Thursday, February 12, 2015

රත්නපුර " කාර්තිගේෂන් " ස්මාරකය





ඉතින් ගං වතුර තියෙන වෙලාවේ කාන්තාවන් කීප දෙනෙක් මේ නගහමුත්තෙට්ටුව කියන වගුරේ ගහගෙන යනවා දැකලා තියෙනවා මේ කාර්තිගේෂන් කියන ඉන්ජිනේරුතුමා . එතුමා වතුරට බැහැලා පීනලා ගිහින් මේ අයව බේරගන්න උත්සාහ කරන්න . ඒත් අවාසනාවන්ත විදියට එතුමාටත් ඒ වතුර පාරේම අවසන් ගමන් යන්න සිද්දවෙලා . 

Read more   රත්නපුර " කාර්තිගේෂන් " ස්මාරකය

Tuesday, February 10, 2015

කොඩිවින උපත , කොඩිවින කිරීම හා කොඩිවින කැපීම ( 4 ) අවසාන කොටස








දෙවෙනි අවුරුද්ද ඉවරවෙලා අපේ බ්ලොග් එකේ තුන්වෙනි අවුරුද්ද පටන්ගන්න කියලා ඉස්සෙල්ලම ලියන්නේ මේ ලිපිය . අදින් මම කොඩිවින ගැන කියන කතාව අවසන් කරනවා . ඒ නිසා මුල ලිපි කියෙව්වේ නැති අය ඉන්නවනම් කියවන්න . කොඩිවින ගැන අහලා නැති දන්නේ නැති ගොඩක් දේවල් එක්ක ඒ සම්බන්ධව තියෙන මගෙ අත්දැකීම් මම ඒ ලිපිවල පිළිවෙලට ලියලා ඇති .

කොඩිවින උපත , කොඩිවින කිරීම හා කොඩිවින කැපීම ( 1 )

කොඩිවින උපත , කොඩිවින කිරීම හා කොඩිවින කැපීම ( 2 )

කොඩිවින උපත , කොඩිවින කිරීම හා කොඩිවින කැපීම ( 3 )

කොඩිවිනයක් කරලා තියෙනවද නැත්ද කියලා අපි දැනගන්න ඕන ඉස්සෙල්ලම . මොකද එහෙම නැතුව වෙන වෙන දේවල් වලටත් ගෙවල් වල අඩදබර ලෙඩ රෝග කරදර ඇතිවෙන්න පුළුවන් නේ නේද . බුදුහාමුදුරුවොත් දේශනා කරලා තියෙන්නේ උතු බීජ කම්ම ධම්ම චිත්ත කියන නියාම ධර්ම පහට අනුව මේ ලෝකයේ වෙන දේවල් ප්‍රමාණයකුත් තියෙනවා කියලා .

මම ගුරුකම් කරන පරපුරවල් කීපයක්ම එක්ක මේ ගැන කතා කරලා ඒ ඒ අයගේ ශිල්පීය ක්‍රම ගැන අධ්‍යනය කරා . ඒවායින් මම ලියන්න සුදුසුයි කියලා හිතෙන ක්‍රම කීපයක් මෙතන සටහන් කරනවා . මොනයම් ආකාරයක හෝ ගුරුකමක් අපිට කරලා තියෙනවනම් ඒක අඳුරගන්න කරන්න පුළුවන් හොඳම දේ තමයි අඳුනක් භාවිතා කරලා හනුමාගෙන් හරි අංජන දේවියගෙන් හරි අහගන්න එක . මොකද එයාලා කියනවා එයාලාට පේනවනම් අදාළ තැන ගුරුකමක් කරලා තියෙනවා කියලා .

මම දන්න කීප දෙනෙක් ළඟම ක්‍රියාකාරීත්වයේ තියෙන අඳුන් කීපයක්ම තියෙනවා . ඒ අය අඳුන් වලින් කියන දේවල් අනුව ඒවා විශ්වාස නොකර බැරි තත්ත්වයක් තමයි තියෙන්නේ . ඒක අවස්ථාවක හනුමා කියලා තිබුණා එක ගෙදරකට ගේ හදන්න කලින් අඩිතාලමට දාලා තිබුණ මිනී ඔලුවක් ගැන . ගෙදර අය ඒක විශ්වාස කලේ නැතුව ඉඳලා අවසානයේ අඩිතාලම හාරලා බලනකොට මිනී ඔලුවක් ගොඩ අරගෙන තිබුණා . දැන් කියන්න පුළුවන් සල්ලි ගන්න කරපු වැඩක් වෙන්නැති කියලා . ඒත් මේ අඳුන බලන කෙනා සල්ලි ගත්තේ නෑ ඒ වැඩ වලට . සමාජ සේවයක් විදියට තමයි ඒවා කරලා තිබුණේ .


කොඩිවින කරලාද නැත්ද කියලා බලාගන්න ඊළඟට තියෙන හොඳ ක්‍රමයක් තමයි දෙහි කපලා බලන එක . මේ වෙනුවෙන් රචනා වෙලා තියෙන මන්තර ගණනාවක් තියෙනවා . වැඩිය ලොකු ඒවත් නෙවෙයි . ඒවායින් අදාළ වාර ගණනක් ජීවන් කරපු දෙහි අදාළ ගෙදර බිම කහ වතුර භාජනයක් තියෙලා මන්තර මතුරන ගමන් ගිරයකින් කපලා දැම්මම , විනයක් තියෙනවනම් ඒ දෙහි පලු බේසමේ පතුල බඳාගෙන ගිලා බහිනවා . විනයක් නැත්නම් උඩ පාවෙනවා .

තව තියෙනවා මන්තර වර්ග කීපයක් " වින කෝෂ මන්තර , වින රාජ මන්තර , වින ධාරණ මන්තර " කියලා . මේවා ඉතාම බලගතු අමාරු මන්තර . මේවා කට පාඩම් තියෙන අයට කොඩිවින වදින්නේ නැති තරමටම මේවා බලගතුයි කියලා තමයි කියන්නේ . හැබැයි කටපාඩම් කරන්න හරිම අමාරුයි . මොකද ඒවායේ භාෂාව ඉතාම පැටලිලි සහගත වචන වලින් තමයි හැදිලා තියෙන්නේ .

මේ මන්තර වලින් මතුරලා දෙහි නාරං අන්නාසි වගේ දේවල් ඒ ඒ මන්තරවලට නියම කරලා තියෙන හැටියට හපලා බලනකොට එන රස අනුව තීරණය කරන්න පුළුවන් වින තියෙනවද නැත්ද කියලා . මේවා හපලා බලන්නේ ඇදුරා නෙවෙයි . ඒවා හපලා බලන්නේ ගෙදර කෙනා . එයාට දැනෙන රස අනුව තමයි තීරණය කරන්නේ . තව මේ මන්තර වලින් දෙහි කපනකොට සමහර වෙලාවල් වලට දෙහි වලින් ලේ පාට දියරයක් වෑස්සෙන්න ගන්නවා . එතකොටත් තීරණය කරනවා මෙතන කොඩිවිනයක් තියෙනවා කියලා .

තවත් ක්‍රමයක් තියෙනවා ගොප් කොලයකට මතුරලා වින තියෙනවද නැතද කියලා හොයන විදියක් . මෙතනදී කරන්නේ ගොප්කොලයට මතුරලා තෙල් ගාලා අදාළ ගෙදර අයගේ කෙනෙක්ගේ ඉනේ දිගට ගොප්කොලේ කඩනවා . පස්සේ ටික වෙලාවක් ඉඳලා ආයෙත් ඒ ගොප්කොලේ ඒ කෙනාගේ ඉනේ එතුවම කලින්ට වඩා දිග වැඩිවෙලා නම් එතන විනයක් තියෙනවා කියලා තීරණය කරනවා . විනයක් නැත්නම් ඒ ගොප් කොලේ දිග වැඩි වෙන්නේ නෑ .

ඔන්න ඔයවගේ තවත් එක එක ශිල්පීය ක්‍රම තියෙනවා කොඩිවින බලන්න . කොඩිවින කපනකොට ඒවා කපන්නත් එක එක දේවල් කරනවා . වින කපන්න කියලා කිව්වට ඔයාලා දන්නේ නැතුව ඇති වින කපනවා කියන්නේ මොකක්ද කියන එක . විනයක් කරන්නේ මොකක් හරි විදියකින් අමනුස්සයෙක් බන්ධනය කරන එක . වින කපනකොට කරන්නේ ඒ බන්ධනය කඩලා ඒ අමනුස්සයා එතනින් ඉවත් කරන එක . මේ දේ කරන්න තමයි ගොඩක් දේවල් කරන්න වෙන්නේ . වින කපන්නත් ක්‍රම දෙකක් තියෙනවා . සමහර වෙලාවට ඉතින් පලි ගන්න ඕනේ නැත්නම් නිකන්ම විනය කපලා දාන්න පුළුවන් . ඒත් කරපු දේ වෙනුවෙන් පලි ගන්න ඕන නම් ආපිට කපනවා කියල වෙනමම ක්‍රියාදාමයක් කරනවා .

මෙතනදී මාරයා ගෙන්නලා මාරයාගේ තියෙන මරණ ශක්තිය වැඩිකරලා විනය කරපු කෙනාව මරලා දාන්න තරම් මේ ආපිට කැපීම දරුණු වෙනවා . ආපිට කැපීමේදී මේ කරන මාරයා අවධි කරවීමට ගුරුකම් ශාස්ත්‍රයේ කියන්නේ මරු නග්ගනවා කියලා . ඔය නිසාම තමයි මම කලින් පෝස්ට් වල වැඩිදුර කියලා තියෙන්නේ වින කරන්න නම් යන්නෙපා , කැපුවොත් අනිවා බඩු හම්බෙනවා කියලා . මෙහෙම අපිට කැපුවම ඉස්සෙල්ලම දිෂ්ටිය එන්නේ විනය කරපු ඇදුරා හොයාගෙන . ඇදුරා ප්‍රභල ආරක්ෂාවක් කරගෙන ඉන්නවනම් දිෂ්ටිය ඊළඟට යන්නේ විනය කරවපු කෙනාව හොයාගෙන . ඒ නිසා වින කරවීමත් වින කිරීම තරමටම භයානක දෙයක් වෙනවා .

වින කපනකොට වින කපන්න ගන්න දේවල් කීපයක් මම මෙතන සටහන් කරන්නම් .

දෙහි
එක ඉත්තක දෙහි
යකිනාරං
එක ඉත්තක යකිනාරං
පුහුල් 
තැඹිලි 
අන්නාසි
පොල්
ඉටි රූප
මැටි රූප
හබරල අල
හොඬල අල
අලුකෙසෙල් අල
බිත්තර
මිනී ඔලු
හරක් ඔලු
නියඟලා අල
කැහිපිත්තන් ගස්
ඉඹුල් කොළ
දිවුල් කොළ
කොලොන් කොළ
නික කොළ
බෝ කොළ
කරඳ කොළ 
නුග කොළ
නෙලුම් මල්
මානෙල් මල්
ගැටතුඹ මල්
සමන් මල්
කිනිහිරි මල්
රත් මල්
මා රත් මල්
ඉද්ද මල්
සප්සඳ වැල්
ඉරමුසු වැල්
කයිල වැල්
සමන්පිච්ච වැල් 
කරවිල වැල්
මෑ වැල්
කැකිරි වැල්
ගොන් කැකිරි වැල්
වෙනිවැල් 
වේවැල්
මදුවැල්

වගේ දේවල් ගොඩක් ගන්නවා . මේ වැල් ජාතිනම් එකසිය අටක් තියෙනවා . ආයේ වෙලාවක එකසිය අටේම නම් කොටලා දාන්නම් . දැන් කම්මැලියි අෆ්ෆා ඔක්කොම කොටන්න . 

ඉතින් ඔයවගේ දේවල් ගොඩක් එක්ක වින කැපීමේ ක්‍රම ශිල්ප විවිධ ආකාරයෙන් වෙනස් වෙමින් ඇතිවෙලා තියෙනවා . කලින් පෝස්ට් එකේ කිව්වා වගේ මේ ලෝකේ නරක වැඩියි . හොඳ තමයි අඩු . ඒවගේම වින කපන්න නිර්මානයවෙලා තියෙන මන්තරත් අඩුයි . වින කරන්න තියෙන මන්තර තමයි වැඩි . මේ මන්තර එක එක දේවල් වලට විශේෂ වෙනවා . 

වින කපන මන්තර වලට අරක්ගත්ත එක එක අමනුස්සයෝ ඉන්නවා . ඒ වගේම වින කපන මන්තර හීන කුලයේ මන්තර සහ මහා කුලයේ මන්තර විදියට කොටස් වෙනවා . හීන කුලයේ මන්තර විදියට රොඩී හෙල්ලොලි වගේ මන්තර ගණන් ගැනෙනවා . මහා කුලයේ මන්තර වෙන්නේ ඍෂිවරු හදපු මන්තර , පඬිවරු හාමුදුරුවරු හදපු මන්තර . මේවා කවුරු හැදුවත් ඒවායේ බලය නම් වෙනසක් නැහැ කියලා තමයි මට හිතෙන්නේ . 

මම දාන්නම් මට කියවන්න ලැබුණ වින කපන මන්තරවල ලැයිස්තුවක් . 

මලයාල නාග වෛරෝඩිය
ගිනි කුමාර වෛරෝඩිය
කළුකුමාර වෛරෝඩිය
හනුමා වෛරෝඩිය
රුවන්දොර පෙරළුම
සත්භූමි කම්පාව 
විෂ්ණු සංහාරය
මහා සොහොන් අලගුව
නවගුනරාජ මන්තරය
සායි දැහැන
හනුමා වෙට්ටුව
සැවුලා තීන්දුව
කින්කිලියා තීන්දුව
ලක්ෂේට නායක අලගුව 
ලංකෙෂ්ට නා අලගුව
ඔඩ්ඩි කුමාර දැහැන් හත
මරු සුරුන්ඩුව
ලේ කාලි තීන්දුව
නවකුන්ට රාජ තීන්දුව
වෙසමුණි සැරය
දැඩිමුන්ඩ ඉනාව
දැඩිමුන්ඩ ජීවම 
දැඩිමුන්ඩ පෙරළුම
අරවලී දැහැන
ගිනි විල්ලොඩිය
කිසිඹිලි කතුර 
ක්‍රෝධ බන්ධන පෙරළුම
හෙනගිනි තීන්දුව
නාග වල්ලි විදුර
අග්නි සැරය
ගෝඩිම්බර දැහැන 
අග්නි මාලාව
මයුර සංහාර පෙරළුම
ඔඩ්ඩි පෙරළුම
කඩවර පෙරළුම
හූනියන් පෙරළුම
පිල්ලි පාරාව
පිල්ලූ පිදෙන්න
නීචකුල තීන්දුව
මරු බන්ධනය
රාජ ගින්ගිලියාව
පළවෙනි තීන්දුව
දෙවෙනි තීන්දුව
තුන්වෙනි තීන්දුව
දෙවොල් බාගේ අලගුව
මලයාල රීරි තීන්දුව
බස්නාහිර තීන්දුව
රීරි කාම තීන්දුව
සිවයන් අලගුව
කල්ලු වින රාජය
අශ්ටෝත්තර අලගුව
විජ්ජාපලුව
කළුවැදි තීන්දුව
වලාශ්‍රී තීන්දුව
ගුරුළු වලා බන්ධනය
ගුරුළු මාල බන්ධනය
ගුරුළු මාල තීන්දුව
කාකු දැහැන් හත
ඊශ්වර අලගුව
ක්‍රලාඩිබාහේ අලගුව
ආඬිබාගේ අලගුව
කයිවීර හනුමා වෙට්ටුව
ශ්‍රී පාද කතුර

මේවායින් මම දන්නා තරමින් දිගම මන්තර දෙක තමයි රුවන්දොර පෙරළුම සහ සත් භූමි කම්පාව . එකක් කොපිපොත් පිටු නවයක් තියෙනවා . අනික කොපිපොත් පිටු දොළහක් තියෙනවා . මේවා ඒකාලේ අය කොහොම පාඩම් කරාද කියලා හිතාගන්න අමාරුයි . ඒත් සරස්වතී තෙල් වගේ දේවල් මේවට උදවු වෙන්න ඇති . 

මේ මන්තර වලින් භයානකම එකක් තමයි රුවන්දොර පෙරළුම කියන්නේ . මොකද මාරයාට භාර කරන මන්තරයක් ඒක . වැරදුනොත් විනේ කැපෙන්න කලින් තමන්ට වැරද්දක් වෙන්නත් පුළුවන් . මේ මන්තර වලින් ජීවම් කරපු මම උඩින් කියලා තියෙන දේවල් වලින් වින කපනවා . තව වින කපනකොට භාවිතා කරන අඩි තියෙනවා . අඩි කියන්නේ මේවා බිම ඇඳලා ඒවා උඩට ලෙඩා ගෙන්නලා , ලෙඩා ඒවා උඩ තියාගෙන මතුරමින් වින කපනවා . මේවාට කියන්නේ ශක්‍රන් කියලා . මේ ශක්‍රන් නිර්මාණය වෙලා තියෙන්නේ සිදුහත් කුමාරයා ඉපදුන වෙලාවේ නෙලුම් මල් හතක උඩ ඇවිදපු සිද්දිය මුල් කරගෙන . මම ඔයාලට බලන්න මේ ශක්‍රන් වල ෆොටෝ ටිකක් දාලා තියෙනවා . 




වින කපනකොට ඉස්සෙල්ලම හූනියන් දෙවියන්ට ආරාධනා කරනවා . පස්සේ යක්ෂ දිෂ්ටි වලට ආරාධනා කරනවා . ඊටත් පස්සේ අදාළ යකාට ආරාධනා කරනවා . මහසෝනා රීරි යකා අභිමාන යකා කළු යකා වගේ යක්කු මේ විදියට ආරාධනා ලබනවා . පස්සේ මාරයා ගෙන්නනවානම් මාරයාට ආරාධනා කරනවා . මාරයා ගෙන්නන්න විශේෂ මන්තර කොටසක් නිර්මාණය වෙලා තියෙනවා . ඇදුරෝ මේ මන්තර කවදාවත් පිටට දෙන්නේ නෑ . ඒක සම්ප්‍රදායක් . පරපුරවල් වලින් රකින දෙයක් ඒක . මොකද ආපිට කපන්න මාරයා ගෙන්නන්න හොඳ පළපුරුද්දක් තියෙන්න ඕන නිසා වගේම මාරයා එක්ක සෙල්ලම් නැති නිසා .

පස්සේ අදාලා වින කපන මන්තරය කියලා විනේ කැපුවට පස්සේ කරන්න ඕන දේවල් ඉතින් ඉවරයි . ප්‍රතිපල එනකල් බලාගෙන ඉන්න තමයි තියෙන්නේ . වින කපන මන්තරවල භයානකකම තේරෙන්න එක්ක මම ඒ මන්තරවල ආපිට යවන කොටස් ටිකක් මෙතන සටහන් කරනවා . මේ තියෙනේ ඒවා .


........අල්ලල්ලා හූ කිඩ ඔට්ටු මරු කුදිර අඩා කුදිර විස කණ්ඩී ඔන්න අරගන් බා බා වින කල අදුරා එලාගන් පෙරලාගන් තීන්දු තීන්දු යමදොරට ගෙන ගිය ඉර ශර අවර බිල්ල ඉරා ශර උර උරා මරණ පුරි ගිනි ගන් මරණ පුරු අඩා පුර ශර මරු පෙරළෙයි හිර ගිනි උපුටයි දෙපයට ගිනි ලයි විෂයට මරණයි අට කොන භාරයි රුවන් දොර පෙරළෙයි සතියට මරණයි අවරට බිල්ලයි මාරුවට භාරයි නව දොර පෙරළෙයි විස පෙවූ කඩුවයි පෙරලා කැපුවයි යාම දේවී භාරයි වින කල ඇදුරට මරණයි රුවන් දොර පෙරළෙයි අඩා පෙරළෙයි.......... 

විෂ්ණු රන්දුනු සැරෙන් වින පෙරලා ගිනිගන් මේ වින කල ඇදුරාට වැදී ගිනි ගං පෙරලගන් රවී කුජ ඔට්ටු බිලි පාරේ පන්දු අෂ්ට ගතේ දැලේ රේඛා තරු ................

...........ඔන් කාමී මිනී රාක්ෂී නීච ග්‍රී හනුමන්තා වින ධාරණී උගුළුවා ගං හිර බන්ධන කැපී වෙසමුණි රජ්ජුරුවෝ සෑම යකුන් යක්ෂණියන් ගෙන්නවා කුල වීදි වලට කුල විජ්ජා බන්ධනයට අසු කරවා සියලු විජ්ජාවල් පාළුකර ආනුභාවෙන් කුල බිලි යක්ෂයා වින කල ඇදුරා බිලි ගං විජ්ජා මරණ දිෂ්ටි ආපිට හැරී පලයන් තීන්දු .............

..............වින කල ඇදුරා රීරි මඩුල්ලේ රීරි දේවතාවුන් වහන්සේට භාරයි ඔහුගේ අඹු දරුවන් නුඹට භාරයි ඔහු මරු භීත කරවා එලා ගන්ඩ තනිපල රීරි මස්සිනා නුඹට භාරයි රීරි යක්ෂනී වින කල ඇදුරා දිෂ්ටි ගං තෝස්වාහඃ......

................වින කල ස්ත්‍රී පුරුෂයෝ ඇත්නම් විනකළ ඇදුරෙක් ඇදුරියෙක් ඇත්නම් ඔහු හිස පුළුටු කුම්බරයාට භාරයි ගැබ දරණය ලේ කුරුම්බරයාට භාරයි උකුල දෙපා කෙන්ඩ පතුල හෙන කුරුම්බරයාට භාරයි දෙවොල් තුන් සමයමට අරක් ගත් රීරි සොහොන් යක්ෂයෝ සත් දෙනාට මේ වින කල ඇදුරාගේ ලේ රීරි ඇට සන්ධි නහර කැප ගං ................


වින කැපීම ගැන කියන්න තියෙන ඒවා ඔච්චරයි වගේ මතක් වෙන්නේ . තව මොනවා හරි මතක් උනොත් ආයෙත් පෝස්ට් එකක් ලියන්නම් . ඒත් මේ ලිපි මාලාව මෙතනින් මම ඉවර කරනවා . මේ ලිපි හතර ලිව්වේ වින ගැන පොඩි දැනුවත් කිරීමක් කරන්න . මොකද අපේ පැත්තේ ඉන්න කාලි යක්ෂනී වසඟයට ගත්ත කෙනෙක් දැන් අංශබාගය වැළඳිලා ඔත්පල වෙලා ඉන්නවා . ඔත්පල කිව්වට දැන් නම් ටිකක් ඇවිදින්න පුළුවන් . ඒත් මෙයාට ගුරුකම් වැරදිලා තමයි ඒ දේ උනේ කියන එක කාටත් නොරහසක් . මොකද ගුරුකම් වැරදිලා මැරෙන , ලෙඩවෙන ඇදුරන් ගැන දෙවුන්දර පැත්තේ මම හොඳට දැකලා තියෙනවා . 

මේ ලිපි කියවලා කවුරුවත් අන්තගාමී වෙන්න ඕන නෑ . මම කියන්නේ නෑ මේවා පිළිගන්න කියලා . ඒත් තව අවුරුදු දෙතුන්සීයක් විතර ගියාම මේ දේවල් ගැන කතා කරන්නවත් කෙනෙක් නැති කාලයක් එයි . එතකොට මේ ලිපි සයිබරේ රැකිලා තිබුණොත් කවුරුහරි කියවලා ඉගෙන ගනීවි ලංකාවේ මෙහෙමත් ඒවා තිබුණා කියලා . 

එහෙනම් වින ගැන ලිව්ව ලිපි කීපය මෙතනින් අවසන් කරනවා . 

ඔබ සැමට සමන් දෙවිඳුගේ පිහිට ලැබේවා !

Monday, February 9, 2015

අද අපේ දෙවෙනි උපන් දිනය


                                                       






ආයුබෝවේවා කියලා අඟහරු ග්‍රහයාට අයිති ගිණි ගණයෙන් පළවෙනි වචනය කොටලා පටන්ගත්ත අපේ මියැසියේ රසකතා බ්ලොග් එකට අදට අවුරු දෙකක් වෙනවා . ගිය අවුරුද්දෙ කිව්ව ටිකම අදත් මතක් කරනවා . ආයෙත් ඉතින් කොටන්න ඕන නැහැනේ . මෙන්න මේ පෝස්ට් එකේ තියෙනවා ඒවා . 

ගතවෙච්ච අවුරුද්දේ වෙනසකට කියලා බ්ලොග් එකේ උනේ මෙන්න මේවා . අපි බ්ලොග් එකේ අලුත් පෝස්ට් කැටගරි ටිකක් පටන් ගත්තා . අලිගැන , යක්ස කතා දේව කතා , ෆන් එකට ලියපුවා , 18+ , වගේ කැටගරි ගතවෙච්ච අවුරුද්දේ අලුතෙන් පටන් ගත්ත ඒවා . ඒවාට අදාළ ලිපි කලින් ලියවිලා තිබුණත් කැටගරි ටික අලුතෙන් පටන් අරන් ඒ ලිපි ඒවට ගොනු කලේ ගිය වසර තුල තමයි .

ඒ වගේම බ්ලොග් එකේ සමහර පෝස්ට් ලියන ශෛලීන් වෙනස් උනා . සමහර මාතෘකා එහෙමම යට ගියා . තව ලිපි සීරියස් කීපයක්ම පල උනා  . මට මතක හැටියට සීයා මුණුබුරා කතා මාලාවේ කතා වැඩි ප්‍රමාණයක් ගිය අවුරුද්දේ අපි පබ්ලිෂ් කරා . තව ලිපි සීරියස් කීපයක්ම සාර්ථකව අපි ලිව්වා .

ඒවගේම බ්ලොග් එක ෆලෝ කරන්න අලුත් අය ගොඩක් එකතුවෙලා තිබුණා . ලිපි කියවන අයත් වැඩිවෙලා තිබුණා . මට මතක හැටියට සිංදුවා අයියා ලියපු කලු නෝටි කෙල්ල අනර්ඝ ගීතයේ සැඟවුණු අර්ථය කියන ලිපිය වඩාත් ජනප්‍රිය වෙලා තිබුණා .

දහසක් වැඩ රාජකාරි මැද සිංදුවයි මමයි අපිට පුළුවන් පුළුවන් හැටියට එදිනෙදා දකින කියන දේවල් උපහාසයට ලක් කරමින් , ශාස්ත්‍රීය කරුණු වාද විවාද වලට ලක් කරමින් ලිපි ලියන එක දිගටම කරගෙන ගියා මමනම් මේ පෝස්ට් කෙටිල්ල නිසා අම්මගෙන හම්බානෙක බැනුම් අහනවා ලැප් එක දිහාම බලාගෙන ඉන්නවා කියලා . දැන් ලියන එක අපේ විනෝදාංශයක් වෙලා . සිංදුවත් මමත් හම්බෙන හැම වෙලාවේම වගේ ලියන ලිපි ගැන ගීතවල තේරුම් ගැන අපේ මත ඉදිරිපත් කරමින් තර්ක කරමින් චාටර් කරගනීමින් එක එක පැතිවලින් හිතලා තමයි මේ ලියන ලිපි අවසානයේ පබ්ලිෂ් කරන්නේ .

සමහර වෙලාවට පෞද්ගලික අත්දැකීම් , අපි අපි ගහ ගන්නා මඩ පෝස්ට් වගේ ඒවා පබ්ලිෂ් කරන්න කලින් ඩ්රාෆ්ට් කරලා අනිත් කෙනාට කියවලා බලන්න කියනවා . මොකද ඒවායේ වැරදි අඩුපාඩු එහෙම තියෙනවානම් ඒවා බලාගන්න . ඒවගේම ලියන දේවල් වල උනත් අඩුපාඩු ගැන සිංදුවාඅයියා සහ මම කතා කරලා බලලා තමයි තවදුරටත් ලිපි ලිවීම කරේ .

පසුගිය වසරේ බ්ලොග් ලියන කීප දෙනෙක්ටම අපි උදවූ කරා එයාලගේ බ්ලොග් තවදුරටත් බ්ලොග් ලෝකයේ ප්‍රවර්ධනය කරගන්න පුළුවන් වෙන විදියට . ඒ අය කවුද කියන එක රහසක් . ඒත් මොනම හරි බ්ලොග් එකක වැරද්දක් අඩුපාඩුවක් දැක්කොත් අපි ඒවා ඒ ඒ අයට කතා කරලා කිව්වා . එයාලා ඒවා හදන නොහදන එක ඉතින් එයාලගේ වැඩක් .

එහෙම කරලා දැනට හොඳට ලියාගෙන යන අය කීපදෙනෙක්ම ඉන්නවා . ඒ අයගේ සාර්ථකත්වය දැක්කම පොදුවේ මියැසියේ රසකතා නියෝජනය කරන සිංදුවටත් මටත් සතුටු වෙන්න පුළුවන් බ්ලොග් ලියන්න ඇවිත් අපේ යුතුකම හරියට ඉෂ්ට කරා කියලා .

මුහුණුපොතේ අපිව අඳුරගත්ත විශාල පිරිසක් ඉන්නවා . මේ අය අපි අලුතෙන් ලිපියක් පබ්ලිෂ් කරාම ඒ මාතෘකාවට අදාළ පොත් පත් ගැන , වෙබ් සයිට්ස් ගැන වීඩියෝ link එව්වා මැසේජ් කරලා . ඒ දේවල් පරිහරණය කරලා මමත් සිංදුවත් අපේ දැනුම සහ අත්දැකීම් වැඩිකරගත්තා වගේම අලුතෙන් ලියන ලිපි වලට පාදම විදියට ඒ කරුණු පසුබිම් කරගත්තා .

කීපදෙනෙක්ම පෞද්ගලිකව ලියන්න කියලා කිව්ව මාතෘකා කීපයක් ගැනම ලියන්නත් ඉඩ ලැබුණා ඒ කාලය තුල . ඒවගේම සමහර මාතෘකා ගැන ලියන්න කියලා බ්ලොග් එකේම කමෙන්ට් කරලා තිබුණා . සිංදුවත් මමත් ඉතින් ඔය ඔක්කොම ඒවා පුළුවන් පුළුවන් හැටියට ලියලා මේ වෙනකල් බ්ලොග් එක ඇදගෙන ආවා .

අපි ලියපු ලිපිවලින් මම දකින විදියට වැදගත්ම ලිපි දෙකක් කියලා මම විශ්වාස කරනවා

තරංගනී දේවියට මග කියන මහා රාජතරංගනී තෛලය

අකුණු හෙනගිනි දේවතාවට මග කියන මහා හෙනරාජ තෛලය 

කියන ලිපි දෙක .

තවත් විශේෂ දෙයක් උනේ හස්තිනාපුර බ්ලොග් එක ආයෙත් සක්‍රීය කරන්න පුළුවන් වෙච්ච එක . සිංදුවා ඒකෙ ඇඩ්මින් කෙනෙක් නොවුනට සිංදුවගේ අදහස් අනුව තමයි බ්ලොග් එකේ පසුබිම මේ දක්වා ඇදගෙන ආවේ . මියැසියේ රසකතා එක්කම හස්තිනාපුරත් ලියාගෙන යන්න තමයි අපේ බලාපොරොත්තුව . සමහර වෙලාවට හස්තිනාපුරේ පෝස්ට් දැම්මම මම ඒකෙ ලින්ක් දාලා පෝස්ට් එකක් මියැසියේ රසකතාවෙත් දැම්මා . එහෙම දැම්මේ සමහර සින්ඩිකේටර් අප්ඩේට් වෙන්නේ මියැසියේ රසකතාවලින් නිසා . මට හස්තිනාපුර සින්ඩිකේටර් වලට දාන්න උනේ නෑ . කම්මැලිකම තමා හේතුව ඉතින් . හිහිහිහිහ් .......

අපි විද්‍යා විෂයන් එක්ක ගැටෙමින් තමයි අහසයි පොළවයි වගේ වෙනස් මාතෘකා එක්ක බ්ලොග් ලියන්නේ . ඒ නිසාම රසායන විද්‍යාව සත්ත්ව විද්‍යාව ගැන අලුත් විදියට ලියන්න බලාපොරොත්තුවක් තියෙනවා . ඒක කොහොම කරනවද කියලා තාම හිතලා නැහැ . බ්ලොග් එකක සැකිල්ලක් විතරක් හදලා එක එක තීම් දදා බල බල ඉන්නවා . ඒකත් පටන් අරගෙන මියැසියේ රසකතාවට අනුබද්ධවම ලියන්න තමයි මේ අවුරුද්දේ බලාපොරොත්තුව .

එදා මෙදාතුර
බ්ලොග් එකට ආපු ගියපු
කතා කියවපු
කමෙන්ට් කරපු

හැමෝටම සිංදුවා සහ වයලීනෝ හදපිරි ස්තූතිය පුද කරනවා . තුන්වෙනි අවුරුද්දෙත් අපිත් එක්ක අත්වැල් බැඳන් ඉඳියි කියලා තමයි අපි බලාපොරොත්තු වෙන්නේ .

මියැසියේ රසකතා සදාකල් දිනේවා !

ශ්‍රී ලෝකං ජයදේව නාග සරණා ශ්‍රී බ්‍රහ්ම නාරායනං
ශ්‍රී ශ්‍රේෂ්ටං ලෝකනාතං ජනතිලක පතිනන්දනේ දේව දේවෝ
ශ්‍රී ලෝකේශ්වර බුද්ධ ශාසන ධරං ශ්‍රී බෝධි බුද්ධාංකුරෝ
ශ්‍රී නාමං නාම දේවං දසඅත නයනං ශ්‍රී විශ්ණුතේ මංගලම්

ශ්‍රී නාරායන දිව්‍ය බෝධි උතුමෝ රක්ෂා කරත් බෝ කලක්
ශ්‍රී යක්ෂ ප්‍රේත පිශාච සර්වභය මේ ඇති ඇස් වහත් තුන් දොසින් 
ශ්‍රී ආයු යංවට්ටිතේ ග්‍රහ දොසත් සැම සර්ව දොෂ හරනාම්  
ශ්‍රී රාම ජග ලෝකපාල නමදිම් ශ්‍රී විශ්ණු තෙ මංගලම් 

ශ්‍රී නාරායන විෂ්ණු දේව නමිතේ නාතස්‍ය බෝසත් උතුම්
ශ්‍රී නිත්‍යO කන්ද කුමාර දේව සරණේ දේවෝ සමන් සුරපති
ශ්‍රී සකලං ආයු දිනා දින දිනේ රක්ෂා කරන් බෝ කලක්
ශ්‍රී රාමං නමදිම් උතුම් දෙවිතුමෝ රාමෂ්ඨකං මංගලම්

ගරු සිංදුවා තුමාගේ ප්‍රකාශය :

අනේ ඉතින් ඔය වයලා උඩ කියපු ටික තමා ඉතින් කියන්ඩ තියෙන්නේ ....
අර අන්තිමට දාලා තියෙන එකනම් මටත් තේරෙන්නේ නෑ.
ඉතින් අපිට කමෙන්ට් කොරපු, කියවපු, බැනපු, හූ කියපු, සිංදු කියපු, හැමෝටම ස්තුති වේවා !
හැමෝටම ගුණසිරි බුල්ටෝ දෙක ගානේ අපි මේ පාර එවනවා. මේ පාර අවුරුදු දෙකයි නිසා බුල්ටෝ දෙකයි.
දැන් අවුරුද්දයි, හෙට අවුරුදු දෙකයි කියලා අපිට මතක් කරන සරාසියටත් ටැංකු වේවා.
ඒ වගේම සියලුම බෝගර්ස්ලටත් සින්ඩියන්ටත් විශේෂයෙන් අන්තිම පේළියටත් ස්තුති කොරන්නම ඕනි.
සකබකටයි පොරගේ බුකියටත් පිං යන්න ඕන.
එහෙනම් ඔන්න ස්තුති කතාව අහවරයි.
ස්තුතියි.


                                                                     

Friday, February 6, 2015

මේ වහින්නේ එදා මල් වරුසාවමයි නේද මගෙ පැට්ටෝ ?






මම සයිබර් අවකාශයේ ලියන්න පටන් ගත්තේ වයලීනෝ නමින් නෙවෙයි පැට්ටෝ . මගේ ඇත්ත නමින් තමයි ඉස්සර ලිව්වේ . අඩුම තරමේ බ්ලොගර් යුසර් ප්‍රොෆයිල් එකක් කියන්නේ මොකක්ද කියලාවත් අහලා තිබ්බේ නැහැ පැට්ටෝ . ඊට ටික කලකට පස්සේ තමයි මම අන්තිම පේලියේ ලියන්න ගත්තේ පැට්ටෝ . හැමදාම මතක් කරනවා වගේ සිංදුවා තමයි අන්තිම පේලියට පාර පෙන්නුවේ පැට්ටෝ . වයලීනෝ නම හැදුනේ අන්තිම පේලියෙන් පැට්ටෝ .

ඔය කැම්පස් යනකල් ගෙදර ඉන්න උන් , වැඩක් නැතුව රස්තා ගගහා ඉන්න උන් එහෙම ඉන්නවනම් අන්තිම පේලියේ එකවුන්ට් එකක් හදාගෙන කතාවක් කවියක් ලියලා දාපල්ලා . මහා ගත්කතුවරු එකතුවෙන ප්ලේස් එකක් ඒක .

මොනවා උනත් අන්තිම පේලිය කියන නම මම තාමත් ඉතින් ආදරෙන් ගෞරවයෙන් තරහෙන් කෝපයෙන් මතක් කරනවා පැට්ටෝ . මේ අන්තිම පේලියේ මම වඩාත්ම කැමති ලිපි කීපයක් තිබුණා . මම ඒවා බුක්මාර්ක් කරලා තියාගෙන සමහර වෙලාවට ආයෙත් කියවලා ඒ ලිපියේ තියෙන රසය විඳින්න වගේම ඒ ලිපිවල මවලා තියෙන රූප , මගෙ හිතෙත් මවාගන්න කැමතියි පැට්ටෝ . අන්න ඒවගේ ලිපියක් තමයි මෙන්න මේ ලිපිය . අවසානය හරිම ආදරණීයයි පැට්ටෝ . ඒකත් කියවලා එන්න පුළුවන් නම් ඉතින් හොඳයි නේද පැට්ටෝ .

අද ලියන්න යන ලිපිය ලියන්න හිතුනේ හේතු ගොඩක් නිසා පැට්ටෝ . අර ලිපියේ කියලා තියෙනවා නේද පස්ට ගීතයක් ගැන . මතකද හැන්දෑවේ අපි දෙන්නා කියන ගීතය . ඒක පස්ටම පස්ට ගීතයක් . ලවු සික් ගහන වෙලාවට ඕක බැක්ග්‍රවුන්ඩ් එකට අහන්න මරු තමා . ඉතින් ඒ ගීතයේ තියෙන්නේ ලවු කරන දෙන්නෙක් හිතන පතන කරන කියන දේවල් ගැන .





මේ වෙලාවේ මට මතක් කරන්නම ඕන මල් කඩනකොට පෙම්වතුන් පෙම්වතියන් කියන ලද බොළඳ කතා ගැන . හයිඩ්‍රජන් පරමාණුවේ ඉඳලා රත්තරන් ප්ලැටිනම් වගේ පරමාණු දක්වා මේ වචන මාලාව ගලාගෙන යනවා . මම නිකන් දාන්නම් එහෙම වචන මාලාවක් නොදන්නා උන්ට ඉගෙන ගන්නත් එක්කම . හරිද පැට්ටෝ ?

හයිඩ්‍රජන්
ලිතියම්
කැල්සියම්
වස්තුව
වස්තුවේ
වස්තු
පැටියෝ
පැට්ටෝ
ටුටු
සිඟිති
සිඟිත්තා
පැටික්කි
පැට්ටි
මෝඩ පැටියා
වහු පැටියා
වස්සි
චුටි මෝඩ කොල්ලා
චුටි කෙල්ල
සුදු
තුදු
බබා
බබී
නපුරා
නපුරි
හාවා
හාවී
සාවා
සාවී
මණික
මැණික්
තුදු මණික
තුදු මැණික
ගැලියම්
ඉන්ඩියම්
ටයිටේනියම්
සීසියම්
කොකුම්
පිනිදිය
කුංකුම
රත්තරන් ..etc .

මේ වගේ වචන භාවිතා කරලා කියන ගොඩක් බොළඳ පෙම් වදන් වල සැඟවිලා තියෙනවා ලොකු ලොකු තේරුම් . මම ඔය පෙම්වතුන් පෙම්වතියන්ගේ සාහිත්‍ය හෑල්ලුවට ලක් කරනවා එහෙම නෙවේ ඔන්න . මම මේ කියන්නේ පොඩි උදාහරණයක් . හරිද පැට්ටෝ ?







දැන් ඔන්න කොල්ලයි කෙල්ලයි මල් කඩනවා . කොල්ලා කෙල්ලට කතා කරනවා " සාමා එන්න අපි මල් කඩන්න යන්න " කියලා . කෙල්ල කියනවා " හා හා අමර අපි යමු මල් කඩන්න " කියලා . එක වසරේ ඉඳලම තමා ඔය මල් කැඩිල්ල උගන්නන්නේ . පස්සේ තමා ඇඩ්වාන්ස් වෙන්නේ . ඉතින් ඔහොම ඇඩ්වාන්ස් උනාම කියන එක දෙබසක් මම උදාහරණයට ගන්නම් . ඔන්න කොල්ලා දුර රටක ඉඳලා ගෙදර එනවා .

ඉතින් කෙල්ල කෝල් දිදී මැසේජ් කර කර අහනවා කොහෙද ඉන්නේ ? ගෙදර එන්නේ කීයටද ? තව කවුද ඔතන ඉන්නේ . කෙල්ලෝ කියක් තව ඔතන ඉන්නවද ? මගෙ මැසේජ් එකට රිප්ලයි පරක්කු උනේ වෙන කෙල්ලෙක් එක්ක මැසේජ් කරා නේද වගේ කතා ගොඩක් . ඔන්න ඉතින් කොල්ලා ගෙදරට ගියා කියමුකො . ඊට පස්සේ කෙල්ලට ෂුවර් දැන් කොල්ලා ගෙදර ඉන්න නිසා අවුලක් නෑ කියලා . දිගට හරහට මැසේජ් කෝල් කරන්නත් පුළුවන් . එතකොට මු වෙන කෙල්ලන්ට කතා කරන එකකුත් නැහැ කියලා කෙල්ල ෂුවර් කරනවා . අපේ හැටි දන්නේ නැතුව නේද පැට්ටෝ ?

ඉතින් ඔය වගේ වෙලාවට කෙල්ල මොකද කරන්නේ , කොල්ලව ශේප් කරලා කොල්ලගේ මල් පුප්පලා ගන්නත් එක්ක මෙන්න මෙහෙම මැසේජ් එකකින් කියනවා .

" මගෙ පැට්ටා ගෙදර ආවද ? " කියලා 







බලන්න කොච්චර සාහිත්‍ය රසයක් මේකේ ගැබ් වෙලා තියෙනවද කියලා . සිද්ධාලෝක රසයට එහා ගිය සාහිත්‍ය රසයක් මේකේ ගැබ් වෙලා තියෙනවා . " මගෙ " කියන වචනයේ තියෙන්නේ වෙන කාගේවත් නෙවේ කියලා කියන අරුත . කෙල්ල මේ කියන්නේ අඩු ගානේ උඹ හදපු වදපු අම්මා තාත්තටවත් උඹ අයිති නැහැ , උඹ අයිති මට මට මට මට මට මට මට මට මට මට මට මට මට මට මට  කියලා . හයියෝ තරුණ අපේ කෙළිලොල් ජීවිතය නේද පැට්ටෝ ?

ඊට පස්සේ අපි බලමු " පැට්ටා " කියන වචනය ගැන . මේ වචනය ඉතාම ගැඹුරු අර්ථයක් ඇතිව තමයි මේ ගෑලු ළමයි කියන්නේ . පැට්ටා කියන වචනය වඩාත්ම ලං වෙන්නේ ඉංග්‍රීසියේ තියෙන pet කියන වචනයට . අන්තිමට මේ වචනය ඉවර වෙන්නේ ආ කාරයෙන් නිසා මම මේ වචනය විසන්ධි කරන විදියට නම් ආ කාරය යෙදීලා  තියෙන්නේ නිකන් විශ්මය දන්වන්න " ආ " කියලා කියනවා වගේ . වෙන වෙන වෙලාවට කියන " ආ " ගැන නෙවේ මම කිව්වේ ඉතින් හරිය ? . මේ ගැන වඩාත් තේරුම් කරනවානම් " ආ ඔයා ආවද ? " කියලා කියනකොට ආ කියන අකුරෙන් ඇතිකරන ශබ්ධ අර්ථ රස දෙකම මේ වාක්‍යයට ඇතුලත් කරනවා .

ඉතින් ඇත්තනේ කතාව . කොල්ලා කියන්නේ කෙල්ලගේ සුරතලා තමා . බැන්දට පස්සේ තමා පරම හතුරා වෙන්නේ . එතකල් කොල්ලා තමයි හුරතලා . ඒකනේ කෙල්ලෝ වැඩිපුර ශේප් කරගන්න ඕන උනාම කොල්ලන්ට අර උඩ තියෙන වචන මාලාව දාන්නේ . එතකොට සිංදුවා වගේ උන් අහුවෙනවා .

ගෙදර ආවද කියලා අහන්නේ නිකන් වෙන අහන්න දෙයක් නැති නිසා . අඩු තරමේ අහපන් කාලද ඉන්නේ කියලා . නැත්නම් බඩගින්නේද ඉන්නේ අම්මා කන්න කෑම උයලද තියෙන්නේ කියලා . එහෙම නෑ . කෙලින්ම අහන්නේ ගෙදර ආවද කියලා . හිතාගෙන ඇති ගෙදර ආවම අපිට වෙන කෙල්ලෝ සීන් වෙන්නේ නෑ කියලා . අනේ නිකන් පලයන් කෙල්ලේ යන්න . මොකටද මගෙ කට :/ :/ :/





කඩන්ට බැරි මිදී තිත්තයි කිව්වට ඉතින් අපිත් පැණි රහ මිදී කාලයක් පරිහරණය කරා . ඒක කිව්වේ ඉතින් සිංදුවා ඕක කියන්න කලින් මමම ඕක කියාගන්න එක හොඳ නිසා . විකාර කරා ඇති දැන් . එමුකො එහෙනම් කස්ටියම සිරා මූඩ් එකකට .

ප්‍රේමය එක එක ආකාරයි . එක එක අය ප්‍රේමය ගැන එක එක විදියට විස්තර කරලා තියෙනවා . ප්‍රේමය ගැන මම අහපු කතා වලින් ප්‍රසිද්ද ගායකයෙක්ගේ පුතෙක් දවසක් ටීවී එකේ කිව්ව කතාවක් මගෙ හිතේ හොඳට තැම්පත් උනා . ගොඩක් වෙලාවට ලවු සික් ගහන උන්ට බන කියනකොට මම ඔය කතාව ඇදලා අරගෙන තමයි බන කියන්නේ .

ප්‍රේමයේ මූලික පියවර වෙන්නේ බාහිර රූපය . කොච්චර කොහොම කිව්වත් මුලින්ම අපි කෙල්ලෙක් දිහා බලලා ලයින් පාරක් දාන්නේ රූපය නිසා ඇතිවෙන ආකර්ෂණයෙන් . පස්සේ තමයි හැගීම් ගැන හිතලා ආධ්‍යාත්මිකව ආදරය කරන්න පටන් ගන්නේ . ආදරය සහ ප්‍රේමය කියන එකත් වචන දෙකක් කියලා මට හිතෙනවා . මොකද දවසක් රේඩියෝ එකේ කවුරු හරි වැදගත් චරිතයක් සම්මුඛ සාකච්චාවකදී කිව්වා ආදරය සහ ප්‍රේමයේ වෙනස මොකක්ද කියලා ඇහුවම ,

" ඔබට මේ ලෝකයේ සිටින සියලුම කාන්තාවන්ට ආදරය කරන්න පුළුවන් . ඒත් ඔබට ප්‍රේම කල හැක්කේ ඉන් එක කාන්තාවකට පමණි " කියලා . ඇත්ත තමයි කතාව . හැබැයි ඉතින් ඒක එක එක විදියට විග්‍රහ කරන්න පුළුවන් . මෙහෙම ප්‍රේම කරන කාලේ කරන විකාර වැඩ ගැන ඉතින් කියලා වැඩක් නෑ . ඒවා දන්නේ නැති මල් පොහොට්ටු ඉන්නවනම් මෙන්න මේ පොස්ට් දෙක තුන කියවලා බලන්න .

සඳ සාවී 

සංවේගයෙන් දන්වා සිටිම්

වයලීනොගේ අන්තිම පෝස්ට් එක

නිතරම සිනහසී සිටින්නී 

කන්ද පිරිමැද පිරිමැද 

ඔය පෝස්ට් කීපයෙන් මම වැඩිපුර කියවන්න කැමති තුන්වෙනි එකයි හතරවෙනි එකයි තමයි . ඒ පෝස්ට් කියවපු වාර ගණන මෙච්චරයි කියලා කියන්න බැහැ . හ්ම්ම්ම්ම්ම් ...........
කොහොම නමුත් ප්‍රථම ප්‍රේමය හරි දෙවෙනි ප්‍රේමය හරි විසි තිස් වෙනි ප්‍රේමය හරි ආවසානයේ විවාහ වෙන කෙනාට ප්‍රථම ප්‍රේමයේ තරමටම ප්‍රේම කරනවනම් හොඳයි කියලා තමයි වයලීනොගේ අදහස .

මේ ප්‍රේම කරන කාලේ කොල්ලෝ වැඩිපුරම කැමතියි  කෙල්ල එක්ක ෆිල්ම් බලන්න යන්න , කෙල්ලට කියල බයි කවා ගන්න , කෙල්ල එක්ක එක කුඩේ යටින් සරසවි පාරේ යන්න , උම්මා දෙන්න , උම්මා ගන්න , ෂොපින් යන්න වගේ දේවල් වලට . ආදරේ කරන කාලේ මේවා කරාට ආදරේ කරලා බැන්දට පස්සෙත් දෙන්නෙක් අතරේ මේ බැඳීම තියෙනවද ?

අද ගීතය ඒ ගැන තමයි කියන්නේ . එහෙනම් පුරුදු විදියට ගීතය අහන්නකෝ ..........





මේ වහින්නේ එදා මල් වරුසාවමයි
මහළු නොවනා පෙම්වතුන්ගේ
සොඳුරු මල් වරුසාවමයි
එදා මල් වරුසාවමයි
මේ වහින්නේ

ජිවිතේ දෝතින් දරා අපි
එදා පෙම් බස් මිමිණුවේ
සිරිපොදේ හීතලෙන් අවදිව
ජීවිතේමයි හිනැහුණේ

එදා මල් වරුසාවමයි මේ
මුවාවක් ඇයි සොයන්නේ
එක වහල යට එකතු වූ දා
එක කුඩේ ඇයි මදි වුණේ

පද - සීතා රංජනී
සංගීතය - රෝහණ වීරසිංහ
ගායනය - දිපිකා ප්‍රියදර්ශණී







මේ වහින්නේ එදා මල් වරුසාවමයි
මහළු නොවනා පෙම්වතුන්ගේ
සොඳුරු මල් වරුසාවමයි
එදා මල් වරුසාවමයි
මේ වහින්නේ

ආදරය කරන කාලේ පෙම්වතුන් පෙම්වතියන් වැඩිපුරම කැමති දෙන්නා එක්ක පොඩ්ඩක් රවුමක් ගිහිල්ලා කාලා බීලා වෙනම ලෝකෙක ඉඳලා ඒ හැඟුම්වල රසය විඳින්න . සමහර වෙලාවට මෙහෙම අය තියෙන තියෙන පාරවල්වල ඇවිදිනවා හරියට අර " පිස්සට හැතැප්මක් නෑ " කියලා කියනවා වගේ . ඉතින් මේ ආදරය කරන අය කොච්චර කුඩ ගෙනිච්චත් අන්තිමට පාවිච්චියට ගන්නේ පොඩි , එක කුඩයක් .

වැස්සක් වැස්සත් අව්වක් පෑව්වත් ඔය දෙකටම ඉහලන්නේ එක කුඩයක් විතරයි . එතකොට පුළුවන්නේ දෙන්නට තුරුල් වෙලා කුඩේ යටින් යන්න . ඔය කුඩේ යටින් යන එක කොච්චර රොමැන්ටික් දෙයක්ද කියනවනම් ඒ ගැන කියලා ලියවිච්ච ගීත ගොඩක් තියෙනවා .

එක කුඩේ යටින් සරසවි පාරේ
හතර වටින් කලුකරගෙන වහින වෙලාවේ
මන්දාරම් අඳුර මැදින්

වගේ ගීත ගොඩක් තියෙනවා . ඉතින් මේ ගීතයේ කියවෙන්නේ ඔහොම කුඩයක් යටින් ගිහින් පස්සේ විවාහ වෙච්ච දෙන්නෙක් ගැන . විවාහ වෙලා කාලයක් යනකොට ජීවන අර්බුදයත් එක්ක ස්වාමියට අමතක වෙනවා බිරිඳ එක්ක ටිකක් ආයෙත් ආදරෙන් කාලය ගත කරන්න . සමහරවිට මේ බිරිඳ රස්සාවක් කරන්නේ නැතුව ගෙදරටම වෙලා ඉන්න බිරිඳක් වෙන්න පුළුවන් . ඒ නිසා වැඩිය ගෙදරින් එලියට යන්නේ නැති කෙනෙක් වෙන්න පුළුවන් . ඒත් දවසක් මෙයා ගෙදරින් එලියට යනකොට වැස්සක් වහිනවා . ඉතින් බිරිඳ කියනවා

" හිමියනි මේ වහින්නේ , අපි දෙන්නා එදා ආදරය කරන කාලේ වැහැපු මල් වරුසාමව තමයි , මේ වැස්ස අයිති වෙන්නේ පෙම්වතුන්ටමයි . කොටින්ම කියනවනම් කවදාවත්ම මහළු නොවන , පරණ නොවන ආදරයක් තියෙන පෙම්වතුන්ගේ මල්වරුසාවමයි " කියලා . සමහරවිට පෙම්වතිය හිතන දෙයක් වෙන්නත් පුළුවන් . ඒත් මේ ගීතයේ විවිධ තැන වල කියවෙන විදියට මමනම් හිතන්නේ අන්තිමට බිරිඳ ස්වාමියාට මේ පැමිණිල්ල ඉදිරිපත් කරනවා කියලා .

ජිවිතේ දෝතින් දරා අපි
එදා පෙම් බස් මිමිණුවේ
සිරිපොදේ හීතලෙන් අවදිව
ජීවිතේමයි හිනැහුණේ

ආදරේ කරනකොට පෙම්වතුන් පෙම්වතියන් කියන සමහර කතා මෙලෝ මිනිහෙකුට කරන්න පුළුවන් දේවල් නෙවෙයි . ඉර ගේන්නම් , හඳ ගේන්නම් , අහස තරම් ආදරෙයි පොළව තරම් ආදරෙයි වගේ අහසයි පොලවයි දෙකටම වඩා තව පොඩ්ඩක් වැඩියෙන් ආදරෙයි වගේ දේවල් ගොඩක් කියනවා . ඒවා ඇත්ත ලෝකෙදී විහිලු උනාට පෙම්වතුන්ගේ පෙම්වතියන්ගේ ලෝකයේ මේවා ඇත්ත කියලා තමයි හිතාගෙන ඉන්නේ .

ගීතයේ පළවෙනි අන්තරා කොටසේ කියනවා " ජිවිතේ දෝතින් දරා අපි එදා පෙම් බස් මිමිණුවේ " කියලා . ඒ කියන්නේ අන්න අරවගේ දේවල් කතා කරන ගමන් මේ පෙම් යුවල ජීවිතේ සැලසුම් කරා කියලා . සමහර වෙලාවට පෙම්වතුන් බඳින්නත් කලින් කටින් බතල හිටවන ගානට බැඳලා ළමයිත් හදලා ළමයින්ට නමුත් දානවා .

ජීවිතය කොච්චර ගැඹුරු උනත් සංකීර්ණ උනත් පෙම්වතුන් පෙම්වතියන් ආදරය කරන කාලේ ජීවිතේ ගැන හිතන්නේ තරමක පටු රාමුවක් තුල හිර වෙලා . ඒක එයාලා හදා ගත්ත ලෝකයක් . ඒවගේ දේවල් ගැන පොදුවේ කියන්න තමයි මෙතනදී කියන්නේ ජීවිතේ දෝතින් දරා කියලා .

හිරිපොදේ හීතලෙන් අවදිව ජීවිතෙමයි හිනැහුනේ කියන තැනදී කියන්නේ ආදරය කරන කාලයේ සීතල දැනෙනකොට පෙම්වතුන් පෙම්වතියන් කිට්ටුව ඉන්නවනම් ප්‍රේමයෙන් අවදි වෙලා තුරුල් වෙලා ආදරයේ උණුසුම විඳගන්නවා කියලා . වෙන වලාවට වහිනකොට හීතලට රෙද්දක් පොරවගෙන නිදාගත්තට ආදරය කරන වෙලාවට සීතල දැනෙනකොට වැඩිපුරම කරේ මේ දෙය තමයි කියලා ගීතයෙන් කියවෙනවා .

එදා මල් වරුසාවමයි මේ
මුවාවක් ඇයි සොයන්නේ
එක වහල යට එකතු වූ දා
එක කුඩේ ඇයි මදි වුණේ

ප්‍රේම කරලා විවාහ වෙලා දැන් කාලයක් ගිහිල්ලා . ගෙදර ප්‍රශ්න , රස්සාවේ ප්‍රශ්න , අම්මලා තාත්තලාගේ නැන්දම්මා මාමන්ඩිගේ ප්‍රශ්න වගේ ඔක්කොම ප්‍රශ්න නිසා ස්වාමියට ටික ටික අමතක වෙනවා බිරිඳ තාමත් තමන්ගේ උණුහුම හොයනවා කියලා . ඒ නිසා බිරිඳ හිතෙන් විඳවනවා තමන්ට කලින් තරම් ආදරය ලැබෙන්නේ නැහැ කියලා .

දවසක් දෙන්නා යනකොට වැස්සක් වහිනවා . ඒ වෙලාවේ ස්වාමියා කුඩයක් අරගෙන ගිහින් නැහැ . බිරිඳ විතරයි කුඩයක් අරගෙන ගිහින් තියෙන්නේ . මේ වෙලාවේ ස්වාමියා කරන්නේ වැස්සට මුවා වෙන්න බිරිඳගේ කුඩේ යටට යන්නේ නැතුව මුවා වෙන්න වෙන තැනක් හොයන එක . ස්වාමියාට අමතක වෙනවා තමන් දැනට කාලෙකට කලින් පෙම්වතෙක් වෙලා ඉන්න කාලේ බාගෙට තෙමීගෙන ගියපු කුඩේ යටට අදත් යන්න පුළුවන් කියලා . ඉතින් බිරිඳ අහනවා " එදා මල් වරුසාවමයි මේ මුවාවක් ඇයි සොයන්නේ , එක වහල යට එකතු වූ දා එක කුඩේ ඇයි මදි වුණේ " කියලා .

මමනම් කියන්නේ මේකට බිරිඳත් හේතු වෙනවා කියලා . දවසක් මට මතකයි දොරමඩලාව වැඩසටහනේ මනෝවිද්‍යා සාකච්චාවක මනෝ වෛද්‍ය කෙනෙක් කිව්වා
" විවාහයට පෙර වැඩිපුරම කතා කරන්නේ පෙම්වතා , ඊට පස්සේ වැඩිපුරම කතා කරන්නේ බිරිඳ " කියලා .

ඒ නිසා මම නම් හිතන්නේ බැන්දට පස්සේ බිරින්දෑවරු කච කච ගාන්න ගත්තට පස්සේ ස්වාමි වරුන්ට ආදරේ අමතක වෙනවා කියලා . ඒ නිසා අද හෙට බඳින්න ඉන්න අයට වයලීනෝ ප්‍රාර්ථනයක් කරනවා මෙන්න මෙහෙම .

" කාට අහිමි උනත් , සාධු මල් පිපියන් පැට්ටෝ "