Saturday, August 31, 2013

කොහොඹ ගහේ දෙවියන්ගේ කොහොඹා කංකාරිය



ආයුබෝ වේවා 
කල සෙත උතුම් වේවා.................
දෝස දුරු වේවා
සක්‍ර මහ බඹු ආයුබෝවා...............




උඩරට නැටුමේ මුදුන් මල්කඩ විදියට පිදුම් ලබන කොහොඹා කංකාරිය ගැන තමයි මේ පොස්ටුවෙන් කොටන්නේ . මේක කියවන අය අතරෙත් එක එක කොයිල් තාවයන් තියෙන අය ඉන්නවනම් කංකාරියක් නටවා ගත්තනම් හොඳයි නේද ?

සුට්ටන් කාලේ වයලීනොට තිබ්බේ වයලීන් ගහන පිස්සුවක් නෙවේ . නටන පිස්සුවක් . වෙස් බදින්නත් ආසාවක් තිබ්බා . කොයි වෙලෙත් කහඹිලියා ගෑවිලා වගේ නටනවා කියලා අම්මාගෙන් බැනුම් අහනවා . ටික ටික ඒක සමනය උනාට නැටුම් ගැන තාම හොයනවා . මේ ඒගැන හොයනකොට හම්බෙච්ච දේවල් ටිකක් හොඳේ ළමයි . දැන් වැඳගෙන අහන් ඉන්න ඕන හරිද ???

" කොහොඹා දෙවියෝ  " කියන දෙවියන් මේ කොහොඹා කංකාරියේදී ප්‍රධාන තැනක් ගන්නවා වගේම පිදුම් ලබනවා . මේ කොහොඹා දෙවියන්ගේ උත්පත්ති කතාව එක එක පරම්පරාවලින් , ගුරුකුල වලින් එක එක විදියට කියවෙනවා .

%E0%B6%BB%E0%B7%8F%E0%B7%80%E0%B6%AB%E0%

ඔන්න රාවණා සීතාව පැහැරගන ගියා කියමුකෝ . එහෙම පැහැරගෙන ගියපු සීතාගේ පතිවත ගැන සැක කරපු විෂ්ණු , සීතාව කැලේට ගෙනිහින් මරන්න කියලා සමන් දෙවියන්ට භාර කරනවා . සමන් දෙවියන්ට මේ වැඩේ කරන්න අමාරුයි . ඒ කිව්වේ සීතාව මරන්න හිත දෙන්නෙම නෑ . ඉතිං සමන් දෙවියෝ සීතාට අභය දානය දෙනවා . එහෙම අභය දානය දීලා වෙන කෙනෙකුගේ ලේ වලින් කඩුව තෙත් කරගෙන ගිහින් විෂ්ණුට කියනවා සීතාව මැරුවා කියලා . සීතා දේවිය ගැබ්ගෙන හිටපු නිසා වනාන්තරේදී දරුවා බිහිකරන්න සිදු වෙනවා . මේ වෙලාවේ සීතා දේවියට උපකාර කරන්නේ ඍෂි වරයෙක් . මේ ඍෂිවරයා තමාගේ ආශ්‍රමයේ කාන්තාවන් ලවා  සීතා දේවියට උපකාර කරවමින් දරුවා හදාවඩා ගන්න උදව් කරනවා .ඔන්න දවසක් සීතා දේවිය යනවා පලතුරු නෙලාගෙන එන්න . දරුවා හිටියේ තොටිල්ලේ . එතකොට දරුවට ටිකක් පෙරලෙන්න හෙලවෙන්න එහෙම පුළුවන් .

ඉතිං මේ දරු පැටියා පොඩ්ඩක් එහෙ මෙහෙ හෙලවෙනකොට තොටිල්ලෙන් බිමට වැටෙනවා . දේව දරුවන් අතින් අල්ලන්න මිනිස්සුන්ට අකැපයි කියල හිතලා ඍෂිවරයා තොටිල්ලට මානෙල් මලක් දැම්මා . ඒ මලෙන් තවත් කුමාරයෙක් ඉපදුනා . දැන් තොටිල්ලේ එක්කෙනයි තොටිල්ල යට එක්කෙනයි .

සීතා දේවිය ආවා . තොටිල්ල යටින් දරුවෙක් හඬනවා ඇහුණාම සීතා දේවිය ඒ දරුවා අතට ගත්තා . මේ වෙලාවේ සීතා දේවිය ඍෂිවරයාගෙන් දරුවන් දෙදෙනෙක් ගැන අහනකොට ඍෂිවරයා තවත් දරුවෙක් මවලා පෙන්නනවා . සීතා දේවිය දරුවන් තුන් දෙනාම ඇතිදැඩි කරගත්තා . මලෙන් උපන් කුමාරයත් එක්ක ඇතිදැඩි උන අනිත් කුමාරවරු දෙන්නත් ඇතුළුව ඒ තුන්දෙනාම මලේ දෙවිවරු තුන්කට්ටුව කියලා හැඳින් වෙනවා . කොහොඹා දෙවියන් කියන්නෙත් මේ මලේ දෙවියන්ට කියලා මතයකුත් තියෙනවා .

kohomba-tree.jpg

එහෙම නැත්නම් කියනවා කොහොඹ ගහට අධිපති නිසා කොහොඹා දෙවියෝ කියනවා කියලා .

දඹදිව බරණැස් නුවර රජතුමාගේ දුව චන්ද්‍රවතී කුමරිය හා කලිඟු රටේ රජතුමාගේ පුතා සුරඹා කුමාරයා අතර රහස් ප්‍රේම සම්භන්ධයක් ඇතිඋනාලු . කාලයක් යනකොට දරුවෙක් හම්බෙන්නත් ආවලු . දෙන්නා මෙහෙම ඉඳලා පැනලා යනවා . ඒ යනකොට කොහොඹ ගහක් යටදී පුත් කුමාරයෙක් බිහි කරනවා . මේ පුත් කුමාරයා තමයි කොහොඹා දෙවියන් කියන්නේ කියලා තවත් මතයක් තියෙනවා .

කොහොම හරි ඔන්න කොහොඹා දෙවියන් කියලා දෙවි කෙනෙක් ඉන්නවා හොඳේ . දැන් අපි කොහොඹා කංකාරිය ගැන බලමු .

700ක් සෙට් එක එක්ක විජය කුමාරයා ලංකාවට සැපත් උනා . ලංකාවට ඉතිං එන ඔක්කොම එන්නේ මුකුත් නොදන්නා බබාලා වගේ පාවෙලානේ . එහෙම ඇවිත් කුවේණිට කියලා උදවු උපකාර අරගෙන ලංකාවේ රජු උනා . කුවේණිව අගමෙහෙසිය කරගත්තත් රජතුමාට එච්චර ඒ ගැන ෆිට් එකක් තිබ්බේ නෑ . මොකද යක්ෂ ගෝත්‍රික කාන්තාවක් නිසා . රජතුමා කුවේණිව පලවා හැරියා . මේ නිසා කුවේණි විජයට සාප කරා . ඒ සාපයෙන්ම විජය මිය ගියා කියල ජනප්‍රවාදයක් තියෙනවා .

Vijaya-Rajathuma.jpg

විජයට පස්සේ රජ වෙන්නේ පඬුවස්දෙව් රජතුමා . මේ රජතුමාටත් කුවේණිගේ සාපෙ ක්‍රෙඩිට් එක ලැබුනා . මේ රජතුමාට රෑට රෑට හීනෙන් දිවියො පෙන්න ගත්තා . දිවිය හීනෙන් දැකලා බය වෙනවා . ඊට පස්සේ ලෙඩ වෙනවා .

Leopard_kataragama.jpg

මේ ලෙඩේ දැන් ගොඩක්ම උග්‍ර අතට හැරිලා . පඬුවස්දෙව් රජතුමා ඔන්න මෙන්න වගේ තත්වෙක හිටියේ . දිවියෙක් හීනෙන් දැකලා ඇතිවෙන දෝෂයක් නිසා මේ දෝෂය දිවි දෝෂය කියලා හැඳින්උනා . මේ ප්‍රශ්නය දිව්‍යලෝකේ දක්වා පැතිරුනා . මොකද ලංකාව ආරක්ෂා කරන්න බුදු හාමුදුරුවොත් පිරිනිවන් මංචකයේදී දෙවියන්ට දේශනා කළා කියනවනේ .

මේ දෝෂය ගැන දැනගත්තම ශක්‍ර දේවේන්ද්‍රයා රාහු අසුරයාට කියනවා මානෙල් මලෙන් ඉපදුන මලේ රජතුමාව ලංකාවට එක්ක යන්න කියලා . රාහු අසුරයා ඌරෙක්ගේ වෙස් අරගෙන මලේ රජතුමාගේ නදුන් උයන විනාස කරන්න පටා.......න්ගත්තා . මලේ රජතුමාට මේක දැකලා සුපිරියටම කේන්ති ගියා . ඉතිං මලේ රජතුමා දුන්නට ඊතලයක් දාගෙන ඌරට ගේම දෙන්න ඌරා පසුපස ලුහුබඳින්න පටන් ගත්තා . ඌරා වෙස් අරන් ඉන්න රාහු අසුරයා මලේ රජතුමාව ඒ උපායෙන් ලංකාව පැත්තට එක්කගෙන ඇවිත් මුහුද තරණය කරලා ලංකාවට සැපත් වෙනවා . ලංකාවේදී ඌරට ඊතල පාර වැදුනා . එතකොට ඌරා එතනම ගල් උනා . මලේ රජතුමා තේරුම්ගන්නවා මේ දෙවියන්ගේ ප්ලෑන් එකක් කියලා .

පස්සේ ඒ මලේ රජතුමා තමයි ලංකාවේදී ඉස්සෙල්ලාම කොහොඹා කංකාරිය යාතුකර්මය කරවන්නේ . අනුරාධපුරේ මහමෙවුනා උයනේ හදපු රංග භූමියක මේ යාතුකර්මය සිද්දවෙනවා . යාතු කර්මය කරන්න මධුරාපුරයෙන් තවත් බමුණන් කීප දෙනෙක් එක්ක ඇවිත් තියෙනවා . එහෙනම් ළමයි ඔන්න කොහොඹා කංකාරියේ මුලාරම්භය. දැන් අපි බලමු කංකාරිය කරවන හැටි කොහොමද කියලා .



කංකාරිය කරන්න කලින් හොඳ පොල් ගහක් වෙන්කරගන්නවා . මේ පොල් ගහ වටේ ගොක් කොළ වලින් සරසලා කංකාරිය කරවන්න ඇප වෙන් කිරීමක් කරනවා . කංකාරිය කරවන්න ඕන කරන පොල් , පොල් තෙල් එහෙම ගන්න යොදාගන්නේ මේ පොල් ගහ තමයි . කංකාරියට මාස තුනකට කලින් කප සිටුවීම සිදු කෙරෙනවා . ප්‍රධාන යක්දෙස්සා , ඒ කියන්නේ කංකාරිය කරන ශිල්පීන්ගෙන් ප්‍රධානියා සකස්කරන සුභ නැකතකට කප සිටුවීම කරනවා . මේ කපට ගන්නේ ගෙඩි හැදිච්ච නැති කොස් ගහක් . කංකාරි භූමියේ පැත්තකට වෙන්න බිම අටමගල ඇඳලා සරසලා සුභ නැකතට කප සිටුවීමේ චාරිත්‍රය ඉෂ්ට කරනවා .


දැන් කංකාරිය නටන කංකාරි මඩුව හදන්න ඕන . මේ මඩුවට හැටපාදමඩුව නැත්නම් හැටපා මඩුව කියලා කියනවා . එහෙම කියන්නේ ඒ මඩුවට පාද කණු හැටක් භාවිතා කිරීම . කණු හැටක් හිටවලා මඩුව හදලා ඊට පස්සේ ඒ මඩුව ගොක් කොළ සැරසිලි වලින් ලක්ෂනට හැඩ වැඩ ගන්වනවා . පොල් , නවසි , බෝධිලි , කුන්දිරා , රන් තැඹිලි , ගොන් තැඹිලි , තල් වගේ ගෙඩි වලුත් කොස් ගෙඩිත් මේ මඩුවේ තැනින් තැන එල්ලනවා .

මේ මඩුවේ එක පැත්තකින් කොටස් තුනකින් වෙන් වෙලා තියෙන මල් යහනාවක් හදාගන්න ඕන . මේ මල් යහනට කියන්නේ යක්සාය කියලා . යක්සායත් ගොක් කොළ වලින් සරසා ගන්නවා . ඊටපස්සේ ඒ යක්සාය දෙපැත්තේ කෙසෙල් කැන් එක්කම තියෙන කෙසෙල් ගස් දෙකක් හිටවා ගන්නවා . කංකාරිය කරනකොට දේවාභරණ දේව රූප තැම්පත් කරලා මල් පහන් පූජා කරන්නේ මේ යක්සායේ වෙන් කරලා තියෙන යහන වලදී තමයි හොඳේ .

මේ යක්සායට ඉස්සරහින් මඩුවේ අනිත් කෙලවරේ අයිලයක් හදනවා . එතන කෙහෙල් මුව තියෙන කෙසෙල් ගස් නවයක් හිටවන්න ඕන . තව ගොක් කොළ වලින් සරසන්නත් ඕන .

කොහොඹා කංකාරිය සිද්ද කරනකොට කරන ප්‍රධාන යාතුකර්ම කොටස් ටික ඔන්න මම පහලින් කොටනවා.

කප් සිටුවීම
දේවාභරණ අයිලයට වැඩමවීම
මහයාතිකාව
මගුල් බෙර වැයීම
ආතත හෙවත් යහන් බෙර වැයීම
යක් ඇණවුම
අයිලය යැදීම / දේවාරාධනාව
අස්නේ නැටීම
යක් තුන් පද නැටීම
හත් පද පෙළපාලිය
ගුරුගේ මාලාව
මල් යහන කවි
කතා පහ නැටීම
දාන පහ
දුනු මාලප්පුව
කෝල් නඩුව
ආවැන්දුම
යක්කම පහ නැටීම
මල් හත් පදය නැටීම
හත්තාලය නැටීම
කප ගැලවීම
කඩවර ගොටුව
ගබඩා කොල්ලය
ගෙට ගිනි තැබීම
කොහොඹා හෑල්ල
මුව මල පිදීම
මාරාව නැටීම

කප් සිටුවීම ගැන මම මුලින්ම කිව්වා .

දේවාභරණ අයිලයට වැඩමවීම
මේකෙදී පංච තූර්ය නාද කරමින් දේවාලයක ඉඳලා කංකාරි මඩුවට දේවාභරණ වැඩම කරවනවා . දෙවියන් සංකේතවත් කරන්න තමයි මෙහෙම දේවාභරණ වැඩම කරවන්නේ . ඒ දේවාභරණ මල් යහනේ තැම්පත් කරලා සුවඳ දුම් අල්ලලා පහන් පත්තු කරලා කෝල්මුර කවි ගායනා කරනවා .

මහ යාතිකාව
මල් යහන ගාව හදපු පොඩි මල් යහනක් ළඟ අටමගල ඇඳලා එතන ආතුරයා වාඩිකරවලා පූජාභාණ්ඩ තියලා කවි කිය කිය ආතුරයාට සෙත් ශාන්ති කරනවා . ඊටත් පස්සේ කුකුල් බිල්ලක් සහ පොල් පහනක් අතට අරගෙන නර්තනයේ යෙදෙමින් කවි ගායනා කරමින් ආතුරයාට සෙත් ශාන්ති කරනවා .








මගුල් බෙර වැයීම
කංකාරියට වාදනය කරන්නේ ගැට බෙරය . මේ බෙර හරියට සුෂර කරලා සුවඳ දුම් අල්ලලා තෙරුවන් ගුණ සිහිකරලා තෙරුවන් කෙරෙහි පූජාවක් විදියට මගුල්බෙර පද වාදනය කරනවා . කොහොඹ ලීයෙන් හදපු බෙර පාවිච්චි කරනවා .

ආතත හෙවත් යහන් බෙර වැයීම
මගුල් බෙර වාදනය කරාට පස්සේ එක එක බෙර වාදකන් ඉදිරියට ඇවිල්ලා තමාගේ දක්ෂකම් පෙන්නන්න හොඳ හොඳ පද වාදනය කරනවා . යහන බෙර වාදනය කියන්නේ ඒකට .

යහන් බෙර වාදනය ඉවර උනාම දැන් නර්තන ශිල්පීන් නාලා පිරිසිදුවෙලා වෙස් තට්ටුව පැළඳ ගන්නවා . වෙස් බැන්දට පස්සේ මේ යක්දෙස්සන් උඩුවියනක් යටින් කංකාරි මඩුවට කැඳවාගෙන එනවා . ඒ ආවම මෙයාලා බෙරකාරයන් එක්ක ආචාර කර ගැනීමක් සිද්ද වෙනවා .

යක් ඇණවුම
දෙවියන් සහ භූතයන් සියලුදෙනාට මල් යහන කරා වඩින්න කියලා ආරාධනා කරමින් කවි ගායනා කර කර බෙර වාදන මැද්දේ නර්තන ඉදිරිපත් කිරීම මේ යක් ඇණවුමෙදී සිදුවෙනවා

අයිලය යැදීම
අයිලයට වඩින්න කියලා වැදී යක්කු දොළොස් කට්ටුවට ආරාධනාකිරීම අයිලය යදීමේදී සිදු කෙරෙනවා .




අස්නේ නැටීම
කුවේණි අස්න , සිනබා අස්න වගේ කවි ගායනා කර කර මේ අවස්ථාවේදී නර්තන ඉදිරිපත් කරනවා . ප්‍රධාන යක්දෙස්සා කවි ගායනා කිරීම ආරම්භ කරත්දී අනිත් යක් දෙස්සන් අත්වැල් අල්ලමින් මේ කවි ගායනාකරනවා . එක එක යක් දෙස්සන් තමන්ගේ නර්තන හැකියාව ඉදිරිපත් කරන්න මේ අස්නේ නැටීම උපයෝගී කරගන්නවා .

යක් තුන් පද නැටීම
නැටීම කිව්වට ඉතිං මේකේ නැටීමක් වෙන්නේ නෑ . දක්ෂ බෙර වාදකයින් දෙන්නා බැගින් මාරුවෙන් මාරුවට බෙර වාදන ඉදිරිපත් කිරීම යක් තුන් පද නැටීම කියලා කියනවා .

4830616246_320e45645d.jpg

හත්පද පෙළපාලිය
මේ හත් පද නැටීම ශාශ්ත්‍රීය නැටුමේ ඉහලම අංගයක් කියලා හඳුන්වනවා . ඒ ඒ පදයට වෙන් වෙච්ච බෙර පද හතක් එක්කම මේ හත් පද නැටීම කෙරෙනවා .
මුට්ටි පදය
දුම්මල පදය
මල් පදය
බුලත් පදය
කොතල පදය
සළු පදය
පොල් පදය
තමයි ඒ පද හත

ගුරුගේ මාලාව
මේ ගුරුගේ මාලාව කියන අංගයට බත්මාලාව කියලත් කියනවා . මේක ප්‍රධාන කොටස් දෙකකින් කෙරෙනවා . නාට්‍යමය කොටස් වලින් මුල් කොටසත් කවි ගායනා වලින් තව කොටසකුත් මේ අංගයේ අන්තර්ගත වෙනවා ,

මල් යහන කවි
මල් යහන වලට දෙවියන් වඩින්න කියලා ආරාධනා කරන කවි ගායනා කිරීමක් මේ අංගයේදී සිද්ද කරනවා

කතා පහ නැටීම
විජය රාජ කතාව - විජය කුවේණි කතාව
කුවේණි කතාව - කුවේණි උත්පත්තිය
පඬුවස් කතාව - විජයාවතරණය / දිවි දෝෂය
දඬු මොනර කතාව - කොහොඹා දෙවියන්ගේ උපත
සීතාපතී කතාව - මලය රජ තුන් කට්ටුවේ උපත

මෙන්න මේ කතා පහ කවි ගායනා කරමින් නර්තනයේ යෙදෙමින් ඉදිරිපත් කිරීම කරනවා .

දාන පහ නැටීම
වැදී දානය - වැද්දන් ගැන කතාවක්
ඌරු දානය - මලය රජුගේ ලංකා ගමන
දිවි දානය - දිවි දෝෂය ගැන
පලවැල දානය - මලය රජු උපත
සුරබි දානය - කොහොඹා කංකාරිය උපත පිලිබඳ කතාව

මේවත් කතා . කලින් වගේම කවි ගායනා එක්ක නටමින් මේ කතා ඉදිරිපත් කරනවා .

දුනු මාලප්පුව
දුන්නක් අතින් අරගෙන කරන රංගනයක් මේක . මලය රජතුමා ඌරට විදින්න ආපු සිද්දිය තමයි මේකෙන් කියා පාන්නේ .

කෝල් කඩුව
කෝලායුධය කියලා දෙවියන්ගේ ආයුධයක් තියෙනවා . ඒ වගේ එකක් අතට අරගෙන මේ රංගනය ඉදිරිපත් කරනවා . කෝල් මුර ගායනා කිරීමකුත් මේකෙදී වෙනවා

ආවැත්දුම
වට්ටම් 12 කින් වගේම අඩවූ කස්තිරම් ගණනාවකින්ම වගේ හස්ත මුද්‍රා ගනාවක්ම තියෙන මේ රංගනය තමයි කොහොඹා කංකාරියේ වඩාත්ම දීර්ගම නර්තනය

2515906425_2f9aca2994.jpg

මල් හත් පදය
මේක නටන්නේ වීර මුණ්ඩ දෙවියන් වෙනුවෙන් . යක් දෙස්සන් හතර දෙනෙක් පොල් මල් අතට අරගෙන තමයි මේ නර්තනය සිදු කරන්නේ .

යක්කම් පහ නැටීම
මේක ටිකක් හිනා යන කතා එහෙම තියෙන නැටුම් ඉදිරිපත් කිරීම් පහක් .
වැදී යක්කම
නයා යක්කම
ඌරා යක්කම
දර්ශනී යක්කම
මහ යක්කම




හත්තාලය නැටීම
තුන් සරණේ කවි ගායනා කරමින් මේ රංගනයේ යෙදෙනවා .

කප ගැලවීම
කවි ගායනා කිරීම අතරේ ප්‍රධාන යක්දෙස්සා විසින් කප ගැලවීම සිද්ද කරනවා .


කඩවර පිදීම

kadawara-1.jpg

මේක තමයි මම කැමතිම කොටස . මොකද මේකේ ගායනය කරන කවි තමයි මට හොඳට හිතට ඇල්ලුවේ . වීඩියෝ එකක් හෙව්වා දාන්න . එත් හම්බුනේ නෑ . දුකම තමා .

මේකෙදී කරන්නේ කඩවර දෙවියන්ට බත් කෙසෙල් වට්ටක්කා කරවල බුලත් පුවක් සහිත පූජාවක් පූජා කිරීම . කඩවර ගොටුව ආතුරයාගේ ඔලුවේ තියාගෙන කඩවර කවි , සිරසපාද කවි කියමින් සෙත් ශාන්ති කරනවා

ගබඩා කොල්ලය
ඔය කංකාරි මඩුවට තියෙනවා පොඩි ගබඩාවක් . මේකේ තමයි කංකාරියට ගන්න හාල් පොල් තියෙන්නේ . ප්‍රධාන යක්දෙස්සා වීරමුන්ඩ දෙවියන්ගේ වෙස් අරගෙන ගබඩාව කොල්ල කනවා නාට්‍යමය ආකාරයෙන් පෙන්නනවා .

ගෙට ගිනි තැබීම
ගබඩාවේ තියෙන ඒවා යක්දෙස්සෝ බෙදා ගත්තට පස්සේ ගබඩාවට ගිනි තියනවා .

කොහොඹා හෑල්ල
කොහොඹා දෙවියන්ගේ උත්පත්ති කතාව ගායනයෙන් සහ නර්තනයෙන් ඉදිරිපත් කරනවා .

මුව මල පිදීම
දැන් කංකාරිය ඉවර වෙන්න ලඟයි  . අයිලයේ පිටිපස්සේ තියෙන අර කෙසෙල් ගහක කෙසෙල් මුවයට ඊතලයකින් විදලා , මුවය කඩාගෙන ඊතලයෙන් කෙසෙල් මුව පතුරු ගහලා අයිලයට උඩින් වීසි කරලා කංකාරිය ඉවර කරන නැටුම ඉදිරිපත් කරනවා .

මාරා පද නැටීම
ප්‍රධාන යක්දෙස්සා මාරා පදය සහ ආලත්ති පදය කියන පද දෙකට අනුව හස්ත මුද්‍රාවෙන් කරන රංගනයක් මේක . ඒක නටලා ඉවරවෙලා කංකාරිය ඉවරයි කියලා තුන් පාරක් කියලා ප්‍රධාන බෙර කාරයා කරන ශාස්ත්‍රීය බෙර වාදනයෙන් කංකාරිය ඉවර වෙනවා .

කොහොඹා කංකාරියේදී අලුත් කොහොඹා , මහා කොහොඹා , පරණ කොහොඹා කියලා කොහොඹා දෙවිවරු තුන් කට්ටුවක් , බණ්ඩාර දෙවිවරු හත් කට්ටුවක් , වැදී යක්කු දොළොස් කට්ටුවක් , කඩවර යක්කු දෙතිස් කට්ටුව පිදුම් ලබනවා කියලා කියනවා .

ඔන්න ඔහොමයි කොහොඹා කංකාරිය නටන්නේ . කංකාරි නටන නර්තන ශිල්පීන් පෙරහැරවල් වලදී කරනම් ගහන්නේ නෑ කියලා දවසක් ටීවී එකේ කිව්වා . එහෙම කරනම් ගහනකොට වෙස් තට්ටුව බිම ගෑ උනොත් ඒක දෙවියන්ට කරන අගෞරවයක් විදියට ඒ ශිල්පීන් සලකනවා .

වෙස් තට්ටුව කියන්නේ කොහොඹා දෙවියන්ගේ හා මලය රජතුමාගේ ඇඳුම් කට්ටලය කියලා කියනවනේ. ගරු කරන්නේ ඒ කාරනාව මුල් කරගෙන වෙන්න ඕන .කංකාරි නටන අවුරුදු 80,90 විතර වයසක ගුරුන්නාන්සේලා තාමත් නුවර පළාතේ පිටිසර ගම් වල ඉන්නවා . හම්බුනොත් කතා කලරලා බලන්න . හරිම අහිංසක මිනිස්සු . බඩ කට පිරෙන්න බත් වේල හොයා ගන්න අමාරු උනත් මේ මිනිස්සු මෙච්චර කාලයක් මේවා ආරක්ෂා කරගෙන ආපු එකට අපි ඒ අයට පිං දෙන්න ඕන .






තව පෝස්ට් එකකින් තව අටමගලක් අරන් එන්නම්...!
ටටා.......!

හැමෝටම කොහොඹා දෙවියන්ගේම පිහිටයි !

Wednesday, August 28, 2013

හූනියම් වීදියට වඩින ගම්භාර ඔඩ්ඩි වඩිග සිද්ධ සූනියම්





මම ඉතිං බුකියට එක එක ෆොටෝ අප්ලෝඩ් කරනවා මගේ ෆ්‍රෙන්ඩ්ස්ලා නම් දන්නවනේ . ඔන්න ඔය උඩ තියෙන ෆොටෝ එකේ ඉන්න කෙනාගේ ෆොටෝ එකක් දැම්මට පස්සේ කීප දෙනෙක්ම කීප විදියක කමෙන්ට් කරලා තිබුණා .

සමහරු දෙවියෝ සහ යක්කු ගැන විශ්වාස කරා හෝ නැතා මේ පොස්ටුව මම කොටන්නේ මෙහෙමත් කථා තිබුණා කියලා සයිබරේට දාලා තියන්න ඕන නිසා . කැමති අය කියවන අකමැති අයත් කියවන්න . මේක කියෙව්වා කියලාවත් ෆොටෝ එක බැලුවා කියලාවත් මේ යක්කු ආවේස වෙන්නේ නෑ . එහෙම වෙනවනම් ඉතින් මානසික වෛද්‍යවරයෙක් හම්බෙලා තමාගේ දුර්වල මානසිකත්වය දියුණු කරගන්න මක්ක හරි කරන්න ඉතින් හොදේ . හැක්ක හැක හැක හැක හැක.............

දෙවියෝ යක්කු නෑ කියලා කියනවනම් ඉතින් බුදු බණත් බොරු වෙන්න ඕන කියලා මට හිතෙනවා . මොකද ආලවක , කාලි , වගේ යක්කුත් සක්‍රයා , උපුල්වන් , වෛශ්‍රවණ වගේ දෙවිවරුත් බුදු හාමුදුරුවන්ගේ දේශනාවල සඳහන් වෙනවා . ඉතින් මෙයාලා දැන් කාලේ කෙසේ වෙතත් ඉස්සර කාලේවත් හිටියා කියලා බෞද්ධ අපිට පිළිගන්න පුළුවන් කියලා තමයි මම හිතන්නේ .

උප්පැන්න සහතිකේ ලියවිලා තියෙන හැටියට ගම්භාර ඔඩ්ඩි වඩිග සිද්ධ සූනියම් දිව්‍ය රාජෝත්තමයානන් වහන්සේ කියලා කියන අර්ධදේව තත්වයේ ඉන්න මේ දෙවියන් ගැන ගොඩක් දෙනෙක් ඉන්නේ හරිම බයෙන් . අඩුම තරමේ මේ පොස්ට් එක කියවලාවත් ඒ බය නැති කරගන්න කියලා මම කියන්නේ . මොකද මේ අමනුස්සයෝ මිනිස්සු වගේ නෙවේ . කිව්වොත් කිව්වා , අනික තමයි කොයික කරත් සාධාරණේට වැඩ .

අර්ධ දේව කියන්නේ මනුස්සයින් හෝ යක්ෂයින් වෙලා ඉඳලා වෙන වෙන ලොකු දෙවිවරුන්ගෙන් වරම් අරගෙන දේවත්වයට පත්වෙච්ච අයට .

දෙවියොත් එක්ක ගනුදෙනු වලදී වැඩිපුර ජෝක්ස් මුල් කරගන්න මමනම් කැමති නෑ . ඒක නිසා පෝස්ට් එක කියවන අයට මේක බොරින් නම් සොරි වෙන්න ඕන හොඳේ .........!

ඔන්න එහෙනම් හූනියම් දෙයියන්ගේ කතාව පටන් ගන්නවා . සාධුකාර දීලා බය අය ඉන්නවනම් ඉතිපිසෝ ගාථාවත් කියලා කියවන්න .



පුරාවෘත වල කියන විදියට ඉතාමත් ඈත අතීතයේ , ඒ කියන්නේ අපේ ගෙවල් ගාව ඉඳලා සිංදු අයියගේ ගෙවල් ගාවට විතර දුර ඈත අතීතයේ ඉන්දියාවේ වඩිග කියන දේශයේ වඩිග කියලා රජකෙනෙක් රජකම් කරනවා . මෙතුමාගේ දේවිය තමයි යවුදගිරි බිසව .

මේ යවුදගිරි බිසව ඉතාමත්ම රූමත් දේවියක් . දවසක් අහසේ ගමන් කරන මහේශාක්‍ය දෙවිකෙනෙක් මේ බිසවගේ ලස්සනට මන්මත්වෙලා දේවියගේ ඇඟට ආවේසවෙලා මෙව්වා එකක් කරනවා . ඉතින් දෙවියා ආවේස උන නිසා යවුදගිරි බිසවට සිහිනැතිවෙනවා . සිහිනැතුව ඉන්න බිසව සනීප කරගන්න ඕන නිසා වඩිග රජතුමා කරන්නේ ඍෂිවරු ගෙන්නලා දිව්‍ය මන්තර ජපකරලා දේවියට සිහිය ලබාගනන්වා . පස්සේ තමයි දැනගන්නේ දේවියට බබෙක් හම්බෙන්න ඉන්නවා කියලා . රජතුමා ගොඩක් සතුටුවෙලා බමුණන් පිරිසක් මාලිගාවට ගෙන්නලා දේවියට සෙත් ශාන්ති කරවනවා .

ටික ටික ගැබ මෝරනකොට දේවියගේ තනපුඩු කලුපාටවෙලා කිසිමදෙයක් කන්නේ නැතුව ඇඹුල් වර්ග , දිවුල් කන්න ඕන කියලා දොළදුක් ඇතිවෙනවා . මේ දොළදුක් කොහොම හරි ගොඩ දැම්මා කියමුකෝ . ඒත් තව දොළක් ඇතිවෙනවා . ඒ තමයි ස්වර්ණාභරණයෙන් සැරසිලා නයි, සර්පයින් ඇඟේ පැළඳගෙන නුවර ඇතුලේ ගමන් කරන්න ඕන කියන දොළ දුක . රජතුමාට කේන්ති යනවා . එහෙම වෙලා රජතුමා මේ බිසව මරන්න නියෝග කරනවා . ඒත් යවුදගිරි බිසව කියනවා තමා ගැබ්බර නිසා මරන්න එපා කියලා . පස්සේ රජතුමා කරන්නේ බිසව මාලිගාවෙන් පිටමන් කරලා තියන එක . මාස ගණන සම්පූර්ණවෙලා ඔන්න පුත් කුමාරයෙක් ඉපදෙනවා . රජතුමා මේ කුමාරයට බමුණන් ලවා නමක් දම්මනවා . ඒ තමයි ඔඩ්ඩි වඩිග කුමාරයා කියන නම .

බමුණෝ ඊට පස්සේ මේ කුමාරයාගේ ඇඟේ ලකුණු බලලා කියනවා මෙන්න මෙහෙම

" මහ රජ , මේ කුමරුවා මහානුභාව සම්පන්නය , සොලොස්වස් පිරුණු කල්හී තොපවහන්සේද පරිවාර රාජ්‍යන්වල රජවරුද මරා වඩිග දේශයම අත්පත්කරගනී . පසුව ලංකාවට ගොඩබැස අමු මිනීමස් කා වාසය කරයි "

රජතුමා මේ ගැන බොහොම උදහස් වෙනවා . මොකද ඒ කාලේ හිටියේ තිරශ්චීන විද්‍යාවෙ කෙල පැමිණි උදවිය . ඒ නිසා රජතුමා දන්නවා එයාලා මෙහෙම අනාවැකි කිව්වොත් අනිවා බඩු හම්බෙනවා කියලා . රජතුමා කියනවා මේ කුමාරයාව මරවන්න කියලා . ඒත් රජතුමාටම දුක හිතෙනවා . තමාගේ දරුවා නිසා කොහොම මරන්නද . රජතුමා ළමයාව හදාගන්නවා .

ඔන්න අවුරුදු දාසයක් ගියා කියමුකෝ . දවසක් මේ වඩිග කුමාරයා කැලයේ ඇවිදින්න යනවා . ඒ යනකොට වේ හුඹහක් දකිනවා . මේ හුඹහේ ඉන්නවා නයි . වඩිග කුමාරයා මේ නයි අල්ලගෙන උන්ගේ දල කඩලා දාලා විස උරා බොනවා . ටික ටික නයි විස මේ කුමාරයාගේ ශරීරයට ඇතුල් වෙනවා . ඔන්න දැන් තමයි වැඩ පටන් ගන්නේ . දල කඩපු නයි , මේ කුමාරයා තමාගේ ඇඟ වටේට ඔතාගන්නවා . පොළොංගු මාපිල්ලු අල්ලගෙන බෙල්ලේ ඔතාගන්නවා .



තමා උරා බීපු නයි විස වැඩ කරලා මේ කුමාරයා එකපාරටම යක්‍ෂාවතාරය බවට පත්වෙනවා . තමා නයින්ගේ කඩා දාපු දල , පොලොන් දල , කරවැල් දල , මාපිල් දල , උගුරැස්ස කටු , දෙහි කටු , තිබොල් කටු අරගෙන මාලයක් වගේ අමුනගෙන බෙල්ලේ එල්ල ගන්නවා . දැන් යක්‍ෂාවතාරය ගත්ත මේ කුමාරයා කරන්නේ තමාගේ පියා සහ පරිවාර ප්‍රාන්ත රජවරු මරා දමන එක . වඩිග දේශය සහමුලින්ම මේ යක්ෂයාගේ ක්‍රියාවෙන් බයට පත්වෙනවා . කුඩා දරුවන් මුල කාලේ ආහාරයට ගත්තත් පස්සේ පස්සේ මිනිස්සු මර මර කන්නත් මේ යක්ෂයා පටන් ගත්තා . මෙන්න මෙහෙමයි සූනියම් යක්ෂයා ඇතිවෙන්නේ .

දැන් යකාට තමාගේ සේනාව වැඩි කරගන්න ඕන . ඉස්සෙල්ලම මේ යකා යනවා වෙසමුණි රජ්ජුරුවෝ හම්බෙන්න . වෙසමුණි විමානයේ තියෙනවා ඇතුල්වෙන තැන ගල් දොරක් . මේ යකා මේ ගල් දොරට පයින් ගහලා කඩලා දානවා . ඒ සද්දෙට වෙසමුණි රජ්ජුරුවොත් භය වෙනවා . වෙසමුණි රජ්ජුරුවෝ අහනවා මෙච්චර ලොකු සද්ද දාලා වැඩ පෙන්නන්න කාරණාව මොකක්ද කියලා . සූනියම් යකා කියනවා " වඩිග දේසේ වඩිග රජ්ජුරුවන්ට ජාතක උන යවුදගිරි බිසවගේ කුසෙන් උපන් ඔඩ්ඩි වඩිග සිද්ධ සූනියම් යක්ෂයානම් මමය . මට නරලොව මිනීමස් කන්නට වරමක් ඕනය " කියලා . වෙසමුණි රජුරුවෝ වරම දෙනවා . ඊට පස්සේ මේ යක්ෂයා යනවා මහකෙල නාගරාජයා හම්බෙන්න . ඒ නාගරාජයාගේ දල හතරේ වාසය කරන යක්ෂ දූවරු හතරදෙනෙක් ඉන්නවා . තකරී , මකරී , යාමී , යමදූතී කියන්නේ ඒ හතරදෙනා .

සූනියම් යකා මේ හතරදෙනා තමාගේ සේනාවට එකතු කරගන්නවා .ඊටපස්සේ තව යක්ෂණියෝ අටදෙනෙක් ඉන්නවා අයිලක් කණ්ඩී , මයිලක් කණ්ඩී , වචක්කණ්ඩී , තොටක්කණ්ඩී , අසේනි , විසේනි , කාලරාත්ති , තස්මාදේවි කියලා . මේ අයත් ඒ අයගේ පිරිවරත් තමාට එකතු කරගන්නවා . මෙහෙම කරලා මෙයා යනවා තවුතිසාවට ; ගිහින් එහෙ දෙවිවරුත් බියගන්නවලා සිරාට්ටා , වාරට්ටා , ගොරාට්ටා කියන දෙවිවරුත් තමාගේ සේනාවට එකතු කරගන්නවා .



දැන් සූනියම් යකාට හොඳ සේනාවක් ඉන්නවා . මෙයා දැන් පොලවට එනවා . ඇවිත් කරන්නේ විශාලා මහනුවර ගම් නියම් ගම් හැම එකකම ඉන්න මිනිස්සු ළදරුවෝ ගෑණුලමයි මර මර මිනීමස් කනඑක . ගෙවල් වල ඉන්න අත දරුවෝ හිටි හැටියේම අතුරුදහන් වෙනවා . තනියම පාරවල් වල යන එන අය අතුරුදහන් වෙනවා . අන්තිමට ඇටකටු විතරයි ඉතුරුවෙන්නේ .

මේ ගමේ අයට මේක හරිම ප්‍රශ්නයක් . ගමේ ඉන්න මන්තර ගුරුකම් දන්න අය මොකක් කලත් මේ යකාව බන්ධනය කරන්න බෑ . අන්තිමට ගමේ අය තෙලිඟු රටෙන් අතිදක්ෂ , මන්තර ගුරුකම්වල කෙල පැමිණි ඇදුරෙක් එක්ක එනවා .

මේ ඇදුරා යකාව බන්ධනය කරන්න මන්තර අලුතෙන් හදනවා . ඔය අපේ සිංදු අයියා සොෆ්ට්වෙයා ලියනවා වගේ වැඩක් මේක . මන්තර හද හද පුස්කොල පොත්වල ලියනවා . යකා අල්ලන සොෆ්ට්වෙයාර් එක මෙහෙම ලියලා ලියලා බලනකොට මන්තර ලක්ෂ ගණනක් ඒ ඇදුරා අතින් ලියවිලා .

දැන් මේ මන්තර ජප කර කර අදාළ ක්‍රියාව කරගෙන යනකොට සූනියම් යකා එකපාරටම මේ පුස්කොල පොත අතරට ඇදිලා ගියා හරියට ඇලඩින්ගේ පහනේ බූතයා පහනට යනවා වගේ . දැන් යකා හිර උනා . මේ පොත දිගෑරුනොත් යකා ආයෙත් එලියට එනවා . ඒක නිසා කරන්නේ රත්තරං හුයකින් ( නූලකින් ) මේ පොත තදට ගැටගහලා ගැට හිර කරන එක .



එදා ඒ ඇදුරා මේ පුස්කොලපොත යකත් එක්කම මුහුදේ පාකරලා යවනවා . පුස්කොලපොත ලංකාවේ දකුණු වෙරළට පාවෙලා එනවා .අන්න එහෙමයි සූනියම් යකා ලංකාවට සැපත් වෙන්නේ . මේ පුස්කොල පොත මාතර ප්‍රදේශයේ පුද්ගලයෙක් අරගෙන ගිහින් ගෙදර තියාගන්නවා . එයාට දෙවිවරු හීනෙන් කියනවා මේ පුස්කොල පොත වීවෘත කරන්න එපා කියලා . ඒත් හේතුව කියන්නේ නෑ . මේ පුද්ගලයත් පොත විවෘත නොකර රහසේම තියාගන්නවා .

මේ අතරේ කුලියාපිටිය කියන ගමේ ඉන්න බොහොම දැහැමි උපාසක කෙනෙක් දෙවිනුවර දේවාලයට වන්දනා ගමනක් යනවා . මේ උපාසක මහත්තයට අර පුස්කොල පොත හම්බෙච්ච පුද්ගලයා මීට් වෙනවා . පස්සේ උපාසක මහත්මයා මේ පුස්කොලපොත තියෙන ගෙදර රෑ නවතිනවා .

පුස්කොලපොත ගැන මේ උපාසක මහත්තයට කිව්ව අර පුද්ගලයා මේ පොත දිගාරින්නේ නෑ කියන පොරොන්දුව පිට පොත උපාසක මහත්මයාට ගෙනියන්න දෙනවා . එහෙම දෙන්නේ තමාට වඩා උපාසක මහත්මයා සිල්වත් කෙනෙක් නිසා මේ පොත පරිස්සම්කරන්න උපාසක මහත්මයා තමාට වඩා ගැලපෙන නිසා . උපාසක මහත්මයාත් මේක ගෙනිහින් තමාගේ ගෙදර පෙට්ටගමක දාලා යතුරුදාලා උම්මා දීලා පරිස්සමට තියාගන්නවා .

හේතු කාරණා මොකක්ද කියලා දැන නොගත්තත් මහා බලගතු මන්තර තියෙන පුස්කොල පොතක් උපාසක මහත්මයාගේ ගෙදර පෙට්ටගමේ තියෙනවා කියලා කුලියාපිටියේ උපාසක මහත්මයාගේ ගෙවල් කිට්ටුව කෙනෙක්ට ආරංචි වෙනවා . දැන් ඉතින් ඕක ගන්නකන් නිවනක් නැති නිසා ඒ මිනිහා කරන්නේ උපාසක මහත්තයා නැති වෙලාවේ ගෙදරට පැනලා පෙට්ටගමෙන් පොත උස්සන එක .

පොත රත්තරං නූල් වලින් ගැටගහලා තිබ්බ නිසා මේ හොරත් හිතන්නේ පොතේ වටිනා මන්තර ඇති කියලා . පොතේ නූල් ලිහලා පොත දිගෑරියා විතරයි සූනියම් යක්‍ෂයා තමාව බන්ධනය කරලා තිබ්බ පුස්කොල පොතෙන් නිදහස් උනා . එතකොටම දෙවිවරු ඝෝෂා කළා " කඹ ලා හිර කරනු , කඹ ලා හිර කරනු " කියලා . ඒත් එතකොට යකා එලියට පැනලා ඉවරයි .

විසාලා මහා නුවර කාබාසිනියා කළා වගේම සූනියම් යකා ලංකාවෙ කුලියාපිටිය පැත්තෙත් මිනිස්සු මර මර කන්න පටන්ගත්තා . ඒ ප්‍රදේශය යක්ෂ භීතියෙන් ඇලලී ගියා . දැන් මේකට මොකද කරන්නේ ? . ඒ පැත්තේ හිටියා තව බොහොම සිල්වත් මන්තර ශාශ්ත්‍රය වගේම දෙවියන්ගෙන් වරම් ගත්ත රාජපද්ම මුදියන්සේ කියලා උපාසක මහත්මයෙක් ,

මුන්නැහේ තමන්ගේ දේව වරම උපයෝගී කරගෙන පත්තිනි දෙවියන්ට මේ පැමිණිල්ල ඉදිරිපත් කරනවා . දවසක් පත්තිනි දේවිය මේ උපාසක මහත්තයට පේන්න වැඩලා කියනවා නවගුණ මන්ත්‍රයෙන් ලක්ෂ වාරය ගනනේ ජීවන් කරපු නවගුණ වැල් හත් පොටක් ලබා දෙන්න කියලා . ඒ කියන්නේ ලක්ෂහත් පාරක් මතුරන්න ඕන . ඒත් මේ ප්‍රශ්නේ බැරෑරුම් කම තේරුම් ගත්ත රජපද්ම උපාසක මහත්මයා මේ නවගුණ වැල් හත්පොට හදලා පත්තිනි දේවියට ලබා දෙනවා .



පත්තිනි දේවිය අහසට පැන නැගලා ටිකක් අමාරුවන් මේ සූනියම් යකාගේ බෙල්ලට නවගුණවැල් හත්පොට දැම්මා . යකත් මේ මන්තරේ බලේට ඉවසාගෙන ඉන්න බැරුව අහසට පැන නැගලා පොටවල් හතෙන් හතර පොටක් කඩලා දානවා . ඒත් තුන් පොටක් කඩාගන්න බැරි උනා . යකා බිමට වැටුනා .

පස්සේ රාජපද්ම මුදියන්සේ උපාසක මහත්මයා ඇතුළු පිරිස , යකාව මතුරපු කඹ වලින් බන්ධනය කරලා හිර කරා . එදා ඉඳලා ඒ ප්‍රදේශය කඹලෑව කියලා ප්‍රසිද්ද උනා . දැන් ඔය කබලෑව කියලා කියන්නේ එතන තමයි .

පත්තිනි දේවිය මේ යකාගේ බලය දැකපු නිසා තීරණය කරනවා දේව වරමක් දීලා දේවත්වයට පත් කරන්න . කිසිම දවසක ආයෙත් මිනීමස් කන්නේ නෑ කියලා පොරොන්දු කරගත්තට පස්සේ පත්තිනි දේවිය සූනියම් යකාට දේව වරමක් දීලා කියනවා සූනියම් වීදියට අරක්ගෙන දොළ පිදේනි ගන්න , ලෙඩ්ඩු සුවපත් කරන්න , ආතුරයින්ට වැහෙන යක්ෂ දෝෂ දුරු කරන්න , සෑම මන්ත්‍රයකටම අරක්ගෙන ඉන්න කියලා .

මෙන්න මෙහෙමයි සූනියම් දෙවියෝ ලංකාවේ දේවත්වයට පත්වෙන්නේ . එදා එතුමා වැටිච්ච කබලෑව
කියන ප්‍රදේශයේ තමයි එතුමාට කැප වෙච්ච ප්‍රධාන දේවාලය පිහිටලා තියෙන්නේ .





අපේ සබරගමුව මහා සමන් දේවාලයේත් මෙතුමාට කැපවෙන පොඩි දේවාලයක් තියෙනවා .






මේ වගේම ලංකාවේ හැම දෙවාලයකම වගේ සූනියම් දෙවියන්ට කැපවෙන ස්ථානයක් ඉදිකරලා තියෙනවා . මොකද සූනියම් දෙවියන් තමයි ගුප්ත ශාස්ත්‍රයට අධිපතීත්වයෙන් කටයුතු කරන්නේ . සූනියම් දෙවියන් ගම්භාර දෙවියන් කියලත් හඳුන්වනවා . ඒ කියන්නේ ලංකාවේ ගම් බිම් සියල්ලම පාහේ මෙතුමාට භාර වෙනවා .

සූනියම් දෙවියෝ දවසේ භාගයක් යක්‍ෂ අවතාරයෙනුත් අනිත් භාගය දේව අවතාරයෙනුත් ඉන්නවා කියලා මතයක් තියෙනවා . හැමදාම රාත්‍රී 9 30 ට මෙතුමා යක්ෂ අවතාරයෙන් මිදිලා දේව අවතාරය ගන්නවා කියලා කියනවා . මේ වෙලාව රාත්‍රී 10 හෝ 10.45 කියලත් විවිධ මත දරන අය ඉන්නවා . හැබැයි ඔන්න මම අහලා තියෙන්නේ 9 30 තමයි . තවත් මතයක් තියෙනවා සූනියම් දෙවියෝ අව පක්ෂයේදී යක්‍ෂාවතාරය විදියටත්

ගුරුකම් මන්ත්‍ර කරන අය මෙතුමා වෙනුවෙන් පහන් දල්වනවා . මේ පහන වෙනුවෙන් හැමදාම සූනියම් දෙවියෝ ඒ පහන් පලට වඩිනවා කියලත් එතුමා එන ඉඩමේ බල්ලන් ඇතිකරන්න බෑ කියලත් කියනවා . බල්ලන්ට මේ දෙවියන් පේනවලු . ඒ දැක්කම බල්ලන් බුරනවලු . ඒ බිරුවම සූනියම් දෙවියන් තමාගේ අතේ තියෙන වේවැලෙන් බල්ලාට පහර දෙනනිසා බල්ලාගේ කකුල් පන නැතිවෙලා මිය යනවා කියලා මතයක් තියෙනවා . මතේ කෙසේ වෙතත් එහෙම ගෙවල් නම් මම දැකලා තියෙනවා . මොකක් හරි ඇත්තක් ඇති .

සූනියම් දෙවියන්ට අයිති එතුමාගේ ඇල්ම බැල්ම වැටෙන ගුරුකම් වලින් ටිකක්

# රුහුණු මායා පිහිටි ඔඩ්ඩි වඩිග පාන්ඩේ සොලී අංග නිලංග වංග කාලිංග බෙන්ගාල පරංගී ඕලන්ද ආදී දහ අට දේස භාෂා මන්තර

# රට යකුම් වීදිය , තොට යකුන් වීදිය , තොටුපල වීදිය , කුමාර වීදිය , නාග වීදිය , ස්වර්ණ වීදිය , වටුන වීදිය , ගොපලු වීදිය , සල්ලි වීදිය , දෙමල වීදිය , ඔඩ්ඩි වීදිය ආදී සියලුම වීදි

# අන්ද සමයන් , මන්ද සමයන් , පාන්දර සමයන් , සැන්දෑ සමයන් , ඉරමුදුන් සමයන් , මහසොහොන් සමයන් , ඔඩ්ඩි සමයන් ආදී සියලුම සමයන්

# අරිච්චි සන්නි , කාල සන්නි , ගොළු සන්නි , බිහිරි සන්නි , කොර සන්නි , ඇඳිරි සන්නි , වෙඩි සන්නි , මල් මදන සන්නි , නාග සන්නි , දේව සන්නි , දෙමල සන්නි , ඔඩ්ඩි සන්නි , වාත සන්නි , පිත් සන්නි ,සෙලෙස්මා සන්නි ,කොළ සන්නි , ඇවුලුම් සන්නි , කණ සන්නි ආදී සියලුම සන්නි

# වස විස අන වින කටුගැසුම් වැල්පැන්නුම් රැක්කටුගැසුම් පෙතලිසූනියම් ඇතුළු හාරසහස් හාරසිය හැත්තෑ දෙකක් හූනියම් වින

# අරින අංගම් ,දුවන අංගම් , පිඹීන අංගම් , පනින අංගම් , බිහිරි අංගම් ,පිල්ලේ අංගම් , ඔඩ්ඩි අංගම් ආදී සියලුම අංගම්

# දෙහි තීන්දු , අල තීන්දු , නලකිරි තීන්දු , තැඹිලි තීන්දු , අන්නක්ක තීන්දු , මහා තීන්දු ආදී සියලුම තීන්දු

මෙන්න මේවගේ තව ගොඩක් ගුරුකම් වලට අධිපති විදියට මෙතුමා කටයුතු කරනවා . ඇදුරන් සියලුදෙනාම ආරක්ෂා කරන්නෙත් මෙතුමා තමයි . කතරගම දෙවියන් සහ ඇදුරන් අතර පණිවිඩ හුවමාරු කරන්නා විදියටත් මෙතුමා කටයුතු කරනවා . කොඩි වින හූනියම් වලදී ඒවා වලට අරක්ගෙන කටයුතු කරන්නත් මෙතුමා ඉදිරිපත් වෙනවා . වින කපනකොට ඒවා ආපස්සට හරවන්නත් මෙතුමා ඉදිරිපත් වෙනවා .

හූනියම් දෙවියන් වසඟයට ගන්න එක ලේසි පහසු වැඩක් නෙවෙයි . මගේ ආච්චිඅම්මා නැතිවෙන්න කලින් දවසක් මට කිව්වා එයාලා පොඩි කාලේ ඒ කිව්වේ 1920 විතර කාලේ එයාලගේ ගමේ හිටියලු හූනියම් දෙවියෝ වසඟයට ගත්ත දක්ෂ ඇදුරෙක් . එයා පාරේ ඉස්සරහට එනකොට කවුරුත් පාරෙන් අයින් වෙලා එයාට ආයුබෝවන් කියලා ආචාර කරන්නත් පුරුදුවෙලා හිටියලු . එහෙම උනත් එයා වැඩිය ලොකු ලයින් දාපු කෙනෙක් නෙවෙයිලු . ගමේ හොඳින් ජීවත් උනාලු . ගමේ කාවහරි නයි , පොළොංගු, සර්පයෝ කාලා විස බස්සන්න බැරි උනාම මේ කියෙන කෙනාට මන්තර මතුරලා නයි විස බස්සන්න අරුම පුදුම හැකියාවක් තිබුණා කියලත් ආච්චි අම්මා මට කිව්වා . ඒ හැකියාව ලැබුනේ හූනියම් වසඟය නිසා කියලා ගමේ පිළිගැනීමක් තිබුනලු .





කියන්න අමතක උනා තව පොඩි කතාවක් . හූනියම් දෙවියන්ට පහන් තියන අය ඉන්නවනම් මේක මතක තියාගෙන්න ඕන . කරනවානම් කරන වැඩේ හරියට කරන්න . මොකද වෙන දෙවිවරුවගේ හූනියම් දෙවියන් ගාව සෞම්‍ය ගතිගුණ නෑ . කවදත් තියන පහන එක දවසක් හරි අතපහු වෙනවානම් ඒ මොකද කියලා මෙතුමා හොයලා බලනවා කියලා කියනවා . පහන අතපහු උනේ නොසැලකිල්ල නිසානම් දඬුවම් ලැබෙනවා කියලත් මතයක් තියෙනවා . සමහර ඇදුරන් නයි දෂ්ට කරලා මිය ගිහින් තියෙනවා . එයාලට එහම උනේ තමා තියන හූනියම් දෙවියන්ට කැප උන පහන අමතක කරපු නිසා කියලත් කියනවා .

කියන්න නම් තව ගොඩක් දේවල් මතක් උනාට දැනටමත් පොස්ට් එක රෙඩ් ලයිට් පහු කරගෙන ගිහිල්ලා . ඒ නිසා හැමෝටම සෙත් පතලා නවතිනවා .





සාධු සාධු සාධු..........................!

තෙදවරම් පස්වාන් දහසකට ආයු ලැබ ඉරන්ද නම් වනයේ අජාසත්ත පර්වතයේ යහතින් වැඩ සිටින සිරසමත ධවල ජටාවකින්ද සැඩපලු දහතුනකින්ද පොලොඟුන් දහතුනකින්ද රකුසු මුහුනකින්ද බඳවට නයින් ජාලයක්ද එක උරයක කරවැලුන් හතර දෙනෙක්ද සුරතට වඩිග කඩුවක්ද වමතට ගිනිකබලක්ද ගෙලවට නයෙකුද හිස සිට දෙපතුල දක්වා නාගයන් දෙදෙනෙකුද දරා දිවිසම් වතින් සැරසුන නිල්වන් දේහයකින් යුතුව නිල්වන් අසෙකු පිට පැන නැගී යක්ෂ රාක්ෂ නාග රාජ කුමාරාදී දස අවතාරයකින් පෙනී සිටින දස දෙස විපුල කීර්ති සත්‍යානුභාවයෙන්ද තවද මෙම ශ්‍රී ලංකාද්වීපයේ සහ එක්ලක්ෂ හතලිස්දහසක් ගණ කෝවිල්වලට යහතින් දිවස් ලූ කබලෑවට අරක් ගත් ඔඩ්ඩි වඩිග සිද්ධ සූනියම් දිව්‍ය රාජෝත්තමයානන් වහන්සේට දෙපා වැඳ මා කරන කන්නලවුව ඔබගේ දිව කනින් අසා දිව නෙතින් බලා ඔබවහන්සේ නමින් ඔප්පු කරන සුවඳ දුම් මල් පහන් පුද පූජා පිළිගෙන මේ ආතුර ප්‍රාණ කාරයන්ට වැදී ඇත්තාවූ සකලවිද උවදුරු දුක්ඛාන්ධකාරයන් දුරින් දුර නසා මොවුන් වෙත බැල්ම දිෂ්ටිලා විනකර අම්ලාකර සිටින්නාවූ යක්‍ෂ ප්‍රේත පිසාච කුම්භාණ්ඩ ආදීන් සැනෙකින් පලවා හැර සෙත් සාන්තිකර සකල රෝගාබාද ධූරීභූතකර ආයු රක්ෂාකර දී වැඩ වදාරන සේක්වා !!!

ශිව මස්තු නමෝ රාමඃ
කන්ධ සේනා සමාගමඃ
වඩිගතන්ත්‍ර මණී කණ්ඨ
ඔඩ්ඩි මංගල නමෝ නමඃ 


Monday, August 26, 2013

ගජමන්ට පෙම් බැදී ඇලපාත මුදලිඳුගේ පුනරාගමනය (6)



ගජමන්ට පෙම් බැදී ඇලපාත මුදලිඳුගේ පුනරාගමනය (1)

ගජමන්ට පෙම් බැදී ඇලපාත මුදලිඳුගේ පුනරාගමනය (2)

ගජමන්ට පෙම් බැදී ඇලපාත මුදලිදුගේ පුනරාගමනය (3)

ගජමන්ට පෙම් බැදී ඇලපාත මුදලිඳුගේ පුනරාගමනය (4)

ගජමන්ට පෙම් බැදී ඇලපාත මුදලිඳුගේ පුනරාගමනය (5)

පස්වෙනි පොස්ට් එකේ අන්තිමට අපි සිංදුවා අයියා කරන විසූක දර්ශන ගැන කියලා නැවැත්තුවා . අද එතන ඉඳලා තමයි කියන්න යන්නේ .

ඔය සිංදුවා අයියා ඒ කාලේ සින්දුවතී එක්ක කාලේ ගත කරේ හරිම සන්තෝසෙන් . දෙන්නා එකට තමයි ගොඩක් ගමන් බිමන් ගියේ . ඒ කිව්වේ ටියුසොන් කලාස් ගියෙත් එකට . සින්දුවතී කැරකෙන තැන් තියෙනවනම් සිංදුවත් එතන . සින්දුවතී බස් එකක යනවනම් සිංදුවත් මෙන්න මෙහෙම සින්දුවතී ගාවින්ම වාඩිවෙලා යනවා .





ඉන්ජෙක්සන් කට්ටකට උනත් බය උනාට මොකෝ , සින්දුවතී ළඟ ඉන්න නිසා සිංදුවා හිතන් ඉන්නේ ඔතනදී එංගලන්තේ ජෝර්ජ් රජ්ජුරුවෝ එයා කියලා . ඔය පේනවනේ ඔලුවේ සයිස් එක . සීයක් අවොත් දහයකට නෙලලා ඉතිරු ටික මුණ පෙන්නලා බය කරන සයිස් එකෙන් ඉන්නේ .



සින්දුවතීනම් කොහොමද දන්නේ නෑ ඔන්න මම නෑ ඉතිං මම අහිංසක ළමයා . ( හම්මෝ කන්න වෙයිද දන්නේ නෑ සින්දුවතීගෙන් . නෑ නෑ එයා සෝයි ළමයා නෙහ්  )

කොහොම හරි සින්දුවතී ගැවසෙන ගහක් යට උනත් පොඩ්ඩක් වෙලා කැරකෙනකොට සිංදුවා හොයාගන්න පුළුවන් පඳුරක් අස්සේ තුත්තිරි ගහක් අස්සේ ඉඳලා . මෙච්චර වෙලා මේ ඔලුව අතගගා ටොකු ඇන්නේ ඇලපාත මුදලිතුමත් සිංදුවා වගේම කරපු වැඩක් ගැන කියන්න .

ඔය ගජමන් නෝනා දෙනිපිටියේ නුග ගහ ගැන කවි කිව්වා නේද ? . අර පිනවන දුටු දන සෑම කියලා . ඉතිං ඒ කාලේ ඇලපාත මුදලි තුමත් මේ දෙනිපිටිය පැත්තේ කැරකිලා තියෙනවා ; සිංදුවා සින්දුවතී වටේ කැරකුනා වගේ . ගජමන් නෝනා දෙනිපිටියේ නුග ගහ ගැන ලිව්වා වගේ අලපාත මුදලි තුමා කරේ දෙනිපිටියේ වැව ගැන කවි ලිව්ව එක .

හුදීජන පහන් සංවේගය වෙනුවෙන් ඔන්න ඒ කවි ටික මම මෙතන ලියනවා .

සාදු කියාගෙන උතුරට මුහුණලා , හිසට කොහොඹ පත්ද , පයට කහඹිලියා පත්ද  තබා , උපන් ඇඳුමෙන් සැරසී කියවන්න .

දුටු දුටු දන මන නන්ද - වඩන සුපිපි කුසුමන්ද 
ඇඹුල උපුල අරවින්ද - ව න සු රැ සා 

( දකින දකින ජනයාගේ සිතේ සතුට වඩවන මල්ද ඇඹුල , උපුල් , නෙලුම් මල් මෙහි බොහෝ තිබේ )

මඳ මඳ එන පවනින්ද - දසදිග විහිදී සුගන්ද 
ගෙන යති බිඟු මකරන්ද - න ද ස ල සා

( දසත හමන මද පවනින් මල් වල සුවඳ හමයි , බිඟුන් මල් පැණි අරගෙන නාද කරමින් පියඹා යයි )

තැන තැන රැඳී සේරුන්ද - පැස්බර වෙල් ලිහිනින්ද
දිය කෑදෑ තුඩුවන්ද - බු දී ති ම සා

( තැනින් තැන සේරුන් වර්ණවත් වෙල් ලිහිණින් දීය කෑදැත්තන් මසුන් අනුභව කරයි )

සොඳ සොඳ රුවැති මෙයින්ද - දෙනිපිටි වැව දකිමින්ද 
සහතොසයෙන් මිතුරින්ද - නෑ මු බැ සා

( මෙම සෝභමාන වූ දෙනිපිටිය වැව දකිමින් මිතුරන් සමග සන්තෝසයෙන් එහි බැස නෑමට හැකිය )

එජල මතෙහි අනුකූල - සෙවල වරල ගන නීල
සුපිපි වතසේ වත ලීල - නි ලු පු ලැ සා 

( මෙම වැවෙහි ජලයේ මතුපිට පාවෙන තද කොළ පැහැති පාසි , හරියට පිපුණු මුහුණක ඇති නිලුපුල් වැනි ඇස් වැනිය ) 

අදර තඹර පෙති දෑල - තිසර දෙතන තුඟු තූල
බමර නමැති මිණි මාල - ගෙ ල ස ර සා

( නෙලුම් මල් හංසයින්ගේ දෙපසින් පිහිටන විට බඹරුන් එම හංසයින් අවට ඉගිලෙන්නේ හංසයින්ගේ ගෙලේ බැඳී මැණික් ඔබ්බපු මාල ලෙසය )

තරඟ පෙලැති රැලි ලීල - පැළඳ සිලිස් සුදු සේල 
ලිහිණි මෙවුල් ඉඟ කෝල - නො ම ග ව සා 

( තරංගයක රැලි වාගේ , සිනිඳු සුදු සේල වැනි පියාපත් ගවසාගත් ලිහිණින් අහසේ ඉගිලෙන්නේ කිසිම ලැජ්ජාවක් පැකිලීමක් රහිතවය )

මෙලෙස සුසැදි සිවිසාල - දෙනිපිටි වැව කමලාල 
ලියසෙ දනෝ සිතු ආ ල - වෙ ති සු දි සා 

( මෙලෙසට විශාලව සැදුනු පිවිතුරු වූ දෙනිපිටිය වැව නමැති කාන්තාවට නොයෙක් දීශාවන් වල අය ආලය කරති )
අවට සුසැදි පලු වීර - අඹ දඹ රඹ මොර වීර
තල් පොල් දෙල් පල බාර - ව තු කැ ටි යේ

( වැව අවට කුඩා ප්‍රදේශවල පලු වීර  අඹ ජම්බු කෙසෙල් මොර වීර තල් පොල් දෙල් පල බරවී තිබේ )

මේකියන වැවට සමීප - බබලන බුදුරුව දීප 
දුසිරි අඳුරු දුරලාප - සැ දී දෙ ම හ ල්

( මෙම වැව අසල බබලන්නාවූ දෙමහල් විහාරයේ බුදුරුවේ රශ්මිය එම ප්‍රදේශයේ දුසිරිත් අන්ධකාරය දුරලන්නා වැනිය )

බිතුයෙහි සිතුයම් රූප - රහතුන් හා දෙවි රූප 
ජූතක බමුණු අරූප - ඇ ඳි මෙ ම තු ල්

( මෙම විහාරයේ බිත්තිවල රහතන් වහන්සේලා දෙවිරූප පූජක බමුණු රූප සිතුවම් කර ඇත )

දෙපසෙහි තොරණ සමීප - වලුමල් එලවා පූප 
කිංකිනි බැඳ දද කීප - ලෙ ලෙ ති ල ක ල් 

( විහාරයේ තොරණ අසල මල් පොකුරු එල්ලා තිබේ , කිංකිනි බැඳ තිබේ , කොඩිද එල්ලා ඇති අතර ඒවා අලංකාරව ලෙල දේ )

මෙලෙසට සුසැදි මනාප - යුත් වෙහෙරට මාදම්ප
මුල් සිඳ හැර දස පාප - ව ඳී මු ව ලො ල් 

( මේ ආකාරයට සෑදී තිබෙන මහා ධර්ම ප්‍රාසාදයට දස අකුසල් දුරුකරගනිමින් ආශාවෙන් වන්දනාමාන කරමු )

හනේ මන්දා අෆ්ෆා . හරිම සෝයි . එයා ගස් ගැන කියනවා මෙයා වැවු ගැන කියනවා . හැබැයි හරිම උසස් සාහිත්‍ය රසයක් තියෙනවා .

බලන් ඒකෙත් හැටි . ගජමන් නෝනා දෙනිපිටියේ නුග රුක ගැන කවි ලියපු ගජමන් විරිතෙන්මයි මේ දෙනිපිටියේ වැව ගැන අලපාත් මුදලි තුමා කවි ලියලා තියෙන්නේ . හඃ හඃ හඃ හඃ හඃ ... කොච්චර මෙව්වා එකක් හිතේ තියෙන්න ඇතිද නේද ?

මෙච්චර දවසක් කියාගෙන ආපු ඇලපාත මුදලි තුමාගේ ජීවිත කතාව හා අදාළ සිද්දි සමුදාය මේ පෝස්ටුවෙන් අවසන් වෙනවා .

අනේ ඉතිං ඉවරයි කිව්වට ඉවරම නෑ . තව තියෙනවා . තව තියෙන්නේ ඇලපාත මුදලිතුමාගේ පුනරාගමනය .

ඒ වගේම තමයි ඇලපාත මුදලි තුමාගේ කවිත් හැමදාම පවතීවි . සිංදුත් හැමදාම ලියුම් ලියාවි , වයලීනොත් හැමදාම මඩ ගසාවි , අපිත් හැමදාම කවි ලියාවී .

හූඌඌඌඌඌඌඌඌස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස්ස් ( නහය පිහිදමින් ) අඩෙනවා අෆ්ෆා ..........

ඇලපාත මුදලිතුමා ආයෙත් ඉපදිලා කරපු වැඩ කිඩ ගැන ඊළඟ පොස්ටුවෙන් බලමු .

එහෙනම් මම අදට වාෂ්පීකරණය වෙනවා .

ඔබ සැමට සමන් දෙවිඳුන්ගේ පිහිට ලැබේවා !

Friday, August 23, 2013

මුහුදු පතුලෙන් මුදු පුත්තු


මේ ළඟදී කියවපු නිව්ස් එකක් නිසා ඔන්න ෆිල්ම්ස් ගොඩාරියක් මතක්වී ගෙන වී ගෙන වී ගෙන වී... එක්කෝ ඕනි නෑ, ඉතින් මේ නිව්ස් එක ඇවිල්ල මේක.

ශ්‍රීමත් ආතර් සී ක්ලාක් මහත්තයා දන්නවා ඇතිනේ. මම නම් විද්‍යා ප්‍රබන්ධ වලට ආස වුනේ එතුමගේ පොත් වලටයි විදුසර පත්තරේටයි පින්සිද්ධ වෙන්න. කොහොම හරි නිව්ස් එකේ තිබුනේ, ඒ දවස්වල රන් මුතු දුව ෆිල්ම් එක කොරන්න කස්ටිය බෝට්ටුවක් ගන්න සල්ලි නැතුව ඉන්නකොට ආතර් මහත්තයා නිර්නාමිකව සල්ලි දීලලු. පේනවනේ සුද්දා එදා ඉඳලා අපිට උගන්වන්නේ පාඩම්. දැන් චන්ද පොස්ටරේකට වියදම් කරන සල්ලි ටික කෝමද මේ වගේ දේකට යෙදෙව්වනම් ? ඕවා කියලා වැඩක් නෑ. චන්දෙ ඉල්ලන උන් මේවා කියෝනවා කියලයෑ. මොකෝ බ්ලොග් කියෙව්වොත් ඒක චන්ද ඉල්ලීමේ සුදුසුකම් උල්ලංගනය කිරීමක් වෙනවානේ. මොකද පල් මෝඩයෙක් වෙලා ඉන්න ඕනිනේ මුලින්ම. කෙලියා නේද තාප්පෙට, සිංදු කියන්න ආව නම් සිංදු කියලා පල. හා.

කොහොම හරි ඉතින් ඔන්න නිව්ස් එක කියෙව්වට පස්සේ සින්දුවගේ මොළේ සිංදු කිසි කිසි ගාලා ට්‍රැක් එකට වැටෙනවා. මුලින්ම වැටුනේ
"මුහුදු පතුල යට ඉඳලා"   කෙලියා නේද තාප්පෙට ඒක ඇවිල්ලා මුදු පුත්තු එකේනේ. ඊළඟට කල්පොනා කොලාම ආවේ
"සිනිදු සුදු මුතු තලාවේ"... ආයෙත් කෙලියා නේද තාප්පෙට ඒක ඇවිල්ලා සත් සමුදුරු එකටනේ. මුහුදු පතුල යට මුලින්ම මතක් වුනු ගමන් ඒක ගැන ලියන්න ඕනා කියලා හිතුනා. පස්සෙනේ මතක් වුනේ ඒක මුදු පුත්තු කියලා. කොහොම වුනත් සිනිදු සුදු මුතු තලාවේ එකනම් මම කලින් ලිව්වනේ. කොහොමද ඒකෙ මියුසික් වල අර්ථය ! ආපෝයි දරුවෝ ඔන්න ඒක කියවලා නැත්නම් මහා පාපයක්. මට හිතෙන හැටියට මට නම් කොච්චර කියෙව්වත් අමුතු කික් එකක් දෙන පොස්ට් එක ඒක. කියෙව්වේ නැත්නම් තියෙන්නේ මේ ලින්ක් එක ක්ලික් කරන්න තමයි.

ඉතින් මේ දෙකම මතක් වුනාට මොකෝ දෙකම රන් මුතු දූවේ නෙවෙයිනේ. ඉතින් ඔන්න ඔහේ ලියන්න හිතුනු මුදු පුත්තු එකේ සිංදුව ගැනම ලියනවා. මේ සින්දුවනම් ඕනි තරම් අහලා ඇතිනේ. අර අර මුහුදු පතුල යට ඉඳලා සිංදුව තමයි මේ කියන්නේ.




ඉතින් මුදු පුත්තු මමත් ඔන්න බලලා තියෙන්නේ පොඩිම කාලේදී එක පාරක් ටීවී එකෙන්. මට තාම මතක ඔය සිංදුව විතරයි. කතාව මොකක්ද කියලා හොයාගන්න ට්‍රයි කොලා කොලා කොලා එකෙක් දන්නේ නෑ හප්පා. දන්නා පින්වතෙක් ඉන්නව නම් මහන්සිය නොතකා පිං තකා ශෙයා කොරගනිත්වා !

ඉතින් මෙහෙමයිලු දැන් ඔය සිංදුව ළමයෙක් නවලන අම්මා කෙනෙක් කියන එකක්නේ.අම්මාගේ නම සරා මට මතක හැටියට. මුලින්ම සරාගේ චරිතය සෝමලතා සුබසිංහ මහත්මියත්, පස්සේ ප්‍රේමා ඩැනියල්ස් මහත්මියත් රඟ දක්වුවලු.  මේ දරුවා ධීවරයෙකුගේ පුතෙක්නේ. ඉතින් ඔන්න ඒ නිසා මුහුද සම්බන්ධ කරගෙන සිංදුව පටාන් ගන්නවා.

මූදු පතුල යට ඉඳලා
මුතු ඇටයක නිදි කරවා
පෙණ කැටියක පාකරලා
මගෙ දෝතට පුතු ආවා

දැන් ඕක අහපු අපේ ගොයියෙක් මට කියනවා ඕකේ තියෙන්නේ අර අර තේරුමක්ලු. මමද නිකන් උඩ කැරකිලා ගියාලු ඈ. උන්දැගේ විචාරේ හැටියට මුතු ඇටය මුතු ඇටය නෙවෙයිලු, පෙණ කැටිය පේන කැටිය නෙවෙයිලු. වෙන ඒවලු නිරුපණය කොරන්නේ. කෙලියා නේද තාප්පෙට ! මුන් සොක්‍රටීස්ලට අන්තයිනේ නෙහ්. මට නම් එහෙම හිතෙන්නම නෑ මෙයා. මම නම් හිතන්නේ ඒ ඒ යෙදුම් යොදාගෙන තියෙන්නේ ඒ ඒ අවස්ථාවට අනුකුලව අර ධීවර යන එක ඉස්මතු කරන්න කියලා.

සුදු පාටින් පහන් තරුව දුර අහසේ දිළිසෙනවා
සුදු පාටින් ටිකිරි හිනා පුතුගෙ මුවින් ගිලිහෙනවා

මෙතනින් කියන දේ ඇත්තටම මුදු පුත්තු බලලම තමා කියන්න ඕනා. සමහර විට මෙතනින් කියන්නේ දුප්පත්කම ගැන වෙන්න පුළුවන්. ඒවා ඔක්කම පුතාගේ සිනාවෙන් යට කරලා අම්මට සතුටක් ගේනවා . එක්කෝ සමහරවිට ඒක නිකන්ම උපමාවක් විදියට ගත්තා විතරක් වෙන්නත් පුළුවන්.

වෙරළෙන් කිරි කවඩි සොයා කෙනෙක් පුතුට ගෙන එනවා
තවත් කෙනෙක් පාට පාට පබළු කඩෙන් ගෙන එනවා
ඒ කවඩියි මේ පබළුයි එක නූලේ අමුනනවා
ඒවායින් හවඩි සදා පුතුගෙ ඉණේ පළඳනවා

මෙතැනදී නොකියා මොනාද කියනවා කියනවා. :D වෙරළෙන් කිරි කවඩි ගේන්නේ එක්කෙනෙකුයි, පාට පාට පබළු ගේන එක්කෙනෙකුයි දෙන්නෙක් ගැන කියනවා. අනික ඒ ටික කියද්දී ඒ අම්මගේ රඟපෑම බලන්න. පුතාගෙන් ඈත් වෙලා හිතන්නේ. වෙරළෙන් කිරිකවඩි ගෙන කෙනා ගැන සතුටු මුණක්, අනිත් කෙනා ගැන වෙනත් මුණක්, වරදක ස්වරූපයක් පෙන්වනවා. නාමික තාත්තයි, නියම තාත්තයි ගැන කියනවා නේද නොකියා. කෙලියා නේද තාප්පෙට !
ඉතින් මේ දෙන්නටම පුතාව අයිතියිනේ. ඉතින් දෙන්නම ගේන ඒවා එක නුලේ අමුණලා හවඩිය බඳින්නේ.

සිංදුව ඇහෙන හැමවෙලාවෙම මම නම් ගිහින් නවතින්නේ ඉස්කෝලේ මේන් හෝල් එකේ. කොලපාට ගාපු බෙරයක් උඩු අතට හරවන් බෙරය කකුල් දෙක අතරේ හිරකරන් පුටුවක වාඩි වෙලා ජින්නා අයියා ඉන්නවා පැත්තක. සර්පිනාව තියාගෙන වසන්තා මිස්. ෆ්ලුට් එක අරන් මධුර අයියා, වයලින් තුන් දෙනෙක් වගේ හිටියා. ඉස්ටෙජ් එකේ කෙල්ලෝ ඉස්සරා කොල්ලෝ ටික පස්සේ. මිසා කවුන්ට් කාලාම ජින්නා දෙනවා මේ විදියටම බෙර පාර..
පුළුවන් තරම් ගිරි යටින් කොට කලිසම් ගහපු කොල්ලෝ සෙට් එකයි, ගිරියටින් කෑ ගහනවට කොල්ලන්ට හිතින් බැන බැන කෙල්ලෝ සෙට් එකයි , මේන් හෝල් එක දෙදරන්න ගයනවා මෙහෙම...




මේක මුල් ගායනය : සෝමලතා සුබසිංහ
තනුව : සෝමදාස ඇල්විටිගල
නාට්‍යය : මුදු පුත්තු - ගුණසේන ගලප්පත්ති
සංගීතය මෙහෙයවීම : ජයතිස්ස අලහකෝන්
මුල් රඟදැක්වීම : 1962 - 05 - 4 හැව්ලොක් ටවුන් රඟහලේ
නිෂ්පාදනයට මහගමසේකරයනුත් දායක වුනා කියලයි ආරංචිය.

( කොහොමවුනත් සින්දුව අග භාගය ඇහෙද්දී මටනම් වයලා ගැන දුක හිතෙනවා. අහ්හ් කෙලියා නේද තාප්පෙට )

Thursday, August 15, 2013

මෙන්න විශේෂ පුවතක් !






ඇලපාත මුදලිතුමාගේ කතාවෙ ඊළඟ කොටස දාන්න කියලා හිතාගෙන ඉන්නකොට වෙන ආතල් කතාවක් හම්බුනා . හම්බුනා කිව්වට හම්බුනාම නෙවේ . මම අරන් තියාගෙන හිටපු කොළ කෑල්ලක් හම්බුනා . ඔන්න මේක පොඩ්ඩෙක්ගෙ පොඩි ආතල් වැඩක් .

අපේ ගෙදර ඉන්නවා , ඉක්කෝලේ හතර වසරේ ඉගෙන ගන්න පොඩ්ඩෙක් . අපේ මාමගේ පුතා . මිනිහා දවසේ වැඩි හරියක්ම ඉන්නේ අපේ ගෙදර . වයලීනොත් එක්ක ගුටි කෙලගත්තම දවසක් දෙකක් විතර නෑවිත් ඉඳලා ආයෙත් " හයියේ............ " ගාගෙන එනවා .

ගිය පොසොන් එකට මිනිහට ඉස්කෝලෙන් ගෙදර වැඩට දීලා තිබ්බා එළකිරි වැඩ ටිකක් . ටීවී එකේ නිව්ස් බලලා ඒවගේ නිව්ස් ස්ක්‍රිප්ට් එකක් ලියාගෙන එන්න කියලත් ඒකෙ තිබ්බා . දන්නවනේ ඉතින් ඒ වගේ වැඩක් දුන්නම අපිත් පොඩි කාලේ හෙන ලොකුවට හිතාගෙන ටීවී එකට මූණ ඔබාගෙන ඉඳලා ඕව කරනවා .

ඉතින් පොසොන් දවසට කලින් දවසේ මේ පොඩ්ඩත් ටීවී එක ගාව වාඩිවෙලා නිව්ස් ඇහුවා . අහලා මිනිහා ලිව්වා ඉස්කෝලෙට ගෙනියන්න නිව්ස් ටිකක් . කෙලින්ම මිනිහා පටන්ගත්තේ 
" මෙන්න විශේෂ පුවතක් " කියලා . හැක හැක හැක 



මෙන්න විශේෂ පුවතක් !

# දැන් කාලගුණය වැඩියි කියා ඔබාමා පැවසුවේය .

# ඉන්දියාවේ කාලගුණය නිසා මිනිසුන්ට ජීවත් වෙන්න විදියක් නෑ කියා මිනිස්සු ප්‍රකාශ කරතී .

# මිනිසාට කේන්ති ගිහින් ගේ ගිනි තියයි.

# හෙට ජනාධිපති බත් දන්සල කයි .


මෙන්න තවත් ප්‍රවෘත්තියක්

# ගංවතුර නිසා ළමයින්ට පාසල් යන්න විදියක් නෑ කියා පවසයි .


මෙන්න තවත් එකක් 

# ගංවතුර නිසා මිනිස්සු ගෙවල් අතෑරලා ගිහින්.

# මිහින්තලාවේ ගින්නක් ඇතිවේ.

# ඉන්දියාවට මරාගෙන මැරෙන බෝම්භ ප්‍රහාරයක් .

# මිනිසා රතිඤ්ඤා පත්තුකර අත කඩාගනියි .


මෙන්න තවත් එකක් 

# මිනිසා කන්දෙන් පහලට පැන ජීවිතය නැති කරගනියි.


මෙන්න කාලගුණය 

මොණරාගල 32යි 
මාතර 50යි
රත්නපුර 52යි
අනුරාධපුරය 64යි

අද කාලගුණය වැඩියෙන්ම තියෙන්නේ රත්නපුරේ . 

බලන්න ආතල්ද කියලා පොඩ්ඩගේ නිවුස් .

Tuesday, August 13, 2013

මම ඔබට අපමණ ආදරේ කරමි සොඳුර






මම ඔබට අපමණ ආදරේ කරමි සොඳුර
ඔබට අවැසිනම් මම එය දිවුරන්නෙමි
දෙවියන්ගේ නාමයෙන් දිවුරන්නෙමි
මම ඔබට අපමණ ආදරේ කරමි සොඳුර

මගේ සිහිනයේ කවිය ඔබය
දැන් මාහට , ඔබ නොමැතිව ජීවිතය ගෙන යා නොහැක
මම ඔබට එතරම් ආදරේ කරමි
එය මා තුලින් එන්නාවූ දිගු සුසුම් පොදක් වැනිය

සාගරයේ මෙපමණ වූ තරංග ඇත
මම ඔබට එතරම්ම ආදරේ කරමි
ඒ මා හට ඇති අපමණ වූ ආශාව නිසාවෙනි
එය කිසිදාක අඩුවක් නොවේ


Friday, August 9, 2013

උම්මා උම්මා උම්ම්ම්ම්මා .................!




මගේ රත්තරං ඔයාට දැන් සනීපද ? .
උම්මා උම්මා උම්ම්ම්ම්මා .................!

අසනීප නිසා වෙනදා වගේ ඔයා මට මූණ දෙන්න නැති උනාම , මම බය උනා ඔයා මට නැතිවෙයි කියලා .
උම්මා උම්මා උම්ම්ම්ම්මා .................!

අත් දෙකම නැතුව දවස් ගානක් හිටියත් මට ඔයා නැතුව ඉන්න බෑ.. බෑ... බෑමයි රත්තරං
උම්මා උම්මා උම්ම්ම්ම්මා .................!

ඔයාව වෙන කාගේවත් අතට යනවා බලාගෙන ඉන්න මට පුළුවන් කමක් තිබ්බේ නෑ රත්තරං
උම්මා උම්මා උම්ම්ම්ම්මා .................!

ඔයාව මගේ කරගන්න හීන මවන කාලේ තිබ්බ ආදරේමයි තාමත් ඔයා වෙනුවෙන් මගේ හිතේ තියෙන්නේ රත්තරං .
උම්මා උම්මා උම්ම්ම්ම්මා .................!

ඔයාගැන දැනගත්ත දවස්වල මම ඔයාගැන හොරෙන් විස්තර හෙව්වේ ඔයාව මගේම කරගන්න හිතාගෙන . උම්මා උම්මා උම්ම්ම්ම්මා .................!

ඒත් මම හදිස්සි උනේ නෑ .
උම්මා උම්මා උම්ම්ම්ම්මා .................!

කල වයස හරිගියාම මම අම්මලට ඔයාගැන කිව්වා .
උම්මා උම්මා උම්ම්ම්ම්මා .................!

අම්මලා ඔයාට කැමතිවෙයි කියලත් මම හිතුවේ නෑ .
උම්මා උම්මා උම්ම්ම්ම්මා .................!

ඒත් ඔයයි මමයි එක වහලක් යටට වෙච්ච දවසේ අම්මලා ගැන ඒ තිබ්බ සැකය නැති උනා .
උම්මා උම්මා උම්ම්ම්ම්මා .................!

ඔයාට මතකද රත්තරං අපේ පලවෙනි රාත්‍රිය ?
උම්මා උම්මා උම්ම්ම්ම්මා .................!

ඔයා මගේ දිහා බලන්නේවත් නැතුව බිම බලාගෙනම හිටියා .
උම්මා උම්මා උම්ම්ම්ම්මා .................!

මම ඔයාගේ නිකටෙන් අල්ලලා මූණ පොඩ්ඩක් උඩට උස්සලා තමයි මූණේ ලස්සන බලාගත්තේ
උම්මා උම්මා උම්ම්ම්ම්මා .................!

මතකද ? මම බලෙන්ම වගේ ඔයාගේ ඇඳුම් ගැලෙව්වා .
උම්මා උම්මා උම්ම්ම්ම්මා .................!

මතකද ? ඔයා මූණ අඳුරු කරගෙන හිටියට මම ඔයාගේ ඉස්සරහ පැත්තට හෙමින් ඔබලා බැලුවා .
උම්මා උම්මා උම්ම්ම්ම්මා .................!

ඔයා රිදිලා වගේ එක පාරටම කෑගහනකොට මම ඔබන එක නවත්තලා ආදරෙන් ඔයා දිහා බලාගෙන හිටියා . උම්මා උම්මා උම්ම්ම්ම්මා .................!

ටික දවසකින් ඔයාගේ හදවතට අලුතෙන් දේවල් ගොඩක් එකතු උනා මතකද ?
උම්මා උම්මා උම්ම්ම්ම්මා .................!

ඊට පස්සේ මම ඔයාගේ ඉස්සරහින් , පස්සෙන් වගේම දෙපැත්තෙනුත් ඔබ ඔබ ඒවා මේවා කරා මතකද?
උම්මා උම්මා උම්ම්ම්ම්මා .................!

ඔයාට ඒවා රිදෙනවා කියලා මම දන්නවා .
උම්මා උම්මා උම්ම්ම්ම්මා .................!

ඒත් මගේ ආසාව වෙනුවෙන් ඔයා ඒවා ඉවසාගෙන ඉන්නවා නේද රත්තරං ?
උම්මා උම්මා උම්ම්ම්ම්මා .................!

මම ආයෙත් ඔයාට රිද්දන්නේ නෑ .
උම්මා උම්මා උම්ම්ම්ම්මා .................!

මම ඔයා කැමති විදියට ඉන්නම් හැමදාම .
උම්මා උම්මා උම්ම්ම්ම්මා .................!

මගේ තනියට ඔයත් හැමදාම මගේ ලඟින්ම ඉන්න රත්තරං .
උම්මා උම්මා උම්ම්ම්ම්මා .................!

ඔයාගේ මූණ දිහා බලාගෙන මම මේ ලෝකේ ගැන ඉගෙනගත්ත දේවල්, මෙච්චරයි කියලා කියන්න බෑ රත්තරං  .
උම්මා උම්මා උම්ම්ම්ම්මා .................!

ඔයාට දන්සනීපයි නේද රත්තරං ?
උම්මා උම්මා උම්ම්ම්ම්මා .................!

මගේ ලැප් එක .
මම ඔයාට ගොඩක් ආදරෙයි වස්තුව .......!
උම්මා උම්මා උම්ම්ම්ම්මා .................!


Friday, August 2, 2013

ගජමන්ට පෙම් බැඳී ඇලපාත මුදලිඳුගේ පුනරාගමනය (5)


ගජමන්ට පෙම් බැදී ඇලපාත මුදලිඳුගේ පුනරාගමනය (1)

ගජමන්ට පෙම් බැඳී ඇලපාත මුදලිඳුගේ පුනරාගමනය (2)

ගජමන්ට පෙම් බැඳී ඇලපාත මුදලිඳුගේ පුනරාගමනය (3)

ගජමන්ට පෙම් බැඳී ඇලපාත මුදලිඳුගේ පුනරාගමනය (4)





මේ පොස්ට් එකට නරක ග්‍රහයෙක්ගේ බැල්මවත් වැටිලාද නැත්නම් ඇලපාත මුදලි තුමාගේ බැල්ම වැටිලද මන්දා ඔක්කොම කොටලා , පොටෝ කෑලි දාලා , අලංකාරව ලක්ෂනට පොස්ට් කරන්න හදනකොටම මොකක්ද මන්දා කී බෝඩ් එකේ මල මගුලක් එබිලා ඔක්කොම ඩිලීට් උනා . මම සයිබර් අවකාසේ අතරමන් උනා වගේ දැනුනා . මම ලියපු පොස්ට් එකක් ඩිලීට් උනාමයි මේ . උදේ කෙටිල්ල එහෙමම අතැරලා ඉඳලා ඔන්නොහෙ රෑ ආයෙත් පටන් ගත්තා පිරිතකුත් රේඩියෝ එකේ දාගෙන ඒක අහනගමන් .

බයකට එහෙම නෙවේ මෙයාලා . ශ්‍රද්ධාවට ශ්‍රද්ධාවට !

ගිය පොස්ට් එකෙන් ඇලපාත මුදලිතුමාට පින් දීලා පැන් වක්කරා , යන එන තැනක යහතින් ඉන්න කියලා . එදා වැඩේ නැවතුනේ ඇලපාත මුදලිතුමාට වටින් ගොඩින් අනං මනං කරපු ඇහැලේපොළ නිලමේ තුමා ගැන නොකියා කියලා . අද ඔන්න මම ඒ නොකියා කියපු එක කියලම දාන්න හදන්නේ .

හරිම මහන්සියි අෆ්ෆා . මේ ඇලපාත මුදලිතුමාගේ මරණේ ඉවරවෙලා වලව්වේ ගහලා තිබ්බ හට් ගලවන්න උදව් කරලා ආවේ . හැක හැක හැක හැක ........ :p :p :p :p

දන්නවනේ ඇහැලේපොළ කියන්නේ කවුද කියලා . සිරිවික්‍රම රාජසිංහ රජතුමාගේ මහඅධිකාරම් විදියට කටයුතු කරපු නිලමේ තුමා . ඒ වගේම සබරගමුවේ පාලනයට හිමිකම් කිව්ව නිලමේ තුමා . මෙතුමාගේ වලව්වනම් තාම අපේ සත්නපුලේ නගරයේ යහතින් තියෙනවා . හැබැයි දැන් ඇහැලේපොළ නිලමේගෙ කවුරුවත් ඒකෙ නෑ .



වලව්ව දැන් ජාතික කෞතුකාගාර දෙපාර්තමේන්තුවට පවරාගෙන රත්නපුර ජාතික කෞතුකාගාරය විදියට පවත්වාගෙන යනවා .

                           මේ ඒ කෞතුකාගාරයේ තියෙන ඇහැලේපොළ නිලමේතුමාගේ රූපය




ඇහැලේපොළ නිලමේතුමා සබරගමුවේ පාලන කටයුතු කරගෙන යන අතරේම මාලිගාවට අයත්වෙන්න ඕන අයබදු එකතු කරන රාජකාරිත් කරලා තියෙනවා . කාලයක් මෙහෙම ඉන්නකොටනේ ඔය ඉංගිරිස් කාරයෝ එක්ක සෙට් වෙලා කියලා රාජසිංහ රජතුමා එක්ක ඇහැලේපොළ නිලමේ තුමා රෙඩ් ලයිට් පත්තු කරගන්නේ . මේ වලව්වේ පස්සේ කාලෙකදී ඇහැලේපොළ නිලමේ තුමා හැංගිලා වගෙත් ඉඳලා තියෙනවා .

මම දෙක වසරේ බබා කාලේ අපේ දහම් පාසලේ දේශනයක් කරන්න ආවා ශාස්ත්‍රපති බන්දුල ලියනගේ මහතා . උන්නැහේ සබරගමුවේ හිටපු ශ්‍රේෂ්ට විද්වතෙක්, පර්යේෂකයෙක්, පරිපාලන නිලධාරී වරයෙක් . එදා උන්නැහේ කිව්වා මේ ඇහැලේපොළ වලව්වේ ඉඳලා කළුගඟ අසලට යන උමගක් තිබුනා කියලා . ඒ උමන් කට තියෙන්නේ සිංදුවා අයියගේ ගෙවල් පැත්තේ . එයත් ඕක දන්නේ නෑ මම හිතන්නේ .

ඒ උමන් කට දැන් බිල්ඩින් එකකට වැහිලා ගිහිල්ලා . ඒ බිල්ඩින් එක හදත්දී මේ උමන් කටට කොන්කිරිට් ස්ප්‍රේ කරලා වහලා දාලා තියෙනවා කියලා තමයි එතුමා කිව්වේ . රත්නපුරේ ෆර්ගසන් කන්ද යටින් මේ උමග තියෙනවා කියලා තව දුරටත් එතුමා කිව්වා . හැබැයි ඇහැලේපොළ වලව්වේ උමගේ ආරම්භයක් දැන් නම් ඇත්තෙම නෑ . මොකද ඇහැලේපොළ මලාට පස්සේ මේ වලව්ව ඉංගිරිස් දිසාපතිවරයාගේ නිල නිවාස බවට පත් උනා . ඒ කාලේ හිටපු අය ඉතිං මේ ලූස් එකට තියෙන ලොකු හිල් ඔක්කොම වහලා වෙන වෙන හිල් හොයාගන්න ඇති .

පසුකාලයෙදීනම් බයේ හැංගිලා වගේ ඇහැලේපොළ නිලමේ තුමා මෙහේ ඉඳලා තියෙන්නේ . ඒ කාලේ තමයි ඇලපාත මුදලිතුමත් ජීවත් වෙලා තියෙන්නේ . මේ ඇලපාත මුදලි තුමාට ලොකු දේපලක් තිබුණා ( මම හරියට දැක්ක වගේ )

මොකද එතුමා පාරම්පරිකවම වංශවතෙක් නිසාත් . එතුමා ඒවා පාලනය කිරීම හොඳින් කරගෙන ගිය නිසාත් ඒවා වර්ධනය උනා මිස නැති උනේ නෑ . මිය යන්න ආසන්න කාලයේ ඇලපාත මුදලි තුමා සබරගමු දිසාවේ කොඩි තුවක්කු නිලමේතුමා විදියට කටයුතු කරපු නිසාත් රජතුමාගෙන් තවත් දේවල් මෙතුමාට ලැබෙන්න ඇති කියලා අපිට හිතන්න පුළුවන් . කොඩිතුවක්කු නිළමේ කියන්නේ ආයුධ භාරකාරත්වයක් දරපු අයට වෙන්න ඕන .



ඇහැළේපොළ නිලමේ තුමා වංශතෙක් උනාට එතුමා ලොකු ලොකු මුදල් ගනුදෙනු වලින් ණය කාරයෙක් වෙලා හිටියා කියලා ජෝන් ඩොයිලි උන්නැහේගේ දිනපොත් වාර්තාවලින් කියවෙනවා . මේ නිසා ඇහැලේපොළ සබරගමුවේ හිටපු වෙනත් ඉහල නිලධාරීන්ගේ වස්තුව කොල්ල කන වැඩත් කරලා තියෙනවා .

කලින් ඇහැලේපොළ නිලමේ ඇලපාත මුදලිතුමාගේ දේපල අයිතිකරගන්න උපායක් විදියට යෙදුවේ අර මද්දුම බණ්ඩාර කුමාරයාගේ අයියා . අර බෙල්ල කපන්න එපා කියලා දිව්ව එක්කෙනාව අලපාත් මුදලිතුමාගේ දුවෙක්ට තීන්දු කරලා තිබ්බ එක . එත් වෙඩින් එක ගත්ත නෑ වයසින් මේ ළමයි බොහොම පොඩි නිසා .
( මගුල කෙරුනෙත් නෑ . උනා නම් විනාසයි ).

ඇලපාත මුදලිතුමා මිය යන්න ආසන්න මොහොතේදී ඇහැලේපොළ නිලමේ තුමාට තමන්ගේ පාරම්පරික වස්තුවට අයත් වටිනා ද්‍රව්‍ය රැසක් පුරවපු පෙට්ටි දෙකක් තුනක් දීලා තියෙනවා .



සමහරවිට ඇලපාත හිතන්න ඇති , මේ දීපු දේවල් නිසා තමා මලාට පස්සේ තාමගේ වස්තුව හූරා කන්න ඇහැලේපොළ නිලමේ එන එකක් නෑ කියලා . එත් උනේ වෙන දෙයක් . ඇලපාත නුදලිතුමා මියගියාට පස්සේ ඇහැලේපොළ නිලමේ ඇලපාත වලවෙන්  තවත් වටිනා කියන දේවල් ගෙන්න ගන්නවා . ඇලපාත මුදලිතුමාගේ පොල් ගස් තුන්දාහකට ආසන්න ප්‍රමාණයක් වගා කරලා තිබුන පොල් වත්තත් අයිති කරගන්නවා .

ඊට පස්සේ ඇහැලේපොළ නිලමේ කරන්නේ ඇලපාත වලව්වෙන් මරාල බද්ද ගෙවන්නේ නෑ කියලා මහවාසලට කම්ප්ලේන් කරන එක . එතකොට මහවාසලෙන් ඔය දැන් ඉන්න ඔඩිට්ලා වගේ ඒ කාලේ හිටපු මහත්වරු සෙට් එකක් ඇලපාත වලව්වට එවනවා ඉන්කම් ටැක්ස් සහ වත්කම් පරීක්ෂා කරන්න .

මෙයාලා ඇලපාත කුමාරිහාමි ඇතුළු වලව්වේ අය එළවලා දාලා වස්තුව ඔක්කොම ගණන් තියනවා . ඔක්කොම වස්තුව පෙට්ටි 2600ක් විතර තිබ්බා කියලා කියනවා . වස්තුව කියන්නේ පින්වතුනී රන් රිදී මුතු මැණික් ඇත්දළ පිත්තල තඹ වගේ දේවල් . ඒත් කුමාරිහාමි වලව්වෙන් එලියට යන්නේ හිස් අතින් . කිසිම දෙයක් එතුමියට ගන්න දෙන්නේ නෑ . ළමයි ටික පරිස්සම්කරගන්න ඕන නිසා කුමාරිහාමි ළමයි ටිකත් අරගෙන වලව්ව ගාව තිබ්බ වෙද ගෙදරට ගියා කියලා කියනවා .

ඉතිං............. ඉතිං.............. ඊට පස්සේ ......................

ඇහැලේපොළ නිලමේ හිතනවා වලව්වේ තවත් හංගලා තියෙන වස්තුව ගන්න ඕන කියල . එහෙම හිතලා ඇලපාත වලව්වේ සේවකයින්ව එක්ක ගිහල්ලා හොඳට කන්න බොන්න දෙනවා .

නෙවෙයි කකුල් වලින් එල්ලලා රත් වෙච්ච යකඩ තල වලින් පුච්ච පුච්ච ප්‍රශ්න කරනවා . ඒ මාර්ගයෙන් වලව්වේ තිබ්බ තවත් වටිනාම කියන භාන්ඩ පෙට්ටි දෙකක් හම්බෙනවා . ඇහැලේපොළගෙ හූරාකෑම ඔහොම තමයි ආ .

මම ඉස්සර ඉඳලා හිතාගෙන හිටියේ ඇහැලේපොළ හොඳ මනුස්සයෙක් කියලා . එත් මගේ හිතේනම් ඒ රූපය දැන් නැතිවෙලා ගිහින් . මේ පොස්ට් පේළියම ලියන්න කලින් මම ගියා ඇහැලේපොළ වලව්ව බලන්න . අස්සෙ මුල්ලෙ රිංගලා කුනුකන්දල් මක්ක හරි හොයා ගන්න . වලව්වේ වත්ත වටේ රවුමක් යනගමනුත් මම කල්පනා කරේ මේ මනුස්සයා නුවර ඉඳන් අපේ ගමට ඇවිල්ලා මෙතන අපේ මිනිස්සුන්ගෙම දේවල් හූරා කෑවනෙ කියලා . හරිම ශෝචනීයයි මෙයාලා .

ඇහැලේපොළ නිලමේ වංශවතුන්ගෙන් මෙහෙම කොල්ල කනවා කියලා රජතුමා දැනගත්තම වහාම වාසලට එන්න කියලා ලියුමක් එවනවා . මොකද ඇලපාත මුදලිතුමත් ඇහැලෙපොලත් තනතුරුවලින් එහා මෙහා උනාට එකම ස්ටාෆ් එකේ අයනේ මෙයාලා . ඉතිං රජතුමාට තරහා යන්න ඇති .

එත් ඇහැලේපොළ නිලමේ කරන්නේ ඒ ලියුම ඉරලා විසික් කරලා , තමා අසනීපෙන් ඉන්න නිසා එන්ට විදියක් නෑ කියලා රජතුමාට දන්වන එක . අයෙත් රජතුමා ලියුමක් එවනවා දඬුවම් කරන්නේ නෑ එන්න කියලා . එතකොට ඇහැලේපොළ නිලමේ මහවාසලට වාර්තා කරනවා .රජතුමා දඬුවම් කරන්නෙත් නෑ . මොකද ඒ කාලේ වෙනකොට ඇහැලේපොළ නිලමේ ඉංගිරිස් කට්ටිය එක්ක සම්භන්ධතා තිබ්බ නිසා රජතුමා බයේ ඉඳලා තියෙන්නේ කැරලි ගැසීමක් වෙන්න පුළුවන් කියලා .

වාසලට යන්න කලින් ඇහැලේපොළ නිලමේ බයටම වගේ කෝකටත් කියලා කොල්ල කාපු දේවල් වලින් සමහර ඒවා ආයෙත් ඒ වලව් වලට භාර දෙනවා . එත් ඒ වලව් වලින් නැතිවෙච්ච ඒවා නැවත භාර දුන් ප්‍රමාණයට වඩා ගොඩක් වැඩියි .

ඔන්න ඇහැලේපොළ නිලමේතුමාගේ කතාව . දැන් අපි වෙන කතාවකට හැරෙමු .

ඔය අපේ සිංදුවා අයියා ඉන්නවා නේද . එයයි මමයි එකම ඉක්කොලෙකට ගියේ කියලත් කට්ටිය දන්නවා නේද ? . ඔය කාලේ තමයි සිංදුවා සින්දුවතී ආදර වෘතාන්තය දිවයන්නේ . හනේ අප්පේ...... බලන්න එපාය දෙන්නගෙ මුකුලුව . ( මම බලාගෙන හිටියේ නෑ , ඉස්කෝල වත්ත වටේ රවුමක් ගියාම පේනවා ) .

ඒ වෙලාවට

                                                      සින්දුවතීගේ හිනාව මේ වගේ.



                                                      සින්දුවගේ හිනාව මේ වගේ .



දෙන්නම මීවද වගේ පැණි හල හල කතාව . තු තු තු . අපිත් මේ නරක උනේ මේ විසූක දර්ශන පෙනීලා තමයි . :p :p :p :p

ඒත් මනස්කාන්තයි පින්වතුනී .

ඒක නෙවේ මෙතන හොඳම කථාව . සිංදුවා කලේ මැත්ස් ගණිතය . සින්දුවතී කලේ ආර්ට් කලා . මම එතකොට 10 වසරේ . අපේ පන්තියට සින්දුවතීගේ පන්තිය පේනවා . වැඩේ කියන්නේ මැත්ස් කරන සිංදුවත් ඉන්නේ ඒ ආර්ට් පන්ති කිට්ටුවමයි . සමහරවිට මැත්ස් පාඩම් ආර්ට් එකෙත් උගන්නන්න ඇති මම හිතන්නේ . හරිම පුදුමයි අපිට . අපිට කිව්වේ සින්දුවගේ මල්ලිටයි මටයි .

අපි ඉස්කෝලේ සංගීත වැඩ වලට එහෙ මෙහෙ යනකොට සින්දුවතී මීට් උනොත් ඒ ගමන්ම සිංදුවත් මීට් වෙනවා . එතකොට අපි එයාලව දැක්ක නිසා සින්දුවගේ මූණ මේ වගේ .



ඇයි සින්දුවතී ඉන්න තැන්වල සිංදුවා කැරකුණේ ? . ඇයි ඒක මෙතැනට අදාළ උනේ ? . බලමු ඊළඟ පොස්ට් එකෙන් .

මම යනවා . ටටා බායි .

ඔබ සැමට සමන් දෙවිඳුගේ පිහිට ලබේවා !