Thursday, September 24, 2015

අඳුන් සඳුන් ජීවන් දිෂ්ටිලා වඩින හනුමන්තා දේව රාජා






ඕං දවරගන ජෝගිනි හනුමා වා වා දිෂ්ටී වා වා ..........................

යක්කු භූතයෝ දෙවිවරු ගැන කතාවක් කාලෙකින් ලියන්න උනේ නැති නිසා අද ආයෙත් ඒවගේ කතාවක් ලියන්න කියලා හිතුනා . ඒත් ඊට කලින් දෙයක් කියන්න ඕන . මේ බ්ලොග් එකේ ලියන්නේ කාගේවත් ලිපි කොපි කරලා පේස්ට් කරලා නෙවෙයි . කියවලා , අහලා , ඉගෙනගෙන නැත්නම් පොත් පත් කියවලා එකතුකරගන්න දේවල් තමයි මෙහෙම ලිපි හරහා අරගෙන එන්නේ . 

තම තමන්ගේ අභිමානය වර්ධනය කරගන්න මගේ හරි සිංදුවාගේ හරි , ලිපි පාවිච්චි කරාට මගේවත් සිංදුවාගේවත් අමනාපයක් නෑ . ඒත් ඒවා කොපි කරනකොට කතෘ අයිතිය ගැන සැලකිලිමත් වෙන්න මතක තියාගන්නවනම් හොඳයි . 

එහෙම කරන්න තියෙන ලොකුම හේතුව තමයි මට නම් මේවා උගන්නපු කීර්තිමත් පරම්පරා කීපයේ අයගේ වගේම එයාලාගේ ශිල්පයේ ගෞරවය රකින්න මමත් පොරොන්දුවෙලා ඉන්නවා කියන කාරණය නිසා . අනික තමයි මගේ වැය වෙන කාලයට වටිනාකමක් තියෙන්න ඕන කියන එක . කැම්පස් එකේ වැඩ ගොඩත් එක්ක බොහොම අමාරුවෙන් තමයි කලබල හිත එකතැන් කරගෙන , කියවන්න කැමති අයට කියවන්නයි , මගේ මානසික ආතතිය නැති කරගන්නයි බ්ලොග් ලියන්නේ .

ලිපියක් ලියනවා කියන්නේ එක අතකට භාවනාවක් වගේ වැඩක් . ඒ නිසා ඒ කැප කිරීමට කමෙන්ට්ස් වලින් නැතත් කොපි කරන්නේ නැතිව මගේ අයිතිය තහවුරු කරන්න උදව් වෙලා අපිට සහයෝගයක් දක්වනවානම් මම කැමතියි . කන්සෙප්ට් කොපි කරාට කමක් නෑ . ඒත් කන්ටෙන්ට් එක එහෙමම නොගන්න කාරුණික වෙන්න . ගන්නවානම් ගත්ත ලිපියේ ලින්ක් එක දාන්න . එහෙම දාන්නත් බැරිනම් පස්සේ අමනාපකම් ඇතිවෙයි .

මේ දේවල් අද කියන්න මතක් උනේ , මගේ ලිපි කීපයක්ම මුහුණු පොතේ එක පිටුවක පලවෙලා තියෙනවා දැක්ක නිසා . කොපි කරලා තිබුණේ ජෝතිෂ්‍යය සහ තවත් යන්තර මන්තර ගැන කටයුතු කරන සම්මාන ලාභී කෙනෙක් . ඒ දේවල් දැක්කම හිතට ඇතිවෙන කළකිරීම කියලා වැඩක් නෑ .

එක අතකට සතුටුයි එහෙම කොපි කරන්න තරම් දෙයක් මම ලියලා තියෙනවා කියලා හිතනකොට . ඒත් ඒවා තමන්ගේ වගේ කොපිකරලා දාගෙන ඉන්නවා මදිවට වෙන වෙන අය ඇවිත් ඒ පේජ් එකේ ඇඩ්මින්ට ස්තූති කරලා කමෙන්ට් කලාම , මේක මගේ රචනාවක් නෙවෙයි මමත් මේක කොපි කරලා ගත්තේ මියැසියේ රසකතා වලින් කියලා කියන්න තරම් ඒ ඇඩ්මින් ඉදිරිපත් නොවීම ගැන මම කණගාටු වෙනවා .

මමයි සිංදුවයි ඒ කෙනාට කිව්වට පස්සේ ලිපි කීපයක් අයින් කරලා තිබුණා . ඒත් කීපයක් ඉවත් නොවී තවම තියෙනවා . ඒ මදිවට මම සිංදුවා එක්ක කිව්ව කතා ගැන ලියලා තිබ්බ කොටස් අයින් කරලා තමයි එයා එයාගේ පේජ් එකේ මේවා දාලා තියෙන්නේ .

දෙවිවරුන්ගේ නම් දාගෙන පේජ් කරාට වැඩක් නෑ . දෙවියෙක් වගේ ජීවත් වෙන්න බලන්න . එතකොට මිනිස්සුත් තමන්ට දෙවියෙක්ට වගේ සලකයි . දැනට මිනිස්සු තමන්ට දෙවියෙක්ට වගේ සලකනවානම් ඔය ගතිගුණ ඔහොමම පවත්වාගන්නවානම් ඕක තාවකාලික බව මතක තියාගන්න . සුමනදාස අංකලුත් එහෙම තමා කාලයක් හිටියේ කියලාත් මතක තියාගන්න .






ඊයේ කැම්පස් ඉඳලා ගෙදර එනකොට බස් එකේ ඇහුනා හනුමන්තා ගැන කියවෙන සින්දුවක් . ඒ සින්දුවෙන් හනුමන්තා ගැන කියවෙනවා කිව්වට හනුමන්තාගේ පසුබිම ගැන නම් වැඩි ලොකු අදහසක් එන්නේ නෑ . ඒත් අඩුගානේ හනුමන්තා කියලා කෙනෙක් හිටියා කියලාවත් දැනගන්න එහෙමවත් ගීතයක හනුමන්තා ඉන්නවා කියන එකත් සතුටු වෙන්න පුළුවන් කාරණාවක් . 

මම මන්කී හනුමන්තා
වඳුරන්ගේ මහදැන මුත්තා
දඬු මොණරේ නැගලා
අහසින් යන්නා
හොයියා හොයියා හෝ

මම මන්කී හනුමන්තා
නැට්ටෙන් වැඩකිඩ ගිණි දුන්නා
දඬුමොණරේ නැගලා
අහසින් යන්නා
හොයියා හොයියා හෝ

චාල්ස් ඩාවින්
කිව්වා බයිලා
ඔහෙලා අපෙන්
පැවතෙනවා කියලා
චෑ චෑ පට්ටම පල් බොරු ඔව්වා
වන සත්තු අපියි
නෑ විපත්ති කරලා

දියුණු උනට කරුමාන්තයෙන්
කැත කරනවා ඔහෙලා මාන්නයෙන්
විසකුරු ගිණි අවි බෝම්බයෙන්
විනාස කරනවා අවියෙ බලෙන්

ඔහෙලගේ දිවි දික්කර ගන්නට
ගන්නවා අපේ දිවි අත්හදා බැලුමට
හිංසාවාදී දාන්නෙ බාල්දි
කවදා හරි ඔහෙලාට වදීවී

ඕං රීං කට්ටු කට්ටු
ඔහෙලගේ මොළ වල පිට්ටු පිට්ටු
මෙන්න දැම්මා අපි තට්ටු තට්ටු
වෙයි ළඟදිම හැම මට්ටු මට්ටු

මම මංකී හනුමන්තා
චිම්පංසිස් මහදැන මුත්තා
දඬු මොණරේ නැගලා
අහසින් යන්නා
හොයියා හොයියා හෝ

මම මංකී හනුමන්තා
ගෝරිල්ලස් ඕල්සෝ ලොක්කා
දඬුමොණරෙන් නගලා
අහසින් යන්නා
හොයියා හොයියා හෝ

ඉක්මන් ගමනට‍ හැදුවා ඔහෙලා
‍වාහන කියලා තෙල් දා දුවනා
පුච්චා අරිනා දුම් පිට කරනා
සී ඕ ටූ මුළු ලොව නැති කරනා

හදන්න ඔහෙලගේ නිවාස ‍ලී බඩු
කපනවා වටිනා කැළෑ ලෝ වටේ
නැතිකරමින් අපේ ජීවන ‍ප්‍රදේස
ගෙනනවා ලඟටම ලෝක අන්තිමේ

මෙහෙම ගියොත් අපි කාට කාට
ඕසෝන් හිලෙන් එන පාට පාට
රැස්වලින් පිච්චිලා මුළු සංහතියම
යයි මරු තුරුලට ගාට ගාට

වැටෙනා හිරු එළියෙන්
හමනා තද සුළ‍ඟෙන්
ගළනා ජල බලයෙන්
ගන්නකෝ වැඩකිඩ හොඳහින්

ගායනය : ජය ශ්‍රී
තනුව : ජය ශ්‍රී
ගී පද :




දැන් ඔයාලා බලනවා ඇති මම අර මුලින්ම පොඩි මන්තර කෑල්ලක් දාලා තියෙන්නේ මොකක්ද කියලා . ඒක ඇත්තටම ඇත්ත මන්තරයක් තමයි . හැබැයි ඒක විශේෂ වෙන්නේ වෙනත් වැදගත් කාරණාවක් නිසා .

මේ මන්තරය තමයි මම මන්තර යන්තර යක්කු භූතයෝ දෙවියෝ ගැන හොයන්න ඉගෙනගන්න කියලා පටන් ගත්ත කාලේ කියවපු පළවෙනිම මන්තරය . ඒක කියෙව්වා වගේම අදටත් මතක තියෙන තරමටම හදවතේ ඒක ලියවුණා . මේ මන්තරය අංජනම් වලට හනුමන්තාට ආරාධනා කරන මන්තරයක් . ආරාධනා කරලා ආවේ නැත්නම් බලෙන් හරි ගෙන්න ගන්න ක්‍රම ශිල්ප තියෙනවා . ඒත් මගේ සොයාගැනීම් අනුව මේක ආරාධනා කිරීමක් . 

යන්තර මන්තර වලට මම ආසාවක් ඇතිකරගත්තේ ඇත්තටම අංජනම් නිසා කිව්වොත් හරි . මම කලින් ලිපිවලත් කියලා තියෙනවනේ අපේ අර වෙදකම් කරපු සීයා කෙනෙක් ගාව මෙහෙම අංජනමක් තිබුණා , ඒ අංජනමෙන් හනුමා ලවා බෙහෙත් එහෙම අහගෙන ලෙඩ්ඩුන්ට බෙහෙත් කරලා තියෙනවා කියලා . ඒ අංජනම බලන්න ඒ කාලේ පොඩි ළමයි කීපදෙනේක්ගේම සහයෝගය ඒ සීයා ලබාගෙන තියෙනවා . මට ඒ අයගෙන් දෙන්නෙක් එක්කම කතා කරන්න පුළුවන් කම ලැබුණා .

එක්කෙනෙක් දැන් අවුරුදු හැත්තෑවත් පහු කරලා . අනිත් කෙනාත් හැත්තෑවට කිට්ටුවෙලා ඉන්නේ . මේ දෙන්නා එක්ක කතා කරලා අහගත්ත දේවල් අනුව හනුමා කියන්නේ ඇඟ පුරාම කලුපාට රෝම වලින් පිරුණු භයංකර මූණක් සහිත වානරයෙක් . හැබැයි කතා කරන්න පුළුවන් . මිනිස්සුන්ට තේරෙන්න සිංහලෙන් කතා කරන්න පුළුවන් . ඒ වගේම ඕන නම් ඕන දේ ලියලා පෙන්නන්නත් පුළුවන් .






අපි බලමුකෝ හනුමාගේ උත්පත්තිය කොහොමද කියලා . එක දිව්‍ය අප්සරාවක් හිටියා මෝහනී කියලා . මේ දිව්‍ය අප්සරාවට මෝහනී කියලා කියන්නේ දෙවියන් උනත් වසඟයට ගන්න පුළුවන් තරමේ නර්තන හැකියාවක් මේ දිවය අප්සරාවට තියෙන නිසා . දවසක් ශිව දෙවියන්ගෙන් මේ මෝහනී දිව්‍ය අප්සරාව වරයක් ඉල්ලුවා . ඒ තමයි ශිව දෙවියන්ගේ ප්‍රජනක ධාතුවක් තමාට ලබාදෙන්න කියන වරය . මේ වරය පිළිගත්තා ශිව දෙවියෝ තමන්ගේ ප්‍රජනක ධාතුවක් මේ මෝහනී කියන දිව්‍ය අප්සරාවට ලබා දෙනවා .

පස්සේ මේ ප්‍රජනක ධාතුව මෝහනී දිව්‍ය අප්සරාව වායු දිව්‍ය පුත්‍රයාට ලබාදෙනවා වන්දනීය වස්තුවක් හැටියට තබාගන්න කියලා . වායු දිව්‍ය පුත්‍රයා කාලයක් මේ ප්‍රජනක ධාතුව තමා ළඟ තියාගෙන හිටියා . පස්සේ දවසක් වායු දිව්‍ය පුත්‍රයාට දැනගන්න ලැබුණා කෙසරී කියන වානරයාගේ බිරිඳ අන්ජානි කියන වැදිරියට දරුවන් නැහැ කියලා . ඒ නිසා වායු දිව්‍ය පුත්‍රයා අන්ජානි වැදිරියගේ කනෙන් ඇතුළුවෙලා මේ ප්‍රජනක ධාතුව අන්ජානි වැදිරියගේ කුසයේ තැම්පත් කරා . මෙන්න මේ විදියට තමයි හනුමන්තා උපත ලබන්නේ .

පොඩිකාලේ හනුමන්තා අහසේ ඉගිල්ලෙන්න එහෙමත් නැත්නම් පාවෙලා යන්න පුළුවන් හැකියාවක් ලබාගත්තා . ඒ නිසා මෙයා ඉර හඳ තාරකා පවා හොයාගෙන ගියා . දවසක් හනුමන්තා සූර්යා ලඟට ගිහින් සූර්යාව ගිලින්න උත්සාහ කළා . මේ වෙලාවේ බයවෙච්ච ඉන්ද්‍ර දෙවියෝ තමන්ගේ වජ්රායුධයෙන් පහර දීලා හනුමන්තාව අඩපණ කරා . හනුමන්තා කියන්නේ ශිව දෙවියන්ගේ දරුවෙක් , ඒවගේම වායු දිව්‍ය පුත්‍රයාගේ දරුවෙක් .

මේ දේව දරුවා විනාශ කිරීම හේතු කරගෙන දෙවිවරු තමන්ගේ කාර්යයන් ඉටු කිරීම නතර කළා . ඒ කියන්නේ වායු දිව්‍ය පුත්‍රයා හුළඟ ඇති කිරීම නතර කළා . වර්ෂාවට අධිපති දෙවියෝ වැස්ස නැවැත්තුවා . මේ නිසා පරිසරයේ අසමතුලිත බවක් ඇතිවුණු නිසා අනිත් දෙවිවරු හනුමන්තාට නැවත ප්‍රාණය ලබාදෙන්න කියලා ඉන්ද්‍ර දෙවියන්ගෙන් ආයාචනා කළා . පස්සේ ඉන්ද්‍ර දෙවියෝ හනුමන්තාට සදාකාලික වීමේ වරයක් දුන්නා . මේ නිසා හනුමන්තා අදටත් ජීවත් වෙනවා කියලා තමයි විශ්වාස ක‍රන්නේ .






හනුමන්තා සහ රාමායණය අතර තියෙන සම්බන්ධයත් මේ වෙලාවේ අපි සලකා බලන්න ඕන . හනුමන්තා රාමායනයේදී රාමට උදවු කරා සීතා දේවිය නැවත රාම කුමාරයාට ලබාගන්න . මේ වෙනුවෙන් හනුමන්තා ගොඩක් කැප වෙලා වැඩ කරා කියලා රාමායනයේ සඳහන් වෙනවා . හනුමා තමයි සීතා දේවිය හොයාගෙන ඉස්සෙල්ලම ලංකාවට එන්නේ . සීතා දේවිය ලංකාවේ ඉන්නවද නැද්ද කියලා බලන්න ඕන කියලා කිව්වම රාම ලක්ෂමන දෙන්නා කල්පනා කරන වෙලාවේ ජම්භවන් කියන වලස් නායකයා කියනවා හනුමාට , ඔබට පුලුවනි නේද ඉගිලිලා යන්න ? . මතක නැද්ද ඔබ කුඩා කාලයේ සූර්‍යා වෙත ගිහින් සූර්‍යා ගිලින්න හැදුවා ? කියලා .

ඉතින් තමන්ගේ ඉගිලීමේ හැකියාව උපයෝගී කරලා හනුමන්තා ලංකාවට ආවා . මේ ගමනේදී හනුමාට ආශිර්වාද වගේම සතුරන් සමග සටන් වදින්නත් උනා . ඒ හැමදේම විඳ දරාගෙන හනුමා ලංකාවට ආවා . ඊට පස්සේ රාවණාගේ බලකොටුවට ඇතුල් වෙන්න සූක්ෂම ශරීර මවාගනීමට , රාවණාගේ යෝධයින් සමග සටන් වදින්න විශාල ශරීර මවාගැනීම වගේ විශ්මිත දේවල් පවා හනුමන්තා කරා . මේවා ඔක්කොම කරලා අවසානයේ හනුමා ලංකාවෙන් පිටත් උනේ හිතාමතාම රාවණාගේ සේනාවට අහුවෙලා රාවණා හමුවෙන්නත් ගිහිල්ලා . රාවනා හමුවෙලා තමාට නියමිත ආසනයක් දුන්නේ නැති නිසා තමාගේ වලිගය දික් කිරීමෙන් ආසනයකුත් හදාගන්න හනුමන්තා සමත් උනා .





හනුමා ලංකාවෙන් පිටත් උනේ තමාගේ වලිගයට රාවණාගේ හේවායින් ගිනි තිබ්බට පස්සේ . මේ ගිණි ගත්ත වලිගයෙන් හනුමන්තා ලංකාව ගිනිබත් කරා කියලා රාමායනයේ සඳහන් වෙනවා . පස්සේ ඔන්න රාම රාවණා යුද්ධය ඇතිවුණා . මේ යුද්ධයේදී හනුමන්තා තමන්ගේ සහය නොඅඩුව ලබාදෙන්න කටයුතු කළා . කුම්භකරණ සමග සටන ඒවායින් වැදගත් එකක් . යුද්ධය අතරතුරේදී රාවණාගේ පුතා , ඉන්ද්‍රජිත් විදපු ඊතලයක් ලක්ෂමනට වැදිලා ලක්ෂමන කුමාරයා මරණාසන්න වෙනවා . පස්සේ මේ වෙනුවෙන් අවශ්‍ය කරන සංජීවනී කියන බෙහෙත් පලැටිය හිමාලයෙන් ගෙන්න භාරගන්නේ හනුමන්තා . හනුමන්තා සෑම ශිල්පයකම විශාරද වරයෙක් නිසා වෙදැදුරු තුමා හනුමාට කිව්වා සංජීවනී පැලැටි ටිකක් ගෙන්න කියලා .

පස්සේ හනුමා හිමාලයට ගියාට පස්සේ මතක නෑ මොනවද ගෙන්න කිව්වේ කියලා . ඉතින් මෙයා කරන්නේ හිමාලයේ තියෙන කොටසක් ගලවලා අරගෙන කර තියාගෙන පියාඹලා ආවා . මේ කොටස පස්සේ ලංකාවේ උණවටුන කියන ප්‍රදේශයේ තිබ්බා කියලා කියනවා . ඒක සනාථ කරන්න සාක්ෂි කීපයක්ම තියෙනවා . උනවටුන ප්‍රදේශයේ ලංකාවේ වෙනත් පැතිවල නැති බෙහෙත් වර්ග තියෙනවා . ඒ වගේම රූමස්සල කඳු ප්‍රදේශයේ ගුරුත්වජ ක්ෂේත්‍රයේ ලොකු වෙනසකුත් තියෙනවා කියලා මම අහලා තියෙනවා . මේවා මෙහෙම වෙනස් උනේ උණවටුන ප්‍රදේශයේ තියෙන කොටස හිමාලයෙන් ගෙනාව කොටස නිසා කියලා පිලි ගැනීමක් තියෙනවා .






මේ හැමදෙයක්ම රාමායනයේ සම්බන්ධ උනාට රාමායණය පිළිගන්න නම් මම කැමති නෑ . මොකද මේ හැමදෙයක්ම වගේ රාවණා විරෝධී විදියටයි හදලා තියෙන්නේ . මම රාවණා අදහන්නේ නෑ . ඒත් රාවණාගේ ඉගැන්වීම් මමත් අනුගමනය කරන නිසා මේවා ගැන මගේ ඒ හැටි පැහැදීමක් නෑ . රාවණාගේ ගොඩක් ශිල්ප ශාස්ත්‍ර එක්ක හනුමා කෙලිනම් හෝ වක්‍රව සම්බන්ධ වෙනවා . ඉතින් දෙන්නා මෙච්චර හතුරෝ නම් කොහොමද එහෙම ශිල්ප සහ හනුමන්තා සම්බන්ධ වෙන්නේ ? . රාවණා රචනා කරපු සමහර අංජනම් බෙහෙත් වලට හනුමා වඩින්නේ කොහොමද ? . ඔන්න ඔයවගේ ප්‍රශ්න ගොඩක් තියෙන නිසා මමනම් රාමායනයේ සමහර කතා එක්ක එකඟ වෙන්නේ නෑ .

හනුමා විෂ්ණු දෙවියන්ට , ඒ කියන්නේ රාම කුමාරයාට වඩාත් භක්තිමත් බවක් පෙන්නනවා කියනවා . ඒ තමන්ගේ ස්වාමියා විදියට විෂ්ණු දෙවියන් කෙරෙහි හනුමන්තා සේවයේ දීලා ඉන්නා නිසා . මම දැන් කියන්නම් හනුමන්තා ගැන මට විතරක් අහන්න ලැබුන දේවල් ටිකක් .

හනුමන්තා අපේ අංජනම් බෙහෙත් වට්ටෝරුවක් වෙනස් කරන්න දායක වෙලා තියෙනවා . මම කියවපු සමහර පොත් පත් වල මුල් රචනාවට පස්සේ සංස්කරණ විදියට හනුමන්තා කිව්ව දේවල් කීපයක් සටහන් කරලා තියෙනවා දැක්කා . ඒවා යටින් ලියලා තියෙනවා මෙය හනුමා කීවේය කියලා .






අංජනම් හදනකොට අපි බෙහෙත් වර්ග ගොඩාක් එකතු කරනවා . මේ බෙහෙත් වට්ටෝරු වලට පාවට්ටා දළු සහ තේක්ක දළු එකතු කරන්න කියලා හනුමන්තා කියලා තිබුණා . තව දෙයක් තමයි අංජනම් හැම කෙනාටම පේන්නේ නැති වීම . මේ අවුල දුරු කරන්න හනුමන්තා එක මන්ත්‍රයක් කියලාදීලා තිබුණා . ඒ මන්ත්‍රයෙන් ඉතා විශාල වාර ගණනක් ජීවම් කරාම අංජනම හැම කෙනාටම බලන්න පුළුවන් තත්ත්වයට පත්වෙනවා කියල හනුමා වැඩි දුරටත් කියලා තිබුණා . ඒත් ඒ වාර ගණන ලේසියෙන් පුරන්න පුළුවන් වාර ගණනක් නෙවෙයි . ඒ නිසා එක ප්‍රායෝගික නෑ . හනුමා මේ මන්ත්‍රය කියලා තිබුණේ මන්ත්‍රයම කියලා නෙවෙයි . අහවල් පොතේ අහවල් පිටුවේ මෙන්න මේ කොටස කියන්න කියලා , කියල තිබුණේ .

අපේ ආච්චිඅම්මාගේ මිත්තණියට නවතින්නේ නැති බඩ යෑමක් ඇතිවෙලා සිංහල සහ ඉංග්‍රීසි බෙහෙත් කරලා කරලා පස්සේ කරන්නම දෙයක් නැතුව අංජනමෙන් බෙහෙත් අහලා තිබුණා . ඒ වෙලාවේ හනුමා කියලා තිබුණා එක්තරා ගමක පැල්පතක් වගේ ගෙදරක ඉන්න මෙන්න මේ නම තියෙන වෙද මහත්තයා දන්නවා මේකට බෙහෙත් . එයාව එක්ක ඇවිත් බෙහෙත් කරන්න කියලා . ඒ වෙද මහත්තයාගේ ගෙදරට යන පාර පවා හනුමන්තා කියලා තිබුණා . ඒ අනුව ඒ රෝගියා සුවපත් කරගත්තා .

තව දවසක් එක ගෙදරක ඔන්න හැමදාම රණ්ඩු රණ්ඩු කියලා අංජනමෙන් බලලා තිබුණා ඇයි එහෙම වෙන්නේ කියලා . ඉතින් හනුමා පෙන්නලා තිබ්බා ගේ ඉස්සරහා තියෙන අඹ ගහ යට මෙන්න මෙච්චර යටකින් තියෙන ගල යට ගුරුකමක් කරපු යන්තරයක් තියෙනවා , අන්න ඒක ගොඩ අරගෙන මේ මේ පිළිවෙලට ගුරුකම ඉවත් කලාම මේ ප්‍රශ්නය නැතිවෙලා යයි කියලා .






තව වතාවක ගමේ එක්තරා පුද්ගලයෙක් ගංජා ගහන්න පුරුදුවෙලා පස්සේ පිස්සු හැදිලා ගම දාලා ගිහිල්ලා . ඉතින් මේ කෙනාව හොයාගන්න ලැබුණේ අංජනමෙන් බලලා . හනුමන්තා කියලා තිබුණා මෙන්න මේ ප්‍රදේශයේ මෙන්න මේ කැලයේ මෙන්න මේ පැත්තේ තියෙන ගලක් උඩ තමයි මේ දවස්වල එයා ඉන්නේ . ඉක්මනට ගියොත් අල්ලගන්න පුළුවන් කියලා . ඒ විදියට ගිහින් ඒ කෙනාව එක්ක ඇවිත් තිබුණා .

ඉතින් ඒ කාලේ නම් හනුමන්තා බෙහෙත් කිව්ව ලෙඩ්ඩු අනන්ත අප්‍රමාන ගණනක් සනීප වෙලා තිබුණා . අදවෙනකොට මේ ශිල්පය අභාවයට ගිහින් නිසා හනුමන්තාටත් නිදහසේ ඉන්න පුළුවන් වෙලා ඇති .

හනුමන්තා විවාහකද නැද්ද කියන එක ප්‍රශ්නයක් වෙන්න පුළුවන් . ඒකට උත්තරයක් මම දැන් දෙන්නම් . හනුමා බ්‍රහ්මචාරීව ජීවත් වෙනවා කියලා පොඩිකාලේ දිවුරුම් දුන්න කියලා හනුමා අදහන අය විශ්වාස කරනවා . පාරාෂර ඍෂි වරයා රචනා කරපු පාරාෂර මහා සංහිතවේ සඳහන් වෙන හැටියට හනුමාගේ ආකාස්මික විවාහයක් ගැන සඳහන් වෙනවා .

සංහිතාවේ කියන හැටියට හනුමා සූර්ය දෙවියන් තමාගේ ගුරුවරයා හැටියට සලකනවා . හනුමා අවිවාහක නිසා දෙවියන්ගේ ඉගැන්වීම් වන නව වැදෑරුම් වූ ව්‍යාකරණ ඉගෙන ගන්න අවස්ථාව නැති උනා . ඉතින් හනුමාගේ ඉගෙන ගැනීම සම්පූර්ණ කරන්න ඕන නිසා බ්‍රහ්ම විෂ්ණු ඊශ්වර කියා ත්‍රී මූර්තිය විසින් සූර්ය කිරණ වලින් සුවර්චලා දේවිය නිර්මාණය කරා . සුවර්චලා තමයි හනුමාගේ විවාහක බිරිඳ උනේ . ඒත් දෙන්නම බ්‍රහ්මචාරීව තමයි ජීවත් උනේ . විවාහයක් කරපු නිසා හනුමාට අර නව වැදෑරුම් ව්‍යාකරණ ඉගෙන ගන්න අවස්ථාව ලැබිලා තියෙනවා .






හනුමාගේ දරුවා ගැන මෙන්න මෙහෙම සඳහනක් තියෙනවා . දවසක් හනුමා වෙහෙස නිවන්න ගඟක් අසබඩ ඉන්නකොට ඇගෙන් දහදිය බිංදුවක් ගඟට වැටුනා . මේ ඩහදිය බිංදුව පස්සේ දරුවෙක් බවට පත් වුණා . මේ දරුවා හදාවඩාගෙන තියෙන්නේ කිඹුලියක් විසින් . මේ වගේ තවත් කතා දන්නවනම් කමෙන්ට්ස් හරහා ඉදිරිපත් කරන්න ඔයාලට පුළුවන් .

හනුමන්තා සම්බන්ධ ගුරුකම් විශාල ප්‍රමාණයක් තියෙනවා .

හනුමා පිරිත
හනුමා ඉදිරෙට්ටුව
හනුමා වෛරොඩිය
හනුමා දැහැන
හනුමා වෙට්ටුව
හනුමා අලගුව
නයනමහාරී ගුරුකම
කෛවීර හනුමා වෙට්ටුව

ඒ ගුරුකම් වලින් කීපයක් .

හනුමා ගැන සම්බන්ධ අංජනම් ගැන මම මෙන්න මේ ලිපියේ ගොඩක් ඉස්සර කාලේ මම ලියලා තියෙනවා . ඔයාලට වැඩි විස්තර දැනගන්න ඕන නම් ඒකත් කියවන්න පුළුවන් . එහෙනම් තවත් ලිපියකින් ආයේ හම්බෙමු .

..... ආතාල බන්ධ පාතාල බන්ධ සිවුකොන අටකොන සොළොස්කොන බන්ධ බන්ධාමි හනුමන්තා දේව රාජා බන්ධාමි අදත් මාගේ මෙරඟ මඩලට දිෂ්ටි ලා ගිනි ගිනි හනුමා දේවරාජා සෙල්ලුම් ක්‍රලාඩි බාහේස් ගුරුලා වන්දනේ ඉරන්ද පෝනුම් සුවරවර වරියේ වෙල්ලක් කොන්ඩු ඉරිනුත්තු සෙල්ලුම් පේසු වර වර දේව රාජා පුර මෙත්ත පුඩයුම් කයිවීර හනුමා දේව රාජා බන්ධ බන්ධාමි වර වර ඒස්වාහඃ ...... ඕන් හරගුරු හනුමා දේවරාජා වර වර ...............





ඔබ සැමට සමන් දෙවිඳුගේ පිහිට ලැබේවා !

Sunday, September 20, 2015

සරසවියට මග පෙන්වූ මහා සරස්වතී තෛලය






ජගන් මෝහිනී මධුර භාෂීණී
චාරු දේහිනී කමල වාසිනී
සරස්‌වතී දේවී වන්දේ
සරස්‌වතී දේවී

කම්පිත කංචන මාලා කූජිත
කිංකිණි නූපුර ජාලා
පාද සරෝඡේ කටී තටාකේ
චංචල නර්තන ලීලා

මීන මකර පංකජ රූපාකුල
අංකිත කුංකුම රේඛා
පූර්ණ කුම්භම්ව පීන පයෝධර
පූරිතාමෘත ධාරා

භාග්‍ය සාධන පුණ්‍ය මූර්තිධර
සුරකුලවර අභිරූපා
දේහි දේහි වරදායක හස්‌තේ
ශුභ මංගල මූද්‍රා




වයලීනෝ ඉස්කෝලේ යනකාලේ , වයලීන් ගහන කාලේ මේ ගීතය වාදනය කරපු වාර ගණන අනන්තයි අප්‍රමානයි මෙයාලා . මතක් වෙනකොට ඇඩෙනවා මෙයාලා . කොයි දේට ගියත් මේ ගීතය වාදනය කරන්න මට අවස්ථාව ලැබෙනවා . මොකද ආර්ට් ඩේ සයන්ස් ඩේ අරඩේ මේඩේ ඔක්කොම ඩේ පටන් ගන්නේ මේ ගීතය ගායනය කරලා පූජා නැටුම ඉදිරිපත් කරලා නිසා . මට මතකයි සිංදුවා අයියා උනත් ඕගන් එක ගත්ත ගමන් මේ ගීතය පොඩ්ඩක් වාදනය කරලා තමයි වැඩ පටන් ගත්තේ . පාස්ට් ටෙන්ස් එකෙන් එහෙම කියන්න උනේ අදවෙනකොට මගේ අතින් වයලීනයත් , සිංදුවා අයියාගේ අතින් ඕගන් එකත් තරමක් දුරට ඈත් වෙලා තියෙන නිසා . ඒත් සරස්වතී දේවිය අපේ හිත්වල කොයි වෙලෙත් වැඩ ඉන්නවා කියන එක ගෞරවයෙන් යුතුව මතක් කරන්න ඕන . 

ඉතින් සකල කලාවන් හී අති උත්තම පූජාවට පාත්‍රවෙන සරස්වතී දේවිය ගැන අද ලිපියෙන් කියන්න හිතුනා . ලිපියේ අන්තර්ගතය ගැන පොඩ්ඩක් කියනවනම් ,  වයලීනොත් සිංදුවාත් දෙන්නම මේ දක්වා ආපු පාරට සමාන්තරව සංගීත පාරකුත් තිබුණ නිසා සරස්වතී දේවිය ගැන කරුණු කාරණා ටිකක් මෙතන ලියනවා . අනිත් දේ තමයි සරස්වතී තෛලය . හෙනරාජ රාජතරන්ගනී තෙල් ගැන ලිව්වට පස්සේ ඒ කාලේම මුහුණු පොතේ කීපදෙනක් මට මැසේජ් එවලා තිබුණා සරස්වතී තෛලය ගැනත් ලියන්න කියලා . ඒ කාලේ නම් මේ ගැන ලියන්න තිබ්බ උනන්දුව අඩුයි . එත් ඔන්නොහෙ ලියලා දානවා කියලා හිතුන නිසා ඒගැනත් මේ ලිපියේ සඳහන් කරා . එහෙනම් අපි නමෝවිත්තියෙන් මුලපුරමු සරස්වතී දේවියගෙන් වරමක් ඉල්ලගන්න .





සරස්වතී දේවිය හඳුන්වන්න අතිවිශාල නම් සංඛ්‍යාවක් තියෙනවා . බ්‍රාහ්මී , වාග් දේවී , වීනාධාරී , පුස්තකධාරී , ගී දේවී , හංසවාහිණී , සාරදා කියන්නේ ඒ නම් ගොන්නෙන් ටිකක් . මේ කොයි නමින් හැඳින්වූවත් සරස්වතී දේවිය සරස්වතී දේවියම තමයි . සරස්වතියගේ උත්පත්තිය ගැන කතා කීපයක්ම අහන්න ලැබුණා . 

සමහරු විශ්වාස කරන්නේ සරස්වතී දේවිය ඉපදුනේ සුරයින් සහ අසුරයින් කිරි මුහුද මන්ථනය කරනකොට කියලා . එත් සමහර අය විශ්වාස කරන්නේ සරස්වතිය ඉංදු ගංගා දෙණියේ ඉපදිලා ඉඳලා පස්සේ දේවත්වයට පත් වුණා කියලා . සරස්වතියට සරස්වතිය කියලා නම් කරලා තියෙන්නේ මහා බ්‍රහ්මයාගෙන් සිවුසැට කලාවන්හී විශාරද භාවයක් ලැබෙන විදියට එතුමියට වරයක් ලැබිලා තියෙන නිසා කියලාත් විශ්වාස කරනවා . 

සරස්වතිය විෂ්ණු දෙවියන්ගේ බිරිඳක් වෙලා හිටියා කියලා දේව කතාවල සඳහන් වෙනවා . මුල කාලේදී සරස්වතිය , ලක්ෂ්මී දේවිය සහ ගංගා දේවිය කියන තුන්දෙනාම විෂ්ණු දෙවියන්ගේ භාර්යාවන් විදියට ඉඳලා තියෙනවා . ඒත් කාලයක් යනකොට මේ තුන්දෙනා අතරේ ආරවුල් ඇතිවෙන්න පටන් ගත්තට පස්සේ විෂ්ණු කරන්නේ ලක්ෂ්මී දේවිය තමා වෙත තියාගෙන සරස්වතී මහා බ්‍රහ්මයාටත් , ගංගා දේවිය ඊශ්වර දෙවියන්ටත් පවරලා දෙන එක . ඒ නිසා සරස්වතිය මහා බ්‍රහ්මයාගේ බිරිඳ විදියට අදටත් හඳුන්වනවා .





සරස්වතිය වැඩ ඉන්නේ නෙලුම් මලක් උඩ , නැත්නම් හංසයෙක් මත . නෙළුම සහ හංසයා මහා බ්‍රහ්මයාගේ ආසනය සහ වාහනය නිසාත් , සරස්වතී දේවිය මහා බ්‍රහ්මයාගේ බිරිඳ නිසාත් එතුමියටත් මේ වාහනය සහ ආසනය ලැබිලා තියෙනවා . සරස්වතී දේවියගේ එක අතක වීනාවක් තියෙනවා . මේ වීනාවෙන් පෙන්නුම් කරන්නේ කලාවන්ට අධිපති බව මෙතුමියට තියෙනවා කියන එක . තවත් අතක පුස්කොල පොතක් තියෙනවා . ඒකෙන් පෙන්වන්නේ අධ්‍යාපනයට එතුමිය අධිපති වෙනවා කියන එක . අනික් අතේ තියෙන්නේ පළිඟු ජප මාලයක් . ජපමාලයෙන් පෙන්නුම් කරන්නේ අධ්‍යාත්මික පසුබිම .

සරස්වතිය වෙනුවෙන් තමයි ඉන්දියාවේ අදටත් සංගීත ශිල්පීන් ප්‍රසංග පවත්වන්නේ . ඒ කියන්නේ මෙහෙමයි . සරස්වතිය වෙනුවෙන් කියලා කිව්වේ නැතත් වෙනත් හේතුවක් නිසා ප්‍රසංග පැවැත්වුවත් එයාලාගේ ප්‍රධාන අරමුණ වෙන්නේ සරස්වතී දේවිය වෙනුවෙන් පුජාවක් පැවැත්වීම . දවසක් මට මතකයි මම බලපු වීඩියෝ එකක තබ්ලා වාදනය කරේ අද ලෝකයේ ඉන්න අංක එකේ තබ්ලා වාදන ශිල්පියා , සකීර් හුසේන් . එතුමාව ෆොටෝ ගන්න වෙලාවක එතුමා වාදනය නවත්වලා කිව්වා පොටෝ ගහන්න එපා , අපි මේ වාදනය කරන්නේ ප්‍රසිද්දිය වෙනුවෙන් නෙවෙයි සරස්වතී දේවිය වෙනුවෙන් පූජාවක් කියලා . අන්න එහෙමයි එහෙ . ලංකාවේ එච්චර දුරට නැතත් සරස්වතී දේවිය වෙනුවෙන් කියන හැගීම හැම කලාකරුවෙක්ගේම හිතේ තියෙනවා .






සරස්වතිය වෙනුවෙන් අද වෙනකොට පුද පූජා පවත්වන එක මාකට් එකක් වෙලා තියෙනවා . මට මතකයි මට ශිෂ්‍යත්වය තියෙන දවසට කලින් දවසේ අපේ අම්මා මාව සරස්වතී පූජාවකට එක්ක ගියා . එදා රත්නපුරේ පැත්තේ හිටපු ගොඩක් ළමයි මේ පූජාවට ඇවිත් හිටියා . පූජාව පටන් ගන්න කලින් හම්මේ තිබ්බ කාලගෝට්ටිය .

පූජා මණ්ඩපය කිට්ටුවෙන් තමන්ගේ ළමයා වාඩිකරවන්න අම්මලා ටික පොරකනවා . අපේ අම්මා මාව පැත්තකට කරගෙන හිටියා කට්ටිය වාඩි වෙනකල් , ඊට පස්සේ ඉඩ තියෙන කොහෙන් හරි වාඩි වෙන්න කියලා . ඊට පස්සේ තමයි මම වාඩි උනේ . ඉතින් පූජාව කරලා ආශිර්වාද කරාට පස්සේ තමයි පූජාව ඉවර උනේ . මේ පූජාව එක අතකින් බැලුවම හොඳයි උනාට මේවා පෝස්ටර් ගහලා අඬබෙර ගහලා කරන එකට මමනම් එච්චර කැමැත්තක් නෑ . දෙවියන් බලනවද නැද්ද මම දන්නේ නෑ . ඒත් මේවගේ මාකට් වැඩ නිසා දෙවිවරුන්ගේ තියෙන දේවත්වය අදවෙනකොට අඩුවෙලා තියෙනවා කියලා මට හිතෙනවා .

ඉතින් මේ පූජාවේදී එක කරපු හාමුදුරුවෝ කිව්වා මට මතකයි සරස්වතී දැහැනෙන් දහස් වාරයක් මේ තෙල් ජීවම් කළා කියලා . ඉතින් ඒ පූජාවේදී මම හොඳට අහගෙන හිටියා කියන්නේ මොනවද කියලා . ඇත්තටම ඒ හාමුදුරුවෝ සරස්වතී මන්තර පුරලා තමයි පූජාව කලේ , පස්සේ පිරිත් කියලා දෙවියන්ට පින් දීලා පූජාව අවසාන කළා .

සරස්වතී තෛලය අද වෙනකොට අහන්න දකින්න ලැබෙන්නේ නෑ . ඒත් සරස්වතී මන්ත්‍රය සරස්වතී යන්ත්‍රය වගේ දේවල් අදත් අහන්න දකින්න ලැබෙනවා . සරස්වතී තෙල් අද නැති නිසා තමයි යන්ත්‍රය සහ මන්ත්‍රය ඇතිවෙලා තියෙන්නේ . අනික තමයි සරස්වාතී තෙල් හදන්න සහ පාවිච්චි කරන්න තියෙන අපහසුව . මේවා පාවිච්චි කරනවානම් මස් මාළු කන්නේ නැතිව පිලී ජාතිවලින් වැළකිලා ඉන්න ඕන . අද වෙනකොට මේ දේවල් පිළිපදින්න අමාරු නිසාත් මේ දේවල් නැතිවෙලා තියෙනවා . අනික තමයි ගුරු මුෂ්ටිය . ගුරු මුෂ්ටිය නිසා මේවා හංගගෙන ඉන්න නිසා මේවා නැතිවෙන්න තියෙන ඉඩ කඩ වැඩිවෙලා තියෙනවා . එත් ගුරු මුෂ්ටි තියාගත්තේ නැත්නම් ශිල්පය අනවශ්‍ය පුද්ගලයින් අතට ගිහින් තවත් විනාස වෙන්න පුළුවන් නිසා මේවා භාවිතය අඩුවෙලා තියෙනවා .





සරස්වතී තෙල් ගැන කියනකොට අපට මතක් වෙන්නේ ෂඩ් භාෂා පරමෙශ්වර ත්‍රිපිටක වාගීශ්වර තොටගමුවේ ශ්‍රී රාහුල හාමුදුරුවෝ . 1408 මැයි මාසයේ 08 වෙනිදා උපත ලබපු මේ තොටගමුවේ ශ්‍රී රාහුල හාමුදුරුවෝ පස්සේ කාලෙක රජ මාලිගාවට ගිහල්ලා අන්තිමට නැවතුනේ පැවිදි බිමට පත්වෙලා . එතුමාගේ ගුරු හාමුදුරුවෝ උනේ වීදාගම මෛත්‍රීය හිමි . ඉතින් කාලයත් එක්ක තොටගමුවේ රාහුල හාමුදුරුවෝ බෞද්ධ අධ්‍යාපනය එක්ක ගුප්ත විද්‍යාවත් හොඳට ඉගෙන ගත්තා .

ෂඩ් භාෂා පරමේශ්වර . ඒ කියන්නේ භාෂා හයක නිපුනත්වයක් ලබාගත්තා . ඒවගේම ජෝතිෂ්‍යය යන්තර මන්තර ශාස්ත්‍රය ගැනත් මනා දැනුමක් ලබා ගත්තා . තොටගමුවේ හාමුදුරුවෝ යක්කු භූතයෝ බැඳගෙන වැඩ ගත්තා කියලා ජනප්‍රවාදයේ සඳහන් වෙනවා . මෙහෙම බැඳගත්ත යක්කු එලවා ගන්න විදියක් නැතුව වෙනත් උපායන් මගින් යක්කු එලවපු කතා පවා සඳහන් වෙනවා . ඒවගේම තොටගමුවේ හාමුදුරුවෝ යන්තර මන්තර  ශාස්ත්‍රය ගැන මනා පරිචයක් ලබාගත්ත හිමි නමක් .

තොටගමුවේ හාමුදුරුවෝ රචනා කරපු මන්තර පවා තියෙනවා . මමත් මන්තර යන්තර ගැන අධ්‍යනය කරන කාලේ එක තැනකදී තොටගමුවේ හාමුදුරුවන්ගේ මන්තර කීපයක්ම කියෙව්වා . ඒ මන්තරවල භාෂාව ටිකක් වෙනස් . තෙලිඟු වගේ භාෂාවක් ඒක .

ඒවගේම තොටගමුවේ හාමුදුරුවෝ කතරගම දෙවියන්ගෙන් වරම් ලබාගත්ත හිමි නමක් විදියට සඳහන් වෙනවා . කතරගම දෙවියන්ගෙන් වරම් ලබාගත්ත අය කීපදෙනෙක් ගැන සඳහන් වෙනවා . ඒ අතරෙන් කෙනෙක් තමයි මේ තොටගමුවේ හාමුදුරුවෝ . ඉතින් අපි එමුකො අද කතාවට . මේ කතාව ඉතින් ඔයාලා කියවලා අහලා දැකලා ඇති . ඒත් හදිස්සියෙවත් නොදන්නා කෙනෙක් ඉන්නවනම් කියලා මම ඒ කතාව සඳහන් කරනවා .






තොටගමුවේ හාමුදුරුවෝ පොඩි කාලේ ඉඳලා හරිම කල්පනාවෙන් යුතුව ජීවත් වුනු චරිතයක් . ඒ නිසාම මේ හාමුදුරුවෝ තමන්ගේ ගුරු හාමුදුරුවන් ගැන පවා හිටියේ හරිම විමසිල්ලෙන් . ඉතින් තොටගමුවේ හාමුදුරුවන්ට දවසක් නෝට් උනා තමන්ගේ ගුරු හාමුදුරුවෝ කොහේ හරි බණකට හෝ වෙනත් ශාස්ත්‍රීය කටයුත්තකට යන්න කලින් පන්සලේ තියෙන රහස් කාමරයට ඇතුල් වෙලා ආයෙත් කාමරයෙන් පිටවෙලා යනවා කියලා . එත් මොකක්ද කරන්නේ කියලා හොයාගන්න උනේ නෑ . දවසක් වීදාගම හාමුදුරුවන්ට හදිස්සියේම ශාස්ත්‍රීය කටයුත්තකට යන්න ඕන උන නිසා කාමරේට ඇතුල් වුන වෙලාවේ කාමරේ දොර වහගන්න උනේ නෑ .

ඒ නිසා තොටගමුවේ හාමුදුරුවෝ හැංගිලා බලාගෙන හිටියා ලොකු හාමුදුරුවෝ මොකක්ද කරන්නේ කියලා . වීදාගම හාමුදුරුවෝ යම්කිසි තෙල් බෝතලයකින් හංස පිහාටුවකින් ස්වල්පයක් අරගෙන දිවේ ගාගන්නවා තොටගමුවේ හාමුදුරුවෝ දැක්ක . ලොකු හාමුදුරුවන්ට තිබ්බ හදිස්සියට කාමරේ දොර වහන්න බැරි වුණා . තොටගමුවේ හාමුදුරුවෝ කාමරේට ඇතුල් උනා . වීදාගම හාමුදුරුවෝ මේ අතරේ පන්සලෙන් පිටත් වුණා . තොටගමුවේ හාමුදුරුවෝ අඳුරගත්තා මේ බෝතලේ තියෙන්නේ සරස්වතී තෛලය කියලා .

සරස්වතී තෛලයෙන් ඉතාම ස්වල්ප මාත්‍රයක් දිවේ ගාගත්තම ඇහෙන ඇහෙන දේවල් මතක හිටිනවා කියලාත් තොටගමුවේ හාමුදුරුවෝ ඒවෙනකොට දැනගෙන හිටියා . ස්වල්පයක් ගාගත්තම එහෙමනම් , බෝතලේම බිව්වම කොහොම හිටියිද කියලා හිතපු තොටගමුවේ හාමුදුරුවෝ එකපාරටම බෝතලේ කටට හලාගත්තා . පන්සලේ හිටපු ගිරවා මේක දැක්කා . ඊට පස්සේ කෑගහන්න ගත්තා තොටගමුවේ මලා තොටගමුවේ මලා කියලා . මේ සද්දේ ඇහුනා පන්සලේ වැඩ කරන ඇබිත්තයාට . ඇබිත්තයාගේ නම පුන්චිත්තා . මෙයා තමයි පස්සේ කාලෙකදී ඉඳුරුගිරි ලෙනේ තොටගමුවේ හාමුදුරුවෝ වැඩ ඉන්න කාලේ උන්වහන්සේට උදවු උපකාර කලේ . ඒවගේම තොටගමුවේ හාමුදුරුවෝ ගුරුකම සම්පූර්ණයෙන්ම වගේ මේ පුන්චිත්තට තමයි උගන්වලා තියෙන්නේ .

ඉතින් ගිරවාගේ සද්දේ ඇහිලා පුන්චිත්තා ඇබිත්තයා දුවගෙන ආවා මොකද වෙලා තියෙන්නේ කියලා බලන්න . ඒ ආවම තමයි දැක්කේ තොටගමුවේ හාමුදුරුවෝ සිහි නැතුව රහස් කාමරේ ඇදගෙන වැටිලා ඉන්නවා . හිස් වෙච්ච සරස්වතී තෙල් බෝතලයත් දැක්කා . පුන්චිත්තා දැනගත්තා මොකද වෙලා තියෙන්නේ කියලා . ඉක්මනටම වීදාගම හිමි හමුවෙන්න දුවගෙන ගිය පුන්චිත්තා වීදාගම හිමියන්ට කිව්වා තොටගමුවේ හාමුදුරුවෝ සරස්වතී තෙල් බීලා සිහි නැතුව ඇදගෙන වැටිලා ඉන්නවා කියලා . වීදාගම හාමුදුරුවන්ට දෙලෝ රත් උනා . කරන්න ගිය රාජකාරියත් පැත්තක දාලා වීදාගම හාමුදුරුවෝ පන්සලට වැඩම කළා . ඒ එන අතරතුරේ කිරි දෙන අම්මලාට පන්සලට එන්න කියන්න කියලා පනිවිඩයකුත් යවලා තමයි වැඩම කලේ .





වීදාගම හාමුදුරුවෝ අර අම්මලාට කිව්වා බෙහෙත් ඔරුවට කිරි දොවලා දාන්න කියලා . පස්සේ තමන් හදපු විශේෂ ඖෂධ මේ කිරි ඔරුවට එකතු කරලා තොටගමුවේ හාමුදුරුවෝ මේ ඔරුවේ සතපවලා මන්තර පුරමින් පිරිත් පුරමින් තොටගමුවේ හාමුදුරුවන්ට සිහිය ලබාහන්න උත්සාහ කරා . සතියක් යනකල් සිහිය ආවේ නෑ . ඒ නිසාම වීදාගම හාමුදුරුවෝ උත්සාහය අත්හැරලා දෙවියන්ට මේ කාර්යය භාරදීලා නිහඬ වෙනවා . වාසනාවට වගේ නොසිතපු වේලාවක තොටගමුවේ හාමුදුරුවන්ට සිහිය ආවා .

ඉතින් ඊට පස්සේ තොටගමුවේ හාමුදුරුවන්ට ඇහෙන ඇහෙන දේ මතක හිටියා කියලා තමයි කියන්නේ . කොච්චර හොඳ දෙයක් උනත් වැඩිපුර පාවිච්චි කරපු නිසා තමයි විෂ බවට පත් උනේ . තෙල ඇත්තටම විෂයි . මොකද මැණික්වර්ග පවා මේ තෙල හිඳින කල්කයට එකතු කරන නිසා . අනික ස්නායු පද්දතියට කෙලින්ම බලපාන නිසා අධි මාත්‍රාව කෙලින්ම ස්නායු පද්දතියට බලපාන්නේ . ඒ නිසා වෙන්න ඇති තොටගමුවේ හාමුදුරුවෝ සිහිය නැති තත්ත්වයට පත් වෙන්න ඇත්තේ .

ඒ කොහොම හරි ඉතින් අද මම මේ ලිපියේ සරස්වතී තෙල හිඳින්න ගන්න බෙහෙත් වර්ග ටික සඳහන් කරන්න කල්පනා කරා . සරස්වතී තෙල් වර්ග දෙකක් තියෙනවා මම දන්නා හැටියට . එකක් පොඩි එකක් . ඒක සරලයි සුගමයි . ඒ වගේම ප්‍රතිචාරයත් සරලයි . අනික තමයි මේක .

මේ සරස්වතී තෙල හිඳින්න ඉතාම සංකීර්ණ වත්පිළිවෙත් විශාල ප්‍රමාණයක් කරන්න තියෙනවා වගේම පේ වීම අකුරටම කරන්න ඕන .මස් මාළු කිලි වර්ග වලින් වැළකෙන්න ඕන . මෙන්න මේවා තමයි සරස්වතී තෙල් හිඳින්න ගන්නා බෙහෙත් වට්ටෝරුවට අයත් වෙන්නේ .

රණවරා මල්
වතුසුද්ද මල්
පිච්ච මුල්
සුදුකටරොළු මල්
නිල් කටරොළු මල්
රත්මල්
කොහොඹ මල්
මූනමල්
නාමල්
සපුමල්
පිච්චමල්
වතුසුදු මල්
මෙට මල්
නිකමල්
හීන් කොඳ මල්
කළු රොළුමල්
පෙතං මල්
බැබිල මල්
නෙළුම් මල්
දුනුකේ අල
බේදුරු අල
ඉඳුරු අල
කලාඳුරු අල
මානෙල් අල
එළනෙළුම් අල
ඉරිවේරිය
රසකිඳ
සැවැන්දරා
එළවරා
එළ බිංතඹුරු
පාවට්‌ටා
කරපිංචා
නික
මිරිස්‌
බුලත්
අරළු
මුගුණුවැන්න
දොඩම්
සප්සඳ
කරඳ
ඇහැල
බටුමුල්
බැබිල මුල්
දෙහි
සස්‌සඳ
කරඳ
ඇහැල
ඔලිඳ
හාතවාරිය
කෝමාරිකා
සූදුරු
මාදුරු
සතකුප්ප
දේවදාර
මනෝසීල
පරංගි පාසානං
සීනක්‌කාරං
ගල්මද
ගල්නහර
උළුහාල්
රුද්‍රෂ්ටක
හිරියල්
සහිඳලුණු
මීපැණි
උක්‌පැණි
පිනිදිය
සුදු හඳුන්
කොහොඹ තෙල්
තලතෙල්
ඉඟිනි ඇට
සීනි
එළකිරි
තැඹිලි
පොල්කිරි
ගිතෙල්
එඬරු තෙල්
මී තෙල්
රත්‍තරං
රිදී
මුතු ඇට
සක්‌ ඇට
සුදු පළිඟු මැණික්‌
කහ පළිඟු මැණික්‌
හීං හැඩයා
උරුලෑසට්‌ටං
ගේකුරුළු බිත්තර
කට්‌ටකුමංජල්
නිදිකුම්බා

සරස්වතී තෙල් හිඳින්න රත්තරන් භාජනයක් අරගන්න ඕන . ඒ කියන්නේ ලිපේ තියන්න වෙන්නේ රත්තරන් භාජනයක් . ඒවගේම උඩුවියන් පාවාඩ වටතිර ඇතුව තමයි තෙල් හිඳින්න ඕන . තෙල හිඳිනවට වඩා අමාරුයි තෙලට සරස්වතී මන්ත්‍රය පුරලා බල පිහිටවන වැඩේ . මස්මාලු කන්නේ නැතිව , කිල්ලට අහුවෙන්නේ නැතිව තෙලට මන්තර පුරන්න ඕන . හදිස්සියෙවත් එහෙම අවුලක් තියෙන කෙනෙක් මන්තර පුරන්න ගන්නවානම් එයා මන්තර පුරලා තෙල ජීවම් කරනකොට එයාට පිස්සු හැදෙනවා . අනික තමයි සරස්වතී තෙල පාවිච්චි කරන කෙනා ඒ වෙලාවේ මස්මාලු කාලා තියෙනවනම් හරි තෙල ගත්තට පස්සේ මස් මාළු කනවනම් හරි ඒ කෙනාට පිස්සු වැටෙන්න පුළුවන් කියලා සඳහන් වෙලා තියෙනවා .

සරස්වතී තෙල හිඳින එක සහ තෙල පාවිච්චි කරන එක සහ තෙලට මන්තර පුරන එක හරිම අමාරු වගේම අවදානම් වැඩක් නිසා අද වෙනකොට ඉතුරු වෙලා තියෙන්නේ සරස්වතී යන්ත්‍රය සහ මන්ත්‍රය විතරයි . සරස්වතී දේවියගේ ඇල්ම බැල්ම ලැබෙන විදියට තමයි සරස්වතී යන්ත්‍රය සහ මන්ත්‍රය රචනා කරලා තියෙන්නේ . සරස්වතී මන්ත්‍ර පාවිච්චි කරන අය ඉන්නවනම් එයාලා මතක තියාගන්න මේවා එක්ක මස් මාළු කිලි කියන දේවල් එකතු කරගන්නේ නැතිව ඉන්න වග බලාගන්න ඕන කියන එක .

ආයෙත් එහෙනම් ලිපියකින් හම්බෙමු .

ඔබ සැමට සමන් දෙවිඳුගේ පිහිට ලැබේවා !

Sunday, September 6, 2015

රොෂේනිසේ......





ආලෝකයෙන් ඔබගේ දෑස් පිරී ඇත
මාව ස්පර්ශ කරන්න
එහෙත් ඔවුන් පවසන්නේ මා ස්පර්ශ නොකරන ලෙසය

සිහින වලින් ඔබගේ දෑස් පිරී ඇත
මාව ස්පර්ශ කරන්න
එහෙත් ඔවුන් පවසන්නේ මා ස්පර්ශ නොකරන ලෙසය

මා ඔබව සොයමින් උන්නේ ස්වර්ගයේ ඉහල සහ පහලය
සමහරවිට මා හට
වලාකුළු වලින් දැවටෙමින් තිබෙන විට
ඔබව හමුවීමට ඉඩ තිබේ

මා ඔබව සොයමින් උන්නේ ස්වර්ගයේ ඉහල සහ පහලය
සමහරවිට මාහට
ගංගාවක පාවෙමින් තිබෙන විට
ඔබව හමුවීමට ඉඩ තිබේ

කාලය නැවතී ඇත
මම ඔබගේ ආගිය තොරතුරු ඇසුවෙමි
මට ගංගාවක් හමුවිය
එය කීවේ මා සාගරය පතුලේ ඔබව සෙවූ බවයි

දිය රැලි ඔස්සේ ගමන් කරමින් සිටින විට
එම දියරැළි මා ස්පර්ශ කරයි
ඒ ඔබගේ දෑත් මෙනි
ඒ අයුරින් මා ස්පර්ශ කරන්න