තා . ඔන්න ඔය පොත තමයි මම මේ දෛවඥකාමධෙනු කියන ග්‍රන්ථය ගැන කුතුහලයක් ඇතිකරන්න මූලික අඩිතාලම දැම්මේ .

මේ පොතේ දඹදෙණි යුගය ගැන ලියවිලා තිබුණු පරිච්ඡේදයේ තිබුණා ඒ කාලයේ ලියවුණු ඉතාමත් වැදගත් පොත්පත් ගැන . මේ පොත්පත් අතරින් දෛවඥකාමධෙනු කියන පොතේ නම මගේ මතකයේ තදින්ම රැඳුනා . ඔහොම කාලයක් ගතවෙනකොට දවසක් ටීවී එකේ තිබුණ ජෝතිෂ්‍ය වැඩසටහනක මේ පොත ගැන තරමක් දුරට විස්තර කෙරුණා .

ඔතනින් තමයි මට මේ පොත හොයාගන්න ලොකු උවමනාවක් ඇතිවුණේ . ඒ කාලේ වෙනකොටත් ජෝතිෂ්‍ය විද්‍යාව ගැන තරමක් දුරට ඉගෙනගෙන හිටියට මොකද මම දැනගෙන හිටියේ නැහැ දෛවඥකාමධෙනු කියන පොත ජෝතිෂ්‍ය ගැන ලියවිලා තියෙන පොතක් කියලා . ඊට පස්සේ ඉඳලා මම මේ පොත හොයන්න පටන් ගත්තා . සරසවිය , ගුණසේන වගේ පොත් කඩවල් වලට යන්න ලැබුණු හැම වෙලාවකම වගේ මම ඇවිදපු පොත් රාක්ක අතරේ මේ පොතත් තියෙනවද කියලා මම විටින් විට බැලුවා . ඒත් ලැබුණේ නැහැ .

ඔහොම කාලය ගෙවිලා ගිහිල්ලා මම ජයවර්ධනපුර විශ්වවිද්‍යාලයට ආවට පස්සේ ප්‍රධාන පුස්තකාලයේ පොත් අතරෙත් මේ පොත හෙව්වා . අන්තිමට මට අවුරුද්දකට විතර පස්සේ පොත හොයාගන්න ලැබුණා . ඒත් ඉතින් ඒක මගේ සන්තකයේ නෙවෙයිනේ තියෙන්නේ . ඒ නිසා නිවීහැනහිල්ලේ කියවන්න විදියක් නැහැ . මම ප්‍රතිපත්තියක් විදියට පුස්තකාලයෙන් පොත් බැහැරට අරගෙන ඇවිත් කියවන්නේ නැහැ .

මට ඕන නම් පොත එක්කෝ පුස්තකාලයේ ඇතුළේදීම කියවනවා නැත්නම් කඩෙන් අරගෙන කියවනවා .  ඒ නිසා මම කල්පනා කරා මේ පොත කඩෙත් විකුණන්නේ නැත්නම් පුස්තකාලෙන් ගන්නත් විදියක් නැත්නම් මොකද කරන්නේ කියලා . මම හිටියේ මේක ෆොටෝකොපි කරන්න . ඒත් පස්සේ සිංදු මල්ලි මට උපන්දින තෑග්ගක් විදියට දෛවඥකාමධෙනු කියන පොත තෑගී කරා . මෙච්චර කල් ප්‍රින්ට් එකට නොදා තිබුණු පොත නුගේගොඩ මොඩන් පොත් සමාගම විසින් මේ අවුරුද්දේ ආයෙත් මුද්‍රණය කරලා තිබුණා .

ජීවිතයේ මට ලැබුණු වටිනාම දේවල් අතරින් එකක් තමයි ඒ පොත . මොකද කොච්චර ජෝතිෂ්‍ය පොත් කියවලා ඉගෙනගෙන තිබුණත් මේ පොතෙන් ඉගෙනගන්න ගොඩක් දේවල් තියෙනවා . මම හිතන්නේ නැහැ ඒ දේවල් ඉගෙනගෙන ඉවරයක් කරන්න ලැබෙයි කියලා . ඒත් බොරුවෙන් වැහිලා තියෙන ජෝතිෂ්‍ය විද්‍යාව ඒ බොරුවෙන් මුදවා ගන්න පුළුවන් තරම් ඉගෙනගන්න තමයි හිතාගෙන ඉන්නේ . පොතේ පිටකවරයේ ෆොටෝ එකක් මම fb දැම්මට පස්සේ කීප දෙනෙක් පොතේ නම විතරක් කියවලා නුහුරට යන කමෙන්ට්ස් ටිකක් දාලා තිබුණා . ඒ නිසාම තමයි මේ පොත ගැන මම ලියන්න කල්පනා කරේ .

මේ පොත ලියලා තියෙන්නේ අනවමදර්ශී කියලා සංඝරාජ නායක හාමුදුරු කෙනෙක් . එතුමා වැඩ ඉඳලා තියෙන්නේ දඹදෙණි යුගයේ පස්වෙනි බුවනෙකබාහු සහ දෙවෙනි පරාක්‍රමබාහු කියන රජවරුන්ගේ කාල වලදී . දේවපතිරාජ සෙනෙවිතුමා හදවපු අත්තනගල්ල පතිරාජ පිරිවෙනේ තමයි මුන්වහන්සේ වැඩ ඉඳලා තියෙන්නේ . මුන් වහන්සේ ගැන වැඩි විස්තරයක් සඳහන් වෙන්නේ නැහැ . එත් මුන් වහන්සේ බ්‍රාහ්මණවංශික නාහිමි කෙනෙක් කියලා කියනවා .

ඔයාල සිරිපැරකුම් චිත්‍රපටිය බැලුවනම් ඒකෙ ඉන්න සංඝරාජ චරිතය තමයි මේ පොත ලියලා තියෙන්නේ . ඒකෙ තියෙන දේවපතිරාජ කියන චරිතය තමයි මේ පොත ලියන්න අනුග්‍රහය දක්වලා තියෙන්නේ . ඉතිහාසගත වාර්තා අනුව සලකලා බලනකොට දෛවඥකාමධෙනු කියන මේ පොතයි සිදත් සඟරාව කියන සිංහලේ මහා ව්‍යාකරණ පොතයි දෙකම ලියවිලා තියෙන්නේ එකම යුගයේ . ඒ කියන්නේ මේ සංඝරාජ නාහිමියන් අතින් තමයි මේ පොත් දෙක ලියවිලා තියෙන්නේ . ඒ නිසා මුන්වහන්සේ එසේ මෙසේ කෙනෙක් නෙවෙයි කියලා තමයි මම නම් හිතන්නේ . මුන්වහන්සේ තව ලියල තියෙනවා පරෝපකාර ගණිතය කියලා පොතකුත් . ඒ පොත ගැන වැඩි විස්තරයක් ලැබුණේ නැහැ . දන්න කෙනෙක් ඉන්නවනම් කමෙන්ට් කරන්න ඒ ගැන .

දෛවඥකාමධෙනු පොත ලංකාවේ විතරක් නෙවෙයි මහා සෘෂිවරු හිටපු ඉන්දියාවේ පවා ඉතාමත් ගෞරවයට පත්වෙච්ච පොතක් . මොකද මේ පොතේ හැම ජෝතිෂ්‍ය කරුණක්ම පාහේ සටහන් වෙලා විස්තර කරලා තියෙන නිසා . මේ පොතේ මෙන්න මේ පහළින් තියෙන කාණ්ඩ හරහා තමයි ජෝතිෂ්‍ය විද්‍යාව ගැන විස්තර කරලා තියෙන්නේ .


මුලින්ම තියෙන්නේ චරිත ප්‍රකරණය . මේ කොටසින් කරන්නේ එක එක ග්‍රහයන්ගේ චරිත ගැන විස්තර කරන එක .
දෙවෙනි කොටස ආදේශ ප්‍රකරණය . මේ කොටසින් කරන්නේ ගොඩක් වෙලාවට ඵලාපල කියන්න අවශ්‍යවෙන දේවල් ගැන විස්තර කරන එක .
තුන්වෙනි කොටස මංගල්‍ය විධාන ප්‍රකරණය . මේ කොටසින් කරන්නේ නැකත් යෝග වගේ දේවල් ගැන විස්තර කරන එක .

ඔය කොටස් තුන යටතේ තවත් උප මාතෘකා රාශියක් අනුව මේ පොත දීර්ඝව ලියවිලා තියෙනවා . සම්පූර්ණ පොත ශ්ලෝක 2614 කින් සමන්විත වෙනවා . එක ශ්ලෝකයක් රුපියලක විතර මිලක් වෙනවා පොතේ මිල එක්ක සසඳලා බැලුවම . පිටු 750කට ආසන්න ප්‍රමාණයක් පොතේ තියෙනවා . ජෝතිෂ්‍ය කරුණු රාශියක් ඒ අතරේ අන්තර්ගත වෙලා තියෙනවා . ඒ හැම දේම මේ ලිපියෙන් මම විග්‍රහ කරන්න බලාපොරොත්තු වෙන්නේ නැහැ .

ටික ටික ඉගෙනගන්න ගමන් ඔයාලටත් කියවන්න දැනගන්න ලිහිල් බසින් ලියලා ජවුතිස්ස කියන කැටගරිය යටතේ ලියන්නම් . පොත කියවන්න කැමති කෙනෙක් ඉතින් අරගෙන කියවලා බලන්න . ඒත් මෙච්චර මිලක් ගෙවලා පොත අරගත්තට ජෝතිෂ්‍ය ගැන දැනුමක් නැති කෙනෙක්ට නම් කියවලා තේරුම් ගන්න නම් පුළුවන් වෙන එකක් නැහැ . ඒ නිසා ජෝතිෂ්‍ය ඉගෙනගෙන මේ පොතත් කියවලා බලන්න .

නම විතරක් කියවලා පොත් වලට අපහාස කරන්න එපා කියන එකත් මතක තියාගන්න .

ඔබ සැමට සමන් දෙවිඳුගේ පිහිට ලැබේවා !

Thursday, July 14, 2016

මංදුවට සිඩක් අදින් අවසන් ( ශ්‍රී සුභ මංගලම් සිංදුවෝ )







ඔන්න ඉතින් එදා සිංදුව සිංදුවතී ලවු කතාව ගෙදරට මාට්ටු උනාට පස්සේ සිංදුව යදමින් බැඳ විලංගු දාලා හිර කරලා තිබුණා කාලයක් . පස්සේ සිංදුවා ඉස්සෙල්ලම කරේ වත්තට ගියපු එක . ඒ වත්තේ තියෙනවා එක එක ජාතියේ මල් . ඒවායින් එක මලක් කඩාගත්තා . ඒ මල සිංදුඅම්මාගේ අතට දීලා වැඳලා කරට ගත්ත සිංදුවතී පැත්තකින් තියලා පොත් ටික අතට ගත්තා . මේ පොත් ටිකත් අරන් පාසැල් ගියපු සිංදුවා අකුරු ලියලා අවසානයේ ජයක් ලබාගත්තා .

පස්සේ විස්ස විජ්ජාලෙට ඇතුළු වෙච්ච සිංදුවා තමන්ගේ උපාධිය අවසන් කරලා හොඳ ජොබ් එකකුත් හොයාගෙන දැහැමෙන් සෙමෙන් රාජ්‍ය කරගෙන වාසය කරමින් හිටියා . මොන දේ උනත් වතී එක්ක තිබ්බ ලවු එක දිගටම පැවතුනා . අවසානයේ ඔන්න ගින්න ආයෙත් පත්තු උනා . පත්තු උනා කිව්වට පිංවතුනි පත්තු උනාම නෙවෙයි . පත්තු කරා .

ඕක පත්තු වෙච්ච කාලේ සිංදුවා සහ සිංදුවතී බයේ සහ ලැජ්ජාවේ ඇඹරි ඇඹරි ඉන්නවා දැක්කම අපිට තියෙන ෆන් එක මෙතෙකැයි කියන්නට බැහැ පිංවතුනි . කොහොමින් කොහොමහරි ඔන්න සිංදුවාත් වතීගේ ගෙදර උදවිය දකින්න බැහැ දකින්න බැහැ කිය කියා ඉඳලා මල මගුල ශ්‍රී සුභ මංගලම් කරගන්න ඕන නිසා වතීගේ ගෙදර අය බැහැ දකින්න ඕන කියලා පුල් පේඩ් කරපු කේක් ගෙඩියකුත් අරගෙන සැදැහැසිතින් හිස මත හොවාගෙන උඩට පාවාඩ පයට උඩු වියන් බඳවා ඔලුවෙන් හිටගෙන ගියා වතීලගේ ගෙදර .

පස්සේ ඉතින් සිංදුවගෙ ගෙදර උදවියත් ආවා වතීව බලන්න . වතීලගේ ගෙදර උදවියත් ආවා සිංදුවගෙ ගෙදර . හනේ සිංදුවා හිටියේ හරියට දහයට ගනින්න බැරි ගානට . දෑත් ලංකොට බිම බලාගෙන තමයි ඒ දවස්වල සිංදුවා ඇවිද්දේ . මූණ උස්සලා බලලා කාත් එක්කවත් කතා කරන්නේ නැහැ ඒ දවස්වල . සිංදුවා වතීලගේ නෑයොන්ට කකුල් දෙකෙන්ම දණගහල නළල හත් වතාව පොලවේ ස්පර්ෂ කරලා වන්දනා කරා . ඉතින් ඔන්න දැන් වැඩේ හරි . තීන්දුයි ස්ථීරයි ජයමංගලානී .

ඔහොමයි සිංදුවගෙ සහ සිංදුවතීගේ ආදර කතාව . මෙච්චර කාලයක් තිස්සේ මඩ ගහගෙන මඩ ගහගෙන ඇවිත් වයලීනෝ කල්පනා කරා මංදුවට සිඩක් කතා මාලාවත් මෙතනින් සමාප්ත කරන්න දැන් කාලය හරි කියලා . කොහොමත් ලියන්න ගත්ත කාලෙම මේ කතාව මේ දවසේ නවත්තනවා කියලා සැලසුම් කරගෙන තමයි ලියන්න පටන් ගත්තේ . ඒ මොකද කියලා දන්නෝ දනිති . නොදන්නෝ මේ ලිපිය කියවා දැන ගනිත්වා .






අවුරුදු එකොළහක පාසැල් ප්‍රේම කතාවක් ලියාගෙන ලියාගෙන ලියාගෙන ආව සිංදුවා සහ සිංදුවතී වෙන වෙනම පැදගෙන ආව ගොන් කරත්ත ආ නෑ නෑ ජීවන ගමන් , අද ඉඳලා ( 14 . 07 . 2016 ) එකට පැදගෙන යන්න කියලා ලොකු බලාපොරොත්තුවක් හිතේ රඳවාගෙන දෙමවුපියන්ගේ සහෝදර සහෝදරියන්ගේ නෑදෑ හිතවතුන්ගේ ආශිර්වාද මධ්‍යයේ ,

එදා සිදුහත් කුමරු මවු කුසින් නික්ම මහා බ්‍රහ්මයාගේ ශ්‍රී හස්ථයට ඉපදී මහපොළවට උතුම් ශ්‍රී පාද පද්මය තැබුවා යැයි පිළිගැනෙන " විසා " නැකත යෙදී තිබෙන අද දින උදෑසන 10 22ට උදාවන සුබ මොහොතින් යුගදිවියට සම්ප්‍රාප්ත වෙනවා .

පාසැල් ප්‍රේම කතා ආරම්භ වෙනවා වගේම ඒවායේ අවසානයකුත් පාසලේම තියෙනවා කියලා තමයි ගොඩක් දෙනා කියන්නේ . 95% ක්ම වෙන්නේ පාසැල් ප්‍රේම කතා පාසලත් එක්කම ඉවරවෙලා යන එක . මේකෙදී මමනම් දකින්නේ ඒ බැඳීම් අතරමග නතරවෙලා යන්නේ දෙන්නටම ඒ ඒ කාල වලට පරිසරයන්ට වගේම ජීවන තත්ත්වයන්ට අනුවර්තනය වීමේ හැකියාව අඩුවීම නිසා කියලා . අනික තමයි නොගැළපීම් ගැළපීම් කරගන්න දෙන්නාගේ තියෙන ඉදිරිපත්වීමේ හැකියාව . ඔයවගේ ඒවා නිසා අන්තිමට පාසැල් ප්‍රේම කතා නතරවෙලා යනවා . ඒත් සිංදුවා සිංදුවතී ආදර කතාව අවුරුදු එකොළහක් තිස්සේ කොහොම කොහොමහරි ගලාගෙන ආවා .

ඔය ගලා ඒමට අතරමග නතර වීම් , බාධක හමුවීම් , නිසල වීම් වගේ දේවල් මුණනොගැහුනාමයි කියලා කියන්නත් බැහැ . හිත් නොහොඳ වීම් මරාගැනීම් නොතිබුණාමයි කියන්නත් බැහැ . මරඟනනන් , අනංගන් මේ දෙන්නා අතරට එන්න උත්සාහ කලේ නෑමයි කියලා කියන්නත් බැහැ . ඒත් ඒ ඒ වෙලාවල්වලට දෙන්නගේ අවබෝධ කරගැනීමේ හැකියාව මත ඒ ප්‍රශ්න කාලයත් එක්කම විසඳිලා ගියා . ( අපි වගේ පුරෝහිතයෝ ඉන්නකොට ඉතින් කාටද මෙයාලා වරදින්නේ ) .

වයලගෙ කාමරේ ලියන මටත් කියවන ඔබටත් අද දවසේ කලයුතු යමක් තියෙනවා . ඒ ඔයාලට රස කර කර කියවන්න , මට නිදහසේ ලියන්න ඉඩ හසර සලසා දීපු සිංදුවගෙ යුග දිවියට සුබ පතන්න සහ ආශිර්වාද කරන්න . එහෙනම් අපි මෙහෙම ආශිර්වාද කරමු .







ශ්‍රී සුබ මංගලම් යනුකී හෙයින් , නෛක ලෝකෛක සමස්ථ පාපමල විද්වංසන කීර පූජිත සිසිරාමෘත ජිනවචන ශ්‍රී සද්ධම්මවර චක්‍රවර්ති අප අංගීරස ශ්‍රී සිද්දාර්ථ ගෞතම සම්‍යක් සම්බුද්ධ සර්වඥ රාජෝත්තමයාණන් වහන්සේ සූවිසි අසංඛ්‍ය කල්ප ලක්ෂයක් පෙරුම් පුරා බුදු වෙන්ඩ යන ආත්මයේදී කිඹුල්වත් නම් පුර නුවර සුද්ධෝදන මහ රජ්ජුරුවන්ට ජාතව මහාමායා දේවීන් වහන්සේගේ කුස පිලිසිඳ දස එකඩ මස ගොසින් ලුම්බිණි නම් මගුල් සල් උයනේ දී මෑණියන් වහන්සේට කිසිඳු ආයාසයක් නොවන ලෙසට වෙසඟ මැදිදෙපොහෝදා කුජ දින විසා නැකතින් මහා බ්‍රහ්ම රාජයාණන්ගේ දොහොතෙහි තිබුණු රන් දැලට බිහිව දිනින් දින මෝරනා පූර්ණ චන්ද්‍රකලාපය මෙන් වැඩ සොළොස් හැවිරිදි වයස ලත් තැන යසෝදරා දේවීන් වහන්සේ කරකාර බඳීම්මැයි සිතා

ශක්‍රාති බ්‍රහ්මනයනේ උපුල්වන් මහේසෞ යනු කී හෙයින්

විෂ්ණු බ්‍රහ්ම මහේෂ්වර සුයාම සංතුෂ ආදී සියලු දෙවියෝ මේ මගුල් සක්වලට රැස්ව සිද්ධාර්ථ කුමාරයාණන් වහන්සේගේ විවාහ මංගල්‍යය පිණිස මගුල් මණ්ඩපයක් කරම්හයි සිතා දිග දොළොස් පළල පසළොස් රියන් මගුල් මණ්ඩපයක් කරවා එරන් කොත් පිහිටුවා රත් නිල සුදු වස්ත්‍රාදියෙන් උඩුවියන් බඳවා පරසතු කඩුපුල් මදාරා ඇඹුල උපුල ඕළු නෙළුම් සපු නා පනා කොබෝලීල ඉද්ද පුලිද්ද සවුකෙන්ද ආදියෙන් මල් දම් පතුරුවා ධෘතරාෂ්ඨ විරූඩ විරූපාක්ෂ වෛශ්‍රවණ යන සතරවරම් මහා දිව්‍ය රාජෝත්තමයාණන් වහන්සේලා කඩුගත් ඇතිව සතරකොණ පිහිටුවා විස්මකර්ම දිවය පුත්‍රයා එරන් පෝරුවක් මවා මඟුල් මණ්ඩපය මධ්‍යයේ රන් රිදී මුතු මැණික් වෛදුර්ය ලෝහිතංක යනාදීන් පතුරුවා එරන් පෝරුව ඊ පිට තබා පට වස්ත්‍රයකින් වසා සිවු කොණ පූර්ණ ඝට මාරුක් මලින් සරසා රන් පහන් දල්වා අන්තාරික්ෂ විමානයෙහි වාසය කරන අංගාරික අසුරේන්ද්‍ර ශනි සෞම්‍ය අමර මන්ත්‍රී යන ආදී නවග්‍රහයින් නවදෙනා පිරිවරා එහි ආයුධ අටක් අටකොණ සිටුවා

මහා කාරුණිකෝ නාථෝ හිතාය සබ්බ පානිනං
පූරෙත්වා පාරමී සබ්බා පත්තෝ සම්බෝධි මුත්තමං

යනාදීන් කියා සිද්දාර්ථ කුමරු හා යසෝදරා දේවීන් වහන්සේ රන් පෝරුව මත වඩා හිඳුවා දෙදෙවූ ලොවට අධිපති ශක්‍ර දිව්‍ය රාජෝත්තමයාණන් වහන්සේ අහසට අතපොවා එරන් සළුවක් ගෙන යශෝදරා දේවීන් වහන්සේගේ සිහිනිඟ බඳවා හිස පටන් පාදාන්තය දක්වා සර්වාභරණයෙන් පළඳවා ඊශ්වර මහා රාජෝත්තමයාණන් වහන්සේ එරන් කරඬුවේ සඟවා තිබුණු දිව්‍ය පිරිත් හුය ගෙන කුමරුන්ගේ හා කුමරියගේ දෙසුලඟිලි බැඳ සහම්පතී නම් මහා බ්‍රහ්ම රාජයාණන් වහන්සේගේ එරන් කෙණ්ඩියෙන් පැන් ධාරා වත්කර ඔවුන් දෙදෙනා වහන්සේ අභිවෘද්ධියට පැමිණවූ සේක

ඒ ආනුභාව මහිමයෙන් අදත් මොවුන් දෙදෙනාට රන් රිදී මුතු මැණික් වෛදුර්ය ලෝහිතංක ශංඛ ශීලප්‍රවාලාද දසවිධ රත්නයෙන් ආඩ්යව රවි චන්ද්‍ර කුජ බුධ ගුරු ශුක්‍ර ශනි රාහු කේතු යන නවග්‍රහ දිවය සමූහයාගෙන් වන්නාවූ සර්ව උපද්‍රවයන් නිවාරණයකොට අශ්ටාතිරේක නවුති සංඛ්‍යාත ව්‍යාධීන් වංනාවූ සර්වෝපද්‍රවයන් ධූරීභූත කොට ත්‍රිවිධ රත්නයෙන්ද සියළු දෙවි දේවතාවුන් වහන්සේලාගෙන්ද පොළව මහී කාන්තාවුන් වහන්සේලාගෙන්ද නවග්‍රහ දිවය රාජෝත්තමයාණන් වහන්සේලාගෙන්ද දෙමාපියන් ඇතුළු ඥාති හිතමිත්‍රාදීන් ගෙන්ද ආශිර්වාද වේවා !

කාල දේවල තපසු රජ මාලිගෙට වැඩි ජය මංගලම්
බාල රූබර කුමරු තපසුගෙ අතට වැඩි ජය මංගලම්
කෝල කේදර නොවී දෙපතුල සිරස පිට තැබූ මංගලම්
සීල පිවිතුරු බලෙන් වේවා සිංදුවට ජය මංගලම්

පුරා පස්වස පසුව දඹරුක මුලට වැඩි ජය මංගලම්
සරා ආසන කිරි මවුන් පිරිවරා වැඩ සිටි මංගලම්
දරා දෙපතුල් ගොතා ගුවනේ වැඩ සිටිය ජය මංගලම්
තිරා කලකට මෙතුන් බලයෙන් සිංදුවට ජය මංගලම්

වැද්ද සූරස මුනිඳු වැඩසිට සෙවන දුන් ජය මංගලම්
සුද්ද සුදසුන් නිරිඳු සහ සෙසු රජුන් කම කල මංගලම්
ඇද්ද මෙකුමරු පාපු විස්මය සියලු සත හට මංගලම්
බුද්ධ රත්නේ බලෙන් වේවා සිංදුවට ජය මංගලම්

නිම්ම නැති සංසාර දුක සිදුහත් කුමරු දැක සිත පෙමින්
දැම්ම යමු අපි මහන වීමට අසුන් ගෙනවයි කී තොසින්
මම්ම පනිමුව පවර මත්තෙන් තුරඟ සිතු ජය මංගලම්
ධම්ම රත්නේ බලෙන් වේවා සිංදුවට ජය මංගලම්

අංග පෙර දරු තුමා සිදුහත් එදා රෑ වැඩි සුබ ගමන්
තුංග ගිරි පවුරට උඩින් පැන වසවතුගෙ ඔද බිඳී තොසින්
තුංග අසුපිට හොවා තිස් යොදුනක් එයින් ගං තෙරට ලං
සංඝ රත්නේ බලෙන් වේවා සිංදුවට ජය මංගලම්

ජයෝ මුනින්දස්ස සුබෝධි මූලේ
අහෝසි මාරස්ස පරාජයෝහී
උග්ඝෝසයුං දේව ගණා පසන්නා
ඒතේන සච්චේන ජයස්සු තුය්හං

ජය සිද්ධී ධනං ලාභං
සොත්ථි භාග්‍යං සුඛං බලං
සිරි ආයුච වණ්ණෝච
භෝගං වුද්ධීච යසවා
සත වස්සාච ආයුච
ජීව සිද්ධි භවන්තු තේ



එහෙනම් අයියේ අක්කේ ඔබ දෙපළ අදින් අරඹන යුග දිවිය සාර්ථකත්වයෙන් සාර්ථකත්වයට පත්වේවා !