Sunday, April 26, 2015

ඔබ ඈත සඳ වී පායා මම මෑත තරුවක පිපිලා









ගොඩක් වෙලාවට ගීතයකට තේරුමක් ලියන්න කියලා හිතනකොට ඒ කිට්ටුවට හරි ගලපන්න පුළුවන් මට අත්දකින්න ලැබුණ කතාවකුත් මම මතක් කරලා ලියනවා . ඒත් ඇත්ත ජීවිතේ මමනම් කරන්නේ මේකේ අනික් පැත්ත . වැඩිපුරම මම කරන්නේ අහන්න දකින්න ලැබෙන දේවල් වලට ගීත තෝරලා බේරලා ගළපන එක . සිංදුවාඅයියා සහ සිංදුවාමල්ලි මේ ගැන හොඳට දන්නවා මම හිතන්නේ .

සමහර වෙලාවල්වලදී මම ප්ලේ කරන සිංදුවල තේරුම සිංදුවාට තේරුම් ගියාම " නවත්තපන් නවත්තපන් ඕක " කියලා කෑගහන වෙලාවල් මෙතෙකැයි කියන්න බැහැ පිංවතුනි . සිංදුමල්ලිත් සමහර වෙලාවට කියන්නේ " වෙන ෆන් සිංදු මුකුත් නැද්ද , ඕකනම් අහන්න බෑ " කියලා . හිහ් හිහ් හිහ් හිහ්......... අවස්ථාවට ගීත ගලපන ඒ වැඩේ ලේසියි . ඒත් ගීතයකට අවස්ථාවක් ගලපන්න ගියාම ටිකක් අනාථ වෙනවා වගේ හැගීමක් දැනෙනවා . ඒ අපේ අත්දැකීම් ගොඩක් වෙලාවට හිතේ හිඩ්න් වෙලා තියෙන නිසා වෙන්නැති . 

ඉතින් අදත් ලියන්න කියලා හිතාගෙන ඉන්න ගීතයට පූර්විකාව ගන්න මම මතක් කරනවා මෙන්න මෙහෙම සිදුවීමක් . හැබැයි මම දන්න හැටියට අද වෙනකොට මගෙ මේ යහළුවත් යෙහෙළියත් දෙපැත්තට වෙලා ටිකක් දවස් වෙනවා . මේ යාළුවා මාත් එක්ක නෙවෙයි ඉගෙන ගත්තේ . වෙන ඉස්කෝලෙක යාලුවෙක් . 

ඒත් මගෙ හොඳම යාලුවෙක්ගෙ යාළුකම නිසා මේ යාළුවව මටත් අඳුරගන්න පුළුවන් උනා . ඉස්කෝලේ යන කාලේ නැත්නම් උසස්පෙළට ක්ලාස් යනකාලේ අපේ යාළුවො කස්ටිය එකතුවෙලා කුමන්ත්‍රණ කරන එක තැනක් තිබුණා . ඉතින් මේ යාළුවත් අපේ සෙට් එකට එකතු උනා වගේම අපි කුමන්ත්‍රණ කළා , එහෙ මෙහෙ ඇවිද්දා , මියුසිකල් ෂෝ වලට පුරුදු උනා වගේ වැඩ කිඩ ගොඩක් කළා . 

මේ කාලේ වෙනකොට වයලීනෝ පාසැල් ප්‍රේමයට පැටලිලා අවුරුදු එකහමාරක් දෙකක් විතර ගෙවලා හිටියේ . සිංදුමල්ලිත් මට මතක හැටියට දෙක තුන හතර පහකටම පැටලිලා හිටියේ හඃ හඃ හඃ හඃ . මම මේ කියන යාලුවා ස්ත්‍රී පරානයකට බැල්ම දැම්මේ 2008 වගේ කාලේ . කොහොමහරි මට මතකයි 2009 ජුලි 11 හෝ 12 දවල් මම ටවුන් එකට ගියා අපේ ආච්චිඅම්මගේගේ ෆොටෝ එකට දාන්න මල් මාලයක් ගන්න . ඒ ගිහින් ගෙදර එනකොට මේ යාලුවා මට හම්බෙලා කිට්කැට් එකක් දීල කිව්වා " මේ ඇනිවසරි එකට පාටිය මචං " කියලා . හැබැයි මට හරියටම ඒක මතක නෑ ඒ ඇනිවසරියද නැත්නම් කොකු පාටියද කියලා . කොහොමහරි එදා මට ඒ යාළුවා ඔය කතා දෙකෙන් එකක් කිව්වා . එව්වා ගොඩ දාගන්න කාපු කටු දැක්ක නිසා අපිත් ගොඩක් සතුටු උනා උටත් එහෙනම් හරිගියානේ කියලා .







ටික ටික ඉතින් දැන් දෙන්නා ගමන් බිමන් එහෙම එකට එනවා අපිට පේනවා . ක්ලාස් එන්නේ යන්නේ එහෙම එකට . අපිත් ඉතින් උන් දෙන්නට නොකිව්ව කතාවක් නෑ . සමහර වෙලාවට දෙන්නා එනකොටම චාටර් කරන්න පටන් අරන් චාටර් කිරීමේ අන්තයටම චාටර් කරනවා . මෙහෙම මෙහෙම මේ ප්‍රේම කතාව ලෝකප්‍රසිද්ද ප්‍රේම කතාවක් වෙලා අන්තිමට ඔන්න ගෙවල් වලිනුත් දැනගත්තා . තාම උසස්පෙළ ලියන්න උනේ නෑ අපිට . මෙහෙම කාලයක් යනකොට මගෙ මේ යාළුවා ඒ ගෑණුළමයාගේ ගෙදරත් යන්න එන්න පටන් ගත්තා . 

මෙව්වා මෙහෙම වෙනකොට දවසක් මමයි සිංදුමල්ලියි මේ ගැන කල්පනා කරලා බලලා කරලා මේ දෙන්නටම වෙන වෙනම කිව්වා මචන් මචීන් ඔහොම ගෙවල් වල යන්න එන්න ගත්ත එකනම් ඒ හැටි හොඳ නෑ , ඒ නිසා ඒ ගමන තව ටිකක් පස්සට දැම්මනම් හොඳයි නේද කියලා . ඊට පස්සේ උසස්පෙළ විභාගය ලං වුණා . අන්තිමට අපි ක්ලාස් ගිය දවසේ මේ යාළුවගේ වෙනසක් දැක්කත් මම හිතුවේ නෑ එදා ඒ කිව්ව දේ නිසා මිනිහා අපිත් එක්ක අප්සැට් ගහලා ඉන්නේ කියලා . කොහොමහරි ඉතින් මිනිහා කාලයක් ඕකට අපිත් එක්ක අප්සැට් ගහලා හිටියා කියලා මට තේරුණා . අපිත් අපිට මොකෝ කියලා හිටියා . පස්සේ එව්වා ශේප් වෙලා ගිහින් ආයෙත් සුපුරුදු පරිදි අපි හැමෝම ෆිට් එකේ හිටියා . 

ඒත් මේ යාළුවා ඒ ගෑණු ළමයාගේ ගෙදර විශේෂ දේවල් වලට පවා සහභාගී උනා . ඉතින් මම දන්නා හැටියට ගමේ මිනිස්සු පවා මේ දෙන්නා කලක පටන් බොහොම එකමුතුයි කියලා දැනගෙන හිටියා . උසස්පෙළ කරපු කාලේ ඉඳලා මේ දක්වා ගතවුණු කාලය අතරතුර මේ දෙන්නා අතරේ කීප වතාවක්ම වෙච්ච හැලහැප්පීම් නිසා දෙන්නා වෙන් වෙන්න යනකොට අපි මැදිහත්වෙලා ඒවා සමනය කරලා දෙන්නා ශේප් කරා . පස්සේ පස්සේ ඉතින් පවුල් ප්‍රශ්න වලට පිටින් ඉන්න අපි අත දාන්න හොඳ නැති නිසා අපි සයිලන්ට් උනා . 

එහෙමම කැම්පස් ගියාට පස්සේ වැඩිය යාළුවො සෙට් එක හම්බුනේවත් එක එක්කෙනාගේ ඒවෙනකොට ඉන්න සිටුඒෂන් එක කොහොමද කියලාවත් කතා කරන්න උනේ නෑ . දැනට සති දෙකතුනකට කලින් දැනගන්න ලැබුණා මේ දෙන්නා වෙන් වුණා කියලා . මම ඉතින් ඒක වැඩිය ගණන් ගත්තේ නෑ . මොකද මේ වගේ කීප වතාවක්ම වෙන් වෙලා ආයෙත් දෙන්නා සෙට් වෙච්ච නිසා . ඒත් මගෙ තවත් හොඳම යාළුවෙක් කතා කරලා කිව්වා මේ කතාව ඇත්තටම වෙලා කියලා . එවෙලේ වයලීනොට සංවේගය පහලවුනා . 

ඉතින් දවසක් ටවුන් එකට ආව වෙලාවේ මේ යාළුවා මට මුණගැහුනා හදිස්සියේ ගමනක් යනගමන් . ඉතින් මම ඇහුවා මොකද උඹ අරක නැවැත්තුවා කියන්නේ ඇත්තද කියලා . පස්සේ මිනිහා කිව්වා ඔව් බං අම්මලත් මට හොඳටම දොස් කිව්වා ගෙවල් වල අයත් ආව ගිය නිසා කියලා . ඉතින් මමත් කිව්වා මිනිහට උඹ ඔය තීරණය ගන්න කල් ගත්තා වැඩියි බං කියලා . එතනින් කතාව නැවතුනා . මේවාට හේතු භූත වෙච්ච දේවල් වත් මොනාද කියලා තාම හරි හැටි දැනගන්න ලැබුණේ නෑ මිනිහගෙන් . උන් ඉතින් වෙන් වෙලානම් දැන් ඕවා හරිහැටි දැනගෙන වැඩකුත් නෑ . හැබැයි ඔව්වා අමතක කරලා ආයෙත් දෙන්නා එකතු වෙනවනම් අපි කැමතියි .






මම එදා හිතුවේ මේ දෙන්නා වෙන් වෙන්න හේතුව උනේ එකිනෙකා ලං වුනා වැඩි නිසා කියලා . මම අද හිතන්නෙත් එහෙමම තමයි . සමහරවිට ඒ තීරණය වැරදි වෙන්නත් පුළුවන් . මොකද ඒක එක එක ප්‍රේමවන්තයින්ගේ ප්‍රේමවන්තියන්ගේ ගතිගුණ සහ තේරුම් ගැනීමේ හැකියාව මත වෙනස් වෙන්න පුළුවන් නිසා . ඒත් කාලයක් තිස්සේ මේ දෙන්නා අපේ ඇස් මානයේ හිටපු නිසා මට නිකමට හිතුන මේ දෙන්නා ලං වෙලා හිටියා වැඩි නිසා ඒ හේතුව මත ඇතිවෙන තත්ත්වය නිසා වෙන් වුනා කියලා . 

අපි ආදරය කරන්න පටන් ගන්න කාලේ ගොඩක් වෙලාවට පෙනුමට තමයි ආදරය කරන්න පටන් ගන්නේ . ඉතින් ජීවිතේට කතාකරලා නැති , අඩුම තරමේ කතාකරන්න පුලුවන්ද බැරිද කියලාවත් දන්නේ නැති කෙනෙක්ට හිතෙන් විතරක් ආදරය කරන්න පටන් ගන්නවා . ඒ කාලෙට අපේ හිත්වල ඇතිවෙන හැගීම් සුන්දරයි මනස්කාන්තයි අරුමැසියි කොයිල් සහගතයි . ඊට පස්සේ ඔන්න පස්සෙන් යන්න පටන් ගන්නවා , නැත්නම් මොකක් හරි විදියකින් කැමැත්ත අකමැත්ත අහන්න පෙළඹෙනවා . 

මේ කාලෙට ඇතිවෙන්නේ ආදරයයි බයයි මික්ස් වෙලා ඇතිවෙන හැගීමක් . කැමතියි කිව්වොත් ලොවෙත් මල් . අකමැතියි කිව්වොත් සමහරු වෙනතක යන්න යනවා . තම සමහරු ටිකක් සෝක මූඩ් ගහලා විස්සෝපෙන් කල් ගෙවනවා . කැමතියි කිව්වොත් ඒ කිව්වට පස්සේ හිතේ ඇතිවෙන්නේ අර දුරින් ඉඳලා ඇතිවෙච්ච ආදරයට වඩා වෙනස් හැගීමක් . ඊට පස්සේ දෙන්නා වැඩි හරියක් ජීවත් වෙන්නේ එකිනෙකා ගැන වද වෙන ලෝකයක . කෑවද බිව්වද නෑවද ගෙදර ආවද කීයටද ආවේ කාත් එක්කද ආවේ මොනවද කලේ කාත් එක්කද කලේ කොච්චර වෙලා කලාද අරවද මේවද ප්‍රශ්න ගොඩයි . සමහරවිට වැඩිය හම්බෙන්න වෙන්නේ නැති ප්‍රේමවන්තයෝ ප්‍රේමවන්තියෝ ටිකක් ඔය වගේ වෙනවා කියලා මම සහසුද්දෙන්ම දන්නවා . මේ කාලෙට එකිනෙකා ගැන තියෙන්නේ පරිස්සම් කිරීමේ අරමුණක් . අනික තමන්ට නොලැබෙන අනුන්ට ලැබෙන පොඩි පොඩි අවස්ථාවන් ගැන ඉරිසියාවක් . 

පස්සේ ඔහොම ඔහොම ගිහිල්ලා මේ ප්‍රේමවන්තයෝ ප්‍රේමවන්තියෝ තමන්ගේ ආදර කතා ගෙවල් වලට කිව්වට පස්සේ එයාලාගේ ආදරය කිරීමේ විලාශය කලින්ට වඩා හාත්පසින්ම වෙනස් වෙනවා . ගෙවල් වල යන්න එන්න ගත්තම ඒ ආදරය තවත් දුරට වෙනස් වෙනවා . ප්‍රේමවන්තයින් ප්‍රේමවන්තියන් මෙහෙම එකිනෙකා වෙත ලංවෙන්න ලංවෙන්න අර මුලින්ම තිබුණ අරුමැසි ආදරය යතාර්ථවාදී ආදරයක් බවට පත් වෙනවා . ඒක ගෙවල් වලට කියන්න කලින් ඉන්නේ කවදද මේවා කියලා පිළිවෙලක් කරගන්නේ කියලා . ඒත් කිව්වට පස්සේ හිතෙනවා අපරාදේ කිව්වේ කියලා . මොකද එතකොට ඇතිවෙන තත්ත්වය ටිකක අමුතු නිසා . එතකොට දෙන්නා ආදරය කරන්නේ අම්මලා තාත්තලා දැනුවත්ව . ඒ නිසා හොරෙන් ආදරය කරනකොට තියෙන නැවුම් පසුබිම ආයෙත් ඇතිවෙන්නේ නෑ  . ඒ නිසා පිංවතුනි ලවු කරනකොට ගෙවල් වලට මාට්ටු උනත් නැවැත්තුවා කියලා හොරෙන් ලවු කරන්න . බඳින්න කිට්ටු කරලා ගෙවල් වලට කියන්න . නැත්නම් ඕක මහා ප්‍රශ්න ගොඩක මුලක් වෙනවා .







ආදරය මේ විදියට යතාර්ථවාදී වීම එකිනෙකා විසින් භාරගන්නේ කොයි කොයි ප්‍රමානවලින්ද කියන එක ඒ ඒ දෙන්නා විසින් අවබෝධ කරගෙන හිටියේ නැත්නම් ඔන්න ඔතනදී තමයි ප්‍රශ්න ඇතිවෙන්න පටන් ගන්නේ මම හිතන විදියට . යොවුන් ආදරයේ තියෙන බොළඳ ගති පැවතුම් මේ යතාර්ථවාදී වීම නිසා අඩුවෙලා යනවා . ජීවන අර්බුදයට මූණ දෙන්න ගත්තම මේ බොළඳ වීම සමහරවිට නැත්තටම නැතිවෙලා යනවා . මම හිතන්නේ පවුල් ප්‍රශ්න ඇතිවෙන්න උනත් ආරම්භය මෙතන වෙන්න පුළුවන් කියලා . 

ඒවා එහෙම උනත් අනිත් කෙනාට ඒවා කෙලින් කියන්නේ නැහැ ගොඩක් වෙලාවට . එයාලා හිතන්නේ අනිත් කෙනා ඒවා ඒ විදියට කරන්න දැනගන්න ඕන කියලා . ගෑණු ළමයි ගොඩක් වෙලාවට මෙහෙමමයි . කොල්ලා ඔක්කොම දේවල් පැත්තක තියලා ජීවන අරගලයේ ගැටෙන්නේ දෙන්නටම හොඳ ලෝකයක් හදාගන්න ඕන නිසා කියලා තේරුම් ගන්න ගෑණු ළමයි ඉදිරිපත් වෙන්නේ හරිම මන්දගාමී විදියට . අඩුගානේ මේක කියවලා එක කෙල්ලෙක්වත් ඒක ඉගෙනගත්තනම් ඒක ලොකු දෙයක් වයලීනොට නිවන් සුව අත්වෙන්න .

මොකද කොල්ලෙක්ට තියෙන පීඩනය හරිම වැඩියි . ඉගෙනගන්න එක , රස්සාව , ආර්ථික මට්ටම , ගෙවල් දොරවල් , වාහන , අමතර ආදායම් මාර්ග එක්ක මේ අතරෙ අම්මලා තාත්තලාගේ ප්‍රශ්න ගෙවල්වල ප්‍රශ්න ඉඩම් ප්‍රශ්න එක්ක ආදරේ කරන්නත් ඕන . ඇනිවසරි සමරන්න , බර්ත්ඩේ සමරන්න , යාලුවන්ගේ ඒවා සමරන්න ඒවා මේවා ඔක්කොම එකතු කරලා ගත්තම කොල්ලෙක්ට මේ ප්‍රශ්න වලින් වැඩි බරක් යනවා කියන එක ඇත්ත නේද ? . හැබැයි හැම කෙල්ලම මෙහෙම පැත්තකට වෙන්නේ නෑ . සමහර අය ඉන්නවා කොල්ලා එක්ක හරි හරියට වැඩ කරලා ලයිෆ් එක ගොඩදාගන්න මහන්සි වෙන අය . එයාලට අපේ ගෞරවය . නැති අය එහෙම වෙන්න ට්‍රයි කරන්න ඈ.... :) 

මේ තැන දක්වා විතරයි වයලීනොට කියන්න පුළුවන්කම තියෙන්නේ . මොකද වයලීනොවත් වයලීනොගේ සමීප යාලුවන්වත් තවමත් ඔයින් එහා පියවරවල් වලට මුල පුරලා නැති නිසා . ඒත් ලං වෙන්න ලං වෙන්න ඈත් වෙන්න තියෙන සම්භාවිතාව වැඩියි කියලා පොඩ්ඩක් මතක තියාගන්න . ඒ නිසා ප්‍රේමවන්තයෝ ප්‍රේමවන්තියෝ සීමාව ඉක්මවා ලං වෙනවා කියන්නේ වෙන් වීමත් අතින් අරගෙනම තමයි කියන එක වයලීනෝ තරයේම කියා හිටිනවා . ඕකට තමයි කියන්නේ අර හැමදාම දකින කුකුලගේ මොකක්ද එක මොකක්ද එකක් කියලා . ඒ නිසා හැමෝටම තම තමන්ගේ ආදර කතා සුන්දරව බැරිනම් අඩු තරමේ ගින්දරව කෙලවරකර නොගන්නා විදියට ගොඩදාගන්න හැකියාව ලැබේවා කියලා වයලීනෝ ප්‍රාර්ථනා කරනවා . 
( මටත් එසේම වේවා ! )







ඉතින් අද කියන්න යන ගීතයත් මම හිතුවා ඒ වගේ කියලා . මේ ගීතයට තේරුම් දෙකක් දෙන්න තමයි හිතාගෙන ඉන්නේ . ඒ නිසා මේ ලිපිය සමහරවිට ගොඩක්ම දීර්ග ලිපියක් වෙන්න පුළුවන් හරිය . මම කියන්න යන ගීතය තමයි මේ තියෙන්නේ 

ඔබ ඈත සඳ වී පායා..
මම මෑත තරුවක පිපිලා..
මේ නිසල රැයේ ලොව නිදනා..
මා ඔබ ඔබ මා ළඟ ඉන්නා..

අප දුරින් දුරක වුව තනියේ..
නෙත් සරින් පමණි හමුවූයේ..
ඒ ඈත් බවිනි හද බඳුනේ..
සෙනෙහසේ සොඳුරු බව පිරුනේ..

මධු සඳ තරු අද හමුවීලා..
සිටියද ඔබ මා ළංවීලා..
ඒ දුරක එදා අප පිපිලා..
තිබු සොඳුරු සෙනේ ගඟ සිඳිලා..


ගී පද :- ආචාර්ය ජයලත් මනෝරත්න
සංගීතය හා තනුව :- එච් එම් ජයවර්ධන
ගායනය :- බණ්ඩාර අතාවුද










මේ ගීතය රචනා කරලා තියෙන්නේ ආචාර්ය ජයලත් මනෝරත්න මහත්මයා . මම වඩාත් ගරු කරන නාට්‍ය වේදීන් දෙපලෙන් එක්කෙනෙක් තමයි මනෝරත්න මහත්මයා . මනෝරත්න මහත්මයා තමයි මට මතක හැටියට " බයිසිකලය " ටෙලි නාට්‍යයේ සියදෝරිස් චරිතයට පණපෙව්වේ . ඒ චරිතය තමයි මම එතුමා දැක්ක පරණම චරිතය . ඊට පස්සේ ගොඩක් ටෙලි නාට්‍ය වේදිකා නාට්‍ය සිනමා කෘති වල දැකලා තියෙනවා . මනෝරත්න මහත්මයාගේ දේශන අහන්නත් මම වැඩිපුර කැමතියි . ඒ එතුමාගේ තියෙන බහුශ්‍රතබව ඒ දේශන වලින් ඉස්මතුවෙන නිසා . මේ ගීතය මෙතුමා රචනා කරා කියලා දැනගත්තම පුදුම හිතුනත් එතුමාගේ තියෙන තිරස්ව විහිදීගිය දැනුම සහ හැකියාව එක්ක ඒක අරුමයක් නෙවෙයි කියලා හිතාගන්න පුළුවන් .






මේ ගීතයට තනුව නිර්මාණය කරලා තියෙන්නේ ප්‍රවීණ සංගීතඥ එච් එම් ජයවර්ධන මහත්මයා . එතුමා බටනලාවෙන් ඉපදුන සංගීතඥයෙක් . ඒ නිසා ඒ සලකුණ මේ ගීතයේ සටහන කරන්න එතුමා අමතක කරලා නෑ .



                


මේ ගීතය ගායනා කරන්නේ බණ්ඩාර අතාවුද මහත්මයා . වයලීනයෙන් බිහිවුන තවත් ගායකයෙක් . ඒ නිසා වයලීනොට ටිකක් වැදගත් චරිතයක් . ඒ වගේම බණ්ඩාර ආතාවුද මහත්මයාගේ ගෝලයින් එක්ක සංගීත තරඟ වලදී තරඟවදින්නත් කීප වතාවක්ම වයලීනෝට අවස්ථාව ලැබුණා . ඒ නිසා මෙතුමා මටනම් කොහොමත් අමතක නොවන චරිතයක් . එතුමාගේ තවත් වැදගත්කමක් තමයි එතුමා කොයිම වෙලාවකවත් තමන්ගේ ගීත මුල් ගායනයෙන් වෙනස් වන ආකාරයෙන් ගායනා නොකිරීම . මෙතුමාගේ ගායනා හරිම පුදුම විදියට මුල් ගායනයත් එක්ක සමීප වෙනවා .

එහෙනම් අපි බලමු මේ ගීතය කොහොමද දිගහැරෙන්නේ කියලා .

යොවුන් ආදරය කියන මාතෘකාව එක තැනකින් පටන් අරගෙන තවත් තැනකින් ඉවර කරන්න පුළුවන් මාතෘකාවක් නෙවෙයි . යාතාර්තවාදීවීමත් එක්ක මම අර කලින් කිව්වා වගේ මේක යටපත් වුණාට කවුරු කවුරුත් කොච්චර වයස ගියත් මේ යොවුන් ආදරයට ආදරය කරනවා . ඉතින් ඔන්න ඔහොම ආදරය කරපු යුවලක් මේ ගීතයේ ජීවත් වෙනවා . තරුණ වයසේ ආදරයක උවමනාව තදින්ම දැනුන දෙන්නෙක් . මේ ගීතයේ ජීවත්වෙන පෙම්වතිය ටිකක් සල්ලි තියෙන පොහොසත් පවුලක කෙනෙක් . පෙම්වතා මධ්‍යම පාංතික පවුලක කෙනෙක් . හැබැයි අන්ත දුගියෙකුත් නෙවෙයි .

මෙයාලා ආදරය කරන්න පටන් ගන්නේ අධ්‍යාපනය ලබන කාලයේ වෙන්න බැහැ . අධ්‍යාපනය ලබාගෙන දෙන්නම රැකියාවක් කරන කාලයේ තමයි ආදරය කරන්න පෙළඹෙන්නේ . ඉතින් මේ දෙන්නාගේ ආදරය ගෙවල්වල ආශිර්වාද මැද්දේ විවාහයෙන් කෙලවර වෙනවා . මංගල රාත්‍රියේ මධුසමය ගත කරලා දැන් දෙන්නා නිදාගන්න හදන වෙලාව . පෙම්වතිය දැන් තමන්ගේ බිරිඳ බවට පත්වෙලා ඉවරයි . ඉතින් අභිනව ස්වාමි පුර්ෂ භූමිකාවට ආව පෙම්වතා තවම නිදි නැහැ . හැබැයි පෙම්වතිය මධුසමයේ අසිරිය විඳලා දැන් තමන්ගේ ස්වාමියාට තුරුල් වෙලා හොඳට නිදි . දැන් ස්වාමි පුර්ෂයා තමන්ගේ බිරිඳ දිහා බලාගෙන මෙහෙම හිතනවා .

ඔබ ඈත සඳ වී පායා..
මම මෑත තරුවක පිපිලා..
මේ නිසල රැයේ ලොව නිදනා..
මා ඔබ ඔබ මා ළඟ ඉන්නා..

මම මුලින්ම කිව්වා මේ පෙම්වතා මධ්‍යම පාංතික පෙම්වතෙක් කියලා . ඉතින් ආර්ථික මට්ටම පෙම්වතියට වඩා පෙම්වතාගේ අඩුයි . පෙම්වතිය පොහොසත් . මේ පද පේලි කීපයෙන් දෙවිදියක අර්ථයක් ඉස්මතු වෙනවා . සඳ , හිරුගෙන් ලැබෙන ආලෝකය පරාවර්තනය කරලා පොළවට එවනවා . පෙම්වතිය තමන්ගේ දෙමාපියන්ගේ ආර්ථිකයෙන් සවිමත් වෙලා ඒ සවි ශක්තිය පෙම්වතාට ලබා දෙනවා . පෙම්වතා තරුව . තරුවට හිරුගෙනුත් ආලෝකය ලැබෙනවා . ඒ එක්කම සඳුගෙනුත් ආලෝයක ලැබෙනවා . ඒ දෙකම තරුවකට ලැබෙනවා . ඒ කියන්නේ පෙම්වතාට තමන්ගේ අම්මා තාත්තාගේ ආර්ථිකයේ සවි ශක්තිය දායාද මගින් ලැබෙනවා . ඒවගේම තමන්ගේ පෙම්වතිය නිර්ලෝභීව ලබා දෙන ඇයට හිමි දායාදවල හිමිකමත් පෙම්වතාට ලබා දෙනවා . ඉතින් හඳයි තරුයි දෙන්නා පෙම්වතයි පෙම්වතියයි කියලා ගැළපෙනවා නේද ?

මේ දෙන්නගේ ආදර බැඳීම විවාහයෙන් කෙළවර වෙලා . දැන් මදුසමයේ රස විඳපු වෙලාව . පෙම්වතිය තමන්ට තුරුල් වෙලා නිදාගන්න වෙලාව . රාත්‍රියම නිහඬයි නිසලයි නිස්කලංකයි . ඒ වගේම මුලෝ ලෝකයම නිදිගත් මොහොතක් . ඒත් පෙම්වතයි පෙම්වතියයි ලංවෙලා තුරුල් වෙලා ආදරයේ උණුසුම විඳිනවා . ඒ උණුසුමත් එක්ක පෙම්වතා අලුත් ජීවිතය ගැන විනිශ්චයකට පැමිණෙනවා .

අප දුරින් දුරක වුව තනියේ..
නෙත් සරින් පමණි හමුවූයේ..
ඒ ඈත් බවිනි හද බඳුනේ..
සෙනෙහසේ සොඳුරු බව පිරුනේ..

පෙම්වතා සිහිපත් කරනවා දෙන්නා ආදරය කරපු කාලේ කරපු කියපු දේවල් . මෙයාලා පාසැල් යනකාලේ නැත්නම් විශ්වවිද්‍යාලයේ ඉගෙනගන්න කාලේ වගේ නිදහස් කාලයක ආදරය කරන්න පටන් ගත්තනම් එයාලට එකිනෙකා හමුවෙන්න අදහස් හුවමාරු කරගන්න ලොකු කාලයක් ලැබෙනවා . ඒත් මෙතන උනේ එහෙම නෙවෙයි . දෙන්නා විවාහ වෙන්න ලං වෙච්ච වයසක තමයි ආදරය කරන්න යොමු උනේ . ඒ නිසා එයාලට වැඩි කාලයක් ආදරය කරන්න හමුවෙන්න උනේ නැහැ . ගෙවල් වලින් මේ ගැන දැනගෙන ඉක්මනටම විවාහය සිද්ද කරනවා . ඉතින් පෙම්වතා කියනවා අපිට වැඩි කාලයක් ආදරේ කරන්න ලැබුණෙත් නැහැ . ඒවගේම අපිට හැමදාම හම්බෙන්න ලැබුණෙත් නැහැ . ඒ ඈත් බව නිසාම අපේ හිත්වල තිබුණ ආදරය අඩු උනේ නැහැ . උනානම් උනේ හද බඳුනේ තිබුණ සොඳුරු ආදරය තවත් වැඩි වෙච්ච එක තමයි කියලා . හැබැයි මේ ආදරය කාලෙන් කාලෙට එක එක පාටවල් වලින් පාට වුණා .

මධු සඳ තරු අද හමුවීලා..
සිටියද ඔබ මා ළංවීලා..
ඒ දුරක එදා අප පිපිලා..
තිබු සොඳුරු සෙනේ ගඟ සිඳිලා..

එක එක පාටවලින් එක එක කාලෙට එක එක මෝස්තරේට පාට වෙච්ච අපේ ආදරය අද සඵල වෙලා . සඳයි තරුවයි අද මධුසමයේ හමුවීලා තියෙනවා . පෙම්වතා මෙහෙම හිතුවට පෙම්වතාට මතක් වෙනවා දෙන්නා ආදරය කරන්න මුල්ම හැගීම ඇතිවෙච්ච කාලේ ගැන , ඊට පස්සේ පස්සෙන් ගිය කාලය නැත්නම් පැත්තෙන් ගිය කාලය , ඊට පස්සේ හම්බෙලා කතාබහ කරලා ආදරය කරපු කාලය , ඊට පස්සේ ගෙවල් වලට කියලා ආදරය කරපු කාලය , අන්තිමටම මධුසමය ගතකරන්න මොහොතකට පෙර සහ මධුසමය ගතකරාට පස්සේ කියන කාලය ගැන . මේ එක එක කාල වලදී මේ පෙම්වතා සහ පෙම්වතිය එකිනෙකාට ආදරය කරපු හැටි දෙන්නට මතක් වෙනවා . පෙම්වතාට මේ කාල තුල ඇතිවුන ආදරය ගැන සාපේක්ෂ සංසන්දනයක් කරලා දැන් තත්ත්වය සහ එදා තත්ත්වය ගැන සමාලෝචනයක් කරන්න වැඩි වෙලාවක් ගතවෙන්නේ නැහැ .

ඉතින් පෙම්වතාට පේනවා එතකොට එදා දුර අතීතයේ අප අතරේ තිබුණ සොඳුරු සෙනෙහස අද වෙනකොට සිඳිලා ගිහිල්ලා කියලා . ඒ කියන්නේ තව තවත් දෙන්නට දෙන්නා ලං වෙන්න ලං වෙන්න ආදරයේ තියෙන නැවුම් බව ටික ටික අඩුවෙන්න පටන් අරගෙන කියලා . සමහර ප්‍රේමවන්තයෝ ප්‍රේමවන්තියෝ මාත් එක්ක එකඟ වෙන එකක් නැහැ . මොකද ලං වෙන්න ලං වෙන්න තවත් ලං වෙන්න බලනවා මිස ඈත් වෙන්න තියෙනඉඩ  අඩුයි කියලා එයාලා විශ්වාස කරන නිසා ( කාන්දම් තමා එහෙම වෙන්නේ ) . හා හා කමක් නෑ . දැනට ඔහොම හිතාගෙන ඉන්න . ඒත් පස්සේ කාලෙකදී තේරෙයි ඒකෙත් පොඩි ඇත්තක් තියෙනවා කියලා . ඒ කාලෙට දෙන්නට දෙන්නා ප්‍රශ්න දාගන්නේ නැතිව , ඇතිවෙච්ච ප්‍රශ්න සාමකාමීව විසඳගෙන , නොතාරිස්ගෙන් පටන්ගත්ත ගමන නීතිඥයාගෙන් කෙලවර කරගන්නේ නැතිව කතාබහ කරලා දෙන්නට දෙන්නා තම තමන්ගේ ඕනෑ එපාකම් අවෙඅබෝධ කරගෙන ජීවත්වෙනවානම් ඒ ඇති .







මේ ගීතය ක්ලික් වෙච්ච දවසේ ඉඳලා ගොඩක් දවස් වලට වැඩ නැති වෙලාවට මේ ගීතය බෝඩිමේදී ප්ලේ කරා . නිකමට වගේ මම සින්දු මල්ලිගෙන් ඇහුවා කොහොම තේරුමක් මේකට ඇතිද කියලා හිතලා බලන්න කියලා . සිංදුව අහන් ඉන්න වෙලාවට අහන් හිටියට මොකද සිංදුමල්ලි මේගැන විමසිල්ලෙන් අහන් ඉඳලා නෑ . ඉතින් ආයෙත් මුල ඉඳලා අහලා ස්ථායි කොටසටයි පළවෙනි අන්තරා කොටසටයි එයත් කිව්වේ මම කිව්වා වගේ අදහසක් . ඒත් දෙවෙනි අන්තරා කොටසෙන් කියවෙන්නේ වෙනමම තේරුමක් කියලා සිංදු මල්ලි කිව්වා . මම ඒකත් ඔන්නොහෙ මෙතන සටහන් කරන්නම් .

මධු සඳ තරු අද හමුවීලා..
සිටියද ඔබ මා ළංවීලා..
ඒ දුරක එදා අප පිපිලා..
තිබු සොඳුරු සෙනේ ගඟ සිඳිලා..

පෙම්වතයි පෙම්වතියයි ආදරය කරන්න ගත්තේ විවාහ වෙන්න කිට්ටු වයසක කියලා මම මුලින්ම කිව්වා . ඉතින් මෙහෙම ආදරය කරාට මොකද පෙම්වතිය ටිකක් විතර සංකර චරිතයක් , හැබැයි ඒ ඉස්සර . ඉතින් පෙම්වතිය පාසැල් සමයේ ඉඳලා මේ වෙනකල් කීප දෙනෙක් එක්කම ආදර සම්බන්ධතා පවත්වලා තියෙනවා . මේ වෙලාවක ඒ කෙනෙක් අතින් පෙම්වතියගේ චරිතය අපිරිසිදු වෙලත් තියෙනවා . ඉතින් අභාවයට ගිය කන්‍යා භාවයක් එක්ක පෙම්වතිය මේ ගීතයේ ඉන්න පෙම්වතා එක්ක විවාහ වෙනවා . ඒත් මේ පෙම්වතා දන්නේ නෑ පෙම්වතිය කලින්ම මධුසමය ගත කරලා කියලා . සමහරවිට පෙම්වතිය බයවෙන්න ඇති ඒ ගැන කියන්න , මොකද මේ පෙම්වතාත් තමන්ට නැතිවෙයි කියලා . ඒ නිසා දෙන්නා විවාහ වෙනවා මේ මොකවත් දන්නේ නැතුව .

විවාහ වෙලා මධුසමය ගත කරන්න යනවා . මධු සඳ තරු අද හමු වීලා සිටියද ඔබ මා ලං වීලා කියන්නේ පෙම්වතයි පෙම්වතියයි ඉන්නේ මධු සමයේ කියන එක . ඒ දුරක එදා අප පිපිලා තිබු සොඳුරු සෙනේ ගඟ සිඳිලා , ඒ කියන්නේ මධුසමය ගත කරත්දී පෙම්වතා දැනගන්නවා පෙම්වතිය කන්‍යාවියක් නෙවෙයි කියලා . ඒත් දෙන්නට දෙන්නා අතරේ තිබුණ ආදරය නිසා පෙම්වතා පෙම්වතියට වෙනසක් පෙන්වන්නේ නෑ . මේ ගැන අහන්න යන්නෙත් නෑ . පෙම්වතා පිටින් පෙන්නුවේ නැතත් හිතෙන් මේ ගැන ප්‍රශ්න කරනවා . ඒ වගේම පෙම්වතිය මේ වෙලාවේ සතුටෙන් ඉන්නවා පෙම්වතා මේ ගැන ප්‍රශ්න කරේ නැති නිසා . ඉතින් පෙම්වතිය සතුටෙන් නිදි . ඒත් පෙම්වතා තවම කල්පනා කරනවා .





පෙම්වතා පෙම්වතිය කෙරෙහි අසීමිත ආදරයකින් තමයි ජීවත් වෙන්නේ . ඒත් මේ සිද්දිය නිසා පෙම්වතාගේ ඒ ආදරය පොඩ්ඩක් දෙදරනවා . සමහරවිට ඊළඟ පියවරේ මේ ඔක්කොම සංසිඳිලා මේ දෙන්නා ආයෙත් මුලින්වගේම ආදරෙන් ඉන්න ඉඩ තියෙනවා . එහෙමත් නැත්නම් වෙන් වෙන්න තරමට මේ ප්‍රශ්නය දුර දිග ගිහින් දෙන්නා දික්කසාද වෙන්නත් ඉඩ තියෙනවා . ඒ තීරණය මොකක්ද කියලා තීරණය කරන්න කියවන ඔබට භාරයි .

මේ ගීතයේ සංගීත සංයෝජනය ගැන වැඩි යමක් කියන්න මට මීටර් වෙන්නේ නෑ . හැබැයි මම මුලින් කිව්වා වගේ එච් එම් ජයවර්ධන මහත්මයා මේ ගීතයේ තමන්ගේ සලකුණ මේ ගීතයේ සටහන් කරලා තියෙනවා බටනලාවෙන් . ඒ වගේම තමයි රාත්‍රිය කියන පසුබිම ඇතිකරන්න මේ ගීතයේ සමහර වාදය භාණ්ඩ දායක වෙනවා . ගීතයේ පෙර වාදන සහ අතුරු වාදන වාදනය කරන්න දායක වෙන සිතාරය සහ ඕගන් එකේ තියෙන සිතාර් හඬ මිශ්‍රවෙලා එන හඬ රාත්‍රිය කියන පසුබිම ඇති කරන්න හොඳින් දායක වෙනවා .

මේ ගීතය අද වෙනකොට පැරණි සංගීත සංයෝජනයයි නව සංගීත සංයෝජනයයි කියලා සංස්කරණ දෙකක් ඇවිත් තියෙනවා . වැඩිපුර ඇහෙන්නේ නම් නව සංස්කරණය . මමනම් වැඩිපුරම කැමති නව සංස්කරණයට . මොකද මට හිතෙන ඇහෙන විදියට නව සංස්කරණයේ සංගීත සංයෝජනය මේ ගීතයට වඩාත් සාධාරණයක් කරනවා කියලා විශ්වාසයි මට . හැබැයි ඒ අපේ තේරීම නිසා වෙන්නත් පුළුවන් . වෙනත් කෙනෙක්ට මේ ගීතයේ පැරණි සංස්කරණය වඩාත් හොඳ වෙන්න පුළුවන් . ඒ තේරීමත් ඔන්න ඔබට භාරයි . මේ ගීත දෙකේම බණ්ඩාර අතාවුදයන්ගේ ගයනා කිරීම , ස්වර වර්ණ ඉදිරිපත් කිරීම් ගොඩක් දුරට සමානයි කියලා මට හිතෙනවා . දක්ෂ ගායකයෙකුගේ හැකියාවක් තමයි මෙහෙම වෙනසක් දැනෙන්නේ නැතිවෙන්න එකම ගීතය නැවත ගායනා කිරීම . බණ්ඩාර අතාවුදයන් සාර්ථකව ඒ අභියෝගය ජයගෙන තියෙනවා මේ ගීතයේ .

මාසෙකට දෙකකට ආයෙත් ලියන්න වෙන්නේ නැති හැඩයි . මොකද වයලීනොට ආයෙත් එක්සෑම් කිට්ටුවෙලා තියෙන්නේ . ඒ නිසා ආයෙත් නිදහසක් ලැබුණම අපි ලියමු . එහෙනම්

ඔබ සැමට සමන් දෙවිඳුගේ පිහිට ලැබේවා !

මේ තියෙන්නේ ගීතයේ පැරණි සහ නව සංස්කරණ දෙක






Saturday, April 11, 2015

මියැසියේ රස කෑම - පොළොස් ව්‍යංජනය







මේ දවස්වල වයලීනෝ සූප ශාස්ත්‍රය පිළිබඳව වැඩිදුර අධ්‍යනයක යෙදිලා ඉන්නේ . මොකද කියනවනම් බැරිවෙලාවත් ලුණු තුනපහ දාගන්න බැරි බවලතියක් අපේ ගෙදර යතුරු කැරැල්ලට උරුමකම් කියාගෙන ආවොත් ඒකිට බම්බු ගහගන්න කියලා මම මට ඕන කෑම හදාගෙනවත් කන්නෙපාය හිටං . ඒ නිසා මම සියලු උයන්න බැරි කෙල්ලන්ගේ කොල්ලන් වෙනුවෙන් අද ඉඳලා පටන් ගන්නවා කෑම සූත්‍ර කියන කැටගරිය යටතේ කෑම වර්ග නිවසේදීම සාදාගන්නා ආකාරය පිළිබඳව පාඩම් මාලාවක් . මේක පිරිමින් සඳහා විශේෂ වන අතර ගෑණු පාර්සවේටත් ඕනනම් ඔලුව දාලා යන්ට පුළුවන් .

ඉතින් මචංලා ඉස්සෙල්ලාම පොළොස් ව්‍යංජනය හදන්න කලින් අවශ්‍ය කළමනා ටික ලං කරගෙන කෙල්ලව කුස්සියෙන් එළවලා ඉන්න ඕන . මොකද ඔව්වා ඉගෙනගත්තොත් කෙල්ල අපිට පස්සේ දවසක කලර්ස් පෙන්නන්න බැරි නැහැ . ඔන්න එහෙනම් අවශ්‍ය ද්‍රව්‍ය

පොළොස් ගෙඩි එකක් ( ඇඹුල හදන්න හොඳ වයසක )
පොල් ගෙඩි එකක්
කබලේ රත්කරගත් මිරිස්කුඩු මේස හැඳි 4
තුනපහ කුඩු මේස හැඳි 1
ගම්මිරිස් කුඩු ජුන්ඩක්
කහ කුඩු ජුන්ඩක්
උළුහාල් ජුන්ඩක්
ලුණු ජුන්ඩක්
රතුළූණු 15g විතර
උම්ම්ම්ම්ම්ම්ම්ම්බලකඩ 15g විතර
අමුමිරිස් කරල් 4ක්
කරාබුනැටි 5ක් 6ක් විතර
සුදුළූණු බික් 5ක් විතර
ගොරක කැබලි හතරක් විතර
රම්පෙ කොළ එකක්
කුරුඳු පොතු කෑලි එකක් ( කුඩුජුන්ඩක් නම්  වඩා හොඳයි , නැත්නම් කනකොට ඕක හැපෙනවා මල වදේ )
කරපිංචා කිනිති දෙකක්

මේවා එහෙන් මෙහෙන් ලං කරගෙන මෙන්න මෙහෙමයි දැන් හදන්න ගන්නේ හරිද .

ඉස්සෙල්ලම පොළොස් ගෙඩියක් ගහෙන් කඩාගෙන හිටං හොඳට හෝදලා ගෙඩිය අඟල් එකක් විතර ගණකම් පෙති පෙති කපන්න . දැන් ඉතින් මචංලා , ගොන් ප්‍රශ්න අහන්නෙපා පොතුගැහුවේ නැ නේද කියලා . නෑ තමයි . පෙති කපලා ඉවරවෙලා පොතු කපන්න වටේට වටේට . ඊටපස්සේ මේ පොළොස් රවුම් වලින් , රවුමක් කෑලි අටක් වෙන විදියට හරහට කපලා ගත්තම නිකන් හැපිකවූ චීස් පෙට්ටියේ චීස් කෑලි වගේ පේනවා . මේ කෑලිවල තියෙනවා හීනිම පැත්තේ පොළොස් ගෙඩියේ නහල්ල කියල කොටසක් . මේකෙන් භාගයක් විතර කපලා ඉවත් කරගන්න ඕන . නැත්නම් ඒක හයියට හැපෙනවා . ඊට පස්සේ මේ කෑලි ඔක්කොම කපාගත්තට පස්සේ හොඳට හෝදලා පැත්තකින් තියාගන්න .

දැන් පොල් ගෙඩිය ගාලා බ්ලෙන්ඩර් කරලා පළවෙනි මිටිකිරි ටික පැත්තකින් තියන්න . ඊට පස්සේ ආයෙත් බ්ලෙන්ඩර් කරලා දියකිරි අරගෙන මේ දියකිරි ටිකයි මිරිස් කුඩු තුනපහ කහ ගම්මිරිස් උළුහාල් සහ කුරුඳු පොතු එක්ක මැටි වලඳකට පොළොස් කැබලි ටිකත් එක්ක දාන්න . ඊට පස්සේ ගොරකා කරාබුනැටි සුදුළූණු ගලේ තලලා දාන්න . මම කිව්වේ මිරිස් ගලේ දාලා තලලා දාන්න කියලා . ඊට පස්සේ රතුළූණු අමුමිරිස් උම්ම්ම්ම්ම්ම්ම්ම්ම්ම්ම්ම්ම්ම්බලකඩ රම්පෙ කරපිංචා කෑලි කපලා දාලා ලිපේ තියලා හොඳට ගින්දර දාන්න . පොළොස් කෑලි තැම්බෙනකල් මෙහෙම ගින්දරේ තම්බන්න ඕන . ආ මතක ඇතුව ලුණු ටිකකුත් දාන්න පොළොස් කෑලි වලට ලුණු රහ වදින්නත් එක්ක .

පොළොස් කෑලි තැම්බිලාද නැත්ද කියලා බලන්න පොළොස් කෑල්ලක් අරගෙන අර නහල්ල කපා දාපු පැත්තේ පොඩ්ඩක් තද කරලා බලන්න එබෙනවද කියලා . තැම්බිලානම් එව්වා නිකන් මෙව්වා වගේ එබෙනවා . ඊට පස්සේ ගින්දර අඩු කරලා මිටි කිරි ටික දාගන්න . ඊට පස්සේ මද ගින්නේ පොළොස් ටික පිස ගන්න . මද ගින්නේ ටික වෙලාවක් තියලා හොඳට පිසගෙන ලුණු රහ බලලා ලුණු මදිනම් තව ටිකක් දාලා වැඩේ ගොඩ කියලා කන්ෆර්ම් උනාම ලිපෙන් බාලා පැත්තකින් තියාගෙන බත් කන වෙලාවට කෙල්ලට දෙන්නේ නැතුව තනියම බෙදාගෙන කන්න . මොකද හදන්න දන්නේ නැත්නම් කන්නත් ඕන නෑ කියලා කෙල්ලට කියන්න . කවුද කිව්වේ ඇහුවොත්  මියැසියේ රසකතා ලියන වයලීනෝට සිංදුවා කියලා , ඒක වයලීනෝ පෝස්ට් එකකින් කිව්වා කියන්න .

සමහර පැතිවල පොළොස් රෑ එළිවෙනකල් තම්බලා පොළොස් ඇඹුලක් හදනවා . එව්වා හදනහැටි පස්සේ දවසක දාන්නම් . මෙන්න මේකත් ප්ලේ කරලා යන්න .

පුංචි කාලේ පොළොස් කියලා
ලොකු වෙනකොට කොස් කියනවා
පැණිවරකා රස විඳ විඳ
පොරවෙන් කල ගුණ පුදනව
බත් ගහ කොස් ගහ දෙන්න එකයිනේ 
බත් ගහ කැපුවොත් අපි ඉවරයිනේ

වැඩ බැරිනම් පොළොස කියලා
ගමේ ඈයෝ පද බඳිනවා
අරටුව හොඳ කෙලින් හැදෙන කාටත් රට හිස නමනවා
කිරි කොස් අටුකොස් පොළොස් මැල්ලුම්
කාපු ගුණයටයි කොස් ගහ කැපුවේ

කොස් නොදන්න මහත්වරුන්
කොස් ගැන මහ පොත් ලියනවා
පානදුරේ කොස් මාමා සහශ්‍රකයටත් වටිනවා
කිරි කොස් අටුකොස් පොළොස් මැල්ලුම්
කාපු ගුණයටයි කොස් ගහ කැපුවේ

පද රචනය -
තනුව -
ගායනය -





ඔබ සැමට කෑම බීම මුරුතැන් වලට අරක්ගත් දේවතාවාගේ පිහිටයි .

Thursday, April 9, 2015

මේ ලොව යම් දවසක අපි වෙන්වෙමු , රහස් අහස් තලයට පවරා







ටික දවසක් සද්ද නැතුව හිටියේ වැඩ වැඩි නිසාමත් නෙවෙයි . ලියන්න තරම් මූඩ් එකක් තිබ්බේ නැති නිසා . අද ඔන්න දවස් දෙකතුනක ඉඳලා ට්‍රයි කරලා කරලා මූඩ් හදාගෙන ලියන්න යන්නේ අලුත් කතාවක් එක්ක ගීතයක් . මේ ගීතය ගැන කලින් සිංදුයියා ලියලා තිබුණා මෙන්න මේ ලිපියේ . කියෙව්වේ නැති අයට ඔන්න කියවලා එන්න පුලුවන් .

අපේ නැන්දා වැඩ කරන්නේ අධිකරණයක ස්ටෙනෝ ග්‍රැෆර් කෙනෙක් විදියට . එයාලට කරන්න තියෙන්නේ නඩු අහන වෙලාවට නඩුකාරයා ළඟ ඉඳගෙන නඩුව ඔක්කොම සටහන් කරගෙන පස්සේ ඒ වාර්තාව ටයිප් කරලා නඩු වාර්තා හදන්න . මෙයාලා ඒවෙලාවට ලියන්නේ ලඝු ලේඛන ක්‍රමය උපයෝගී කරගෙන . ඒවා නිකන් බ්‍රාහ්මීය අක්ෂර වගේ . ඉරි කෑලි කොටු කෑලි තමයි තියෙන්නේ . පස්සේ ඒවා සිංහලයට පෙරල පෙරල ටයිප් කරලා වාර්තාව හදනවා .

ඉතින් ඔහොම හදන නඩු වාර්තා සමහර වෙලාවට නැන්දා ගෙදර ගෙනල්ලත් හදනවා . ඒ හදනකොට ටයිප් කර කර තියන නඩු වාර්තා කියවලා බලන්න වයලීනොටත් අවස්ථාවක් ලැබුණා . මේ එහෙම කතාවක් . නම් ගම් පාවිච්චි කරන්නේ නෑ . මොකද මේක නඩුවක් නිසා . මේක කියෙව්වෙත් මම හෙන ඉස්සර කාලේ . දැන්නම් මට මතක හැටියට මෙහෙම නඩු වාර්තා ගෙවල් වලට ගෙනැල්ල හදන්නේ දෙන්නේ නැත්ද කොහෙද . මොකද මේවායේ රහස්‍යභාවය ගැන ප්‍රශ්න ඇතිවෙන නිසා . හිහ් හිහ් හිහ් හිහ් . ඊට කලින්  වෙලාවට මේක කියවලා තියාගත්තේ .






රත්නපුරේ පැත්තේ වෙළඳ ව්‍යාපාරික මහත්මයෙක් ඉන්නවා . එයා වෙළඳාම් කරන්නේ කරවල උම්ම්ම්ම්ම්ම්ම්ම්ම්ම්ම්ම්ම්ම්ම්ම්ම්බලකඩ හාල්මැස්සෝ වගේ දේවල් . ඉතින් මෙයා සතියකට දෙවතාවක් විතර දකුණු ලකේ අගනගරේ පැත්තට ගිහින් මේවා එකතුකරගෙන එනවා . සමහර වෙලාවට වාහන අරගෙන ගිහිල්ලත් එකතුකරන් එනවා . ඒ නැත්නම් මෙයා ගෝනිවල මේවා අහුරගෙන බස් එකෙත් ගේනවා .මේ ව්‍යාපාරිකයා සමහර දවස්වලදී කරවල උම්ම්ම්ම්ම්ම්ම්ම්ම්ම්ම්ම්ම්ම්ම්බලකඩ ගන්න ගියාම ඒ පළාතේ තමන්ගේ යාලුවෙක්ගෙ ගෙදර නවාතැන් ගන්නවා . සමහරවිට මේ ගෙදරත් ඉන්න ඇත්තේ මේ ව්‍යාපාර වලට සම්බන්ධ කෙනෙක් වෙන්න ඇති . කොහොම හරි මේ දෙන්නා කලක පටන් බොහොම එකමුතුයි .

මේ ගෙදර හිටියා බඳින වයසේ ලස්සන දුවෙක් . මේ දුවට ප්‍රේම සම්බන්ධයක් තිබුණා ගමේ මාළු කොල්ලෙක් එක්ක . ඒත් ගෙදරින් කැමතිවෙලා තිබුණේ නැහැ ඒකට . සමාජ තත්ත්වය නිසා කියලා කියමුකෝ ඉතින් අකැමති වෙන්න හේතුව . ස්මාහරවිට කුල කේස් එකක් නිසා වෙන්නත් පුළුවන් . ඉතින් මේ අපේ පැත්තේ ඉන්න ව්‍යාපාරිකයා දවසක් රෑ එහෙ නැවතිලා ඉන්නවෙලාවේ කරපු කතාබහක් දුරදි ගිහින් එයාගේ පුතාව මම මේ කිව්ව ගෙදර දුවට යෝජනා කෙරෙනවා . දුවගේ ගෙදරින් තමයි මේ යෝජනාව කරන්නේ . හැබැයි අපේ පැත්තේ ඉඳලා ගියපු ව්‍යාපාරික උන්නැහෙත් මේකට කැමති වෙනවා . මොකද දන්නා අඳුරන කෙනෙක් නිසා . හැබැයි එදා එයා දැනගෙන ඉඳලා නැහැ මේ මගුල කතා කරේ දුවගේ නොගැලපෙන සම්බන්ධය නැතිකරන්න විසඳුමක් විදියට කියලා . පස්සේ ඔන්න ගෙවල් වලින් ගිහින් දැකබලාගෙන මගුල තීන්දු උනා .

මේ පුතා ටිකක් අහිංසක පුතෙක් . හරියට වයලීනෝ වගේමයි . කෙල්ලෙක් දිහා ඇහැක් අරලාවත් බලන්නේ නෑ . තරමක් දුරට ඉගෙනගෙනත් තියෙනවා . ඒත් වතුවලින් ලැබෙන ආදායම ප්‍රමාණවත් නිසා ඒවා නඩත්තු කරගෙන ගෙදරට වෙලා ඉන්න පුතෙක් මෙයා . ඉතින් ඔන්න කසාදෙත් කෙරුනා . වත්සුණු සුවඳින් සුවඳ කරලා පෙම් කුසුමන් හද පුබුදු කරවලා ආසිරි මංගල ගීත පතුරවලා දුවව කැන්දාගෙන රත්නපුරේට එක්ක ආවා .





ටික කාලයක් යනකොට ඔන්න පවුල් ප්‍රශ්න ඇතිවෙනවා . කෙල්ලට අඩුම තරමේ උයන්නවත් බැහැලු . කොල්ලා තමයි ගෙදර උයනවා කියන්නේ . අන්තිමට කෙල්ල පරන කොල්ලත් එක්ක ගනුදෙනු කරනවා මේ පුතාට අතටම අහුවෙනවා . ඒ නිසා කොල්ලා මේවා අම්මලා තාත්තලාට කියනවා . පස්සේ අම්මලා තාත්තලා කෙල්ලගේ අම්මලා තාත්තලාටත් කියනවා . ඊට පස්සේ මාර වැඩක් උනේ . කෙල්ල කියනවා මේ කොල්ලත් එක්ක ජීවත් වෙන්න බෑ දික්කසාද වෙන්න ඕන කියලා . ඒ එක්කම මේ කෙල්ල කොල්ලගෙන් වන්දි ඉල්ලනවා ( ටේප් පටි කැඩුවට වෙන්නැති ) . මෙතන වෙලා තියෙන්නේ නඩුත් හාමුදුරුවන්ගේ බඩුත් හාමුදුරුවන්ගේ වගේ වැඩක් .

ඒත් කොල්ලා මේ වෙලාවේ සංවේදී තීරණයකට එනවා . කොල්ලා කියනවා එයාට මාත් එක්ක ඉන්න බැරිනම් මම දික්කසාදය දෙන්නම් . වන්දියත් දෙන්නම් , මට බලෙන් මෙයාව ළඟ තියාගන්න උවමනාවක් නෑ කියලා . කොල්ලා ටිකක් අහිංසක පාටට ඉන්න නිසා කෙල්ල මෙවෙලාවේ යුතු ප්‍රයෝජනයජ්ක් විදියට වන්දි ඉල්ලුවා වෙන්නත් පුළුවන් . ඒත් කොල්ලා කැමතිවෙනවා වන්දියත් දෙන්න . කෙල්ල වන්දිය විදියට ඉල්ලන්නේ ලක්ෂ දහයක් . දැනට අවුරුදු හතකට විතර කලින් ලක්ෂ දහයක් මම හිතන්නේ මරූටියක තුන්කාලක් විතර ගන්න පුළුවන් වගේ . අන්තිමට දෙන්නා වෙන් වෙනවා . මේ දික්කසාදවෙච්ච පිරිමි ළමයත් කියන්න ඇත්තේ මේ ගීතය කියලා වයලීනොට නිකමට හිතුනා .

සඳකැන් වැසිලා අඳුරේ එතිලා
ගණඳුරු රෑ තනිකම නෑ
සොයා එන්න ගණඳුරු තරු නිවලා
මගේ එළිය අද ඔබ පමණී

ජිවිතම සතු එකම සුවේ
හී සර පහරක වෙලෙනු පෙනේ
මේ ලොව මා සතු ඈ සතු ඒ නෙතු
අසල් වාසියෙකු සොයනු දැනේ

මා නැත අන්සතු සිත් බිඳලා
දෑතම බැඳගෙන ඉඳිමි බලා
මේ ලොව යම් දවසක අපි වෙන්වෙමු
රහස් අහස් තලයට පවරා

පද රචනය - ප්‍රේමකීර්ති ද අල්විස්



සංගීතය - වික්ටර් රත්නායක
ගායනය - වික්ටර් රත්නායක




මේ ගීතයේ මම කැමතිම සංස්කරණය තමයි මේ . මම හිතනවා මේ සංස්කරණයට වඩා තවත් පරණ එකක් තියෙනවා කියලා . ඒත් මේ සංස්කරණයේ සංගීත සංයෝජනයේ තියෙන මටසිළුටු ස්වර වර්ණ වලට මම කැමතියි .



මේ තියෙන්නේ මේ ගීතයේ නවතම සංස්කරණය . ඒ ඩෙල් ස්ටූඩියෝ සංගීත වැඩසටහන මගින් සංගීත සංයෝජනය කරලා පටිගත කරපු ගීතය . ඒකටත් මම කැමතියි . ඒ මොකද කියලා මම කියන්නම්කො කතාව කියාගෙන කියාගෙන යනකොට .





මේක ප්‍රේමකීර්ති මහත්තයාගේ පෞද්ගලික අත්දැකීමක් කියලා කියනවා . වෙන්න පුළුවන් . එච්ච දේවල් එක්ක ඉතින් මේක එහෙම වෙන්න ඇති . මොකද ලියන අය ගොඩක් වෙලාවට තමන්ගේ ඇඟිලි තුඩෙන් ලෝකයට විසි කරන්නේ තමන්ගේ හිතේ ඇඳෙන රූප වචන වලට පෙරලලා කියනවනේ . ඒ නිසා මේකත් එහෙම වෙන්න පුළුවන් . ඒත් මම ඒ කතා මෙතන කියන්න අවස්ථාවක් කරගන්නේ නැහැ . මොකද අර මම මුලින් කිව්ව ලිපියේ සිංදුයියා එව්වා පිළිවෙලට ලියලා තියෙන නිසා . මම ආයෙත් කියන්නේ ඒක කියෙව්වේ නැත්නම් කියවන එක හොඳයි මෙයාලා . හරියා .







සඳකැන් වැසිලා අඳුරේ එතිලා
ගණඳුරු රෑ තනිකම නෑ
සොයා එන්න ගණඳුරු තරු නිවලා
මගේ එළිය අද ඔබ පමණී

තමන්ගේ ජීවිතය මේ සිද්දවෙන දේවල් නිසා කොච්චර අඳුරකට පත්වෙලා තියෙනවද කියලා මේ ගීතයේ ජීවත්වෙන පුද්ගලයා කල්පනා කරනවා . තමන්ගේ ජීවිතයට අද හඳ එළිය වැටෙන්නේ නෑ , ඒ කියන්නේ තමන්ගේ බිරිඳ තමයි තමන්ගේ ජීවිතයට පායපු හඳ . පිරිමියෙකුගේ ජීවිතයට ගෑණු පරාණයක හුස්ම පොදක් ගෑවෙන්නේ නැත්නම් එතන පොඩි අවුලක් තියෙනවා . නේද පැට්ටෝ ?  :p  :p  . ඉතින් මේ පුද්ගලයාගේත් ජීවිතයට තිබුණ ආලෝකය ගෙනල්ලා දුන්නේ තමන්ගේ බිරිඳ . මෙතන සඳෙන් දෙන ආලෝකය මම උපමා කරනවා බිරිඳගේ ආදරයට . අඳුර උපමා කරනවා බිරිඳගේ තහනම් ප්‍රේමයට .

එතකොට සඳකැන් වැසිලා අඳුරේ එතිලා කියලා කියන්නේ තමන්වෙත එන ආදරය දැන් නැවතිලා වැහිලා ගිහින් , තහනම් ප්‍රේමයකට බිරිඳ යොමුවෙලා නිසා . ඉතින් මේ පුද්ගලයාගේ ජීවිතයම දැන් පාළු අන්ධකාර රාත්‍රියක් වෙලා කියලා එයා හිතෙන් හිතාගෙන තවත් තනි වෙන්නම උත්සාහ කරනවා . ගණඳුරු රෑ තනිකම නෑ කියලා කියන්නේ තමන්ට තමන් ඉන්න නිසා වෙන කවුරුවත් ඕන නෑ මට මේ තනිකම හොඳයි කියලා හිතන නිසා වෙන්න ඕන . සොයා එන්න ගණඳුරු තරු නිවලා කියන පද පේලියටත් මම ටිකක් වැඩිපුර කැමතියි . මෙතන තරු වලට මම උපමා කරනවා බිරිඳ හැර තමන්ගේ ළඟින් ඉන්න අනිත් අය .

ඒ කියන්නේ හොඳම යාලුවෝ වගේ අය . මෙයාට කොච්චර දුකක් හිතිලා තියෙනවද කියනවනම් මෙයා හිතනවා පාළුව තනිකම සහිත ඝන අන්ධකාරය තමන්ගේ යාළුවනුත් තමා වෙතින් අයින් කරලා තමන් වෙතට එන්න කියලා . අවසාන වශයෙන් මගෙ එළිය අද ඔබ පමණි කියලා ගීතයේ ස්ථායි කොටස නවත්තනවා . මෙයා බිරිඳ එක්ක ජීවත් උනා මිස වෙනත් කාන්තාවන්ගේ පහස ලබන්න යොමු උනේ නෑ . ඒ නිසා මෙයාට බිරිඳගෙන් ලැබෙන ආලෝකයට ආසන්න වශයෙන් සමාන වෙන ආලෝකයක් වත් වෙන කෙනෙක්ගෙන් ලබාගන්න බැහැ . ඒ නිසා මෙයා කියනවා අද මගෙ ජීවිතයට ආලෝකය වෙන්නේ අන්ධකාරය තමයි කියලා .





ජිවිතම සතු එකම සුවේ
හී සර පහරක වෙලෙනු පෙනේ
මේ ලොව මා සතු ඈ සතු ඒ නෙතු
අසල් වාසියෙකු සොයනු දැනේ

ජීවිතයම සතු එකම සුවේ , ඒ තමන්ගේ බිරිඳගෙන් ලැබෙන ආදරය කරුණාව සෙනෙහස . එකම එකම එකම සුවේ කියලා කියන්නේ මේ පුද්ගලයා වෙනත් කාන්තාවන්ගෙන් ආදරය හොයාගෙන ගියේ නෑ කියලා තවදුරටත් සනාථ කරන්න . ඉතින් මේ ජීවිතයම සතු එකම සුවය , හී සර පහරක වෙලෙනු පෙනේ කියන්නේ තමන්ගේ ආදරය මදිවෙලාදෝ වෙනත් කෙනෙක්ගෙන් ආදරය හොයාගෙන යනවා කියන එකට . අනංගයා සමහර වෙලාවට එකම හදවතකට ඊතල දෙක දෙක විදිනවා වෙන්න පුළුවන් . සමහරවිට මිනිහට ඉලක්ක වැරදිලා වෙන්නැති . හැබැයි අනංගයා මේ කරන වැඩෙන් කෙනෙක් සතුටු වෙනවා වගේම තවත් කෙනෙක් දුක් වෙනවා කියලා අනංගයා තේරුම් ගන්න ඕන . හරිද අනංගයෝ ?

මේ ගීතයේ මම වඩාත්ම කැමති පද පේලිය තමයි මේ . ඒ මේ ලොව මා සතු ඈ සතු ඒ නෙතු කියන පද පේලිය . මෙතන අනුප්‍රාස රසය ඉස්මතුවෙලා පේනවා . සතු සතු නෙතු කියන වචන අනුප්‍රාසය ඉස්මතු කරනවා . ඒ වගේම ඒ වචන අතර තියෙන මේ , මා , ඈ කියන වචන දීර්ඝ ආකාරයට ඇදෙන අකුරු නිසා අනුප්‍රාස රසය දෙගුණ තෙගුණ කරන්න ඒවා ඉවහල් වෙනවා කියලා කියන්න පුළුවන් . අසල් වාසියෙකු සොයනු දැනේ කියන්නේ ඉතින් අසල වාසියෙකු සොයනු දැනේ කියන එකටම තමයි :)







මා නැත අන්සතු සිත් බිඳලා
දෑතම බැඳගෙන ඉඳිමි බලා
මේ ලොව යම් දවසක අපි වෙන්වෙමු
රහස් අහස් තලයට පවරා

මේ පුද්ගලයා කාගේවත් සිත් බිඳලා නෑලු . ඒ කියන්නේ කා එක්කවත් අමනාප වෙලා නෑ කියන එක නෙවෙයි . අන්සතු කාන්තාවන් එක්ක ආදරයෙන් වෙලිලා වෙනත් පිරිමින් සතු ආදරණීය සිත් කඩා දාලා නෑ කියන එක තමයි ඒ කියන්නේ . මේ වෙලාවේ තමන්ගේ බිරිඳ වෙන පිරිමියෙක්ගේ ආදරය හොයාගෙන ගිහින් . ඉතින් ඒකට කෑගහලා වැඩක් නෑ . මොකද බිරිඳ තමන්ගෙන් නොලැබුණ රසයක් වෙනත් පිරිමියෙක්ගෙන් හොයාගෙන ගිහින් නිසා .

ඒ රහ කවදාවත් තමන්ට දෙන්න පුළුවන් වෙන්නේ නැතුව ඇති . ඒ නිසා බිරිඳ හොරෙන් හරි ඒ රහ හොයන්න ඇති . ඒකට එක අතකට බිරිඳට දොස් කියන්නත් බෑ . මොකද අසාවල් හිතේ තද කරගෙන ඉන්න පුළුවන් සීමාවක් තියෙනවනේ . හැබැයි තමන්ට තමන්ගේ උවමනාවල් කිව්වනම් සමහරවිට මේ ප්‍රශ්නය මෙච්චර දුර දිග නොයන්න තිබුණා . ඒත් දැන් පරක්කු වැඩියි . ඒ නිසා මේ පුද්ගලයා දෑතම බැඳගෙන බලාගෙන ඉන්නවා තමන්ගේ සහ බිරිඳගේ ජීවන ඉරණම විසඳෙන්නේ කොහොමද කියලා බලාගෙන .

දැන් වෙන කරන්න දෙයක් නැහැ . තවදුරටත් එකට ඉන්නවා කියන්නේ හිත රවට්ටා ගැනීමක් ඒ නිසා මේ පුද්ගලයා කියනවා මේ ලෝකෙදීම ඒ කියන්නේ මිය යන්න කලින් අපි වෙන්වෙමු . නැත්නම් දුක් විඳලා තමන් මිය යන්න පුළුවන් කියලා . රහස් අහස් තලයට පවරා , ඒ කියන්නේ වෙන් වෙන්න හේතුව කාටවත් කියන්නේ නැතුව හොරෙන්ම වෙන් වෙමු . හේතුව අහන අයට වෙන වෙන හේතු කියමු කියලා . මේ පිරිමියා ඇත්තටම ගන්න තීරණය තරමක් සාධාරණයි නේද . මටනම් හිතෙන්නේ එහෙමයි . ඔයාලත් හිතෙන දේවල් කමෙන්ට් කරන්න .






ගීතයේ සංගීත සංයෝජනය ගැන කියන්න දේවල් කීපයක්ම තියෙනවා .

මුලින්ම අපි බලමු තේමා වාදනය කොහොමද කියලා . තේමා වාදනය පටන් ගන්නේ වයලීන් වලින් වාදනය කරන ස්වර හතරකින් . ඒ ස්වර හතර අතරේ ගිටාර් වලින් කෝඩ් පන්ච් එකකුත් කරනවා . මේ ස්වර සංකලනය වෙලා තියෙන විදියට ඇතිවෙන්නේ ජීවිතය ගැන අවිනිශ්චිත හැගීමක් . ඊට පස්සේ බට නලාවකින් වාදනයක් ඉදිරිපත් වෙනවා . ඒ බටනලාව ඉහල ශ්‍රුතියක බටනලාවක් . ඒ කියන්නේ දිගින් අඩු කොට බට නලාවක් . මේ බටනලාවෙන් වෙනත් ගීතවල ඇති කරන්නේ ශ්‍රුන්ගාරාත්මක හැගීම් . ඒත් මේ වෙලාවේ එතන ඇති කරන්නේ විප්‍රලම්භ ශ්‍රුන්ගාරය කියලා කියන්න පුළුවන් . ඊට පස්සේ ආයෙත් වයලීන් වලින්

ටික්කිරි ටී.....
ටික්කිරි ටී.....
ටික්කිරි ටී.....
ටික්කිරි ටී.....

කියලා ඉහල ස්වර ඉඳලා පහල ස්වර වලට වාදනය කරගෙන එනවා . අන්තිමටම තනි වයලීන් එකකින් එක වයලීන් පාට් එකක් වාදනය කරනවා . මේ වයලීන් වාදනය ගීතයේ මුලට එන නිසා මේ වයලීන් වාදනයෙන් ශෝක රසය උඩට අරගෙන ගීතය ආරම්භ කරන්න මුල පුරනවා . ඊට පස්සේ ගීතය ආරම්භ වෙන්නේ ටිකි ටිකි ටිකි ටින් කියලා වාදනය වෙන ගිටාර් සහ පියානෝ වාදනයකින් . ආ ! කියන්න අමතක උනා  ගීතයේ තාල වාදනය කරන්නේ බොංගෝ ඩ්‍රම් එකකින් . ඒ වගේම හයිහැට් එකකින්

ටික් ටික් ටික්කිරි
ටික් ටික් ටික්කිරි
ටික් ටික් ටික්කිරි
ටික් ටික් ටික්කිරි

කියලා තාලය වාදනය කරනවා . බේස් ගිටාර් එකෙන් බේස් නෝට් වාදනය කරනවා තාලය වාදනය වෙන විදියට . ඒත් බේස් ගිටාර් එකෙන් ලොකු ලොකු බේස් පැටන් චේන්ජ් වීමක් මේ ගීතයේ වෙන්නේ නෑ .

ඔන්න දැන් ගීතය ගායනය පටන් ගන්නවා . සඳ කැන් කියනකොටම යටින් පටන් ගන්නවා වයලීන් වලින් කවුන්ටර් පාට් එකක් වාදනය කරන්න . ඒ කවුන්ටර් එක වචන වල තියෙන අවිනිශ්චිත බව සහ ශෝකය මතුපිටට උලුප්පලා පෙන්නන්න හොඳට දායක වෙනවා . වෙන ගීත වලට වඩා මම මේ ගීතයේ වෙනසක් දකිනවා . ඒ තමයි ස්ථායි කොටස ගායනය කෙරෙන දෙවතාවේම කවුන්ටර් එක වාදනය කිරීම . සාමාන්‍යයෙන් වෙන්නේ දෙවෙනි ගායනයේදී කවුන්ටර් එක වාදනය කිරීම . ඒත් මේ ගීතයේ මුල ඉඳලම කවුන්ටර් එක වාදනය කරනවා . ඒක වික්ටර් රත්නායකයන්ගේ සුවිශේෂ සංගීත සංයෝජනයක් .







දැන් එනවා ගීතයේ අතුරු වාදනයට . වයලීන් වලින් ඉතාම පහල ස්වර වලින් වාදනය කරලා අතුරු වාදනය පටන් ගන්නවා . ඊට පස්සේ තනි වයලීන් එකකින් වාදන කොටසක් වාදනය කෙරෙනවා . මේ වාදන කොටස නම් දුකක් තමයි ඉස්මතු කරලා පෙන්වන්නේ . ඊට පස්සේ අයෙත් වයලීන් වලින් වාදන කොටසක් ඉදිරිපත් කරලා ගීතයේ අන්තරා කොටසට එළඹෙනවා . මේ අතුරු වාදනයේ වයලීන් එක්ක චෙලෝ එකක් වාදනය කරනවා . ඒ චෙලෝ එකෙන් වයලීන් පාට් එක්ක වාදනය කෙරෙන බේස් නෝට්ස් වලින් වයලීන් පාට් එකේ තියෙන බර ගතිය වැඩි කරලා තියෙනවා .

දැන් එන්නේ අන්තරා කොටසට . අන්තරා කොටස දෙවතාවක් ගායන කරනවා . ඒ අන්තරා කොටසේ මුල පද දෙක . එයින් පළවෙනි වතාවේ කෝඩ් පන්ච් එකත් එක්ක ගීතය ගායනාවෙලා සම්ප්‍රදායානුකූලව දෙවෙනි වතාවේ කවුන්ටර් එක වාදනය කෙරෙනවා වයලීන් වලින් .






මේ ගීතයේ ගිටාර් කෝඩ්ස් ගැනත් යමක් කියන්න ඕන . කෝඩ්ස් චේන්ජ් වෙන තැන් ගැන බලනකොට ගනඳුරු රෑ තනිකම කියන තැන E කෝඩ් එකක් සහ G කෝඩ් එකක්  චේන්ජ් වෙනවා . ඒ කෝඩ් චේන්ජ් එක මේ ගීතයේ විශේෂ තැනක් කියලා කියන්න පුළුවන් .





ඒ එක්කම මම ඩෙල් ස්ටූඩියෝ එකේ සංගීත සංයෝජනය ගැනත් යමක් කියන්න කැමතියි . ඩෙල් ස්ටූඩියෝ එකේ මම අහපු සාර්ථකම සංගීත සංයෝජනය මේ ගීතයේ සංගීත සංයෝජනය කියලා කියන්න පුළුවන් . හැබැයි ඒ බලපු ඒවායින් විතරයි හරිය . ඒත් එක තැනකට මම කැමති නෑ . ඒ මේ ගීතයේ මුල වාදනයේ ෆ්ලූට් පාට් එකට . ඒක කිසිම වෙනසක් නැතුව වාදනය කරත් එතන වාදනය කරන වෙලාවේ ස්වර පෙරලීම කියන දේ ඕනාවට වඩා වෙන නිසා ටිකක් අවුට් යනවා වගේ ඇහෙනවා . ඒත් හරිම සමබර විදියට ඒ වාදනය කෙරෙනවා .

අනික තමයි කවුන්ටර් නිර්මාණය කරලා තියෙන විදිය . වයලීන් එකේ තියෙන එක ටෙක්නික් එකක් තමයි පිසිකාටෝ කියන්නේ . ඒ බෝ එකෙන් නැතිව ඇඟිල්ලෙන් ටින් ටින් ටින් ගාලා ස්වර වාදනය කරන එක . ඒකත් එක්ක ඇතිවෙන්නේ සිම්ෆනි සම්ප්‍රදායට ගැලෙපන විදියේ සංගීතයක් . ඒ සංගීත සංයෝජනයටත් මම කැමතියි .






ඒවගේම තවත් දෙයක් කියන්න ඕන . අපි ගීත වාදනය කරනකොට ගීතයේ මැද කොටස් වලට වඩා අවධානය යොමු කරන්නේ ගීතයේ ආරම්භය සහ අවසානයට . මොකද ශ්‍රාවකයින්ගේ හිතේ වඩාත් පැලපදියම් වෙන්නේ ගීතයක ආරම්භය සහ අවසානය . මේ ගීතය ආරම්භ කරන්න ඩෙල් ස්ටූඩියෝ කණ්ඩායම යොදලා තියෙන උපක්‍රමය හරිම සාර්ථකයි . ඒවගේම අවසානයත් හරිම පර්ෆෙක්ට් විදියට අවසන් කරනවා . ඒ නිසා සමස්ථයක් හැටියට මේ ගීතයේ සංගීත සංයෝජනය ඩෙල් ස්ටූඩියෝ තුලත් ඉතාම සාර්ථකයි .

තවත් වැදගත් දෙයක් තමයි මේ කියන්න යන්නේ . මේ ගීතයේ මගේ භාන්ඩේට ඒ කියන්නේ වයලීන් එකට දීලා තියෙන බර වැඩියි . ඒකට හේතුවක් වෙන්න පුළුවන් වික්ටර් රත්නායක මහත්මයා වයලීනයෙන් බිහිවෙච්ච සංගීත වේදියෙක් වීම . එතුමාම දවසක් කිව්වා මට මතකයි මෙන්න මේ කතාව . ඒ තමයි වයලීනයේ ස්වර ලකුණු කරලා නෑ . ඒ නිසා එක දසමයක් එහා මෙහා උනාම නෝට්ස් අවුට් වෙනවා . ඒ නිසා වයලීන් වාදකයා හැමවෙලේම වාදනය කරන වෙලාවට ස්වර ගැන කල්පනාවෙන් ඉන්නේ . අවුට් වෙනවා දැනුනොත් ඇඟිලි එහා මෙහා කරලා ඉක්මනටම ඒවා හදාගන්න වයලීන් වාදකයා ඉක්මන් වෙනවා . ඒ නිසාම වයලීන් වාදනය කරන අය ගායන ක්ෂේත්‍රයේ ඉදිරියට එන්න තියෙන ප්‍රවනතාවය වැඩියි කියලා තමයි එතුමා කිව්වේ . ඇත්ත වෙන්න පුළුවන් . මොකද අමරදේවයන් අමරසිරි පීරිස් බණ්ඩාර ආතාවුද වගේ ගායකයින් වයලීනයෙන් බිහිවෙච්ච ගායකයින් නිසා .






මේ ගීතය වාදනය කරන හැමෙලාවකම මට හිතෙනවා මේ ගීතය වයලීනයටම හදපු ගීතයක් කියලා . සමහරවිට ඒ මේ ගීතය Am ( ඒ මයිනර් ) ශ්‍රුතියට හදලා තියෙන නිසා වෙන්නත් පුළුවන් . මේ ස්කේල් එකේ ගීතවල වයලීනයේ ඇඟිලි යන එන එක පිළිවෙලක් තියෙනවා . කාලයක් වාදනය කරනකොට ඒක ඇඟට දැනෙනවා . මටත් දැනුනා . වයලීන් ගහන අය ඉන්නවනම් බලන්න ඔයාලටත් දැනෙනවද කියලා . එහෙනම් මම ගියා ඔන්න .

ඔබ සැමට සමන් දෙවිඳුගේ පිහිට ලැබේවා !