Thursday, March 24, 2016

ඒකපාර්ශවික ආදරයක මල් පිපිලා ජීවිත උයනේ මල් පිපිලා


මල් පිපිලා
මල් පිපිලා
ජීවිත උයනේ මල් පිපිලා
ආත්මයේ දසන්තයේ සුවඳ ගලා
ප්‍රාර්ථනා මල් පිපිලා
ප්‍රාර්ථනා මල් පිපිලා
මල් පිපිලා

මගෙ දෙතොලට ඔබෙ දෙකොපුල හිමි නැත
මගෙ දෑතට ඔබෙ රතැඟිලි හිමි නැත
ඒත් මගේ යුග දෙනෙතට උරුමයි
කම් නැත මියුලැසියේ
ඒ ඇති මට මගෙ නෙත් යුග පියෙන තුරා

රෑ බඹරෙකු මා දකින වෙලාවක
මධු පිරි මලකට ඇදෙන වෙලාවක
ආශා රැහැනින් හදවත පිබිදෙයි
කම් නැත මියුලැසියේ
සිහින ලොවේදී මා ඔබ දකින තුරා


ගායනය - ආචාර්ය දයාරත්න රණතුංග
පද රචනය - චන්ද්‍රසේන රංගේ
තනුව - ස්ටැන්ලි එම්. ප්‍රනාන්දු





කතාව කියවන්න කැමති නැති අය වීඩියෝ ටික තියෙන තැන ඉඳලා කියවගෙන යන්න .



ඩෙල් ස්ටූඩියෝ වැඩසටහන , මුල කාලෙ නොබැලුවත් දැන් නම් මමත් ඉන්නේ අලුතෙන් වැඩසටහනක් එනකල් බලාගෙන . මුල කාලෙ වැඩසටහන එපාවෙලා තිබුණේ , මොකද කියනවනම් අමරසිරි පීරිස් , ටී එම් ජයරත්න , ඩැඩී , ජිප්සීස් වගේ අය එක්ක කරපු වැඩසටහන් ටිකක් චොර වෙලා තිබුණු නිසා . සිංදුවා කොහොමත් ඕක මන්තරේ වගේ හොඳයි හොඳයි කියලා මතුරන නිසා මමත් ඩෙල්ස්ටූඩියෝ බලන්න පටන් ගත්තා . දැන් නම් ඩෙල්ස්ටූඩියෝ පට්ට . දැන් තියෙන විදියට කලින් ආව අය ආයෙත් ගෙන්නලා වැඩසටහන් කරන්න පුළුවන් නම් මම හිතනවා කලින්ට වඩා දැන් හොඳ තත්ත්වයක වැඩටසහන තියෙයි කියලා. ඒ කිව්වේ ටී එම් , අමරසිරි පීරිස් වගේ අයව නැවතත් ගෙන්නන්න කියන එක .

ඉතින් ඔය අතරේ තමයි මේ ළඟදී දවසක දයාරත්න රණතුංග මහත්මයා වැඩසටහනට ආවේ . දෙරණ නාලිකාවේ යූටියුබ් එකවුන්ට් එකට වැඩසටහන අප්ලෝඩ් කරනකල් ඉන්න බැරි නිසා මම වෙන සයිට් එකකින් වැඩසටහන බාගෙන බැලුවා . ඔය ගීත ටික ඉස්සර ඉඳලම මගේ සිංදු ලිස්ට් එකේ තියෙන නිසා මම කැමැත්තෙන් වැඩසටහන බැලුවා . සිංදුවත් මුලින්ම කිය කිය හිටියේ උඹටනම් මේ ප්‍රෝග්‍රෑම් එක දිරවයි , හැමවෙලේම බුකියේ ශෙයා කරන්නේ ඔය සිංදු ටිකනේ කියලා . කිව්වත් වගේ ඒ වැඩසටහන දිරවලා අවශෝෂණය කරගන්නත් වැඩි වෙලාවක් ගියේ නැහැ .

ඔය ගීත එක්ක බැඳිලා තියෙන සමහර සුන්දර මතක සටහන් තියෙනවා මගේ අතීතයේ . මේ ගීතය අහන වෙලාවේත් මතකය ගියා ඈතට . පාසැල් සංගීත තරඟ තියෙන දවසක , එදා තිබුණේ කලාප තරඟ . අපේ ඉස්කෝලෙන් ඉදිරිපත් කරලා තිබුණා තරඟ කීපයක්ම . ඕවා පටන් ගන්නකල් අපි කරන්නේ ඒ ගුරුවරුන් එක්ක කොහේ හරි පංතිකාමරයකට වෙලා තරඟෙට වාදනය ගායනය කරන්න තියෙන දේවල් පුරුදු පුහුණු වෙන එක . ඉතින් එදා අපි මේ පුහුණුවීම් කරලා දවල් කෑම කන්න වෙලාව ආවම සර්ලා මිස්ලා ගියා කෑම කන්න . අපිට ඉතින් සංගීතේ එකතු උනාම ඒ කාලෙ වැඩිය බඩගින්නක් නැහැ . අපි ඉතින් එක එක සිංදු ගගහා කස්ටිය එක්ක පොඩි ෆන් එකක් ගත්තා .





ඒ කාලෙ ඉස්කෝලේ බටනලා ගහන සහෝදරයෙක් හිටියා . හරිම අමාරුවෙන් සංගීතය ඉගෙන ගත්ත කෙනෙක් . ඒවගේම දක්ෂයෙක් . ඒ සහෝදරයා මගේ අතටත් එයාගේ බටනලාවක් දීලා මල් පිපිලා ගහමු කියලා කිව්වා . මමත් හා කියලා පටන් ගත්තා . අපි දෙන්නයි , තබ්ලාවයි , සර්පිනාවයි . ඔය සද්දේ ඇහිලා වෙනත් ඉස්කෝලවල සර්ලා මිස්ලාත් ආවා සිංදුව අහගෙන ඉන්න . මේ ගීතයේ කොටස් අපි දෙන්නා බෙදාගෙන එදා හොඳ වාදනයක් ඉදිරිපත් කළා . මම හිතන්නේ මම බටනලාව තවත් බටනලාවක් එක්ක වාදනය කරපු පළවෙනි සහ අන්තිම දවස එදා තමයි .

ඩෙල් ස්ටූඩියෝ බලපු වෙලාවේ මල් පිපිලා ගීතය ආරම්භ වෙනකොටම මට මතක් උනේ මේ සිදුවීම . මේ ගීතයේ තියෙන්නේ ඒකපාර්ශවික ආදරයක් කියලා කිව්වම මට මගේ ඒකපාර්ශවික ආදර කතාවක් මතක් උනා .

ඉස්සර කාලෙ . යටගිය දවස බරණැස්නුවර බ්‍රහ්මදත්ත නම් රජ්ජුරු කෙනෙකුන් රාජ්‍ය කරන සමයේ මම හිටියේ දහය වසරේ ඉගෙන ගනිමින් . ඉතින් හවසට හවසට මම පන්සල් යන්න පුරුදුවෙලා හිටියා ඒ කාලෙ . දැනට වඩා අපි ඒ කාලෙ පිනට දහමට ලැදියි . ඉතින් මම ගිහින් බෝධියට මල් පූජා කරනකොට එක ගැහැණු ළමයෙක් ආවා මල් පූජා කරන්න . එයයි මමයි විතරයි බෝධියේ හිටියේ . මම බෝධියේ මේ පැත්තේ මල් හදනවා . එයා ඒ පැත්තේ මල් හදනවා . හරිම රොමෑන්ටික් . මම හොරෙන් මල් හදන ගමන් මූණ උස්සලා බැලුවා . එයා නිහඬ නිසසල දෑසින් මල් ආසනේ දිහා බලාගෙන මල් හදනවා . මම ඉතින් විනාඩි දෙකෙන් හදන මල් හැදිල්ල විනාඩි දහයක් විතර හදලා පස්සේ එයා මල් හදලා ඉවර උනාම නතර කරා .

ඊට පස්සේ ඔන්න එයා පැන් කලයක් අරගෙන බෝධිය නාවනවා . එයා මාවත් නාවයි කියලා බලාපොරොත්තුවෙන් පැත්තකට වෙලා මම බලාගෙන ඉන්නවා . ඔහොම ඔහොම වෙලා අන්තිමට වැඳලා පුදලා ඉවර වෙලා ඇය යන්න ගියා මැකිලා . ඇහැහ් ඇහැහ් ඇහැඈ......................................... තනි ඇහැට ඇඩෙනවා .

එයාව දකින්න තිබ්බ ආසාවට මම පහුවෙනිදත් පන්සල් ආවා . ඒත් එදා එයා හිටියේ නෑ . පහුවෙනිදත් ආවා . ඊට පහුවෙනිදත් ආවා . ඒත් එයා ආවේ නෑ . මාස කීපයක්ම මම එයා පන්සලට එයි කියලා හිතාගෙන පන්සල් ආවා . ඒත් එයා ආවේ නැහැ . අන්තිමට වයලීනොගේ කුළුඳුල් ප්‍රථම එකසිය අටවෙනි ප්‍රේමය ඒකපාර්ශවික ආදරයක් වෙලා නැත්තටම නැතිවෙලා , රි ස්ටෝර් කරන්න බැරි විදියටම මැකිලා ගියා . අහැහ් ඇහැහ් ඇහැඈ.............................................................. පස්සේ කාලෙක තමයි දැනගත්තේ ඒ අක්කා කෙනෙක් කියලා . ඇහැහ් ඇහැහ් ඇහැඈ................................





මේ ගීතයඅහන වෙලාවේ මට ඔය සීන් ඒකත් මතක් උනා . ඒ කියන්නේ ඒකත් මේ ගීතයත් එක්ක ගැළපෙනවා . එහෙනම් කස්ටිය වයලීනොගේ ඒකපාර්ශවික ආදරය ගැන සිහි කරගෙන කඳුළු සලමින් මෙන්න මේ ගීතය අහන්න . ඉස්සෙල්ලම තියෙන්නේ අලුත් නැති , පරණත් නැති ලොවෙත් නැති සංස්කරණය . මම නම් වැඩිපුරම අහන්න කැමති ඒ සංස්කරණය . ඊට පස්සේ තියෙන්නේ මුල්ම සංස්කරණය . ඊටත් පස්සේ තියෙන්නේ ඩෙල්ස්ටූඩියෝ සංස්කරණය .










මල් පිපිලා
මල් පිපිලා
ජීවිත උයනේ මල් පිපිලා
ආත්මයේ දසන්තයේ සුවඳ ගලා
ප්‍රාර්ථනා මල් පිපිලා
ප්‍රාර්ථනා මල් පිපිලා
මල් පිපිලා

ඉපදීමෙන් පස්සේ ක්‍රමක්‍රමයෙන් කාලය ගතවෙලා ජීවිතය ඒකාකාරී වේගෙන එනකොට තමයි ජීව විද්‍යාත්මක සහ සමාජ විද්‍යාත්මක වශයෙන් ආදරය ආකර්ෂණය ප්‍රේමය වගේ හැගීම් මිනිස්සුන්ගේ හිත් තුල ඇති වෙන්නේ . ඇත්තටම ගොඩක් දෙනෙක්ගේ පළවෙනි ආදරය අප්‍රකාශිත ප්‍රේමයක් වෙනවා . දෙවෙනි ප්‍රේමය තමයි ප්‍රකාශ කරලා කෙලවගන්නේ . ඊට පස්සේ ඉතින් අත්දැකීම් එක්ක කාලයත් එක්ක අහන දකින දේවල් එක්ක කිරලා මැනලා ජීවිතයට ගැළපෙන කෙනෙක් ලං කරගන්නවා .

ඉතින් මේ පළවෙනි ආදරය හිතේ ඇති උනාම තමයි මේ මල් පිපිල්ල සැරටම වෙන්නේ . මේ ගීතයේ කතා නායකයාගේත් පළවෙනි මල වෙන්න ඇති මේ පිපිලා තියෙන්න . තමන්ගේ ජීවිතය උද්‍යානයක් නම් ඒ උද්‍යානයේ මල් පිපිලා අලංකාර වෙලා කියලා ඔහු දකිනවා . මල් පිපෙන්න කලින් මේ උද්‍යානයේ තිබුණේ පස් ගල් බොරළු විතරයි . ඒත් ඒවායේ තියෙන කර්කශ ස්වභාවය මේ මල් නිසා නැතිවෙලා අඩුවෙලා ගිහිල්ලා . පිරිමියෙක්ගේ තියෙන රළු ගති ගුණ ආදරයත් එක්ක තුනී වෙලා යන්නෙත් මේ විදියට වෙන්න ඇති .ඒ මල් නිසා අන්තිමට තමන්ගේ මුළු ආත්මයම සුවඳවත් වෙනවා . ආත්මයේ දස අත මේ සුවඳ ගලාගෙන යනවා . ඉතින් ජීවිතේ මල් පිපිලා .

මගෙ දෙතොලට ඔබෙ දෙකොපුල හිමි නැත
මගෙ දෑතට ඔබෙ රතැඟිලි හිමි නැත
ඒත් මගේ යුග දෙනෙතට උරුමයි
කම් නැත මියුලැසියේ
ඒ ඇති මට මගෙ නෙත් යුග පියෙන තුරා
මල් පිපිලා

මෙතනින් තමයි ගීතය ඒකපාර්ශවික ආදරයක ස්වරූපය ගන්නේ . මගෙ දෙතොලට ඔබෙ දෙකොපුල හිමි නැත , ඒ කියන්නේ පෙම්වතාට පෙම්වතියගේ කම්මුල් සිපගන්න අවස්ථාවක් ලැබෙන්නේ නැහැ කියන එක .
මගෙ දෑතට ඔබෙ රතැඟිලි හිමි නැත , දෙන්නට ඉතින් කවදාවත් අතිනත් අරගෙන ආදරෙන් ඇවිදින්න ලැබෙන්නේ නැහැ . ඒත් මගේ යුග දෙනෙතට උරුමයි , මෙන්න මේ පදය තමයි මම මේ ගීතයේ කැමතිම තැන . මේ පෙම්වතාට මේ ගැහැණු රූපය හැමදාම දකින්න ලැබෙනවා ඇති . යුග දෙනෙතට උරුම ඇති . ඉතින් පෙම්වතා It's ok baby කියලා කම් නැත මියුලැසියේ කියමින් හිත හදාගන්නවා . විවාහ වෙන්න නැතත් , ආදරයෙන් වෙලෙන්න නැතත් මිය යනතුරාවටම ඇගේ දර්ශනයෙන් සිත් සනහා ගන්න මේ පෙම්වතාට පුළුවන් කියලා තමයි කියන්නේ ඒ ඇති මට මගෙ නෙත් යුග පියෙන තුරා කියලා .


රෑ බඹරෙකු මා දකින වෙලාවක
මධු පිරි මලකට ඇදෙන වෙලාවක
ආශා රැහැනින් හදවත පිබිදෙයි
කම් නැත මියුලැසියේ
සිහින ලොවේදී මා ඔබ දකින තුරා


මුදලට හෝ මුදලට නැතුව ආශාව සංසිඳවා ගන්න විතරක් පිරිමින් සොයාගෙන රාත්‍රී කාලයේ හැසිරෙන ගැහැණු ළමයින්ට රෑ සමනලියන් කියලා කියනවා . ඒකෙ අනික් පැත්ත බඹරා . දවල් කාලෙ හැසිරෙන්නේ හරි පාරෙන් රොන් ගන්න බඹරු . ඒත් රෑ කාලයේ හැසිරෙන්නේ වැරදි පාරෙන් රොන් ගන්න බඹරු . මෙතන මේ ගීතයේ රෑ බඹරෙකු මා දකින වෙලාවක කියලා කියන්නේ මේ පෙම්වතාට පේනවා රාත්‍රී කාලයේ මලෙන් රොන් ගන්න යන බඹරෙක් . නිකන්ම නිකං මලකට නෙවෙයි ඇදෙන්නේ , මධු පිරි මලකටයි ඇදෙන්නේ . මේවා දැක්කම මේපෙම්වතාගේත් හදවත ආශාවන්ගෙන් පිරී ඉතිරී යනවා .

ගොඩක් වෙලාවට තමන්ගේ ළඟ ඉන්න කෙනෙක්ට ලැබෙන දේ තමන්ට නොලැබෙනකොට සමහර වෙලාවට උඩ හිතින් නැතත් මිනිස්සු යටි හිතෙන් දුක් වෙනවා . ඒක තමයි ස්වභාවය . මමනම් හිතන්නේ මේ ගීතයේත් උඩින් පෙන්නුවට පෙම්වතා තමන්ගේ යටි හිතෙන් දුක් වෙනවා තමන්ට ඒ උණුසුම නොලැබීම ගැන . ඒත් ඒ වෙලාවෙත් මේ පෙම්වතා හිත හදාගන්නේ කම් නැත මියුලැසියේ කියලා . ඒ මොකද පෙම්වතා දන්නවා තමන්ගේ පෙම්වතිය රාත්‍රියේ නින්දට ගියාට පස්සේ  සිහින ලෝකෙදී පෙම්වතියගේ රූපය දකින්න ලැබෙනවා කියලා .

මේක ඒකපාර්ශවික ආදරයක් . සමාජයේ ගොඩක් නැතත් එකක් දෙක හරි මේවගේ ඒකපාර්ශවික ආදරයන් වෙනුවෙන් ජීවිතයකැප කරපු පිරිමි වගේම ගැහැණු පවා දකින්න ලැබෙනවා . අන්තිමට ඒ අය තමන්ගේ ජීවිතය කසාවතින් වහගන්න තත්ත්වයට පවා පත්වෙලා තියෙනවා .





ඊ ලඟට අපි බලම මේ ගීතයේ සංගීතය කොහොමද සංයෝජනය වෙලා තියෙන්නේ කියලා . ගීතයේ තාලය වාදනය කරන්නේ බොන්ගෝ ඩ්‍රම් එකකින් . බේස් ගිටාර් එකකින් බේස් ගිටාර් පාට්ස් වාදනය කරනවා තාලයත් එක්කම ගැලපිලා යාන්න . ඒත් සමහර තැන වලදී වැඩි අලංකාරයක් වෙනුවෙන් තාලයෙන් පිට පනින තැන් කීපයකුත් තියෙනවා . ඔයාලට ගීතය සාවදානයෙන් අහගෙන ඉන්නකොට ඒ පිට පැනින් තැන් හොයාගන්න පුළුවන් වෙයි . හයි හැට් එකත් වැඩිය දඟලන්නේ නැතුව ටිකි ටිකි ටිකි ටිස් / ටිකි ටිකි ටිකි ටිස් කියලා තමන්ගේ වාදනය පාඩුවේ කරගෙන යනවා .

ගීතයේ පෙර වාදනය ආරම්භ වෙන්නේ මවුත් ඕගන් එකකින් . මේ මවුත් ඕගන් පාට් එක යන අතරේ ඒ යටින් වයලීන් සහ චෙලෝ එකක් බේස් ගතිය වැඩිකරලා නිර්මාණය කරලා තියෙන වාදන කොටසක් ඉදිරිපත් කරලා තියෙනවා . මවුත් ඕගන් එකෙන් ශෝකය පාළුව වගේ හැගීම් මේ තාලයත් එක්ක ඉස්මතු කරලා පෙන්නන්න අමාරුයි . ඒත් ඒ බේස් වාදනයත් එක්ක වාදන කාණ්ඩය හොඳට සමබර වෙලා තියෙනවා . ඊට පස්සේ ඒ බේස් වාදනයත් එක්කම මවුත් ඕගන් වාදනයත් නතරවෙලා බටනලාවෙන් පොඩි කොටසක් වාදනය කරනවා . ඒක ටිකක් දුකක් ඇති කරන වාදනයක් . ඊට පස්සේ වයලීන් වලින් වාදනයක් ඉදිරිපත් කරනවා . ඒ වාදනයට කවුන්ටර් පාට්ස් විදියට යටින් වාදනය කරන්නේ චෙලෝ පාට් එකක් . ඊට පස්සේ කීබෝඩ් එකක් බටනලාව සහ මවුත් ඕගන් එක මාරුවෙන් මාරුවට එකට වාදනය කරනවා .

ඊට පස්සේ මල් පිපිලා කියලා ගීතය ආරම්භ වෙනවා . ඒ ආරම්භයත් එක්කම ස්වර තුනෙන් තුනට යන ස්වර අභ්‍යාසයක් වගේ එකක් ඉහල ඉඳලා පහළට ගලාගෙන එනවා . මල් පිපිලා . ඒත් ඒ මලේ කිසිම සතුටක් නැහැ වගේ දෙයක් තමයි ඒ වාදනයේ අන්තර්ගත වෙලා තියෙන්නේ .ගීතය ඉතින් සාමාන්‍ය විදියට ගායනා වෙනවා . ඇතුලෙන් වයලීන් වලින් කවුන්ටර් වාදනය වෙනවා . ඒ වාදනය මිහිරියි . ඒත් ගීතයේ තියෙන ඒකපාර්ශවික ආදරයේ තියෙන හිස් බව ගීතයෙන් පෙන්නන්න ඕන නිසා වැඩි සංගීත ශිල්ප ක්‍රම මේ ගීතයේ යොදාගෙන නැහැ .

ගීතයේ අතුරු වාදනයත් පෙර වාදනයම තමයි  . ඊට පස්සේ ඔන්න අන්තරා කොටස් වලට එනවා . මේ අන්තරා කොටස්වල මම කැමතිම තැනක් තමයි "  ඒත් මගේ යුග දෙනෙතට උරුමයි , ආශා රැහැනෙන් හදවත පිබිදෙයි කියන කොටස් දෙක . වචන වගේම මේ වචන ගායනා කෙරෙන ස්වර රචනාවත් ලස්සනයි . ඒ වගේම ඒ වචනත් එක්ක වාදනය කරන බේස් ගිටාර් වාදනය ආකර්ෂණීයයි . ඒ බේස් ගිටාර් එකේ ගීතයේ මුල සිට අග දක්වා තියෙන ඒකාකාරී බවෙනි තරමක් මිදෙන්නේ මේ තැන් දෙකේ නිසා .


පොදුවේ මේ ගීතයේම සංගීතය ගැන කියනවනම් , මේ ගීතය බටහිර සහ පෙරදිග සංගීතය සමබරව භාවිතා කරපු ගීතයක් කියලා කියන්න පුළුවන් . පෙරදික සංගීතයේ රාග වාදනයේ ගායනේ තියෙනවා තිහායි කියලා ශිල්ප ක්‍රමයක් . මේකෙදී කරන්නේ එකම කොටස ආයේ ආයේ වාදනය කරලා තාල් වලට එන විදියක් . මේ ගීතයේත් මට ඇහෙනවා රාගධාරී සංගීතයේ එහෙන් මෙහෙන් ඇහෙන තිහායි කොටස් .

එහෙනම් ආයෙත් ලිපියකින් හමුවෙමු . හැබැයි වයලීනි මේක කියෙව්වට පස්සේ වයලීනෝ ජීවත් වෙලා හිටියොත් තමයි ඈ .

ඔබ සැමට සමන් දෙවිඳුගේ පිහිට ලැබේවා !

Monday, March 14, 2016

අපි කතා නොකර ඉමු ?






බ්ලොග් එකට පෝස්ට් එකක් දාන්න ඕන කියලා හිත හිත ඉන්නවා හැමදාම . ඒත් වෙලාවක් වෙන්නේ නෑ . බුකියේ මම පෝස්ට් ශෙයා කරනකොට කස්ටිය හිතාගෙන ඉන්නේ මම හෙන ෆ්‍රී එකේ ඉන්නවා කියලා . ඒත් තියෙන වැඩ කන්දරාව දන්නේ මමයි උඩ ඉන්න දෙයියෝයි විතරයි හෆ්ෆා . ඉඳලා ඉඳලා එපා උනාම තමයි ඇවිත් බුකියේ පෝස්ට් ශෙයා කරගෙන කරගෙන යන්නේ . ඒකත් එපා උනාම ආයෙත් වැඩ කරන්න බහිනවා . අද කරන්ට් නැහැ . ඒ නිසා කැම්පස් එකේ අද ලෙක්චර්ස් ගොඩක් තිබුණේ නෑ . ඒ නිසා වේලාසනින් බෝඩිමට ආව නිසා හිතුවා පෝස්ට් එකක් ලියලා දැම්මනම් හොඳයි කියලා .

අපිට පලවෙනි අවුරුද්දේ දෙවෙනි සෙමෙස්ටර් එකේ තිබුණා කුරුමිණියෝ ගැන උගන්වන පාඩමක් . එන්ටොමොලොජි තමයි ඒකෙ නම . සිංහලෙන් මොකක්ද  එකක් කියනවා . මතක නෑ . :p  :p . ඉතින් මේ පාඩම උගන්වන කාලෙ අපිට ඒ පාඩම කියලා දීපු කථිකාචාර්ය තුමිය , පාඩමේ අන්තිම හරියේ තමයි මේ කුරුමිණියන්ගේ ප්‍රජනන කාර්යය ගැන විස්තර කරේ . මේ අයගේ තියෙන සංවේදන පද්ධතිය සහ ෆෙරමෝන කියන රසායනික ද්‍රව්‍යක් නිසා ඒ ඒ සතුන්ට තමන්ට ආවේනික විරුද්ධ ලිංගික ජීවියා කිලෝමීටර් ගාණක් ඈත තියා උනත් අඳුරගන්න පුළුවන් කමක් තියෙනවා කියලා මේ කථිකාචාර්ය තුමිය අපිට විස්තර කළා . මේ ක්‍රමය භාවිතා කරලා දැන් කෘමි සත්තු විනාශ කරන්න ෆෙරමෝන උගුල් පවා පාවිච්චි කරනවා . ඉතින් මේ ෆෙරමෝනවල තියෙන සුවඳට තමයි මේ සත්තු ආකර්ෂණය වෙන්නේ .






ඉස්සර මම උසස්පෙළ පංතියේ ඉගෙනගන්න කාලෙ අපේ බයෝ මිස් අපේ පංතියේ හිටපු කෙල්ලන්ට කිව්වා මරු කතාවක් . ඒකට හේතු උනේ ඒ කාලෙ ඒ පැත්තේ හිටපු ගුරු භවතෙක් තමන්ගේ ක්ලාස් එකට ආව ළමයෙක් එක්ක පැනලා ගියපු කතාවක් නිසා . අපේ මිස් කිව්වේ ඔය එක එක සැර සුවඳවල් තියෙන සෙන්ට් ජාති ගාගෙන ක්ලාස් යන්න එපා කියලා . අවංකවම කියනවනම් ඒ කතාවට මම ඒ කාලෙ හිත යටින් හිනා උනා . ඒත් අද වෙනකොට තමයි ඒකට හේතුව තේරුම් ගත්තේ . මිනිස්සුන්ට ඇහෙන දේට , කියන දේට දකින දේට වඩා සුවඳ හොඳට මතක හිටිනවා . ඒ නිසා අපිට ඒ සුවඳ ආයෙත් දැනුනම ඒ සුවඳ මුලින් දැනුනු දවස , අවස්ථාව හරිම ඉක්මනට මතක් කරගන්න පුළුවන් වෙනවා .

මට මතකයි බුකියේ පෝස්ට් එකක් ශෙයා උනා ලිංගේන්ද්‍රිය අවට තියෙන රෝම ඉවත් කරන්න එපා කියලා කතාවක් . ඒකෙ විද්‍යාත්මක සත්‍යතාවයක් ගැන නම් සාධක මට ලැබුණේ නෑ . ඒත් ඒ ලිපියේ කියලා තිබුණේ මනුෂ්‍ය වර්ගයාගේ ආකර්ෂණය වීම් සිදුවෙන්න මේ ලිංගය සහ යෝනි මාර්ගය අවට තියෙන රෝමවල රෝම මූල වලින් ශ්‍රාවය කරන , ෆෙරමෝන වලට සමාන සංයෝග වලින් ඇතිවෙන ආග්‍රාන සංවේදනය උපයෝගී වෙනවා කියලා . ඒ දේ වෙනවා කියන්නේ අපිට නොදැනීම කියලා තමයි ඒ ලිපියේ වැඩිදුර විස්තර කරලා තිබුණේ .


                                                  http://previews.123rf.com/images/maridav/maridav1304/maridav130400114/19226464-Couple-running-Sport-runners-jogging-on-beach-working-out-smiling-happy-Fit-male-fitness-model-and-a-Stock-Photo.jpg


ජීව විද්‍යාත්මකව එහෙම හිතන්න පුළුවන් වගේම පෙම්වතෙක් පෙම්වතියක් ආදරය කරන කාලයේ තම තමන්ගේ සහකරුවා හෝ සහකාරියගේ ළඟින් ඉන්න එක තරම් වටිනා වෙනත් දෙයක් ඇත්තේ නැහැ . පිස්සට හැතැප්ම නැහැ කියනවා වගේ පෙම්වතුන් පෙම්වතියන් කතා කරන්න ගත්තත් ඇවිදින්න ගත්තත් රණ්ඩු කරන්න ගත්තත් ඔය කිසි දේක ඉක්මන් අවසානයක් නම් ඇත්තෙම නැහැ . මේ නිසා දෙන්නට දෙන්නා පොඩි වෙලාවක් පොඩි කාලයක් හරි දකින්නේ නැතුව කතා කරන්නේ නැතුව ඉන්න එක හරියට කල්පයක් ගත කරනවා වගේ තමයි හිතට දැනෙන්නේ . මෙන්න මේ අදහස් කැටි කරලා රචනා කරපු ගීතයක් ගැන තමයි අද වයලීනොගේ ලිපියෙන් කියවෙන්නේ . එහෙනම් වෙනදා වගේම ඉස්සෙල්ලම අපි ගීතය අහලා ඉමු .



අපි කතා නොකර ඉමු
හිනා නොවී ඉමු
ටික දවසක්
අපි දෑසින් දෑසට ළංව බලන් ඉමු
එක මොහොතක්
කල්පයක් සේ දැනේවී
කල්පයක් සේ දැනේවී

අපි කතා නොකර හිඳිනා ටික දවසට
මල් පිපී පරව යන අරුමේ
ඔබ හිනා දකින්නට
මල් පුසුඹ දිගේ
කෙලෙසද නෑවිත් ඉන්නේ

අපි ළංව බලන් හිඳිනා එක මොහොතට
මල් පුසුඹක් සේ නුඹ දැනුනේ
මල් පුසුඹ සිඹින්නට
මා නෙළූ මලේ
කෙලෙසද නෑවිත් ඉන්නේ


ගායනය - ජානක වික්‍රමසිංහ
















පද රචනය - සුනිල් ආර්. ගමගේ



තනුව හා සංගීතය - ගුණදාස කපුගේ




මේ ගීතය අහනකොට මට මැවෙන්නේ මොකක් හරි රණ්ඩුවක් වෙලා හෝ ඒ නැත්නම් තරහා වෙලා නිසා , එහෙමත් නැත්නම් තමන්ගේ පෙම්වතිය හමුවෙන්න යන්න දාගෙනහිටපු දවසේ වෙනත් වැඩක් යෙදිලා පෙම්වතිය හමුවෙන්න යන්න බැරි වීම නිසා පසුවතැවෙන පෙම්වතෙක්ව . මොකද ඔයවගේ පෙම්වත්තු කීපදෙනෙක්ම වයලීනොගේ ඇස ගැටෙන මානයේ ඉන්නවා . උන්ටත් කියන්න පුළුවන් උන්ගේ ඇස ගැටෙන මානයේ ඒවගේ පෙම්වතෙක් ඉන්නවා කියලා ඕන නම් .  :p . එහෙමත් නැත්නම් ඉතින් මේ පෙම්වතා කරන්නේ අපිට මෙහෙම හම්බවෙන්නේ නැතුව ඉන්න උනොත් මොනවා වෙයිද කියලා හීන මවන සීන් එකක් .

අපි කතා නොකර ඉමු
හිනා නොවී ඉමු
ටික දවසක්
අපි දෑසින් දෑසට ළංව බලන් ඉමු
එක මොහොතක්
කල්පයක් සේ දැනේවී
කල්පයක් සේ දැනේවී

පෙම්වතා කියනවා අපි කතා කරන්නේ නැතුව ඉමු , පොඩි කාලයක්මත් නෙවෙයි . ටික දවසක් . ඒත් කතා කරන්නේ නැතුව දෑසින් දෑස ලං වෙලා බලාගෙන ඉමු . එතකොට අපිට ඒ කාලය කල්පයක් තරම් හිතට දැනෙනවා කියලා . ආදරය කරන දෙන්නෙක්ට මේ දේවල් දෙකම ලොකු දේවල් . දෙන්නට දෙන්නා කතා කරන්නේ නැතුව ඉන්නවා කියන්නේ ඉතින් ජීවිතේටම හෙන ගැහුවා වගේ තමයි . කොල්ලා කන්නේ බොන්නෙත් නෑ . කෙල්ල කන්නේ බොන්නෙත් නෑ . ඔහේ බලාගත්ත අත බලාගෙන ඉන්නවා . ඔය වගේ එක එක විදියට තමයි ඒ ආවේගය පිට කරන්නේ . ඒ වගේම තමයි දෙන්නට දෙන්නා ලං වෙලා මුනට මූණ බලාගෙන මොට්ටු මොට්ටු...................... කියලා නළලට නළල තියාගෙන බලාගෙන ඉන්නකොට . වෙන් වෙලා මූණ අහකට ගන්න හිතෙන්නෙම නෑ . ඔය ගත කරන කාලයන් දෙකම මහා විශාල කාලයක් විදියට තමයි පෙම්වතුන් කිරලා මැනලා ගන්නේ .





අපි කතා නොකර හිඳිනා ටික දවසට
මල් පිපී පරව යන අරුමේ
ඔබ හිනා දකින්නට
මල් පුසුඹ දිගේ
කෙලෙසද නෑවිත් ඉන්නේ

කොල්ලෝ කෙල්ලේ ෆෝන් එකෙන් නැත්නම් හම්බෙලා කතා කර කර ඉන්නවට අපේ බාසාවෙන් කියන්නේ මල් කඩනවා කියලනේ . ඔය මල් කැඩිල්ල ඇතිවෙලා තියෙන්නේ ආදරය කරනකොට පූදිනවා කියන පෙම් මල් නිසා . මේ පෙම්වතා කියනවා අපි දෙන්නා කතා නොකර ඉන්න ටික දවසට පෙම් මල් පිපිලා පරවෙලා යන විදිය දැක්කම පුදුමත් හිතෙනවා කියලා . ඉතින් ඒ පෙම් මල් පරවෙලා යන්න දෙන්නේ නැතුව පෙම්වතියගේ මුහුණේ පිපෙන හිනා මලක් එක්ක තමන්ගේ හිතේ පිපෙන පෙම් මල මුහු කරලා ආදරය විඳගන්න කොහොමද නෑවිත් ඉන්නේ කියලා පෙම්වතා තමන්ගෙන්ම ප්‍රශ්න කරනවා . මල් පුසුඹ දිගේ කෙලෙසද නෑවිත් ඉන්නේ . මෙන්න මේ පද පේලිය නිසා තමයි මම මේ ගීතයට අර ජීව විද්‍යාත්මක කතාව සම්බන්ධ කරන්න කල්පනා කරේ . කුරුමිණියා ෆෙරමෝන සුවඳට ඇදිලා යනවා වගේ , පිරිමියා ගැහැණියගේත් ගැහැණිය පිරිමියාගේත් සුවඳට ඇදිලා යනවා වගේ මේ ගීතයෙන් කියවෙන්නේ පෙම්වතියගේ සුවඳ විඳින්න පෙම්වතා යන්නේ නැතුව ඉන්නේ කොහොමද කියලා අහනවා වගේ දෙයක් නේද ?

අපි ළංව බලන් හිඳිනා එක මොහොතට
මල් පුසුඹක් සේ නුඹ දැනුනේ
මල් පුසුඹ සිඹින්නට
මා නෙළූ මලේ
කෙලෙසද නෑවිත් ඉන්නේ

දැන් පෙම්වතා හීන මවනවා පෙම්වතිය එක්ක තමන් කොතැනක හරි තනිවෙලා ඉන්නවා කියලා . දෙන්නට දෙන්නා මූණට මූණ ළං කරගෙන ඉන්නේ . පෙම්වතාට පෙම්වතිය දැනෙන්නේ මල් සුවඳක් වගේ . ඒ කියන්නේ පෙම්වතාට මතක් වෙනවා තමන් කලින් පෙම්වතියගෙන් විඳපු සුවඳ . ඉතින් ඒ සුවඳ ආයෙත් විඳගන්න එන්නේ නැතුව ඉන්නේ කොහොමද කියලා තමයි පෙම්වතා ප්‍රශ්න කරන්නේ .




මේ ගීතයේ සංගීතය ගැන ලොකුවට විස්තර කරන්න නම් දේවල් දැනෙන්නේ නැහැ . මේ ගීතයේ සංගීතයේ මම රස විඳින තැන් කීපයක් ගැන මම කියන්නම් . ගීතයේ පෙර වාදනය ආරම්භ වෙන වෙලාවේ ඉඳලම හොඳ රිදම් ගිටාර් පන්ච් එකක් යනවා . ඒවගේම බේස් ගිටාර් එකත් තමන්ගේ ගතානුගතික වාදන ශෛලිය ඉක්මවා ගිහින් කෝඩ්ස් වල ස්වර වාදනය කරමින් ඒ අතරේම තවත් ඒ කෝඩ්ස් වලට ගැළපෙන ස්වර වාදනය කරමින් ගීතය හොඳට පුරවලා තියෙනවා . අපේ බාසාවෙන් එහෙම තමයි කියන්නේ , පුරවලා තියෙනවා කියලා . ගීතයේ තියෙන ප්‍රේමාන්විතබව සහ හුදෙකලා බව ඇතිකරන්න හොරනෑවක් වගේ හඬක් නිකුත් කරන ඕබෝ එකක් දායක වෙනවා . පෙර වාදනය අවසන් වෙන වෙලාවේ ගිටාර් කෝඩ්ස් පන්ච් එක හුච් චං ගාලා වාදනය කරලා තමයි නවතින්නේ . ඒකත් මේ ගීතයේ හොඳ තැනක් .

අපි දෑසින් දෑසට ළංව බලන් ඉමු කියන වචන අතරේ බේස් ගිටාර් එකෙන් හොඳ වාදනයක් ඇතුළෙන්ඉදිරිපත් කරලා තියෙනවා . ගීතයේ අන්තරා කොටස් දෙකේම ගායන කරන අතරේ ඊට යටින් ඇහෙනවා ගිටාර් එකකින් ස්වර වාදනය කරනවා ඒ ඒ කෝඩ්ස් වල . ඒකත් ටිකක් මේ ගීතයේ ආකර්ශනීය තැනක් .






මේ ගීතයේ හදතට කතා කරන්න පුළුවන් ගායනා ස්ථානයක් තමයි කල්පයක් සේ දැනේවී කියන තැන . ජානක වික්‍රමසිංහ මහත්මයා ඒ ගායනය හදවතට දැනෙන විදියටම ඉදිරිපත් කරලා තියෙනවා . අපි කතා නොකර හිඳිනා ටික දවසට කියන කොටසේ ටික දවසට කියන වචන දෙකට අදාල ස්වර මාරු වීමට මම ටිකක් වැඩිපුර කැමතියි . මොකද මම ගීතය අහන්න ගත්තට පස්සේ ඒ තැන එනකල් බලාගෙන ඉන්නවා . හිතා මතා නැතත් ඉබේම වගේ ඒ දේ වෙනවා . මේ ගීතය මම බටනලාවෙන් වාදනය කරන්න කැමතියි . ඒවගේම සිංදුවා ඕගන් ඒකෙන් මේ ගීතය වාදනය කරනවා අහන්නත් කැමතියි . සිංදුවා මේ සිංදුවේ පෙර අතුරු වාදන වාදනය කරන වෙලාවට ඕගන් එකේ බෙන්ඩ් එක හොඳට පාවිච්චි කරනවා . බෙන්ඩ් එක කැඩෙන්නත් ඇත්තේ ඕකම තමා . හැක හැක හැක :p :p

මම එහෙමයි මේ ගීතය අහන්නේ . ඒ වෙනසට මම කැමතියි . ඒ නිසා ඔයාලත් ඒ වෙනසට කැමති වෙන්න . ගීතය අහලා ඔයාලට දැනෙන දේ කමෙන්ට් කරන්න .

ඔබ සැමට සමන් දෙවිඳුගේ පිහිට ලැබේවා !

Friday, March 4, 2016

රත්තණපිටිය







ඔන්න අම්මේ තාත්තේ අයියේ  අක්කේ නංගියේ මල්ලියේ වයලීනෝ මහතා අදත් මෙතනට ආවේ යස අපූරුවට තියෙන ගමක් කාලා බීලා විනාස කරලා දමන්නටයි . උදා හිරු කිරණ මේ මිහිමතට පතිතවෙන මොහොතේ පතන්නම් ඔබට සුබ උදෑසනක් , දවාලක් , සවසක් හෝ රැයක් කියලා . කැමති ඕන එකක් උනත් හිතා ගත්තට මට කමක් නැහැ . ඔය සිරි ජයවර්ධනපුර සරසවියේ ඉගෙනගත්ත , ඉගෙනගන්න අයනම් මේ ගම ගැන හොඳට දන්නවා . මොකද මේ ගම පිහිටලා තියෙන්නේ ජයවර්ධනපුර සරසවියට පිටිපස්සේ නිසා . ඒත් එහෙමයි කියලා මේ කතාව කියවන්නේ නැතුව අතෑරලා දාන්න එපා . මොකද ඒක ජාතික ගීය දෙමළෙන් ගායනා කලාට වඩා  ජාතියට කරන අපරාදයක් වෙන්න පුළුවන් . එහෙනම් මම ඔන්න කතාව පටන් ගන්න තමයි හදන්නේ . හැමෝම සාධුකාරයක් දීලා කැරකිලා දෙකට නැවිලා මේ කතාව අහගෙන ඉන්න ඕන හොඳද ළමයි ?

විජයාගමනයට පෙර අම්මටසිරිලංකාවේ කොළඹ කිට්ටුව තිබුණා එක ගමක් . මේ ගම හරිම පිටිසරයි . මොකෝ ඉතින් දැන් කාලේ වගේ කාර් බස් තිබුනා කියලය . ඉතින් මේ ගමේ අය ගමන් බිමන් ගිහින් තියෙන්නේ ගොං කරත්ත වලින් . ඒ පැත්තේ දැනට ජීවත්වෙන සමහර අයගේ වැඩ දැක්කම දැනුත් ඒ පැත්තේ ඉන්නේ මේ කරත්තවල බැඳපු අයමද කියලා මමනම් හිතන්නේ නැහැ . ඒත් මේක කියවන ඔබ තමුන්නාන්සේලාට ඒ ගැන හිතන්න පුළුවන් .

ඉතින් මේ ගොං කරත්තවල බඳින්න ගොන්නුත් ඉන්නේපාය . ගොඩක් වෙලාවට මේ ගොං කරත්තවල බැඳලා තියෙන්නේ එකම පුද්ගලයෙක්ට අයිතිවෙලා තිබ්බ හරක් . එහෙමත් නැත්නම් එයාගෙන් කරත්ත කුලියට උනත් ගන්න පුළුවන් . අපේ කතාව දැන් තමයි පටන් ගන්නේ . මේ හරක් අයිතිවෙලා හිටපු කෙනාගේ නම ලනුද . එයාට ලනුද කියලා නම වැටිලා තියෙන්නෙත් මේ කරත්ත රස්සාවට සම්බන්ධ නිසාම තමයි . මොකද හරකුන්ගේ නහය විදලා ලණුවක් දාන්න ඕනනේ කරත්තවල බඳිනවනම් . ඒ වැඩේට මෙයා හොඳට දස්සයිලු . ලණු දාන්න දස්ස නිසා තමයි ගමේ ය මෙයාට ලනුද කියලා නම දාලා තියෙන්නේ  . නැත්නම් එයාගේ නම දිකරන් .





මේ දිකරන් කියන කෙනා තමන්ගේ හරකුන්ට ඉතාම ආදරයෙන් සලකාගෙන ජීවත් උනා . ගමේ අයට කරත්ත කුලියට දුන්නේත්  මෙයා තමයි . මෙයා ඒ ලැබෙන සල්ලිවලින් ගමේ පන්සලට නොමිලේ වෙබ් සයිට් එකක් පවා හදලා දීලා තියෙනවා . ඒත් හරිම නිරහංකාර කෙනෙක් තමයි මේ දිකරන් කියන කෙනා . මෙයාගේ ගෙවල් කිට්ටුව තියෙනවා විශාල තණකොළ  පිට්ටනියක් . එයාට කන්න නෙවෙයි ඒක වවලා තිබුනේ . එයාගේ හරකුන්ට කන්න තමයි ඒක වවලා තිබුණේ . මෙන්න මේ තණකොළ පිට්ටනිය තමයි මේ ගමට නම වැටෙන්න අන්තිමට හේතු උනේ .

දවසක් ඔන්න මේ ලනුද , එහෙමත් නැත්නම් දිකරන් කියන මනුස්සයා තමන්ගේ හරක් ඔක්කොම දක්කාගෙන ගියා මේ තණකොළ තියෙන පිට්ටනියට . මොකටද ගියේ ? වෙන මොකටද ඉතින් උන්ට කන්න දෙන්න . ඔන්න දැන් ගිහින් ඉන්නවා තණකොළ පිට්ටනියට . හරක් ටික තම තමන්ට කැමති කැමති තැන්වල කැමති කැමති පොසිසන් වලට ඉඳගෙන හිටගෙන එක එක ස්ටයිල් වලින් මේ තණකොළ කනවා .

ඔහොම ඉන්න අතරේ මෙතනට ආවා ටිකක් කටකාර පුද්ගලයෙක් . අපි කියමුකෝ එයාට අබරං කියලා . මේ අබරන් දැන් කදිරන් එක්ක බර සාකච්චාව . එකපාරටම අබරන් ඇහුවා කදිරන්ගෙන් ඔයා ගොපලු දෙවියෝ විශ්වාස කරනවද කියලා . කදිරන් කොච්චර පන්සලේ වැඩට උදවු කරත් මේ දෙවිවරුන්ගේ වැඩ වලට උදවු කරන්නේ නෑ  . ඒ නිසා ගත් කටටම කිව්වා මමනම් ඔය දෙවියෝ විශ්වාස කරන්නේ නෑ . ගොපලු දෙවියෝනම් කොහොමටවත් විශ්වාස කරන්නේ නෑ  . ගොපලු දෙවියෝ මට දීපු බම්බුවක් නැහැ කියලා .

මේ වෙලාවේ මේ කතාව ගොපලු දෙවියන්ගේ මහ ඇමතිට ඇහිලා වහාම මේ ගැන කම්ප්ලේන් කරා ගොපලු දෙවියන්ට මෙන්න මෙහෙම කෙනෙක් තමුන්නාන්සේට අපහාස වෙන්න කතා කරනවා කියලා . ඒ වෙලාවේ ගොපලු දෙවියන්ට හොඳටම කේන්ති ගිහින් අර තණකොළ පිට්ටනියම රත් වෙන්න කියලා ශාප කළා . හරක් ටික එහෙ මෙහෙ දුවනවා . කදිරන්ට කරගන්න දෙයක් නැහැ . එයා හරිම අමාරුවෙන් හරක් ටික ගෙදරට දක්කාගෙන ගියා . ඒත් මේ පිට්ටනියේ ආයෙත් කදිරන්ට නෙවෙයි වෙන කාටවත්ම තමන්ගේ හරකුන්ට තණකොළ කන්න දෙන්න ලැබුණේ නැහැ . මොකද මේ ගොපලු දෙවියෝ කරපු ශාපය නිසා .

කාලයක් යනකොට මේ පැත්තට රත් තණකොළ පිටිය කියලා මිනිස්සු කිය කිය හිටියා . පස්සේ අන්තිමට රත් තණකොළ පිටිය රත්තණපිටිය  බවට පත්වෙලා අද දක්වා විකාශනය වේගෙන එනවා කියලා ඉතිහාසගත පොසිල වාර්තාවල සඳහන් වෙලා තියෙනවා . ඔන්න ඔහොමයි රත්තණපිටිය  ගමට නම වැටුනේ .නයන්න මාරු උනොත් හොඳ නැති බව කරුණාවෙන් සලකන්න . ආයෙත් මේ වගේ රසබර කතාවක් අරගෙන ඔබ හමුවට එන්නම් .

පලි :-
ටික කාලෙකට ආයෙත් ලියන්න වෙන්නේ නැහැ . දැන් කැම්පස් එකේ වැඩ වැඩිවෙලා තියෙන්නේ . පුළුවන් විදියට ලියලා ආයෙත් කතා අරගෙන එන්නම් . අර සීයාගේ මුණුබුරාගේ කතා එනකල් බලාගෙන ඉන්න අය සොරි වෙන්න ඕන කතාව පරක්කු වෙනවට . කතාවට මම " සඳ එළියේ අසිපත " කියලා තමයි නම දැම්මේ . ඒත් ඒක ලියලා ඉවර කරන්න කලින් වැඩ වැඩි උනා . ඒ නිසා ඒ කතාවත් කල් යයි .

ඔබ සැමට සමන් දෙවිඳුගේ පිහිට ලැබේවා !