Sunday, July 19, 2015

වයලීනෝ සබැඳි කතා









බ්ලොග් ලියන්න ඇවිත් මට හම්බවුණු යාළුවො යෙහෙළියෝ ගොඩක් ඉන්නවා . සමහර අය ඉතාම ළඟ යාළුවො . මේත් එයින් එක්කෙනෙක්ගේ වැඩක් . දනුල වික්‍රමආරච්චි . බ්ලොග් එකේ ලිපි කියවලා මුහුනුපොතෙන් මාව හොයාගෙන ඇවිත් ලිපි ලියන්න ගවේෂණය කරන්න මාව දිරිමත් කරපු තවත් එක යාලුවෙක් . පස්සේ තමයි දන්නේ දනුල ඉන්නේ මටත් දැකබලාගන්න පුළුවන් කිට්ටුවක කියල . මමත් ඉතින් දවසක් වෙලාවක් දාගෙන ඒ පැත්තේ ගිහිල්ලා කතාබහ කරලා එයාලව අඳුරගත්තා .

දනුලගේ අම්මා තාත්තා වගේම පවුලේ අයත් දැන් මගේ හොඳ යාළුවො . දනුලගේ ගෙදර පොත් රාක්කයේ තියෙන පොත් එක එක දැන් විජේරාමේ ඉඳලා රත්නපුරේ ඇවිත් ආයෙත් විජේරාමෙට යනවා . දනුලගේ අධ්‍යාපන වැඩ වලටත් අපෙන් උදවු උපකාර ලබාගන්නවා .

දනුල දවසක් මට කිව්වා සම්මුඛ සාකච්චාවක් කරලා ආටිකල් එකක් කරන්න ඕන කියලා . මුලින් මම මේක විහිලුවට අරගෙන ෆන් එකක් ගත්තා . පස්සේ වැඩේට සීරියස් බැහැලා ඔන්න ලිපියට උත්තර බැඳලා ඒ සාකච්චාව ෆේස්බුක් හරහා සිද්ද කළා . දැන් මේ පබ්ලිෂ් කරන්නේ දනාගේ පළාමල්ල වෙබ් අඩවියේ පලවෙච්ච ඒ සම්මුඛ සාකච්චාව .







අපි ජීවත්වෙන සහ අපිට පෙනෙන ලෝකය තුළ, අපිට නොපෙනෙන ලෝකයක් තියෙනවා කියලා බුද්ධ දේශනාවේ සදහන් වෙනවා. අමනුෂ්‍ය ලෝක, අමනුෂ්‍යයෝ, පුනර්භවය සහ පුනරුත්පත්තිය, අක්ෂර සිද්ධි ගැන එදා විශ්වාස කළේ නැතත්, අද ඒවා විශ්වාස කරන්න තරම් බොහෝ දෙනෙක් පුරුදු වෙලා ඉන්නවා. අවුරුදු දෙදහස් පන්සීයකට කලින් බුදු හාමුදුරුවන් තමන්ගේ ලෝකවිදූ ඤාණයෙන් දේශනා කරන ලද බොහෝ දේවල්, අද තමයි නූතන විද්‍යාවට අහු වෙන්න ගන්නේ.

ලෝකය කොච්චර විද්‍යාවෙන් සහ තාක්ෂණයෙන් දියුණු වුණත්, ඒ සෑම සියලු දෙයක්ම සොයා ගන්න නම් හම්බවෙන එකක් නෑ. මොකද විද්‍යාව කියන්නේ බුදු දහමේ කොටසක් වුණාට, බුදු දහම කියන්නේ විද්‍යාවේ කොටසක් නෙවේ. අනිත් හේතුව තමයි බුද්ධ ඤාණය අචින්ත්‍යයි. අප්‍රමාණයි.

ඉතින් අද හිතුනා අමනුෂ්‍ය ලෝක, අමනුෂ්‍යයෝ, යන්තර සහ මන්තර, ජෝතිශ්‍ය විද්‍යාව, වෛද්‍ය ශාස්ත්‍රය ගැන කතා කරන්න. මොකද අපේ රටේ නම් ඉස්සර ඉදලම මේ ඔක්කොම සහ සම්බන්ධ වෙලා තියෙන්නේ එක පුරුකක් වගේ. ඉතින් මේ වගේ ඒවා ගැන සාකච්ඡා කරන්න වයලීනෝට වඩා සුදුස්සෙක් ඉන්නවද මේ බ්ලොග් අවකාශයේ?

වයලීනෝ ප්‍රභාත් ධර්මවර්ධන, එහෙමත් නැත්නම් වයලීනෝ කියන්නේ කවුද කියලා බ්ලොග් අවකාශයේ ලිපි ලියන අය වගේම, ලිපි කියවන අයත් අනිවාර්යෙන්ම දන්නවා. ඒ අයට නම් මෙයා ගැන අටුවා, ටීකා අවශ්‍ය නෑ. මියැසියේ රස කතා හරහා යක්ෂ දේව කතා ලියන්නේ වයලීනෝ තමයි. ගොඩක් දෙනෙක් දන්නේ නැති වුණාට, හස්තිනාපුරයේ ඉදන් සමන් දෙවියන් ගැන ලිපි ලියන්නෙත් මෙයාම තමයි. ඒ නිසා ඒ මාතෘකා යටතේ තියෙන ලිපි ඉතාමත්ම ජනප්‍රිය වුණා.

මේවා අවිශ්වාස කරන අයත් ගොඩක් ඉන්නවා. මේ ලිපිය ලියන්න හිතුවේ "මෙහෙම දේවල් ඇත්තටම තියෙනවා, මේවා අනිවාර්යෙන්ම විශ්වාස කරන්න ඕන" කියලා සමාජයට ඒත්තු ගන්වන්න නෙවේ. සමාජයට යම්කිසි දැනුමක් ලබා දීමේ සුපිරිසිදු චේතනාවෙන්. මේ ලිපිය කියවලා නොදන්න යමක් දැන ගන්න ලැබුණා නම් අපිට ඒ ඇති. හොදයි එහෙනං. දැන් ඉතින් මේ කටයුත්තට නමෝ විත්තියෙන් මුල පුරමු.







01. උප්පැන්න සහතිකයෙන් ලැබුණු නම? 

**   හිටිනමළුව හේවගේ වයලීනෝ ප්‍රභාත් ධර්මවර්ධන

02. අද ඔබව හදුනන්නෙ? 

**  වයලීනෝ කියලා තමයි වැඩි දෙනෙක් දන්නේ. ඉස්කෝලේ කාලේ වෙන වෙන නම් ගොඩක් තිබුණා. ඒවා ඉතින් ඒ කාලේ විතරයි.

03. උපන්න ගම් පළාත? 

**   රත්නපුර

04. ඉගෙන ගත්ත පාසල?

**   ප්‍රාථමික අධ්‍යාපනය ලැබුවේ රත්නපුර ගැටන්ගම රත්නමහා විද්‍යාලයෙන්. මේ විද්‍යාලය කලින් මධ්‍යමහා විද්‍යාලයක්. කන්නංගර මහත්මයාගේ මධ්‍යමහා විද්‍යාල සංකල්පය යටතට වැටෙන විද්‍යාලයක් මේක.
පස්සේ බිල්ඩින්වල ඉඩ මදි නිසා අලුත් තැනකට මධ්‍යමහා විද්‍යාලය අරගෙන ගියා. මේක මහා විද්‍යාලයක් උනා. මම ශිෂ්‍යත්වෙන් රත්නපුර සීවලී මධ්‍යමහා විද්‍යාලයට ඇතුළු උනා. උසස්පෙළ දක්වා ඉගෙන ගත්තේ සීවලී මධ්‍යමහා විද්‍යාලයේ.

05. උසස් පෙළට පිවිසෙන්නෙ?

** 2008 ජුනි 26 වෙනිදා. ඒත් රත්නපුර සීවලී මධ්‍යමහා විද්‍යාලයට. ජීවවිද්‍යා අංශයෙන් තමයි උසස්පෙළ හැදෑරුවේ.

06. දැන් මොනවද කරන්නෙ? 

** ශ්‍රී ජයවර්ධනපුර විශ්වවිද්‍යාලයේ ව්‍යවහාරික විද්‍යා අධ්‍යන අංශයේ ජීවවිද්‍යා අංශයේ උපාධි අපේක්ෂකයෙක්. මම සත්ත්ව විද්‍යාව, රසායන විද්‍යාව සහ කළමනාකරණ විද්‍යාව කියන විෂයන් තුන අධ්‍යනය කරනවා . මම දැන් දෙවන වසර උපාධි අපේක්ෂකයෙක්.

07. මොකක්ද මියැසියේ රස කතා කියන්නේ?

**  මිසැසියේ රස කතා පටන් ගත්තේ සිංදුවා අයියා, ඒ ගීතවල අර්ථ විග්‍රහ කරන්න. ඒත් මම ඒකට සම්බන්ධ උනාට පස්සේ මියැසියේ යක්ස කතා, මියැසියේ කෙටිකතා වගේ එක එක මාතෘකා යටතේ ලිපි පලවෙන තැනක් බවට පත් උනා. ඒත් මියසියේ රසකතා , මියසියේ රසකතා විදියටම පවත්වාගෙන යන්න මම උනන්දු වෙනවා . මොකද බ්ලොග් එක පටන් ගත්තේ සංගීතය නිසා . ඒ පාදම ශක්තිමත් නිසා තමයි අනිත් දේවල් උනත් බය නැතුව මේකේ ලියන්න පුළුවන් උනේ .

08. එතකොට හස්තිනාපුර කියන්නේ?

**  හස්තිනාපුර කියන්නේ මම ඉස්සෙල්ලම ලියන්න පටන්ගත්ත තැන . බ්ලොග් කියන්නේ මොකක්ද කියලාවත් දන්නේ නැතිව හිටපු කාලෙක ලියන්න ඉගෙනගත්ත තැන තමයි හස්තිනාපුර කියන්නේ . අදත් මම ඒකෙ ඉබි ගමනින් ලියනවා . හස්තිනාපුරය යම් සීමාවකට කොටු කරලා තියෙන නිසා වැඩිපුරම නිදහස තියෙන මියසියේ රසකතාවලට හස්තිනපුරයට වඩා මගේ අවධානය යොමු වෙනවා කිව්වොත් හරි .

09. මොකක්ද ඔය තරමටම දෙව්වරුත් එක්ක තියෙන සම්බන්ධය ?

**   දෙවිවරු ගැන මට අදහසක් දුන්නේ අපේ ආච්චිඅම්මා . ආච්චිඅම්මා ගොඩක් වෙලාවට දෙවිනුවර දේවාලය අපේ පවුලේ වැදගත් අවස්ථා වලට මුල් කරගත්තා . අපි විභාගයක් ලිව්වත් අපි ඊට කලින් දෙවුන්දර දේවාලෙට ගිහින් වැඳලා එන සිරිතක් තියෙනවා . හැබැයි ආච්චිඅම්මා නැති උනාට පස්සේ ඒ සිරිත ටිකක් අඩුවෙලා තියෙන්නේ . ඒ නිසා වැඩිපුරම යන්නේ ගෙවල් කිට්ටුව තියෙන සමන් දේවාලෙට .

පන්සල් යනවා වගේ හිත නිදහස් කරගන්න ඕන උනාම මම යන්නේ සමන් දේවාලෙට . මොකද යන්න තියෙන පන්සල් වලට ගියාම හිත නිදහස් වෙන්නේ නෑ , තවත් විකල් වෙනවා විතරයි වෙන්නේ . සමන් දේවාලේ තියෙන්නේ නිස්කලංක පරිසරයක් වගේම පන්සලක වටපිටාවක් . ඒ නිසා සමන් දේවාලෙට , දේවාලයේ පසුබිමේ තියෙන සුවඳට මම කැමතියි . දේවාලේ ගියාට , දෙවියන්ට වැන්දට , දෙවියන්ගෙන් හැමදේම ඉල්ලන පුරුද්දක් මට නැහැ . මට දෙවියන් ගැන තියෙන්නේ ගෞරවයක් . ඒ ගෞරවය ඇතිවුණේ ආච්චිඅම්මා නිසා කියලා තමයි කියන්න තියෙන්නේ .

10. එතකොට යන්තර සහ මන්තර ශාස්ත්‍රය ගැන ලියන්නේ? 

**  මම වෙද පවුලක කෙනෙක්. තෝම්බුව සම්පූර්නෙන් දිගාරින්න මම කැමති නැහැ . ඒ නිසා කෙටියෙන් කියනවනම් මම වෙද පවුලක කෙනෙක් නිසා මට යන්තර මන්තර ගැන ඉගෙනගන්න අවස්ථාවක් ලැබුණා කිව්වොත් හරි . වෙදකම් කියලා අපේ අය වැඩිපුරම කරලා තිබුණේ විස වෙදකම .

විස වෙදකම එක්කම මන්තරත් ගෑවිලා තියෙනවා . විෂ බස්සන්න , ඕන නම් විෂ නග්ගන්න , සර්පයින් ගෙන්නලා ඌ ලවාම විෂ උරවලා ආයෙත් ඒ සතාව පිටත් කරලා යවන්න වගේ ගොඩක් දේවල් එක්ක මන්තර සම්බන්ධ වෙනවා . ඒ නිසා ඒ හැමදේම යම් තරමකට මටත් උගන්නලා තියෙනවා .

11. යන්තර මන්තර ඉගෙන ගත්තා විතරමද? අත්හදා බලලා නැද්ද? 

**  ඔව් යන්තර ගැන ඉගෙනගෙන තියෙනවා . ඒ ඉගෙනගන්න තියෙන උවමනාවට විතරයි . මම මන්තරවලින් සර්පවිෂ බස්වන්න කරන්න ඕන විධි ගැන ඉගෙනගෙන තියෙනවා. කීප වතාවක් අත්හදා බලන්නත් පුළුවන් උනා. විෂ බස්වනවා වගේම විෂ නග්ගන්නත් ගුප්ත විද්‍යාව එක එක මාර්ග පිළියෙළ කරලා තියෙනවා . ඒවා ඉතින් වචන වලින් කියන්න අමාරුයි. කරලා ප්‍රතිපල ගන්න තමයි තියෙන්නේ .








12. තව ටිකක් විස්තර කරමු බලන්න ඒ ගැන.

**  වෙදකම සහ මන්තර එකට බැඳිලා තියෙන්නේ. සමහර වෙලාවට විෂ ශරීරගත උනාම ඒවා ඇඟට පත්තියන් වෙනවා. ඊට පස්සේ ඒවා අඩු කරලා විෂ බස්සන්න මන්තර මතුරන්න වෙනවා. නොකරම බැරි වෙලාවල් කීපයක මම ඒ දේවල් අත්හදා බලන්න වගේ කරලා බැලුවා . කියන්න තරම් වරදක් උනේ නම් නැහැ . ඉගෙනගත්ත ඒවා ඇත්තද බලන්නත් ඕනනේ.

උසස්පෙළ කරන්න ගත්තට පස්සේ ඒ දේවල් ටික ටික මතකයෙන් ඈත් වෙලා ගියා . සමහර මන්තරවල කෑලි කෑලි ඉඳලා හිටලා කියවෙනවා . එත් ගොඩක් දේවල් දැන් අමතකයි පාවිච්චි කරන්නේ නැති නිසා . අමතක වෙන්න කලින් මම ගොඩක් දේවල් ලියලා පරිස්සම් කරලා තියෙනවා . ගුරුකුලේ රකින්න ඕන නිසා පස්සේ කාලෙක කාටහරි ඒ දේවල් උගන්නන්නත් බලාපොරොත්තුවක් තියෙනවා .

වෙද මහත්වරු ගොඩක් වෙලාවට කරන්නේ විෂ බස්සලා විෂ නැති කරලා රෝගියා සනීප කරන එක . එත් විෂ නග්ගනවා කියලා එකකුත් තියෙනවා . ඒ කියන්නේ බහින විෂ ආයෙත් ඕන නම් නග්ගලා තිබ්බ ප්‍රමාණයට වඩා වැඩි කරලා ඒකෙන් මිනිස්සුන්ගේ ජීවිත කෙලවර කරන්නත් පුලුවන් වැඩකට. ඒකත් මම ඉගෙනගෙන තියෙනවා. ඒත් ඒ ඉගෙනගත්තේ එහෙම කරන්න නෙවෙයි. ඒවා ඉගෙනගත්තම විෂ බස්වන්න ලේසියි. මොකද තුවාලයකට බෙහෙත් දාන්නේ තුවාලේ පෑරෙන විදියට ශුද්ද කරාට පස්සෙනේ . විසෙන් විස නසන්නත් සමහර වෙලාවල් වලට යම් ප්‍රමානෙකට විෂ නග්ගන්න වෙනවා .

13. මොකක්ද එතකොට මන්තර කියන්නේ? මන්තර සහ යන්තර අතර තියෙන වෙනස මොකක්ද?

**  මන්තර කියන්නේ අකුරු එකතුවක්. ඒ අකුරු එකතුව කරන්න විශේෂ දැනුමක් ඕන. අකුරුවල උච්චාරණයට අනුව ඒ ඒ අකුරුවලට විශේෂිත සංඛ්‍යාත තියෙනවා. ඒ අනුව ඒවා කම්පනය කරලා ශක්ති උත්පාදනය කරලා තමයි මන්තරවලින් එක එක ඒවා කරගන්නේ. යන්තර කියන්නේ සංකේත වර්ගයක්. ඒවා තඹ පිත්තල තහඩුවල ලියපු ඒවා වගේම වෙනත් සංකේත උනත් වෙන්න පුළුවන්.

අටමගල පංචායුධය කියන්නේ ඒවගේ යන්තර ගණයට වැටෙන සංකේත. යන්තර වලට මන්තර මතුරලා ශක්ති පිහිටවලා ගත්තම ඒවාත් ඒ සංඛ්‍යාත වලට කම්පනය වෙනවා. ඉතින් ඒ කම්පන වලට අදාලා වැඩ සිද්දවෙනවා. යන්තරයක් හදන එක විද්‍යානුකුලව තමයි කරන්නේ. ඒ ගන්න තහඩුවල දිග පළල, මතුරන කාලය, වාර ගණන, කොටින්ම කියනවනම් යන්තරය එල්ලන්න ගන්න නූලත් ඒ ඒ ක්‍රියා වලට විශේෂ වෙනවා.

14. එතකොට අක්ෂර සිද්ධියෙන් සිද්ධ කරන යන්තර සහ මන්තර කටයුතු වලට දිව්‍ය, යක්ෂ, භූත, ප්‍රේත ආදී අමනුෂ්‍ය ලෝකවල ඉන්න ජීවී කොට්ඨාස සම්බන්ධ වෙන්නේ කොහොමද?

**  ඉස්සර හිටපු ඍෂිවරු තමයි මේවා නිර්මාණය කරා කියලා කියන්නේ. මට එතුමාගේ නම හරියට මතක නෑ . අවුරුදු 9000කට කලින් පහල වෙච්ච මේ ඍෂිවරයා තමයි ප්‍රාචීන විද්‍යාවන් නිර්මාණය කළා කියලා කියන්නේ . ග්‍රහ තාරකා චලනයේ ඉඳලා ප්‍රාචීන විද්‍යාවන් වලට අදාළ භෞතික මිනුම් ඔක්කොම සම්මත කරා කියන්නේ මේ ඍෂි වරයා . අක්ෂර ශක්ති විශේෂ සංයෝජනය කරලා මන්තර නිපදවන ශාස්ත්‍රයත් එතුමාගේ නිර්මාණයක් කියලා තමයි මමනම් දන්නේ .

මම නම් හිතන්නේ අමනුස්සයොත් ශක්තියක් කියලා. එයාලාට වෙනමම වෙන් වුණු විශේෂ ශක්තියක් තියෙනවා. මන්තරවලින් කරන්නේ ඒ ශක්තිය අපිට ඕනා විදියට හසුරුවන එක .

15. ඒ අය එහෙම සම්බන්ධ වෙන්නේ කැමැත්තෙන්ද? නැත්නම් අකමැත්තෙන්ද?

**  අමනුස්සයෝ ගොඩක් අකමැත්තෙන් තමයි එන්නේ. මොකද මේවා අමනුස්සයින්ගෙන් අහලා නෙවෙයිනේ කරන්නේ. ඒත් සමහර වෙලාවට අමනුස්සයෝ කැමැත්තෙනුත් වැඩ කරනවා. දෙවිවරු බන්ධනය කරොත් එන්නේ අකමැත්තෙන්. දෙවිවරුන්ට ආරාධනා කරොත් එන්නේ කැමැත්තෙන්. අංජනම්වලට නම් ගොඩක් වෙලාවට හනුමන්තා එන්නේ කැමැත්තෙන්. ඒ වගේ ඒ ඒ අවස්ථාවේ හැටියට අමනුස්සයෝ ඉදිරිපත් වෙන්නේ වෙනස් ස්වරූප වලින්. කැමැත්තෙන් එන අයගෙන් වැඩ කරගන්න වැඩි අමාරුවක් නෑ . එත් අකමැත්තෙන් එන අය එක්ක ගණුදෙනු කරන එක ටිකක් අවදානම් .







16. තාරකා විද්‍යාවට අනුව නම් ජීවය පවතින ලෝකවල ඉන්න ජීවීන්ව හදුන්වන්නේ පිටසක්වල ජීවීන් කියලා. එතකොට අමනුෂ්‍ය ලෝකවල ඉන්න ජීවීන් අයත් වෙන්නෙත් ඒ කුලකයටමද?

**   ආටානාටිය සුත්‍රයේ සිංහල තේරුම කියවලා බලන්න. එතකොට මේ ප්‍රශ්නෙට උත්තරේ මම දෙනවට වඩා හොඳට දැනගන්න පුළුවන්. අමනුෂ්‍ය ලෝක කියලා මමනම් හිතන්නේ වෙනමම සංඛ්‍යාත පරාසයක ජීවත්වෙන ජීවින් පිරිසකට කියලා .


17. බුදු හාමුදුරුවන් දේශනා කරපු සූත්‍ර දේශනා වලත් තියෙන්නේ අකුරුවල එකතුවක්. අක්ෂර සිද්ධියක්. ඒවාත් මහා බලසම්පන්නයි. ඒ කියන්නේ බුදු හාමුදුරුවන් දේශනා කරපු සූත්‍ර අයිති වෙන්නෙත් මන්තර වලට කියන එකද?

** අකුරු උනාට මන්තර, සූත්‍ර වෙන්නෙත් නෑ. සූත්‍ර, මන්තර වෙන්නෙත් නෑ. හැබැයි බුදු හාමුදුරුවන්ගේ සූත්‍ර සමහර ඒවායේ අක්ෂර සිද්ධිය අද්විතීය විදියට ගළපලා හෝ ගැලපිලා තියෙනවා. ඒ නිසා ඒවටත් අද්විතීය බලයක් හිමිවෙලා තියෙනවා.

18. 2014 දෙසැම්බර් 29 වෙනිදා, මියැසියේ රස කතාවල, ගජ අංගම (අලි මන්තර) ගැන ලියපු ලිපිය ගමු. අලි මන්තරේ කිව්වායින් පස්සේ අලියා නැවතුනොත් ඒ මන්තරයේ බලය නිසා කියලා කියනවා. 
අලියා මන්තරේ ඇහුවේ නැත්නම් අලියගේ පිටේ දෙවි කෙනෙක් ඉන්නවා කියලා කියනවා. තවත් සමහරු කියනවා මන්තරෙන් බලාපොරොත්තු වුණු ප්‍රතිඵල ආවේ නැති වුණාම, කිලි වලට අහු වුණ නිසයි හරි නොගියේ කියලා. ඒ නිසා මේ ශාස්ත්‍රය හසුරුවන කෙනා හැම තිස්සෙම Backup Plan එකක් එක්ක, එහෙමත් නැත්නම් අතිරේක සැලැස්මක් එක්ක ඉන්නවා කියලා චෝදනාවක් එල්ල කළොත්? 

** මම ලියන්න කලින් ඉගෙන ගත්තා. ඒ නිසා මම ඇත්ත නැත්ත මොකක්ද කියලා වටහාගෙනයි ලිව්වේ. ඒ නිසා මට ඔය ප්‍රශ්නයට මෙහෙම උත්තරයක් දෙන්න පුළුවන්. ගොඩක් වෙලාවට මිනිස්සු ඔහොම කියන්නේ එක්කෝ හොරු ගාවට ගිහින් රැවටිලා නිසා, නැත්නම් මේවා පිළිගන්න තියෙන අකමැත්ත නිසා. ඒත් ප්‍රතිපල තියෙන සහ ප්‍රතිඵල ලබාදෙන්න පුළුවන් අය තමන්ගේ මේ ක්‍රියාකාරකම් නිහඬව එදත් අදත් හෙටත් ඉටු කරනවා කියලා මට විශ්වාසයි.

තොටගමුවේ රාහුල හාමුදුරුවෝ දක්ෂ මන්තර හසුරුවන්නෙක් කියලා ඔයාලා දන්නවා ඇති . උන්වහන්සේ රචනා කරපු මන්තර මමත් කියවලා අහලා දැකලා තියෙනවා . ඉතින් ඒවා බොරු වෙන්න පුළුවන්ද ? . ඒවා බොරු කියන අයම උන්වහන්සේගේ සැළලිහිණි සංදේශය අනර්ඝ වස්තුවක් හැටියට වර්ණනා කරනවා . මෙතන තියෙන්නේ මිනිස්සු වාසියට යම් යම් දේවල් පිළිගෙන අනිත් දේවල් ඉවත දාලා තියෙන එක .

කමක් නෑ ඉතින් . තම තමන්ගේ කැමැත්ත නිසා . ඒත් සයනයිට් වස කියලා පිළිගත්තත් පිළිනොගත්තත් ඕන නම් ඒක බලෙන් හරි කැවුවොත් මැරෙන්න වෙනවා වගේ මන්තර ශාස්ත්‍රයත් පිළිගත්තා හෝ නැතා තමන්ට එයින් කවුරුහරි නියමාකාර විදියට බලපෑමක් කරනවානම් ඒක බලපානවාම තමයි . ධනාත්මක චින්තනයෙන් නම් මේවට අභියෝග කරන්න ශක්තිමත් වෙන්න බෑ . අධ්‍යාත්මික ශක්තිය නම් මේවාට අභියෝග කරන්න පුළුවන් තරම් ශක්තිමත් . ඒ නිසා ඔන්න ධනාත්මක චින්තනය නැතුව ආධ්‍යාත්මය දියුණු කරනවානම් මේවායින් බලපෑම් එල්ල නොවී ජීවත් වෙන්න පුළුවන් .


19. බෞද්ධ දෙව්වරු. හින්දු දෙව්වරු. මිත්‍යා දෙව්වරු. මේ දෙව්වරු තුන් වර්ගයම අද ශ්‍රී ලාංකිකයෝ පටලවාගෙන තියෙනවා. කොහොමද බෞද්ධ දෙවි කෙනෙක්ව අනිත් දෙව්වරුන්ගෙන් වෙන් කරලා හදුනා ගන්න පුලුවන් වෙන්නේ?

**   මම නම් එහෙම වෙන් කරන්න කැමති නෑ. සක්‍රයා, ඉන්ද්‍ර, සියුස් තුන්දෙනාම එක්කෙනෙක් කියලා මම හිතනවා. ඒ වගේම විෂ්ණු උපුල්වන් කියලා මම හිතනවා. ඒ නිසා කොයි දෙවියන්ට කොහොම වැන්දත් මම නම් හිතන්නේ එකයි කියලා. හැබැයි මගේ නම් විෂ්නුටයි, සමන් දෙවියන්ටයි වැඩි කැමැත්තක් තියෙනවා. ඒ විෂ්ණු දෙව්ලොව නායකයෙක් නිසා සහ සමන් දෙවියෝ සෝවාන් වෙලා නිසා. ඒ වගේ එක එක්කෙනා තම තමන්ට කැමති විදියට ඒ ඇදහීම් කරනවා නේද ?

20. ගොඩක් බෞද්ධයන් කතරගම, උපුල්වන්, සුමන සමන් වගේ දෙව්වරුන්ව බැති සිතින් වන්දනාමාන කරනවා. ඒත් මේ දෙව්වරු ගැන අපිට අහන්න ලැබෙන්නේ ජනප්‍රවාද සහ ජන කතා එක්කම වගේ. ඒත් ජීවමාන බුදු හාමුදුරුවන්ගේ කාලයේ හිටපු බුද්ධ ශ්‍රාවක දෙව්වරු ගැන බුද්ධ දේශනාවලම සදහන් වෙනවා. මාතෘ දිව්‍යරාජයා, සක්‍ර දේවේන්ද්‍රයා, ජනවසභ දෙවියන්, සතර වරම් දෙව්වරු ගැන බුද්ධ දේශනාවල කියවෙනවා. ඒත් ඒ දෙව්වරුන් ගැන අපේ බෞද්ධ ජනතාවට මතක් වෙන්නෙත් නැති තරම්. ඒකට හේතුවක් විදිහට ඔබ දකින්නේ මොකක්ද?

** ජනකතා හැදුන කාලේ මිනිස්සු පොත් එක්ක සමීප නෑ. එයාලට බෞද්ධ දෙවිවරු ගැන දැනගන්න ලැබෙන්නේ බණ අහනකොට විතරයි. ඉස්සර පුරුද්දක් තිබිලා තියෙනවා අකුරු දන්නා කෙනෙක් අනිත් අයට ඇහෙන්න පන්සීය පනස් ජාතක කතා වලින් එක එක ජාතක කතා කියවන එක.  ඒ නිසා බෞද්ධ දෙවිවරු මිනිස්සුන්ට ලං උනේ අඩුවෙන්. ඒත් අනිත් දෙවිවරු මෙයාලට ළඟයි. ඒ මොකද ගමේ දේවාලේදී ඒ දෙවිවරුන්ට වැඳුම් පිදුම් කරන නිසා. හැමදේටම දේවාලෙට ගිහින් පඬුරක් තියලා භාරවෙලා වැඩ කරපු නිසා බෞද්ධ සාහිත්‍යයේ දෙවිවරු ජනප්‍රවාද වලින් වෙන්වෙලා වෙනමම තියෙනවා කියන්න පුළුවන්. ඒ සාමාන්‍ය පරිසරයේ . මන්තරත් එක්ක ගණුදෙනු කරන අයට ඔය කවුරුත් මන්තර වලදී හම්බෙනවා .

ආලවක යක්ෂයා පවා මන්තර වල දකින්න ඉන්නවා . ඒ කියන්නේ හැම අමනුෂ්‍යයෙක්ම මන්තර වලදී වැදගත් වෙනවා කියන එක . එක මන්තරයක් තියෙනවා ඒ මන්තරයේ කියවෙනවා මාරයා විසින් බුදුන් වහන්සේගේ පරිනිර්වාණ අවස්ථාවේ බුදුන් වහන්සේගේ ප්‍රාණය ශරීරයෙන් නිරුද්ද වෙන්න කලින් මාරබන්ධනය කරන්න ඉදිරිපත් වෙච්ච සිදුවීමක් ගැන . පස්සේ ඒක වැළකුණා කියලත් අන්තිමට කියනවා . ඒ නිසා මන්තර සාහිත්‍යයේනම් ඔක්කොම අය ඉන්නවා . වැරැද්ද තියෙන්නේ මන්තර හැමෝටම කියවන්න දකින්න ලැබෙන්නේ නැති එක . ඒ නිසා වරණීයව තමයි මේවා සමාජගත වෙලා තියෙන්නේ .






21. කවදා හරි දවසක අමනුස්සයෙක්ව දැකලා තියෙනවද? ඒ අයත් එක්ක මේ ශාස්ත්‍රය හරහා ගණුදෙනු කරලා තියෙනවද?

**  මම තදබල විදියට අසනීප වෙන වෙලාවට ඒ ගැන පෙරනිමිත්තක් මට දකින්න ලැබෙනවා. ඒ පෙරනිමිත්ත කොහොම එකක්ද කියලා කියන්න මම කැමති නෑ. ඒත් මම හිතනවා මම ඒ දකින්නේ අමනුෂ්‍ය බලවේගයක් කියලා . මට ඇපෙන්ඩිසයිටීස් හැදිලා ලෙඩේ හොයාගන්න බැරිව සති දෙකකට වඩා වැඩි කාලයක් අසනීපෙන් හිටියා . පැපොල හැදිලා ඒත් ගොඩක් අමාරු උනා . ඔය වගේ දරුණුවට අසනීප වෙන වෙලාවල් වලදී මට එක පෙරනිමිත්තක් දකින්න ලැබෙනවා . ඒක අමනුෂ්‍ය බලවේගයක්දෝ කියලා මම වෙලාවකට සැක කරනවා . හැබැයි හැමදේම සංසුන් උනාට පස්සේ තමයි මතක් වෙන්නේ මම අර පෙරනිමිත්ත මේ දේ වෙන්න කලින් දැක්කා නේද කියලා .


22. වඩාත්ම බලවත් මන්තරද? පිරිත්ද? 

**  පිරිත්. ඒත් පිරිත් වලින් කරන්න බැරි ඒවත් තියෙනවා. ඒ තැන් වලදී පිරිත් වලට වඩා මන්තර ඉස්සරහට එනවා. ඒත් පිරිත බලවත් කියන එක ගුප්ත ශාස්ත්‍රයේ සම්මතයක් . අවුල වෙන්නේ ඕන ඕන හැම දේම පිරිතෙන් කරන්න බැරි එක. බන්ඩි කියතෙන් පාන් කපන්නේ නැහැනේ. ඒත් ඕන නම් ට්‍රයි කරලා කපාගන්න බැරිකමකුත් නෑ. ඒත් පාන් කන්න පුළුවන් වෙයිද කියලා තමයි සැකයි.


23. වඩා බලවත් පිරිත් නම් යන්තර සහ මන්තර ශාස්ත්‍ර භාවිතා වෙන්නේ ඇයි?

**  පිරිත් බලවත් උනාට පිරිත ඕන එකටයි එපා එකටයි හැම දේටම ගත්තම ගෞරවය නැති වෙනවා. නැත්නම් පිරිත් වලිනුත් වින මිනිස්සු මරන්න කරන්න පුළුවන් . සමහර පිරිත්වල තියෙන්නේ හොඳ කොටස් සහ නරක කොටස් එකතුවෙලා උදාසීන හෝ හොඳ කොටස් වැඩිවෙලා නිසා නරක දුරු වෙලා . ඒත් ශිල්පය දන්නා අය මේ පිරිත්වල කොටස් වෙන් කරලා තම තමන්ට ඕනා දේවල් කරනවා .
උදාහරණයක් ගත්තොත් සබ්බ පාපස්ස අකරනං ගාථාවේ කොටස් වෙන් කරලා ඒවායින් මතුරලා අංගම් පිඹලා මිනිස්සුන්ට අවැඩක් කරන්න පුළුවන් විදි ඒ ශිල්පයේ කියවෙනවා . ඒවා රහස්. ඒ රහස් නිසාම තමයි පිරිත වෙන් කරලා මන්තර හදලා තියෙන්නේ .






24. " නත්ථි මේ සරණං අඤ්ඤං - බුද්ධෝ මේ සරණං වරං "...... අදටත් මේක වලංගුද? කෙනෙක්ට මොකක් හරි කරදරයක් වුණාම බුදු හාමුදුරුවන්ටත් වඩා දෙව්වරුන්වයි මතක් වෙන්නේ. ඒත් බුදු හාමුදුරුවන් කියන්නේ දෙව්වරුන්ගේ පවා වන්දනාවට පාත්‍ර වුණු උත්තරීතර ශාස්තෘවරයෙක්. දෙව්වරු හැම තිස්සෙම ඉන්නේ බුදුවරුන්ට පහළින්. මෙහෙම තියෙද්දිත් විපතක් වුණු වෙලාවට මිනිස්සු තුනුරුවන් ගැන අමතක කරලා දෙව්වරුන්ගෙන් උදව් උපකාර ලබා ගන්න උත්සාහ කිරීම ගැන මොකද හිතන්නේ?

**   මට මේ වෙලාවේ මතක් වෙන්නේ සමන් දේවාලයේ වැඩ කරන්න ඉන්න සීයා කෙනෙක් හැමවෙලේම එන අයට කියන කතාවක් . ඒ “ බුදු සරණයි දෙවි පිහිටයි කියනවා මිස, බුදු පිහිටයි දෙවි සරණයි කියන්නේ නැහැනේ “ කියන කතාව . මොකද සමහර අය බුදුන්ට වඳින්නේ දෙවියන්ට වැඳලා . ඒත් කරන්න ඕන බුදුන්ට වැඳලා පස්සේ දෙවියන්ගෙන් පිහිට ඉල්ලන එක . ඒ නිසා මම හිතන්නේ කරදර වලදී දෙවිවරු මතක් කළාට කමක් නැහැ. ඒත් බුදුගුණ හිතේ තියෙනවා නම් බුදුන් ඇතුළු තෙරුවන් සරණ ගිහින් ඉන්නවානම් තමන්ට වෙන කරදර අඩු වෙයි කියලා .


25. ඒ කාලේ යුද්ධ ජයග්‍රහණය කරවන්න හිටං කොඩිවින, වින බන්ධන, පිල්ලි යැවීම්  කළා කියලා කියවෙනවා. ලංකාවේ මෑත ඉතිහාසය තුළ පැවති 30 වසරක යුද්ධය ජයග්‍රහණය කරන්න ඇයි මේ ක්‍රම උපයෝගී කර ගන්න, මේවා ප්‍රගුණ කරපු අය ඉදිරිපත් වුණේ නැත්තේ? එහෙම කළා නම් ජීවිත සහ දේපල විශාල ප්‍රමාණයක් රැකෙන්න තිබුණා.

** ඒවා පිළිගන්න උන් නැති රටක ඒවා කරන්න ඉදිරිපත් වෙයිද? අනික සාත්තරේ උගන්නන අය දැන් උගන්වන්නේ ශාස්ත්‍රයේ පැවැත්ම සඳහා මිස වැඩ කරන්න නෙවෙයි. මටත් ඔය ප්‍රශ්නය ඉස්සර තිබුණා. මට හම්බුණ එක ගුරුන්නාන්සේ සීයා කෙනෙක් කිව්ව උත්තරයම තමයි මමත් මේ මුලින්ම කිව්වේ. අනික ඔන්න දක්ෂ කෙනෙක් ඕවා කරා කියමුකෝ ඊට පස්සේ එයාට වෙන්නේ මොකක්ද කියලා කාටද කියන්න පුළුවන් . සමහරවිට එයාට සැනසිල්ලේ ඉන්න නැති වෙනවා . ප්‍රසිද්ධිය වදයක් වෙනවා . ටීවීවල පත්තරේ හැමතැනම එයා . ඒ දේවල් නිසාම කවුරුවත් මේවා කරන්න ඉදිරිපත් වෙන්න නෑ . අනික මන්තර එක්ක මිනිස්සුන්ගේ හිත් දරදඬු වෙනවා . මන්තර එක්ක හැප්පෙන අයගේ හිත ටිකක් තදයි . ඒ නිසා මානුෂීය පදනම මත පිහිටලාවත් මේවා කරන්න ඒ කාලේ ඒ අය ඉදිරිපත් වෙන්න නැතුව ඇති . අනික තමයි ගුරුකම් වල යාවත්කාලීන වීම් වෙන්නේ නැති එක . වෙඩි හිර කරන මන්තර හැදිලා තිබුණා . ඒත් එතනින් එහාට ඒවා දියුණු උනේ නෑ . ඒකට හේතුව සම්පත් දායකයින්ගේ හිඟ තාවය . ඒ නිසා බෙහෙත් කොටන තුවක්කුවේ වෙඩිල්ල මන්තරෙන් හිර කරන්න පුළුවන් උනාට පතරොම් දාලා පත්තු කරන මැෂින් ගන් එකේ උණ්ඩය හිර කරන්න මන්තර බිහිවෙලා නෑ . ඔයවගේ ප්‍රශ්න නිසාත් මේ දේවල් කරන්න එයාලා ඉදිරිපත් වෙලා නෑ කියලා මට හිතෙනවා .







26. අපි හිතමු කවුරු හරි කෙනෙක්ට හූනියමක් කරලා තිබ්බා කියලා. මේක ගැන දැන ගත්ත දවසේ ඉදලම මේ කෙනා ඉන්නේ නොසන්සුන් වෙලා. බැරි වෙලාවත් මෙයා පාරේ යන කොට බස් එකකට හැප්පුනොත්, මෙයා නිගමනය කරනවා ඒක වුණේ හූනියම නිසා කියලා. ඒත් එයා මීට කලින් දවසක හැප්පුනොත් නිගමනය කරනවා එහෙම වුණේ රියදුරාගේ තියෙන නොසැළකිලිමත්කම නිසා කියලා. පුද්ගලයෙක් තමන් හූනියමකට ලක්වෙලා බව දැනගත්තහම ඒක හිතෙන් අයින් කරලා මට කරදරයක් වෙන්නේ නැහැ කියලා තමන් විසින් තමන්වම සනසා ගන්න හදනවා. නමුත් මෙහිදී අමතක වෙනවා වෙනුවට නැවත නැවත අවිඥාණිකවම මතකයට නැගීමක් සිදුවෙනවා. මේ හේතුවෙන් එදිනෙදා සිදුවන අහඹු සිදුවීම් පවා වෙන්නේ මේ හූනියම නිසයි කියන සිතුවිල්ල අදාල පුද්ගලයා තුල පහල වෙනවා. මේ නිසා කෙනෙක්ට හිතේ ඇතිවන අධික භය නිසා ඔහුට හෝ ඇයට යම් හානියක් වෙන්න තියන ඉඩකඩ වැඩියි. අධික කම්පනයට ලක්වෙන පුද්ගලයන් හදවත් රෝග, අධික උණ ගතිය, ආහාර අරුචිය, නින්ද නොයාම, මායාවන් පෙනීව, හැඟීම් දැනීම් අවුල් වීම ඇතුලුව විවිධ රෝග වලට ගොදුරු වෙන්න පුලුවන්. ඉතින් හූනියමක් කියන්නේ පුද්ගලයෙක් අධිකව විශ්වාස කරන මතයක් උපයෝගී කරගෙන ඔහුගේ හෝ ඇයගේ භීතිය ඇවිස්සීමෙන් හෝ ඔවුන්ගේ මානසිකත්වය අවුල් කර ඔවුන්ව පීඩාවට පත් කිරීමට ගන්නා කුරිරු සහ කපටි උපක්‍රමයක් බවට යම් කෙනෙක් තර්ක කලොත්?

** ජලනන්දන පිරිත බුදුහාමුදුරුවෝ දේශනා කළේ මොකටද කියලා දන්නවද දන්නේ නෑ? දවසක් ආනන්ද හාමුදුරුවන්ව දැක්ක රොඩී කාන්තාවක් ආනන්ද හාමුදුරුවන්ට ආදරේ කරනවා. පස්සේ මේ කාන්තාවට ආනන්ද හාමුදුරුවෝ ඕන වෙනවා. පස්සේ මෙයා ඒක මෙයාගේ අම්මට කිව්වම මෙයාගේ අම්මා ආනන්ද හාමුදුරුවන්ට බන්ධනයක් කරනවා. ආනන්ද හාමුදුරුවෝ මේ බන්ධනයෙන් වශී වෙලා රොඩී ගුබ්බෑයමට යනකොට බුදු හාමුදුරුවන්ව සිහි කරනවා මාව බේරා ගන්න කියලා. ඒ වෙලාවේ තමයි බුදුහාමුදුරුවෝ ජලනන්දන පිරිත දේශනා කරන්නේ. "ආනන්දොති මහා තේරං උත්තමං ධම්ම භාණ්ඩකං යෙන භික්කු මහා තේරං සයනේ බන්ධන විද්වන්සනං" කියලා දේශනා කළේ ඒක තමයි.

මේ වෙලාවේ බුදුහාමුදුරුවෝ එහෙම කළේ මේ බන්ධනය වැඩ කරපු නිසා නේද? ඒ නිසා මේවා කාටත් බලපාන්න පුළුවන්. මනුස්සයෙක්ගේ මානසිකත්වය අඩුවෙන වෙලාවක මේවායින් ප්‍රයෝජන ගන්නවා කියන්නේ අද කාලේ ඉන්න හොර කට්ටඩීන්ගේ වැඩ නිසා. ඒ නිසා ඒවා විශ්වාස කරන්න බෑ. අනික අද කාලේ ඉන්න සාමාන්‍ය මිනිස්සුත් අන්ධ වෙලා මේවා පස්සේ යන නිසා රවට්ටන්න ලේසියි. රවට්ටන්නේ නැති එක කට්ටඩියාගේ යුතුකම.

රැවටෙන්නේ නැති එක මිනිස්සුන්ගේ වැඩක්. එතකොට මල්ලි මේ අහන ප්‍රශ්නේ මතුවෙන්නේ නෑ. කොච්චර මේ ශිල්පෙ ගැන මම හෙව්වත් මම ඒ දේවල් කරන්නේවත් කරන්න අනුබල දෙන්නේවත් නැත්තේ ඒ නිසා . අදකාලේ මිනිස්සුන්ගේ මානසික තත්ත්වය හරිම අඩුයි . ඉන්ද්‍රියන් පහම හරිම අඩුවෙන් වැඩ කරන්නේ . ඒ දේවල් එක්ක ඒවායින් අරමුණු කරන දේවල් සාර්ථක වෙයි කියලා විශ්වාස කරන්න බැහැනේ . ඒ නිසා ඕන වෙලාවක බෝලේ බස්සලා ගානට රවට්ටන්න පුළුවන් .


27. පහුගිය ජනාධිපතිවරණයත් එක්ක කරලියට ආපු මාතෘකාවක් තමයි ජෝතිශ්‍ය කියලා කියන්නේ. කොහොමද අපේ සෞරග්‍රහ මණ්ඩලයේ තියෙන අජීවී ග්‍රහලෝක, පෘතුවියේ ඉන්න පෘතුවි වාසීන්ට බලපෑම් එල්ල කරන්නේ?

** සූර්යාගේ ඉඳලා එන ශක්තියෙන් තමයි ප්‍රභාසන්ශ්ලේෂණය වෙන්නේ. ඒක පිළිගන්නවනේ නේද? ඒ වගේ තමයි සූර්යාලෝකය හැමදේටම බලපානවා. මේ ආලෝකය ඒ ඒ ග්‍රහලෝකවල වැදිලා පරාවර්තනය වෙන ආලෝකය පොලවට එනවා. ඒවායේ තියෙන්නේ එක එක තරංග ආයාම වගේම එක එක ශක්තීන්. ඉතින් මේවා නිසා මිනිස්සුන්ට එක එක බලපෑම් වෙනවා. ඍෂිවරු මේවා අනුව බලලා තමයි ජෝතිෂ්‍ය විද්‍යාව ගොඩනගලා තියෙන්නේ. ජනාධිපතිවරණය කාලේ වෙච්ච දේවල් ගැන මගෙ තියෙන්නේ කලකිරීමක්. ඊට පස්සේ ජෝතිෂ්‍යය බොරු බොරු කියලා ගොඩක් දෙනෙක් කෑගැහුවා.

මමත් යාලුවොත් එක්ක හිනාවෙන්න ඕන උනාම ඔයවගේ දේවල් කියලා හිනාවෙනවා . එත් ශිල්පයට වෙච්ච දේ ගැන නම් මට ඇත්තටම දුකයි . ඕනෑම ශිල්පයක් මගින් සේවයක් කරන කෙනෙක් ස්වාධීන වෙන්න ඕන . ස්වාධීන නැත්නම් ශිල්පෙ පැත්තක දාලා ගෙදර ඉන්න ඕන බලයට අධිකාරීත්වයට බයේ මේ දේවල් කරලා ඒවා හෑල්ලු කරන්නේ නැතිව . ජෝතිෂ්‍ය විද්‍යාවේ තව හෑල්ලු වෙන්න දෙයක් නෑ . නම් දරාපු උදවිය කියලා ඉන්න අය කරන එක එක විකාර වැඩ නිසා කවුරුවත් මේවා ඉස්සරහට පිළිගන්න එකක් නෑ .

එක එහෙමයි කියමුකෝ. ඒත් මම අහන්න කැමතියි ඒ බොරු බොරු කියලා කෑගහන අය මේක ඉගෙනගෙනද කෑගහන්නේ කියලා? එක පැත්තකින් සාධාරණයි. රාජකීය දෛවඥයා කිව්ව දේ බොරු උනාම තව කවර කතාද? . වෙදකමට නැකත් මුහුර්ථ ඒවා මේවා ඕන වෙනවා . ඒ  නිසාම මම නම් ජෝතිෂ්‍ය  ඉගෙනගන්නවා. මම වටේ ඉන්න ආශ්‍රය කරන ගොඩක් අයගේ කේන්දර මට ලැබෙනවානම් මම කැමතියි . ඒ එයාලගේ ජීවන තත්ත්වය මට පේන නිසා පොතේ දැනුම ප්‍රායෝගිකද කියලා බලන්න එකෙන් අවස්තාවක් ලැබෙන නිසා . කැමති කෙනෙක්ට මගෙන් උදවු ගන්න පුළුවන්.

හැබැයි මම බලෙන් උදවු කරන්න යන්නේ නෑ. මුල කාලේ මනුස්ස කමට කියලා බලෙන් උදවු කරලා හොඳ අත්දැකීම් තියෙනවා මට වැරදුනු නිසා . හැබැයි ඒ අය මේ ලිපිය කියවනවනම් මම කියන්න කැමතියි මම කිව්ව දේවල් මම වගකීමක් නැතිව කියලා නෑ කියලා . ඒ වගේම මගේ පරීක්ෂණ වලට අහුවෙච්ච අයගේ ජීවන තත්ත්වය ගැන මම තාමත් විමසිල්ලෙන් ඉන්නවා කියලත් කියන්න ඕන . එතකොට තමයි මේ ශිල්පය හරිද වැරදිද කියලා දැනගන්න පුළුවන් වෙන්නේ .


අද කාලේ ජෝතිෂ්‍ය නැතිවෙන්න ලොකුම හේතුවක් තමයි බාගෙට ඉගෙනගෙන පලාපල කියන එක. ඒක අසාර්ථකයි. ජෝතිෂ්‍ය විද්‍යාව හරියට ඉගෙනගන්නවානම් මැරෙනකල් ඉගෙනගත්තත් ඉවර කරන්න බෑ. ඒත් යම් යම් සීමාවල්වල තියෙන විශාල කරුණු තොගයක් ඉගෙනගෙන ඕන ඒවා ප්‍රයෝජනයට ගන්න. ජෝතිෂ්‍ය වේදියෙක් හොඳ පරීක්ෂකයෙක් වෙන්න ඕන ගිරවා දාලා වැඩ කරන්නේ නැතුව . මොකද ලෝකේ අලුත් වෙනවා . සංකල්ප ස්ථාවර උනත් ඒ සංකල්ප එක්ක බැඳිලා තියෙන සමහර දේවල් අලුත් වෙන්න ඕන . එතකොටයි ශිල්පය පවතින්නේ .

දැන් තියෙන ලොකුම අවශ්‍යතාවයක් තමයි ජෝතිෂ්‍ය සංගායනාවක් තියලා එකඟතාවයකට එන්න තියෙන උවමනාව . ඒත් ඒවා වෙයි කියලානම් හිතන්න බෑ . කේන්දර බලන අය කේන්දර අතේ තියන් බලන්න එන මිනිස්සුන්ට කියන්නේ සල්ලි නෙවෙයි ජීවිතේ කියලා . ඒත් කියන උන්දැගේ අතේ සල්ලි තිබ්බේ නැත්නම් උන්ද මුකුත් කියන්නේ නෑ . ඒ නිසා මුදලින් හැම දේකම අද්විතීය බව අයට ගිහින් . උත්තරේ දිග වැඩි උනේ මෙහෙම කියන්න අවස්ථාවක් එන්නේ නැති නිසා .

28. කොහොමද ලිපි වලට ලැබෙන ප්‍රතිචාර?

** හිතුවට වඩා හොඳයි. ඒත් තව ලියන්න ඕන නිසා වැඩිය ප්‍රතිචාර ගැන හිතන්නේ නෑ .

29. අවසාන වශයෙන් පාඨකයින්ට මොනවා හරි විවෘතව කියනවා නම්?

** කියන්න ඕන ඔක්කොම බ්ලොග් එකේ පෝස්ට්වල මම කියලා තියෙනවා. හැබැයි මම කැමතියි එයාලා මගෙ අඩුපාඩු කියනවනම්. ලියන ඒවා වෙනස් වෙන්න ඕන හැටි , ලියන්න ඕන මොනවාද කියලා කියනවනම්. අනික තමයි මම ලියලා තියෙන දේවල් කොපි කරලා දානවනම් කතෘ අයිතිය ගැන සැලකිලිමත් වෙන්න කියලත් කියනවා . මම ඔය දේවල් හොයලා බලලා දාන්නේ මගේ අධ්‍යාපන වැඩත් එක්ක . විශ්වවිද්‍යාල අධ්‍යාපනයේ වැඩිපුරම තියෙන්නේ තනියම හොයලා ඉගෙනගැනිල්ලක්.

ඒවත් එක්ක මේවට වෙලාව හදාගන්නේ සමහර දේවල් කැප කරලා . ඒ නිසා ඒ කැප කරන දේවල් වලට වටිනාකමක් මේවායින් තියෙන්න ඕන කියලයි මම හිතන්නේ  . වෙන සයිට් වලින් කොපි කරලා මම මොකවත් දාන්නේ නෑ . දැම්මොත් දාන්නේ සිංදුවක පද රචනය විතරයි . ඒකත් අහලා බලනවා හරිද කියලා . සංකල්පය විග්‍රහ කරන්න පුළුවන් තරම් මම ටයිප් කරනවා . ඒ වගේම මම ලියන ඒවා කවුරු හරි කොපි කලොත් හොයාගන්නත් සලකුණු තියනවා . මම ටයිප් කරලා දාලා තියෙන ගොඩක් සිද්දාන්තමය දේවල් කොපි කලොත් මට ඒ සලකුණු වලින් අඳුරගන්න පුළුවන් . ඒ නිසා කොපි කරන අය කතෘ අයිතිය සඳහන් කරන්න කාරුණික වෙන්න කියලා ඉල්ලනවා .

මම ඇදුරෙක්වත් සාත්තර කාරයෙක්වත් නෙවෙයි . ඒ නිසා මගෙන් එහෙම උදවු ඉල්ලන්න එපා . මට පරම්පරාගත උරුමයක් තිබුණට මම බටහිර විද්‍යාව ඉගෙනගන්න අතරේ තමයි මේවා ගවේෂණය කරන්නේ . ඒ නිසා මේවා ප්‍රායෝගිකව කරන්න පුළුවන්ද කියලා මගෙන් අහලා මුණු පොතේ නැලවී නැලවී මැසේජ් දාන්න එපා . කේන්දර ගැන ප්‍රශ්න නම් ඇහුවත් කමක් නෑ . මම පුළුවන් හැටියට කියන්න පුළුවන් දෙයක් කියන්නම් විෂය තුල හොයලා බලලා . ඒත් පොරොන්දම් බලන්න , හොර කේන්දර හදන්න මාව හොයාගෙන එන්න එපා , බෑ කිව්වම තරහා වෙන්නත් එපා . මම ඒවා කරන කෙනෙක් නෙවෙයි .

සමහර වෙලාවට මම දාන කමෙන්ට් රිප්ලයි සමහර අයට වැරදි විදියට තේරුම් යනවා මම ආවේගශීලීව කතා කරනවා කියලා . මට ආවේගශීලීව කතා කරලා මගේ මතය සම්මත කරන්න කිසිම උවමනාවක් නෑ . ඇත්ත නැත්ත මම දන්නවා . ඒවායින් මට ඕන දෙයක් කරගන්නවා ඇරෙන්න අනිත් අය ඒවා පිළිගත්තත් එකයි මට නැතත් එකයි . කමෙන්ට් එකකින් හැගීම් එවන්න අමාරු නිසා මම සමහරවෙලාවට දාන ඩිරෙක්ට් කමෙන්ට් වලට හිත් අමනාපකම් ඇතිකරගන්න උවමනා නෑ කියලා මම ඉල්ලන්න කැමතියි .


30. වයලීනෝට ලියනවා නම්? 

** darshanaprabhath1@gmail.com

වයලීනෝගෙන් අහන්න තව ගොඩාක් ප්‍රශ්න තිබුණත් "සොදුරු කතා බහේ" ආකෘතියට අනුව අකමැත්තෙන් වුණත් මේ සංවාදය ප්‍රශ්න 30කට සීමා කරන්න සිද්ධ වුණා. අද සාකච්ඡාවට යොදා ගත්තේ නිතරම සමාජයේ කතා බහට ලක්වෙන මාතෘකා කිහිපයක්. දනා ඔව්වා විශ්වාස කළත්, සාකච්ඡාවකදී පැත්තක් ගන්න බැරි නිසා වැට උඩ ඉදගෙන තමයි ප්‍රශ්න ටික හැදුවේ. කොටින්ම කියනවා නම් භෞතිකවාදීන්ගේ කෝණයෙන් තමයි ප්‍රශ්න හැදුවේ. ඒවායෙන් ගොඩක් ප්‍රශ්න වලට වයලීනොත් සාර්ථකව උත්තර බැන්දා.

ඔන්න ඔහොමයි සාකච්චාව කෙරුනේ . ඔයාලත්

දනාගේ පලාමල්ල

ගොඩවෙලා දනුලගේ ලිපිත් කියවලා දැනුම එකතුකරගන්න .

ඔබ සැමට සමන් දෙවිඳුගේ පිහිට ලැබේවා !

Thursday, July 9, 2015

සිංදුවට මඩක් සමග පෙම් කල වරදට මට වද දෙන්නේ







මෙහි එන නම් ගම සියල්ල මනඃකල්පිත නොවන අතර 21වන සියවසේ මුල් භාගයේ රත්නපුරේ හද්ද පිටිසර මූකලාන ගමක සිදුවුණ අසත්‍ය සිදුවීමක් ආශ්‍රයෙනි .

( බුදු සරණ වේවා තාලෙට කියන්න )

ආ යු බෝ වේවා..........
රෝ ග බෝ වේවා...........
පැටවූ බෝ වේවා ..........
මෙතුන් බෝවෙන් ජයම වේවා..................

අම්මේ තාත්තේ අයියේ අක්කේ නංගියේ මල්ලියේ සහෝදර සහෝදරි වරුණේ . අදත් ඔන්න සිංදුවට මඩක් යටතේ පොඩී............. කතාවක් එක්ක සිංදුවක් ගැන කියන්න තමයි වයලීනොගේ කල්පනාව . මේ වෙනකොට සිංදුවා සිංදුවතී ප්‍රේම පුරාණයේ පුරාවිද්‍යාත්ම පසුබිම ඔයාලට අමතක වෙලාත් ඇති කියලා හිතනවා . මොකද ගොඩ කාලෙකින්නේ සිංදුවා සිංදුවතී කතා පුවතක් අරගෙන වයලීනෝ දුවගෙන දුවගෙන දුවගෙන ආවේ .

සිංදුවා ඔන්න කොහොම කොහොමහරි ඉස්කෝලේ යනකාලේ සිංදු කියලා , නැවු ටෝල්ක්ස් දීලා වතී අක්කව සෙට් කරගත්තා . දැන් ඔහොම ඔහොම කාලයක් ගතවෙලා යනකොට වතී අක්කගේ ගෙදර විශේෂ අවස්ථා සඳහා සහභාගී වෙච්ච සිංදුවා අවසානයේ බයිසන් කුලුමීහරකා දමනය කරලා ගමටම ශාන්තියක් උදාකරදීලා ගමේම වීරයා බවට පත්වුණා . ඊට පස්සේ කාලයක් යනකොට වතී අක්කගේ අයියට පොඩ්ඩක් ඉව වැටෙනවා වතීඅක්කගේ ජීවිත උයනේ මල් පිපිලා කියලා . දැන් අයියට කවුද කියලා හොයාගන්නත් ඕන . ඒත් අහන්නත් බෑ බෑ වගේ . 

ඔහොම ඔහොම ටික දවසක් යනකොට වතී අක්කගේ පිස්සුව තවත් වැඩි උනා . ගෙදර පිඟන් කෝප්ප පවා වැඩි හරියක් වතී අක්කා අතින් කුඩු වෙන්න පටන් ගත්තා . මේ මොනවා උනත් වතී අක්කගේ අම්මා වතී අක්කට බැන්නේ නෑ . වතී අක්කාගේ අම්මා හැමවෙලාවෙම කිව්වේ එහෙම දෙයක් උනාම

" අනේ ඉතින් ලාස් වලින් මනින්න තරම් කෙල්ලෝ ඉන්න එකක්ය , පිඟන් කෝප්පනම් ගන්න බැරිය "

කියලා . කොහොමහරි වතී අක්කා අම්මගේ අයියගේ නහය විදලා ගානට නූලට සීරුවට මල පුප්පගෙන පුප්පගෙන පුප්පගෙන ගියා . අවසානයේ ඔන්න ඒ අඳුරු දිනය උදා උනා . 

කොච්චර අඳුරු දිනයක්ද කියනවනම් උදේ ඉඳලා වැහි අන්ධකාරය . ගමම මේ වැහි අඳුරෙන් මිරිකිලා ගිහින් තිබුනේ . ගෙදර හොඳටම කරුවලයි . දවල් වෙනකොට කරන්ට් එකත් කැපුවා . ගෙදර වැඩක් කරගන්නවත් විදියක් නැති නිසා වතී අක්කගේ අම්මා කියනවා ඉටිපන්දම් ඉවර වෙලා කඩේට ගිහින් ඉටිපන්දම් ගේන්න කියලා . වතී අක්කා මේවා කිසි ගණනකට ගන්නේ නැතිව කාමරේට වෙලා සිංදුවා එක්ක මල 

වතී :- හානේ සිංදු අපේ ගමට හරිම කරුවලයි . ගෙදර කරන්ට් එකත් නෑ . මට බයා.............යි 
වතා :- ග්ර්ර්ර්ර්ර්ර්ර්ර්ර් ඔන්න යකා එනවා....... ග්ර්ර්ර්ර්ර්ර්ර්ර්ර් ඔන්න ගෝනි බිල්ලා එනවා  
වතී :- අනේ මාව තවත් බය කරන්න එපා අනේ . මම අහිංසකයි 
වතා :-  ඔයා බය වෙන්නෙපා මෙයා . මම ඉන්නවනේ . මම යකාව අඹරලා චප්ප කරලා දානවා 
වතී :- මම දන්නවා මගේ සිංදුවා හපනා කියලා






ඔන්න ඔහොමයි වැඩේ . අර අහිංසක අම්මට ඉටිපන්දම් ගේන්නේ නැතිව මුන් දෙන්නා මෙතන sms කර කර ගොනිබිල්ලෝ සෙල්ලම් කරනවා . ඉතින් අවසානයේ ගෙදරට ඉටිපන්දම් ගෙන්න ඉදිරිපත් වෙන්නේ අහිංසක මලක් වගේ ඉන්න වතී අක්කගේ අයියා . අයියා ඔන්න ගෙවල් කිට්ටුව තියෙන කඩේට යනවා ඉටිපන්දම් ගෙන්න . කඩේට ගිය වෙලාවේ තමයි ගින්න පත්තු වෙන්නේ . ඒ වෙලාවේ කඩේට ඇවිත් ඉන්නවා ඕපාදූප හොයන අම්මණ්ඩි කෙනෙක් . ඒ අම්මණ්ඩි වතී අක්කා සිංදුවා එක්ක බස් එකේ ඩබල් සීට් එකේ ඩබල් දාලා යනවා දැක්කා කියලා වතී අක්කගේ අයියගෙන් කනේ තියනවා . 

අම්මණ්ඩි :- පුතේ දැන් කවදද නංගිගේ කසාදෙ ගන්න ඉන්නේ ?

අයියා :- මොන කසාදද නැන්දේ ? තාම මේ ඉස්කෝලේ ගිහිල්ලා ඉවරවෙලාවත් නෑ . 

අම්මණ්ඩි :- ආආ ඒකත් එහෙමද ? . මම හිතුවා අර බස් එකේ යනවා දැක්ක ඉලන්දාරියා දුව බඳින්න ඉන්න     හාදයා වෙන්නැති කියලා .

අයියා :- මොකක් නැන්දේ ? ආයේ කියපන් බලන්න .

අම්මණ්ඩි :- නෑ මම මේ කිව්වේ පුතේ මෙහාට වරෙන්කො පොඩ්ඩක් කියන්න . ඔය වයසට ඔහොම තමයි . මම කිව්වා කියලා කියන්න ඕන නෑ . මම දැක්කා මේ දැරිවි පිරිමි ළමයෙක් එක්ක බස් එකේ කතා කර කර යනවා . 

අයියා :- ආ මේ ඉස්කෝලේ යාලුවෙක් වෙන්නැති . 

අම්මණ්ඩි :- වෙන්න බෑ ළමයෝ . ඉස්කෝලේ යාලුවෙක් උනත් දෙන්නගේ කතාවෙන් පෙනුනේ යාළුකමට එහා ගිය මොකක්හරි දෙන්නා අතරේ තියෙනවා කියල තමයි . 

අයියා :- හ්ම්ම්ම් . මම ඕකිගෙන් අහන්නම්කො . මේ කතාව බොරු උනොත් මම උඹව කළු ගඟට දානවා කිඹුලොත් එක්ක දියබුං ගහන්න .

අම්මණ්ඩි :- ආයේ ඉතින් මක්කය ? අර එදා කුළු හරකා එළවලා ගම බේරාගත්තා කොලුවා එක්ක තමයි කෙල්ල හිටියේ . ඔන්න මම කිව්වය කියන්න එහෙම එපා . කෙල්ල මාත් එක්ක වයිර බඳියි . ඇස්වහක් කටවහක් නෑ පුතේ හරිම සීදේවි ජෝඩුව හැබැයි .

අයියා :- සීදේවි ? මම ඕකිව විහාරමහාදේවී කරනවා මේ කතාව ඇත්ත නම් .







අයියා මේ කතාවත් එක්ක කඩෙන් පිටවෙලා ගෙදර එන්න එනවා . අයියා කල්පනා කරනවා එදා වෙච්ච ඒවා . සිංදුවා කුළු හරකා දමනය කරපු වෙලාවේ වතීගේ මුනේ තිබ්බ එලිය , සී ඇප් ඇල් බල්බවල එලිය පරාදයි . කාලෙක ඉඳලා දෙන්නා අතර මොකක් නමුත් ඇයිහොඳයියක් තියෙන්න ඇති කියලා වතීගේ අයියා කල්පනා කරනවා . පස්සේ අයියා ගෙදර එනවා පවනට බඳු වේගයට වඩා පොඩ්ඩක් අඩු වේගයෙන් . ඇවිත් ඉටිපන්දම් ටික අම්මට දීලා කියනවා නංගිට කාමරෙන් එලියට එන්න කියන්න මට එයත් එක්ක කතාවක් තියෙනවා කියලා . 

අම්මා ඉටිපන්දමක් පත්තු කරගෙනම වතී අක්කගේ කාමරේ ගාවට ගිහින් කියනවා අමල්බිසෝ දොර ඇරපන් , ඈ නෑ නෑ දුවේ දොර අරින්න කියල . ඒත් සද්දයක් නෑ . පස්සේ ආයෙත් කෑගැහුවා දොර අරින්න කියලා . ඒත් සද්දයක් නෑ . ආයෙත් කෑගැහුවම ඔන්න වතී අක්කා එපාවෙච්ච මූඩ් එකෙන් කෑගහන්න ගත්තා ඇයි අම්මේ මම මේ පාඩම් කරනවා කියලා . අම්මා හිතාගෙන ඉන්නේ පාඩම් කරනවා කියලා ඇත්තටම . අපිනේ දන්නේ සිංදුවා මෙතන යක්කු භූතයෝ ගැන උගන්නනවා කියලා . ඉතින් අම්මා අයියට ඇවිත් කියනවා නංගි පාඩම් කරනවා කියලා . පස්සේ අයියම ගේමට බහිනවා .

අයියා :- තෝ හොඳ හිතින් කාමරේ දොර ඇරපන් . මට උඹත් එක්ක වැදගත් කතාවක් තියෙනවා .
වතී :- දැන් වැදගත් කතා කතාකරන්න වෙලාව නෙවෙයි , ලයිට් ආවම කතා කරමු 
අයියා :- ඇයි උඹට ලයිට් එන්න ඕනද කතා කරන්න , ඇරපිය මේ දොර 
වතී :- මට බෑ 
අයියා :- හිටපන් මම උඹව එලියට ගන්න 

කියල අයියා පවනට බඳු වේගයට වඩා පොඩ්ඩක් වැඩි වේගයෙන් අහසට පැන නැගිලා කැරකිලා කැරකිලා ගෙදර තිබ්බ මෝල්ගහ අරගෙන ඇවිත් වතී අක්කගේ කාමරේ දොරට දුන්නේ එකයි . ටින් ගාලා දොර ඇරුනා . වතී අක්කා වහාම ක්‍රියාත්මක වන පරිදි ඇඳෙන් බැහැලා ස්ටාන්ස් තියලා අයියත් එක්ක ගේමට හිටගත්තා .






අයියා :- කියපන් කවුද උඹ එක්ක බස්වල යනවා කියන කුමාරයා 
වතී :- මම දන්නේ නෑ 
අයියා :- එතකොට මමද දන්නේ 

කියලා අයියා වතී අක්කට දුන්නා පාරක් දිෂුන් දිෂුන් කසු කුසුමසායි සෙයි සෙයි ......... 

වතී :- බුදු අම්මො...... මෙන්න මරනෝ......... අම්මේ මාව බෙරගන්නෝ........................
අයියා :- දීපන් උඹේ ෆෝන් එක . ආයේ උඹට ෆෝන් නැහැ 
වතී :- බෑ දෙන්නේ නෑ . ඒක මගේ 
අයියා :- දීපන් 
වතී :- බෑ 

මම බෑ බලාගන්නම් කියලා ආයෙත් පාරක් දුන්නා 

දිෂුන් දිෂුන් කසුකුසුමසායි සෙයි සෙයි .........

අයියා කාමරේ පෙරලලා හොයලා ඔන්න ෆෝන් එක හොයාගත්තා . උඹ ආයේ ගෙදරින් එලියට බැහැලා ඉවරයි . ඉස්කෝලේ යන්නේ අම්මා එක්ක . එන්නෙත් අම්ම එක්ක . එහෙම කියලා අයියා ෆෝන් එකේ මැසේජ් බලන්න ගත්තා . 

අයියා :- පැටියෝ , සුදු , රත්තරන් . අම්මේ මේ අහුවෙන්නේ මේකිගේ හොර . කවුද බං ඔය රත්තරන් . අරන් වරෙන්කො ගෙදර , මාල වළලු හදලා විකුණන්න . 
වතී :- ඉහි ඉහි ඉහීඊඊඊඊඊඊඊඊඊඊඊඊඊඊඊඊඊ..................... ඊඊඊඊඊඊඊඊඊඊඊඊඊඊඊ...................................
අයියා :- කවුද කියපන් මේ . නැත්නම් උඹව මම හමගහනවා මෙතනම 
වතී :- ඉහි ඉහි ඉහීඊඊඊඊඊඊඊඊඊඊඊඊ. ඊඊඊඊඊඊඊඊඊඊඊඊඊඉ.....................................
අයියා :- කියනවා !
වතී :- ස්ස්ස්ස්ස්ස්ස්ස්ස්ස්ස් 
අයියා :- ඇයි උඹේ කටෙන් හුලන් යනවද ? කියපිය 
වතී :- ස්ස්ස්ස්ස්ස් සිං සිං 
අයියා :- සිං සිං ඤෝරුද ?
වතී :- සිංදුවා 
අයියා :- ආආආ හරි එහෙනම් . කතාව හරි . අද ඉඳලා උඹ ඉස්කෝලේ විතරයි යන්නේ . මමයි අම්මයි එනවා ඉස්කෝලේ මිස්ලා හම්බෙලා මේ ගැන කතා කරන්න . ඒ ඇර උඹ ගෙදරින් එලියට බහින්නේ නෑ . 
වතී :- ඉහි ඉහි හිහිහිහිහිහිහීඊඊඊඊඊඊඊඊඊඊඊ.......................... මට ක්ලාස් යන්න ඔනී...............
අයියා :- නෑ නෑ ඒවා ඕන නෑ .







ඔන්න ඔහොම ඉතින් වතී ගෙදර හිර කාරියක් උනා . දෛවයේ සරදමක් වගේ ලයිට් ආවා . වතී කාමරේ තියෙන එයාගේ පොඩි රේඩියෝ එක ඕන් කළා . එතකොට ප්ලේ උනේ මෙන්න මේ ගීතය . ඉහි ඉහි ඉහීඊඊඊඊඊඊඊඊ.................... මටත් ඇඩෙනවා අෆ්ෆා.......

පෙම් කල වරදට මට වද දෙන්නේ
පෙම් කල හිතකින් නොවන නිසා
අයියණ්ඩියෙ මට සමාව දෙනු මැන
ආදරයේ සුව දැනුනු දිනේ

යන එන හමු වන මග අවුරාලා
ආදරයක් වැලකිය හැකිදෝ
නොපෙනෙද ඔහුගේ දෙපතුල මා හිත
සැනහෙනු මේ රැකවල් බිඳ දා

චිත්‍රාවක් වන්නේ නෑ මා නම්
අයියණ්ඩියෙ ඔබෙ අණට හොරා
ආදරයේ දුක ඔබට දැනේවී
පෙම්වතියක මුණ ගැහුණු දිනේ

පදරචනය :- දායා ද අල්විස්
තනුව :- චන්ද්‍රදාස බෝගොඩ
ගායනය - ඉන්ද්‍රාණි බෝගොඩ





නව සංස්කරණය




මුල් සංස්කරණය


ගීතයේ මම අලුත් සංස්කරණයයි පැරණි සංස්කරණයයි දෙකම මෙතන අමුණලා තියෙනවා ඔයාලට අහලා බලන්න . මොකද දැන් අලුත් සංස්කරනයවත් වැඩිය ඇහෙන්නේ නෑ . බලෙන් හොයාගෙන ඇහුවොත් තමයි ඇහෙන්නේ . ඒ නිසා මේ වගේ තවත් බ්ලොග් ලියන අයට මම කියන්න කැමතියි මේ වගේ ගීතවල පැරණි සංස්කරණත් කරළියට ඇදලා ගන්න කියලා . 





ගීතය ලිව්වේ තනුව දැම්මේ කවුද කියලා හොයලා බලනකොට තමයි දැනගත්තේ මේක බොහොම දුර්ලභ ගණයේ ගීතයක් කියලා . එහෙම වෙන්නේ චන්ද්‍රදාස බෝගොඩ , ඒ කියන්නේ බෝගොඩ පවුලේ වැඩිමල් පුරුක විසින් නිර්මාණය කරපු ගීත කීපයෙන් එකක් විදියට මේ ගීත හඳුන්වන්න පුළුවන් නිසා . සංගීතය මනාව හදාරපු සංගීත පවුලක වැඩිමල් පුරුක උනාට එතුමාගේ නම නම් දැන් වැඩිය ඇහෙන්නේ නෑ . අපේ අම්මා නම් කිව්වේ ඉස්සර රේඩියෝ එකේනම් මේ නම ඉඳලා හිටලා ඇහෙනවා කියලා .

දවසක් මම ගියපු ගායනා තරඟයකදී බෝගොඩ කෙනෙක් තබ්ලා වාදනය කරන්න ඇවිත් ඉඳලා වචන කීපයක් කතා කරන්න ලැබුණ . ඒ මෙතුමාද මෙතුමාගේ මල්ලිද කියලා හිතාගන්න අමාරුයි . කෙසේ වෙතත් මේවගේ ප්‍රවීනයන්ගේ ආශ්‍රයෙන් දැන් ඉන්න ආධුනිකයින් ඈත් වීම එච්චර හොඳ දෙයක් නෙවෙයි කියලා තමයි මගේ අදහස . සිංදුවා නැවු ටෝකක් දුන්නා දවසක් මට ප්‍රවීණයෝ එක්ක ඉන්නකොට මට මොකක්ද හිතෙන්නේ කියලා අහලා . මම කිව්වා ඉරිසියාව . පැහැදිලි ඉරිසියාව . එහෙම කියලා සිංදුවා අවුස්සලා සිංදුවගේ අදහස් මම අහගත්තා . මේ ඒ අදහස් තමා . මටත් වයලීන් ගහන්න වැඩි හරියක් ගුරුහරුකම් ලැබුණේ ප්‍රසංග වලට ගිහින් ඒවායේදී හම්බෙන ප්‍රවීණයින්ගෙන් ලැබෙන පොඩි පොඩි ට්‍රික්ස් වලින් . වයලීනය ගැන මූලික දැනුම දුන්නට මගේ ගුරුවරු දෙපල මට මේ අවස්ථාවල් ලබාදෙන්න බලෙන්ම වගේ මාව මේ දේවල් වලට එක්ක ගියේ ඒ නිසා වෙන්න ඕන . කතාව ගීතයෙන් පිට පැන්නා වගේ .





දායා ද අල්විස් මහත්මිය . ගීත රචනා වැඩි ප්‍රමාණයක් නොකලත් එතුමිය කරපු ගීත රචනා සියල්ලම වගේ ඉතාම අරුත්බර ජනප්‍රිය ගීත . එතුමිය මේ ගීතය රචනා කරන්නේ එතුමියට දැනගන්න ලැබුණු සිද්දියක් මුල් කරගෙන . නිවෙස්වල අඩදබර මධ්‍යයේ ආදරය කරපු දෙන්නෙක්ගෙන් පෙම්වතිය එයාගේ සහෝදරයින්ට වචනයෙන් කියන්න බැරි දේ ගීතයෙන් කිව්වා කියන අදහසක් තමයි මේ ගීතයෙන් දායාද අල්විස් මහත්මිය උක්ත කරන්න බලාපොරොත්තු වෙලා තියෙන්නේ . හැබැයි මේ සිද්දිය ඇත්ත සිද්දියක් කියලා එතුමිය අවධාරණයෙන් කියා හිටිනවා . එහෙනම් අපි මේ ගීතය ගැන පොඩ්ඩක් කරුණු ගලපලා බලමු .





පෙම් කල වරදට මට වද දෙන්නේ
පෙම් කල හිතකින් නොවන නිසා
අයියණ්ඩියෙ මට සමාව දෙනු මැන
ආදරයේ සුව දැනුනු දිනේ

ගීතයේ කියවෙන හැටියට මධ්‍යම පාංතික පවුලක් . ගමක ජීවත් වෙන පවුලක් . එහෙම කියන්නේ ඒ හැගීම ඇතිවෙන්නේ මේ ගීතයේ සංගීතයෙන් සහ ගායිකාවගේ කටහඬ මගින් නිසා . ඉතින් මේ පවුලේ ඉන්නේ අයියයි නංගියි . කාලයත් එක්ක තාත්තා නැති හෝ අබල දුබල වෙච්ච තාත්තා කෙනෙක් ඉන්න පවුලේ වගකීම් හිසමත වැටෙන්නේ අයියගේ ඔලුවට . ඉතින් මේ නිසා හැමදේම ගැන හොයලා බලන්නේ අයියා . නංගි මේ වෙනකොට වැඩිවියට පත්වෙලා කාලයක් ගිහින් . සමාජයේ යම් තරමකට නිදහසක් ලැබුණ කෙනෙක් . මේ නංගි ටිකක් කලින්ම වගේ ප්‍රේම සම්බන්ධයකට යොමුවෙනවා . සමහරවිට ගෙදර ප්‍රශ්න ඉගෙනගන්න පීඩනය අරවා මේවා එක්ක ඒ කාලෙට හැදෙන ආදර ලෙඩත් එක්කම ඔක්කොම කලවම් වෙලා මේ නංගි ප්‍රේමවන්තයෙක් එක්ක ප්‍රේම සම්බන්ධයක් පටන්ගන්න ඇති .

මේ සම්බන්ධය පටන්ගත්තට පස්සේ ඉඳලා මේ නංගි ගතින් නැතත් හිතෙන ජීවත් වෙන්නේ මේ ප්‍රේමවන්තයා එක්ක . ඒ නිසා නංගිට මේ ප්‍රේමවන්තයා මොනම විදියකින්වත් නැති කරගන්න බෑ . ඉතින් කාලයක් යනකොට නංගි තවත් වයසින් මුහුකුරා යනකොට දෙන්නගේ ප්‍රේමය ශක්තිමත් වෙලා ටිකක් නිදහස අයුතු විදියට ප්‍රයෝජනයට අරගෙන ගෙදරට ලව මාට්ටු කරගන්නවා .

දැන් මාට්ටු උනාට පස්සේ මේ වෙනුවෙන් කතා කරන්නේ ගෙදර ඉන්න අයියා . ඉතින් අයියා නංගිගෙන් ප්‍රශ්න කරලා කොල්ලා ගැන හොයලා බලනකල්වත් කියලා නංගිව ගෙදර හිර කරනවා . නංගිට මේක දැනෙන්නේ උන්මාද චිත්‍රා එක්ටැම්ගෙයක හිරකරා වගේ තමන්වත් එක්ටැම් ගෙයක හිර කරලා තියෙනවා කියන ගානට . ඒවගේම තමන්ගේ ප්‍රේමවන්තයා හම්බෙන්න බැරි නිසා දරාගන්න බැරි දුකකුත් දැනෙනවා . සමහරවිට මේ අයියට කලින් හෝ දැන් පෙම්වතියක් ඉන්න ඇති . නැත්නම් නැතිව ඇති . ඒ කෙසේ වෙතත් මෙතනදී නංගි කියන්නේ අයියා ප්‍රේම කරන්න දන්නේ නෑ , ප්‍රේම කරපු හිතකින් හිතන්නේ නැති නිසා තමයි මට මෙහෙම ලොකු වරදක් කරලා නැති උනත් වද දෙන්නේ කියලා . පස්සේ කියනවා අයිය , මම වැරද්දක් කරා කියලා හිතාගෙන උන්නත් , අයියත් ප්‍රේම කරපු කලෙක ආදරයේ සුවය දැනුන වෙලාවක , මට සමාව දේවි කියලා .





යන එන හමු වන මග අවුරාලා
ආදරයක් වැලකිය හැකිදෝ
නොපෙනෙද ඔහුගේ දෙපතුල මා හිත
සැනහෙනු මේ රැකවල් බිඳ දා

ගීතයේ හොඳම කොටස විදියට මම දකින්නේ මෙතන . අයියගේ හිතට වදින්න හිතට දැනෙන්න කියන්නේ මෙතැනදී . නංගි කියනවා දැන් මට ගෙදරින් එලියට බහින්න දුන්නේ නෑ කියලා මගේ හිතට තහංචි දාන්න ඔයාලට පුළුවන්ද කියලා . ආදරවන්තයින්ට ලැබෙන ප්රෝබේෂනරි පීරියඩ් දෙකක් මම දකිනවා . ඒ තමයි කෙල්ලගෙන් කැමැත්ත ලැබෙනකල් තියෙන කාලය . අනික ගෙවල් වලින් කැමැත්ත ලැබෙනකල් තියෙන කාලය . මේ කාලය තුල පෆෝමන්ස් හොඳයි නම් කොල්ලා ගොඩ . නැත්නම් පසුව දනුන්ම් දෙන්නම් කියලා අහගෙන අනික් පැත්ත හැරිලා යන්න වෙනවා .

මෙතනත් වෙන්නේ එහෙම දෙයක් . කෙල්ලත් යහපත් කල්කිරියාවෙන් ඉන්නවා . කොල්ලත් ශේප් මූඩ් . ඉතින් දැන් පෙම්වතිය කියනවා යන එන මග අවුරලා තිබ්බට අපේ හිත්වල තියෙන ප්‍රේමය මකන්න පුළුවන්ද කියලා .

මේ දඬුවම නිසා පෙම්වතිය කෑම නොකා දුකෙන් කාලය ගෙවනවා වෙන්න ඇති . ඒ ඔක්කොම කරන්නේ තමන්ගේ පෙම්වතාව තමන්ගේ කරගන්න තියෙන උවමනාවට . ඒ නිසා පෙම්වතිය අහනවා අයියගෙන් පේන්නේ නැද්ද මේ දාලා තියෙන රැකවල් ඔක්කොම බිඳ දාගෙන ගිහින් මගේ හදවත පෙම්වතාගේ දෙපතුල ගාව සැනසෙනවා කියලා . මෙතනදී පෙම්වතිය උත්සාහ කරන්නේ අයියගේ දරදඬු හදවත තෙත් කරලා තමන්ගේ අදහස මුදුන්පත් කරගන්න කියලා ඕන කෙනෙක්ට තේරෙනවා . ඒත් අරමුණ පිරිසිදුනම් ඉතින් වරද්දකුත් නැහැනේ නේද ?





චිත්‍රාවක් වන්නේ නෑ මා නම්
අයියණ්ඩියෙ ඔබෙ අණට හොරා
ආදරයේ දුක ඔබට දැනේවී
පෙම්වතියක මුණ ගැහුණු දිනේ

දැන් පෙම්වතිය අයියව ඉමෝෂනල් කරලා පස්සේ කියනවා තමන් වැරද්දක් කරන්නේ නෑ කියලා . ඒ කියන්නේ නොමග යන්නේ නෑ කියලා . චිත්‍රා , ඒ කියන්නේ උන්මාද චිත්‍රා ලෝක ඉතිහාසයේ නොමැකෙන ප්‍රේම ජවනිකාව වෙන රෝමියෝ ජුලියට් වගේ ලංකාවේ ඉතිහාසගත ප්‍රේම වෘතාන්තයේ ප්‍රේමවන්තිය . එතනදී උනේ චිත්‍රා වැරදි පාරෙන් ප්‍රේමය ජයගත්ත එක .

මේ ගීතයේ කතා නායිකාව දැන් කියනවා මමත් එහෙම චිත්‍රාවක් වෙයි කියලා හිතලා තමයි මෙහෙම හිර කරලා තියෙන්නේ . එත් මම අයියගේ අණට හොරෙන් පැනලා යන්නේවත් වරදෙහි ඇලෙන්නේවත් නෑ . ඒ නිසා මට නිදහස ලබා දෙන්න කියලා .

අවසානයේ එයා හිතනවා ආදරයේ දුක ඔබට දැනේවී පෙම්වතියක මුණ ගැහුනා දිනේ කියලා . ඒ කියන්නේ ආදරයේ තියෙන වේදනාව , සහ ආදරය නැති වීමේ වේදනාව අත්දැකීමෙන් ඉගෙනගන්නවා මිස වචනවලින් කියන්න බෑ කියලා . ඇලපාත මුදලිතුමාත් එක තැනක කියලා තියෙනවා ආදරයේ තියෙන එකම සතුට තමයි දුක කියලා . ලූෂන් බුලත්සිංහල මහතා එක තැනක කියනවා සැබෑ පෙම්වතුන් කිසිදා එක් නොවේ කියලා . මාත් දැකලා තියෙන්නේ ප්‍රේමයේ තීව්‍රබව වෙන් වෙන්න වෙන් වෙන්න වැඩි වෙනවා කියලා .

මේ ගීතයේ සංගීතය පැරණි සංස්කරණයට වඩා අපේ හිත වලට දැනෙන්නේ නව සංස්කරණයේ සංගීතය . ඒ නිසා මම නව සංස්කරණයේ සංගීතය ගැන මෙතන කියන්නම් .





ගීතයේ තේමා වාදනය ආරම්භ වෙන්නේ වයලීන් සහ ඕගන් එකකින් කරන වාදනයක් එක්ක . මේ ගීතයේ තියෙන්නේ ප්‍රේමය අහිමිවේය කියන බයක් සහ දුකක් නිසා මේ වයලීන් හා ඕගන් එකෙන් කරන වාදයනයෙන් කරන්නේ බය ගතිය ඇතිකරන එක . ඊට පස්සේ බටනලාවක් වාදනය කරනවා .






දුක ඇති කරන්නේ මේ බටනලාවෙන් . ඊට පස්සේ සිතාරයක් එක්ක ගිටාරයක් වාදනය කරනවා . සිතාරය සහ ගිටාරය සුසංයෝගය හරිම වැදගත් දෙයක් . සිතාරය වාදනයෙන් ඕනෑම බටහිර වාදනයක බටහිර බව නැති කරන්න පුළුවන් . ඒත් මේ ගීතයේ ඒ අසමතුලිත් බව නැතිකරන්න සිතාරය සහ ගිටාරය එකටම වාදනය කරනවා .





ඒ නිසා වෙලා තියෙන්නේ ගීතයට අලුත් පාටක් ලැබිලා තියෙන එක . ඒ අවිනිශ්චිතබව කියන හැගීම වෙන්න ඕන . ගීතයේ තෙමාවාදනයේ තාල වාදයන කරන්නේ හයිහැට් ඔක්ටර්පෑඩ් වලින් . රිදම් ගිටාර් වාදනයක් එක්ක ගීතයේ කෝඩ්ස් වාදනය කිරීම සම්පූර්ණ වෙනවා .







ඔන්න දැන් ගීතයේ ආරම්භයට එනවා . ගීතයේ ආරම්භයේදී තබ්ලාවෙන් තාලය කඩලා තාල වාදනය ආරම්භ කරනවා . ඒ විරාමයේදී ඉන්ද්‍රානි මහත්මියගේ කටහඬ අවදි කරනවා පෙම්කල වරදට කියන පද දෙකෙන් . ස්ථායි කොටසේ කවුන්ටර් පාට් වාදනය කරන්නේ වයලීන් සහ ඕගන් එකෙන් . බිට්ස් පාට වාදනය කරන්නේ ලීඩ් ගිටාර් එකකින් . ගීතයේ තාලය දිගටම වාදනය කරන්නේ මේවෙනකල් තබ්ලාවෙන් . තබ්ලාවට සහය වෙන විදියට තමයි හයිහැට් සහ ඔක්ටර්පෑඩ් එක වාදනය කරන්නේ .







දැන් ගීතයේ අතුරු වාදනය . වාදනය ආරම්භයේම තබ්ලාව නැවතිලා ආයෙත් පෙර වාදනය වගේ තාල වාදනය භාරගන්නේ හයිහැට් ඔක්ටර්පෑඩ් දෙන්නා . අතුරු වාදනයේ ආරම්භය වයලීන් සහ ඕගන් මිශ්‍රණයක් . ඊට පස්සේ වාදනය කරන්නේ ඔබෝ හඬක් ඕගන් එකකින් . ඒ වාදනය මුල් ගීතයේ නම් සාර්ථකයි . නව සංස්කරණයෙනම් මට පේන්නේ ඒ හඬ හරිම අසාර්ථකයි . අන්තිමට සිතාර් ගිටාර් සුසංයෝගයෙන් වාදනයවෙන කොටසෙන් පස්සේ ආයෙත් තබ්ලාව උඩට ඇවිත් අනිත් දෙන්නා සහය වාදනය බවට පත්වෙනවා .

ගීතයේ අන්තරා කොටසේ සංගීත කොටස් වලින් දැන් එයි දැන් එයි කියලා මම බලාගෙන ඉන්න පාට් එකක් තමයි දෙවෙනි පාරට ආදරයක් වැළකිය හැකිදෝ කිව්ව ගමන් තියෙන ලීඩ් ගිටාර් බිට් පාට් එක . වීණාවෙන් ඇතිවෙන්නෙත් අන්න ඒ වගේ හඬක් . වාදකයාගේ දක්ෂතාවය තමයි මෙතනදී වැඩිපුරම ඉස්මතු වෙන්නේ . ගිටාර් එකකින් ඒ ස්වර වර්ණ ඉස්මතු කරගන්න එක වාදකයාගේ දක්ෂතාවය . හින්දුස්ථානි සංගීතයේ තියෙන " ගමක් " ශෛලිය තමයි මේ වාදන කාණ්ඩයේ තියෙන්නේ . මේ පාට් එකම ආයෙත් වාදනය වෙනවා අයියණ්ඩියෙ ඔබේ අණට හොරා කියන පදය දෙවෙනි වතාවට ගායනා කරනකොට .

ගීතයේ අන්තරා කොටස්වල මුල පේලි දෙක දෙපාරක් කියනවා . එයින් පලවෙනි වතාවේ ගයනාව හුදෙකලා ගායනයක් . දෙවෙනි වතාවේ බටනලාවෙන් කවුන්ටර් පාට් එකක් වාදනය වෙනවා ගීතයත් එක්කම . අන්තරා කොටසේ ශෝකාකූල බව සහ ආයාචනාත්මක බව මේ කවුන්ටර් පාට් එකෙන් වැඩි කරලා ඉස්මතු කරලා තියෙනවා .

මේ ගීතයත් එක්කම කියන්න දෙයක් මට මතක් වුණා . ඒ තමයි වයලීන් සහ ඕගන් කියන දෙන්නා එකම වාදනය එකට වාදනය කිරීම . වයලීනය ඕගන් එකට වඩා අවදානම් . ඒ මොකද වයලීනයේ ස්වර ලකුණු කරලා නැති නිසා . ඕගන් එකේ ස්වර නිශ්චිතයි . ඒ නිසා මේ දෙන්නා එකට යුගල කරනකොට හරිම පරිස්සම් වෙන්න ඕන . වයලීන් වාදකයා  , අපි කියන්නේ පර්ෆෙක්ට් කෙනෙක් වෙන්න ඕන කියලා . එහෙම කෙනෙක් නම් විතරයි මේ යුගල කිරීම කරන්න ඕන . නැත්නම් ඕගන් එකේ සද්දේ ඉතාම අඩු කරලා තමයි මේ දෙන්නා එකට වාදනය කරනකොට කරන්නේ . නැත්නම් දෙන්නගේ සද්දේ වෙන වෙනම ඇහෙන්න පුළුවන් . ඒක හරිම අප්සැට් වෙනවා ගීතයට .

ඔච්චර තමා කියන්න තියෙන්නේ . සිංදුවා දැන් මට මඩ ගහන්න බලාගෙන ඉන්නේ . ඊට කලින් මම උන්දැව කාලා වනසලා ඉවරකරන්නයි මේ හදන්නේ . ඊළඟ මඩ පෝස්ට් එකත් ළඟදීම එනවා .






ඔබ සැමට සමන් දෙවිඳුගේ පිහිට ලැබේවා !

Thursday, July 2, 2015

චන්ද්‍ර මණ්ඩලේ සැතපුන පුංචි සාවියේ ( පැනලා යන්න ඉන්න අයට )









මේ මාතෘකාවත් එක්ක දිග ගමනක් යන්න කියලා හිතාගෙන තමයි මේ ලියන්න පටන් ගන්නෙ  . ඒ නිසා ලියන්න කලින්ම මම හිතනවා ටිකක් දිග වැඩි ලිපියක් වෙයි කියලා මේකත් . එහෙනම් ඔන්න පටන් ගත්තා .

පුංචි අම්මා දැන් පැන්සොන් කියලා ඔයාලා දන්නවා ඇතිනේ . හැබැයි ගුරු භූමිකාවට තිත තියයි කියල හිතුවට මොන තිත්ද , ඔන්න දැන් ටියුසොන් එක බැහැලාම කරන්න තමා පිඹුරුපත් හද හද ඉන්නේ . පුංචිගේ ටියුෂන් එක ගැනත් යමක් කියන්න ඕන . මට හයක් හතරක් නොතේරෙන පොඩීඊඊඊඊඊඊඊඊඊඊඊඊඊඊ කාලේ පවා අපේ පුංචි ටියුෂන් එක කළා .


ගෙදර කරපු ඒ ටියුෂන් ජීවිතයටත් දැන් අවුරුදු 25ක් විතර වෙනවා මම හිතන්නේ . ඒ කාලේ අපේ ගෙදර ඉස්සරහා තියෙන කාමරේට කියන්නේ පංති කාමරේ කියලා . ඒකෙ ලොකු බෝඩ් එකක් බිත්තියේ එල්ලලා ඩෙස් බංකු දාලා තමයි ක්ලාස් එක කරගෙන ගියේ . ඒ ක්ලාස් එකට ආව ළමයින්ගේ ළමයිනුත් අද වෙනකොට පුංචිගේ ක්ලාස් එකට එනවා . ඒ අයියලා අක්කලා ආවම සමහර වෙලාවට අතීතය මතක් කරනවා . ඉස්සර මල්ලිලාගේ ආච්චි අම්මා තමයි අපිට චක්කරේ වැරදුනාම මතක් කරන්නේ කියලා එයාලා වැඩි හරියක් කියලා තියෙනවා . 

පුංචිගේ පංති කෙරුවාවේ එදා ඉඳලා නොකඩවා කරගෙන එන දේවල් කීපයක් තියෙනවා . පන්තියට ආව ළමයා පන්තියෙන් පිටත් වෙනකොට පංති පොතේ අන්තිම පිටුවේ දිනය සහ වෙලාව දාලා පුංචි අත්සන් කරනවා . පස්සේ ළමයා ගෙදර ගියාම ගෙදර ගිය වෙලාව කීයද කියලා ලියලා ගෙදර කෙනෙකුත් අත්සනක් දාන්න ඕන . ළමයි ක්ලාස් ඇරිලා ගෙදර යනවද වෙන කොහේවත් යනවද නැද්ද කියලා දැනගන්න පුංචියි ඒ ළමයින්ගේ ගෙවල් වල අයයි අතරේ තිබ්බ ඔත්තු සේවාව උනේ මේ අත්සන් කෙරුවාව . බැරිවෙලාවත් ඔන්න වෙලාව එහා මෙහා වෙලානම් ඉතින් නඩු හැටයි . හැබැයි ක්ලාස් එකේ ඒ කාලේ ළමයි ගොඩක් හිටියා . මේ ක්ලාස් එකේ අනිත් සම්ප්‍රදාය තමයි හැම කෙනාම ක්ලාස් එක ඇරිලා යන්න කලින් පුංචිට චක්කරේ පාඩම් දීලා යන්න ඕන . 

අද දෙවරක් නම් ලබන සතියෙත් ඉතින් ඒත් දෙවරක්ම තමා . දෙවරක් හොඳට පුලුවන් උනාම තුන් වරක් . ඔහොම ඔහොම ඔක්කොම වරක් ටික ඉවර උනාම චක්කරේ අග ඉඳලා මුලට කියන්න ඕන . ඒ කියන්නේ දෙවරක් දහතුන විසි හයයි , දෙවරක් දොළහ විසිහතරයි , දෙවරක් එකොළහ විසි දෙකයි කියලා . ඉතින් මෙහෙම චක්කරේ දෙන්න බැරි උනාම අල්ලට වේවැලෙන් දෙකක් හම්බෙනවා . නැත්නම් ඊළඟ දවසේ අම්මා එක්ක එන්න කියනවා . ඔන්න ඔහොමයි ක්ලාස් එක . ඒ ක්ලාස් එකේ හැමෝම වගේ ගණන් ගොඩදාගත්තා . චක්කරේ වරදින වෙලාවට අපේ ආච්චි අම්මා තමයි වැරදි හදන්නේ . දෙවරක් දෙක හය නෙවෙයි හතරයි කියලා ආච්චි අම්මා වැරදි හදනවා . 

මේ ක්ලාස් එකට වැඩි හරියක් ආවේ දුප්පත් අම්මලා තාත්තලාගේ ළමයි . ඒ නිසා සල්ලි නම් ලැබුණේ හරිම අඩුවෙන් . මට මතක කාලේ පුංචි ගත්ත මුල්ම පංති ගාස්තු මුදල රුපියල් සීයක් පමණි . ඒකත් ලැබුණේ නෑ . පුංචි ඉල්ලුවෙත් නෑ . දුන්නත් එකයි නැතත් එකයි , හැමෝටම එක වගේ ඉගැන්නුවා . පස්සේ පස්සේ ක්ලාස් එකට එන ළමයි අඩුවෙලා ගිහින් එහෙමම ගෙදර ක්ලාස් කරන එක නැවතුනා . ඊට පස්සේ තමයි ඉස්කෝලේ හවස පංති දැම්මේ . ඒවා නම් නොමිලේම තමා කලේ . ඊටත් පස්සේ ඔන්න ටවුන් එකේ පොට් එකක් අල්ලගෙන පොඩියට ක්ලාස් කරන්න පටන් ගත්තා . තාමත් ඉතින් ඒ ක්ලාස් එක පොඩියි . 

එයාට ළමයින්ගෙන් සල්ලි ඉල්ලන්න හිතෙන්නේ නෑලු . මම ඔන්න ඔය වෙලාවට තමා මගෙ ශ්‍රී මුඛයේ ස්වර වර්ණ ඉදිරිපත් කරන්නේ . මම කියන්නෙම ඔයාට බැරිනම් උන්ට කියන්න මට සල්ලි දෙන්න කියලා . හැබැයි ඔයාට දෙන්නේ 25% පමණයි කියලා . පුංචි ඒ ක්ලාස් එකත් පරණ සම්ප්‍රදායටම කරගෙන ගියා . රිසල්ට් හොඳයි . ඕලෙවල් පාස් නැති ළමයි පවා රිවිෂන් දාගෙන ඒ ක්ලාස් එකෙන් ගොඩ ගියා . ඒ නිසා එයාගේ ඉගැන්නිල්ල නරකම නෑ . පොඩි අවුලකට තියෙන්නේ ළමයින්ගේ ලවු හුටපට ගැන තාමත් හොයන එක . මම ඒකටත් එයාට හොඳ උපදෙස් දෙනවා . මම මේ ලිපිය ලියන්න ගන්න පැය දෙකකට විතර කලිනුත් පුංචිට අවධාරණය කලේ , මාගේ දෑස දෙස බලනූ................ ඔයා දැන් ටීචර් කෙනෙක් නෙවෙයි ටියුෂන් මාස්ටර් වරියක් . ඒ නිසා ළමයින්ගේ හැදියාව නෙවේ මාකට් එකයි හදා ගන්න ඕන කියලා . මොන ? . තාමත් ඉන්නේ ඒ ඉස්කෝල මිස්ම තමා . 







ඉතින් අද කියන්න යන ගීතයට හූමිටි තියන්න එන්නේ අපේ පුංචිගේ මේ ක්ලාස් එක . පුංචිගේ ක්ලාස් එකට ඉස්සර ඉඳලා ආපු ළමයෙක් හිටියා . ගෑණු ළමයෙක් . පුංචි උගන්නපු ඉස්කෝලෙක ළමයෙක් . මහලොකු ලස්සනක් ඇත්තෙත් නෑ . හැබැයි කැතක්ම කියලා ඇත්තෙත් නෑ . ඒ ගෑණු ළමයා අනිත් අය දිහා බලන බැල්මේ පොඩි අවුලක් තිබ්බා . ඒ ළමයා බලන්නේ ඇස් කොනෙන් වගේ පැත්තට හැරිලා . ඉතින් කොල්ලෝ ගොඩක් ඔය බැල්මට අහුවෙනවා . ඉස්කෝලේ කාලේ ඉඳලා නඩු කෝටියක් විතර කෙලවර උනේ මේ ගෑණුළමයගෙන් . ඕවා ඉතින් ගෙදර ඇවිත් පුංචි මාත් එක්කත් කියනවා . ඒ අවවාදයට වඩා ආදර්ශය උතුම් නිසා වෙන්නැති . හැක හැක හැක . 

මේ ළමයාගේ අම්මා තාත්තා දුප්පත්ම අය නෙවෙයි . මහා ලොකු සල්ලියක් නැතත් මේ අය හොඳට ජීවත් වුණා . ඒ වඩේ රෝල්ස් කට්ලට් පැටිස් විකුණලා . එයාලාට එයාලගෙම වාහන දෙකක් තිබුණා . ෂෝ කේස් ගහපු ලොරියක් සහ ත්‍රී විල් එකක් . ඒවයින් හැමදාම හවසට මේ කෑම ජාති ටවුන් එකේ එක එක තැන් වල විකුණලා තමයි මේ අය ජීවත් උනේ . පුංචි මාත් එක්ක කිව්ව හැටියට ඉතින් සල්ලි අවුලක් නෑ . ඔය ගෑණු ළමයා කවුද කියලා බලන්න ඕන නිසා මමත් දවසක් පුංචිගේ ක්ලාස් පැත්තේ කැරකිලා පුංචිගෙන් අහගත්තා කවුද ඩයල් එක කියලා . කිව්වත් වගේ බැල්මේ අවුල නම් තියෙනවා තමා . මටත් ඒ ළමයා , මාගේ දෑස දෙස බලනු කියලා දැම්මේ ඇස් කොනෙන් බලන බල්මම තමා . ඔබ මුලින් දුටුවා දිනමා , මට කරන්ට් වැදිලා වැටුනා කියනවා වගේ මාත් එතනම එව්වා මෙව්වා වෙලා ගියා . පස්සේ ඉතින් ඔහොම කාලේ ගෙවිලා මේ ගිය සතිය දක්වා කිසිම අවුලක් නැතුව කාලේ ගෙවුනා . 

ගිය සතියේ පුංචි ක්ලාස් ඇරිලා ගෙදර ආවා . ඇවිත් කිව්වේ මාර සීන් එකක් . ඒ ගෑණු ළමයගේ අම්මා ඇවිල්ලා ක්ලාස් එකට ඒ ළමය එක්ක යන්න . ඉතින් පුංචි කියලා ළමයා ආවේ නෑනේ අද කියලා . පස්සේ මේ අම්මා හිනා වෙලා ඉඳලා . අම්මා හිතලා තියෙන්නේ පුංචියි කාඩ් මාක් කරන කෙනයි විහිලු කරනවා කියලා . බලනකොට ඇත්තටම දුව ක්ලාස් එකේ නෑ . ඒ අම්මට දෙලොව රත් වෙලා . මොකද ඒ ළමයාගේ ඉතිහාසය හොඳ නැති නිසා අම්මා පස්සෙන්ම තමා හිටියේ . ඒත් වෙලාව ලැබුණ මොහොතේ මේ දුව කොල්ලෙක් එක්ක පැනලා ගිහිල්ලා . ඒක කිව්ව වෙලාවේ වයලීනොටත් හරිම අප්සැට් . ඒ කෙල්ල ගැන නෙවේ . කෙල්ලගේ අම්මා තාත්තා ගැන . වැඩි වයසක් තියෙන දෙන්නෙක් නෙවෙයි . ජීවත් වෙන්නයි ළමයින්ගේ වැඩ කරන්නයි මේ දෙන්නා මාර විදියට මහන්සි වෙනවා . ඒ අම්මා වඩේ හදන ඒවා අතරේ ළමයි එක්ක යන්න එක්ක එන්න පරිස්සම් කරන්න ඒ වැඩත් කරා . ඒත් අන්තිම මොහොතේ පොඩ්ඩ මිස් උනා විතරයි කෙල්ල පැන්නා .







හැබැයි අපේ පුංචි ළමයින්ගේ මේ වගේ ප්‍රශ්න වලට කලිනුත් මූණ දීලා තියෙන නිසා කලබල උනේ නෑ . එයා කිව්වෙම ගෙදර ගිහින් පොඩ්ඩක් දන්න කියන තැන් වල හොයන්න කියලා . ඒත් මේ අම්ම තාත්තා බයටම පොලිසි ගිහින් තමයි අනිත් තැන්වල හෙව්වේ . මෙයාලා දැනගෙන හිටියා එක කොල්ලෙක් එක්ක දුව අවසන් වරට ලවක් පැවැත්වුවා කියලා . අන්තිමට ඉතින් හොයලා බලනකොට දුව හිටියේත් ඒ කොල්ලගේ ගෙදර තමයි . ඒ අම්මා අපේ පුංචිට කෝල් කර කර වැලහින්න වගේ අඬනවා දහඅතේ දෙස් දෙවොල් තිය තිය . කාටවත් නෙවේ , තමන්ගේ දුවටම තමා . ඒ තාත්තා කෙලින්ම කියලා තියෙන්නේ ඕකි ගෙදරට වැද්ද ගන්නේ නෑ , පරිවාසේට යවන්න ඕන කියලා . නැත්නම් අනිත් ළමයා හදාගන්න වෙන්නෙත් නෑ කියලා .

පස්සේ අපේ පුංචි සියලු අවවාද ටෙලිෆෝන් එකෙන්ම දුන්නා . මේක වෙන අයට කියන්නේ නැතිව වැඩිය ආරංචිය පිට යන්න නොදී තියාගන්න . ළමයා ගෙදර එක්ක එන එක තමා වඩාත්ම හොඳ . අඩු වයස නිසා මේක අවුල් කරගන්නේ නැතිව පිළිවෙලට විසඳගන්න . කසාද බඳින්නත් බැහැ දැන්මම . ඒ නිසා පස්සේ ඒ කොල්ලටම බන්දලා දුන්නත් කමක් නෑ වයස හරියනකල්වත් ගෙදර නවත්තගන්න කියලා . පස්සේ පුංචි තව දුරටත් කිව්වා හොස්පිටල් ඇඩ්මිට් කරලා ළමයා චෙක් කරවලා ඊළඟට කරන දෙයක් කරන්න කියලා . 

තාත්තාගේ දැඩි විරෝධය මැද දැන් ඒ ළමයා ගෙදර එකක් ඈවිත් . වාසනාවට කොල්ලයි කෙල්ලයි සරුංගල් යැවුවට නූල තාම යහතින් තියෙනවලු . වෙලාවට සරුංගලේ සේරුව අවුල් වෙලා සරුංගලේ බිමට බාලා තියෙන්නේලු . බැරිවෙලාවත් වැඩිය උඩ ගියානම් නූල හබක් තමාලු . එහෙම උනා නම් ඉස්කෝලේ ගිහින් ඉවරයි . ඔක්කොම ඉවරයි . මෙහෙම දෙයක් උනා කියලා දැනගත්තම ඉස්කෝලෙන් ළමයි භාරගන්නේ නෑ ශිෂ්‍යාවන් විදියට . පුංචි කිව්වේ මේ ගැන නොකියා ළමයා ඉස්කෝලේ යවන්න , එක්සෑම් කරන්න තව මාස කීයද තියෙන්නේ කියලා . අදත් පුංචි ඒ අම්මට කතා කරලා අවවාද කළා . ඒ අම්මා කියලා තිබ්බා මෙඩිකල් ටෙස්ට් එක හොඳයි . ඒත් දැන් ළමයා අන්ද මන්ද  වෙලා වගේ ඉන්නවා කියලා .

මටනම් වැඩිපුරම දුක ඒ අම්මා තාත්තා ගැන . කොච්චර නම් මහන්සියක් වෙනවද ළමයින්ට හොඳට උගන්නන්න . ඒත් ඒ ළමය ඒවා ගැන හිතුවේ නෑ . කාගේද වැරැද්ද කියලා හිතාගන්න අමාරුයි . හැබැයි වැඩි වගකීමක් යන්නේ ළමයා අතටම තමයි කියලා තමයි මමනම් හිතන්නේ .







පාසැල් ප්‍රේමය කාටත් පොදු දෙයක් වෙන්න පුළුවන් . ඒත් ඒක නැති වීම අසාමාන්‍ය තත්ත්වයක් නෙවෙයි . තිබිලා නැතිවීමත් අසාමාන්‍ය දෙයක් නෙවෙයි . සිංදුවා හැදුවේ මාවත් උගේ බෝට්ටුවටම දාගන්න . ඒත් මමනම් යයි ඌ ගිය බෝට්ටුවේ හැක හැක හැක . වැඩි දෙනෙක් කියන්නේ පාසැල් ප්‍රේමය පාසලේම නැවතුනා කියලා . කොහොමින් කොහොම හරි මම මේ කිව්ව කතාවේදී උනේ ඒ ගෑණු ළමයාගේ අම්මලා තාත්තලාගේ මහන්සිය , ගුරුවරුන්ගේ මහන්සිය , ඒ ළමයා පරිස්සම් කරන්න අපේ පුංචි ගත්ත මහන්සිය හැමදේම පැය කීපයකින් අවලංගු කරලා දාපු එක . මේ ළමයා සමහරවිට දැන් අන්ද මන්ද වෙලා ඉන්නේ සත්‍ය අවබෝධ වෙලාද දන්නේ නෑ . අවබෝධ උනත් දැන් ඒ ළමයා තමන්ගේ නමේ ගාගත්ත මඩ පැල්ලම කවදාවත් මකලා අයින් කරන්න වෙන්නේ නෑ .

ගෑණුන්ට සමහර වෙලාවට පහළවෙන හැඳිමිටේ මොලේ ගැන කියනකොට මට මේ වෙලාවේ මතක් වෙනවා ජයසේන ජයකොඩි මහත්මයා ලියලා තියෙන පිච්ච මල නවකතා මාලාවේ දෙවෙනි පොත , අරලියමල් ආරාමය කියන පොතේ ලියවිලා තියෙන සිදුවීම් කීපයක් .

මල් ගොටුව සහෝදරිය අත තැබූ සුමේධා හාත්පස ම බලා තෙරණුවන් කරා එළඹ දණගසා වැඳ මදක් වෙවුලමින් ගතකොට අධිෂ්ටානයක් ක්‍රියාත්මක කරන්නියක සේ එකවිටම උන්වහන්සේගේ දෙපයම සිඹ , ක්ෂණයෙන් නැගී සිටියාය .

ඔන්න ඔතනින් පටන්ගන්න සුමේධා සහ රාහුල තෙරණුවන්ගේ කතාව අන්තිමට ඉවර වෙන්නේ සුමේධා , ගමේ ලියුම් බෙදන මුනිදාසට කියලා හදා ගත්ත දරුවා රාහුල හාමුදුරුවන්ට දාව ඉපදුන ළමයෙක් කියලා බොරුවක් හදලා හාමුදුරුවන්ගේ නමටත් කැළලක් කරලා . ඒ වෙලාවේ හාමුදුරුවෝ ඒ වෙනුවෙන් ප්‍රතික්‍රියා කරපු හැටි ගැන අපි පස්සේ බලමු . මේ දේ වෙන්න කලින් සුමේධා කියන තරුණිය හාමුදුරුවන්ව තමන්ගේ කරගන්න නොකළ දෙයක් නෑ . හාමුදුරුවෝ තමන්ගේ කරගන්න අන්තිම තුරුම්පුව විදියට තමයි සුමේධා මේ කාගේවත් ළමයෙක් හාමුදුරුවන්ගේ කියලා කතාව වෙනස් කලේ .

ඔයාලත් පොත හොයාගෙන කියවලා බලන්න . ජීවිතය ගැන අලුත් විදියකට හිතන්න ඒ පොත් අටම ගොඩක් හොඳයි කියලා වයලීනෝ විශ්වාස කරනවා . ටිකක් ඈත කාලයේ කියවපු රොබින්සන් කෲසෝ තමයි මම කියවපු හොඳම චරිතය . තාමත් හිතේ හොල්මන් කරන්නේ කෲසෝ තනියම තමන්ගේ ජීවිතය ගොඩගත්ත හැටි ප්‍රශ්න වලට උත්තර හොයාගත්ත හැටි . දියුණු වෙන්න නම් මනුස්සයෙක්ට කෲසෝ හොඳ ආදර්ශයක් . ඊට පස්සේ ලැබුණ හොඳම චරිතය තමයි පිච්චමලේ රාහුල හාමුදුරුවෝ . ඔයාලත් කියවලා බලන්න .







ඉතින් මට කියන්න ඕන උනේ ආදරය කියන මාතෘකාව හමුවේ මේ ගෑණු ළමයි කොච්චර ඉක්මන් වෙනවද මෝඩ වෙනවද සහ කපටි වෙනවද කියන එක . ජෛවීය විද්‍යානුකූලව හා ප්‍රවේණි විද්‍යානුකූලව මානව ලිංග නිර්ණය සඳහා දායක වෙන්නේ X වර්ණදේහය සහ Y වර්ණදේහය . මේවායින් එකක් අම්මගේ . අනික තාත්තාගේ . මේ වර්ණ දේහ වලින් තමයි ගැහැණු පිරිමි ගතිලක්ෂණ ප්‍රවේණිගත කරන්නේ . ඒ කියන්නේ අලුත් පරපුරට ලබා දෙන්නේ . XX උනොත් ඉපදෙන්නේ කාන්තාවක් . XY උනොත් ඉපදෙන්නේ පිරිමියෙක් .





මේ වර්ණදේහ දෙකෙන් Y වර්ණදේහය X වර්නදෙහයට වඩා ටිකක් කොටයි . ඒ නිසා X වර්ණ දේහය මගින් අරගෙන එන ඔක්කොම ලක්ෂණ පිරිමින් තුලින් එලියට ප්‍රකාශ වෙන්නේ නෑ . හැබැයි කාන්තාවන්ගේ එහෙම නෙවෙයි . එයාලාට තියෙන්නේ එකම සයිස් වර්ණදේහ දෙකක් නිසා ඒ දෙක යුගල් උනාම ඒ වර්ණදේහවල තියෙන ලක්ෂණ වැඩි ප්‍රමාණයක් පිටතට පෙන්නුම් කරනවා . කාන්තාවන් සියල්ලටම පොදු ලක්ෂණ සහ සිතුම් පැතුම් හැසිරීම් ගොන්නක් තියෙනවා . මමනම් හිතන්නේ මෙන්න මේ වර්ණදේහ පසුබිමත් හේතු වෙනවා කියලා කාන්තාවන්ගේ මේ පොදු ලක්ෂණ ඔක්කොම අරගෙන එන්න . කාන්තාවන්ට මෝඩමල් පිපෙන්නේත් මේ වර්ණදේහ සීන් එක නිසා කියලා තමා වයලීනෝ විශ්වාස කරන්නේ .

ජෝතිෂ්‍ය විද්‍යාවට අනුව බැලුවමත් කලින් විවාහවෙන , පැනලා යන , දෙකතුනක් එක්ක යන ග්‍රහ පිහිටීම් තියෙනවා . ඒවා අනුව ඉස්සරනම් කෙල්ලෝ පරිස්සම් කරලා තියෙනවා . ඒත් දැන් ඒවා පිළිගන්නේ නැති නිසා ඒ සයිඩ් එක මත පිහිටලා කෙල්ලෝ පරිස්සම් කරන බවක් නම් පේන්නේ නෑ .

කුජ ග්‍රහයාගේ බලපෑම , සඳු ග්‍රහයාගේ බලපෑම නිසා කෙල්ලෝ පැනලා යන්න පුළුවන් . නැත්නම් ඉක්මන් විවාහ වෙන්නත් පුළුවන් . අඩු වයසේදී සිකුරු මහදසාව ලැබුවොත් ඒ අයත් ටිකක් ඉක්මනටම සරුංගල් යවනවා කියලා ජෝතිෂ්‍ය විජ්ජාවේ කියනවා . තවත් ග්‍රහ යෝග කීපයක්ම තියෙනවා මෙහෙම ඉක්මන් විවාහවෙන යෝග විදියට සලකන ඒවා .

ඉක්මන් විවාහය ගැන කියවෙන තවත් මතයක් තමයි කොටහළු මංගල්‍යය ඉතාමත් උත්කර්ෂවත් විදියට ගත්තොත් ඒ ගෑණු ළමයා ඉක්මනට පැනලා යනවා කියන එක . ඒක දැනට අවුරුදු පනහකට හැටකට ඉස්සර කාලේ තිබ්බ මතයක් . අද වෙනකොටනම් ඒක පිළිගන්න බෑ . මොකද හැමතැනකම වගේ කොටහළු මංගල්‍ය උත්කර්ෂවත් විදියට දැන් ගන්න නිසා .

ඔය ඔක්කොම උනා කියමුකෝ . ඉතින් දෙන්නෙක් අතරේ ප්‍රේම සම්බන්ධයක් ඇතිවෙන්න බලපාන විවිධ හේතු තියෙනවා . සමහර අය දැක්ක ගමන් හිත බැඳුනා වාසනාවේ දොර ඇරුනා කියලා දොර ඇතුලට රිංගවනවා . පස්සේ තමයි තේරෙන්නේ ඇරපු දොර ඇරියම තමයි කියල . ඊට පස්සේ ඉතින් ගැලපුනා නොගැලපුනා ඒ දොරෙන් තමා ඇතුලට යෑම් සහ ටික කාලෙකින් ප්‍රතිපලය පිටතට ඒම් .







සමහර අය කාලයක් ආශ්‍රය කරලා ප්‍රේම සම්බන්ධතා ඇති කරගන්නවා . ප්‍රේම සම්බන්ධතා ඇවිත් වීමේ වඩාත් වැඩි සම්භාවිතාවක් තියෙන්නේ සහෝදර ප්‍රේම වලට තමයි . අයියේ නංගියේ කියලා පටන් ගන්න සහෝදර ප්‍රේමය පස්සේ ඔයා මෙයා ප්‍රේමයක් වෙලා පැට්ටෝ පැට්ටි ප්‍රේමයක් දක්වා දුරදිග යනවා . සමහරවිට සහෝදර ප්‍රේමය එක්ක දෙන්නෙක් වඩාත් වැඩිපුර ලං වෙන නිසා පස්සේ ඔයාමෙයා ප්‍රේමයක් ඒ තුලින් හටගන්නවා වෙන්න පුළුවන් . කලාතුරකින් තමයි ඔයාමෙයා ප්‍රේමයක් ඇතිවෙලා ඒක නැතිවෙලා සහෝදර ප්‍රේමයක් බවට පත්වෙන්නේ . හැබැයි ඉතින් ඒක දෙන්නා විවාහ උනාම දෙන්නගේ නෝනටයි මහත්තයාටයි මාට්ටු උනාම ඔක්කොම ඉවරයි .

ප්‍රේම සම්බන්ධතා ඇතිවෙන්න තව මෙන්න මේ දේවලුත් හේතු වෙන්න පුළුවන් .

- කාලයක් ආශ්‍රය කරපු දෙන්නෙක්ගේ සිතුවිලි එකිනෙක සමාන වෙලා ඒවා එකට යා වීම . එයත් හිතන්නේ මම වගේ . මමත් හිතන්නේ එයා වගේ කියලා හිතලා අපිට එකට ජීවත් වෙන්න පුළුවන් කියල හිතලා සමහර අය ප්‍රේම සම්බන්ධතා ඇති කරගන්නවා . හැබැයි මෙතනදී දෙන්නා අන්ධ වෙන්නත් පුළුවන් . එක්කෙනෙක්ට අනිත් කෙනා ඕන නිසා තමන් විහින් තමන්ට නොගැලපුනත් ගැලපෙනවා කියලා හිතලා යාලුවෙන වෙලාවලුත් තියෙනවා . ඒක ඉතින් කරුමේ තමා . පස්සේ තමා කරුමේ පල දෙන්නේ .

- තවත් සමහර අයට ගෙදරින් ලැබෙන ආදරය අඩු උනාම ප්‍රේම සම්බන්ධතාවලින් ඒ අඩුව පිරිමහ ගන්න යනවා . සමහරවිට අම්මලා තාත්තලා කාර්යබහුල නිසා ළමයින්ට ලං වෙනවා අඩු ඇති . ඒත් ළමයි වරද්ද ගන්න තැනත් මෙතනම තමයි . කොච්චර නෑ කිව්වත් ගෙවල් වලින් තමන්ට ලැබෙන ආදරය අඩු වෙන්නේ නෑ . උනොත් වෙන්නේ අවධානය අඩුවෙන එක විතරයි . ඒක ඉතින් එක එක්කෙනා ලබා උපන් හැටි කියල හිත හදාගන්න තියෙන්නේ .

- සමහර වෙලාවට තමන්ගේ යාලුවෝ ඔක්කොටම සහකරුවෙක් සහකාරියක් ඉන්නවා . මට විතරක් තමයි නැත්තේ කියලා ඔන්න දැක්ක පලියට හොඳයි කියලා දෙන්නෙක් අතරේ ප්‍රේම සම්බන්ධයක් ඇතිවෙන්න පුළුවන් . මේවාට ඒ යාළුවන් විහින්ම පොහොර දාලා ඔක්කොම සෙට් කරලා දෙනවා .

- සමහර අය ඉන්නවා අනිත් කෙනාට අනුකම්පා කරන අය . සල්ලි තියෙන කෙනා නැති කෙනාට අනුකම්පා කරනවා . අහිංසක කමට අනුකම්පා කරනවා . මේ වගේ ඇතිවෙන යාළුමිත්‍රකම් අන්තිමේදී ප්‍රේම සම්බන්ධතා බවට පත් වෙන්න පුළුවන් . 

- විනෝදය සඳහා ප්‍රේම සම්බන්ධතා ඇතිකරගන්න අයත් ඔය අතරේ ඉන්නවා . ගමේ එකයි , ටවුමේ එකයි , රූම් එකට යන්න එකයි , බස් එකේ යනොට එකයි . මෙහෙම මෙහෙම විනෝදය සඳහා ප්‍රේම කරන අයත් ඉන්නවා . සමහර අය මෙතැනින්ම තමන්ගේ ලිංගික ආසාවන් සම්පූර්ණකරගන්නත් පෙළඹෙනවා . මේ චෝදනාව නම් කෙල්ලන්ට එල්ල වෙනවා අඩුයි . වැඩිපුරම කොල්ලන්ට තමා චෝදනාව යන්නේ .

- තවත් අවස්ථා වලදී බයට යාලු වෙනවා . කෙල්ල දුර්වලයි . කොල්ලා බලවත් . මාත් එක්ක යාලුවෙයන් කියලා කියන බලකිරීම නිසාම දෙන්නා යාලු වෙනවා . 

- සමහ‍ර අය පාළුව තනිකම මකා ගන්න ප්‍රේම කරනවා . ඒවා ප්‍රේමද මොනවද මන්දා . හැබැයි එහෙම තමයි කියන්නේ . fb චැට් , ටෙලිෆෝන් චැට් මැසේජ් චැට් එව්වා මෙව්වා එන්නේ මේ කැටගරියට .

- සමහර කෙල්ලෝ තමන්ට පෙනෙන කඩවසම් , කීර්තිමත් , දක්ෂ , GPA එක වැඩි , සල්ලි තියෙන , පවුල් පසුබිම උසස් කොල්ලන්ට ප්‍රේම කරනවා . ඒකත් එක විදියක මෙව්වා එකක් තමා .

- ඔය ඔක්කොමත් නැත්නම් තවත් සමහර අය ප්‍රේම කරන්නේ තමන්ගේ මනෝ ලෝකයේ ඉන්න චරිතයකට . සමහර විට තමන් තමන්ගේ වෙනවානම් හොඳයි කියලා හිතාගෙන ඉන්න චරිතය වගේ කෙනෙක්ට ප්‍රේම කරනවා . 

ඔය කොහොම කරත් අන්තිමේදී ප්‍රේම සම්බන්ධතා පවත්වාගෙන යනකොට තමයි කෙලවෙන්නේ . ප්‍රශ්න ප්‍රශ්න ප්‍රශ්න . ප්‍රේමය නිසාම මේවා පටන් ගත්තට කීයක් ඒවා ගැන හිතන්න වෙනවද අන්තිමට . අම්මලා තාත්තලාගේ විරෝධතා , පාසැල් නීති රීති , විභාග වලට සූදානම් වීම් , එව්වා මෙව්වා ප්‍රශ්න ගොඩයි . ඉතින් මේවා අස්සේ ප්‍රේම කිරීමත් බැලන්ස් උනොත් තමයි වැඩේ ගොඩ යන්නේ . එහෙම නැතිව එක පැත්තකට බර උනොත් ඔන්න අවුල් වෙනවා . පැනලා යන්න තීරණය කරන්නේ අන්න එහෙම අය . මට තව දුරටත් ඉගෙන ගන්න බෑ . තව කල් ඉවසගෙන ඉන්න බෑ . වගේ තීරණ නිසා පැනලා යන්න පෙළඹෙනවා .

ඒත් පැනලා යන්න හිතන අය හිතන්න ඕන තම තමන්ට ඒකට හයියක් තියෙනවද නැත්ද කියලා . විවාහය කියන්නේ පොතේ ලියලා එක වහලක් යටට වෙන එකම නෙවෙයි . සත්‍ය ප්‍රේමයේ බ්රුංග රාජයෝ වෙලා එක වහලක් යටට ආවට දෙන්නෙක් එකට ජීවත් වෙනකොට සම්පූර්ණ වෙන්න ඕන දේවල් ගොඩක් තියෙනවා . දෙන්නගේ සමාජ පසුබිම ගැලපීම , හැසිරීම් , ඕනා එපාකම් ගැලපීම , අධ්‍යාපන මට්ටම් , ආර්ථික ස්ථාවරත්වය අරවා මේවා වැඩ ගොඩයි ඉතින් . එක , දෙක තුන උනාම තවත් ප්‍රශ්න . ඉතින් මේවා විසඳගන්න පුළුවන් උනා කියලා අම්මා තාත්තා රවට්ටලා පැනලා යන එකත් ඉතින් නුවණට හුරු දෙයක් නෙවෙයි .

ගැළපෙන්නේ නැතිව එක වහලක් යටට එන අය ඉන්නවනම් ඒ අය තරයේ හිතා ගන්න ඕන මේවා ඔක්කොම ඉවසාගෙන විඳ දරාගෙන එකට ජීවත් වෙන්න පුළුවන් නම් විතරක් විවාහ වෙන්න . ඒ කාලය අතරතුර දෙන්නා පරිස්සමෙන් කල් ගෙවීමත් වැදගත් . පිරිමින්ට නම් නා ගත්තම ශේප් . ඒත් ගෑණු ළමයි මේවා ගැන සැලකිලිමත් වෙන්න ඕන . නැත්නම් ගැළපීම නොගැළපීම තේරුම් ගන්නකොට වෙන කසාදයක් කරගන්න බැරි තත්ත්වයටම පත් වෙලා . ඒ නිසා අවබෝධය තමයි අංක එක වෙන්න ඕන . ඒක නැත්නම් නිකා ඉන්න එක තමයි වඩා හොඳ .







ඔන්න ඔය කිසිම දෙයක් ගැන දන්නේ නැති වඩු වැඩ කරලා තමන් සහ තමන්ගේ දුවව පෝෂණය කරපු තාත්තා කෙනෙනක් ජීවත් වුණා ගාල්ල පැත්තේ එක ගමක . මේ ගමේම වෙනත් ගෙදරක නැවතිලා ඉඳගෙන පාසැල් ගියපු එක තරුණයෙක් හිටියා . ඒ තරුණයා හැමදාම වගේ පාසැල් ගියේ ආවේ මේ වඩුමඩුව තියෙන තැනින් වැටිලා තියෙන පාර දිගේ . සමහර දවසට වැස්ස තද උනාම මේ තරුණයාත් මේ වඩු මඩුවට එනවා හෙවනක් හොයාගෙන .

මේ වඩු බාසුන්නැහෙ තමන්ගේ දුව එක්ක ජීවත් උනේ මේ වඩු මඩුවට අල්ලලා හදලා තියෙන පොඩි නිවහනේ . ඉතාම දුක්බර ජීවිතයක් ගෙව්වත් මේ අයට එදා වේල කොහොමහරි හම්බකරගෙන පන ගැටගහගන්න හැකියාව තිබුණා . සමහර දවසට මේ පාසැල් යන තරුණයාත් දකිනවා වඩු බාසුන්නැහෙගේ දුව ගෙදර මිදුලේ ඉන්නවා . ඔහොම ටික කාලයක් යනකොට දවසක් මේ තරුණයා පාසැල් ගිහින් එනකොට වඩු බාසුන්නැහේ ඉන්නවා වඩු මඩුවට වෙලා කල්පනා කර කර . මූණත් මැලවිලා . මොකද වෙලා තියෙන්නේ ? අර දුව කවුද කොල්ලෙක් එක්ක පැදුරටත් නොකියාම පැනලා ගිහිල්ලා . මේ තරුණයාගේ සංවේදී හදවතේ පැළපදියම් වෙච්ච මේ සිද්ධිය පසුකාලයේ ඔහුගේ අතින්ම ගීතයක් බවට පත් වුණා . ඒ මෙන්න මේ ගීතය .

චන්ද්‍ර මණ්ඩලේ සැතපුන පුංචි සාවියේ
මන්ද කියාපන් නොකියා හැංගිලා ගියේ
පාන නිවුන සේ පාළුයි ලැයිම් කාමරේ
මන්ද නුඹ ගියේ කියාපන් පුංචි සාවියේ

ලාබ රත්තරන් දිලිසෙන පාළු වීදියේ
ගෑණු ළමයි පියාඹලා ඉස්සරත් ගියේ
උන්ට සෙයිලමේ මග තොට පාර වැරදුණේ
අන්න ඒ නිසයි මට දුක රත්තරන් දුවේ

මාල බැඳන් සුදු යකඩෙන් රෝස මල වනේ
මාල ගිරවු ගේ දොරකඩ සින්දු කිවු වෙලේ
හීනෙනුත් හිතුනෙ නෑ මට මොකද කාරණේ
පාර මතක නම් තාමත් ගේ ළඟයි දුවේ

ගී පද - රත්න ශ්‍රී විජේසිංහ





ගී තනුව - රෝහණ වීරසිංහ





ගායනය - සුනිල් එදිරිසිංහ






පුංචිගේ පංතියේ හිටපු ගෑණු ළමයා පැනලා ගියා කියලා දැනගත්ත ගමන්ම මට මතක් උනේ මෙන්න මේ ගීතය . එවෙලේ ඉඳලා මම පුන්චිගෙන් හැමවෙලේම වගේ මේ ළමයාට මොකද උනේ ? දැන් තත්ත්වය කොහොමද අරවද මේවද ඔක්කොම ඇහුවා . ඒත් එක්කම තමයි මේ ලිපිය ලියන්න ඕන කියලා හිතුනේ . අපි එහෙනම් මේ ගීතය ගැන පොඩ්ඩක් හාරවුස්සලා බලමු .








චන්ද්‍ර මණ්ඩලේ සැතපුන පුංචි සාවියේ 
මන්ද කියාපන් නොකියා හැංගිලා ගියේ 
පාන නිවුන සේ පාළුයි ලැයිම් කාමරේ 
මන්ද නුඹ ගියේ කියාපන් පුංචි සාවියේ 

ගෑණු ළමයෙක් කියන්නේ පවුලට එළියක් උනාට වැඩි හරියක්ම තාත්තලාගේ හිතට බරක් . මොකද දුව නිකන් බන්දලා දෙන්න තාත්තලා කොහොමවත්ම කැමති වෙන්නේ නෑ . ඒ නිසා දුවෙක් ඉපදුනාට පස්සේ තාත්තලා හම්බ කරන්න තරමක් මහන්සි වෙනවා . ඒ යමක් ඉතුරු කරලා දුවට දෙන්න . අඩුගානේ මුකුත්ම බැරිනම් මාලයක් මුද්දක් කරාබු කුට්ටමක් හරි වැඩිපුර හදවලා දෙන්න උත්සාහ කරනවා . මේ තාත්තාත් එහෙම තාත්තා කෙනෙක් . අනික මේ තාත්තාට වැඩි වගකීමක් තිබුණා . ඒ අම්මා කෙනෙක් නැති දුවව බලාගන්න එක . දුවෙක් හැදෙන්න අම්මා කෙනෙක් ඕනමයි . ඒ දුවෙක්ට තාත්තා කෙනෙක්ට කියන්න බැරි සමහර දේවල් කීපයක් තියෙන නිසා . ඒත් මේ දුවට හැමදේටම හිටියේ තාත්තා විතරයි .

තාත්තා වැඩ කලෙත් ගෙදරට අල්ලලා හදාගත්ත වඩු මඩුවේ . ඒ නිසා කොයිවෙලෙත් දුව හිටියේ ඇහැ ගැටෙන මානයේම තමයි . කොහොමහරි දුක්විඳලා දුවව ලොකුමහත් කරලා දුවට ආදරෙන් සලකන බෑණා කෙනෙක්ට දුවව දෙන්න තමයි මේ තාත්තත් බලාපොරොත්තු වෙන්න ඇත්තේ . සමහරවිට මේ තාත්තා කාටවත් නොකිව්වට නොපෙන්නුවට සුළු දෙයක් හරි දුව වෙනුවෙන් ඉතුරු කරලා තියෙන්න ඇති . ඒත් දැන් ඒ සේරම උඩු හුළඟට ගහගෙන ගිහිල්ලා .

මේ ගීතයේ තියෙන විශේෂ යෙදීමක් තමයි හඳේ ඉන්න හාවා ලිංග විපර්යාසයකට ලක් කිරීම . පන්සීය පනස් ජාතක පොතේ සස ජාතකයේ කියවෙන හැටියට ගින්නට පැනපු බෝධිසත්ව හාවාගේ රූපය ශක්‍ර දේවේන්ද්‍රයා තමයි හඳේ සිතුවම් කරන්නේ . ඒ බෝධි සත්වයන්ගේ දාන පාරමිතා බල මහිමය ඉර හඳ පවතිනාතාක් කල් මිනිස්සුන්ට දැකබලාගන්න හැකිවෙන්න ඕන කියන අරමුණෙන් . ඒත් ගීත රචකයා මේ ගීතයේ අවස්ථානුකූලව හඳේ හාවා හාවියක් බවට පත් කරලා .

හැබැයි මට මෙහෙමත් හිතෙනවා . පවුලේ තත්ත්වය , ගෙදර තත්ත්වය මේ ගීතයේ එක වචනයකින් හරි පෙන්නන්න ඕන නිසා ගීත රචකයා " චන්ද්‍ර මණ්ඩලේ සැතපුන පුංචි සාවියේ " කියන යෙදුම යොදන්න ඇති කියලා . මේ ගෙදර දුප්පත් ගෙයක් . ඒ නිසා මේ ගෙදරට උළු , ශීට් සෙවිලි කරන්න ඇති කියලා හිතන්න බෑ . ඒ නිසා වහලේ තියෙන පොල් අතු හරි , නැත්නම් දිරාගිය ටකරම් වල හරි තියෙන සිදුරු වලින් රෑට හඳ එළිය ගෙට කඩා හැලෙනවා . මේ දුව ඒ හඳ එළියේ එහෙමත් නැත්නම් චන්ද්‍ර මණ්ඩලයේ තමයි හැමදාම නිදාගන්න ඇත්තේ . හඬ එළියේ නිදාගෙන ඉන්න දුවව තාත්තට පෙන්න ඇත්තේ හාවියක් වගේ වෙන්න ඇති . මමනම් හිතන්නේ ගීතයේ මේ පදයෙන් ඒ අයගේ දුප්පත්කම පෙන්නලා තියෙනවා කියලා . කොච්චර වයසින් මුහුකුරා ආවත් දෙමවුපියන්ට තමන්ගේ ළමයි පොඩියි කියලා පෙන්වන්න පුංචි සාවියේ කියන වචන දෙක හොඳටම ඇති .

තාත්තා දැන් අහනවා මන්ද කියාපන් නොකියා හැංගිලා ගියේ කියලා . තමන්ට තමන්ගේ දුවව රාජ කුමාරයෙක්ට දෙන්න බැරි විත්තිය මේ තාත්තා කොහොමත් දන්නවා . ඒ නිසා යන කෙනෙක් ගැන කියලා ගියානම් මේ දේ මීට වඩා පිළිවෙලකට කරන්න තිබුණා සහ මෙච්චර දුක් විඳින්න වෙන්නේ නෑ කියලා තාත්තා හිතනවා .

වෙනදා ගෙදර පහන පත්තු කරන්නේ අම්මා . අම්මා නැතිවුනාට පස්සේ ඉඳලා ගෙදර පහන පත්තු කරේ දුව . අද දුවත් නෑ . දුව පත්තු කරන පහනත් නෑ . පහනේ ආලෝකයත් නෑ . ඒ ගිනි දැල්ලෙන් එන එළිය . ඊට වඩා එළියක් මේ ගෙදරට ලැබුණේ දුව නිසා . අද ඒ එළියත් නෑ කියලා තාත්තා ආයෙත් ප්‍රශ්න කරන්නේ ඇයි මට නොකියාම යන්න ගියේ කියලා .


ලාබ රත්තරන් දිලිසෙන පාළු වීදියේ 
ගෑණු ළමයි පියාඹලා ඉස්සරත් ගියේ 
උන්ට සෙයිලමේ මග තොට පාර වැරදුණේ 
අන්න ඒ නිසයි මට දුක රත්තරන් දුවේ 


දැන් තාත්තා ඉන්නේ බයෙන් . මොකද දුව ගියේ කාත් එක්කද කියලා තාත්තට ඉවෙන් වගේ දැනුමක් තියෙන නිසා . මේ වඩුමඩුව පිහිටලා තියෙන ගමත් දුප්පත් ගමක් . ඒ නිසාම මේ ගමේ වැඩි දෙනෙක්ට රත්තරන් කරේ එල්ලන් යන්න උනේ නෑ . ඒ නිසා එයාලා ලස්සන උනේ ලාභ රත්තරන් වලින් . ඒ කියන්නේ ඉමිටේෂන් මාල වළලු වලින් . මේ ලාභ රත්තරන් දාගත්ත අය යන එන පාරෙන්ම ඉස්සරත් ගෑණු ළමයි කොල්ලොත් එක්ක පැනලා ගියා , එහෙමත් නැත්නම් නගරයේ රස්සාවල් වලට ගිහින් නගරයේ ඉන්න කපටින්ට අහු වුනා . ලාබ රත්තරන් දිලිසෙන පාළු වීදියේ ගෑණු ළමයි පියාඹලා ඉස්සරත් ගියේ කියලා කියන්නේ අන්න ඒ අදහසින් .

දුව හැමවෙලේම වගේ ඉන්නේ ගෙදර . නැත්නම් ගේ ඇතුලේ . දුවට ආශ්‍රය කරන්න හම්බුනේ ගමේ කීප දෙනෙක් විතරයි . ඒත් තාත්තා ගමේ ගොඩක් අය ආශ්‍රය කළා . ඒවගේම වඩුමඩුවට එන අය ආශ්‍රය කළා . ඒ නිසා ඒ අයගෙන් අහන දේවල් සහ ගමේ සිදුවෙන දකින දේවල් වලින් තමන්ගේ දුවටත් ඒ ඉරණමම අත්වෙයි කියලා බයෙන් ඉන්න ඇති . තමන්ගේ දුව තවත් පරිස්සම් කරන්න ඕන කියලා මේ තාත්තත් හිතන්න ඇති . හැබැයි දුව ගැන තිබ්බ විශ්වාසය නිසා මේ අවදානම තාත්තාගේ හිතේ ඇතිවුනේ තාවකාලිකව .

වඩු මඩුව ඉස්සරහින් එහෙම පැනලා ගියපු උදවිය ආයෙත් එක දෙක වෙලා එන්නෙත් තමන්ගේ වඩුමඩුව ඉස්සරහින්ම තමයි . තාත්තා මේ දේවලුත් දැකල තියෙන නිසා කිසිම පැකිලීමකින් තොරව තාත්තාට කියන්න පුළුවන් උන්ට සෙයිලමේ මග තොට පාර වැරදුණේ උන්ගේ තියෙන මුස්පේන්තු කම නිසාමන්යි කියලා . ඒත් තාත්තා හීනෙකින්වත් හිතන්නේ නැතිව ඇති තමන්ගේ සිරියාවන්ත දුවටත් මේ දේ සිද්දවෙයි කියලා . අන්න ඒ නිසයි මට දුක රත්තරන් දුවේ කියන්නේ අන්න ඒ නිසා තමයි . මම මුලින් කිව්වනේ තාත්තා දන්නවා කියලා දුව කාත් එක්කද ගියේ කියලා . ඒ කයි තාත්තා මෙහෙම විනිශ්චයකට අවසානයේ පත්වෙලා ඉන්නේ .


මාල බැඳන් සුදු යකඩෙන් රෝස මල වනේ 
මාල ගිරවු ගේ දොරකඩ සින්දු කිවු වෙලේ
හීනෙනුත් හිතුනෙ නෑ මට මොකද කාරණේ 
පාර මතක නම් තාමත් ගේ ළඟයි දුවේ 


දුවෙක් තරුණ වියට පත් වුණාට පස්සේ ඒ දුව පතාගෙන එන්න මනමාලයෝ ගොඩක් මේ පාරේ එහා මෙහා යන අය අතරේ ඉන්නවා කියලා මේ තාත්තා දැනගෙන හිටියා . ඒත් එහෙමයි කියලා දුවව ගේ අස්සෙම තියාගෙන ඉන්නත් බෑ . ඉතින් දුව මිදුල් අතුගාන්න මල් කඩන්න වගේ දේවල් වලට එලියට ආවම මේ පාරේ යන අයත් දුව ගැන විමසිලිමත් වුණා . එහෙම විමසිලිමත් වෙනවා කියලා තාත්තත් දැක්කා . මේ උදවියගෙන් කෙනෙක් දුවව තමන්ගෙන් උදුරාගෙන යනකල් තාත්තා දන්නේ නෑ .

මේ දුවව පතාගෙන බැල්ම දාපු කොල්ලෝ ඔක්කොම වගේ බොරු ෂෝ කාරයෝ . මාල බැඳන් සුදු යකඩෙන් රෝස මල වනේ කියන්නේ අන්න ඒ නිසා . සුදු යකඩ මාලවල දිලිසීම විතරයි . කිසිම වටිනාකමක් නෑ . මේ මාල එල්ලාගෙන ආව කොල්ලොත් එහෙම තමයි . පිට පෙනුම විතරයි . ඇතුලාන්තය ආලෝකමත් නෑ . ඒත් දුවට ඒ මාල ගිරවු කිව්ව සිංදු මොනවද කියලා තේරුම් ගන්න තරම් මොලයක් තිබ්බෙත් නෑ .

තාත්තා මේ ගිරවු ඇවිත් වී කරල දිහා බැල්ම දානවා දැකලත් නිසොල්මනේ ඉන්න ඇත්තේ තාත්තත් ඒ වයස පහුකරපු නිසා වෙන්න ඕන . මොකද එහෙම උනා කියලා කලබල උනොත් වැඩ වරදින්නත් ඉඩ තියෙන නිසා . අනික තමයි මේ තාත්තා තමන්ගේ දුවව ගොඩක් විශ්වාස කරා . අම්මත් නැතිව තමන්ව හදපු ලොකුමහත් කරපු තාත්තාට පිටුපාලා යන එකක් නෑ කියලා හිතුවා . මාලගිරවූ මේ දුවට ඉඟි බිඟි පාන්නේ දුවත් ඒවට ධනාත්මකව ප්‍රතිචාර දක්වපු නිසා කියලා තාත්තා දකින්නේ නෑ . සමහරවිට තමන්ගේ එකාගේ ඇදේ පේන්නේ නැතිව අනුන්ගේ එවුන්ගේ ඇදේ විතරක් පේන්නත් ඇති . හීනෙනුත් හිතුනෙ නෑ මට මොකද කාරණේ කියන්නේ මේ මොකවත් තාත්තට කලින්ම තේරුම් ගන්න බැරිවෙච්ච නිසා .

අවසානයේ පාර මතක නම් තාමත් ගේ ළඟයි දුවේ කියලා තාත්තා කියනවා . අන්න ඒ පදයෙන් තමයි මමනම් හිතන්නේ තාත්තා දන්නවා කියලා දුව ගියේ කාත් එක්කද කියලා . එහෙමත් නැත්නම් ඔන්න තාත්තා දන්නේ නෑ කවුද කියලා . ඒත් මේ සිද්දිය දැක්ක රත්නශ්‍රී මහත්මයා දකින්න ඇති දුවට තාත්තා බලන්න එන්න මහා දුරක් නෑ කියලා .

පාර මතකනම් කියන එකෙන් තාත්තා නොකියා කියන්නේ තාත්තව තාමත් උඹට මතකනම් ගෙදර එන්න මහලොකු දුරක් නෑ . කොල්ලත් එක්කම ගෙදර ඇවිත් තාත්තා බලලා යන්න කියලා . මේ වෙලාවේ මේ තාත්තට කොල්ලට එරෙහිව නැගී හිටින්න හයියක් නැතිව ඇති . වඩු බාස් කෙනෙක් කියන්නේ ඉතින් ආර්ථිකවශයෙන් සහ සමාජීය වශයෙන් මහලොකු හයියක් තියෙන කෙනෙක් නෙවෙයිනේ . අවසානයේ ඔය ගීතය ඔහොමම ඉවරවෙලා ගියා .

මේ ගීතය අදවෙනකොට තාත්තලා කීදෙනෙක් වෙනුවෙන් සාධාරණ උනාද කියලා අපිට කියන්න අමාරුයි . ඒත් ඒ ගීතය සාධාරනීකරණය කරගත්ත තාත්තලාගේ දුවලා අවසානයේ දික්කසාද වීම් , සියදිවි නසාගැනීම් වගේ දේවල් වලට වැඩිහරියක් පෙළඹුනා කියලානම් කියන්න පුළුවන් .







ගීතයේ සංගීත සංයෝජනය ගැනත් යමක් කියන්න ඕන . මේ ගීතය මම ඉස්සර ඉදලා අහන්න පටන් ගත්තේ මේකේ තියෙන බටනලා වාදනය , සිතාර් වාදනය සහ තබ්ලා වාදනය එක්ක තමයි මම වැඩිපුර මේ ගීතය අහනකොට ජීවත් උනේ . තේරුම ගැන හිතුවේ මෙන්න මේ නිසා . ඒ ඉස්සර තිබුණා ස්වර්ණවාහිනියේ හේම නලීන් කරුණාරත්න මහත්මයා ඉදිරිපත් කරපු වැඩසටහනක් . මට නම මතක නෑ . ඒක තිබ්බේ සෙනසුරාදා ඉරිදා දවස්වල හත අට කියන පැයේ .

මේ පැයට එන එක ගායකයෙක් හෝ ගායිකාවක් තමන්ගේ ගීත වල ඉතිහාසය ගැන විස්තර කරමින් ගීත ගායනා කළා . මේ වැඩසටහනෙන් තමයි මම දැනගත්තේ මේ ගීතයේ තියෙන්නේ මෙහෙම කතාවක් කියල . පස්සේ තවත් වැඩසටහන් වල ඒ ගැන ඇහුවට වැඩි විස්තරයක් දැනගත්තේ ඒ වැඩසටහනෙන් . සංගීතය සජීවීව මේ ගීතයට සපයනවා ඉස්සෙල්ලම දැක්කෙත් ඒ වැඩසටහනෙන් . මට මතක හැටියට තබ්ලා වාදනය කරේ නැසීගිය විජේරත්න රණතුංග මහත්මයා . අපි එහෙනම් බලමු මේ ගීතයේ සංගීත සංයෝජනය ගැන .

මේ ගීතයේ පෙර වාදනය ආරම්භ වෙන්නේ බට නලාවකින් . මේ බටනලා වාදනයේ සමහර ස්වර ගැලපීම් වෙස්සන්තර ජාතකේ කවි ගායනා කරන තනුවට ආසන්නයි කියලා දැනෙනවා . කොහොමත් මේ ගීතයේත් තියෙන්නේ දරුව නැති දුකෙන් ශෝක වෙන පියෙකුගේ විලාපයක් නිසා වෙස්සන්තර ජාතකේ කවිවල තනුව මේ ගීතයට වඩාත් ගැළපෙනවා . ඒ කොහොම උනත් මේ බටනලා වාදනය මේ ගීතයට පාළුව එක්ක ශෝක රසය ගෙනත් දෙන්න දායකත්වය ලබා දෙනවා . ඒ ගතිය ලබාදෙන්න සිතාර් එකත් මේ ගීතයට දායක වෙනවා .





කියන්න ඕන අනිත් දෙය තමයි මේ බටනලා වාදනය ඉදිරිපත් කරන්නේ ශිල්පීන් දෙන්නෙක් වෙන්න ඕන කියන කාරණාව . මොකද බටනලා දෙකකින් වාදනය කරනකොට සාමාන්‍යයෙන් ඉහල ශ්රුතිය එක්ක ඊට සමාන පහල ශ්රුතිය තියෙන බටනලා දෙකක් තමයි භාවිතා කරන්නේ . එතකොට ඒ වාදනයේ අමුතු ගතියක් තියෙනවා . මේ බටනලා දෙකේ ශුෂර වීම කවදාවත් එක සමාන වෙන්නේ නෑ . මොකද වාදකයාගේ වාදන ශෛලීය , වාදන ඉරියව්ව , සුළං පහරේ වේගය සහ Blowing angle එක , ඒකට සිංහලෙන් මොකක් කියනවා දන්නේ නෑ . අපි කියමුකෝ පිඹින කෝණය කියලා . ඔය හේතු මුල්කරගත්ත තවත් හේතු ගොඩක් තියෙනවා . ඒ හේතු නිසා සර්වසම බටනලා දෙකක් වාදනය කරත් එකම සංඛ්‍යාතය එන්නේ නෑ . ඒ නිසා එහෙම වාදනය කරනකොට ඒ වාදනය හරිම ලස්සන වෙනවා . මෙතනත් වෙලා තියෙන්නේ එක තමයි . වෙලා නෙවෙයි , සංගීත සංයෝජකයා විහින්ම එහෙම යොදන්න ඇති .







දැන් බටනලා වාදනය භාගයක් දුර ගියාම තබ්ලාව තමන්ගේ ඒකාකාරී රටාව කඩලා ආයෙත් අලුත් වාදන කොටසකට එනවා . එතකොට සිතාර් ඒක ආයෙත් මේ වාදනයට එකතු වෙනවා . සිතාර් වාදනයත් ශෝකාකූලයි . සිතාර් වාදනයත් කෙරෙන්නේ සිතාර් දෙකකින් . සිතාර් එකෙත් වෙන්නේ අර සංඛ්‍යාත ආසන්න වශෙයන් වෙනස් වීම නිසා ඇතිවෙන ස්වර අලංකාර වීම . සිතාර් එකේ නම් සංඛ්‍යාත වෙනස් වෙන්න හේතු වෙන්නේ වාදකයා තත මත ඇඟිල්ල තියන බර , තත ඒ ස්වරය තියෙන ෆ්රේට් එක උඩ එහා මෙහා වීම සහ ෆ්රේට් එක එහා මෙහා වෙලා තිබීම . කොච්චර හරියට ටියුන් කරත් ඔය හේතු තුන නිසා සංඛාත වෙනස් වෙනවා . ඒකෙත් ඇතිවෙන්නේ අමුතු ගතියම තමයි . මේ අමුතු ගතිය නිසාම අපිත් වයලීන් ගොඩක් ටියුන් කරනකොට සංඛ්‍යාතය පොඩ්ඩක් එහා මෙහා වෙන්න ටියුන් කරනවා .

මේ වාදනය බටනලාව සහ සිතාර් එක මුල් කරගෙන ඒ ඒ භාණ්ඩ මාරුවෙන් මාරුවට වාදනය වෙමින් ගීතයට හොඳ ආරම්භයක් ලබාදෙනවා . තවත් කියන්න ඕන දෙයක් තමයි තාල වාදනයත් මේ ගීතයේ යුගලයක් විදියට වෙන්නේ . මම කිව්වට තබ්ලාවෙන් වාදනය වෙනවා කියලා . තබ්ලාව විතරක් නෙවෙයි . හොඳට අහලා බලන්න . මේකේ තබ්ලාවයි ඩොල්කියකුයි දෙකක් වාදනය වෙනවා . තාල වාදනය දෙකකින් කරාම වෙන්නේ එකම තාලය දෙන්නම එකට වාදනය කරත් දෙන්නගේ ඇඟිලි වාදන භාණ්ඩයේ හමත් එක්ක ස්පර්ශවෙන වෙලාවේ වෙන සුළු වෙනස් වීම නිසා නිපදවෙන හඬ දෙක මිශ්‍රවෙලා ඇහෙන එක . එතකොට ඒ වාදනයෙත් තියෙන්නේ අමුතු ගතියම තමයි .








 


ගීතයේ තාල වාදනය ගැන තව එක දෙයක් කියන්න ඕන . පාළුව මූසල බව ඇති කරන්න මේ ගීතය පුරාවටම තාලයේ ප්‍රධාන තාල ස්ථානවල ට්‍රෑන්ගල් කියන වාදන භාණ්ඩය වාදනය කරනවා . ට්‍රෑන්ගල් කියන එක ත්‍රිකෝණ හැඩයට නාවලා තියෙන ලෝහ කම්බියක් . ඒකට තවත් ලෝහ කූරකින් තට්ටු කලාම ටින්....... ගාලා සද්දයක් එනවා . තාලම්පොටක් වාදනය කළා වගේ . ඒත් තාලම්පොටට වඩා ට්‍රෑන්ගල් එකේ හඬ තියුණුයි .







ගීතයේ කෝඩ්ස් වාදනය කරන්න ගිටාර් එක දායක උනාට ඒ ගිටාර් වාදනය හරිම සංයමයෙන් තමයි කෙරෙන්නේ . විමසිල්ලෙන් ඇහුවේ නැත්නම් එහෙම එකක් නෑ වගේ . බේස් ගිටාර් ඒකත් තනි නෝට් එක එක වාදනය කරනවා මිස සංකීර්ණ බේස් ගිටාර් පැටන් වලින් මේ ගීතයට ලොකු සහයක් දක්වන්නේ නෑ . ඒත් ඒ සංයමය නිසා මේ ගීතව වඩාත් අලංකාර වෙලාත් තියෙනවා .











පෙර වාදනය ඉවරයි . ගායකයා තමන්ගේ ශෝකී ස්වරය ඉස්මතු කරනවා . මේ ගීතයේ මම වඩාත් කැමතිම තැනක් තමයි පුංචි සාවියේ කියන තැන . ගීතය අහන අය සංවේදී වෙන එක තැනක් එතන කියලා කියන්න පුළුවන් . මන්ද කියාපන් නොකියා හැංගිලා ගියේ කිව්වට පස්සේ බටනලාවෙන් පොඩි පාට් එකක් වාදනය කරනවා . අන්න එතන එක බටනලාවක් විතරයි වාදනය කරන්නේ . ඔයාලට බටනලා දෙකක් ගහනකොට කොහොමද කියලයි එකක් ගහනකොට කොහොමද කියලයි අන්න එතනින් වෙන් කරලා අඳුර ගන්න පුළුවන් වෙන්න ඕන . මේ ගීතයේ තවත් සංවේදී ගායන ස්ථානයක් තමයි ලැයිම් කාමරේ කියන කොටස . ගීතයේ ස්ථායි කොටසේ තබ්ලාවේ " න " අක්ෂරය වාදනය වෙනවා වැඩියි . ඒ නිසා ඒ කොටසට වැඩි අලංකාරයක් ලැබිලා තියෙනවා .

දැන් අතුරු වාදනයට එනවා . අතුරු වාදනයෙදී තබ්ලාව තාලයක් විදියට දිගටම වාදනය වෙන්නේ නෑ . ඒත් ට්‍රෑන්ගල් එකෙනුයි තබ්ලාවෙනුයි වාදනයේ ආඝාතය රැකගන්න පුළුවන් විදියේ වාදනයක් ඉදිරිපත් කරනවා . මම තවත් කැමති කොටසක් තමයි මේ ගීතයේ අතුරු වාදනයේ තියෙන සිතාර් වාදනය . ගීතයේ තේමාව මේ සිතාර් වාදනයෙන් ඉස්මතු වෙනවා වගේම අන්තරා කොටස්වල තියෙන ශෝක රසය ශ්‍රාවකයාගේ හදවතට ඇතුල් කරන්න මේ සිතාර් වාදනය හොඳ ආරම්භයක් ලබා දෙනවා .

දැන් ගීතයේ අන්තරා කොටස . අන්තරා කොටසේ තබ්ලා වාදනය ස්ථායි කොටසට වඩා ආකර්ෂණීයයි . මොකද මේ අන්ත්රා කොටසේ තාල වාදනය තාලය පෙරලීමට ලක් කරමින් වාදනය කරනවා . පෙරලනවා කියන්නේ ඉතින් පෙරලනවා තමා . ඒක වචන වලින් කියන්න මම දන්නේ නෑ .  :p . ඒවගේම අන්තරා කොටසේ තබ්ලාවෙන් වැඩිපුර " තිට "  " ක " කියන අක්ෂර වාදනය වෙනවා .

අන්තරා කොටසේ පොඩි පොඩි තැන් පුරවන්න බටනලාවෙන් පොඩි පොඩි පාට් කීපයක් වාදනය කරනවා . මේවත් වාදයන කරන්නේ තනි බටනලාවකින් .

අන්තරා කොටස්වල තියෙන මගතොට පාර වැරදුනේ , පාර මතකනම් කියන තැන් ටිකක් සංවේදී බවක් ගන්නවා කියලා හිතෙනවා .

සමස්ථයක් විදියට ගත්තම ගීතයේ අර්ථ නිරූපණය සංගීත සංයෝජනය මගින් සාර්ථකත්වයට අරගෙන ආව ගීතයක් විදියට මේ ගීතය හඳුන්වන්න පුළුවන් .

පැනලා යන්න හිතාගෙන ඉන්න අය පැනලා නොයන තත්වෙට වැඩ කටයුතු දැන්ම තියා සූදානම් කරගන්න උත්සාහ කරන්න කියලා ඉල්ලමින් මේ ලිපිය මම මෙතනින් නවත්තනවා .


ඔබ සැමට සමන් දෙවිඳුගේ පිහිට ලැබේවා !