Sunday, August 30, 2015

කිරි හොදි







පොලොස් ඇඹුල හදන හැටි කියලා දුන්නට පස්සේ කෑම සූත්‍ර කැටගරියත් කොහොම හරි ඇදගෙන යන්න කියලා කීප දෙනෙක්ම මුහුණු පොතේ දැනට කාලෙකට කලින් මතක් කරලා තිබුණා . සමහර අයනම් කියන්නේ දැන් සිංදු ගැන කිව්වා ඇති , අපි රස කෑමක් හදමු කියලා . ඒත් ඉතින් ලියන්න කලින් කෑම ගැන අධ්‍යනය කරලා ඉන්ට එපාය .

වයලීනෝ මහතා අද අරගෙන එන්නේ බොහොම ලේසියෙන් හදාගන්න පුළුවන් කෑමක් . බතක් උයාගෙන මේ වගේ හොද්දක් හදාගත්තාම කන්ට හැකි බඩ පිරෙනකල් . හදිස්සියේ ඔන්න කෙල්ල කොක්කක් දාගෙන නැන්දම්මාගේ ගෙදර යනවා කඩාගෙන බිඳගෙන . එහෙමත් නැත්නම් බැන්දට පස්සේ චන්ඩි බන්ඩි මහත් වෙන ලෙඩේ හදාගෙන නැන්දම්මාගේ ගෙදර දුවනවා . එහෙමයි කියලා අපි කන්නේ බොන්නේ නැතිව බඩ ගින්නේ ඉන්නද ? . එව්වා සුම්මා . වයලීනොගේ මේ ප්‍රයත්නය ඒ වගේ කල්ල කපටි අම්මන්ඩිලාට හොඳ පාඩමක් උගන්වන්න , අපේ පිරිමි වර්ගයා දැනුවත් කිරීමයි ඔන්න .

එහෙනම් උයන්න පිහන්න දන්නේ නැති , අඩුම තරමේ හොද්දක ලුණු ඇඹුලක්වත් බලන්න දන්නේ නැති කල්ල කපටි කම්මැලි ගැහැණු ළමයින් සමග විවාහ වීමට සූදානම් වී සිටින හෝ විවාහ වී රහට කන්න නැතිව සිටින අහිංසක අසරණ පුරුෂ පාර්ශවය වෙනුවෙන් අද මම අරගෙන එනවා ලේසියෙන්ම හදාගන්න පුළුවන් කිරි හොදි හදාගන්නේ කොහොමද කියලා , කියලා දෙන්න . හිසට උඩු වියන්ද , පයට පාවාඩද ඇතිව ඉතාම ගෞරවයෙන් තමයි මේවා හදන්න ඕන හරිද ළමයි ?

මුලින්ම බලමුකෝ අවශ්‍ය ද්‍රව්‍ය මොනාද කියලා .

පොල් ගෙඩි 1ක් ( ලොකු නම් බෑයක් ඇති / පොඩි නම් ගෙඩියම ගත්තත් අවුලක් නෑ , බඩටනේ යන්නේ ) 
රතු ළූණු 100g ක්
උම්ම්ම්ම්ම්ම්ම්බලකඩ 10g ක්
කැකුළු හාල් මේස හැන්දක් විතර
දෙහි ගෙඩි 1ක්
කරපිංචා ඉති 1ක්
සුදු ළූණු බිග් 4ක්
ගොරකා කෑල්ලක්
රම්පෙ කොළ 1ක්
අමුමිරිස් කරල් 2ක් 
කහ ජුන්ඩක්
කුරුඳු කුඩු ජුන්ඩක් 
තුනපහ කුඩු ජුන්ඩක්
උළුහාල් ඇට ජුන්ඩක්
මිරිස් කුඩු ඉතාම ජුන්ඩක් 
ලුණු අවශ්‍ය තරමට ජුන්ඩක් 

පොල් ගාලා හොඳට බ්ලෙන්ඩර් කරලා කිරි ජාති දෙකම වෙන වෙනම අරගෙන තියාගන්න . ඊට පස්සේ කිරි හොද්ද හදන භාජනය අරගෙන ඒකට රතු ළූණු , උම්ම්ම්ම්ම්ම්ම්බලකඩ , අමුමිරිස් , සුදු ළූණු සහ ගොරකා කෑල්ල ලියලා දාලා රම්පා කරපිංචාත් කෑලි වලට කපලා දාන්න . ඊට පස්සේ අර මුලින් කිව්ව කැකුළු හාල් ටික මිරිස් ගලේ දාලා හොඳට අඹරලා ඒ ටිකත් අරවටම එකතු කරගන්න . කැකුළු හාල් දැම්මේ නෑ කියලා අවුලක් වෙන්නේ නෑ . ඒත් හාල් පොඩ්ඩක් හීනියට අඹරලා දැම්මම පොඩි ගතියක් තියෙනවා හොද්දේ .

ඊට පස්සේ ඒකටම මිරිස් කුඩු ජුන්ඩක්  , කහ කුඩු ජුන්ඩක් , තුනපහ කුඩු ටිකක් , උළුහාල් ජුන්ඩක් , කුරුඳු කුඩු ජුන්ඩක් එකතු කරගන්න . ලුණු පොඩ්ඩක් වෙන්න මුලින් දාගන්න . පස්සේ මදි උනොත් එකතු කරගන්න පුළුවන් . සමහර අයනම් ගම්මිරිස් එකතු කරනවා රහ එන්න . එව්වා හොද්දේ එක්ස්පර්ට් උනාම ඔයාලා හිතලා බලලා එකතු කරගන්න .

දැන් මේවාට දියකිරි විතර දාලා ලිපේ තියෙලා හැඳි ගගා හෙමීට තැම්බෙන්න අරින්න . මේ දාලා තියෙන ඒවා තම්බුනාට පස්සේ පස්ට සුවඳක් එනවා . ඊට පස්සේ තැම්බිලාද කියලා හොඳටම  බලාගන්න ඕන නම් රතු ළූණු කෑල්ලක් හැන්දට අරගෙන හපලා බලන්න පුළුවන් තැම්බිලද කියලා . එහෙම තැම්බිලානම් දැන් තියෙන්නේ මිටි කිරි ටික දාන්න . මිටි කිරි ටික දාලා ලිපේ හොඳට ගින්දර දාලා ටිකක් වෙලා යනකොට බෙර දවුල් තම්මැට්ටම් හොරණා ගහලා හොද්ද නටාගෙන එනවා . එතකොට නොනවත්වා හැඳි ගාන්න තමයි තියෙන්නේ . හැන්ද නැවත්තුවොත් හොද්ද කැටි ගැහෙන්න පුළුවන් . ඒ නිසා හොඳට හැඳි ගාන්න . ( උඹලාවත් බාගෙට හැඳිගාලා හදපු නිසා තමයි අද උඹලා ඔය වගේ කෙල්ලන්ට අහුවෙලා කන්න නැති වෙලා ඉන්නේ . ඒ නිසා හොද්දවත් හරියට හැඳි ගාපල්ලා )

හොද්ද හොඳට පැහුනට පස්සේ ලිපෙන් බාලා ආයෙත් ටිකක් වෙලා හැඳි ගාන්න තියෙන්නේ . ටිකක් වෙලා හැඳි ගාලා හොද්ද නටන එක අඩු උනාට පස්සේ දෙහි ගෙඩිය කපලා දෙහි ඉස්ම මිරිකලා දාන්න හොද්දට . ඊට පස්සේ කිරි හොද්ද හැදිලා ඉවරයි . සමහර අය මේකට සියඹලා එකතු කරගන්නවා . ඒක ඉතින් කැමති කැමති විදියට එක්ස්පර්ට් උනාම කරගන්න . දැන් බතක් උයාගත්තම හොදියි බතුයි කාලා ශේප් වෙන්න පුළුවන් . එහෙම බැරිනම් පොල් කුඩු ටික විසි කරන්නේ නැතිව තියාගෙන ඒකට මිරිස් ලුණු දෙහි ළූණු කෑලි ටිකක් දාලා ගලේ අඹරාගෙන පොල් සම්බෝලයක් හදාගෙන කිරි හොදියි පොල් සම්බෝලයි බතුයි කන්න පුළුවන් . පොල් කුඩු කන්න ඕන නෑ ඉතින් . ඕන නම් අලුතෙන් පොල් ගාගෙන හදාගෙන කන්න . මම කිව්වේ ලේසි නිසා  :p

අලුත් කෑමකින් ආයේ හම්බෙමු !

Tuesday, August 25, 2015

මංදුවට සිඩක් සමග ඇගෙ සිනහව තහනම්








මෙහි එන නම් ගම සියල්ල මනඃකල්පිත නොවන අතර 21වන සියවසේ මුල් භාගයේ රත්නපුරේ හද්ද පිටිසර මූකලාන ගමක සිදුවුණ අසත්‍ය සිදුවීමක් ආශ්‍රයෙනි .

( බුදු සරණ වේවා තාලෙට කියන්න )

ආ යු බෝ වේවා............
රෝ ග බෝ වේවා...........
පැටවූ බෝ වේවා ............
මෙතුන් බෝවෙන් ජයම වේවා...........

ඔන්න පිංවතුණි පිංවතියනි සිංදුවා සිංදුවතී ආදර කතාවේ හොඳම හරියට තමයි දැන් අපි ලං වෙලා තියෙන්නේ . කොයිවෙලේ මේකට කෙලවෙනවද කියලා තමයි වයලීනෝ බලාගෙන ඉන්නේ . මොකද සිංදුවා හොම්බෙන් යනවා බලන්න තමයි වයලීනොගේ බලාපොරොත්තුව . ඉතින් දැන් කතාවේ හැටියට වතී අක්කා නිවසේ හිරකාරියක් උනා . වතී අක්කගේ අයියා වතී අක්කගේ ෆෝන් එකත් ගත්තට පස්සේ වතී අක්කට කරගන්න දෙයක් නෑ . සිංදුවට කතා කරගන්න විදියක් නෑ . එත් සිංදුවා මේ මොකවත්ම දන්නේ නෑ . ඒ නිසා මැසේජ් කර කර ඉඳලා එකපාරටම මැසේජ් කරන එක නැවතුනේ ඇයි කියලා බලන්න සිංදුවා වතීට කෝල් එකක් ගත්තා .

ට්‍රීන් ට්‍රීන්න්න්න්.......................
ට්‍රීන් ට්‍රීන්න්න්න්.......................

සිංදුවා :- හෙලෝ වතී , ඇයි රත්තරන කතා කරන්නේ නැත්තේ ? මම මේ මැසේජ් එකක් එයි කියලා බලාගෙන ඉඳලා ඉඳලා තමයි කෝල් එකක් ගත්තේ.

අයියා :- ආ උඹලා දෙන්නා එහෙ මෙහෙ ඇවිද ඇවිද රත්තරන් බඩු සාප්පුවක් දාන්න යනවා කියලා මට ආරංචි උනා . මල්ලි බැරිද මටත් මාලයක් මුද්දක් අඩුවට හදාගන්න ?

සිංදුවා :- හෙලෝ , මේ කවුද කතා කරන්නේ

අයියා :- කවුද ? කවු නෙවේ කතා කරන්නේ . උඹේ මාරයා කතා කරන්නේ . උඹට මොකක්ද මගේ නංගි එක්ක තියෙන ගණුදෙනුව ?

සිංදුවා :- හෙලෝ ඔය උස්වැටකෙයියාවේ සුකොමලී නගාද කතා කරන්නේ ? මට පොඩ්ඩක් සුකොමලී නගාට කතා කරන්න පුළුවන්ද ? මම මේ සුගුණපාල කතා කරන්නේ සියඹලාණ්ඩුවෙන් .

අයියා :- තෝ හිතුවද මම තෝ කවුද කියලා දන්නේ නැතුව කතා කරනවා කියලා . මම දැක්කා උඹේ නම වැටෙනවා කෝල් එක එනකොට . ආයේ ඉස්කෝලේ එනකොට මමත් එනවා . ඇවිත් උඹලගේ පන්තිභාර ටීචර්ට කියලා උඹට මම දෙන්නම් ජම්බු .

සිංදුවා :- ජම්බු එපා අයියා මේ දවස්වල මට පොඩ්ඩක් වාත අමාරුවක් හැදිලා වගේ ඉන්නේ . ඌෂ්ණ කෑම කන්න හොඳ නෑ . පුළුවන් නම් මට වැටකොළු පතෝල වගේ සීතල මොනවාහරි දෙන්න .

අයියා :- හා රත්තරන් . වරෙන්කො ඉස්කෝලේ . ඊළඟ දවසේ මමත් උඹේ රත්තරන් එක්ක ඉස්කෝලේ එනවා .





ඔන්න දැන් තමාට කෙළවීගෙන එනවා කියලා සිංදුවා සහසුද්දෙන්ම දැනගත්තා . සිංදුවා කරගන්න දෙයක් නැතිව එක පාරටම සිහි නැතිව වගේ ඇඳට කඩාගෙන වැටුනා . ඒ එහෙම කලේ නිකන් අර ෆිල්ම් වල වගේ ඇක්ටින්ග් පාරක් දාන්න ඕන නිසා . නැතිව මුට ඇත්තටම සිහි නැතුව නෙවේ , හොඳට සිහි තියෙනවා . ඊට පස්සේ ටිකක් වෙලා ඉන්නකොට ඉන්නකොට ඉන්නකොට සිංදුවට හිත හදාගෙන ගෙදර ඉන්න බෑ . සිංදුවා ගෙදරින් යන්න තීරණය කළා .

කාටත් නොකියා සඳ ඇති රාත්‍රියක ගෙදරින් පිටවෙලා ගිහින් උපාලි සහ ජින්නා එදා මඩොල් දූවේ කල හපන්කම තනියමම කරන්න සිංදුවා කල්පනා කළා . එහෙම කරලා බයිසිකලෙන් කාර් එහෙක් හෝ අස්ප කරත්තෙකින් ඇවිත් වතී අක්කව කැන්දාගෙන යන්න කල්පනා කරා . ඒත් යන්න බෑ . සිංදුව එවෙලේ ගෙයින් එලියට බහින්න හිතුවට යන්න විදියක් නෑ . මොකද සිංදුවට ඒ වගේ වැදගත් ගමනක් යන්න හොඳ කිට් එකක් හදලා අයන් කරලා තියන්න උනේ නැති නිසා . ඊට පස්සේ හිත හදාගත්ත සිංදුවා හොඳට රෙද්දක් පොරවාගෙන නිදාගත්තා . 

සිංදුවා පහුවදා කලින්ම ඇහැරුනා . බාගෙට දත් මැදගත් සිංදුවා බාගෙටම මූණ හෝදලා හඩු ගඳ යන්න පෙයාර්ස් බේබි ශේරමි කොලොන්ග් බෝතලය ඇඟේ හලාගත්තා බ්ලැක් ඊගල් කොලොන්ග් බෝතලය හිසේ හලාගත්තා . කොලොන්ග් බෝතලය අතට ගන්න වෙලාවේ සිංදුවට වතීව මතක් උනා . අනේ වතී ඉතාම ආදරයෙන් සිංදුවට දීපු කොලොන්ග් බෝතල ටික . අද මරු කටට යන්න ඉන්න සිංදුවා , අම්මා ඉතාම අමාරුවෙන් හදලා දුන්නු කිරි එකවත් බොන්නේ නැතිව ගෙදරින් එලියට බැස්සා .






වෙනදා දිව්‍ය ලෝකයට යනවා වගේ ගිය සිංදුවා අද ඉස්කෝලෙට යන්නේ අපායට යනවා වගේ . 
වෙනදා දිව්‍ය ලෝකයට යන්න එන දිව්‍ය රථය වගේ පෙනුන බස් රථය අද සිංදුවට පේන්නේ අපායට යන BMW එක වගේ .
වෙනදා පොත් බෑග් එක අතින් අරන් යන සිංදුවා අද ඉස්කෝලේ යන්නේ පොත් බෑග් එක කරේ එල්ලගෙන . වෙනදා සිනහා මුසු මුහුණින් යන සිංදුවා අද ඉස්කෝලේ යන්නේ දුක්මුසු මුහුණින් . 
වෙනදා කකුල් දෙකෙන් ඉස්කෝලේ යන සිංදුවා අද ඉස්කෝලේ යන්නේ හොම්බෙන් .

ඔන්න සිංදුවා ඉස්කෝලේ ගියා . ඉන්ටවල් වෙලාවේ සීනුව නාද කළා . මේ වෙලාවේ සිංදුවගේ අම්මා ඉස්කෝලෙට ඇවිත් වයලීනොව අහම්බෙන් වගේ හම්බවෙනවා .

සිංදු අම්මා :- වයලීනෝ පුතා , අර ඉස්කෝලේ ළමයින්ගේ පවුල් අවුල් කරන මිස් ඉන්නවා දැක්කද ? 

වයලීනෝ :- ආ අන්න අතන ඉස්ටාප් කාමරේ ඉන්නවා ඇන්ටි 

සිංදු අම්මා :-  මට ඒ මිස් එන්න කියලා කිව්වා කෝල් කරලා . මම මේ ආවේ අපේ උන් දෙන්නාගෙන් මොකෙක්හරි මේ පාර මොන විජ්ජුම්බරයක් කරලද දන්නේ නෑ කියලා හිත හිත . 

වයලීනෝ :- ඔව් ඔව් ඇන්ටි ඕකුන් දෙන්නම එකයි . කෝවේ දාලා මකලා ගත්තත් වැඩක් වෙන්නේ නෑ ඇන්ටි .
සිංදු අම්මා :- මම එහෙනම් ගිහින් එන්නම් පුතා 

සිංදු අම්මා ඉස්කෝලෙට ඇවිත් පවුල් අවුල් මිස්ව හම්බුනා . අන්ෆෝචුනේට්ලී වතී අක්කගේ අයියත් ඇවිල්ලා . පස්සේ තමයි සිද්දිය දන්නේ . වතී අක්කගේ අයියා පවුල් අවුල් මිස්ට කියලා සීන් කෝන් එක . පස්සේ සිංදු අම්මට එන්න කියලාත් කෝල් කරලා තියෙන්නේ පවුල් අවුල් මිස්ම තමයි . දැන් ඔන්න හතරදෙනාම පවුල් අවුල් මිස් ඉස්සරහා විත්තිය සහ පැමිණිල්ල හමුවේ සාක්ෂි දෙන්න සූදානම් . පවුල් අවුල් මිස් තමන්ගේ අති භයංකර ගොරහැඩි නාදය අවධි කළා . 

පවුල් අවුල් :- ග්ර්ර්ර්ර්ර්ර්ර්ර්ර්ර්ර්ර්ර්ර්ර්ර්ර්ර්ර්ර්ර්ර්ර්ර්ර්ර්ර්ර්ර්ර්ර්ර් සිංදුවා 

සිංදුවා :- ඉන්නවා මිස් 

පවුල් අවුල් :- මම මෙතන රෙජිස්ටර් මාක් කරනවා නෙවේ . මම අහන්න හැදුවේ මොකක්ද මේ දෙන්නා අතර තියෙන පටලැවිල්ල කියලා .

සිංදු අම්මා :- මම හිතුවා මිස් මම හිතුව . මු කාමරේට වෙලා දොර වහගෙන දවසෙම ඉන්නේ ඇයි කියලා . මට හෙමීට ඇහෙනවා කුටු කුටු ගානවා . මු එහෙනම් කුටු කුටු ගගා මේක තමයි කරලා තියෙන්නේ . කාමරේ හැමතැනම ෆෝන් කාඩ් .







සිංදුවා :- පිස්සුද අම්මේ . මම ඒ කුටු කුටු ගගා කලේ වයෙලීනෝ මල්ලි කියාදුන්නු මන්තර ජප කරපු එක . 

පවුල් අවුල් :- කට වහපිය සිංදුවා . කියනවා දෙන්නා අතරේ තියෙන සම්බන්ධය මොකක්ද කියලා 

වතී :- ඉහි ඉහි ඉහීඊඊඊඊඊඊඊඊඊඊඊඊ ඊඊඊඊඊඊඊඊඊඊඊඊ . අපි අතරේ සහජීවන සම්භන්ධයක් තමයි තියෙන්නේ මිස් . පස්සේ පරපෝෂී සම්භන්ධයක් වෙන්න කියලා හිතාගෙන ඉන්නේ ඉහි ඉහීඊඊඊඊඊඊඊඊඊඊඊඊ////............................................ . සිංදුවා අහිංසකයි මිස් . මම තමයි මේකට වැරදි . මම එදා අම්මට ඉටිපන්දම් ගෙනත් දුන්නා නම් මේ කිසි කරදරටයක් නෑ . ඒ නැත්නම් එච්චර ඉක්මනට මේක අහුවෙන්නෙත් නෑ . 

පවුල් අවුල් :- මම අහන්නේ එහෙම අහුවෙන්න තියෙන්නේ මොකක්ද කියලා ?

සිංදුවා :- අල්ලලා බැලුවොත් අහුවෙන්න නම් ඉතින් ගොඩක් දේවල් තියෙනවා මිස් . හිහ හිහ හිහ හිහ හැක හැක හැක 

පවුල් අවුල් :- කට වහනවා මොට්ටපාල . මේ ඉස්කෝලේ යන වයසේ ඕවා තියාගන්න බෑ . අදම මේක නවත්ත ඕන . ඔයාලා දෙන්නා පොරොන්දු වෙන්න ඕන අදම මේක නවත්තනවා කියලා . ඉගෙනගෙන ඉවරවෙලා ඔයාලාට ඕන දෙයක් කරගන්න පුළුවන් ගෙවල් වල අයත් කැමතිනම් . 

වතී :- මට සිංදුවා නැතිව බෑ....... ඉහි ඉහි ඉහීඊඊඊඊඊඊඊඊඊඊඊඊඊ......................

අයියා :- උඹ කට වහපන් . උඹට තියෙන්නේ දැන් හොන්දට ඉගෙනගන්න මේ විකාර ඔලුවේ දාගන්නේ නැතිව . සිංදුවද උඹට ඉස්කෝලේ යන්න වියදම් කරන්නේ ? කන්න අඳින්න දෙන්නේ ? යමන් අද ගෙදර , උඹව මම හම ගහනවා .

සිංදු අම්මා :- අපේ එකා මෝඩය දුවේ . ඔය දුව මේවා නවත්තලා හොඳට ඉගෙනගන්න .

ඔහොම ඔහොම ඉතින් බොහොම සාමයෙන් සතුටෙන් ප්‍රශ්නේ අවසන් කරලා සිංදු අම්මා සහ වතී අක්කාග් අයියා ඉස්කෝලෙන් යන්න ගියා . ඉස්කෝලේ ඇරිලා වතී සිංදුවා දෙස අවසන් බැල්ම හෙලලා ලේන්සුවෙන් මුණ වහගෙන යන්න ගියා . 

සිංදුවා දැන් හරිම අවුලේ ඉන්නේ . ගෙදර ගියොත් මම නසී , ගෙදර නොගියත් මම නසී වගේ තමයි දැන් සිංදුවට වෙලා තියෙන්නේ . සිංදුවා හෙමින් හෙමින් ගෙදර ආවා . ඇවිත් කාමරේට යන්න හැරුනා විතරයි අම්මා විසින් සිංදුවව ආමන්ත්‍රණය කළා .







අම්මා :- ආ ආවද මනමාලයා අපේ මුණේ දැලි ගාලා 

සිංදුවා :- අම්මා ඉතින් සමහර දවසට උදේටත් මුණේ අතේ දැලි ගාගන්නවනේ උයන වෙලාවට 

අම්මා :- කටවහපිය . තාත්තා රට ඉඳලා එනකල් ඉස්කෝලේ යවන්නේ නෑ . එතකල් ඉන්නවා ගෙදර . තාත්තා ආවම තාත්තා එක්ක කතා කරලා තව දුරටත් ඔය ඉස්කෝලෙට යවනවද නැද්ද කියලා තීරණය කරන්න ඕන . එතකල් කාමරෙන් එලියට බහින්නේ බාත්රූම් යන්න විතරයි . කෑම එක කාමරේට එනවා . කාල ඉන්නවා වැඩිය දඟලන්නේ නැතිව . දඟලන්න ආවොත් පේනවනේ වේවැල . දෙනවා පලු යන්න . ගෑණු ගන්න දැන්ම ඉඳලා . පොඩි එකාවත් නරක් කරලා තියෙන්නේ මේ මනමාලයා තමා .

සිංදුවා :- ඉහි ඉහිහීඉඑඑඉඑඊඑඊඊඊඊඊඊඊඊඊඊඊඊ ඊඊඊඊඊඊඊඊඊඊඊඊඊ මට ඉස්කෝලේ යන්න ඔනෙඑඊඊඊඊඊඊඊඉඊඊඊඊඊඊඊඊඊඊඊඊඊ....................

අම්මා :-  කට වහගෙන යනවා කාමරේට .

අවසානයේ කාටවත් වරදක් නැති අහිංසක නිකැළැල් කෙලි ලොල් , ලොලේ ලොල් සිංදුවා ගෙදර හිර කාරයෙක් වෙනවා . යමින් බැඳ විලංගු දාලා අන්තෙටම අසරණ වෙලා ගෙදරත් හොම්බෙන් යන්න පටන් ගන්නවා . ඔන්න බලන්නකෝ හොම්බෙන් යන හැටි .

සිංදුවා :- මල්ලි !

සිංදු මල්ලි :- මල්ලි ? එන්නෙපා තමුසේ මෙතන මට මල්ලි කියන්න . තමුසේ අපේ පවුලට ගැළපෙන වැඩක්ද කලේ කියනවා . කෙල්ලොත් එක්ක යාලුවෙන්න . දැන්මම ඕවා ඕන නෑ කියලා දහම්පාසලේ හාමුදුරුවෝ කිව්වා තමුසෙට මතක නෑ .

සිංදුවා :- බනින්නෙපා මල්ලි . මට උදවුවක් කරන්න .

සිංදු මල්ලි :- උදවු කරන්න . අපේ මුණේ දැලි ගාලා තව උදවු ඉල්ලනවද ? . මම මේ මැක්ස් ෆෙයානස් ක්‍රීම් ගාලා සුදුවට තියන් ඉන්න මුණේ තමුසේ දැලි ගෑවා .

සිංදුවා :- මට වතී නැතිව ඉන්න බෑ මල්ලි .

සිංදු මල්ලි :- වතී ? . ඔය කුසුමාවතීට ඉන්න දිහාවක ඉන්න දීලා තමුසේ අපේ පවුලේ නම්බුව රකිනවා . ආවා මෙතන ඉස්කෝලේ ගිහින් ඉවරවෙන්න කලින් කෙල්ලෝ සෙට් කරගන්න .
කට වහගෙන ඉන්නවා . මමයි මෙතන අද ඉඳලා අයියා . තමුසේ මම කියන දේ අහගෙන ඉන්නවා . හා දැන් ගිහින් තමුසේ මට AC 1 game එක ඉන්ස්ටෝල් කරලා දෙනවා .

ඔන්න ඔහොමයි සිංදුවගේ මල්ලි සිංදුවට කිව්වේ . සිංදුවාට කෑම එක ගෙනත් දෙන්නෙත් සිංදු මල්ලිම තමා . සිංදු මල්ලි ඇවිත් කෑම එක සිංදුවගේ කාමරෙන් තියලා සිංදුවට කතා කරන්නේ දබරගිල්ලෙන් . සිංදුවා කෑම එක ගාවට එන්නේ බිම බලාගෙන . ඇවිත් කෑම කාලා පිඟාන දෙනකල් සිංදු මල්ලි කාමරේ ඉන්නවා . සිංදුවා බත් පොඩ්ඩක් හරි ඉතුරු කලොත් වේවැලෙන් එකක් දෙනවා ටා.............ල් ගාලා . එතකොට සිංදුවා බත් ඔක්කොම කනවා .  ඔහොම ඉන්න සිංදුවා හිර ගෙදරක හිර කූඩුවේ කම්බි ගනිනවා වගේ කාමරේ ජනේලයේ කම්බි වලින් ඉස්කෝලේ යන ළමයි දිහා බලාගෙන ඉන්නවා . අපිටත් දුකේ බෑ . එත් මොනවා කරන්නද . කරුමේ තමා කරුමේ . ඔන්න ඔහොම ඉන්න වෙලාවක සිංදුවගේ හිතට ආවා මෙන්න මේ සිංදුව . හැබැයි සින්දුවේ සමහරතැන් එක්ක ගත්තම මේක සිංදුවට ගැළපෙන්නේ නෑ . ඒත් සිංදුවට ඒක මතක් උනා .





ඇගෙ සිනහව තහනම්
ගෙදරින් මට තහනම්
සැලවෙයි ගෙදරට ඇය හමුවුණොතින්
චරපුරුෂයෝ දැන් මා වටලා
යන එන හැම තැන් මුර දාලා

යාබද නිවසේ ඇය ඉන්නේ
එනමුදු ගව්වක දුර වැන්නේ
එනමුදු ගව්වක දුර වැන්නේ
යාබද නිවසේ ඇය ඉන්නේ

පෙළපත කුලගොත වෙනස් වෙලා
නෑදෑ පිරිවර හරස් වෙලා
නෑදෑ පිරිවර හරස් වෙලා
පෙළපත කුලගොත වෙනස් වෙලා


ගායනය - චන්ද්‍රකුමාර කඳනාරච්චි
පද - කේ.ඩී.කේ. ධර්මවර්ධන
තනුව - චන්ද්‍රකුමාර කඳනාරච්චි




සිංදුවට නම් මේ ගීතයේ සමහර තැන ගැළපෙන්නේ නෑ . ඒත් ඔන්නොහෙ මේක ගැළපෙන අයට ගළපගන්න කියලා අපි බලමු මේ ගීතය ගැන .

ඇගෙ සිනහව තහනම්
ගෙදරින් මට තහනම්
සැලවෙයි ගෙදරට ඇය හමුවුණොතින්
චරපුරුෂයෝ දැන් මා වටලා
යන එන හැම තැන් මුර දාලා

ඔන්න කෙල්ලෙකුයි කොල්ලෙකුයි යාළුවෙලා හිටියලු . ඊට පස්සේ ටික දවසක් යනකොට යනකොට යනකොට යනකොට මේ කොල්ලයි කෙල්ලයි මෙව්වා මේවා කියලා ගෙවල් වලට ආරංචි වෙනවා . ඊට පස්සේ ලවු එකට තහංචි වැටෙනවා . මේ තහංචි හමුවේ දුක ඉවසාගෙන ඉන්න බැරි නිසා මේ ගීතයේ කතා නායකයා කියනවා මේ විදියට . ඒ නිසා කොල්ලා ඉන්නේ කෙල්ලව හම්බෙන්න විදියක් නැතුව . 

යාබද නිවසේ ඇය ඉන්නේ
එනමුදු ගව්වක දුර වැන්නේ
එනමුදු ගව්වක දුර වැන්නේ
යාබද නිවසේ ඇය ඉන්නේ

කෙල්ලයි කොල්ලයි ඉන්නේ කිට්ටුව ගෙවල් වල . ඒත් කොල්ලට කෙල්ලව හම්බෙන්නත් බෑ . කෙල්ලට කොල්ලව හම්බෙන්න්ත් බෑ . ඒත් දෙන්නා ඉන්නේ කිට්ටුව ගෙවල්වලනේ . ඒ නිසා කොල්ලා මෙහෙම කියනවා .

පෙළපත කුලගොත වෙනස් වෙලා
නෑදෑ පිරිවර හරස් වෙලා
නෑදෑ පිරිවර හරස් වෙලා
පෙළපත කුලගොත වෙනස් වෙලා

මෙන්න මෙතන තමයි මේ සිංදුව සිංදුවට ගැළපෙන්නේ නැති වෙන්නේ . සිංදුවා අනාගත්තේ මල් කඩන්න ගිහින් . මේ සින්දුවේ ඉන්න දෙන්නට කෙළවුණේ කුල ගෝත්තර ප්‍රශ්නයක් නිසා . 

මේ ගීතයේ තේරුමත් එච්චර අවුලක් නෑ . සංගීතය ගැනත් වැඩිය කියන්න දෙයක් නැති නිසා මෙච්චර තමා කියන්න වෙන්නේ . හැබැයි සිංදුවා වෙනුවෙන් කරගෙන යන මඩ ප්‍රචාරය තාම ඉවර වෙලා නම් නැහැ . එහෙනම් ඊළඟ මඩ කතාවෙන් හම්බෙමු . 

ඔබ සැමට සමන් දෙවිඳුගේ පිහිට ලැබේවා !

Monday, August 17, 2015

රාත්‍රිය උදා උනා නින්ද ඇයි නොඑන්නේ






ගොඩ කාලෙකට පස්සේ ලියන්න එන්න වෙලාවක් ලැබුණේ අද තමයි . වයලීනෝ සබැඳි කතා පෝස්ට් දෙක පබ්ලිෂ් කලාට මොකද ඒවා ඉතින් කලින් ලියලා තිබුණ ඒවා . ඒ නිසා වැඩි අවුලක් නැතිව ඒවා පබ්ලිෂ් කළා . ඒත් මේ දවස්වල වයලීනොට ටිකක් වැඩ රාජකාරි අධික උනා . ඒ නිසා බ්ලොග් පැත්තේ එන්න උනෙත් නෑ . දාලා තිබුණ කමෙන්ට් වලට ප්‍රතිචාර දක්වන්න ආවත් ලියන්න වෙලාවක් සෙට් කරගන්නම උනේ නෑ . වෙනදා වැඩ ටික බැලන්ස් කරගෙන ගියාට මොකද සති දෙකක් එකදිගට සිංහරාජ වනාන්තරයේ සහ නුවරඑලිය පැත්තේ ක්‍ෂේත්‍ර චාරිකා යන්න යෙදුන නිසා සහ ඒවාට අදාළ ක්‍ෂේත්‍ර වාර්තා ලියන්න ඕන නිසා තමයි මෙහෙම බිසී වෙලා වයලීනොට ලියන්න කියවන්න එන්න බැරි උනේ . ඒත් දැන් ඒ අපල කාලය ටිකකට ගෙවිලා ඉවර නිසා අද ආයෙත් ටිකක් පරණ ඒත් අපේ බ්ලොග් එකට අලුත් ගීතයක් ගැන ලියන්න කියලා හිතුවා .

ගොඩ දෙනෙක් දන්නවා සිංදුවයි මමයි ඉස්කෝලේ යන දවස්වල සංගීත වැඩ වලින් තමයි වැඩිපුර අඳුරගත්තේ කියලා . ඒක ඇත්තටම කියනවනම් ගීත නාට්‍යයක් . මේ නාට්‍යට වචන නෑ . ඒ කිව්වේ දෙබස් නෑ . ඔක්කොම තියෙන්නේ අපිට එදිනෙදා ඇහෙන ගීත වලින් , ඒ ගීතවල තේරුම අනුව ගලපලා කතාවක් ගොඩනගලා තියෙන එක . පිටපත තිරරචනය සංගීත අධ්‍යක්‍ෂණය අරවා මේවා ගොඩක් සිංදුවම තමා කරේ . ගායනයෙනුත් සම්බන්ධ උනා මම හිතන්නේ .

මේ වැඩේට එන්න කියලා කිව්වම මමත් වයලීන් එක කරගහගෙන ගියාට මොකද මටත් මේ ගැන කිසිම මීටරයක් තිබ්බේ නෑ . කවදත් වයලීන් ගහන්න ගියාම දාන ලොකු ලයින් එක දාලා මම සිංදුවට කිව්වා , ඔයා මේ එක පාරට ගහෙන් ගෙඩි එනවා වගේ සින්දු කිව්වට මට ඔව්වා ගහන්න බෑ . කොහොමද මේ නාට්ටිය කෙරෙන්නේ කියලා ඩිමෝ එකක් ඕන කියලා . පස්සේ සිංදුවා නාට්ටිය පෙන්නන්න කට්ටිය නැති නිසා මිනිහා දන්න සිංහල ඔක්කොම පාවිච්චි කරලා මේ නාට්ටිය ගැන මට විස්තර කළා . අරයා අරම එනවා . මෙයා මෙහෙම එනවා . අන්තිමට එයා මෙයාගෙන අහනවා . අහනකොට එයා බෑ කියනවා . පස්සේ කැමති වෙනවා . කැමති වෙලා මල් කඩනවා . පස්සේ බූට් තියනවා . ඔන්න ඔහොම ඉතින් විකාර ගොඩක් කිව්වා .






මට කොයිල් වගේ . මොකද ඉතින් කියන්න කියලා කිව්වට මම එවෙලාවේ ඕනෑකමින් අහගෙන හිටියෙත් නෑ . මොකද මට ඒ වෙලාවේ ඕන වෙලා තිබුනේ මේ මල කරදරෙන් ගැලවිලා ගෙදර යන්න . පස්සේ මම ආයෙත් ලොකු ලයින් එකක් දීල කිව්වා එහෙනම් ගහන්න ඕන සින්දු ටික මට පිළිවෙලට ලියලා දෙන්න . දැන් ලියන එකක් තමයි . ආයේ අලුත් අලුත් ඒවා දාන්නයි වෙනස් කරන්න බෑ . එහෙනම් මට බෑ කියලා . පස්සේ අපරාදේ කියන්න බෑ සිංදුවා මට සිංදු ටික පිළිවෙලට ලියලා දුන්නා ඒ කාලේ මිනිහට තිබ්බ තිරිවාන ගල්කැට වගේ අත් අකුරු වලින් . පස්සේ මමත් ඒවා අහලා බලලා ඔක්කොම සෙට් කරලා අපි ඒ නාට්ටිය හොඳට කළා . ආයෙත් අපරාදේ කියන්න බෑ , වෙන සංගීත වැඩ වලට ප්‍රැක්ටිස් වලට ගියාම ඒවා කරවන හෝ පුරුදු කරවන අය අපේ කාලය කා දැම්මට සිංදුව නම් එහෙම කලේ නෑ . වෙලාවට කට්ටියම ගෙන්නගෙන කෑගහල බැනලා කොහොමහරි සීන් එක නියමෙට කළා .

මේ නාට්ටියේ තිබ්බේ ඉස්කෝලේ කොල්ලෙක් ඉස්කෝලේ කෙල්ලෙක්ට ලවු කරනවා . කොල්ලා ටිකක් රස්තා ලයින් එකක් . කෙල්ල නෝමල් . ඉතින් ලයින් දාලා , සෙට් කරගෙන ලවු කරලා පස්සේ කෙල්ල ඩොක්ටර් කෙනෙක් එක්ක යනවා කොල්ලට බූට් තියලා . මේ නාට්ටිය පටන් ගත්තේ " ගැස්සෙන පැද්දෙන ලස්සන ලෝකේ " කියන ගීතයෙන් . ඊට පස්සේ

හාද වෙන්න ආව තමයි ඉලන්දාරි නම්
ඔබ හීනයක් වගේ
ඔබ පෙම් කරනා
මං මුලා වී
කවුරුත් එන්නැති කවුරුත් දන්නැති
රන් සමනලයෝ

වගේ තව සිංදු ගොඩක් තිබුණා . ,මේවා ගායනා කරන්න කීප දෙනෙක්ම සහභාගී උනා . ඕගන් ගැහුවේ සිංදුවා . වයලීන් ගැහුවේ මම . තව තබ්ලා ගහන්න ,බටනලා ගහන්න ගිටාර් ගහන්න කීප දෙනෙක්ම සම්බන්ධ උනා . අද කියන්න යන ගීතයත් මට ඉස්සෙල්ලම අහන්න ලැබුණේ එදා ඒ නාට්ටියෙන් . ඒ නිසා මම හිතන්නේ මේ කතාවත් ගීතයට ගන්න පූර්විකාවට වැදගත් වෙනවා කියලා . මේකට සම්බන්ධ වෙච්ච අයටනම් සමහරවිට මේක කියවනකොට එදා වෙච්ච සිදුවීම් මතක් වෙයි . මේ ගීතය යොදලා තිබ්බේ කොල්ලා මේසයක් පුටුවක් තියාගෙන වාඩිවෙලා කල්පනා කර කර ඉන්න වෙලාවක . කෙල්ලට ලයින් දාලා වැඩේ ගොඩ යාගෙන එනකොට තමයි මේ විපර්යාසය උනේ . කල්පනා කර කර හීන මව මව කොල්ලා ඉන්නවා . ඉතින් නින්ද යන්නෙත් නෑ .






දැනට දවස් දෙක තුනකට කලින් වයලීනි සමග කරපු දීර්ඝ සාකච්චාවක් අතරතුරේ අපි කතා උනා වයලීනිගේ කැම්පස් එකේ අලුත් කපල් එකක් ගැන . ගෑනු ළමයා ටිකක් හුරතලේට හැදුන ඒත් ගෙදර හිර කරලා වගේ හැදුන කෙනෙක් . කොල්ලා ටිකක් එක විදියක් . දෙන්නා යාලුයි කියලා කතාවක් තිබ්බට තාම ඒක දන්නේ වයලීනි ඇතුළු කීප දෙනයි . මොකද මේ ගැන කොල්ලා කියන්න එපා කියලාලු තියෙන්නේ කාටවත් . ඉතින් වයලීනි කියන්නේ මේ කොල්ලයි කෙල්ලයි එහෙ මෙහෙ ඇවිදලා අන්තිමට කෙල්ලට යනඑන මං නැති වෙයි කියලා බයයි කියලා . මොකද කවුරුවත්ම මේක දැනගන්නවට කොල්ලා කැමති නා කිව්ව නිසා . ඉතින් ඔය කතාව කිය කිය ඉන්න අතරේ වයලීනි කියනවා බෝඩිමේදී මේ ගෑනු ළමයා සමහර දවසට රෑ එළිවෙනකල් ඇහැරගෙන කොල්ලත් එක්ක මැසේජ් කරනවා කියලා . මම කිව්වා ඉතින් වෙන වැඩ නැතිව ඇති දෙන්නට කියලා . ඒත් වයලීනි නම් කියන්නේ මේ ගෑනු ළමයාගේ අත්දැකීම් අඩු මොලොක් හිතත් එක්ක අර කොල්ලා සෙල්ලම් කරන්න හදනවා කියලා .  ඉතින් අපි බලමුකෝ ඉදිරියට මොකද වෙන්නේ කියලා .

දෙයියනේ කියලා වයලීනොට නම් මල් නෙවේ ගෙඩි උනත් කමක් නෑ . ඇඳට වැටුන ගමන් නින්ද යනවා . ඒත් මේ සමහර අයට එහෙම නින්ද යන්නේ නෑලු . ඒවා මේවා මතක් වෙනවලු . ඔන්න ඕකයි පිංවතුනි අද වෙනකොට තියෙන තත්ත්වය . රෑ ජාමේ වෙනකල් මල් කඩ කඩ ඉන්නවා . රෑට පටන්ගන්නවනම් එලි වෙනකල්ම මල් කඩනවා . එහෙමත් නැත්නම් මල් කඩලා ඉවර උනත් දෙන්නට දෙන්නා හීන මව මව ඉන්නවා .

අද මේ කියන ගීතයත් ඒවගේ රෑ එළිවෙනකල් නින්ද යන්නේ නැති පෙම්වතෙක් කියන කතාවක් ගැන කියවෙන ගීතයක් . ඉස්සෙල්ලම ගීතය අහලා ඉන්නකෝ .


රාත්‍රිය උදා උනා
නින්ද ඇයි නොඑන්නේ
රාත්‍රිය උදා උනා

ඔබ හමු වූ දා පටන්
මා හදවත අවදියෙන්
රැය පහන් වෙලා යයි
නොවී නිදි දැහැන්

ඔබ අවුදින් සිව් දිගින්
මා දෙනෙතේ දැවටෙමින්
සිත් තැවුල් මවාලයි
පුරා රැය නිතින්...

පද රචනය :- 
තනුව :- 
ගායනය :- ටී එම් ජයරත්න 








යෞවන ප්‍රේමය සුන්දරයි මනස්කාන්තයි . ළමා අවධිය ගෙවලා ක්‍රම ක්‍රමයෙන් කාලය ගෙවීගෙන යනකොට ප්‍රේම සම්බන්ධතා ඇතිවීම ස්වාභාවිකයි . මේකත් ඒවගේ කතාවක් . හැබැයි මේ ගීතයේ තේරුම හරිම සරළ නිසා වැඩි වැල්වටාරම් ඕන වෙන එකක් නෑ මේ ගීතය ගැන කියන්න .

රාත්‍රිය උදා උනා
නින්ද ඇයි නොඑන්නේ
රාත්‍රිය උදා උනා

ප්‍රේමවන්තයෙක් ප්‍රේමවන්තියට කල් යල් බලලා ආදරය ප්‍රකාශ කරනවා . දැන් ඉතින් මේ ප්‍රේමවන්තයා ජීවත් වෙන්නේ මේ ප්‍රේමවන්තියගේ ලෝකයේ . එහෙමත් නැත්නම් ප්‍රේමවන්තිය එක්ක ගත කරන කාලය ගැන සිහින මවමින් . ඉතින් ප්‍රේමවන්තයා දවස පටන්ගන්නෙත් ප්‍රේමවන්තිය ගැන සිහිපත් කරගෙන . දවසේ සියලුම වැඩ කටයුතු කරන්නෙත් ප්‍රේමවන්තිය ගැන සිහිපත් කරගෙන . නින්දට යන්නෙත් ප්‍රේමවන්තිය සිහිපත් කරගෙන . ඉතින් මේ ප්‍රේමවන්තයට නිදාගන්න ගියාට නින්ද යන්නේ නෑ . මොකද ඒ තරමටම ප්‍රේමවන්තිය තමන්ගේ හිතේ හොල්මන් කරනවා . රාත්‍රිය උදා උනා , ඒත් නින්ද එන්නේ නෑ . ප්‍රේමවන්තයා තමන්ගෙන්ම ප්‍රශ්න කරනවා ඇයි මට මෙහෙම වෙලා තියෙන්නේ කියලා .

ඔබ හමු වූ දා පටන්
මා හදවත අවදියෙන්
රැය පහන් වෙලා යයි
නොවී නිදි දැහැන්

ප්‍රේමවන්තයාට මේ ප්‍රේමවන්තිය ඇසගැටුණු දවසේ ඉඳලා ඔහු ජීවත් වෙන්නේ ඒ මුහුණගැන , ඒ හිනාව ගැන හිත හිත . ඉතින් හැමවෙලේම හිත තියෙන්නේ අවධියෙන් . මේ නිසා නිදාගන්න ඕන කියලා වැතිරුනාට නින්ද යන්නේ නෑ . ඒත් කාලය හරිම ඉක්මනින් ගෙවිලා යනවා . ඒක ඉතින් සාමාන්‍ය දෙයක්නේ . කැමති දෙයක් වෙනකොට වෙලාව යනවා දැනෙන්නේ නෑ . අකමැති දෙයක් වෙනකොට වෙලාව යන්නේ නෑ කියලා තමයි හිතෙන්නේ . ඉතින් මේ ප්‍රේමවන්තයාටත් වෙලා තියෙන්නේ ඒක . රැය පහන්වෙලා යනවා . ඒත් නින්ද යන්නේ නෑ . සමහරවිට නින්ද ගියේ නැති නිසා එදිනෙදා කරන වැඩ ටික කරගන්න මේ ප්‍රේමවන්තයට අපහසු ඇති . ඒත් නින්ද යන්නේ නෑ .







ඔබ අවුදින් සිව් දිගින්
මා දෙනෙතේ දැවටෙමින්
සිත් තැවුල් මවාලයි
පුරා රැය නිතින්...


ප්‍රේමවන්තයා නිදාගන්න ඕන කියලා හිතාගෙන ඇස් වහගත්තත් එයාට පේන්නේ තමන්ගේ ප්‍රේමවන්තියගේ මුහුණ . ඒ නිසා ප්‍රේමවන්තයා කියනවා ඔබ අවුදින් සිවුදිගින් කියලා . සිත් තැවුල් මවාලයි පුරා රැය නිතින් කියන වචන ටික දැක්කම මෙහෙම දෙයක් කියන්න පුළුවන් . ඒ මේ ප්‍රේමවන්තයාට ප්‍රේමවන්තිය තාම හරියට වචනයක් දීලා නැහැ කියන එක . ඒ නිසා ප්‍රේමවන්තයා සිත් තැවුලෙන් තමයි ඉන්නේ තමන්ට තමන් මවන හීන සැබෑ කරගන්න ලැබෙයිද නැත්ද කියන ප්‍රශ්නාර්ථය පෙරදැරි කරගෙන . 

මේ ගීතයේ රාත්‍රිය කියන ස්වභාවය ඉස්මතුකරලා පෙන්නන්න සංගීත සංයෝජනය හොඳින් පාවිච්චි කරලා තියෙනවා . අපි මුලින්ම බලමු ආරම්භක වාදනය කොහොමද කියලා . මේ ගීතයේ ආරම්භක වාදනය , එහෙමත් නැත්නම් පෙර වාදනය හරිම කෙටි සරළ වාදනයක් . තාලය වාදනය කරන්නේ නැති උනාට වාදනයට අවශ්‍ය කරන ලය , ඒ කියන්නේ ටෙම්පෝ එක පවත්වාගන්න වාදන භාණ්ඩ වලින්ම තාලය තියාගෙන වාදනය ඉදිරිපත් කරනවා . 

එහෙම තාලය තියාගෙන වාදනය කරන්නේ සංගීත භාණ්ඩ තුනක් . ඒ ග්ලොකන් ස්පීල් එක , සයිලෆෝන් එක සහ ගිටාර් එක කියන වාදන භාණ්ඩ තුන . මේ භාණ්ඩ තුනෙන්ම ස්වර තුනක් වාදනය කරනවා . ඒ ස්වර තුන වාදනය කරනවත් එක්කම ඒ අතරින් වාදනය වෙනවා ඇහෙනවා ඔබෝ නලාවක් . ඒ සංයෝජනය නිසා මේ ගීතයේ ආරම්භය තුලින්ම රාත්‍රිය කියන හැගීම ඉස්මතුවෙලා පෙන්නනවා . 










දැන් ගීතයේ ස්ථායි කොටස ගායනා කරන්න ආරම්භ කරනවා . ගීතයට තාල වාදනය සම්බන්ධ වෙන්නේ මෙතනින් . තාල වාදනය කරන්නේ බොන්ගෝ ඩ්‍රම් එකක් , ඔක්ටර් පෑඩ් එකක් සහ හයිහැටි එකක් . ඒ එක්කම බාර් එකෙන් එකට ටින් ටින් ගාලා වාදනය කරනවා ඇහෙනවා ට්‍රෑන්ගල් එකක් . මේ ට්‍රෑන්ගල් එකත් ගොඩක් වෙලාවට උදවු වෙනවා රාත්‍රිය කියන පෙනුම මේ ගීතයට ලබා දෙන්න . ගීතයේ කෝඩ්ස් වාදනය කරන්නේ ගිටාර් කීපයකින් . ඒවගේම කෝඩ්ස් වාදනය කරන්න කීබෝඩ් එකත් උදවු වෙලා තියෙනවා . 







ගීතයේ අතුරු වාදනය පටන්ගන්නේ සැක්සෆෝන් එකකින් . මේ සැක්සෆෝන් වාදනය එක්ක ඔබෝ එකත් වාදනය වෙනවා . ඒ වාදනය නිසා මේ ගීතයේ අර්ථයට අදාලා ප්‍රේමවන්තයාගේ පාළුව තනිකම කියන හැගීම ඉස්මතුවෙන්න ඒ වාදනය දායක වෙනවා කියන්න පුළුවන් . සැක්සෆෝන් වාදනය ඉවරවෙනවත් එක්කම මැඬලීන් එකක් සහ බැන්ජෝගිටාර් එකක් වාදනය කරනවා . ඒ වාදනයෙන් පස්සේ තමයි ගීතයේ අන්තරා කොටස් ගායනා කරන්න පටන් ගන්නේ . 





ගීතයේ අන්තරා කොටසත් ඔහේ ගායනා වෙනවා මිසක් වැඩි වැඩි සංගීත කොටස් සම්බන්ධ කරලා නැහැ . අන්තරා කොටවල අවසාන භාග වල කීබෝඩ් එකෙන් පොඩි කවුන්ටර් පාට් එකක් වාදනය කරනවා මිස වැඩි සංගීත කොටසක් වාදනය කරන්නේ නෑ . 





ගීතයේ තියෙන පසුබිම හුදෙකලා පසුබිමක් නිසා ගීතයේ සංගීත සංයෝජනයත් ටිකක් හුදෙකලා බවක් අරගෙන තියෙනවා . ඒක ඉතින් සංගීත සංයෝජකයාගේ දක්ෂකම . අපි එහෙනම් තවත් ලිපියකින් ආයෙත් හම්බෙමු . 

ඔබ සැමට සමන් දෙවිඳුගේ පිහිට ලැබේවා !

Tuesday, August 4, 2015

වයලීනෝ සබැඳි කතා - 2 ( අලි ගැන )







දැන් ටිකක් ලියන එක ඇන හිටලා තියෙන්නේ වැඩ රාජකාරි ටිකක් වැඩි නිසා . ඒත් ඉක්මනටම ආයේ ලියන්න එනවා . කලින් ලිපියේ දෙවෙනි කොටස තමයි මේ . ඔය කිව්වට තුන්වෙනි කොටසකුත් එන්න පුළුවන් . කියවලා බලන්නකෝ . මේ දනාගේ පළාමල්ල ලියන දනාගේ වැඩක් .

අවුරුදු දෙදහස් පන්සීයක් තිස්සේ අපේ රටේ දේශපාලනික, ආගමික, ආර්ථික, සංස්කෘතික සහ සමාජීය අංශවලට සෘජුවම සම්බන්ධ වුණු සාධකයක් විදිහට අලි ඇතුන්ව හදුන්වන්න පුලුවන්. මිනිසා හැරුනුකොට ලෝකයේ ඉන්න බුද්ධිමත්ම ජීවියෙක් වෙන අලි ඇතුන්ට තියෙන්නේ, මිනිසා හා සමාන ජීවන අවධියක්. අපේ රටේ බෞද්ධ සංස්කෘතියත් එක්ක අලි ඇතුන් අපිට හරිම සමීපයි. ඉතින් අද හිතුනා අපේ රටේ හීලෑ අලි ඇත් පරපුර ගැන කතා කරන්න.

අලි ඇත්තු ගැන මතක් කරනකොට නම් මුලින්ම මතක් වෙන්නේ වයලීනෝව. අලි නම් වයලීනෝ. වයලීනෝ නම් අලි. මොකද මියැසියේ රස කතාවල වයලීනෝ අලි ගැන අලී ලිපි ලියනවා. ඉතින් තවත් මොන කතාද කියලා, වයලීනෝ සබැදි කතා ලිපිය උණු කැවුම් වගේ යන අතරේ, නොසිතූ මොහොතක වයලීනෝ සබැදි කතාවල දෙවෙනි කොටසත් ලියන්න හිතුනා. මොකද වයලීනෝ දහයට ගණන් කරන්න බෑ වගේ හිටියට හෙන අලී වැඩකාරයෙක්.

ඉතින් මුලින්ම වයලීනෝ එක්ක මේ මාතෘකාව ගැන Facebook එකෙන් මහා පරිමාණයේ සාකච්ඡාවක් කළා. මහා පරිමාණයෙන් විතරක්ම සාකච්ඡා කළොත් කිසි ගතියක් නැති නිසා, ඊට පස්සේ වයලීනෝව හම්බවෙලත් මේ මාතෘකාව ගැන කුඩා පරිමාණයේ සාකච්ඡාවකුත් කළා. ඊට පස්සේ තමයි නමෝ විත්තියෙන් වැඩේට මුල පිරුවේ. හොදයි එහෙනං. වැඩිය කතා බතා නැතුව අපි වැඩේට බහිමුකෝ....







01. කොහොමද අපේ පළවෙනි ලිපියට ලැබුනු ප්‍රතිචාර?
**   ප්‍රතිචාර නම් හොඳයි. හැබැයි මුහුණුපොතේ ගොඩක් අය ගොඩක් දේවල් ගැන අහලා Message එවලා තිබුණා. මම ඉතින් වෙලාව තියෙන හැටියට ඒ අයට උත්තර දුන්නා. තව Requests ගොඩක් ඇවිත් තිබුණා වයලීනෝ කියන්නේ කවුද කියලා හොයාගෙන. හොඳයි ඉතින්, අලුත් යාළුවො ගොඩක් අඳුරගන්න ලැබුණා ඒ ලිපිය නිසා.


02. දැන් සමහරක් අය වයලීනෝගෙ ළගට එන්නත් බයයිලු නේද?
**   එහෙමනම් නෑ. දන්න අය මම ගැන දන්නවා. අනිත් අය ඉතින් කැමති දෙයක් හිතුවට කමක් නෑ.


03. කොහොමද අලි ඇතුන්ට ආසාවක් ඇති වුණේ? කොච්චර හීලෑ වුණත් එයාලා ළගට යන්න බයක් දැනෙන්නේ නැද්ද?
**   ඔය ප්‍රශ්නය මගෙන් අපේ කැම්පස් එකේ යාළුවො, ප්‍රදර්ශකවරුන් පවා වෙලාවකට අහනවා. මම හිතන්නේ මුහුණුපොතේ මම වැඩිපුර අලින්ගේ පින්තූර දාන නිසා වෙන්න ඇති. මේ දේ ගැන අහනකොට මට හිතේ මැවෙන රූප දෙකක් තියෙනවා. මම ගොඩක් පොඩිකාලේ, මම හිතන්නේ මම මොන්ටිසෝරි යන්නත් කලින් වෙන්න ඕන. දවසක් අපි සමන් දේවාලයේ පෙරහැර බලන්න ගියා. අම්මා මාව උකුලේ වාඩිකරවාගෙන පෙරහැර විස්තර කරනවා. එදා පෙරහැර අවසානයේ සමන් දෙවියන්ගේ දෙවාභාරණය වැඩම කරවන කපුමහතා ආපු අලියා පෙන්නලා අම්මා මට කිව්වා මතකයි, අර ඉන්නේ දේවාලේ අලියා කියලා. ඒ අලියා ඇඳලා හිටියේ කහ පාටට හුරු ඇඳුමක්. මම ඒ අලියා මට නොපෙනී යනකල් බලාගෙන හිටියා. එදා තමයි මට අලියෙක් ගැන ආසාවක් හිතුන පලවෙනි දවස. ඊට කලින් මට අලි ගැන අහන්න දකින්න ලැබුණත් මතකයක් ඉතුරුවෙලා නෑ. පොඩි කාලේ අලි දැක්කම සමහර ළමයි බයේ කෑගැහුවට, මම එහෙම කෑගහන්නේ නෑ කියලා අම්මා කියනවා. ඇස් ලොකු කරගෙන අලියා දිහා බලාගෙන ඉන්නවලු.

      අලි ගැන ආසාව තවත් වැඩිකරන්න හේතු උනේ දළදා මාලිගාවේ ඉඳලා මියගිය රාජා ඇතා. පොඩිකාලේ අම්මයි තාත්තයි මාව දළදා මාලිගාවට එක්ක ගියා. එදා මට වෙච්ච දේවල් යන්තමට වගේ මතකයි. මම එතකොට මොන්ටිසෝරි යන කාලේ. දළදා මාලිගාව වැඳලා අම්මයි තාත්තයි මාව රාජා ඉන්න කෞතුකාගාරය බලන්න එක්ක ගියා. එදා කොහොම හරි රාජාගේ රූපය දැකලා මට අලි ඇත්තු ගැන ආසාවක් ඇති උනා. ඉස්සර මේ අනුරුව බලලා එන අයට එතනින් ඇතාගේ රූපය මුද්‍රණය කරලා තියෙන පින්තූර පොස්ට්කාඩ් එකක් දෙනවා. මම මේ පෝස්ට්කාඩ් එක ගොඩක් කල් පරිස්සම් කරගෙන හිටියා. රාජාගේ රූපය බලන හැම වෙලාවකම වගේ මට අලි ඇත්තු ගැන ආසාවක් ඇති උනා. ඒ කාලේ මම අඬන්නේ සෙල්ලම් බඩු ඉල්ලලා නෙවෙයි, අලියෙක් ගෙනැත් දෙන්න කියලා. අම්මලා වැඩ ඇරිලා එන වෙලාවට මොනවද ගේන්න ඕන ඇහුවමත් මම කියන්නේ අලියෙක් ඕන කියලා. කොටින්ම කියනවනම් මම අපේ වත්තේ තියෙන කිතුල් ගස්, කොස් ගස් කපන්නවත් ඉඩ දුන්නේ නෑ, අලියට කන්න දෙන්න ඕන නිසා. පස්සේ පස්සේ ඉතින් වටපිටාව ගැන තේරුම් ගන්න වයස එනකොට මට තේරුනා මේක කියන තරම් ප්‍රායෝගික දෙයක් නෙවෙයි කියලා. ඒත් ආසාව නම් තාම එහෙමම තමයි. ඒ නිසා තමයි අලියෙක් ඉන්න තැනක් වෙලාවක් දැනගත්තම පොඩ්ඩක් ළඟට ගිහින් බලලා එන්න යන්නේ.

       මිනිස්සුන්ට ආසාවල් ඇතිවෙන හැටි ගැන බෙල්ලන ඥානවිමල හාමුදුරුවෝ එක පොතක කියලා තියෙනවා. ඒකෙදි කියන්නේ සංසාරික පුරුද්ද නිසා එහෙම ආසාවල් ඇතිවෙනවා කියලා. මේකත් එහෙම වෙන්න ඇති.







04. ආසාව තියෙන්නේ හීලෑ අලි ඇතුන්ට විතරමද?
**  අලි නම් කොයි අලියත් මට එකයි. හැබැයි අලි පැටවුන්ට වැඩිපුර කැමතියි. ඇත්තුන්ගෙන් තෝරාගත්ත කීපදෙනෙක්ට විතරයි කැමති. ඒ, ඒ අයගේ පෙනුම නිසා. මම කැමති ගොඩක් ඇත්තු දැන් මැරිලා. එහෙම මියගිය මිල්ලන්ගොඩ රාජා, හෙයියන්තුඩුවේ රාජා, හෙම්මාතගම හාමුදුරුවන්ගේ වෑවලදෙනියේ රාජා, බෝතලේවලව්වේ ගාමිණී, නවම් රාජා, රුවන් රජා, මගේ ලිස්ට් එකේ මුලින්ම වගේ හිටපු අය. මියගිය අයගෙන් හෙයියන්තුඩුවේ රාජා තමයි මම කැමතිම ඇතා. ජීවත් වෙලා ඉන්න අයගෙන් නැදුන්ගමුවේ රාජාට තමයි වැඩිපුරම කැමති. කතරගම වාසනා ඇතාටත් මම වැඩිපුර කැමතියි. අකැමති අයත් කියන්න එපාය. ඉන්දිරාජා, ජනරාජා, සිංහ රාජා, බුරුම රාජා, මියන් රාජා වගේ කීපදෙනෙක්ට මම කැමති නෑ.






05 ඇයි ඒ?
** එයාලා ටිකක් පෙනුමෙන් අඩුයි. සංසන්දනය කරලා බැලුවම එයාලා ටිකක් කැතයි වගේ. ඒ නිසා වැඩි කැමැත්තක් නෑ.


06. අනිත් හීලෑ ඇතුන් එක්ක බැලුවම කතරගම වාසනාව අදුරගන්න හරිම ලේසියි නේද? නොදන්න අයට දැන ගන්නත් එක්ක, ඒ ගැනත් කියමුද?
**   වාසනා ඇතා අඳුරගන්න ලේසියි. අලි කුල වලින් මම හිතන විදියට වාසනා මංගල හෝ උපෝසථ කියන කුල දෙකෙන් එකකට අයිති වෙන්නේ. වාසනා ඇතාට තියෙන්නේ හරිම ගාම්භීර පෙනුමක්. වාසනා ඇතා සාමාන්‍යයෙන් ඉන්නේ ඔලුව ටිකක් ඉහලට ඔසවාගෙන. ඒක තමයි ඇතෙක්ගේ තියෙන ගාම්භීර බව වැඩි කරන්න තියෙන හොඳම දේ. වාසනා ඇතාගේ දල දෙකට දාලා තියෙන දල කොපු ගලවලා තියෙනවා මම දැකලා නෑ. ඒ නිසා ඒ දල කොපු වලිනුත් වාසනා අඳුරගන්න පුළුවන්. මේ දල කොපු ස්ථීර ලෙසටම දාන්න ඇත්තේ දල ගෙවෙන නිසා. ඇතා නානකොට දල දෙක ගඟේ තියෙන ගල්වල වැදිලා ගෙවිලා කැඩිලා යන්න පුළුවන් නිසා මෙහෙම දල කොපු හයි කරන්න ඇති. නැදුන්ගමුවේ ඇතාගේ නම් දලවල පැත්ත පැත්ත ගෙවිලා තියෙනවා. එයාට එහෙම වෙන්නත්, මෙයාට එහෙම නොවෙන්නත් හේතු වෙන්න ඇත්තේ මේ දල කොපු හයි කරලා තියෙන එක වෙන්න ඕන.

   වාසනාගේ තවත් විශේෂ ලක්ෂණයක් තමයි හොඩවැල ඔතාගෙන කටින් හපාගෙන තමයි ඉන්නේ. එහෙම ඉන්නේ එයාට ඒක පුරුදු කරලා තියෙන නිසා කියලයි මම හිතන්නේ. උඩරට අලි බලන අය, අලින්ට හොඩවැල කට ඇතුලේ තියන් ඉන්න පුරුදු කරනවා. එහෙම කරන්නේ පාරේ ගැහැණු සතුන්ගේ මුත්‍රා වැටිලා තිබුනොත් ඒවා ඉව කරලා මේ අලි නොසන්සුන් වෙන්න පුළුවන් නිසා. වාසනාට ඒ පුරුද්ද කොහොම ලැබුනද කියන්න බෑ. හැබැයි වාසනාත් හොඩවල කටේ දාගෙන තමයි ඉන්නේ වැඩි වෙලාවක්. ඇවිදිනකොට එයා හොඩය කටේ නැත්නම්, දල දෙකේ හරි ඔතාගන්න බලනවා.


07. අලි ඇතුන් ගැන කතා කරනකොට, මද කිපෙනවා කියන වචනය හැමතිස්සෙම වගේ අහන්න ලැබෙනවා. මද කිපීම ගැන නිර්වචනය කරනවා නම්?
**  මද කිපෙනවා කියන්නේ අලියා ලිංගික ක්‍රියාවලියට සූදානම් කියලා පිටට හඟවන සංඥාවක්. මද දිය වැගිරෙන්නේ කන කිට්ටුව තියෙන මද ග්‍රන්ථිවලින්. මේ ශ්‍රාවය දුඹුරු පාටට හුරුයි. කෝපිවල තියන සුවඳ වගේ සුවඳක් තමයි තියෙන්නේ. අලියා ලිංගික එක් වීමකට සූදානම් කියන සංඥාව තමයි මේ නිකුත් කරන්නේ. මේ කාලෙට අලියා ගාවට කිට්ටු වෙන්න බෑ. එයාව කොහෙවත් එක්ක යන්නත් බෑ. ඒ නිසා එයාව ගස් බැඳලා තියනවා මාස දෙකක් විතර මද කාලය අවසන් වෙනකල්. ඊට පස්සේ තමයි ආයෙත් සංසුන් තත්ත්වයට පත් වෙන්නේ. මද කිපෙන එක දැනගන්නේ අර මද ග්‍රන්ථි වලින් මද ශ්‍රාවය වෙන සලකුණත් එක්ක.







08. අලි ඇතුන්ගේ ලිංගභේදය ගැන කතා කරනවා නම්?
**  අලි සහ ඇතුන් කියන දෙගොල්ලෝ ගත්තම අලියට දළ දෙකක් නැහැ. ඇතාට දළ දෙකක් තියෙනවා. අලියාගේ ගැහැණු සතා හඳුන්වන්නේ කෙනෙර කියලා. ඇතාගේ ගැහැණු සතා හඳුන්වන්නේ ඇතින්න කියලා. ගැහැණු සත්තුන්ට දළ දෙකක් එන්නේ නෑ. මම ඒ කිව්වේ ආසියාතික අලින්ට. හැබැයි අප්‍රිකානු අයට නම් ගෑණු පිරිමි භේදයක් නෑ, දෙගොල්ලන්ටම දළ පිහිටලා තියෙනවා. ඇතින්නක් සහ කෙනෙරක් හඳුනාගන්නේ ප්‍රසූතියෙන් පස්සේ. ඇත් පැටියෙක් ප්‍රසූත කලොත් ඇතින්නක්. අලි පැටවූ ප්‍රසූත කලොත් කෙනෙරක්. හඳුනාගන්න වෙන ක්‍රමයක් නම් මම දන්නා තරමින් නැහැ.
 
      ඇතෙක් සහ කෙනෙරක් අතර ප්‍රජනනයෙන් ලැබෙන්නේ අලි පැටවූ. ඇතින්නක් සහ ඇතෙක් හෝ ඇතින්නක් සහ අලියෙක් අතර ප්‍රජනනයෙන් අනිවාර්යෙන්ම ඇත් පැටියෙක් ඉපදෙනවා කියලා අලි ඇත්තු බලාගන්න අය අතරේ පිළිගැනීමක් තියෙනවා. ඒ වගේම ලැබෙන පැටවුන්ගේ ලක්ෂණ ගැන බලලා මේ ගැන ඒ අය පැහැදිලි සාක්ෂි ඉදිරිපත් කරලත් තියෙනවා. අලියෙක් සහ කෙනෙරක් අතරේ ප්‍රජනනයෙන් නම් අනිවාර්යෙන්ම ඇතිවෙන්නේ අලි පැටියෙක් තමයි. අලි ඇතුන්ගෙන් පැටවූ ඇතිකර ගැනීම කරනකොට ඇත් පැටියෙක් ඕන නම්, සාමාන්‍යයෙන් ගාල් කරන්නේ හොඳ ලක්ෂණ තියන ඇතෙක් සහ ඇතින්නක්. ඒකෙන් ඇත් පැටියෙක් ලැබෙන්න තියෙන සම්භාවිතාව ඉතාම වැඩියි.

       ඉතින් මේ හේතුව නිසා කෙනෙර සහ ඇතින්න පැහැදිලිවම හඳුනාගන්න පුළුවන් වෙලා තියෙනවා. අලි ඇත්තු ගැන විද්‍යාත්මකව පරීක්ෂණ කරනවා අඩුයි. මොකද අලියෙක් ඇතෙක් කන්න දිදී තියාගෙන ඉන්න එක ලොකු වියදමක්නේ. ඒ වගේම අලින්ගේ මාස විසි හතරකට ආසන්න, ඒ කියන්නේ අවුරුදු දෙකකට ආසන්න ගැබ් කාලය නිසා අලි ඇත්තුන් ගැන පරීක්ෂණ කරන්න ඉතාම වැඩි කාලයක් ගත වෙනවා. කියන්න තව විශේෂ දෙයක් තියෙනවා දැනගැනීම වෙනුවෙන්. ගොඩක් වෙලාවට අලි බලන අය ඇතින්න කියලා ගෑණු සතුන්ට කතා කරනවා ඇහෙනවා, ඔයාලත් අහලා ඇති. එහෙම කිව්ව පලියටම ඒ ඇතින්නක් කියලා විශ්වාස කරන්න එපා. අලි බලාගන්න අය ඇතින්න කියලා කියන්නේ කෙනෙර කියලා කියනවට වඩා ඇතින්න කියන එක කියන්න ලේසි නිසා.


09. අපේ රටේ හීලෑ අලි ඇත් පරපුර ගත්තම, දැනට ජීවතුන් අතර ඉන්න අයගෙන් කාටද වැඩියෙන්ම ආස කරන්නේ? ඒකට හේතුවත් කියමු බලන්න.
**    අලින්ගෙන් වැඩිපුරම කැමති යක්කල කාලි කෝවිලට අයිති ගජබා කියන අලියට. හේතුවක් කියන්න අමාරුයි. හැබැයි ඒ හේතුව පෙනුම වෙන්න ඇති කියලා හිතනවා. ගොඩක් වෙලාවට මම වැඩිපුර අවධානය යොමු කරන්නේ උසින් වැඩි මුහුණේ රෞද්‍ර පෙනුම අඩු අලින්ට. ගජබා ඒ දෙකම සම්පූර්ණ කරලා තියෙනවා. ඇත්තුන්ගෙන් නම් වැඩිපුරම කැමති නැදුන්ගමුවේ රාජාට. ඇත්තටම නැදුන්ගමුවේ රාජා, "දෙවු පුර ඇතෙකි" කියන ගජගා වන්නමට හරියටම ගැළපෙනවා. ඒ වගේ ශාන්ත ප්‍රභාවමත් බවක්, වෙන අලි ඇතුන්ගේ මුහුණුවල මම දැකලා නෑ.






10. අලි ඇත්තු ගැන අමතක නොවන ජීවන අත්දැකීම් ටිකක් කියමු බලන්න.
**   දවසක් පින්නවලදී අලි පැටියෙක්ගෙ වලිගෙන් ඇදලා තියෙනවා දුවන්න නොදී. අඩි කීපයක් ඇති ඒ පැටියාගේ උස. නාන්න යන්න දුවනවා සිහියක් ඉවක් බවක් නැතිව. මම ඉතින් වලිගෙන් අල්ලලා නවත්ත ගත්තා. පස්සේ පැටියා වෙර දාලා අදිනකොට අතෑරියා. දෙවුන්දර මහ පෙරහැරක් දවසේ ඔන්න පෙරහැර බලනවා. පෙරහැර දැන් හවස ගියාට ඉස්සර මම පොඩි කාලේ ගියේ දවල්. අපේ ඥාතිවෙන කෙනෙක්ගේ ගෙදර මිදුලේ ඉඳලා තමයි පෙරහැර බලන්නේ. මම එතකොට ගොඩක් මිටියි. ඒ නිසා අම්මා මට පුටුවක් ගෙනත් දුන්නා පුටවට නැගලා පෙරහැර බලන්න කියලා. දැන් ඔන්න පෙරහැර යනවා. විෂ්ණු දෙවියන්ගේ දේවරාජ ප්‍රතිකඩය ඇතා පිටේ වැඩම කරගෙන ඈතින් එනවා පේනවා. මම හිටපු තැන පහුකරලා ඔන්න දැන් අලියෙක් ගියා. උස අඩි අටක් විතර. මූ එකපාරටම ආපස්ස හැරුනා. හැමෝම දුවන්න ගත්තා විතරයි මම පුටුවෙන් බිමට පැන්නා. දිව්වා දිවිල්ලක් ආයේ නැවතුනේ අපේ ඥාති වෙන කෙනාගේ ගෙදර කාමරේක. ඊට පස්සේ දොර රෙද්ද පොඩ්ඩක් පැත්තකට කරලා එලිය බලන්න හදනකොටම අම්මා ආවා. ඊට පස්සේ ආයෙත් පෙරහැර සාමකාමී උනා. දඟලපු අලියා කිට්ටුව ඉඩමක පොල් ගහක ගැට ගැහුවා. එදා තමයි අලියෙක්ට බයේ පළමුවෙන්ම සහ අවසාන වතාවට දිව්වේ. එදා ඉඳලා පෙරහැර බලනකොට අලියෙක් මගේ ඉස්සරහින් යනවා නම් මගේ ඇඟපත පොඩ්ඩක් සීතල වෙනවා පුරුද්දට වගේ. පොඩිකාලේ ඇතිවෙච්ච බයවල් හිතෙන් අයින් කරන්න අමාරුයි කියන්නේ මේවගේ උදාහරණ නිසා වෙන්න ඇති.

    හැබැයි මම ඕන තරම් අලි ඇත්තු කිට්ටුවට යනවා. ඒත් නොදන්න අලි ඇත්තු කිට්ටුවට යන්නේ දෙපාරක් හිතලා බලලා. වැඩිය ලං වෙන්නෙත් නෑ එයාලා ගාවට. අලි ඇත්තු එක්ක ගතකරපු කාලයෙන් අමතක කරන්න බැරි දවසක් තමයි නැදුන්ගමුවේ රාජාගේ මුණ පොඩ්ඩක් අතගාපු දවස. සමන් දේවාලයේ පත්තිරිප්පුවට ඇතා ඇතුල් උනාම ඇතාගේ මුණ අල්ලන්න පුළුවන් උසකින් තමයි තියෙන්නේ. එදා කරඬුව තැම්පත් කරන්න ලෑස්ති වෙන වෙලාවේ තමයි මම ඇතා ගාවට කිට්ටු උනේ. අවුලක් නෑ. හරිම ගුණයහපත් හීලෑ සතෙක්. මම කලිනුත් ලිපියක කියලා තිබුණා අලි ඇත්තු ආකර්ෂණය වෙන යන්තරයක් ගැන. දවසක් ඒක බෙල්ලේ එල්ලගෙන පෙරහැර බලන්න ගිය වෙලාවක නැදුන්ගමුවේ රාජා පාවඩයෙනුත් පිට පැනලා මගේ පැත්තට ආවා. මම එදා තමයි ඒ යන්තරේ හැටි දැනගත්තේ. යාළුවා උනාට නැදුන්ගමුවේ නිසා බයක් හිතුනේ එදා තමයි. හැබැයි මම අවවාදයක් දෙන්න කැමතියි අලි ඇත්තු කොච්චර යාළු උනත්, එයාලා ගාවට කිට්ටු වෙනකොට අලි බාසුන්නහේ ඉන්න වෙලාවක කිට්ටු වෙන්න. ඇතෙක් කියන්නේ සම්පතක්. ඇතෙක් මිනී මැරුවොත් ආයේ එයා ලවා දළදා කරඬු වැඩම කරවන්නේ නෑ කියලා පිළිගැනීමක් තියෙනවා. ඒ නිසා තමන්ගේ ජීවිතය වගේම ඇතාගේ සේවය ගැනත් දෙපාරක් හිතලා අලි ඇත්තු කිට්ටුවට යනකොට බාසුන්නැහේ ඉන්න වෙලාවක කිට්ටු වෙන්න.


11. අලීන්ටත් කුල තියෙනවා?
**   ඔව්. කුල දහයක් තියෙනවා. මේවා සංස්කෘත ශ්ලෝකවලින් පවා විස්තර වෙනවා. ඒ කුල තමයි කලාවක, ගන්ගෙයිය, පන්දර, තම්බ, පිංගල, ගන්ධ, මංගල, හේම, උපෝසථ, ඡද්දන්ත කියන කුල දහය. මේ කුල ගැන මම වැඩිපුර ලියලා තියෙනවා මෙන්න මේ ලිපියේ. කියවලා බලන්න පුළුවන් කැමති කෙනෙක්ට.


12. මිනිසුන් අතරේ තිබුණු කුල භේදය නැති වෙමින් යන යුගයක, මිනිසා විසින්ම අලි ඇතුන්ව කුලවලට බෙදලා වෙන් කරන එක සාධාරණද?
**   ඔව් සාධාරණයි. මිනිස්සු මිනිස්සුන්ව කුලවලට බෙදලා තියෙන්නේ උස් පහතකම් සලකන්න. අලි ඇත්තු වෙන් කරලා තියෙන්නේ ඒ අයගේ බාහිර ලක්ෂණ බලලා හොඳ අලි ඇත්තු තෝරාගන්න. හොඳ ලක්ෂණ තියෙන අය විතරයි හිලෑ කරන්න ගන්නේ. අනිත් අයව අල්ලන්නේ නෑ. ඒ පදනමටයි අලි ඇත්තු කුලවලට වෙන් කරලා තියෙන්නේ. ඒ නිසා අලි, කුල වලට වෙන් කරා කියලා ප්‍රශ්නයක් නෑ. මම ඒ ගැන මගේ ලිපියේ වැඩිදුර විස්තර කරලා තියෙනවා.







13. දේවාභරණ සහ සධාතුක කරඩු තැන්පත් කරන සද්ධන්ත කුලයේ ඇත්තුන්ගේ පිටේ මිනිස්සුන්ට යන්න සුදුසුද?
**    කොහොමත් අලි බලන කෙනා අනිවාර්යෙන් ඇතා පිටට නගිනවා. මෙතන මේ වගේ කතාවක් හදලා තියෙන්නේ කිලි වැදුන වෙනත් අය ඇතා පිටට නගින එක නවත්තන්න ඕන නිසා. ඒ කිලි වැදුනම දෙවියන්ට ඒ තැනට කිට්ටු වෙන්න අපහසු නිසා. ඉස්සර කාලේ රජවරුන් ගියපු මගුල් ඇත්තුන්ගේ පිටේ පවා දේවාභරණ, සධාතුක කරඬු වැඩම කරා. අනික තමයි අර වගේ උතුම් දෙයක් වැඩම කරවන කෙනාගේ පිටට වෙනත් අය නැග්ගම ඒ සතාට තියෙන ගෞරවය අඩුවෙයි කියන මතය. මේක සංකල්පමය වාරිත්‍රයක් විතරයි. කරඬු තැම්පත් කරන්න කලින් අනිවාර්යෙන්ම සඳුන් කිරිපැන් ඉහලා ඇතාව පිරිසිදු කිරීමක් කරනවා. ඒ නිසා මම නම් හිතන්නේ ඒවගේ සත්තුන්ගේ පිටේ නැග්ගා කියලා ප්‍රශ්නයක් වෙන්නේ නෑ. හැබැයි ඉතින් කිලි නොවැදී ඉන්න අය නම් වඩා හොඳයි. කිලි වැදිච්ච අලි ඇත්තු දේවාභරණ වැඩම කරවනකොට කුලප්පු වෙච්ච අවස්ථා මමත් අහලා තියෙනවා.


14. ඇයි ඒ වගේ කටයුතුවලට ගැහැණු අලි ඇතුන්ට වාසනාව හිමි වෙන්නේ නැත්තේ?
**   අලි ඇත්තු පිටේ දේවාභරණ වැඩම කිරීම තමයි ඉස්සෙල්ලම සිද්ද උනේ. බුදු හාමුදුරුවන්ගේ කාලෙන් පස්සේ තමයි අලි ඇත්තුන්ගේ පිටේ සධාතුක කරඬු වැඩම කරවන්න පටන් ගත්තේ. ඉන්දීය ආගමික සංකල්ප එක්ක කාන්තාවන්ට ලැබුණේ දෙවෙනි තැන. ඒ නිසා මේ වගේ දේවල් වලටත් ගැහැණු සත්තුන්ට ඉඩක් ලැබෙන්නේ නැතිව ඇති. අනික තමයි ඇතාට දළ යුවලක් පිහිටලා තියෙන එක. ඇතින්නන්ට දළ පිහිටලා නැහැනේ. ඒ නිසා පිරිමි සතාව යොදාගත්තා මේවගේ විශේෂ දේවල් වලට. සමන් දේවාලයේ පෙරහරේ සධාතුක කරඬුව වැඩම කරවන්නේ ඇතෙක්. දේවාභරණ වැඩම කරවන්නේ අලියෙක්. මේ විශේෂණය කරලා තියෙන්නේ බුදුන් වහන්සේට වැඩි සැලකිල්ල දක්වන බව සංකේතවත් කරන්න. ඉතින් ඔය වගේ හේතු කාරණා නිසා තමයි පිරිමි සත්තු මේ සඳහා සහභාගී කරවාගන්නේ.






15. අලි භාෂාව ගැන එහෙමත් දන්නවා ඇති නේද?
**   අලි භාෂාව කියන එක ගැන කිව්වම සමහර අය හිතනවා අලින්ට ඒ දේවල් තේරෙන්නේ අලින්ට ඒ භාෂාව සමීප නිසා වෙන්න ඇති කියලා. එහෙම එකක් නැහැ. අලින්ට පොඩි කාලේ ඉඳලා සාමාන්‍ය සිංහල ඉගැන්නුව නම් එයාලාට අපේ භාෂාවෙන්ම විධාන දෙන්න පුළුවන්. ඒත් අලි භාෂාව කියන එක වෙනස් භාෂාවක් විදියට වෙන් කරලා අලි බලන අය අතරේ විතරක් තියාගෙන ඉන්නේ, සාමාන්‍ය මිනිස්සුත් අලින්ට විධාන දෙන්න ගත්තම සත්තු හසුරවන්න අපහසු වෙන නිසා. අනික අලි භාෂාවේ තියෙන වචන ගොඩක් ඒවා උච්චාරණය කරනකොට අපහසුවකින් තොරව වැඩි හඬකින් උච්චාරණය කරන්න පුළුවන්. මේ නිසා අලි භාෂාව ඒ අයට උච්චාරණය කරන්නත් පහසුයි. අලි භාෂාව හැදිලා තියෙන්නේ කේරල, මලයාල, තෙලිඟු භාෂාවල් වලට සමීප වචන ආශ්‍රය කරගෙන.

දහ - යන්න
උදරි - හොඩය උස්සන්න
හෙත්ත - පිටිපස්සට යන්න
දෙරි - ගන්න
හිද / හිඳ - නිදාගන්න / ඇලවෙන්න / වාඩිවෙන්න
මෙහෙ දහ - මෙහෙ එන්න
ඉඩ දහ - අයින් වෙලා යන්න
පුරු උදරී - හොඩය උස්සලා තල්ලු කරන්න
හරුව - විසි කරන්න
පිචන් - එපා
හෝවාන් - නවතින්න
දෙරි දහ - ගිහින් ගන්න

     කොඩිවින කපන, කොඩිවින කරන, දිෂ්ටි ගෙන්නන, දිෂ්ටි යවන මන්තරවල මේ වගේ වචන කීපයක් තියෙනවා. දිෂ්ටියට යන්න, එන්න වගේ දේවල්වලට තමයි ඒ වචනවලින් විධාන සපයන්නේ. ඒ නිසා මේ වචන මන්තර සාහිත්‍යයත් එක්කත් සම්බන්ධයි කියලා කියන්න පුළුවන්. අලි භාෂාව එක්ක අලි බලන අය ගැනත් දෙයක් කියන්න ඕන. අලි බලන පරණ උදවිය මේ ශිල්පය හරියට දැනගෙන හිටියා. අලි භාෂාව උච්චාරණය කරන්න හොඳට දැනගෙන හිටියා. ඒත් දැන් ඉන්න අලුත් අය අලි භාෂාව උච්චාරණය කරනවා ඇහුණාම මට මතක් වෙන්නෙ, සතුට සුරංග මහත්මයාගේ ගායනා ශෛලිය. ඒ විධාන වලට අලියා අවනත වෙන්නත් හොරයි. ඒ නිසා අලියා වැරදි කරා වගේ හෙණ්ඩුවෙන් අලියට අනිනවා. මේ ළඟදී YouTube නාලිකාවේ එක වීඩියෝ එකක් තිබුණා, හුණුපිටිය ගංගාරාමයේ අලි බලන්නෙක් අලි පැටියට දස වද දීලා අලි භාෂාව උගන්වන රූපරාමු පෙළක්. අලියට අලි භාෂාව උගන්වන එක කලාවක්. ඒක මෙහෙම කෙටියෙන් විස්තර කරන්න බැහැ.







16 . මියැසියේ රසකතාවල ලියපු "ගජ අංගම" ලිපියෙන් අලි මන්තර ගැන කතා කරලා තිබ්බා. මෙව්වා කවදා හරි අත්හදා බලලා තියෙනවද?
**    ගජ අංගම නම් පිඹලා නෑ. ඒක භයානකයි අලියට. අලි ගාවට යනකොට මතක් කරන්න තියෙන ඒවා නම් මතක් කරලා තියෙනවා. ඒත් ඒකත් වැරදිච්ච දවසක් තිබුණා. මම මගේ Research එකකට මදකිපිච්ච අලියෙක් කිට්ටුවට ලං උනා. ඇත්තටම මම දැනගෙන හිටියේ නෑ එයා මදකිපිලා කියලා. කන් දෙක ගාව මද ගලලා තියෙනවා හරියට පෙනුනෙත් නෑ. මීටර් දහයක් විතර දුරක් තිබුණේ අපි දෙන්නා අතරේ. දම්වැලක් කටින් හප හප හිටපු නිසා ඒ ගැන බලන්න මම කිට්ටු උනේ. ඒක අලි ඇතුන්ගේ කැළඹුණු හැසිරීමක් (Stereotypic Behavior). ඒත් නොහිතපු වෙලාවක එයා කිතුල් ලීයක් හොඩෙන් උස්සලා මගේ පැත්තට විසි කළා. මම ලීය එනවා දැකල ටක්ගාලා බිමට පාත් උනා. නැත්නම් මගේ මුණෙන් පැත්තක්ම මේවෙනකොට නැහැ. අලි ඇත්තුන් ඉලක්කය ගන්න හරිම දක්ෂයි. ඒ නිසා ඈතින් උන්නත් සූදානම් ශරීරයෙන් ඉන්න ඕන අලි ඇත්තු එක්ක. ඉතින් අලි මන්තර වැඩ කරපු නැති දවසක් උනා ඒක.

       තව දවසක් දේවාලේ පෙරහැර දවසක දවල්. මම ගියා කවුද ඇවිල්ලා ඉන්නේ කියලා බලන්න. එදා කැලණියේ කණ්ඩුල ඇතා, මට ඒත් කිතුල් ලීයක් එවන්න ලීය ගන්නකොටම අලි බලන අයියා හෙණ්ඩුවෙන් ඇදලා නවත්තගත්තා. එදත් මන්තර වැඩ කරලා නෑ. ඒ ඇයි කියලා මම දන්නේ නෑ. කොහොමහරි වෙනදට නම් දෙවියන්ගේ පිහිටෙන් කරදරයක් උනේ නෑ. හැබැයි ඔය දෙකම උනේ සමන් දේවාලේදී. දේවාලේදී අලි, මන්තර අහන්නේ නැද්ද දන්නේ නෑ. එහෙමත් වෙන්න පුළුවන්.






17. අපේ රටේ විහාරස්ථානවල සහ දේවාලවල සිද්ධ කරන චාරිත්‍රවලට අමතරව, අලි ඇතුන් යොදාගෙන කරන තවත් චාරිත්‍ර, උත්සව  එහෙම තියෙනවද?
**    සිංහල අවුරුද්දට නැකතට හිසතෙල් ගාන චාරිත්‍රය ටිකක් වැදගත්. කැලණිය පන්සලේ සහ පින්නවල අලි අනාථාගාරයේ අලින් ඇතුන්ට නැකතට හිසතෙල් ගානවා. අවුරුදු උත්සව වලදී අලියෙක් එක පැත්තක් සහ අනික් පැත්තට මිනිස්සු එකතුවෙලා කඹ අදිනවා. අලියට ඇහැ තියන්න සමහර වෙලාවට අලි පැටවූ යොදාගන්නවා. ඒකට නම් මම කැමති නෑ. වැරදිලාවත් හුනුකැටේ ඇත්තටම අලි පැටියගේ ඇහැට ගියොත් ඇහැ පේන්නේ නැතිවෙලා යනවා. තව කතරගම දේවාලයේ පන්දලම බඳින්න නැකතට පළවෙනි අත්ත තියන්නේ මංගල හස්තියෙක්. වාසනා තමයි දිගටම ඒක කරගෙන එන්නේ. දේවාල, පන්සල්වලින් ඇරුනම ඉතින් මේවා කෙරෙනවා අඩුයි. තව ඇතා දල ඇනපු තැන පස් හෝ වැලි වාසනාව ගෙන එන දෙයක් කියලා කියනවා. මට මතකයි දුටුගැමුණු කුමාරයා හොයාගෙන එන කඩොල් ඇතාත් දුටුගැමුණු කුමාරයා කිට්ටුව දල බිම ඇන්නා කියලා කතාවක් තියෙනවා. තව අලි ඇත්තුන්ගේ දල යොදාගන්නවා සිංහල වෙදකම්වලට. කැඩුම් බිඳුම් වෙදකමට ඇත් දල ඉතාමත් වටිනා දෙයක්.


18 ගජ මුතු ගැන මොනවද දන්නේ?
**  ගජමුතු කිව්වම සමහර අයට හිතේ මැවෙන්නේ මුතු ඇට. ඒත් ගජ මුතු එච්චර සුන්දර නැහැ. ඔපමට්ටම් කරලා ගත්තම තමයි රවුමට තියෙන්නේ. ඒත් සමහර ගජමුතු ස්වභාවයෙන්ම ගෝලාකාර වෙනවා. ගජමුතු හැදෙන්නේ මෙහෙමයි. ඇතෙක් වැඩෙනකොට ඇත් දලත් වැඩෙනවා. මෙහෙම වැඩෙනකොට ඇතාගේ දන්තිනය වර්ධනය වෙන්නේ දලය පටන්ගන්න හරියෙන්. කාලයක් යනකොට දන්තිනය එකතුවෙලා එකතුවෙලා දලයේ ඇතුලේ තියෙන කුහරයත් කෙටිවෙනවා. මේ කුහරයට ආගන්තුක දේවල් ඇතුල් වෙන්න පුළුවන්. ඒ දලය පළුදුවෙලා තියෙනවනම්. මේ වගේ ආගන්තුක දේවල් වටේටත් දන්තිනය තැම්පත්වෙලා තමයි ගජමුතු නිර්මාණය වෙන්නේ. මේක සරලව කිව්වට කාලයක් ගතවෙන හෙමින් සිදුවෙන ක්‍රියාවලියක්. ඒ නිසා ගජමුතු ඇතිවීමත් දුර්ලභයි.

     අනික ගජමුතු ඇතිවෙන්න වැඩි සම්භාවිතාවක් තියෙන්නේ පළුදු වෙච්ච හෝ රෝගී ඇත් දලවල. මේ හේතුව නිසාම අද කාලේ සමහර ඇතුන්ගේ දල හිතා මතාම පළුදු කරන අවස්ථාත් මම අහලා තියෙනවා. ගජ මුතු නිර්මාණය උනාට පස්සේ සමහර ඒවා දතේ කුහරයේ පැත්තක ඇලිලා තියෙනවා. නැත්නම් මේක කුහරය තුලට වැටිලා එහෙ මෙහෙ හෙලවී හෙලවී තියෙනවා. මේ සෙලවීම නිසා ඇතිවෙන ඝර්ෂණයෙන් ගජමුතු ඇටය රවුම් වෙන්න පුළුවන්. ගජමුතු තියෙන සමහර ඇත්තු ඔලුව හොලවනකොට දලේ ඇතුලෙන් ටක ටක ගාලා සද්දේ ඇහෙනවා. ඒකෙන් කියන්නේ එයාගේ දලේ ඇතුලේ ගජමුතු තියෙනවා කියලා. ගජමුතුවල වටිනාකම මනින්නේ කෝටිගණන්වලින්. ඒත් මේවා වෙනුවෙන් මරණ ඇත්තුන්ගේ ජීවිතවල වටිනාකම මිනිස්සු තක්සේරු කරන්නේ නෑ. සමහර වෙලාවට මරණ ඇත්තුන්ගේ දලවල ගජමුතු ඇත්තෙත් නැහැ. ඒ නිසා ගජමුතු හොයන්න ඇත්තු මරන්න එපා කියලා කියන්න ඕන. ලංකාවේ ඇත්තු නැතිවේගෙන යනවා. ඒ නිසා ඉන්න සත්තු ටිකවත් රැකගන්න ඕන.






19 අලියෙක්ගේ බඩ යටින් ගියාම, වස් දොස් දුරු වෙනවා කියන්නේ ඇයි?
**   ඒක නම් බොරු කතාවක්. මනුස්සයෙක් බය උනාම ඇඟේ සමේ තියෙන ග්‍රන්ථිවලින් පෙරමෝනයක් වගේ රසායනික ද්‍රව්‍යයක් ශ්‍රාවය වෙනවා. මේ නිසා තමයි අලියා දැනගන්නේ අපි බයවෙලා කියලා. අලියාගේ බඩ යටින් යන්න යන්න අපිට ඒ දේ හුරු දෙයක් වෙනවා. එතකොට අර පෙරමොනය ශ්‍රාවය වෙන්නේ නෑ. ඒ නිසා බය ගතිය නැති වෙනවා. අලියෙක්ට බය නෑ කියන්නේ ඉතිං ඊට වඩා අඩු තව ගොඩක් අයට බය නෑ කියන එක. මේ බය ඇතිවීම නවත්වන්න තමයි අලියාගේ බඩ යටින් යන්නේ. ඒත් අද කාලේ ග්‍රහ අපල දුරුවෙන්න ඒවා මේවා කිය කියා යනවා. කමක් නෑ ඉතින් මිනිස්සුන්ගේ කැමත්තනේ. ඔය ක්‍රියාවලිය ඇතිවෙලා තියෙන්නේ අලි බලන කෙනාට මුදල් උපයාගන්න උවමනාව නිසා. අලියාගේ බඩ යටින් ගියාම දෙන මුදලෙන් ඒ අය තමන්ගේ ඕනා එපාකම් සපුරාගන්නවා. ඒකයි මේ සම්ප්‍රදාය ඇතිවෙලා තියෙන්නේ. හැබැයි මම අර මුලින් කිව්ව හේතුව විද්‍යාත්මකව සනාථ කරලා තියෙනවා.



20. මිනිසා හැරුනුකොට, පෘතුවියේ ඉන්න බුද්ධිමත්ම ජීවීන් අතරේ ඉහළින්ම ඉන්න සත්වයෙක් තමයි අලි ඇත්තු කියන්නේ. සාමාන්‍යයෙන් අලි ඇත්තුන්ගේ මතක ශක්තිය ඉහළ මට්ටමක තියෙනවා කියන්නේ ඇත්තද?
**   ඔව්. දේහයේ ප්‍රමාණයට සාපේක්ෂව ඉතා කුඩා මොලයක් අලියාට හිමි උනාට විශ්ලේෂණ හැකියාවෙන් අලියා ඉතාමත් ඉස්සරහින් ඉන්නවා. පර්යේෂණවලට අනුව අලියාට තියෙන්නේ මොන්ටිසෝරි යන වයසේ ළමයෙකුගේ තරම් විශ්ලේෂණ හැකියාවක්. ඒ නිසා අලියාට උගන්වන්න සහ ඒවාට අදාළ ප්‍රතිපල ආපසු ලබාගන්න පුළුවන් ලේසියෙන්ම. අලි ගොඩක් වෙලාවට මතක තියාගන්නවා. ඉතිහාස කතාවල අහලා ඇතිනේ කඩොල් ඇතා ගැන කතාව. කඩොල් ඇතාව දල දෙකෙන් අල්ලලා බිම වාඩි කරවපු නිසා නන්දිමිත්‍ර එක්ක කඩොල් ඇතා තරහෙන් ඉඳලා තියෙන්නේ. ඒ නිසා කට ඇතුලේ ගලක් තියාගෙන ඉඳලා තියෙනවා නන්දිමිත්‍රට පහරදෙන්න. ඒත් විජිතපුර සටනේදී කඩොල් ඇතා දලින් ඇනලා කොටුවේ යදොර බින්දට පස්සේ මේ දොර ඇලවෙලා තියෙන්නේ ඇතාගේ පැත්තට. නන්දිමිත්‍ර තමයි පැනලා දොර අල්ලලා අනික් පැත්තට තල්ලු කරලා තියෙන්නේ. මේ වෙලාවේ තමයි කඩොල් ඇතා අර ගල නන්දි මිත්‍ර ගාවින් තියලා තරහා නැති කරගෙන තියෙනවා කියලා කියන්නේ.

      ඔය වගේ සිද්දි කීපයක්ම උනා. එක පාරක් අලි පැටියෙක්ට චොක්ලට් කෑල්ලක් පෙන්නලා නොදී ඉඳපු මනුස්සයෙක් පෙරහැර බල බල ඉන්නකොට අලි අම්මා විසින් හොඩෙන් ඇදලා අරන් කටින් හපලා මැරුවා. තව පාරක් අලි පැටියට ඒත් මොකක්ද අරියාදුවක් කරපු කෙනෙක්ව අලි අම්මා විසින් දෙවිනුවර දේවාලය ඉස්සරහාම පොලවේ ගහලා මැරුවා. අලින්ට හොඳ ආග්‍රාන අවයව පිහිටලා තියෙනවා. ඒ නිසා පෙනීමට වඩා මෙයාලගේ තියුණු වෙන්නේ ගඳ සුවඳ දැනීම. හැබැයි කන් ඇසීම නම් ඊටත් වඩා දියුණුයි. මේ නිසා මේවායින් ලැබෙන සංඥා තදින් මෙයාලාගේ මතකයේ කාවදිනවා. අලින්ව පුහුණු කිරීම සහ නිල භාවිතා කිරීමත් යන්නේ මේ ධාරණය කියන සංකල්පය එක්ක. එක පාරක් නිලයට ඇන්නම එයා දන්නවා ආයෙත් ඇන්නොත් රිදෙනවා කියලා. ඒ නිසා එතනට උල ලං වෙනකොටම දඟ වැඩ අඩු කරනවා.

      අලින්ගේ නින්ද ගැනත් මෙහෙමම කියන්නම්. මොකද මෙයාලාගේ මතකයත් එක්කම තියෙන දෙයක් තමයි නින්ද. අලි නිදාගන්නේ හිටගෙන කියන එකේ යම් ඇත්තක් තියෙනවා. අලි තමන්ගේ පුරුදු තැනදී තමයි වැඩි හරියක් නිදාගන්නේ. ගොරව ගොරවා නිදාගන්න අලිත් ඉන්නවා. ඒත් පිට තැනකට ගියාම එයාලා ඉන්නේ අඩ නින්දේ. සමහර අලි වාඩිවෙලා නිදාගන්නවා. සමහර අලි ගස්වලට හේත්තු වෙලා නිදාගන්නවා. මට මේ වෙලාවේ මතක් වෙනවා අතීත කතාවක්. මගේ ආච්චි අම්මාගේ නංගි ගුරුවරියක්. එයා ඉගැන්නුවේ අනුරාධපුරේ පැත්තේ දුෂ්කර ඉස්කෝලෙක. මේ ඉස්කෝලේ වත්තටත් ඉඳලා හිටලා අලි එනවා. මේ ආච්චි මට කිව්වා ඉස්සර ඉස්කෝල වත්තේ ගහකට හේත්තුවෙලා නිදාගන්න අලියෙක් හිටියා කියලා. එයා නිදාගත්තම ඉස්කෝලේ පටන්ගන්න වෙලාවටත් නිදිලු. ඉතින් ළමයි ඇවිත් ඈතින් ඉඳලා කෑගහලා තමයි අලියා එලවනවා කියන්නේ. හැබැයි පහුවෙනිදටත් එනවලු. ඔන්න ඔහොමයි අලින්ගේ මොළේ හැටි.






21. අපේ රටේ හීලෑ ඇත් පරපුර දවසින් දවස අඩු වෙනවා. විශේෂයෙන්ම හීලෑ ඇතුන්. දළදා පෙරහැරට නම් අවම වශයෙන් ඇතුන් 8 දෙනෙක්වත් අත්‍යාවශ්‍යයි. මේ හීලෑ අලි ඇත් සම්පතේ අඩුව නිසා, කවදා හරි දවසක අපේ රටේ පෙරහැරවල් නතර වෙයිද?
**   මගේ නම් විශ්වාසය දළදා වහන්සේට කවදාවත් අලියෙක්ගේ පිටේ නම් වඩින්න වෙන එකක් නෑ කියලා. දේවාභරණ අලියෙක්ගේ පිටේ වැඩම කරා කියලා අගෞරවයක් වෙන්නේ නෑ. දළදා වහන්සේ වැඩ ඉන්නකල් පෙරහැර කෙරෙයි. ඇත්තුත් ලැබෙයි. මට ඒක විශ්වාසයි.



22. මහනුවර ඇසළ පෙරහැර තමයි අපේ රටේ තියෙන ලස්සනම පෙරහැර. මහනුවර ඇසළ පෙරහැරේ ඉස්සරහින්ම යන දළදා පෙරහැරේ, පෙරහැර කරඩුව වඩම්වන්න සහ දෑලේ යන්න ඇත්තු 3 දෙනෙක් තෝරන්න කිව්වොත්, වයලීනෝ තෝරන්නේ කාවද?
**  මිල්ලන්ගොඩ රාජා, නැදුන්ගමුවේ රාජා සහ හෙයියන්තුඩුවේ රාජා. කරඬුව වැඩම කරවන්නේ මිල්ලන්ගොඩ රාජා. හෙයියන්තුඩුවෙයි, නැඳුන්ගමුවෙයි දැලේ ගමන් කරනවා. මිල්ලන්ගොඩ තමයි දිගම දල දෙකකට හිමිකම් කියන්නේ. ඒ නිසා එයා මැද ඉඳලා අනිත් දෙන්නා දෙපැත්තේ ඉන්නකොට හොඳ ගෞරවාන්විත පෙනුමක් ඇතිවෙනවා. හෙයියන්තුඩුවේ සහ නැදුන්ගමුවේ දෙන්නා ටිකක් එක වගේ. ඒ නිසා දෑලේ යන්න හොඳට ගැළපෙනවා දෙන්නා එක වගේ, එකම ප්‍රමාණ වගේ නිසා.


23. අලියා හෝ ඈතා, කොච්චර හීලෑ වුණත් එයාලගේ පාද තුනකට දම්වැල් දානවා. ඒ වගේම ගොඩක් අලි බාසුන්නැහේලා හෙණ්ඩුව සහ කෝටුවත් පාවිච්චි කරනවා. පෙරහැරේ යන්න ඕන ඇදුමකින් සැරසිලා. සමහරක් වෙලාවට ඉස්සරහා පෙන්නෙත් නෑ. අවුරුදු දෙදහස් ගාණක් තිස්සේ අපේ රටේ සංස්කෘතික පදනමත් එක්ක අලි ඇතුන්ව මේ වගේ දේවල්වලට සහභාගි කර ගත්තත්, අනිත් පැත්තෙන් බලනකොට මෙව්වත් සත්ව හිංසන නේද? ඒ අනුව ගත්තොත්, අලි ඇතුන්ව මේ වගේ ආගමික වැඩවලට සහභාගී කර ගැනීම බුද්ධ දේශනාවට පටහැනී කියලා හිතෙන්නේ නැද්ද?
**   පටහැනියි. අනිවාර්යෙන්ම පටහැනියි. මේවා කරන්නේ ගෞරවය මුල් කරගෙන. සමහර වෙලාවට ඒ සත්තු අකමැති ඇති මේ දෙන වදවලට. වත බඳින්න දාන බෙල්ට් එක තද කලාම අලියාගේ හෝ ඇතාගේ පෙනහළු හිරවෙලා හුස්ම ගන්න අමාරු වෙනවා. ඒත් එයාලා ඒවා විඳදරාගෙන ඉන්නේ ඔය පැය ගානම. මට මේ වෙලාවේ මතක් වෙනවා අලි ඇතුන්ගේ අඬන සිද්දිය ගැන. අලි ඇත්තු අඬනවා කියලා කියනවා. ඒ මෙහෙමයි. පෙරහැර දවස් ගානක්ම රෑට හරියට නිදි නෑ. ඉතින් අලි ඇත්තු දවල්ට ඉන්නෙත් නිදිමතේ තෙහෙට්ටුවෙන්. මේ නිසා තමයි අලි ඇත්තු අඬනවා කියලා කියන්නේ. එයාලාට තියෙන නිදිමතට සහ උෂ්ණය නිසා ඇස්වලින් කබ කඳුළු ගලනවා. මේකට කියන්නේ නම් පෙරහැර ඉවර වෙලා දුකට අඬනවා කියලා. ඒත් වෙන්නේ අරක තමයි. ඉතින් ඔය ඔක්කොම දුක් විඳගෙන අලි ඇත්තු මේවා කරන්නේ එක අතකට උන්ගේ පවකට වෙන්න ඇති. ඒත් දළදාව එක්ක බැලුවම නම් ඉතින් පිනක් නේද? ඒ වගේ අවස්ථාවක් ලැබෙන එකම මදිද?







24. සමහරක් දවස්වල අළුයම් කාලයේ සෝමාවතී චෛත්‍යරාජයාගේ ධාතු ගර්භය ඇතුළට සුදු ඇත් පැටවෙක් පිවිසෙනවා කියලා කතාවක් තියෙනවා. ඒ වගේම කැබලිත්ත ඓතිහාසික සියඹලාපේ දේවාලය පිහිටලා තියෙන භූමි පරිශ්‍රයෙත් ක්ෂණයෙන් මතුවෙලා, ක්ෂණයෙන් අතුරුදහන් වෙන අද්භූත ඇතෙක් ඉන්නවා කියලා කතාවක් තියෙනවා. ඒ භූමියේ ඉදගෙන කතරගම දෙවියන්ව හෑල්ලුවට ලක් කරන අයට ඒ ඇතාගෙන් ගොඩක් කරදර එහෙමත් වෙනවලු. මේ වගේ අපේ රටේ සමහරක් ශුද්ධ භූමිවල අද්භූත අලි ඇතුන් සම්බන්ධව අහන්න ලැබෙනවා. වයලීනෝට මොකද මේ ගැන හිතෙන්නේ? සංතුසිත දිව්‍යරාජයා, මහාමායා දේවියගේ කුසේ පිළිසිද ගනිද්දිත්, මහාමායා දේවිය නෙළුම් මලක් හොඩින් ගත්, සුදු ඇත් පැටවෙක්ව හීනෙන් දැක්කා. ඒ අනුව ගත්තොත් මේ සිදුවීම්වලට දෙව්වරුන් සම්බන්ධද?
**   අලියෙක් හෝ ඇතෙක් කියන්නේ තිරිසන් ආත්මය ලබන අවසාන ආත්මය කියනවනේ. මට මතකයි හාමුදුරුවරු බණට එහෙම කියනවා. ඊට පස්සේ එයා මනුෂ්‍ය ආත්මයක් ලබනවලු. ඉතින් මේ සිද්දි එක්ක බැලුවම ඒක ඇත්ත වෙන්නත් පුළුවන් නේද?

     අලි ඇත්තු පිටේ දෙවිවරු වඩින නිසා වන අලින්ට මන්තර කියනකොට දෙවිවරු ඉවත් කරලා ඊට පස්සේ කියන්න කියලාත් තියෙනවා. දෙවිවරුන්ට ඉවත් වෙන්න කියලා කිව්වට පස්සේ තමයි මන්තරය මතුරන්නේ. ඉතින් දෙවිවරු එක්ක අලි ඇත්තු සම්බන්ධ ඇති කියලා හිතන්න පුළුවන් නේද? අනික තමයි දෙවිවරුන්ට අලි අත්තුන්ට බලපෑම් කරන්න පුළුවන් කියන කතාව. බලන්ගොඩ බොල්තුඹේ සමන් දේවාලයේ පෙරහරට අලි ඇත්තු ගෙන්නන්නේ නෑ. එහෙ පෙරහරට අලි ඇත්තු ආවම එයාලා කුලප්පු වෙනවාලු. ඇයි එහෙට විතරක් එහෙම වෙන්නේ? අන්න ඒ වගේ දේවල් හරහා හිතලා බැලුවම දෙවිවරු සහ අද්භූත බලපෑම් එක්ක අලි ඇත්තු සම්බන්ධයි කියන්න පුළුවන්.


25. එතකොට සුමන සමන් දිව්‍යරාජයාගේ සුදු ඇතා ගැන මොනවද කියන්න දන්නේ? සුමන සමන් දිව්‍යරාජයා සුදු ඇතෙක් භාවිතා කරන තැනට පත් කළේ අපේ රටේ පැරණි ජනප්‍රවාද, ජනශ්‍රැති, ජනකතා සහ සාහිත්‍යකරුවන් නේද? ඇත්තටම දෙව්වරුන් ඒ විදිහට සත්ව වාහන භාවිතා කරනවද? බුද්ධ දේශනාවේ ඒවා ගැන මොනවත් සදහන් වෙනවද?
**    දෙවිවරු සත්ව වාහන භාවිතා කරනවා කියන්න නම් වෙන හේතු ඕන නෑ. ඓරාවණ හස්තියාම ඇතිනේ සක්‍රයා ගමන් බිමන් යන්න යොදාගන්න ඇතා විදියට. ඔව් ජනශ්‍රැති මේකට බලපාන්න පුළුවන්. සමන් දෙවියෝ කලින් උන්නු ප්‍රාදේශීය ගෝත්‍රික නායකයෙක්. එයාට අලියෙක් හෝ ඇතෙක් වාහනය විදියට ඉන්න ඇති. මරණයෙන් පස්සේ සුමන සමන් දෙවියන් උනා වගේ, එයාගේ ගමන් ගියපු ඇත් වාහනය දෙවියන්ගේ වාහනය වෙන්න ඇති. සුදු ඇතෙක් කියලා කියන්නේ සුදුම නිසා නෙවෙයි. අදටත් ඉන්නවා රෝස පාටට හුරු අලි ඇත්තු. සමහරවිට මේ සතාත් ඒවගේ වෙන්න පුළුවන්. සබරගමුව පැත්තේ ඉන්න කුරු අලි ඇත්තුත් මේ සමන් දෙවියන්ගේ වාහනය ඇති වෙන්න හේතු වෙන්න ඇති.


26. හොදයි. "මේ වගේ ලිපි ලියන එක කාලය කාලා දාන, අතට කීයක්වත් එන්නේ නැති, අබ ඇටයක් තරම්වත් වාසියක් නැති, නිකං තේරුමක් නැති වැඩක්" කියලා කවදාවත්ම හිතිලා නැද්ද?
**    හිතෙනවා. ඒත් ආත්ම තෘප්තිය වෙනුවෙන් ලියනවා. වෙන මිනිස්සු සූදු කෙලිනවා, බොනවා, ගංජා ගහනවා, වෙනත් වෙනත් දේවල් කරනවා. අපි මේ කරන දෙයින් ඒ වගේ කාටවත් හෝ තමන්ට කිසිම කරදරයක් වෙන්නේ නෑනේ. Internet බිල විතරයි ප්‍රශ්නයකට තියෙන්නේ. ඒකත් අවුලක් නෑ. මට දරන්න පුළුවන් ගානක Unlimited Package එකක් තමයි මම පාවිච්චි කරන්නේ. ඒ නිසා මට කිසිම ප්‍රශ්නයක් හෝ අතෘප්තිමත් බවක් දැනිලා නෑ. මට ඇතිවෙනකල් මම ලියනවා. පස්සේ කාලෙක මේවා කියවනකොට මටම මම ගැන සතුටු වෙන්න පුළුවන් විදියට මම ලියනවා. ඒක තමා අවසාන බලාපොරොත්තුව. ඉතින් ඒ අතරේ මොනවා හරි ඉගෙන ගන්න අයත් මම ලියන දේවල් වලින් ප්‍රයෝජන ගනියි.







27. මම කියනවා "වයලීනෝ මේ වගේ ලිපි ලියන්නේ අනිත් අයගේ අවධානය දිනා ගැනීමේ උපක්‍රමයක් හැටියට සහ සමාජය අතර, බ්ලොග්කරුවන් අතර කැපී පෙනෙන 'පොරක්' වෙන්න" කියලා. දැන් මොකද වයලීනෝ කියන්නෙ?
**   මගේ ආදර්ශ පාඨය වෙලා තිබුනේ "ගේම නම් ගේම, ශේප් නම් ශේප්" කියන එක. ඒත් ඒ ඉස්සර. දැන්නම් ඕන එකක් වෙච්චාවේ කියලා මම මගේ පාඩුවේ ඉන්නවා. ඒ නිසා මට කවුරුවත් අතරේ පොරක් වෙන්න අවශ්‍යතාවයක් නෑ. තත්ත්වයෙන්වත් ප්‍රශංසාවෙන්වත් උඩ යන්නේ නැතුව මගේ සාමාන්‍ය මට්ටමේ ඉඳගෙන මම තාමත් ලියනවා. කාලෙන් කාලෙට වෙනස් වෙනවා. ඒත් ලියනවා. මම දන්නා විෂයන් දන්න ගොඩක් අය තාක්ෂණයත් එක්ක සම්බන්ධ නෑ. ඒ නිසා ඒ අයගේ දැනුම බ්ලොග් වලින් එලියට එන්නේ නෑ. අත්දැකීමුත් එහෙමම පල් වෙවී තියෙනවා. ඒත් මට, දන්නා පොඩ්ඩ මෙහෙම ලියලා පල කරන්න පුළුවන් නිසා මම ලියනවා. මම හිතන්නේ මම කරන දෙයින් වැදගත් දෙයක් කියලා වෙන්නේ අන්න ඒක කියලා. ඒ නිසයි මම ලියන්නේ. හැබැයි මෙහෙම එකක් තියෙනවා. මම කැමති නෑ කවුරුවත් මාව පාලනය කරනවට. මට සීමාවල් දාන්න ආවොත් එතන පොඩි අවුලක් වෙනවා. ඒ සීමාවල් මම පිළිගත්තේ නැත්නම් ප්‍රශ්න ගොඩක් තමයි.


28. මොනවද ඉදිරි බලාපොරොත්තු?
**   අධ්‍යාපනය අතින් පොඩි පොඩි බලාපොරොත්තු ටිකක් තියෙනවා. රසායන විද්‍යාව හරි සත්ත්ව විද්‍යාව හරි ඒ දෙකම හරි වැඩි දුර ඉගෙනගන්න බලාපොරොත්තුවක් තියෙනවා. තව වයලීනෝ කියන නම, මම දැනට යොමුවෙලා නැති ක්ෂේත්‍ර කීපයකට යොමුකරන්නත් හිතාගෙන ඉන්නවා. ඒවා වෙන්නේ කොහොමද කියලා අනාගතය විසින් තීරණය කරාවි.


29. ස්තූතියි කරන්න ඕන පිරිසකුත් ඉන්නවා නේද?
**   ඔව්. ආච්චි අම්මා, අම්මා, තාත්තා, පුංචි අම්මා මට මතක් නොකරම බැහැ. සංගීතය පැත්තට යොමු උනේ අම්මා තාත්තා දෙන්නා නිසා. ගුප්ත දේවල්වලට යොමු උනේ ආච්චි අම්මා නිසා. විශ්වවිද්‍යාලය දක්වා එන්න ඉගෙනගත්තේ පුංචි අම්මා මග පෙන්වපු නිසා. සිංදුවා අයියාගේ පවුලේ උදවියත් මතක් කරන්න ඕන. එයාලත් මට හැම දෙයින්ම උදවු කරනවා. බ්ලොග් ලියන්න ආව පාරේ මට පාර කියලා දුන්නේ ලාභයි ඇපල් ලියන ඇපල් අයියා සහ ආගිය කතා ලියන හසිත චාමිකර අයියා. බ්ලොග් ලිවිල්ලේදී මාත් එක්ක ඉඳලා විවේචන අඩුපාඩු තර්ජන ගර්ජන ඔක්කොම මුලින්ම ලබාදෙන්නේ සිංදුවා අයියා සහ සිංදුවා අයියාගේ මල්ලි. මගේ ලිපි කියවන ප්‍රතිචාර දක්වන අයටත් ස්තූති කරන්න ඕන. කී නොකී හැමෝටම ඉතින් ස්තූතියි.


30. වයලීනෝට ලියන්න ඕන විදිහ ආයිත් මතක් කරනවා නම්?
**  darshanaprabhath1@gmail.com


ඔන්න ඔහොමයි වයලීනෝ එක්ක කරපු දෙවෙනි කතා බහ අවසන් වෙන්නේ. කොහොම හරි මේ ලිපියත් එක්ක වයලීනෝගේ සම්පූර්ණ විෂය පථයම ආවරණය වෙනවා. මේ ලිපියට දාලා තියෙන ඔක්කොම වීඩියෝ ටික තේරුවේ වයලීනෝ. ඉතින් උඩ දාලා තියෙන වීඩියෝ දෙක වගේම, පහළ තියෙන වීඩියෝ ටිකත් බලන්න කියලා වයලීනෝ ඔබ සැමට විවෘත ආරාධනාවක් කරනවා, බොහෝම තැන්පත් සිතින් යුක්තව. අද සමාජයේ අලි ඇතුන් ගැන සාකච්ඡා වෙන දේවල් පාදක කරගෙන තමයි මේ ලිපිය ලිව්වේ. හැම දෙයක් ගැනම නැති වුණත්, බොහෝමයක් දේවල් ගැන අපි මෙතනදි සාකච්ඡා කළා.

අප්පච්චි තුන්වෙනි පාර ඉල්ලන්න ගිහින් වෙච්ච හරිය මදැයි! ඒ නිසා වයලීනෝ සබැදි කතා IIIක් නම් එන්නේ නෑ. අනික ඕනෑම දෙයක් ඕනෑවට වඩා ඕනෑම නෑ. ඔය වයලීනෝ වුණත් එච්චර තමයි...!!!!!!!