Sunday, March 19, 2017

දරුඵල සහ කේන්දරය ගැන බිඳක්





මේකත් නිකමට වගේ ප්ලේ කරලා බලන්න .







දැනට ටික දවසකට කලින් මම කියවපු කේන්දරයක කතාවක් කියලම මම මේ ලිපියට පූර්විකාව තියන්නම් . මම කේන්දරේ බලනවත් එක්කම එයාගෙන් ඇහුවා මොනවද බෙහෙත් කරනවා කියලා දරුපල වෙනුවෙන් කරේ කියලා .

මේ තියෙන්නේ එයාගේ වචනවලින්ම ඒ අය කරපු දේවල් . කවුද හරි කවුද වැරදි කියලා ඔයාලා තීරණය කරන්න . ඒ ගැන මගේ අදහස මම නොකියා ඉන්නම් . එහෙනම් මේ කතාව කියවලා බලන්නකෝ . කතාවෙන් පස්සේ අපි බලමු දරුවන් සහ කේන්දරය කොහොමද සම්බන්ධ වෙන්නේ කියලා .


මම මුලින්ම ABCD කියල doctor  කෙනෙක් ගෙන් බෙහෙත් ගත්තා .එය අපි දෙන්නටම බෙහෙත් දුන්න.බෙහෙත් කන්දක් බිව්වා . ඒ , අපි කන බොන කෑම වල විෂ ද්‍රව්‍ය වැඩි නිසා ඒවා ශරීරෙන් අයින් වෙන්න ඕනි කියල.ඒ doctor තනිකර දුන්නේ anti-biotin . මට ඒ කලේ urine trouble එකක් නිතරම තිබුන . කොහොම හරි ඒ බෙහෙත් බොන අතරතුරේදීම ඒක දරුණු උනා . මාව hospital admit කරලා දවස් 7ක් එක දිගට IV -meropanam කියල බෙහෙතක් selaine  වලට දාල දුන්න . මම අඟුරු කෑල්ලක් වගේ කළු උනා ඒ බෙහෙතට . අපේ family doctor තමා මව ඇඩ්මිට් කරන්න කිව්වේ . ඊට පස්සේ එය කිව්වා ටික කාලයක් යනකන් VOG doctor ගෙන් බෙහෙත් ගන්න එක නවත්තන්න කියල . ඊට පස්සේ මාස  6ක් විතර මම  බෙහෙත් ගන්න ඒක නැවැත්තුවා . ඒ වෙනකොට මගේ VOG doctor මෙහෙන් transfer  වෙලා පානදුරට ගිහින් තිබුනා . ඊට පස්සේ මම දන්නා midwife ඇන්ටි කෙනෙක් මාව GHIJK කියල VOG කෙනෙක් ගාවට යැව්වා . එයා කිව්වේ මගේ බර අඩු කරගන්න කියල . ඇඟේ සීනි ගතිය එන්න පුළුවන් කියල මට GLUMET කියල බෙහෙතක් දිගටම දුන්රනා . තව තව බෙහෙත් දුන්න . ඒ කොහොම උනත් ඒ doctor එක්ක කිසි දෙයල් කතා කරන්න බැ , අපි නිකන් අත පල්ලෙන් වැටුන ගානට කතා කරන්නේ . දන්නේ නැති කිසි දෙයක් අහන්න බැ බනිනවා . ඉතින් මහත්තය කැමති උනේ නෑ  එයා ගාවට යන්න . අනික ඒ වෙනකොට මට gastritis හොදටම වැඩි වෙලා බෙහෙත් වලටම . ඊට පස්සේ XYZ කියල doctor කෙනෙක් ලඟට මාස 2ක් විතර ගියා . එයා මට බෙහෙත් විද්දා . එයත් කිව්වේ බර අඩු කරගන්න කියල . ඒ මනුස්සයා  නම් දෙවි කෙනක් වගේ . හරිම කරුණාවන්තයි . ඒ උනාට මල්ලි , ඒ වෙනකොට මගේ රතු කට්ට පැනල තිබුනේ . මට කෙලින් කටින් ඉන්න බැ . ගැස්  වැඩි වෙලා , අඩි 2,3ක් ඒක දිගට ඇවිදින්නවත් බැ . කකුල් අත පය කැක්කුම . මට හැම දේම එපා වෙලා හිටියේ . බෙහෙත් වලටම මාව යට වෙලා . මම අන්තිමට තීරණයක් ගත්තා බබාල  නැතත් මම නිරෝගී වෙන්න ඕනි කියල . මහත්තය උනත් කැමති උනේ නැ දිගටම මෙහෙම වද විඳිනවට.
ඊට පස්සේ ඔක්කොම තියෙද්දී මම PQRST කියල doctor කෙනෙක් ගෙන් ගෑස් වලට බෙහෙත් ගන්න ගියා . එයා මගේ බඩ scan කරල කිව්වා අක්මාවේ තෙල් කියලා , අනිඅක මගේ blood බලලා  කිව්වා මගේ අක්මාවේ cells විනාශ වෙමින් යනවා කියල . දිගටම බෙහෙත් ගත්ත නිසා වෙන්න ඇති . දිගටම ඔය තත්වේ තිබුනොත් cancer එකක් දක්වා යන්න පුළුවන් කිව්වා.

එයාගේ බෙහෙත් වලට මට දැන් ගෑස්  ගතිය ගොඩක් අඩු උනා.
දැන් නම් බෙහෙත් බොන්නේ නැ. ආයේ මාස 3කින් blood එකක් බලාගෙන එන්න කිව්වා.

ඔන්න ඕක තමයි කතාව . ඒ කතාව කියනකොට මට තවත් කතාවක් මතක් වුණා . ඒකත් කියලම දරුපල ගැන අපි කතා කරමු . මේ කතාව මට කිව්වේ අපේ ආච්චිඅම්මා . 

මාතර මහගෙදර විකුණලා අපි එහේ ගෙදර බඩු අස්කරනකොට තමයි මට අපේ ඔය පවුලේ පොත් පත් තියෙන පෙට්ටගම ඉස්සෙල්ලම හොයාගන්න ලැබුණේ . කොහොමහරි පෙට්ටගමේ යතුර මට දෙන පිළිවෙලට දීලා මම ඕවා අකුරක් නෑර කියෙව්වට පස්සේ දවසක් මට පෙට්ටගමේ හැංගිලා තිබිලා තවත් පාර්සලයක් ලැබුණා . එතකොට මම හිතන්නේ මම 9 වසරටවත් ඇවිත් නැතුව ඇති . මම මේ පාර්සලය අරගෙන හෙමින් සීරුවේ දිගෑරලා බැලුවා . ඒකෙ තිබ්බේ තඹ පත්තිරු මිටියක් . එක එක වර්ගයේ යන්තර ඇඳලා තිබුණු තඹ පත්තිරු මිටියක් . 

මේ යන්තර සමහර ඒවා අපේ පොත්වල ලියලා තිබුණෙත් නැහැ . මම හැම එකක්ම අරගෙන විමසිල්ලෙන් බැලුවා . සමහර යන්තරවල අයිතිකෙනාගේ නම පවා තිබුණා . ඊට පස්සේ අපේ ආච්චිඅම්මා ඔය යන්තර මිටිය අරගෙන එකක් එකක් ගානේ බලලා ඒ හැම එකක් ගැනම විස්තර කරලා ඒවා ළඟ තියාගන්නේ නැතුව ගඟට දාන්න කියලා කිව්වා .






ඒ යන්තරවල තිබ්බ එක යන්තරයක් ගැන ආච්චිඅම්මා ගොඩක් විස්තර මාත් එක්ක කිව්වා . ඒ යන්තරේ දරුවන් නැතුව අවුරුදු හතකටත් වඩා වැඩි කාලයක් හිටපු දෙන්නෙක්ට තමයි දාලා තියෙන්නේ . ඒ ගෑනු කෙනා හැමදාම මහගෙදර ඇවිත් අපේ ආච්චි එක්ක දුක් ගැනවිලි කියනවාලු දරුවන් නැති නිසා පවුලේ ප්‍රශ්න කියලා . පස්සේ ආච්චි අම්මා අපේ මී මුත්තට මේ කතාව කියලා තියෙනවා . ඒ කාලේ මී මුත්තා වෙදකමත් ටිකක් අඩුවෙන් කරපු කාලයක් අසනීපකම් තිබුණු නිසා .

ඒ නිසා වෙලාවත් තියෙන නිසා යන්තරයක් දාමු කියලා තමයි ඔය යන්තරේ දාලා තියෙන්නේ . අද කාලේ වගේ යන්තර දැමීමක් නෙවෙයි  . මාස තුනක් දවසට වරු දෙක ගානේ වරුවකට එකසිය අට වාරයක් ගානේ ජීවම් කරලා තියෙනවා ඒ යන්තරේ . ඊට පස්සේ තමයි ඕක බෙල්ලේ ගැටගහලා තියෙන්නේ . මාස තුනකට පස්සේ ප්‍රතිඵල ලැබිලා තියෙනවා . ඊට පස්සේ ඒ අයගෙන් මේ යන්තරේ ආයෙත් අරගෙන මහ ගෙදර තමයි තියලා තිබිලා තියෙන්නේ . අද කාලේ බෙහෙත් වලට වඩා ඒ කාලේ ඒ ප්‍රතිකර්ම හරි ගිහින් තියෙනවා .

අද එහෙම දේවල් කරන්න මිනිස්සුත් නැහැ සහ බටහිර වෙදකමටම වහල් වෙලා ඉන්න නිසාත් කන්නේ වස විස නිසාත් දරුවන් ලැබීම සම්බන්ධව එක එක විදියේ ප්‍රශ්න ඇතිවෙලා තියෙනවා . හැබැයි සිංහල වෙදකම තවමත් ශක්තිමත් මේ ප්‍රශ්නයේදී . බටහිර වෙදකම ශක්තිම නැහැ කියනවා නෙවෙයි . ඒත් බටහිරට යන්න බැරි වෙච්ච පැති වලට සිංහල වෙදකම සම්බන්ධ වෙලා තියෙනවා . ඒ නිසා මගේනම් මතය දරුපල ප්‍රශ්න තියෙනවනම් බටහිර වෙදකම් කරලා හරියන්නෙත් නැත්නම් සිංහල වෙදකම පැත්තට පොඩ්ඩක් ගිහින් බලන්න කියන එක තමයි .





හරි එහෙනම් අපි එමු අපේ මාතෘකාවට . කේන්දරය සහ දරුපල .

විවාහයක් වෙනවානම් පොරොන්දම් බලනවා වගේම , කේන්දර ගැළපනවා වගේම තමයි ජ්‍යෝතිෂ්‍ය දන්නා මහත්වරු විදියට දරුපල ගැනත් ඉඟියක් දෙන එක යුතුකමක් . මොකද එතකොට ප්‍රශ්නයක් තියෙනවනම් විවාහවෙන දෙන්නට ඒවා ගැන කලින්ම කතාවෙලා බෙහෙත් ගන්න , ශාන්තිකර්ම කරන්න , යන්තර දාන්න , බෝධි පූජා කරන්න වගේ දේවල් කරන්න පුළුවන් වෙන නිසා .

කේන්දරේක පස්වැන්න තමයි දරුවන් ගැන ප්‍රධාන වශයෙන්ම වග කියන්නේ . ඒත් එහෙමයි කියලා පස්වැන්නටම ලොකු බරක් දෙන එක වැරදියි . තවත් විශාල ගණනක් හේතු සාධක තියෙනවා දරුපල කොහොමද කියලා තීරණය කරන . පොදුවේ දරුවන් නොමැති වීම පෙර ආත්මවල කරන ලද අකුසල කර්මයක් කියලා තමයි පිළිගැනෙන්නේ . කේන්දරෙත් එක්තරා ආකාරයක කුසලාකුසල කර්මවල සංයෝජනය පෙන්වන දෙයක් විදියටත් සලකන නිසා දරුපල ගැන විතරක් හිතලා බලනකොට මේක පෙර කර්මයක් අනුව හොඳ හෝ නරක අතට වෙනවා කියලා විශ්වාස කරන්න පුළුවන් .

පොඩ්ඩක් මෙන්න මේ කතාව කියවලා බලන්න .

ස්වාමීනී, මාගේ පාවාඩය මතින් නොවැඩියේ මන් ද ?

නමෝ තස්ස භගවතෝ අරහතෝසම්මා සම්බුද්ධස්ස

අත්තානං චේ පියං ඡඤ්ඤා
රක්ඛෙය්‍ය නං සුරක්ඛිතං
තිණ්ණ මඤ්ඤතරං යාමං
පටිජග්ගෙය්‍ය පණ්ඩිතෝ

පින්වත්නි, ඉහත මාතෘකා කළ ගාථාව අයත්වන්නේ බෞද්ධ අත්පොත වන ධම්මපදය ග්‍රන්ථයේ ආත්ම වර්ගයටයි. මෙහි සාමාන්‍ය අදහස වන්නේ තමාට තමා පි‍්‍රයනම් ආත්මය රැකගත යුතුය. නුවණැත්තා කුඩා කාලය, තරුණ කාලය සහ මහළු කාලය යන තුන් අවස්ථාවෙන් එක් අවස්ථාවකදීවත් කුසලින් පෝෂණය කරගත යුතුය යන්න ය. සම්මා සම්බුදුරජාණන් වහන්සේ මෙම ගාථාව දේශනා කරන ලද්දේ බෝධිරාජ කුමාරයාටය. මිහිපිට ඇති සියලු ප්‍රාසාද අබිබවා ගිය ‘කොකනද’ නම් ප්‍රාසාදයක් බෝධිරාජ කුමාරයා දක්ෂ වඩුවන් ලවා ඉදිකරවා ගත්හ.

එම ප්‍රාසාදය ගෙවදීමේ මංගල්‍යයට බුදුරජාණන් වහන්සේ ඇතුළු මහා සංඝයා වහන්සේට ද ආරාධනා කළා. ‘මට දුවක් හෝ පුතෙක් ලැබේනම් බුදුපියාණන් වහන්සේ පාවාඩ උඩින් වඩින සේක්වා’ යි සිතා බෝධිරාජ කුමාරයා එළිපත සිට පාවාඩ එලුවා. බුදුරජාණන් වහන්සේ එළිපත වෙතට වැඩමවා නතර වූහ. ‘ ස්වාමීනි! භාග්‍යවතුන් වහන්ස, පාවාඩ උඩින් වඩින සේක්වා’ කියා බෝධිරාජ කුමාරයා ආරාධනා කළහ. එහෙත් බුදුරජාණන් වහන්සේ නිසොල්මන්ව අනද තෙරුන්වහන්සේ වෙත බැලූහ. බුදුන් වහන්සේ පාවාඩ උඩින් නොවඩින බව ආනන්ද තෙරුන් වහන්සේ තේරුම් ගත්හ. පාවාඩ අකුලා දමන ලෙස ආනන්ද තෙරුන් වහන්සේ කුමාරයාට දැන්වූහ. පාවාඩ හකුලා අයින් කලාට පසු බුදුරජාණන් වහන්සේ ඇතුළු සංඝයා වහන්සේ මාලිගයට වැඩම කර දානය වැළදූහ. දන් වළදා අවසන් වූ බුදුරජාණන් වහන්සේගෙන් කුමාරයා මෙසේ අසන ලදී.

‘ස්වාමිනී භාග්‍යවත් බුදුපියාණන් වහන්ස! ඔබ වහන්සේ මා ඇතුරූ පාවාඩ මගින් නොවැඩියේ මන්ද?’
‘ඔබ කුමක් ප්‍රාර්ථනය කර පාවාඩ ඇතුරුවේ දැයි’ බුදුරජාණන් වහන්සේ කුමාරයාගෙන් විමසා සිටියහ.
‘ස්වාමිනී ! මා පාවාඩ ඇතුරුවේ මට දුවෙක් හෝ පුතෙක් ලැබේනම් ඔබ වහන්සේ මගේ පාවාඩ උඩින් වඩීවා යන ප්‍රාර්ථනය ඇතිවයි’ බෝධිරාජ කුමාරයා උත්තර දුන්නා.
‘මා පාවාඩ නොපාගන්න අදහස් කළේ ඔබේ ප්‍රාර්ථනය ඉෂ්ට නොවන නිසා ‘ යනුවෙන් බුදුන් වහන්සේ වදාළහ.
‘මට දරුවෙක් නොලැබෙන්න හේතුව කුමක් දැයි’ කුමාරයා බුදුන් වහන්සේගෙන් විමසා සිටියහ.
‘ඔබ එක් ආත්මයක ඔබේ බිරිය ද සමඟ කළ අපරාධයක් නිසා දරුවන් නොලැබෙන බව‘ බුදුන් වහන්සේ පැවසූහ.

‘ස්වාමීනි, එම අතීත කථාව වදාරන මැනැවැ’ යි බෝධිරාජ කුමාරයා බුදුන් වහන්සේට ආරාධනා කළහ.
බුදුන් වහන්සේ ඔහුගේ අතීත කථාව මෙසේ දේශනා කළහ. “කුමාරය, ඔබ පෙර එක් ජාතියක ඔබත්, බිරිඳත් පිරිවර සමඟ මුහුදු ගියා. මුහුද මැද දී නැව බිඳී පිරිස අතරමං විය. ඔබ සහ බිරිඳ දැව කොටයක ආධාරයෙන් එක්තරා දූපතකට පැමිණියා. ඒ දූපත කුරුලු වාස භූමියක්. ඔබ දෙපළට ඒ අවස්ථාවේ ආහාරයක් නොමැති නිසා කුරුලු බිත්තර අනුභවයට ගත්තා. ඒ වගේම කුරුල්ලන් අල්ලා ගින්නෙන් පුළුස්සා අනුභව කළා.
එම පාප කර්මය නිසා ඔබ උපදින උපදින ආත්මයක දරු සම්පතක් ලැබෙන්නේ් නැහැ. ඔබ එදා බිරිඳ සමග සිහිනුවණින් කටයුතු කළේනම් මෙසේ වන්නේ නැහැ. කුමාරය, තමාට තමා පි‍්‍රය වේ නම්, තමාට තමා හිතවැඩ පතානම්, තුන්වයසේදීම තෙමේ රැකිය යුතුය. තුන් වයසින් අඩු තරමින් එක් වයසකදීවත් තෙමේ රැකිය යුතුය. මෙසේ මාතෘකා කළ ගාථාව මුල්කර බුදුන් වහන්සේ කුමාරයාට ධර්ම දේශනා කළහ.

තමන් කරන කුසලාකුසල කර්මයන්ගෙන් කිසිවිටෙකත් සැඟවිය නොහැකිය. ගොනා පසුපස ඇදී එන රිය සක මෙන් අකුසල කර්මයේ විපාක සසර පුරා දුක් දෙමින් පසුපස එනවා. කුසල විපාකත් ඒ වගේම සෙවනැල්ල මෙන් සැප විපාක දෙමින් පසුපස එනවා.

බෝධිරාජ කුමාරයාට දරුවන් නැතිව ගියේ බිරිය සමග කුරුලු බිත්තර අනුභවයට ගත් පාපයකටයි. එක් එක් සත්ත්ව වර්ගයාට ආවේණික වූ ආහාර වර්ග කොටි, වලසුන් වැනි සතුන් මාංශ භක්ෂකයි. මුවෝ, ගෝන්නු, වැනි සතුන් ශාඛ ආහාරයට ගන්නව. මනුෂ්‍යායට ආහාරවන්නේ අල, බතල, ධාන්‍ය පලතුරු වැනි දේය. එහෙත් මිනිසා එයින් සෑහීමකට පත්වන්නේ නැහැ.

ඔබ සැමට තෙරුවන් සරණයි !
හබරන වෙහෙරහේන යෝගාශ්‍රමයේ
මැල්ලවගෙදර සමණධම්ම හිමි






ජෛවීය විද්‍යානුකූලව ජීවයේ අකණ්ඩ පැවැත්ම තහවුරු කිරීම තමයි ජීවියෙකුගේ මූලික ජීව ක්‍රියාව වෙන්නේ . ඒ වෙනුවෙන් ඉතින් දරුපල තිබීම වැදගත් සාධකයක් වෙනවා . සමාජීය වශයෙන් දරුවෙක් ඉන්නා පවුලක තියෙන සමාජීය තත්වය දරුවෙක් නැති පවුලක ඇතිවෙන්නේ නැහැ . නෛතිකමයව බලනකොට දරුවන් නැති පවුලක සමහර දේවල් හිමිවීමේ වරප්‍රසාදය නැතිවෙනවා . උරුමකම් ලැබීම එහෙම ඒවගේ වෙනවා .

කේන්දරේක දරුවන් ගැන වැදගත් වෙන ස්ථානය පස්වැන්න කියලා කිව්වා වගේම තමයි එතැන ඉඳලා හත්වැන්න විදියට සලකන කේන්දරේ එකොළොස්වැන්නත් දරුපල පිළිබඳව සරු නිසරු බව පෙන්නනවා . කේන්දරේ හත් වැන්නත් චන්ද්‍රයා සිටින ස්ථානයත් අනුව දරුපල ඇතිවීම වෙනස් වෙනවා .

තනි පුද්ගලයෙකුගේ කේන්දරයක් අතට අරගෙන දරුපල මෙච්චරයි කියලා කියන එක සර්ව සාධාරණ නැහැ . බඳින්න හිතලාවත් නැති කෙනෙක් කේන්දරේ දීලා මට ළමයි කීයද කියලා ඇහුවට ඒක සාර්ථක කීමක් වෙන්නේ නැහැ . අනික එහෙම අහන එකත් එක්තරා ආකාරයකට වැරදි දෙයක් . හරිනම් දෙන්නාගේම කේන්දර අනුව තමයි දරුපල ගැන අහන්න ඕන . කේන්දර සංසන්දනය කිරීම අනුව තමයි දරුපල ගැන හරිහමන් තීරණයකට එන්න පුළුවන් වෙන්නේ . ඒවගේම ඒ ඒ කාලවල ගෙවන දසාවල් අනුවත් කේන්දරේ බලවත් උනත් දරුවන් නැතිවෙන්න හෝ ලැබෙන්න ඉඩ තියෙනවා .

දරුපල සම්බන්ධව කේන්දරේ අයිතිකාරයා විදියට සලකන්නේ බ්‍රහස්පතී , ඒ කියන්නේ ගුරු . ගුරු ග්‍රහයාව හඳුන්වන්නේ පුත්‍රකාරක ග්‍රහයා කියලා . ගුරු ග්‍රහයාගේ තැම්පත් වීම , බල දුබලතා , අධිපති භාවය වගේම ගුරු ග්‍රහයාගේ කාලානුරූප හැසිරීමත් මේ දරුපල වෙනුවෙන් දායක වෙනවා .

පස්වැන්න හත්වැන්න එකොළොස්වැන්න අධිපති බව උසුලන ග්‍රහයින්ගේ බලදුබලතා අනුවත් මේ දරුපල විකාශය වීම වෙනවා .

මිථුන සිංහ හා කන්‍යා කියන ලග්න සාමන්‍යයෙන් වඳ නිසරු රාශි විදියට තමයි සලකන්නේ . මේෂ සහ කුම්භ කියන රාශිනුත් වියළි බවෙන් යුක්ත ඒවා . මේ ලග්න පහ දරුවන් අඩු කරන ලග්න කියලා තමයි පෙන්වා දෙන්නේ . ඔය රාශිවල අදාළ ග්‍රහයින් ඉන්නවානම් ඒ ග්‍රහයින්ගේ බල දුබලතාවල වෙනස් වීම් වෙලා දරුවන් අඩු හෝ අහිමි කරවන තත්වයට පත් වෙනවා .

දරුවන් ලබාදෙන්න බාධා එල්ල කරන ග්‍රහයින් විදියට ශුෂ්ක ගති සහිත කුජ නපුන්ෂක ගති සහිත බුධ සහ අර්ධ නපුන්ෂක ගති සහිත සෙනසුරු හඳුන්වන්න පුළුවන් . ඒ ඒ තැන්වල මේ ග්‍රහයින් තැම්පත් වෙලානම් , එයාලට වැටෙන දෘෂ්ටි වලින් මේ ග්‍රහයින්ගේ නරක වැඩ දුර්වල කරන්නේ නැත්නම් දරුවන් අඩුවෙන්න පුළුවන් .





මම කලින් කිව්වා දරුපල වලට හිමිකම් කියන්නේ කේන්දරේ 5 සහ 11 කියන තැන්වල ඉන්න ග්‍රහයින් සහ ඒ අධිපතීන් සහ චන්ද්‍රයාගේ ඉඳලා පහ එකොළහ කියන තැන්වල ඉන්න ග්‍රහයින් කියලා . මේ අධිපතින් සහ ග්‍රහයින් ගේ ඉන්න තැන්වල තියෙන අංශක ගණන් බලනකොට මේවා බෙරණ , අස්ලිස , මා , සිත , දෙට , මුල , දෙනට වගේ නැකත් වලට වැටෙනවානම් දරුවන් අඩුවෙන්න පුළුවන් .

දරුවන් අඩු හෝ නැති අයට විකල්ප විදියට මෙන්න මේ පහලින් මම සටහන් කරන දේවල් ජ්‍යෝතිෂ විද්‍යාවේ සඳහන් වෙලා තියෙනවා .

අදවෙනකොට සමහර ඒවා ප්‍රායෝගික වීමත් නොවීමත් වෙලා තියෙනවා . ඒත් ඔයාලාගේ දැනගැනීම සඳහා මම ඒ දරුවන් ආකාර පිළිබඳව සඳහන් කරනවා .

ඖරස පුත්‍ර - විවාහක බිරිඳගේ දරුවා

ක්ෂේත්‍රජ පුත්‍ර - ස්වාමියා විසින් තමාගේ සහෝදරයෙකුගෙන් හෝ ළඟම නෑදෑයෙකුගෙන් ලබාදෙන දරුවා . නිසරු බව නිසාත් පවුලේ අනන්‍යතාවය පිටත යන නිසාත් දේපල පිටත යන නිසාත් මේ දේ වෙන්න පුළුවන් . එකගෙයි කෑම යම් ආකාරයකට මේකට සමානයි .

දත්ත පුත්‍ර - හදාගන්න ගත්ත දරුවා

ක්‍රීට පුත්‍ර - මිලදී ගත්ත දරුවා

කෘත්‍රීම පුත්‍ර - වැඩුණු පසු හදාගන්න ගත්ත දරුවා

අධම පුත්‍ර - පහත කුලයක කාන්තාවගෙන් ගත්ත දරුවා

ගූඩෝත්පන්න පුත්‍ර - විවාහක ස්වාමියා නැති ස්ත්‍රියකට උපන් දරුවා

අපවිද්ධ පුත්‍ර - පවුලෙන් ඉවත්කරනු ලැබුවාට පසු හදාගන්න ගත් දරුවා

පෞනර්භව පුත්‍ර - වැන්දබු ස්ත්‍රියක් හා සමග විවාහ වෙලා එයින් ලත් දරුවා

කණින පුත්‍ර - අවිවාහක ස්ත්‍රියගෙන් ලබාගත්ත දරුවා

සශෝධි පුත්‍ර - විවාහ වනවිටත් ගැබ්ගෙන සිට පසුව බිහිකරනු ලබන දරුවා

දාසි ප්‍රභව පුත්‍ර - නිවසේ දාසියකගෙන් ලබාගන්නා දරුවා

මේ ආකාරයේ දරුවන් තමන්ට ලැබීම හා නොලැබීම වෙන්නේ කොහොමද කියන එක ගැන ඉගැන්වෙන ඉගැන්වීම් හරිම සංකීර්ණයි . සංකීර්ණ ග්‍රහ පිහිටීම් අනුව තමයි ඒවා සිද්ධ වෙන්නේ . ඒවා පරීක්ෂා කිරීම ජ්‍යෝතිෂ්‍ය දන්නා අයට භාර වෙනවා . දරුවෙක් හදාගන්න ගන්නද කියලා අහනකොට අද කාලෙට ප්‍රායෝගික හොඳ මොකක්ද කියලා කියන එක තමයි ජ්‍යෝතිෂ වේදියාගේ යුතුකම වෙන්නේ .

ඒවගේම තමයි දරුපල හිමිවීම සහ අහිමි වීම කියන එක මේ වගේ ලිපියකින් සුළුවෙන් කතා කරන්න පුළුවන් දෙයක් නෙවෙයි . ඒක සරළම අවස්ථාවේ ඉඳලා ගැඹුරු කරුණු කාරණා දක්වා පැතිරිලා යනවා . දරුවන් නැති අයට පොදුවේ කරන්න පුළුවන් දේවල් ගැන මම ලිපියේ අවසානය විදියට සඳහන් කරන්නම් .





කන බොන දේවල් වලින් අපේ ඇඟේ විස ගතිය ඇතිවෙනවා . ඒ කියන්නේ බෙහෙත් වල පවා විස තියෙනවා . කැඳ වර්ග වලින් පුළුවන් ඇඟේ තියෙන විෂ ගොඩක් දුරට සමනය කරගන්න . කරපිංචා කොළ කැඳ , හාතවාරිය කොළ කැඳ , හාතවාරිය අල කැඳ , හීනටි හාල් කැඳ , වගේ දේවල් පාවිච්චි කරන්න පුළුවන් නම් හොඳයි . ගෙදර මේවා වවා ගන්න ඉඩක් නැත්නම් හාතවාරිය එහෙම පෝච්චියක හදාගන්න පුළුවන් . ඉක්මණට පැල වෙනවා . ඒවගේම තමයි අලත් බහිනවා ඉක්මණටම .

කරපිංචා කැඳ , කරපිංචා විතරක් කැඳ බොන්න පුළුවන් නම් හොඳයි . එහෙම බැරිනම් වෙන පලා වර්ගයක් එක්ක කලවම් කරලා බොන්න පුළුවන් නම් වඩාත් හොඳයි . හැබැයි වැඩියෙන්ම නැතුව සතියට දෙවතාවක් විතර බොන්න . කරපිංචා මිරිස් ගලේ අඹරලා ලුණු , දෙහි දාලා සම්බල හදලා කන්නත් පුළුවන් . ඒත් හොඳයි .

අලුකෙසෙල් ගස් කැපුවට පස්සේ කඳේ උඩ හරියේ කෙසෙල් බඩය ගලවලා අරගෙන නියඹලා වගේ හදලා කන්න පුළුවන් නම් ශරීරයේ තවත් විෂ ගතිය අඩුවෙනවා . සර්පයෝ කෑවට පස්සේ පොවන්නෙම අලුකෙසෙල් කඳේ කෙසෙල් පතුරුවල ඉස්ම , අලුකෙසෙල් අල ඉස්ම වගේ දේවල් . ඒ නිසා අලුකෙසෙල් බඩත් ඉතාම ගුණදායක කෑමක් මේ විෂ ගතිය නැති කරන්න .

මේක තමයි වැදගත්ම දේ . මේක කරනවානම් ශරීරය ඉක්මණටම ප්‍රකෘතිමත් වෙනවා . ඒ කෝමාරිකා මදය කන එක . තිත්ත දැනෙන්නේ නැත්නම් කෝමාරිකා පිත්තම හපලා කන්න  පුළුවන් නම් හොඳයි . එහෙම බැරිනම් කෝමාරිකා පිත්ත පලලා ඒ මදය හැන්දකින් හූරලා දාන්න වතුර වීදුරුවකට . පස්සේ ඒක බොන්න . සෙවල ගතියක් විතරයි තියෙන්නේ . කිසිම රහක් නැහැ . අක්මාවට මුත්‍රාශයට මොළයට වගේ හැම දෙකටම කෝමාරිකා ගොඩක් හොඳයි .

කටු අනෝදා වඩාත් ගුණදායකයි . ශරීරය , ලේ , මුත්‍රා පිරිසිදු කරන්න පුළුවන් හැකියාවක් අනෝදා වලට තියෙනවා . ඒවගේම සෛලීය ක්‍රියාකාරීත්වය වැඩිකිරීමේ හැකියාවක් අනෝදා වලට තියෙනවා .

මේ දේවල් පිස්සු හැදිලා වගේ කාගෙන බීගෙන යන්න එපා . සතියට මේ ජාතිවලින් දෙකක් වගේ ටික ටික ඇඟට දාගන්න . එතකොට ශරීරයේ විෂ ගතිය ටික ටික නැතිවෙලා යයි .

වතුර වැඩියෙන් බොන්න ඕන . ඒකත් වැදගත් දෙයක් . එතකොට ශරීරයට අනවශ්‍ය දේවල් මුත්‍රා එක්ක පෙරෙනවා . මුත්‍රාශයේන් අධිකව බෙහෙත් වර්ග පෙරෙනවා කියන්නේ ඒකෙ ව්‍යුහයට හානියක්  වෙන්න තියෙන ඉඩ වැඩිවෙනවා . ඒ හානිය සමනය කරන්න කරපිංචා වලට පුළුවන් .






සරු බව වැඩිවෙන්න මේ කෑම ජාති හොඳයි .
රට කජු
කජු
එළඟිතෙල්
එළකිරි
උඳු
තල
මුන් ඇට
වෙරළු
මුරුංගා කරල් උයලා
මුරුංගා කොළ
එරබදු කොළ
රට ඉඳි
කිරි ඉබි මස් ( මරන්න තහනම් / හොයන්න ලේසි නෑ )
දූරියන් වගේ දේවල් හොඳයි
දූරියන් ඇට තම්බලා

ආහාරයට ගැනීමෙන් ප්‍රජනන සෞඛ්‍ය තත්වය නගාසිටුවාගන්න පුළුවන් .


කෘත්‍රීම කෑම වලින් පුළුවන් තරම් ඈත් වෙන්න

කොත්තු , ක්ෂණික නූඩ්ල්ස් ,වගේ කෑම අහිතකරයි .
කෘමිනාශක වගේ දේවල් අහිතකරයි .
විකිරණ අහිතකරයි .


ඒවගේම තමයි දරුපල වැඩිකරගන්න නොයෙක් ආකාරයේ ශාන්තිකර්ම තියෙනවා . පොදුවේ හැමෝටම කරන්න පුළුවන් දේ තමයි මම මේ ලිපියේ සටහන් කරන්නේ . ඒ තමයි සිල් සමාදන් වීම .

විවාහක යුවලක් දෙන්නාම සිල් සමාදන් වෙන්න ඕන . මේ සිරිත ආවේ සිද්ධාර්ථ කුමාරයාගේ කුස පිළිසිඳ ගැනීම අරමුණු කරගෙන කියලා තමයි මමනම් හිතන්නේ . බෞද්ධ සිංහල උදවිය හැටියට මේක කරන්න බැරි කමක් තියෙන්න විදියක් නැහැ ; පෝයට ඉතින් නිවාඩුත් තියෙන නිසා .

ඇසල මාසයේ පුර පසළොස්වක පොහොය දවසේ මහමායා දේවිය සිල් සමාදන් වෙලා ඉන්නා දවසක රාත්‍රියේ තමයි සිදුහත් කුමාරයා තුසිතයෙන් නික්මිලා මවුකුසට වැඩියේ . ඒ දේ අනුව යමින් හැම පොහොය දවසකම දෙන්නටම අටසිල් සමාදන් වෙන්න පුළුවන් නම් දරුවෙක් පිළිසිඳ ගැනීමේ වාසනාව ලඟා කරගන්න වාසනාවන්ත වෙන්න පුළුවන් කමක් ලැබෙනවා කියලා විශ්වාසයක් තියෙනවා .

දරුවෙක් ලැබෙන්නේ නැත්නම් දරුවෙක් හදාගන්නා එක තමයි උතුම්ම පිං කම වෙන්නේ . තමන් ඒකට හිත හදාගන්න ශක්තිමත් වෙන්න ඕන . තමන් ගිය ආත්මවල කරපු පවු නිසා තමයි මේ ආත්මයේ විඳවන්න වෙලා තියෙන්නේ . ඒ පවෙන් ලබන ආත්මයේ හෝ ගැළවෙන්න මේ ආත්මයේ කරන්න පුළුවන් ලොකුම පිං කම තමයි දරුවෙක් අරගෙන හදාගන්නා එක .

පවුලේ දේවල් පිටට යනවා , ලෙයින් පිටට යනවා , වගේ දේවල් පදනමක් නැති කතා . ඒ නිසා තමන්ට පුළුවන් තරම් උත්සාහ කරලා බෙහෙත් හේත් ශාන්තිකර්ම කරලා බැරිනම් දරුවෙක් හදාගන්න කියලා තමයි මමනම් කියන්නේ .

එහෙනම් දරුවන් නැති අයට දරුවන් ලැබේවා කියලා ප්‍රාර්ථනා කරනවා .
දරුවන් ඉන්න අයටත් දරුවන් ලැබේවා කියලා ප්‍රාර්ථනා කරනවා .

ආයෙත් ලිපියකින් හමුවෙමු .

ඔබ සැමට සමන් දෙවිඳුගේ පිහිට ලැබේවා !

Tuesday, March 7, 2017

මුදු මුහුණේ සුව දැනුනේ මගෙ විතරද ?







ගීතයක් ගැන ලියන්න ඕන කියලා හිත හිත හිටියට ලියන්න තරම් වැදිච්ච සිංදුවක් මේ දවස් වල තිබුණේ නැහැ . මේ දවස්වල වැඩියෙන්ම අහන්නේ වාදන . රවි ශංකර් , අනුෂ්කා ශංකර් , සකීර් හුසේන් , පන්නලාල් ගෝෂ් , හරිප්‍රසාද් චෞරසියා වගේ අයගේ වාදන තමයි ඒ වාදන ලිස්ට් එකේ තියෙන්නේ . අපේ ගෙදර ටිකක් සද්ද බද්ද වැඩියි . මොකද පොඩි චරිතයක් නිතරම ගෙදර ඉන්න නිසා .

ඒ නිසා පොතක් කියවන්න ගත්තත් කේන්දරයක් බලන්න ගත්තත් fb ආවත් හැමවෙලේම වගේ මම ඔය වාදනයක් හෝ ගීතයක් දාගෙන හෙඩ් සෙට් එක කනේ ගහගෙන තමයි වැඩ කරන්නේ . මේ ගීතය මතක් වුනේ දවසක් කේන්දර ලියලා තියෙන පොත පෙරලනකොට .

ජ්‍යෝතිෂ විද්‍යාව එදා ඉඳලා අද දක්වා පරිණාමය වුණේ සෘෂි වරුන්ගේ න්‍යායාත්මක දැනුම සහ ඒ ඒ කාලවල පහළවෙච්ච විශාරදයින්ගේ පරීක්ෂණ මත . ඒ නිසා මමත් ලැබෙන හැම කෙනෙක්ගෙම කේන්දර එදා ඉඳලාම පොතක ලියනවා එකතු කරලා විශ්ලේෂණය කරලා මොනවා හරි අලුත් දෙයක් කරන්න . 

ඒ නිසා ඒ ඒ අයගේ විශේෂතා කේන්දරේම ලියලා තියෙනවා . වෙලාවක් ලැබුණු වෙලාවේ මම මේක දවසක් ආයෙත් මුල ඉඳලා පෙරලලා බැලුවා . ඔය බලන අතරේ දකින්න ලැබුණු කේන්දරයක් තමයි අද කතාවට මාතෘකා වෙන්නේ . ඊට පස්සේ අපි එමු ගීතයට . 





ගිය අවුරුද්දේ අන්තිම මාසේ දවසක මට කෙනෙක් කේන්දරයක් මගේ fb එකවුන්ට් එකට මැසේජ් කරලා තිබුණා ඒකෙ ගුණ අගුණ කොහොමද කියලා කියන්න කියලා . මම ඊට පස්සේ ඕක බලන්න ලොකු කාලයක් ගත්තා . මොකද ඒක ලැබෙන්න කලින් ගොඩක් කේන්දර ලැබිලා තිබුණු නිසා . 

ලැබුණු පිළිවෙලට තමයි මම බලන්නේ ඒක සාධාරණ නිසා . දවසට කේන්දර දෙකක් විතරක් බලන්න තමයි මම වෙලාව තියාගෙන ඉන්නේ . එතකොට අනිත් දේවලුත් සමබර කරගෙන කරන්න පුළුවන් නිසා . ඒත් මේ කේන්දරේ බලන්න ගොඩක් කල් ගියා . ඊට පස්සේ දවසක් ඔන්න මෙයා මට ආයෙත් මැසේජ් කරලා තිබුණා . 

ඒ මැසේජ් එකේ කියලා තිබුණේ එයාගේ පවුල් ජීවිතයේ ප්‍රශ්නයක් තියෙනවා . ඒක තවම විසඳගන්න ලැබුණේ නැහැ ඒ නිසා කේන්දරේ ඉක්මණට බලලා දෙන්න කියලා . 

එයා විවාහක කෙනෙක් . ඉතින් හදිස්සියි කිව්ව නිසා මම ඒක ඉක්මණට බැලුවද ? . නැහැ . වයලීනෝ එහෙම කෙනෙක් නෙවෙයි නිසා හරියට පිළිවෙලට බලාගෙන ඇවිත් ඔන්න හරි තැනදී ඒකත් බැලුවා . කේන්දර බලනකොට කේන්දරේ ගන්න වෙලාවේ මම කේන්දරේ දෙන කෙනාගෙන් අහන විශේෂතම ප්‍රශ්නය තමයි මගේ පළාපල කථනය හරහා විශේෂයෙන් දැනගන්න උවමනා මොනවාද කියන එක . මොකද එයාලට අවස්තාවක් දීමෙන් වඩාත් හොඳ විස්තරයක් ලබාදෙන්න පුළුවන් නිසා . 




මෙයා ඒකට කියලා තිබ්බේ එයාගේ පවුල් ජීවිතය කොහොමද , දරු පල කොහොමද ? , එයාගේ වෙනත් සම්බන්ධතා ඇතිවීමේ හැකියාවක් තියෙනවද ? එයාගේ බිරිඳට වෙනත් සම්බන්ධතා ඇතිවෙන්න හැකියාවක් තියෙනවද කියන එක . ඔය ප්‍රශ්න ඔක්කොටම මම ළඟ කේන්දරේ හරහා උත්තර තිබුණා . මම ලවා කේන්දර බලවාගත්ත අය දන්නවා ඇති මම කියන කතා , ඔයවගේ ඒවා ගැන . 

ඇඟට දැනෙන්නේ නැතිවෙන්න මම කියන ඔය වගේ දේවල් තේරුම් ගන්නේ බොහොම පොඩ්ඩයි . තේරුම් ගත්තේ නැති වුණාම සමහර අයට මම ඒක අන්තිම මොහොතේ තේරුම් කරනවා . එහෙම කරන්නේ ඉගෙන ගත්ත යමක් කමක් තේරුම් ගන්න මොලයක් තියෙන අයට විතරයි . නැත්නම් පවුල් අවුල් වීම වෙන නිසා ඒවා කියවෙන්නේ නැහැ . 

ඔන්න ඉස්සෙල්ලම පිරිමි කෙනාගේ කේන්දරේ බැලුවා . හරි අවුලක් නැහැ . ඒකෙ තියෙනවා වෙනත් සම්බන්ධතා ඇතිවෙන්න පුළුවන් කියලා එයාට . ඊට පස්සේ ඒ ගැන කිව්වා . කිව්වට පස්සේ මිනිහත් කිව්වා ඔව් එහෙම එකක් තියෙනවා කියලා. ඊට පස්සේ මෙයා කිව්වා තමන්ට බිරිඳගේ කේන්දරේ බලවාගන්න ඕන කියලා . මම ඊට පස්සේ කිව්වා මම බලලා දෙන්නම් හැබැයි ටික දවසක් දෙන්න කියලා . 

ඔන්න ඔය ටික දවසට තමයි මෙයා පිස්සු නටන්න ගත්තේ . හැමදාම මට මැසේජ් කරන්න ගත්තා බිරිඳ පිට යන්න පුලුවන්ද කියලා අහලා . ඒ අස්සේ අහනවා තමන්ට මීටත් අමතරව වෙනත් සම්බන්ධතා ඇතිවෙන්න පුලුවන්ද කියලා . මම බිරිඳගේ සහ සැමියාගේ කේන්දර දෙක එකට තියලා බැලුවා මොකක්ද අවුල කියලා . දෙන්නා වෙන් වෙන්න පුළුවන් . ඒත් බිරිඳ චරිතය නසාගන්නවා කියලා පෙන්නුම් කරන මොකවත තිබුණේ නැහැ .




ඔය මැසේජ් ටික සාවධානයෙන් බලපු මම ඒත් හිටියා එයාගේ අවස්ථාව ආවම එයාගේ බිරිඳගේ කේන්දරේ බලලා දෙනවා කියලා හිතාගෙන . මෙයා එන්නේ මෙයාගේ හිතේ තියෙන දේවල් වලට මගේ පළාපල විස්තරේ අවියක් කරගන්න කියලා මට තේරුම් ගිය නිසා මම ඒ කේන්දරය බැලීම ප්‍රතික්ෂේප කරා . 

පස්සේ එයා බැගෑපත් වුණත් මම ඒක ප්‍රතික්ෂේප කරා . ඇත්තටම හොඳ බිරිඳක් එයාට හිමිවෙලා තිබුණා . එයාට තිබුණේ වෙනත් ගෑණු පස්සේ යන්න තියෙන උවමනාවට හිත හදාගන්න හේතු හොයන්න තිබ්බ උවමනාවක් .

කේන්දර බැලීම ප්‍රතික්ෂේප කලත් මම එයාට කිව්වා ඔයාට වඩා ඔයාගේ බිරිඳගේ කේන්දරේ හොඳයි . ඒ කියන්නේ එයාගේ ජීවිතය හොඳයි  . ඔයා බැන්දට පස්සේ තමයි එයාට දුක් විඳින්න වෙනවානම් වෙන්නේ කියලා . එයා ඒක පිළිගත්තා . ඒත් ඊට පස්සෙත් ප්‍රශ්නය වුණේ බිරිඳ පිට යනවද කියන එක . ඉන් එහා මම ඒ ගැන මොකවත් අදහස් දක්වන්න ගියේ නැහැ .

ඔයවගේ අත්දැකීමක් මට ලැබුණාමයි . 

මෙතන පිරිමියා රැකියාවක් කරන්නේ නැහැ . ඉගෙනගෙනත් නැහැ . බිරිඳ තරමක් ඉගෙනගෙන . රැකියාවක් කරනවා . උපයනවා . බිරිඳ උපයන සල්ලිවලින් කකා , තව බිරිඳ පිට යනවද කියලා සැක කරන එක කොච්චර පහත් වැඩක්ද . ඊටත් වඩා පිළිකුල් සහගත දේ තමයි ජීවිතය සාර්ථක කරගන්න පාරවල් කියලා දෙන ජ්‍යෝතිෂ විද්‍යාව වගේ ඉගැන්වීමක් ඇයි මේ මිනිස්සු ජීවිතේ නැති කරගන්න නාස්ති කරගන්න පාවිච්චි කරන්නේ කියන එක . 

බිරිඳ පිට ගියා කියමුකෝ , ඒක හොයාගන්න කේන්දරෙන් පුළුවන් වුණත් එයාගේ අරමුණ මොකක්ද කියලා පැහැදිලි නිසා මම කිව්වේ නැහැ . අවසාන වශයෙන් මම කිව්වේ බිරිඳ පිට යනවානම් කොන්දක් තියෙනවනම් කෙලින්ම පස්සෙන් ගිහින් හොයාගන්න කියන එක . එතනින් ඒ කතාව අවසන් වුණා . 

කේන්දර බලන්න ගිහින් සමාජය ගැන මාර දේවල් තමයි අහන්න දකින්න ලැබුණේ . 75% වගේම තියෙන්නේ අන්ධ වීම නිසා ජීවිතේ විනාශ කරගත්ත අවස්ථා . ඒත් 25 % වගේ තියෙනවා හොඳ තත්වයක් . මේ ගතවුණු කාලයටම සැලකිය යුතු ප්‍රශ්න නැති එකම එක පවුලක් මට හම්බෙලා තියෙනවා .

ඒවගේම තමයි බිරිඳගේ ඉතිහාසය හොඳ නැති ඒත් වර්තමානය හොඳ නිසා අනාගතයත් හොඳ වෙයි කියලා බලාපොරොත්තුවෙන් හිත හදාගෙන ඉන්න , තමන්ගේ ඉතිහාසයත් හොඳ නැති නිසා බිරිඳට ඇඟිල්ල දිගු කරන්නේ නැතිව වර්තමානය හොඳින් ගත කරන දෙවිවරු වගේ චරිතත් මට හමුවෙලා තියෙනවා .

ස්වාමියාගේ වැරදි ඉවසාගෙන ඒවා ටික ටික හදාගෙන දියුණුවෙන්න බලන ධෛර්යවන්ත් කාන්තා චරිතත් මට හමුවෙලා තියෙනවා . ඒ හැමෝම තමන් ගත කරන ජීවිතය උපේක්ෂාවෙන් බලලා ගොඩ යන්න ගන්නා උත්සාහය හරිම ප්‍රශංසනීයයි .





ඒ හැමදේම ගැන හිතලා බලනකොට අවසානයේ පේන්නේ තමන්ගේ හිත පාලනය කරගන්න බැරි වීම නිසා තමයි හැමදේටම ප්‍රශ්න අරගෙන එන්නේ කියලා . ලැබුණු දේ හොඳයි කියන මතයෙන් ඉදිරිය ගැන කල්පනා කරලා වැඩ කරන්නේ නැතුව ලැබුණු දේවල වල වැරදිත් නොලැබුණු දේවල් ගැනත් හොයන එකයි හොඳ නැතිම දේ . අනික තමයි අනුන්ට ඇඟිල්ල දිගු කරන්නේ නැතිව ඉස්සෙල්ලම තමන් හොඳට ඉන්න ඕන කියන දේ . තමන් කරන පැමිණිල්ල හෝ දෝශාරෝපනය සාධාරණ එකක් වෙන්නේ අන්න එතකොටයි .

කේන්දර පොත පෙරලන වෙලාවේ ඔන්න ඕවා එක්ක තමයි මෙන්න මේ ගීතය මතක් වුණේ . ඊට පස්සේ ගීතය ගැන හොයලා බැලුවාම එක එක වර්ගයේ මත තිබුණා . ඒත් මම හිතුවා ඒ කේන්දර කතාවෙන් ලැබුණු ආරම්භයත් එක්ක මේ ගීතය ගැන ලිව්වනම් හොඳයි කියලා .

ඉස්සෙල්ලම අපි ගීතය අහලා ඉමු . හෙඩ් සෙට් දාගෙන ගීතය අහන්න . නැත්නම් ගීතයේ හොඳ සංගීතය ඇඟට දැනෙන එකක් නැහැ .











මුදු මුහුණේ සුව දැනුනේ
පිය ලඳුනේ මට විතරද
ඔබෙ සුසුමේ සුව දැනුනේ
හිමි සඳුනේ මට විතරද...

පුළුලුකුලේ සුව යහනේ
නිදි වැරුවේ මන් විතරද
උර තලයේ හිස රන්දා
සුව වින්දේ මන් විතරද...

ඉඟ නෙරියේ රැළි බින්දේ
පිය ලඳුනේ මන් විතරද
ඉඟ නෙරියේ රැළි සැදුවේ
හිමි සඳුනේ මගෙ විතරද...

පද රචනය -මහින්ද දිසානායක



සංගීතය     -ගුණදාස කපුගේ



ගායනය     -දීපිකා ප්‍රියදර්ශණී / කරුණාරත්න දිවුල්ගනේ







මේ ගීතය විවාහක යුවලක් අතර සිදුවෙන ගැටීමක් විදියට සමහරෙක් අර්ථ දක්වලා තිබුණා . ඒවගේම තවත් කෙනෙක් ලියලා තිබුණා මේ ගීතයෙන් කියවෙන්නේ අවිවාහක යුවලක් ඒත් ලිංගික හැසිරීමක් වෙනුවෙන් සූදානම් වන අවස්ථාවක දෙන්නාගේ හිතේ ඇතිවෙන ප්‍රශ්න සමුදායක් ගැන කියලා . මොකද හදිස්සියේ හෝ සැලසුම් කරලා හෝ ඒ වෙනුවෙන් වෙලාවක් හදාගෙන මේ දෙන්නා හමුවෙන වෙලාවේ මේ පිරිමියාට මේ කාන්තාව කෙරෙහි ආදරයක් ඇතිවෙනවා . පෙනුමට හෝ හැසිරීම නිසා වෙන්න ඇති . ඒ ආදරය නිසා මේ සම්බන්ධය තව දුරටත් අරගෙන යන්න හෝ විවාහ වෙන්න පුළුවන්ද කියලා ප්‍රශ්න කරන ස්වභාවයෙන් මේ ගීතය නිර්මාණය වෙලා තියෙනවා කියලා තමයි එතැන විස්තර කරලා තිබුණේ .

මේ ගීතය අහනකොට මටනම් හිතෙන්නේ විවාහක යුවලක් පවුල් ප්‍රශ්නයක් ආරම්භ කරගන්න සූදානම් වෙන අවස්ථාවක් මේ ගීතයේ සඳහන් වෙලා තියෙනවා කියලා තමයි . විවාහක යුවලක් කියලා කියන්න මම මෙන්න මේ දේවල් තමයි හේතු කරගත්තේ .

ගණිකාවකට " පිය ලඳුනේ " කියලා ආමන්ත්‍රණය කරයි කියලා විශ්වාස කරන්න බැහැ . ඒවගේම තමයි හදිස්සියේ මුණ ගැහුණු දෙන්නෙක් අතරේ මේ දෙබස වෙනවානම් පිරිමියා කාන්තාවට " පිය ලඳුනේ " කියලා ආමන්ත්‍රණය කරන්නත් කාන්තාව විසින් පිරිමියාට " හිමි සඳුනේ " කියලා ආමන්ත්‍රණය කරන්නත් හැකියාවක් නැති නිසා . අනිත් කාරණාව තමයි පුළුලුකුලේ සුව යහනේ නිදි වැරුවේ මං විතරද කියලා ප්‍රශ්න කිරීම . අවිවාහක යුවලක් නම් ඔය ප්‍රශ්නය අහන්න අවශ්‍ය වෙන්නේ නැහැ . ගණිකාවක් නම් ඒත් අහන්න උවමනාවක් වෙන්නේ නැහැ .

ගීතය ගැන පොදුවේ මෙන්න මෙහෙම අදහසක් තමයි මම දරන්නේ . විවාහක යුවලක් විවාහ වෙලා ටික කාලයක් ගතවුණාට පස්සේ ඒ දෙන්නා ගැන දෙන්නටම සැක හිතෙනවා . ගීතයෙන් කියවෙන්නේ සැකයේ ආරම්භය . ඒ කියන්නේ හිතෙන් සැක කරන අවස්තාව ගැන . සමහර වෙලාවට පෙම්වතුන් අතරෙත් මේ වගේ ප්‍රශ්න ඇතිවෙනවා . ඒක වගකීම් රහිත ප්‍රශ්න ඇතිවීමක් . පෙම්වතුන් අතරේ සැකය ඇතිවීමෙන් වෙන් වුණා කියනවාට වඩා ලොකු ප්‍රශ්නයක් ඇතිවෙනවා විවාහ වෙලා ඉන්නා දෙන්නෙක් අතරේ ප්‍රශ්නයක් ඇතිවෙලා වෙන් වුණාම . ඒ නිසා සැකයේ වාසියට ඉඩ දීම නෙවෙයි වැදගත් වෙන්නේ හරියටම අදාළ කාරණය ගැන හොයලා බලලා වැඩ කරන එක තමයි වැදගත් වෙන්නේ . අපි බලමු ගීතය ගැන .





මුදු මුහුණේ සුව දැනුනේ
පිය ලඳුනේ මට විතරද

ඔබෙ සුසුමේ සුව දැනුනේ
හිමි සඳුනේ මට විතරද...

ස්වාමියා අහනවා බිරිඳගෙන් ඔබගේ මෘදු මුහුණේ සුවය දැනුනේ මට විතරද කියලා . ඒ කියන්නේ මුහුණ සිප වැලඳ ගත්තේ ස්වාමියා විතරද කියලා . එතකොට බිරිඳටත් තියෙනවා ඒවගේම ප්‍රශ්නයක් . ඒ තමයි ඔබෙ සුසුමේ සුව දැනුනේ හිමි සඳුනේ මට විතරද කියන ප්‍රශ්නය . 

ස්වාමියා බිරිඳගෙන් ප්‍රශ්න කරනවාට වඩා සැර ගතිය වැඩි අර්ථයක් තමයි බිරිඳ ස්වාමියාගෙන් කරන ප්‍රශ්නයෙන් මම දකින්නේ . ඔබෙ සුසුමේ සුව දැනුනේ කියලා කියනකොට එතනින් වක්‍රාකාරව ලිංගික එක් වීමක වේගවත් සුසුම් පහර වුණත් අර්ථවත් කරන්න පුළුවන් . කොහොමත් බිරින්දෑ වරුන්ගේ ප්‍රශ්න කිරීම් සැර නිසා ඒ තර්කය සාධාරණ වෙන්න ඕන . 

දෙන්නට දෙන්නා සැක කරනවා . තවම ගිනි පත්තුවෙලා නැතත් ගිනි පත්තු වෙන්න ඔන්න මෙන්න වගේ තමයි තියෙන්නේ . දෙන්නම ගින්න අවුලව ගන්න මාවතක් හොයනවා කියලා තමයි ගීතයෙන් පේන්නේ . ගීතයේ සංගීතය ගැන කියනකොට මට ඒකට හොඳ සාක්ෂි තියෙනවා . අපි එතකොට බලමු ඒ මොනවද කියලා . 





පුළුලුකුලේ සුව යහනේ
නිදි වැරුවේ මන් විතරද

උර තලයේ හිස රන්දා
සුව වින්දේ මන් විතරද...

ඊළඟට පිරිමියා ප්‍රශ්න කරන්නේ බිරිඳගෙන් , ඇයගේ උකුල් තලයේ හිස තියාගෙන නිදි වැරුවේ ස්වාමියාම විතරද කියලා . නිදි වරනවානම් , මුලින් කිව්වා වගේ ගණිකාවක් හෝ ප්‍රේම වන්තියක් නොවෙයි නම් . මේ ගීතයෙන් විවාහක යුවලක් ගැන කියවෙනවා කියන එක සාධාරණයි කියලා මම ආයෙත් මතක් කරනවා .

එතකොට බිරිඳටත් ඒවගේම ප්‍රශ්නයක් එනවා තමන්ගේ ස්වාමියාගේ උර තලයේ හිස තියාගෙන ඒ සුවය වින්දේ තමන් විතරමද කියලා . ගීතය මුල ඉඳලා ක්‍රම ක්‍රමයෙන් උච්චත්වයට ගමන් කරනවා වගේ තමයි පේන්නේ . අපි බලමුකෝ දෙවෙනි අන්තරා කොටස කොහොමද කියලා .





ඉඟ නෙරියේ රැළි බින්දේ
පිය ලඳුනේ මන් විතරද

ඉඟ නෙරියේ රැළි සැදුවේ
හිමි සඳුනේ මගෙ විතරද...

ගීතයේ අර්ථයේ පිළිවෙලින් ගලායාමේ උච්චම තැන තමයි මේක . ප්‍රශ්න කිරීමේ ඉහළම ප්‍රශ්නය . ඉඟ නෙරියේ රැළි බින්දේ පිය ලඳුනේ මං විතරද ? . ඉඟ නෙරියේ රැලි බිඳිනවා කියන එකෙන් කියන්නේ ශරීරයේ වස්ත්‍ර ඉවත් කිරීම . 

හැබැයි වස්ත්‍ර දෙකක් තියෙනවා නෙරිය තියන . එකක් චීත්තය . අනික තමයි ඔසරිය . විවාහයෙන් ඔසරියත් , පසු කාලීනව චීත්තයේ නැත්නම් සේලයේ නෙරියේ රැලි බින්දේ ස්වාමියා විතරද කියලා තමයි ඒ ප්‍රශ්න කරන්නේ . ඒ ආකාරයෙන් වක්‍රව අහන්නේ ලිංගික ඇසුරක් පැවතුනේ ස්වාමියා එක්කමද කියන එක . 

බිරිඳ අනික් අතට අහනවා ඉඟ නෙරියේ රැළි සැදුවේ හිමි සඳුනේ මගෙ විතරද කියලා . ඒකෙන් කියන්නේ ස්වාමියා ලිංගික ඇසුරක් පවත්වලා තියෙන්නේ තමා එක්කම විතරද කියන කාරණාව . ගීතය මේ ආකාරයට අවසාන වුණත් මේ ගීතයේ හොඳ තැන් කීපයක් තියෙනවා මතක් කරන්න . 

කලින් කිව්වා වගේ මේ ගීතයේ සිප ගැනීම , උකුලේ හෝ උර තලයේ නිදි වැරීම , අවසානයේ ලිංගික ඇසුර කියන පිළිවෙලට ගීතයේ අර්ථය පහළම තැන ඉඳන් උච්චතම අවස්වථා දක්වා ගමන් කරලා තියෙනවා . ඒක විශේෂයි ගීතයේ . 

ඒවගේම තමයි මේ ගීතයේ මාත්‍රා විසිහතරේ විරිත රැකලා තියෙනවා අපේ වචනයෙන් කියනවනම් ආයේ නෑ සුපිරියටම . 

මුදු මුහුණේ සුව දැනුනේ පිය ලඳුනේ මට විතරද
ඔබෙ සුසුමේ සුව දැනුනේ හිමි සඳුනේ මට විතරද...

පුළු ලුකුලේ සුව යහනේ නිදි වැරුවේ මන් විතරද
උර තලයේ හිස රන්දා සුව වින්දේ මන් විතරද...

ඉඟ නෙරියේ රැළි බින්දේ පිය ලඳුනේ මන් විතරද
ඉඟ නෙරියේ රැළි සැදුවේ හිමි සඳුනේ මගෙ විතරද...


සමහර තැන් වල අවශ්‍ය විදියට හල් අකුරු වැටිලා තිබුණත් විරිත රැකිලා තියෙනවා . ඒ විරිත රැකිලා තියෙන නිසා ගීතය නිකං කියවාගෙන ගියත් ඇඟට දැනෙන්නේ අමුතුම ගතියක් . සිංහල භාෂාවේ තියෙන ගතිය ඒක තමයි . කවි ලිවීමේදී භාවිතාවෙන මේ විරිත් ගීත වලට භාවිතා වීම සංගීත නිර්මාණය කරන සංගීතඥයාට වඩාත් උදවු වෙන දෙයක් . මොකද ගීතය මාත්‍රා වලට හරියට කඩන්න පුළුවන් නම් තනුව දාන්න ලේසියි . මට මතකයි මගේ සංගීත ගුරුවරයා , ගුණපාල විතානගේ සර් ගීත වලට තනු දානකොට සමහර වෙලාවට කියනවා මේ වචන හරිම අප්සැට් කියලා . ඒත් සර් ඒ ගීත වලට තනු නිර්මාණය කරන්නේ සංගීතඥයා කෙතරම් දක්ෂද කියලා පෙන්වන්න තියෙන එක සාධයක් තමයි ඒක කියන එක පෙන්නුම් කරමින් .





අපි එහෙනම් ගීතයේ සංගීතය ගැන බලමු . මේ ගීතය මම අහන්න ගත්තෙත් සංගීතය නිසාම තමයි . රාත්‍රී කාලයේ හදවතට දැනෙන සංගීතයක් තමයි මේ ගීතයේ නිර්මාණය වෙලා තියෙන්නේ . ඇත්තටම මේ ලිපියේ වචන ගැන මම ලිව්වේ උදේ කාලයක . එත් සංගීතය ගැන ලියන්න තියෙන තැනට ඇවිත් ලිපිය නතර කරලා තිබුණේ රාත්‍රී කාලයේ සංගීතය ගැන ලියන්න ඕන කියලා . සංගීතය ඇඟට දැනෙන්නේ ඒ වෙලාවට තමයි හොඳට .

මුලින්ම අපි බලමු ගීතයේ තාල වාදනය ගැන අපි සලකලා බලමු . මගේ ගීත විචාර කියවලා තියෙන අය දන්නවනේ මම ඉතින් තාල වලට අලුත් පද හදනවා කියලා . මේ ගීතයේ ප්‍රධාන තාලය වාදනය කරන්නේ එකොස්ටික් ඩ්‍රම් එකකින් . ඒවගේම ඔක්ටර් පෑඩ් එකක් ඒ එක්කම හරි හරියට වාදනය කරනවා . ඒ දෙක වෙන් කරලා අඳුරගන්න ටිකක් අමාරුයි . ඒත් විමසිල්ලෙන් අහන්න .

එතකොට වෙන් කරලා අහන්න පුළුවන් . ඒ වගේම තාල වාදනයේ ප්‍රධාන තැනක් ගන්නවා බොංගෝ ඩ්‍රම් එක . ඒකත් එකපාරටම ඇහෙන්නේ නැහැ . ගීතයේ බීට් එක කඩලා නැවතත් බීට් එකට ගන්න තැන්වල ඒ භාණ්ඩය වෙන් කරලා හඳුනා ගන්න පුළුවන් . හයිහැට් එකෙන් වාදනය කරනවා

ටික් කිටි ටික් ටිස්
ටික් කිටි ටික් ටිස් 
ටික් කිටි ටික් ටිස් 
ටික් කිටි ටික් ටිස් 

කියලා ගීතය පුරාවටම . අපිට නොදැනෙන එත් ගීතයට ලොකු සේවයක් ඒ හයිහැට්ඒ බීට්ව එකෙන්ගේ කෙරෙනවා . නැත්නම් ප්‍රධාන තාල වාදන භාණ්ඩ වල වාදනය කැපිලා පේන්නේ නැහැ .  රිදම් ගිටාර් එකෙන් හොඳ සහයෝගයක් දෙනවා තාල වාදනයට . ඒක නම් හොඳට කැපිලා පේනවා ගීතයේ . 













එහෙනම් අපි හාහාපුරා කියලා ගීතයේ මුල ඉඳලා රස විඳිමු . 

ගීතයේ තේමා වාදනය ආරම්භ වෙන්නේ වයලීන් වාදනයකින් . මම ගීතයේ කැමතිම වාදනය ඒක තමයි . සැකය බිය ශෝකය මිශ්‍ර වෙච්ච මේ ගීතයේ තේරුම ඇඟට දැනෙන්නේ ඒ වයලීන් වාදනයෙන් . අනිත් ඒවායිනුත් දැනෙනවා . ඒත් මේ වයලීන් වාදනයත් ඒ වාදනය ඇතුලේ වාදනය වෙන චෙලෝ වාදනයත් හරිම සහයෝගයෙන් ගීතයේ හැගීම් ඉස්මතු කරලා පෙන්නනවා . 








ගීතයේ තියෙන හදවතට දැනෙන බර ගතිය දැනෙන්නේ මේ වාදන කාණ්ඩ වල තියෙන චෙලෝ සහ බේස් ගිටාර් වාදනයෙන් . ඒවායින් වාදනය වෙන පහල ස්වර නිසා තමයි ගීතය පිරිලා තියෙන්නේ . සමහරවිට ස්වර දෙකතුනක් තමයි එහා මෙහා වෙවී වාදනය වෙන්නේ . ඒත් ඒ ස්වර නිසා වයලීන් සහ සැක්සෆෝනයේ වාදනය වෙන ස්වර ඉස්මතුවෙලා පේනවා . 





ඔන්න සැක්සෆෝනය කිව්වම තමයි ඒකත් වාදනය වෙන්න ගන්නේ . වයලීන් වාදනයට පස්සේ සැක්සෆෝනයෙන් වාදනයක් කෙරෙනවා . ඒකෙ නම් තියෙන්නේ දුක් මුසු ගතියක් . ඊට පස්සේ වයලීන් වලින් ගීතයේ ගායනය වෙන්න පටන් ගන්නා ස්වර වලට අරගෙන ඇවිත් ගායකයාට ආරාධනා කරනවා ගීතය පටන් ගන්න . කලින් වගේම චෙලෝ සහ බේස් වාදන මේ වයලීන් වාදනයේත් ඉස්මතුවෙන්න ඕන තැන් නියමෙටම ඉස්මතු කරලා පෙන්නනවා . 

ඔන්න දැන් ගීතය ගායනා වෙනවා . 

මුදු මුහුණේ කියනකොට සැක්ස ෆොනයෙන් බිට් පාර්ට් එකක් වාදනය කරනවා . සුව දැනුනේ කියනකොටත් සැක්ස ෆෝනය වාදනය වෙනවා . පිරිමියාගේ තියෙන හැගීම්වල රළු බව ඒ සැක්ස ෆෝන වාදනයෙන් ඉස්මතු වෙනවා . පිය ලඳුනේ මට විතරද කියන පේලියේ විත කියන අකුරු දෙකත් එක්කම වයලීන් වලින් රන් එකක් වාදනය කරගෙන සැක්ස ෆෝනයේ ගීතයට කරන සේවාව වයලීන් විසින් භාර ගන්නවා . 

ඊට පස්සේ ගීතයේ වචනත් එක්කම වයලීන් එකෙන් කවුන්ටර් පාට් එකක් වාදනය වෙනවා . කවුන්ටර් කියන්නේ ගීතය ගායනා වෙන අතරේම ගීතයට හානි නොවෙන්න ඒ ශෘති වලට අදාළව වාදනය වෙන ස්වර වාදන වලට . දීපිකා මහත්මිය ගායනා කරන සියුමැලි හැගීම් සහිත ඒ වචන පේලි දෙකේ හැගීම් ඉස්මතු කරන්න වයලීන් වලින් සමත් බවක් දක්වලා තියෙනවා . 

මේ ගීතයේ තියෙන අලංකාර බව වැඩිවෙලා තියෙන තවත් හේතුවක් තමයි එකොස්ටික් ගිටාර් එකකින් කෝඩ්ස් වලට අදාළ ස්වර බීට් එක තියාගෙන වාදනය කිරීම . ගීතය ගායනා වෙන වෙලාවට අහගෙන ඉන්න ටිකක් . ටිකි ටිකි ටිකි ටිකි කියලා ගීතයේ වචන වලට යටින් ගිටාර් වාදනය ඇහෙනවා . වතුර ගලාගෙන යනවා වගේ තමයි ඒ වාදනය වාදනය වෙන්නේ . ගීතයේ මම කැමතිම තවත් අංගයක් තමයි ඒක . 





ඔන්න ඊට පස්සේ අතුරු වාදනය පටන් ගන්නවා . අතුරු වාදනයත් පෙර වාදනයම තමයි . අතුරු වාදන වෙනස් කරලා ගීතය සංකීර්ණ වෙනවට වඩා මේ විදිය හොඳයි කියලා තමයි මම හිතන්නේ . ඔයාලාගේ අදහසුත් දක්වන්න බලන්න ඒ ගැන . 

ඔන්න දැන් ගීතයේ අන්තරා කොටස ආරම්භ වෙනවා . අන්තරා කොටසේ මුල කොටස ඒ කියන්නේ පළවෙනි පේලිය දෙසැරයක් ගායනා කෙරෙනවා දිවුල්ගනේ මහත්මයා විසින් . ඒකෙන් පළවෙනි වතාවේ ගායනා කෙරෙනකොට කවුන්ටර් පාට්ස් වාදනය වෙන්නේ නැහැ . ගීතයේ වචන එහෙමම ගායනා වෙනවා . තාලය වාදනය වෙනවාත් එක්කම සාමාන්‍ය විදියට . 

දෙවෙනි වතාවේ ගායනා කරනකොට වයලීන් තමන්ගේ වැඩ පටන් ගන්නවා . ඒ පද පේලිය පුරාවටම වයලීන් වලින් ගීතයේ විරිතේ අඩු තැන් ඇදෙන තැන් පුරවනවා . ඊට පස්සේ සැක්සෆෝනය විසින් වයලීන් වල කාර්යය භාරගන්නවා . එත් වයලීන් වලින් ඒක එකපාරටම දෙන්නේ නැහැ . වයලීන් වල සහයත් ඇතිව තමයි සැක්ස ෆෝනයෙන් බිට්ස් පාට් දෙකක් වාදනය වෙන්නේ . ඊට පස්සේ ආයෙත් වයලීන් වලින් කවුන්ටර් වාදනය කරලා ගීතයේ අන්තරා කොටස අවසන් වෙනවා . ආයෙත් අතුරු වාදනය විදියට පෙර වාදනයම තමයි වාදනය වෙන්නේ . 





ගීතයේ සංගීත නිර්මාණය අතිනුත් හරිම අලංකාර විදියට නිර්මාණය වෙලා තියෙනවා . මම හිතනවා මේ විස්තරය හරහා ඔයාලට ඒ වාදනයත් එකින් එක රසවිඳින්න පුළුවන් කියලා . භාවනාවක් කරනවා වගේ ඒ වාදනය රස විඳින්න . 

ගීතයේ ගායනා කරන අවස්ථාවල මම කැමතිම අවස්ථා දෙකක් තියෙනවා . 

එකක් තමයි " සුව යහනේ " කියන තැන . අනික තමයි " රැලි බින්දේ " කියන තැන . ඒ තැන්වල ගායකයා තමන්ගේ සියුම් කටහඬ පාවිච්චි කරලා ගීතයේ අලංකාරවත් බව සහ සංවේදී බව වැඩි කරලා තියෙනවා . 

කාලෙකට පස්සේ තමයි ගීතයක් ගැන ලිව්වේ . 

එහෙනම් කියවලා බලලා අඩුපාඩු කියන්නකෝ . 

ආයෙත් ලිපියකින් හමුවෙමු . 

ඔබ සැමට සමන් දෙවිඳුගේ පිහිට ලැබේවා !

Monday, February 27, 2017

මේ තමයි අපි බ්ලොග් ලියලා හම්බ කරගත්ත දේ ( ලක්ෂ 4යි )


සූරිය කුල තෙද උතුමා
පෑවිය සක්වලට හැමා
කාරිය සිතුවාට තමා
සූරිය දෙවි නමෝ නමා

චන්ද්‍ර සහෝදර උතුමා
චන්ද්‍ර කටක පැවති තමා
සව්සිරි දී රකු මෙ තුමා
චන්ද්‍ර සුරිඳු නමෝ නමා





දවසට වතාවක් හෝ බ්ලොග් එක පැත්තේ කැරකිලා ගිය මටත් දැන් ඉඳලා හිටලා බ්ලොග් එකට එන්න අමතක වෙනවා . ඒ නිසාම අපේ බ්ලොග් එකේ විශේෂ අවස්ථාවක් අසපසුවෙලා කියලා දැනගත්තේ අද . ඒ විශේෂ අවස්තාව සමරන්න තමයි මම මේ ලිපියෙන් අද බලාපොරොත්තු වෙන්නේ . 

මාතෘකාව කියෙව්වම ඉතින් අමුතුවෙන් කියන්න ඕන නැහැනේ මෙයාලා . අපි ලක්ෂ තුනේ කඩයිම පසු කරේ හරියටම 2016 ජුනි මාසේ 29 වැනිදා . එදා ඉඳලා අද වෙනකොට වීව්ස් ලක්ෂයක ප්‍රමාණයක් අපි උපයාගෙන තියෙනවා කියලා සිංදුවාත් මමත් මතක් කරන්නේ ඉතාමත්ම සතුටෙන් . ඇත්තම කියනවානම් ලක්ෂයකටත් වඩා වැඩියි . 




අවුරුද්දකටත් අඩු කාලයක් ඇතුළත වීව්ස් ලක්ෂයක ප්‍රමාණයක් උපයාගන්න සහය දක්වපු හැමෝටම ස්තූතිවන්ත වෙනවා . 

ඒවගේම අපේ පෝස්ට් ශෙයා කරලා සහය දක්වපු හැමෝටමත් ස්තූති . 

අපි ගැන තවත් අයට කියලා අපේ ලිපි කියවන්න උනන්දු කරවපු අයටත් ස්තූති .

මම කතා සීරියස් පටන් අරගෙන ලියන්නේ නැතුව ඉන්නකොට මැසේජ් කර කර ලියන්න ලියන්න කියලා උනන්දු කරවපු හැමෝටමත් ස්තූති . 

කේන්දර බලන්න ගත්තට පස්සේ තමයි දන්නේ විදේශගත විශාල පිරිසක් අපේ බ්ලොග් එකත් එක්ක සම්බන්ධ වෙලා තියෙනවා කියලා . ඒ අයටත් ස්තූති . 

ඉදිරියටත් වයලගෙ කාමරේ වෙනදා වගේම හැම දෙකින්ම අඩුවක් නැතිව පිරිලා තියේවි . 

අවසාන වශයෙන් කියන්න තියෙන්නේ ,

එහෙනම් වයලගෙ කාමරේට 
ජය වඩා , 
බල වඩා , 
ආ වඩා ,

ආයුබෝ වේවා ! 


මේ තමයි අපි බ්ලොග් ලියලා හම්බකරගත් දේ .





















එහෙනම් ආයෙත් ලිපියකින් හමුවෙමු . 

ඔබ සැමට සමන් දෙවිඳුගේ පිහිට ලැබේවා !

Wednesday, February 8, 2017

ඉඟුරු ව්‍යංජනය






බ්ලොග් එක ගොඩ කාලෙකට පස්සේ ගතානුගතික යක්ස කතා දේව කතා වලින් මුදවලා ආයෙත් සුපුරුදු තත්වයට ගත්තා . මම හිතන්නේ මේ මාස ගානකට පස්සේ තමයි ලිපියක් ලියන්නේ . මේ කාලය පුරාවටම බ්ලොග් එකත් එක්ක රැඳිලා ඉන්න අයට මාගේ හදපිරි මෙව්වා එක පුද කරනවා . අද ලියන්න යන්නේ කෑමක් ගැන . කෑම ගැන ලියන්න කලින් මම කියන්නම් ඇයි මේක ලියන්න කල්පනා කරේ කියලා . 

ගොඩක් දෙනෙක්ට මේ කාලේ බඩේ ලෙඩ තමයි තියෙන්නේ . බඩ පුරවාදාන ලෙඩ . ගැස්ට්‍රයිටීස් ලෙඩ . අජීර්ණ ලෙඩ වගේ ලෙඩ තමයි තියෙන්නේ . කේන්දර බලන වෙලාවට සමහර අයට තියෙන බඩේ ලෙඩ ගැන කියලා මම ඒ අයට කියලා තියෙනවා ඉඟුරු සුදුලූනු එහෙම වැඩියෙන් කන්න කියලා . ඔන්න ඔහොම දවසක් මම කිව්ව කෙනෙක් අද මට කතා කරලා ඇහුවා ඉඟුරු ආහාරයට ගන්න විධි මොනවද කියලා . 

මමනම් කියන්නෙම අමුවෙන් පොඩ්ඩක් පොඩ්ඩක් කන්න පුළුවන් නම් හොඳයි කියලා . ඒත් කන්න බැරි අයට පුළුවන් බත් එක්ක දාගෙන අනාගෙන කන්න . එහෙමත් බැරිනම් උයලා කන්න පුළුවන් විදියක් ගැන තමයි මම ඒ කෙනාට කිව්වේ . උයන්නේ කොහොමද කියලා ඇහුවම මම කිව්වා හැමෝටම දැනගන්න එක්ක අපි බ්ලොග් එකේ ලියන්නම් ඒ ගැන . ලියලා ලින්ක් එක එවන්නම් කියලා . මෙන්න මේ විදියට තමයි ඉඟුරු ව්‍යංජනය හදන්නේ . 

මුලින්ම අවශ්‍ය ද්‍රව්‍ය 

වැඩිය මෝරලා නැති ඉඟුරු අල ග්රෑම් 250 
මිටි කිරි කෝප්ප 1 
දිය කිරි කෝප්ප 1 
මිරිස් කුඩු මේස හැන්දක්
තුනපහ අවශ්‍ය තරමට 
රතුළූණු ග්රෑම් 5 
උම්ම්ම්ම්ම්ම්ම්ම්ම්බලකඩ ග්රෑම් 5 
අමුමිරිස් කරල් දෙකක් 
රම්පෙ කොළ 1 
කරපිංචා කිනිති දෙකක් 
දෙහි ගෙඩි 1 
උළුහාල් ජුන්ඩක්
කහ ජුන්ඩක් 
ලුණු ඉතාම ජුන්ඩක් අවශ්‍ය තරමට 


සාදන අන්දම 

ඉස්සෙල්ලම ඉඟුරු අල හෝදලා පොතු ඇරලා පිරිසිදු කරගන්න . ඊට පස්සේ ඒවා පෙති පෙති කපන්න . පෙති හීනි වෙන තරමට හොඳයි . මොකද ලොකු කෑලි හැපෙනවට වඩා පොඩි කෑලි හැපෙනකොට පොඩි ගතියක් තියෙනවා බත් එක්ක . 

ඉඟුරු ලියලා පිසගන්නා භාජනයකට දාගන්න . ඊට පස්සේ කපාගත්ත රතු ළූණු උම්ම්ම්ම්ම්ම්ම්බලකඩ අමුමිරිස් මිරිස් කුඩු තුනපහ කහ උළුහාල් රම්පෙ කරපිංචා දියකිරි දාලා අවශ්‍ය තරමට ලුණු දාලා මද ගින්නේ පිසගන්න . 
ඊට පස්සේ ඉඟුරු අල කෑලි තැම්බිලා කියලා දැනෙනකොට මිටි කිරි දාලා දෙහි ඇඹුල් බිංදු කීපයකුත් දාලා හොඳට ගින්දර දාලා පිසගන්න . ව්‍යංජනය හොඳට පිසගෙන ඊට පස්සේ දෙහි ඇඹුල් අවශ්‍ය තරමට දාලා කලවම් කරගත්තට පස්සේ කන්ට හැකි බඩ පිරෙනකල් . 


මේ ව්‍යංජනය කටෙන් ආරම්භ වෙලා අනිත් කොනෙන් අවසන්වෙන ලෙඩරෝග විශාල ප්‍රමාණයකට ගුණදායක වෙනවා . ඒවගේම තමයි වාත පිත්ත සෙලෙස්මාව කියන තුන් දොස් සමනය කරන්න මේ ආහාරය වඩාත් ගුණ දායක වෙනවා . ආමාශගත රෝග සමනය කරන්නත් මේ ආහාරය උදවු වෙනවා . පොඩි ළමන්ගේ පණු අමාරු සමනය කරන්නත් මේ ආහාරයට පුළුවන් . ඉඟුරු දැන් ටිකක් මිලයි . ඒ නිසා මමනම් කියන්නේ වත්තේම ඉඟුරු වගා කරගන්න කියලා . පෝච්චියක උනත් පුළුවන් වගා කරගන්න . 

මේ ආහාරය මාසයකට වතාවක් වගේ හදලා ආහාරයට ගන්න පුළුවන් නම් ශරීරයට ලොකු මෙව්වා එකක් ලබා ගන්න පුළුවන් කියලා පුරාණයේ හිටපු සෘෂිවරු පුස්කාපු කොලපොත් වල ලියලා තියෙනවා . 

එහෙනම් තවත් ලිපියකින් ආයෙත් හමුවෙමු . 


ඔබ සැමට සමන් දෙවිඳුගේ පිහිට ලැබේවා !

Monday, January 30, 2017

පුලතිසි ( 6 ) අවසාන කොටස





මෙහි එන නම් ගම් සියල්ල මනඃකල්පිතය

19වන සියවසේ මුල් භාගයේ වැල්ලබඩ පත්තුවේ එක්තරා ග්‍රාමයක සිදුවූ සත්‍ය සිදුවීමක් ආශ්‍රයෙනි


පසුගිය කොටසින්

" මැණික්හාමි නැහැ කියන්නේ ආයෙත් ගල ඇතුළට කාටවත් එන්න වෙන්නේ නැහැ . ඒ නිසා බයවෙන්න කාරී නැහැ . ගුහා දොරටුව වහන්න . ඉහළ තියෙන දොරටුවත් වහන්න . මේ ගල වටේටම බඹර දෙබර මැසි පිලවුන් අරක් ගනීවි . ඒ අය මේ ගල ආරක්ෂා කරාවි . පිටින් ඇවිත් කරන දේවල් කරත්දාවේ . ඇතුල්වෙන්න ඉඩ දෙන්න එපා . එහෙම වෙන්නත් පුළුවන් වෙන එකක් නැහැ . ගලේ ඉහළ දොරටුවත් වසා දමන්න . අදෘශ්‍යමාන දොරටුවක් මින් පස්සේ පාවිච්චි කරන්න ගල ඇතුළට ඇතුල් වෙන්නයි පිට වෙන්නයි "

සීයා තම උපදෙස් රණබා වෙත කීවේ චිත්තරාජ යක්ෂ සේනාධිපතිට ඒවා කෙලින්ම කීමට නොහැකි නිසාවෙනි . නමුත් චිත්තරාජ නිහඩතාවයෙන් ඒවා සියල්ල අනුමත කළා යැයි පැවසුවේය . මාළිගාවේ ශාලාවන් පරීක්ෂා කරන අතරතුරේ එක් ශාලාවක රත්‍රන් පිළිමයක් අතින් ගෙන මැණික් හාමි වැටී සිටියේය . රණබා මැණික්හාමිගේ කකුල් දෙකෙන් අල්ලා ඇදගෙන ගොස් පැත්තකින් තැබුවේය .

" ඇයි දැන් උන්දව තියාගෙන මොනවා කරන්නද ඔය දරුවා හදන්නේ ? "

" රාවණ රජතුමා අවදිවෙනකල් මම මුන්දව තියනවා මෙහෙ . තියලා රජතුමාට පෙන්නනවා මාළිගාව අපවිත්‍ර කරේ මුන්දා තමයි කියලා "

" ඔය ළමයාගේ කැමැත්තක් "





අද එතැන් සිට

" මට මුන්දව මරන්න ලැබුණ නම් මම මෙහෙම නෙවෙයි මුන්දව මරන්නේ . කෑල්ල කෑල්ල කපලා ඇත්ත නැත්ත අහගෙන තමයි මරන්නේ "

" හා දැන් ඒවාට කාරී නැහැ . අපි අපේ රාජකාරි ඉෂ්ට සිද්ද කරන්න ඕන . පුලතිසි උත්තමයාට අපි පොරොන්දු වූ හැටියට අර අයට ශාප කරන්නත් නැවු ගිල්වන්න පිල්ලි යවන්නත් ඕන " 

" නැව් ගිල්වීම සඳහා ඔබගේ වේලාව වැය කිරීම තව දුරටත් අවශ්‍ය වන්නේ නැහැ . ඒ වෙනුවෙන් අපි කටයුතු සිද්ධ කරන්නම් . දඬුවම් කිරීමේ කාර්යය ඔබ විසින් සිද්ද කරන්න . ඔබට කිසිවක් සිද්ද වන්නේ නැහැ . ඔබ පවට හසු වන්නේ නැහැ කියලා මට විශ්වාසයි . ඔබ කරන්නේ වරදට දඬුවම් දීමක් "

සීයාගේ සැලසුමට චිත්තරාජ යක්ෂ සේනාධිපතියා පිළිතුරු දුන්නේ මේ ආකාරයටය . සීයා ඉන් පසුව තමන්ගේ අවසාන රාජකාරිය ඉටු කිරීමට සියල්ල සූදානම් කරමින් ඒවා හරිහැටි සිදුවෙනවාදැයි සොයා බැලීමට ගියේ මා රණබා සමග කතාවට වැටුණු පසුවය . 

" මලයන්ඩිට මාළිගාවේ පෙන්වන්න දේවල් තියෙනවා . එන්න අපි ටිකක් ඇවිදලා බලමු . ආයේ කවදා මේවා දකින්න ලැබෙයිද දන්නේ නැහැනේ . ඒ නැතත් ආයේ මේ දේවල් කොහොමින් කොහොම වෙනස් වෙයිද කියලා දන්නෙත් නැහැ නෙව " 

" මොනවද මෙහෙ තව බලන්න තියෙන්නේ ? "

" හාහ් හාහ් හාහ් . මලයන්ඩි රාවණා රජතුමාගේ දේවල් ගැන තවම දන්නේ නැහැ . එන්නකෝ . මේ සිහගිර පොළවෙන් උඩට පේනවා වගේම තමයි පොළවෙන් ඇතුළටත් තියෙනවා . ඒ ඇතුලේ මාළිගාව ජයටම හදලා තියෙනවා . යමු බලන්න . කවදා හරි දන්නා අයට කියලා දෙන්න සිහගිර කියන්නේ නිකන්ම නිකන් ගලක් නෙවෙයි කියලා . ඒ නිසා තමයි මම මේ දේවල් මලයන්ඩිට පෙන්වන්න අවසර ගත්තේ " 

" කාගෙන්ද ? " 

" චිත්තරාජ උත්තමයගෙන් " 

" යමුකෝ එහෙනම් බලන්න " 





රණබා මා කැඳවාගෙන ගියේ සීගිරි මාළිගාවේ ඇතුළත ඇති පහත මාලය වෙත ගමන් කරන පඩිපෙළක් අසලටය . එතැන් සිට අප ගමන් ගත්තේ පඩිපෙළක් බැසගෙනය යාමෙන් පසුවය . විශාල ශාලාවක් තුළට අප පිවිසියායින් පසුව රණබා තමන්ගේ විස්තර කිරීම ආරම්භ කළේය . 

" මේ තියෙන්නේ මේඝනාද කුමාරයා එක්ක රාවණ මහ රජතුමා තල්කොළ වල තමන් සොයාගන්නා දේවල් ලියන්න පාවිච්චි කරපු තැනක් . මේ වගේම තැනක් තියෙනවා අසෝක උයනේ . එදා පුලතිසි ගුරුතුමා කතා කරන වෙලාවේ කිව්වේ අදෘශ්‍යමාන ගුහාවක් ගැන . අන්න එතන තමයි මෙතනට අමතරව පොත් පත් ලියන්න රාවණ රජතුමා කාලය ගත කරේ " 

" ඉන්ද්‍රජිත් කුමාරයාත් පොත් ලියලා තියෙනවද ? " 

" ඔව් . අර තියෙන්නේ කළුගල් පෙට්ටියක් . ඒ ඉන්ද්‍රජිත් කුමාරයාගේ තල්කොළ පොත් . ඒවා කවදාවත් දිරන්නේ නැතිවෙන්න විශේෂ බෙහෙත් වර්ග ගල්වලා ඔය කළුගල් පෙට්ටියේ තැම්පත් කරේ මේඝනාද කුමාරයාම තමයි . අවශ්‍ය වෙලාවට අවශ්‍ය කෙනාට ඒවා ලබා දෙනවා කියලා මේඝනාද කුමාරයා රාවණ රජතුමාට පොරොන්දු වෙලාත් තියෙනවා . රාවණ රජතුමාගේ කාලේ උන්නු මහා දැනුමැති අය ආයෙත් ඉපදුනාට පස්සේ මේඝනාද කුමාරයාගේ ආත්මය ඇවිදින් අපේ චිත්තරාජ උත්තමයට දැනුම් දෙනවා මේ මේ පොත් අසවල් කෙනාට ලැබෙන්න සලස්වන්න කියලා . හෙළ දැනුම අන්න එහෙම තමයි මෙතැනින් බෙදාහරින්නේ . මෙතැන තියෙන රහස් කවුරුන් හෝ එළිකරනවානම් හරි පිටට දෙනවානම් හරි ඒ කෙනාව ආයේ ඉතුරුවෙනවද නැද්ද කියලත් තීරණය කරන්නේ මේඝනාද කුමාරයාම තමයි . මේවා ඒ උත්තමයෝ තමන්ගේ මහන්සියෙන් එකතු කරලා තිබ්බේ මිනිස්සුන්ට වින කටින්න නෙවෙයි . යහපත වෙනුවෙන් වැඩ කරන්න " 

" මම ඒ පොත් තැම්පත් කරලා තියෙන තැනට යන්නද ටිකක් ? " 

" මලයන්ඩිට කැමැත්තක් කරන්න අවසර තියෙනවා " 

මගේ උස මේ වනවිට අඩි හයකට වඩා අඩුවෙන් ඇත්තේ අඟලක් හෝ දෙකක් පමණි . මෙම පොත් බහා තිබෙන කළුගල් මංජුසාව මම මෙන් තුන් ගුණයක් පමණ දිග ඇතිබවත් මට වඩා අඩියක් පමණ උස බවත් මම සිතෙන් මැනගත්තෙමි . මෙපමණ පොත් ප්‍රමාණයක් මෙවැනි ස්ථානයක වසර දහස් ගණනක් ප්‍රවේසම් සහිතව තබා ගැනීමම අපගේ ජාතියට කරනු ලබන මහත් සේවාවකි .





" ඔය තියෙන්නේ පොත් ලියන්න රජතුමායි කුමාරයායි ඉඳගත්ත ආසන දෙක "

රණබා අප අසල මදක් ඈතින් පිහිටා තිබෙන ශෛළමය ආසන දෙකක් පෙන්වා මට කීවේය . 

" අපි යමු . තව පෙන්වන්න දේවල් තියෙනවා "

රණබා මා කැඳවාගෙන තවත් පහළට ගියේය . සෑම තට්ටුවකටම ආලෝකය සමව ලැබෙන සේ පලිඟු කණ්නාඩි සවිකර තිබිණි . ඒවායින් ඉහළ සිට පතිතවන ආලෝකය එක් එක් අතට හරවා එම ශාලාවන් සියල්ල ආලෝකමත් කර තිබිණි . 

" මෙතැනින් එහාට තවත් මාළිගාව හදලා නැහැ . රජතුමා තව යටට මාළිගාව හදන එක නවත්තලා තියෙන්නේ තවත් පහළට හදනවානම් මේ තරම් පහළට ආලෝකයත් හුළඟත් ගන්න උවමනා වෙන නිසා . ඒත් ඕන නම් හදනවා කියලා තමයි ඉඳලා තියෙන්නේ " 

" අයියණ්ඩි , එතකොට අර උඩ මාළිගාවේ බිත්ති අයිනෙන් උඩට ගිහින් තියෙන ගල් කණු මොනවද ? . මම දැක්ක හැටියට ඒවා ඉහළම තට්ටුවේ ඉඳලා පහළටම එකම තැනකින් දකින්න තියෙනවා " 

" ඒ ගල්කණු නෙවෙයි " 

" එහෙනම් ? " 

" ඒ වාරි නළ " 

" එහෙනම් ඒ කතාව ඇත්ත නේද ? " 

" මොකක්ද ? " 

" සීගිරි ගලේ උඩත් වතුරමල් තිබුණාය කියන එක ? " 

" මෙතන ඉඳන් යොදුන් ගානක් ඈතින් තියෙනවා කන්දක් . ඒ කන්දේ තියෙනවා විශාල පොකුණක් . ඒ පොකුණ කවදාවත් හිදෙන්නේ නැහැ . ඒ පොකුණ එක්ක තමයි ඔය වාරි නළ සම්බන්ධ කරලා තියෙන්නේ . මමත් දවසක් ඔය පොකුණට ගියා . ඒ පොකුණේ ඉඳලා උමගකින් තමයි මෙහාට වතුර ගලාගෙන එන්නේ . එතනයි මෙතනයි වතුරේ බර වෙනස හරියනකල් වතුර මේ නළ දිගේ ඉහළට ගමන් කරනවා . එතකොට උඩට ඉබේම වතුර ලැබෙනවා . උඩ තියෙන වතුර මල් ක්‍රියාත්මක වෙන්නේ අර මම කිව්ව කන්දට වැස්ස වැඩියෙන් වැටුණු කාලෙට . ඒ නැත්නම් පහල වතුරමල් විතරයි ක්‍රියාත්මක වෙන්නේ . ඒ කොහොම වුණත් හැමදාම සිහගිරට ජලයෙන් නම් අඩුවක් තිබුණේ නැහැ " 

" එතකොට අර පහල තියෙන වතුර මල් වලට වතුර කොහෙන්ද එන්නේ ? " 

" උඩට යන වතුර , පාවිච්චි කරන වතුර , වැහි වතුර එහෙම එකතුවෙන්න ගල මුදුනේ වෙනමම පොකුණක් තියෙනවා . ඒකට වතුර පිරුණම තමයි පහල වතුරමල් වලට වතුර ගලාගෙන යන්නේ " 

" ඒ වතුර එන නළ කොහේද තියෙන්නේ ? " 

" ගල අයිනේ කාණුවක් වගේ එකක් තියෙනවා . ඒ පහළ තියෙනවා කුහරයක් . එතැනින් වතුර යන්නත් වෙනමම නළ ඇතුළෙන් වතුර යන්නත් තමයි හදලා තියෙන්නේ " 

" මේවා අවහිර වුණොත් ලේසි වෙන්නේ නැහැ නේද හදන්න ? " 

" අපහසුවක් නැහැ . අපේ උදවියට ඉන්න ප්‍රමාණයට වඩා කුඩා වෙන්න පුළුවන් . ඒ අයට පුළුවන් නළ දිගේ පහළට ගිහින් අවහිර තැන් හරිගස්සන්න " 

" එහෙමද ? " 





මම පුදුමයෙන් මෙන් ඇසීමි . මාළිගාවේ ඇති වස්තුවෙන් අඩුම තරමේ සීයෙන් පංගුවක් වත් ඉවතට ගෙන යන්නට පරදේසක්කාරයින්ට හැකි වූයේ නැත . මම එය වටහාගත්තේ රණබා සමග මාළිගාවේ තැනින් තැන ඇවිදීමෙන් අනතුරුවය . මාළිගාවේ මම වඩාත් සිත් ගත් දෙයක් වූයේ තැනින් තැන තබා තිබෙන හක් ගෙඩි සමූහයයි . කුඩා කල සිටම මගේ ඇස ගැටෙන මානයේ හක්ගෙඩියක් තබාගෙන සිටීමට මම ප්‍රිය කලෙමි . එහි ඇති ගැඹුරු හඬට මම ආදරය කලෙමි . කලබලකාරී අවස්ථාවක වුවද මාළිගාවේද හක්ගෙඩි දැකීමෙන් මම තරමක් කුල්මත් වීමි . 

" අයියණ්ඩි ? " 

" ඇයි මලයාන්ඩි ? " 

" ඇයි මේ තැනින් තැන හක්ගෙඩි තියලා තියෙන්නේ ? " 

" රජතුමා ඉන්න කාලේ හැමදාම මේවා පිඹලා තියෙනවා . උදේට හවසට රාජකාරි වෙලාව මතක් කරන්න සක පිඹලා තියෙනවා . ඒවගේම තමයි රජතුමා නීලකුම්බිලා දේවතාවියට පුද පූජා පවත්වනකොටත් මේවා පිඹලා තියෙනවා " 

" මමත් පොඩි කාලේ ඉඳලම දකින්න කැමති දෙයක් තමයි මේ හක්ගෙඩිය " 

" හා හා ඕවා අල්ලන්න එපා . ඕවාට අයිති උදවිය ඉන්නවා . ඒ අය කෝප වේවි " 

" කවුද අයිති අය ? " 

" ඕවා පිඹින අය තවමත් ඉන්නවා . ඒ අය කැමති නැහැ ඒවා අල්ලනවට " 

" කෝ එය ? " 

" ඒ අය ඕන වෙලාවට එනවා තමන්ගේ සක පිඹින්න . මේ දවස්වල කලබල නිසා චිත්තරාජ උත්තමයා කියලා තියෙන්නේ එන්න එපා කියලා . ඒත් ඒ අයට තමන්ගේ සක කවුරු හෝ අල්ලනවානම් දැනෙනවා " 

" හ්ම්ම් . ඒකත් එහෙමද ? " 

" අපි යමු . දැන් මලයන්ඩිගෙ සීයා රාජකාරි කරන්න සූදානම් වෙනවා ඇති මයේ හිතේ " 

සීයා අප පැමිණෙන විටද අවශ්‍ය කාරණාව ඉෂ්ට කිරීමට මන්ත්‍ර පුරමින් සිටියේය . ඔහු මා දකිත්ම එතනට එන්න යැයි අතින් සංඥා කළේය . මම වහා එහි පිටත් වීමි . සීයා මරු නැංවීම ජයටම කරමින් සිටියේය . විනයක් පිල්ලියක් යැවීම වැනි බරපතල කාරනාවකදී සීයා මරු නංවන්නේ කලාතුරකිනි . එහෙත් මේ වතාවේ මරණයම බලාගෙන මෙම දේවල් සිදුකරන බැවින් මරු නැංවීම අත්‍යාවශ්‍ය කරුණකි . 

.............................................ඕන් සුරුන්ඩු මරු දිෂ්ටි වර වර විෂ්ණු රාම ආනුභාවයෙන් මරුවාට අඬගසා මරු නැගී නැගී මරු රීරි යක්ෂයා වර වර ඉජ , ඕන් ක්‍රලාදී කොන්ඩු වර වර ඊශ්වර ආනුභාවයෙන් මරු බිල්ල දිෂ්ටියෙන් මරු නැගී නැගී වර වර මම කැප කර දෙන මරු බිල්ල තුන් විනාඩියෙන් මෙපිට මරුවාට භාරයි වන් අන්සෙන් ගොස් දකුණු අන්සේ නේත්‍රය කැප ගන්න මරු පොල්ලෙන් තරව තරව ගසා ඉස මොළ කටු ගලවා දෙකන්සකින් විදුරු දිව ගසා ඇට සංදී නහර කුලල් මරු හඬ ගස ගසා ඇද ඇද කා ඉරාපන් අකුණු හෙණක් මෙන් මරු නැගී නැගී බාරගන් ඔහුගේ සිටිනා තැනට නැගෙනහිරෙන් පැන භාරගන් වරුණ දිග භාගයෙන් ක්‍රේම මරු රීරි යක්ෂයා වත්ත වටේ තුන් වළල්ලක් මරු හඬ තුනක් ගසා බිල්ල කෙලගන් 

ඕන් කංකාල මරු දිෂ්ටි මා ලෝ දැල් බැන්ද ආනුභාවයෙන් මරුවාට මම භාර දෙන මරු බිල්ල තුන් විනාඩියෙන් මරුවාට භාරයි හිටුපිය නොසොල්වා මරු දිෂ්ටි හිරයි 

ඕන් නමෝ ශ්‍රී විෂ්ණු රාම වාලි මකුට මාල........................................





සීයා මරු නංවා පිල්ලි මන්ත්‍ර කියා ලේ ගොටු ජීවම් කර එකින් එක ගිනි ගොඩට වත්කරමින් තමන්ගේ අනසකට යටත් වූ පිල්ලි සමූහයා පිටත් කර හැරියේය . සිතුවාට වඩා වෙලාවක් ගත විය එම කාරණාව ඉටු කිරීමට . එබැවින් අධික තෙහෙට්ටුව නිසා මම නිදාවැටෙමින් සිටියෙමි . සීයා අවසන් ලෙ ගොටුව වත්කරන විට මහා හයියෙන් හෙන හඬ පුපුරා ගොස් වහින්නට පටන් ගත්තේය . මා අවදි වුයේ එම විදුලි සැර මගින් නිකුත් කල මහා හඬේ ඇති බියකරු බවින් තිගැස්සීය . 

" පුතාට නිදිමතයි වගේ ? " 

" ඔව් සීයේ මේ දවස් ටිකටම නින්දක් නැහැනේ . අපේ වැඩ ඉවරයි නේද සීයේ ? " 

" ඔව් සේරම අහවරයි . ආයෙත් මේවගේ තැනකට එන්න වෙන්නේ නැති නිසා පුතා මේ තැන ටිකක් ඇවිදලා බලපු එක හොඳයි " 

" මම පහල මාළිගාව බැලුවා . සීයත් ගිහින් බලන්න . ලස්සනයි එතන තියෙන දේවල් " 

" මට ඒ හැටි ආසාවක් නැහැ දරුවෝ " 

කියමින් සීයා මද සිනහවක් පෑවේය . සියල්ල සංසුන් බව මම සීයාගේ සිනහවෙන් තේරුම් ගත්තෙමි . 

" අපි එහෙනම් දැන් යන්න ලක ලැස්ති වෙමු " 

සීයාත් මමත් සියල්ල අවසන් කර සීගිරි මාළිගාවෙන් පිටත් වීමට අවශ්‍ය බව රණබාට දන්වා සිටියෙමු . ඔවුන් අපට නැවතත් සංග්‍රහයක් සූදානම් කර තිබිණි . එයින් පසුව චිත්තරාජ යක්ෂ සේනාධිපති අප දෙදෙනාට ස්තූති කළේය . ඔහු අත යමක් තිබිණි . ඒ අලංකාර මංජුසාවකි . 

" ඔබ දෙදෙනාගෙ උදවු උපකාර නැතිවන්නට මෙම මාලිගාවෙන් අප සදහටම වෙන් වෙන්නටත් ඉඩ තිබුණා . ඔබගෙන් මම යමක් ඉල්ලන්නට කැමතියි . අපිව බන්ධනය කරන්න පුළුවන් මන්තර තියෙන තැන් හොයලා අපට දන්වන්න ; හැකියාවක් තියෙනවානම් . මේ මංජුසාව ඇතුලේ තියෙනවා තල් කොළයක ලියලා එක ශ්ලෝකයක් . මේ ශ්ලෝකය මමම හදාපු එකක් . අඳුනට මේ ශ්ලෝකය තුන් වතාවක් කියන්න . මම අඳුන තුළින් ඔබව දකින්නම් . මන්තර තිබෙන තැන් පිළිබඳව මාව දැනුවත් කරන්න . අපි ඒවා විනාශ කරන්න ක්‍රියා කරනවා ; මතුවටත් මේවාගේ අවදානම් සහිත දේවල් වෙන්න මත්තෙන් . ඒ පරපුරවල් පවා නැති කරලා දන්නවා . ඒකෙන් කවදාහරි මේ හෙළබිම සතුරන්ගෙන් ආරක්ෂා වේවි " 

" එහෙමයි එහෙමයි "

සීයා එම ඉල්ලීම පිළිගත්තේය . 





" මේ මංජුසාවේ තියෙන දේවල් ඔබ  දෙපළට භාරයි . කෘතගුණ දැක්වීමක් වශයනේ රාවණ රජතුමාගේ ප්‍රධාන සෙනෙවි තුමා භාවිතා කරන ලද ජය ශංඛය මම ඔබ දෙපළට තෑගී කරනවා මේ වෙලාවේ . ඒත් එක්කම රාවණ රජතුමාගේ පිළිරුවක්ද සහිත වෙනවා . හැම අමාවක දවසකම අමාවක ගෙවුණු වෙලාවේ මේ පිළිරුවට පූජා පවත්වන්න . ඔබ දෙපළත් ඔබ දෙපළගේ ලේ උරුමක්කාරයිනුත් රාවණ පරපුර සමග සදාකල් සබැඳියාවෙන් පවතීවි . ඒ උත්තමයින්ගේ නොමද ආරක්ෂාව උදවු උපකාර ඔබලාට ලැබේවි . 

දීර්ගායු වේවා !
දීර්ගායු වේවා !
දීර්ගායු වේවා ! " 

චිත්තරාජ තමා අතැතිව තිබුණු ලෝහමය මංජුසාව සීයා අත තැබීය . 

" මම තව අවුරුදු කීපයයි ජීවත් වෙන්නේ . පස්සෙන් පහු මේ දරුවා තමයි මේ දේවල් කරන්නේ .ඒ නිසා මට නැති වුණාය කියලා කාරී නැහැ . මේ දරුවා ඔය ඇත්තන්ට භාරයි . මම හැමදේම මේ දරුවාට උගන්වලා තියෙන්නේ . තව පාඩම් කීපයයි තියෙන්නේ . ඒවා ඉගැන්නුවට පස්සේ මම නිදහස් . ඉන් පස්සේ මේ දරුවා ආරක්ෂා කරන්න ඔය ඇත්තෝ ඉදිරිපත් වෙන්න ඕනා . මට උවමනා එච්චරයි . ඔය ඇත්තන්ටත් සියළුම දෙවිවරුන්ගේ ආශිර්වාදය ලැබෙන්න ඕන " 

සීයා එය කියා අවසන්වත්ම මාළිගාවේ ස්වර්ණමය ආසනයක් මත විශාල ආලෝකයක් නිකුත් වෙන්නට පටන් ගත්තේය . එය සුදු පැහැති විශාල ආලෝකයකි . එම ආලෝකය තුළින් මතුවුයේ වෙන කවුරුන් හෝ නොව . හෙළයේ මහා මොළකරු වූ පුලස්ති මහා සෘෂි තුමාය . 

ආයුබෝවේවා ගුරුතුමණි 
ආයුබෝවේවා ගුරුතුමණි 
ආයුබෝවේවා ගුරුතුමණි 


යක් රැහේ සියල්ලෝම එක හඬින් ජය ඝෝෂා පැවැත්වීය . 

" දරුවනි . ඔබ සියල්ලන්ටම යහපතක්ම වේවා ! "

සුදුපැහැති ආලෝකය එකවරම අතුරුදන් විය . අප අවසානයේ ප්‍රාර්ථනා කරේ එයයි . ඒ ආකාරයටම පුලස්ති මහා සෘෂි තුමා අපට ආශිර්වාද කළේය . 

" එහෙනම් රණබා දරුවෝ අපිට යන්න කාලේ හරි නේද ? " 

" රණබා මේ ඇත්තන්ව ගමට පිටත් කර නැවත මෙහි පැමිණෙන්න . ගුහා දොරටුව වසා දැමීම ඉක්මණින්ම සිදු කළයුතුයි . ඒ සඳහා ඔබගේ පැමිණීම අනිවාර්යයි " 

"එහෙමයි උත්තමයෝ එහෙමයි " 

" අපි යමු මලයන්ඩි " 

" කරත්තය සූදානම් කරලා තියෙන්නේ " 

" දෙයියන්ටම ඔප්පු වෙච්චාවේ . මට හරකට කන්න දුන්නද නැද්ද අහන්නවත් මතක් වුණේ නැහැ නෙව " 

" ඒවා අපි සියල්ලම වෙලාවට ඉෂ්ට කරලා ඇති " 

රණබා සිනහව පාමින් සීයාට කීවේය . 

ජය ශ්‍රී 
ජය ශ්‍රී 
ජය ශ්‍රී 

සීගිරි ගුහා දොරටුව හරහා මාළිගාවෙන් ඉවතට එන මොහොතේ අවසන් වරට අපට ඇසුනේ සීගිරි මාළිගාව තුල අදටත් ජීවත් වන යක්ෂ සේනාව අප දෙදෙනාට කරන ලද එම ආශිර්වාදයයි . 


ජීවිතයේ මම ලත් වටිනාම අමතක නොවනම මතක සටහන එයයි . කිසිදිනෙක ඉන් පසු මා හට එම ස්වර්ණමය මන්දීරයට පිවිසීමට අවස්ථාවක් ලැබුණේ නැත . එහෙත් තවමත් මාගේ මතකයේ එය නොමැකෙන සේ තැම්පත්ව තිබෙනා මතකයකි . රණබා අපව වලව්වට කැඳවාගෙන ආවේ කෙසේදැයි අප දන්නේ නැත . ඒ අත බලා මේ අත බලනවිට වලව්වේ කඩුල්ල අපට පෙනිණි . මෙය ඇස් බැන්දුමක් දෝ මම සැක කලෙමි . එහෙත් එහි සත්‍යතාවය ඔප්පු කිරීමට චිත්තරාජ දුන් මංජුසාව හූමිටි තැබුවේය . 

" එහෙනම් මාමණ්ඩි . මම ගොහින් එන්නම් " 

" ඔය දරුවට සමන් දෙයිහාමුදුරුවන්ගේ පිහිටයි " 

රණබා අපෙන් සමුගත්තේ නැවතත් ඔහු අප හමුවීමට පැමිණේවිද ? යන ප්‍රශ්නාර්ථය ඉතිරි කරමින්ය . කෙසේ වෙතත් කාමරයේ පෙට්ටගම උඩ තබා තිබෙන රාවණ යුගයේ ජය ශංකය මෙම මතකයන් නැවත නැවතත් ආවර්ජනය කිරීමට විටින් විට මා හට අවස්ථාව සලසා දුන්නේය . 





කොටස් හයක් පුරාවට දිව ආ පුලතිසි කතා මාලාව මෙසේ සමාප්ත කරමි !

ඔබ සැමට සමන් දෙවිඳුගේ පිහිට ලැබේවා !